طبيعة شعب

بعد ظهور جمال مبارك و اسرته بكل بجاحة فى الاهرامات ، بجد حاجة تحرق الدم بس اقولكم حاجة

احنا شعب اللى اختشوا ماتوا و اللى قلعوا برقع الحياء عاشوا

احنا شعب تمشى جنب الحيط ، بس نسيوا يقولوا ان حتى الحيط ممكن تقع عليك تجيب أجلك

احنا شعب يا بخت مين بات مظلوم و لا باتش ظالم ، بنفرح اننا نبات مظلومين اصل الظلم وحش

احنا شعب ان كانلك عند الكلب حاجة قوله يا سيدى ، و اهو الكلب ركب و دلدل رجليه و مفيش مفيش هاتاكلوا مصر يعنى ، و الشعب الاهبل على امل الفتات بيقوله يا سيدى

احنا شعب العين بصيرة و الايد قصيرة ، احلى حجة نهرب بيها ، دة بدل ما نشوف حقوقنا و ناخدها

احنا شعب على قد لحافك مد رجليك ، ما عندناش امل اللحاف يكبر و الامور تتحسن

احنا شعب القناعة كنز لا يفنى ، بنموت م الجوع و السرطان و المواصلات و الرصاص و الاعتقال بس قناعة ، شعب قنوع بطبعه

احنا شعب القرش الابيض ينفع فى اليوم الاسود ، يعنى عارفين ان الاسود جاى جاى و مستنيينه و عاملين حسابنا ، دة بدل ما نحاربه

احنا شعب الجنيه غلب الكارنيه ، يعنى العلام مالوش لازمة ، المهم الجنيه ييجى ، ييجى ازاى مش مشكلة

احنا شعب اللى يتجوز امى اقوله يا عمى ، شعب مسالم او عبيط ، و الام كل جوازاتها زفت و العم بينهب فيها و احنا برضه بنقوله يا عمى

احنا شعب ساب فى القرآن فرعون و هامان و ظلمهم ، ساب القضاء الظالم اللى حكم على سيدنا يوسف ، ساب كلمة فأستخف قومه فأطاعوه ، و شبطان فى كلمة خير اجناد الأرض ، لحد ما خير اجناد الارض بقوا فوق الشعب و داسوا عليه

احنا شعب اللى تعرفه احسن من اللى ما تعرفوش ، تغيير ايه ، بنرضى بأى حد نعرفه حتى لو ظالم و نخاف من اللى ما نعرفوش حتى لو عادل

احنا شعب العيار اللى ما يصيبش يدوش ، و العيار عمره ما صاب و دايما بيدوش بس احنا راضيين بالدوشة و اتعودنا عليها

احنا شعب الحى ابقى من الميت ، و اللى مات بيتنسى و مش مهم مات ليه ، حتى لو مات علشانك و علشان حقك

و على رأى الخال الله يرحمه احنا ولاد الكلب الشعب .