و قلت تعمل ثورة ،
نط فيها إخوان ،
و قلبت معاك بفلول ،
نطوا في قلب ميدان ،
و انت يا صاحبي تايه ،
بتلف كل مكان ،...
دي ثورتي أنا ،
قلبت هبل و جنان .
و عجبي
عجبي ع اللي يسلم
نفسه لغيره ،
و يغني بعدها ظلموه ،
ما بين طايفة و طايفة ،
فرقوكم ،
و بعد إيد واحدة ،
الأخ باع أخوه ،
و في الآخر أخدتوا المقلب .
ايوة
كلكم خدتوه ،
بس نقول إيه ،
في راكب دماغه ،
لا اتعلم من ماضيه ،
و لا إخواته حتي شافوه .
و عجبي
عجبي علي إللي نزل
علشان حق الفقير ،
وعده يجيبله حقه ،
و خلاه يحلم كتير ،
ضحي بنفسه و حياته ،
و اخواته ضيعوه ،
العيب مش فينا يا صاحبي ،
دة لسه فيه أعاصير .
و عجبي
عجبي ع اللي بيجري
ع التورته جري وحوش ،
قال إيه عايز يقسمها ،
و أصلا كله فشوش ،
خدها الأول يا صاحبي ،
و قسم براحتك بعدين ،
من كتر تقسيمها راحت ،
و طعمها دة ما شفتوش .
و عجبي
عجبي علي إللي بيبلع ،
كل مرة نفس الطعم ،
و يقع في نفس المصيدة ،
و نفس الوهم ،
يا صاحبي دي لعبة كبيرة ،
و دخلنا فيها كلنا ،
دخلنا بحلم ،
و لسه زي ما هواه حلم .
و عجبي
عجبي
ليست هناك تعليقات:
إرسال تعليق