الثورة المضادة

نقول كمان و كمان و كمان

فيه ثورة ضد نظام قامت , مهما كانت اسبابها و مهما كانت اهدافها , يبقى طبيعى جدا كرد فعل ليها يبقى فيه ثورة مضادة من النظام نفسه لأنقاذ نفسه بكل الطرق الممكنة , 

طبعا اللى بينفذ الثورة المضادة هم اذرع نظام مبارك عسكر و فلول و اخوان و سلفيين بيبدلوا عليك علشان يطلعوا عين اللى جابوك , 

يعني لعبة الثورة المضادة إن حد بيسلم للتاني و يكملوا بعض ، بطريقة أسهل ، مبارك اتنحي ، طنطا...وي قتل و إعتقل في الثوار ، مرسي قتل و إعتقل في الثوار ، برضه السيسي قتل و إعتقل ثوار ، معني كدة ان كلهم مشكلتهم الثوار ، و اللي مشكلته الثوار هو النظام اللي قامت عليه الثورة ، أعتقد كدة اتفهمت . 

نيجي بقي للشعب و دور الشعب سواء في الثورة أو الثورة المضادة . 

الشعب هو الكارت الكسبان فى اى مواجهة , اللى يكسب الشعب فى صفه بيكسب معركة بس مش الحرب لأن الشعب بحالات , مرة يدخل فى غيبوبة و تلاقيه نسى كل حاجة و بقى مع الثورة المضادة , و شوية بعد الأزمات و الجوع يفوق من الغيبوبة دى , 

مرة تحس انه اتغير و بيطالب بحقه و اضرابات و اعتصامات , و مرة تلاقيه ساكت و نديله فرصة و نعصر لمون و الاستقرار و ايد واحدة , 

احنا كسبنا الشعب قبل كدة ما ننكرش , بس كسبناه بعد عذاب و تمن غالى و مواجهات كتير كنا فيها عددنا قليل و من غير الشعب فى صفنا بالعكس كان بيشتم فينا فى اوقات كتير بفعل التغييب الاعلامى , بس فى الآخر قدرنا على مبارك و قدرنا على طنطاوى و قدرنا على مرسى , بس الثورة المضادة برضه مش ساكتة و شغالة و التها الاعلامية رهيبة قدرت لحد دلوقتى انها تحميهم من المحاسبة بس مفيش مشكلة لأن الثورة و الثورة المضادة مواجهاتهم بتبقى موجات ثورية متتالية , 

الثورة المضادة بتلعب دايما على كسب الشعب ضد الثورة و لسه لحد دلوقتى بتلعب على كسب الشعب سواء بالأعلام او الصحافة او بالاشاعات عن اكتشاف علاج او حد ادنى و اقصى او فتح مستشفيات القوات المسلحة , عامة كل دى اسلحة فى ايد الثورة المضادة لكسب الشعب و بتستغلها صح , 

و احنا برضه عايزين نكسب الشعب علشان الشعب هو اللى هايساعدنا فى تحقيق اهداف الثورة , 

الشعب هو الكارت الكسبان و هايفضل الصراع كدة و الشعب من كفة الثورة الى كفة الثورة المضادة , يرجح كفة الثورة شوية و تكسب معركة و يرجح كفة الثورة المضادة شوية و تكسب معركة , و الحرب شغالة و ممكن تستمر سنين طويلة , لحد ما كفة تخلص على التانية و تنتصر و ساعتها هايبقى الشعب معاهالأن مفيش غيرها . 

مش معنى ان الثورة خسرت معركة يبقى خسرت الحرب , و مش معنى ان الثورة المضادة كسبت معركة تبقى كسبت الحرب , دة صراع هايستمر طول ما الثورة المضادة موجودة , ليه طول ما الثورة المضادة موجودة , لسبب بسيط , ان الثورة ليها طريق واحد بس مالوش تانى , الطريق دة هو العدالة الاجتماعية و علشان تحقق العدالة الاجتماعية محتاج اموال و علشان تجيب الاموال يبقى لازم محاكمات و مصادرات , طول ما مفيش محاسبة و لا محاكمات ثورية , موجات الثورة هاتبقى على فترات متقاربة و اجعص رئيس جمهورية هايقعد فى الحكم سنة , لأن الشعب اللى صبر على مبارك 30 سنة ما صبرش على طنطاوى الا سنة و نص , و ما صبرش على مرسى اكتر من سنة , و برضه مش هايصبر و دة مؤكد , 

الصراع بين الثورة و الثورة المضادة , ممكن ياخد سنين طويلة , 

لا لليأس 

لا للاحباط  

مكملين مهما بلغت قسوة الصراع , مكملين علشان حق الناس اللى ماتت .