بيكياااااااااااااااااااااااااااااااااااا
اى حاجة قديمة للبيع
بلد قديمة للبيع
اللى يقدر يسيطر
اللى يدفع اكتر
شعبها
كل ما يطلع من غيبوبة
يدخل فى غيبوبة
شعب خطير
يوم ما يثور يبقى كبير و كتير
و يوم ما يدخل الغيبوبة
يجيبلك شلل بضمير
بس شعب غلبان
يعمل ثورة
و يضحك عليه كل من خان
مرة باسم الدين
و مرة الدين ارهاب
و احنا اللى حاميين
و مرة باسم الامن و الامان
و يطلع من دقن يدخل فى كاب
و تتقفل الابواب
و يبدأ يطلع المنافق و الكداب
و الشعب مضحوك عليه
مرة بالدقن
و مرة بالكاب
و مرة و مرة مرة
و الشعب يلاقى طريقه
و فجأة يدخل فى التوهان
نقول كمان
بيكياااااااااااااااااااااااااااااااااااااا
شعب قديم للبيع
شعب عمره آلاف السنين
بس مسكين
مش لاقى ياكل
و عايشين
حاول يجيب حقه
بس يا خسارة
دايما بتيجى معاه بخسارة
يطلع من نقرة لدحديرة
و الشعب نصه مش فاهم
و الباقى ما بين منافقين و طبالين
و فضائيات
و اللى فاهم منه اتسجن او مات
و اللى راح منه عدى و فات
بس الشعب هلكان و شقيان
و لازم يدخل الغيبوبة
و شبابه يدفعوا التمن
علشان يفوق من الغيبوبة
و البلد يا عينى معطوبة
كل شوية تقع منها طوبة
و طوبة ورا طوبة
ما بقاش فيه حيطان فى البلد
و مات الولد
اجدع ولد
اللى ضحى
علشان يلاقى البلد بلده
و الشعب برضه فى الغيبوبة
رغم دم ولده اللى مات
بيدور على السبوبة
و نعيده من تانى
و زى الاولانى
هانبدأها من تانى
هو يدخل غيبوبته
يدخلها مش علشان عبيط
علشان طيبته
و احنا ندفع تمن العلاج
و حتى لو مات
برضه هاندفع مصاريف الجنازة
و أهو الأم من جوازة لجوازة
و تختم بجنازة
و بيكياااااااااااااااااااااااااااااااااااااااااا
اى حاجة قديمة للبيع
شعب سهل تخدعه
شعب صدق ان العلاج
اريال و صباع كفتة
و مستنى الفرج
و مستنى يتغطى من البرد
لو بحتة بفتة
شعب تعب و استوى من الخداع
شعب 30 سنة ضياع فى ضياع
و بيكياااااااااااااااااااااااااااااااااااااااااااااااااااااااااااااااا
أى حاجة قديمة للبيع
شعب قديم للبيع
بس شعب مالوش تمن
و اوقات بأرخص تمن
شعب فاهم و مش فاهم
شوية حالم
و شوية نايم
عايز يعيش
يساوى كتير انه يعيش
بس حكامه بيقولوا عليه
ما يساويش
شعب قومته زى الطوفان
و نومته غيبوبة
تجيب للعاقل جنان
و نقول كمان
بيكياااااااااااااااااااااااااااااااااااااااااااا
اى حاجة قديمة للبيع
kanoun saksonia
ليست هناك تعليقات:
إرسال تعليق