رسالة العسكر لشعب مصر

الرسالة اللى وجهها العسكر بخروج محمد سلطان من السجن فى مقابل تنازله عن الجنسية المصرية و قبلها صحفيى الجزيرة برضه فى مقابل التنازل عن الجنسية المصرية ، و طبعا غير ناس كتير سابت البلد هربا من جحيم العسكر ،
الرسالة دى غيرت المعادلة كلها و بقت المعادلة

لتبقى حر
لتبقى مصرى
و اختار ما بين الاتنين
عايز تبقى حر اتنازل عن انك تبقى مصرى ، و عايز تبقى مصرى استحمل القتل و الاعتقال و ما تفكرش فى الحرية
رسالة العسكر لشعب مصر ، لتبقى حر لتبقى مصرى
لسه الجاى احلى .

انت ماشى حافى ليه

عارفين حالنا دلوقتى ، زمان كان فيه نكتة القرد كل ما يعدى و يشوفه النمر يقوله انت ماشى حافى ليه و يفضل يضرب فيه ، القرد زهق راح للأسد بيقوله النمر كل ما يشوفنى يضربنى  ، الاسد قاله خليك ذكى و شوفه عايز منك ايه ، القرد راح للنمر و قاله انا تحت امرك انت عايز منى ايه ، النمر مش عايز حاجة ، هو عايز يضرب القرد بس علشان يدارى على نفسه قاله انا عايز تفاحة ، راح القرد طالع على الشجرة و جابله تفاحة صفراء ، النمر قاله انا كنت عايزها حمراء و نزل ضرب فيه ، القرد رجع للأسد قاله النمر مش عاجبه حاجة و عملت زى ما قلتلى و برضه ضربنى ، الاسد قال للقرد خليك ذكى ، اصل انا ما اقدرش على النمر ، قالك عايز تفاحة هاتله واحدة حمراء و واحدة صفراء ، القرد عمل زى ما الاسد قال بالضبط ، رجع للنمر و قاله عايز ايه ، النمر قال عايز تفاحة ، القرد راح و جابله واحدة حمراء و واحدة صفراء ، النمر بصله اوى و قام قايل بس انت ماشى حافى ليه و نزل فيه ضرب .
مشكلة القرد انه مش فاهم او نقول القوى الثورية ان المشكلة مش لون التفاحة او المشكلة مش هايتضرب ليه ، هايتضرب و خلاص ، و سواء الاسد او النمر ، عسكر و اخوان ، دة هايسكت عن اللى بيعمله دة ، تفتكروا النمر مش عارف ان القرد هايشتكى للأسد ، عارف بس بيتصرف برضه ، و تفتكروا الاسد خايف من النمر ، لأ طبعا بس محتاج النمر و عايزه يضرب القرد طالما دة فى مصلحته ان القرد يلجأ ليه ساعة ما يتضرب من النمر .
حد فهم حاجة ؟
مش مهم

مش عايز مين فيهم

لو مش عايز السيسى تبقى اخوان
و لو مش عايز مرسي تبقى انقلابى
و لو مش عايز الاتنين تبقى كافر فى نظر الاخوان و خاين و عميل فى نظر مؤيدى السيسى .

طيب و لو عايز السيسى ، تبقى مواطن شريف خايف على البلد و مؤمن ان مستوى المعيشة فى عهد السيسى اعلى من مستوى معيشة المريخيين فى كوكب زحل

و لو عايز مرسي ، تبقى مسلم و هاتموت شهيد و هاتدخل الجنة و بتحافظ على الشرعية و بتدافع عن الاسلام و عن شرع الله

طيب و لو عصرت لمون و انتخبت مرسي و مضيت على تمرد و فوضت السيسى ، تبقى حمار باربع رجلين و ديل .

تركيا و الاكراد و داعش

الاعلام المصرى مركز اوى مع اردوغان و داعش ، على فكرة رفض اردوغان لضرب داعش دة منطقى جدا ، طبعا لأن ماحدش فاهم حاجة ، اردوغان ما ينفعش تركيا تبقى فى حلف الاطلنطى او الناتو و تمول داعش بالسلاح و الا هايطردوها من الحلف ، بس ليه بقى تركيا رافضة ضرب داعش ،
اردوغان مصلحته او مصلحة تركيا ان الاكراد ما يستقلوش ، لأن لو استقلوا اكراد اكراد سوريا و العراق ، اكراد تركيا هايطالبوا بالاستقلال و انشاء دولة كردية  ، طبيعى يبقى مع الشيطان ضد الاكراد ، خصوصا ان دولة كردية موالية لاسرائيل جنوب تركيا هاتبقى كارثة كبيرة ، و دة طبعا لأن معروف ان الاكراد بيكرهوا العرب و مواليين لاسرائيل ، يبقى طبيعى ان تركيا تبقى ضد الاكراد و القضاء على داعش دة فى مصلحة الاكراد .

دقة زار

هو بالضبط كدة
البلد عليها عفريت راكبها و مش راضى يطلع ، و كل ما نيجى نطلعه ، يقول مش طالع ، جه الريس شمهورش و قال فوضونى و نعمل زار و نطلع العفريت و نخلص من العفاريت اللى تبعه ، الناس ما صدقت العفريت خلاص طالع ، راحوا فوضوا الريس شمهورش يطلع العفريت ، و الريس شمهورش قال انا مش عايز حاجة ، هاطلع العفريت و امشى ، و على دقة زار ، اللى مسك دف و اللى مسك طبلة و اللى بيضرب فيها علشان العفريت يطلع ، و الصاجات و رقص و بخور و كله فى الدخان ماحدش شايف التانى و لا حد شايفها ، و كله بيلف حوالين منقد البخور و الدخان كتير و الصوت عالى و زحمة و ناس كتير فى الزار ، و ناس تقع و يدوسوا عليها و ناس تموت و يدوسوا عليها و الناس بتلف فى الصوت الهالى فاقدة الوعى بأى حاجة ، و فجأة وقعت على الارض قاطعة النفس
و اخيرا طلع العفريت و قام ناطط راكبها الريس شمهورش و قال انا اولى بيها من غيرى دى بتاعتى انا .
بس الحمد لله طلعنا العفريت

واحد رخم هيسألنى ، يعنى هى دلوقتى مش راكبها عفريت ؟

سؤال وجيه
لأ طبعا مش راكبها عفريت الحمد لله 

امال مش على بعضها و مش عارفها راسها من رجليها كدة ليه ؟

هههههههههه راكبها مارد بعيد عنك

و بخروووووووووووها

معقولة تانى مرسي و شفيق

الناس اللى صدقت ان صوت البرادعى هو اللى فى التسريب مع البغل ابو حمالات ، عندى سؤال للبقر بس ،
ليه التسريب ما طلعش الا اما البرادعى اعترف بأن السيسى مسئول عن الدماء اللى حصلت من ٧/٣ لحد دلوقتى ؟
اشمعنى يعنى فى الوقت دة ؟ الأهم بقى البرادعى بيكتب من امتى و كان فين ابو حمالات ؟
و حد سمع صوت البرادعى فى اى خطاب قاله ؟ دة لو عيل صغير سمعتوه التسريب هايقول دة مش صوت البرادعى على فكره و واضح جدا ان حد بيقلده او من هبلهم فى تركيب الصوت ، الصوت مختلف تماما فى الامتدادات بتاعته ، عامة الوحيد اللى اثبت انه مش طمعان فى حاجة هو البرادعى ، و طبعا كراهية العسكر و الاخوان ليه بيثبت ان الراجل دة على حق ،
بس الاى محيرنى الاخوان دلوقتى ، ثقتهم و تحركاتهم الدولية بتقول كتير ، و الانهيار السريع للسيسى برضه بيقول كتير ، تفتكروا ان الاختيار القادم هايبقى برضه مرسي و شفيق ، و تفتكروا الجاى مرسي و لا شفيق ؟
هاتنتخب مين فى انتخابات الرئاسة الجاية يا واد يا مزيكا

بديل تالت

نقول كمان معروف ان على الأرض مفيش غير عسكر و اخوان ، و الفلول مع مصلحتهم بس و ما يفرقش معاهم ، دة امر واقع ، الاتنين بيكملوا بعض ، و وجودهم بيعتمد على بعض ، العسكر مش هايحكم من غير فزاعة ، و الاخوان برضه عايزين فزاعة ، لو راجعنا السنين اللى فاتت ، هاتلاقى بين الاتنين نقط تلاقى كتير ، راجع دستور مرسي هاتلاقى الجيش فيه دولة فوق الدولة ، و راجع دلوقتى هاتلاقى الاخوان دورهم فى تثبيت حكم السيسى واضح رغم ان على الأرض ماعملوش اى نتيجة ايجابية او رجعوا مرسي او او او ، بس مساعدتهم بأنهم بيشتتوا القوى الثورية و يقسموها ، دول عايزين يتحدوا معاهم و دول لأ ، مقسومة اتنين ، المهم ان القوى الثورية اتضحك عليها من العسكر و الاخوان ، و اتركبوا منهم ، و اللعبة كلها لأن مصلحة العسكر و الاخوان واحدة الاتنين بيفرقوا القوى الثورية و يشتتوها ، ايه هى القوى الثورية ، ابريلى على حمدينى على برادعاوى على اشتراكى على مش تابع لحد اصلا و رص غير كل دة كتير اوى ، عدد لت يستهان بيه على فكرة ، لو اتحدوا هايبقوا قوة تالتة غير العسكر و الاخوان ، و الموضوع مش اتحاد بس ، الناس جربت الاخوان و جربت العسكر و سهل يقبلوا بديل تالت ، لو اتحدوا و اختاروا واحد و التفوا حواليه كلهم و يكون واحد من الصفوف الخلفية اللى بعيد عن الاضواء و يلتفوا حواليه و يساندوه ، و يبقى بديل تالت ، الثورة مش هاتحكم الا اما تبقى بديل تالت للناس ، مش ثورة و بعدها مش عارفين نعمل ايه ، دايما السؤال ايه البديل ، طيب ما ايام السيسى معدودة ، يبقى الحل الوحيد تجهيز البديل ، بدل ما نفضل ننضم للاخوان شوية زى ما عصرنا لمون و ننضم للعسكر شوية زى تمرد ، لحد امتى ، طول ما مفيش بديل تالت على الارض كل القوى الثورية ملتفة حواليه و سانداه و القوى الثورية عددها مش قليل ، يبقى الثورة هاتفضل كدة بتلف فى دايرة مفرغة شوية مع دة و شوية مع دة ، لحد ما دة و دة ينفذوا هدفهم و يقضوا على الثورة تماما لأن من مصلحتهم الاتنين القضاء عليها و بعدها هايبدلوا مع بعض مساومات و صفقات .

الاتنين واحد

السيساوى بيشتم الكل و اى معارض يبقى اخوانى و الاخوانى بيجيب القطط الفطسانة فى اى حد مش معاه و اللى مش معاه ضده و الاتنين مش فارق معاهم غير الكرسي دة عايز السيسى و دة عايز  مرسي ، و لو جه احتلال يحافظ ليهم على الكرسي الاتنين اتحدى يرفضوا ، الاتنين هايبرروا الاحتلال الاخوانى هايقول الاحتلال ضد الانقلاب ، و السيساوى هايقول علشان نحارب الارهاب ، دة فى بلد و دة فى بلد و الضحية شعب لا ليه فى انقلاب و لا عايز ارهاب و مش فاهم حاجة و الاتنين بيضحكوا عليه دة بالوطنية و دة بالدين  .

الجيش و الدستور

معروف ان اقوى شخص فى الجيش هو رئيس الاركان ، لأنه بيسيطر على القوات البرية ، اللى هى تعتبر ٧٥٪ من اى جيش ، و معروف ان رئيس الاركان بيعينه رئيس الجمهورية مش وزير الدفاع ، نرجع كدة لثورة يناير ، كان سامى عنان فى امريكا لحد يوم ٢٩ يناير الل. هو اليوم اللى نزل فيه الجيش ، رغم ان طنطاوى كان فى مصر ، بس الجيش ما نزلش لا بأوامر الرئيس و لا وزير الدفاع ، لازم رئيس الأركان اللى كان ساعتها سامى عنان ، العقلية العسكرية اتبنت على السمع و الطاعة و التزمت فى مصدر الأوامر ، يعنى بتابعية اسلحة المشاة و الاشارة و المدرعات و المدفعية لرئيس الأركان يبقى الأوامر من رئيس الاركان فقط لا غير اللى استغربت ليه فى دستور السيسى سيبك من عنه عين محمود حجازى رئيس اركان نسيبه يعنى و ضامن ولاءه ليه ، رغم انى مقتنع ان تعارض المصالح مافيهوش ولاء لشخص مهما كان ، بس ليه حصن وزير الدفاع ٨ سنين خارج سلطة الرئيس ، يعنى الرئيس ما يقدرش يشيله ، رغم ان وزير الدفاع بيسيطر على اقل من ٢٥٪ من الجيش اللى هى القوات البحرية و الجوية و الدفاع الجوى الا اذا كان وزير الدفاع هو الرئيس الجاى و لسه ليه دور هايقوم بيه .

التجارة

عسكر و اخوان و رجال اعمال ضد شعب غلبان معظمه مضحوك عليه ، و متقسم عليهم ، و كلهم تبع مصلحتهم بس ، المصيبة الكبيرة ان الناس مش فاهمة ان التجارة بالوطنية زى ما بيعمل العسكر هى نفسها التجارة بالدين زى ما بيعمل الاخوان هى نفسها التجارة بقوت الفقير زى ما بيعمل فلول مبارك و رجال الاعمال ، و اللى فاهمين كدة ما يزيدوش عن ٢٪ من الشعب ، لسه كتير اوى على ما نخرج من الدايرة دى .

و كله مقضيها فى الغابة

لو جينا دلوقتى و حاولنا نشوف الصورة كلها هانلاقى الشعب فى الغابة اتقسم تقسيمة غريبة اوى ، و بقى خمس انواع

اول نوع الخرفان الربعاوية و دول متبرمجين برمجة كاملة ، الواحد منهم تلاقيه عايز الشرعية و عايز مرسى يرجع ، و عنده استعداد يعمل اى حاجة ، مش فارق معاه البلد و لا فارق معاه تولع او ما تولعش ، لو امريكا تحتل مصر و ترجع مرسي هايوافق مش هايقول لأ ، متبرمج و مصمم ان مرسي راجع

تانى نوع عندنا الكلاب السيساوية ، و دول بقى ما بيفهوش ، الواحد منهم استأصلوا مخه بالاعلام و حطوا مكانه بطاطس مهروسة ، تفهم فيه ما بيفهمش ، و اما يتزنق يتعصب ، شايف كل حاجة غلط بس كل حاجة ليها عنده تبرير و سبب ، شغلته انه يبرر بس ، عنده انجازات فى دماغه ماحدش شايفها غيره ، متأكد انه صح و ان السيسى عالج الايدز بالكفتة و حفر على الناشف ، عنده استعداد يصدق اى حاجة و يهز ديله من الفرحة

تالت نوع الافيال الكنباوية ، و دول مش فارق معاهم طالما بياكلوا و يشربوا البلد تولع ، مرسي السيسى مبارك مش مهم ، حركتهم صعبة جدا و الواحد منهم ما يتحركش الا بكارثة تحصل ، الفيل الكنباوى تخصص استفتاءات و انتخابات و دايما اختياراته تزدى فى ٦٠ داهية ، تقوله قول لأ ، يقولك هاقول نعم علشان البلد تستقر ، يعشق الخوازيق و يموت فى انه يختار غلط و يندم ، يعشق الاستقرار و عجلة الانتاج ، يؤمن بأحلام اليقظة و الوعود الكاذبة

رابع نوع الذئاب البشرية العسكرية الفلولية و دول برضه متبرمجين ، الواحد منهم متبرمج على السرقة و القتل و النهب و النصب ، دول اللى اغتصبوا البلد ، كل واحد عارف دوره بالضبط ، انت تسرق و انت تقتل و انت تحبس ، كله عضو فى عصابة واحدة ، و طبعا يتركزون فى الجهات السيادية ، الحكومة و الداخلية و الجيش و القضاء و ضيف عليهم اعلام و رجال الاعمال

خامس نوع فى الغابة الحمير الثورجية  ، النوع دة بقى اللى مش موافق على حاجة ، و شايف ام البلد رايحة فى داهية و مش فى ايده حاجة ، اتقتل و اتحبس و اتصاب و برضه عنده أمل ، بس مشكلته ان دايما بيتضحك عليه ، و دايما بيتركب ، مرة الجيش و الشعب ايد واحدة و مرة يعصر لمون و مرة نديله فرصة و مرة تمرد و المصيبة فيه انه ما بيتعلمش من اخطاءه و برضه بيتضحك عليه و خارج الحسابات تماما ، خد خوازيق كتير و رغم كدة نفس المقلب بياخده ، و لأن السلطة عارفة انه ما بيتعلمش ما غيرتش اسلوبها و بياخد الخازوق بنفس الاسلوب و الطريقة ، تمرد نجحت ، نعمل تمرد جديدة ، عصروا لمون ، السيسى بقى رئيس مدنى و هو اللى انقذ البلد ، نفس الطريقة و برضه ما اتعلمش حاجة من كل اللى حصل

الكارثة ان الغابة رايحة فى داهية و كله هايدفع التمن ، بس من الآخر لا الربعاوى هايفكر و لا السيساوى هايفهم و لا الكنباوى هايتحرك و لا الذئاب العسكرية الفلولية هاترحم حد و لا الثورجى هايتعلم
علشان دة يحصل عايزين معجزة .

عزبة ابوك

من حقك
دى عزبة ابوك
عايز تطردنا منها
عايز تبعدنا عنها
و تبقى ملكك انت
و ملك اللى خلفوك
من حقك
ماهى عزبة ابوك
قسم فيها براحتك
شوف مين معاه مصلحتك
بيعها او اشتريها
اصلها بلد اللى جابوك
من حقك
دى عزبة ابوك
زود قضاء و شرطة
حط الشعب فى ورطة
ارفع عليه الاسعار
خلى حياته مرار
اصل كل الحكاية
تطحنه يزودوك
من حقك
دى عزبة ابوك
اعلام عمال يطبل
و فضائيات تهبل
و يقولوا شجيع السيما
عمالين ينفخوك
من حقك
دى عزبة ابوك
عمال تبنى فى سجون
و تقتل قتل جنون
و مفيش و لا اى خطة
بس بيشجعوك
من حقك
اصلها عزبة ابوك
معاك داخلية و جيش
و قضاء ما بيخليش
و اسأل تقوللى مفيش
و تحبس اللى يكدبوك
من حقك
اصلها عزبة ابوك
بتنهب فى التكية
و تبيع فى الوسية
اصلك طالع مسهوك
تتكلم مية مية
و تضحك ع الزبون
مرعوب لو يخلعوك
من حقك
اصلها عزبة ابوك

ربط شوية حاجات

نشوف كدة الايام اللى فاتت حصل ايه
اعتراف البرادعى
تشويه مؤيدى السيسى و الاخوان للبرادعى و مهاجمته
ظهور حركة بداية و تشابهها المطلق من حركة تمرد و ظهورها فى الاعلام ، لاحظوا مواقف الاعلام من معرضى السيسى
دعوات ٦ ابريل و آخرتها و بدء انتشارها و الدعوة لمظاهرات بالتزامن مع ظهور حركة بداية
الاهم بقى من كل دة حملة انا الرئيس و شفيق و عودته للمشهد السياسى
سيبكم انتم لا يلدغ المؤمن من جحر مرتين بس المصريين مرتين و تلاتة و اربعة عادى .

يعنى ايه حرب اهلية

قرأت مقال عن الحرب الأهلية هاحاول ابسطه شوية
ببساطة و بكل سهولة يعنى ايه حرب اهلية ؟ يعنى ناس من نفس البلد بيقتلوا فى بعض و بيحاربوا بعض ، مع اختلاف المسميات انصار بيت المقدس ، اخوان ، داخلية ، اجناد مصر ، جيش ، كلهم ناس من بلد واحدة و بيحاربوا و يقتلوا بعض ، الجيش و الداخلية من ثورة ٢٥ يناير حتى الآن قتلوا اكتر من ٥٠٠٠ قتيل ، و الجانب المضاد سواء بسلاح او بتفجيرات او او او او قتلوا اكتر من ٥٠٠ قتيل ، التعريف المعترف بيه للحرب الاهلية ١٠٠٠ قتيل من الجانبين على ان يكون على الأقل ١٠٠ قتيل من كل جانب ، و اللى مش واخدين بالنا منه اننا عدينا الرقم دة بمراحل ، و اذا كانت دلوقتى تحت السطح و مشاكل الحياة متوهاها و مش مقتنعين ، اسألوا عن السلاح فى الصعيد و كمية الاسلحة اللى دخلت مصر فى ال٣ سنين اللى فاتوا ، و سيناء و السلاح اللى فيها اللى خلى القبائل تحارب انصار بيت المقدس ، اعتقد ساعة الجد كل دة هايطلع و يبقى على عينك يا تاجر ، ماهو اللى مع النظام سيساوى ، و اللى ضده ارهابى ، قولتولى يعنى ايه حرب اهلية ؟

بلا عودة

الخلاصة ان احنا دخلنا خلاص ، و ما فيهاش رجوع ، عملت ثورة ضد العسكر او ما عملتش نهايتك معروفة ، هاتموت ، هاتموت م الجوع ، هاتموت فى السجن ، هاتموت مقتول ، هاتنتحر علشان مش قادر تأكل عيالك ، فى قطر ، فى عربية ، فى مستشفى ، فى مظاهرة ، هاتموت ، غير كدة الداخلية ركبت و اقل مجند فى الداخلية هايديك بالجزمة و لو نطقت هاتبقى ارهابى و اخوان و تلبس قضية محترمة و تاخد حكم بالاعدام ، خايف ، مرعوب ، انت حر ، دى حاجة ترجعلك ، بس النهاية واحدة مش هاتفرق كتير ، الفرق الوحيد تموت بكرامتك و انت بتدافع عن حقك و لا لأ ، الفرق الوحيد تموت علشان انت راجل و لا تموت زى الارانب فى البيت ، النهاية واحدة مش هاتفرق كتير ، ثوروا او موتوا .

كل دى عصافير

كل دى عصافير

القضاء الادارى يقر باعادة المحاكمة لمتهمى عرب شركس يوم ٢ يونيو القادم  ، قوم ايه الناس تم تنفيذ حكم الاعدام فيهم اصلا بتصديق من الرئيس واخدين بالكم من الرئيس ، عندنا رئيس و كمان بيصدق على احكام اعدام ما علينا ،

قوم ايه اكتشفنا ان وكلاء النيابه الثلاثه بالسائق يتم اغتيالهم بعد ما سابتهم عربية التامين قبل ان يوصلوا للمحكمه بدقايق ، الاعلام بقى شغال الله ينور عمال يودينا فى طريق ثانى خالص حورات اسلام البحيرى والازهر و الادارية رفضت وقف برنامج اسلام البحيرى ، مشكلة الناشط سعد الصغير مع مراته الراقصة شمس ، و الفدائية سما المصرى و المؤدب مرتضى منصور اتصالحوا اخيرا ، تصريحات وزير التربيه والتعليم ومحلب وتوفيق عكاشه و مية مصر احسن من مية امريكا ، و امك فى العش و لا طارت ،  

حرب الملوك

بقلم نبيه البرجى هي حرب الملوك. من يحطم تاج من.. من يحطم رأس من!! شلدون ادلسون، الملياردير اليهودي الذي يتماهى عاطفياً، واستراتيجياً، مع بنيامين نتنياهو، يقول «دعوا ذئاب الشرق الاوسط تأكل بعضها البعض»، لماذا لم يقل «دعوا آلهة الشرق الاوسط تأكل بعضها البعض؟» اذاً، هي حرب الآلهة ام حرب الملوك؟ مفكر عربي كبير، ومشع، سألني «في ضوء كل تلك الفتاوى، والشطط الفقهي، وفي ضوء كل تلك الحروب، هل ما زلت تعتقد انه لا يزال هناك إله واحد للمسلمين؟» نكتفي بالسؤال.. ثمة من قال لنا انه عام التسويات، معتبراً أن هذا الذي نراه امامنا، وحيث العمليات العسكرية تأخذ ذلك الايقاع الهيستيري، ليس اكثر من محاولة لتكديس الاوراق على الطاولة. هذه، قطعاً، ليست مؤشرات صفقة، الجميع لا يعلمون الى أين يذهبون. حالياً، نحن في وسط.. جهنم. الجميع يتكئون على الله ويطلبون العون من الشيطان! منذ حوالى عامين، قال لي احد الوزراء «قرأت مقالتك وانا في الطائرة، واستغربت لماذا انت متشائم الى هذا الحد، كما لو اننا نقترب من خراب الدنيا». قبل يومين اتصل بي ليقول لي «انه حقاً.. خراب الدنيا». زميل سعودي قال لي «لا تتصور ان الملك سلمان بن عبد العزيز يمكن ان يتراجع، وانت الذي تعلم ماذا يعني قيام سلطة مناهضة للمملكة في اليمن». اضاف «نعلم اننا في عنق الزجاجة، ولكن الا تعتقد ان الايرانيين في قعر الزجاجة؟ ماذا يمكن ان يقدموا للحوثيين سوى الكلام وسوى الفستق الحلبي الا اذا كنت تطن انهم ملأوا الصناديق التي على الباخرة بالكافيار»؟ «لم تعد السعودية تثق بأميركا. قد نكون قد اكتشفنا ذلك بعد فوات الاوان، ولا ريب ان الذين طالما مدننا لهم يد العون وفي ظروف حالكة، خذلونا، هذه مشكلة، لكن القرار هو استعادة اليمن، حتى ولو استغرقت الحرب عشر سنوات او عشرين سنة». يقول هذا الزميل السعودي ليتابع: «لا حدود مشتركة بين السعودية وايران والا لكانت تصفية الحسابات أخذت منحى آخر. هناك اكثر من مسرح للصراع. لاحظ كيف يتقهقر الايرانيون وحلفاؤهم في سوريا. بعد ادلب جسر الشغور، وبعد المسطومة اريحا. حلب لن تبقى في يد النظام. ما المانع هنا ان نتعاون مع الاتراك؟» قرار الرياض «لن نتراجع لا في اليمن ولا في سوريا، ولن نفاوض لا على اليمن ولا على سوريا. لا حل سوى بأن يعود الايرانيون الى الهضبة التي انطلق منها الفرس الاخمينيون منذ اكثر من الفي عام، وانطلق منها حديثا الفرس الخمينيون او الخامينيئيون. الزميل السعودي يؤكد انه «منذ الان وحتى 30 حزيران ستتبدل أشياء كثيرة على الارض. اذا استطاع آيات الله توقيع الاتفاق النووي مع واشنطن، وكذلك الملاحق المتعلقة ببعض ملفات المنطقة، فلن يجدوا مكاناً يقفون عليه لا في اليمن ولا في سوريا ولا حتى في العراق». لا يستطيع الزميل السعودي الا ان يتحدث هكذا ويفكر هكذا. بعد شهرين من الغارات الهائلة ماذا تحقق على الارض، حتى ان مؤتمر الرياض الذي قال بدولة اتحادية، راح يبحث عن مكان يحط فيه عبد ربه منصور هادي الذي يختزل بشخصيته الباهتة، الشرعية في اليمن. رجاء ابحثوا عن رجل آخر يتمتع بمواصفات الحد الأدنى للاضطلاع بذلك الدور... الباحث الاستراتيجي الاميركي انطوني كوردسمان ينصحنا بـ«ان نضع عظامنا في الثلاجة بدل المقبرة»، ليلاحظ ان كل الصراعات التي تحدث الآن في المنطقة انما تعمل لمصلحة ابي بكر البغدادي الذي بات تأثيره (الايديولوجي) في العالم الاسلامي أشد بكثير من تأثير السعوديين والايرانيين على السواء... لكن الرياض التي تتعامل مع انقرة لتعزيز «جبهة النصرة» وتفعيلها، واثقة من انها ستضيّق الخناق اكثر فاكثر على النظام في سوريا بالرغم من صدمة القلمون، كما انها واثقة من ان القنابل الذكية دمرت 70 في المئة من مخازن السلاح والذخيرة في اليمن، وهي بانتظار من يرفع الرايات البيضاء... في الافق، الافق العربي بوجه خاص، لا شيء سوى... الرايات السوداء! ملاحظة: من اطرف ما يتردد في احدى العواصم العربية ان النظام في سوريا تعمد تكتيكيا الانسحاب من تدمر أمام «داعش» ليستدرج القوى الدولية الكبرى لتغيير موقفها منه والتعاطف معه. مجرد ملاحظة...

تولع زى غيرها

كل الدول اللى فيها حروب داخلية سواء العراق او سوريا او ليبيا او اليمن او لبنان حتى الدخول على السعودية و ضرب نجران و تفجير المسجد قبلية مابين سنة و شيعة ، و دى كانت اللعبة بالاتفاق مع ايران من البداية ، و جت قلبت لمحور سنى بقيادة تركيا و محور شيعى بقيادة ايران ، الا مصر مشكلتهم مع مصر ان مافيهاش شيعة كتير و ايران مالهاش نفوذ فيها يبقى نعمل ايه ، نقلبها شعب و ارهابيين ، او شعب و اخوان و اى معارض نقول عليه اخوان  ، و احكام اعدامات و قتل و اعتقال و حرق و تفجيرات و  نمهد الشعب للعنف اللى جاى و يبقى العنف بالنسبة ليه شئ عادى و القتل شئ عادى بيحصل كل يوم  ، و فى ساعة الصفر بعد التسخين نسيب الاتنين يمسكوا فى بعض و تولع زى غيرها .

عسكر و اخوان ، وجهين لعملة واحدة

على فكرة ما ننكرش ان مفيش فى مصر غير قوتين واضحين بيتصارعوا على السلطة و لو انكرنا كدة يبقى بنضحك على نفسنا ، طبعا مع الاختلاف الظاهر بين العسكر و الاخوان الا انهم متشابهين فى حاجات كتير اوى ، طبعا الحاجات دى بتخلى الاتنين وجهين لعملة واحدة ،

الاتنين سواء اخوان او عسكر بيتبعوا سياسة الاقصاء ، يعنى المناصب تتوزع حسب الولاء مش حسب الكفاءة يعنى تعيين ضباط الجيش فى كل مفاصل الدولة و يعنى برضه اخونة الدولة

الاتنين بيلعبوا على السيطرة على الشعب بالعاطفة مش الانجازات العسكر بيتاجر بالوطنية و اللى ضدى يبقى ضد الجيش و خاين و عميل و الاخوان بيتاجروا بالدين و قال الله و قال الرسول و اللى ضدنا يبقى ضد شرع الله و كافر

الاتنين ماشيين بمبدأ اطاعة الاوامر طبعا التربية العسكرية اتبنت على اطاعة اوامر القادة بدون مناقشة و الا تتحول لمحاكمة عسكرية ، دة اى جيش كدة و طبعا الاخوان طوروها و بقت اهم مبادئ الجماعة السمع و الطاعة ، و اطاعة اوامر مرشد الجماعة و مكتب الارشاد و طبعا عدم اطاعة الاوامر يساوى الفصل من الجماعة

الاتنين بيعتمدوا على الاعلام و ضرب اعداءهم تحت الحزام و تخويش و تشويه معارضيهم و ترويج الاشاعات ، طبعا عايز تفهم النقطة دى سيبك من مهاجمتهم لبعض و تخوينهم و تشويههم لبعض ، لأ شوف موقف الاتنين من ٦ ابريل و البرادعى مثلا ، هاتلاقى الاتنين بيهاجموهم ، زى ما العسكر شوههم بآلته الاعلامية الجبارة ، الاخوان شوهوهم ، و الكارثة ان الاخوان و العسكر فى صراعهم ، قالوا نفس الكلام عن اللى مش اخوان و مش عسكر ، لأن لو انت مش اخوان و مش عسكر، مؤيد السيسى هايقول عليك اخوان و مؤيد مرسي هايقول انك بتأيد السيسى

الاتنين بيعتمدوا على نظرية التخوين ، اللى ضدهم يبقى عايز يسقط الدولة ، يبقى بيخرب ، يبقى هو السبب فى توقف عجلة الاقتصاد ، يبقى خاين يعنى بالنسبة للاخوان كل اللى مضى على تمرد و نزل فى ٣٠ يونيو خاين و فلول و مسيحى و و و و و بالنسبة للعسكر كل اللى ضد السيسى ارهابى اخوانى ، عايز يقتل و عايز يخرب البلد

الاتنين بيعتمدوا على القوة و القتل فى قمع المعارضة طبعا مع الاخوان ما ننساش الاتحادية و المقطم و محمد محمود ٣ و غيره و غيره و برضه ما ننساش مع العسكر العباسية و رابعة و ماسبيرو و مجلس الوزراء و محمد محمود ١ و ٢ و النهضة و مسرح البالون و المنصة و الحرس الجمهورى

الاتنين لو متفقين يبرروا لبعض و يحموا بعض ، طبعا تبريرات الاخوان لاحداث محمد محمود و يا مشير انت الامير و احداث بورسعيد و غيره و طبعا فى نفس الوقت دة تبرير العسكر للاخوان ان فيه مجلس شعب منتخب و الداخلية ما ضربتش خرطوش و ترامادول و ٢٠٠ جنيه ، ضامن ان مجلس الشعب مش هايدينه و معترف بيه .

الاتنين بيضربوا فى الضهر و دة واضح جدا لو اخدناها كمثال اللى عمله مرسي مع طنطاوى و عنان و اقالتهم رغم انهم سلموه السلطة و البلد نفس اللى عمله السيسى مع مرسي و عزله رغم ان مرسي هو اللى عمله وزير دفاع .

الاتنين عندهم الغاية تبرر الوسيلة و الوصول للكرسي بأى طريقة و صفقات الغرف المغلقة طبعا وصول مرسي للكرسي على اكتاف القوى الثورية تم اساسا بصفقة مع المجلس العسكرى بدايتها الاعلان الدستورى الاعوج و نعم تدخل الجنة و لا تدخل النار و وصول السيسى و لعبة تمرد اللى عزلت مرسي كانت بصفقة مع فلول مبارك و التمن حمايتهم و دة الواضح دلوقتى

الاتنين ما بيثقوش فى حلفاءهم قبل اعداءهم ، و بيخونوا اى حد طبعا دى وضحت مع مرسي بعد عصر اللمون و وقوف قوى ثورية كتير معاه و طبعا برضه دى واضحة مع السيسى فى المشاكل اللى بينه و بين الفلول دلوقتى و محاولة اقصاءهم من الصورة

الاتنين بيتبعوا سلاح الفزاعة فى التغطية على فشلهم مرسي كان بيقول مؤامرات خارجية و صوابع بتلعب فى البلد و امريكا و اسرائيل و السيسى بيقول جماعات ارهابية و تفجيرات و بنقاوم الارهاب و احنا فى حرب

اذا كان العسكر و الاخوان وجهين لعملة واحدة فى غياب القوى المدنية و تفككها و هى عملة فاسدة ، برضه سواء الحكم بإسم الدين او بإسم الوطنية حكم استبدادى ديكتاتورى ، انك تحتكر الدين او الوطنية لنفسك و اللى ضدك خاين بيكره جيش بلده او كافر بيكره شرع الله ، الاتنين خدوا نفس الوسيلة للوصول للحكم .

اقتل كمان

اقتل كمان
و اسجن كمان
ارمى الشباب ورا الحيطان
فاكر انك بتحمى عرشك
فاكر انك هاتملا كرشك
و انت فى امان
دة انت جبان
بتقفل فى وش الناس كل البيبان
خليت القاتل ضحية
و المقتول نسيه الزمان
كل صرخة ام ابنها
مسجون و لا مات
كل حلم ببكرة
كان بيعدى من سكات
كل جنازة فيها تابوت
شايله تابوت
كل واحد شاف الظلم فى البيوت
كل واحد مات جعان
اقتل كمان
حط كله فى السجون
ازرع فى الناس الجنون
بكرة هاييجى الطوفان
اقتل و خلى فى كل بيت
و لو شهيد
كل شهيد دمه لعنة
هاتفضل تطاردك فى المنام
قول كلام
ورا كلام ورا كلام
بقت خلاص دولة حطام
طالق فيها كلابك
و الديابة
فى كل مكان
اقتل كمان

السقوط

واضح جدا ان السيسى ماشى باقصى سرعة فى اتجاه سقوطه ومفيش معاه فرامل ، و عايش فترة حلاوة روح ، تصريح رئيس البرلمان الالمانى ، اعترافات البرادعى ، التصفيات الجسدية لطالب كلية الهندسة ، و الانفجارات اللى بتحصل فى بيوت بيقولوا عليهم ارهابيين و انفجرت فيهم القنبلة ، القمع الامنى الغير مسبوق ، و القتل بدم بارد ، و قانون التظاهر و قانون الارهاب و بيع اصول ماسبيرو ، و فنكوش العاصمة الجديدة و فنكوش محور القناة ، و الغلاء الفاحش فى الاسعار و رفع الدعم و ذيادة اسعار الكهرباء و اثبات صحة التسريبات من نيويورك تايمز ، و المليارات اللى اختفت و دخلت حساب الجيش ، و واشنطن بوست ، احكام اعدام بالجملة ، سوء العلاقات مع الدول التى أيدته زى السعودية ، اعلامه الفاشل اللى خلى ناس تتعاطف مع الاخوان ، و ختمت بتعيين الزند اللى فضايحه و فساده اتنشر فى الصحافة القومية قبل صحافة  المعارضة ، شغل بجاحة و لوى دراع مع الشعب ، يعنى من الآخر اخبطوا دماغكم فى اجدع حيطة . دة لو حمار باربع رجلين و ديل مش هايمشى لنهايته بالسرعة دى ، يخرب بيتك يا راجل ايه دة كله ايه دة كله بجد احييك على غباءك ، و ارفع القبعة للى اختارك فى وظيفة ملحق كوبرى لأن الكوبرى فى السجن

البركان القادم كله هايدفع التمن ، كله مؤيد و معارض هايدفع التمن ، و كل يوم بيقرب موعد الانفجار ، خلال شهور اوعدكم هاتصحوا فى يوم على الحقيقة و على بلد غير البلد . خليكم ساكتين ، كله هايدفع التمن .

الزند يا راجل

مين يا ابنى وزير العدل الجديد

الزند يا راجل

الزند مين يابنى ما اعرفوش

الزند الذند اللى اهيييييييي

الزند مين يابنى نورنى

الذند اللى قال كلهم عبيد و احنا الاسياد يا راجل

ما كلهم يابنى قالوا كدة ، السيسى قال كدة ، محلب قال كدة ، مدير امن البحيرة قال كدة ، الذند مين

الزند ، الزند اللى قال مش هايدخل القضاء الا ولاد القضاه يا راجل

يابنى مش عارف الزند مين دة ، فكرنى بيه

الزند ، الزند اللى نهب و سرق اراضى الدولة و طلع منها زى الشعرة م العجين يا راجل

يابنى زند مين و ازاى دة يمسك وزير عدل

السيسى عايز كدة يا راجل ، و بكرى بيقول الشعب موافق يا راجل

يابنى مش فاهم برضه الزند مين و عايز ايه

هو الزند مين صعبة يا راجل ، بس عايز ايه على رأى مرتضى منصور اكبر مؤيدى الزند هايطلع تيت ابوك و تيت اللى خلفوك يا راجل

امشى يا ابن التيت من قدامى ، ملعون ابوك على ابو الزند على ابو مرتضى فى يوم واحد ، اصل انت ابن تييييت ، تيييييت تيييت

ابو جهل

احنا فى زمن ابو جهل ، ابو جهل دة مش اسم شخص ، دة اسلوب حياة ، اسمه ابو جهل و هو ابو جهل

اما تصدق الكداب رغم انه خلى العيشة هباب و ما نفذش اى وعود و جنوده اتدبحوا ع الحدود تبقى ابو جهل

اما تشوف مليون مظلوم و الظلم يذيد يوم عن يوم و الدم كتير و الحر اسير و تسكت و تطنش و تبقى طرطور من الطراطير تبقى ابو جهل

اما تصدق احمد كوسة و بكرى استاذ التعريص و لا تصدق حتى عكاشة و تتفرج ع الست لاميس تبقى خلاص عايز فورمات و التعلب فات و انت ابو جهل

لما يقولوا نحفر ع الناشف و انت تقول الحفر مفيد او مليون وحدة و تتسلم لكل الشعب قريب و بعيد لا شفت حفرة و لا شفت نقرة و طلعت بقرة طلعت ابو جهل

لما تبقى الاسعار نار و بيعاملوك ان انت حمار دة فى مصلحتك دة كدة لراحتك
و انت مصدق
تبقى ابو جهل

لما يحرموا كلمة لأ لما يضيعوا بيك الحق دة بقى شهيد و دة فى زنزانة لما القاعدة عار و خيانة و راضى بحالك تبقى ابو جهل

لما الحرامى يبقى وزير و بيحميه ١٠٠ الف غفير و انت موافق تقول مش فارق تبقى ابو جهل

مش لاقى حتى رغيف العيش و كل حاجة مفيش و مفيش و يدوا براءة لناس نهبوك و انت طربوش م الطرابيش و برضه قاعد كدة مستسلم ابنك بيموت و انت تسلم تبقى يا سيدى انت ابو جهل

كله ابو جهل مش قلتلك اسلوب حياة .

زيارة المانيا

بعد ما رفض رئيس البرلمان الالمانى لقاء السيسى ، و طبعا السيساوية نقحت عليهم الكرامة و بدأت تنكشف خطوط مؤامرة على رأى السيساوى الزيوط اللى اكتشف ان المخابرات الالمانية كانت مجندة مرسي و اعوانه ،، و ان ٦ ابريل تم تدريبهم فى المانيا ، و ان اصلا رئيس البرلمان الالمانى اخوان ، و ان اصلا الالمان هما اللى قاموا بثورة ٢٥ يناير ، و لسان حال السيسى بقى سمعنى احلى سلام شحط محط

مش اروح مش هاتيجى مش اروح مش هاتيجى

اه يا بت يا خايبة اعصابك سايبة

هانروح المانيا و نجيب كام لعبة

مش اروح
مش هاتيجى
مش اروح
مش هاتيجى

اعدام شعب

اعدام كلها اعدام اعدام ارهاب و كلام اعدام التراس اعدام اعدام اخوان اعدام اعدام مالكش فى حاجة اعدام كلها اعدام اعدام و الشعب اهو نام اعدام موتى يا احلام اعدام كل الايام اعدام الحرية اعدام و الوطنية اعدام و قضاءنا الشامخ اعدام و برادعاوى اعدام طب حمدينى اعدام و الاشتراكية اعدام ابريلى يسارية اعدام ايدت السيسى اعدام و عارضت السيسى اعدام الا الحرامية مش اعدام ؟ دول سرقة و نهب و بيع اوهام انما اعدام لو كنت برئ اعدام تقول كلمة حق اعدام حتى رأيك اعدام لو عايز حقك اعدام و رغيف العيش اعدام كل الحرافيش اعدام ماشى جنب الحيط اعدام فلاح فى الغيط اعدام حتى فى مدرستك اعدام او رايح شغلك اعدام برصاص داخلية اعدام مشنقة قضائية اعدام تحلم ببكرة اعدام او حتى الفكرة اعدام ابنك او بنتك اعدام جارك او صاحبك اعدام و الدور جاى جاى اعدام فى مدينة و حى اعدام اعدام كلها اعدام بلد المشانق بلد المحارق بلد الظلم اعدام

اعدام شعب .

كله بالقانون

كله بالقانون
الفرق بين السيسى و مبارك حاجة واحدة ، ان السيسى قنن الفساد و الظلم و القتل ، يعنى خلى الفساد قانونى ، اصدر قوانين تودى فى داهية ، اسناد المشروعات الحكومية بالأمر المباشر ، تخصيص الاراضى بالأمر المباشر ، محاكمات عسكرية بالدستور اللى وافق عليه الشعب ، هيئة قناة السويس هيئة مستقلة غير تابعة لمجلس الوزراء ، التعيينات و الترقيات حسب الكفاءة ظاهريا و الواسطة من تحت لتحت حسب قانون الخدمة المدنية ، قانون التظاهر ان لو اعترضت تتحبس ، قانون الارهاب ان من حق الحكومة تعتبرك ارهابى و تقتلك ، كله قانونى و بالقانون ، مبارك اعتمد على فساد القضاء حتى اما اتنحى اعتمد على فساد القضاء ، انما السيسى قنن الفساد ، يعنى ايه قنن الفساد ؟ يعنى بقى الفساد قانونى يعنى حتى لو القضاء مش فاسد ، دة حلم يعنى ، كله بالقانون ، انا سرقت بس ما خالفتش القانون ، انا قتلت بس ما خالفتش القانون ، انا اشتريت ارض بربع تمنها بس ما خالفتش القانون ، انا اشتريت اصول ماسبيرو اللى عايزين يبيعوها بس ما خالفتش القانون ، دى قوانين البلد و صادرة من السلطة التشريعية اللى هما عدلى طرطور و السيسى حاليا فى الجريدة الرسمية ، و طبعا اتحدى ٥٪ من الشعب بما فيهم ثوار الفيس بوك متابعين الجريدة الرسمية ، المهم ان كله قانونى ، سرقة و بجاحة ، نهب بالقانون ، يعنى حتى حضراتكم لو طهرتم القضاء مش من حقكم تحاكموهم و هاياخدوا براءة بقضاء نزيه ، السيسى اتعلم من اللى حصل لمبارك ، مش عايز يقضى يوم فى السجن لو مشى لا هو و لا اللى وقفوا معاه ، مش من حق حد قانونا يحاسبهم و لا يحاكمهم ، كلهم ماشيين قانونى ، بس السؤال هل فيه امل فى القضاء ؟ اصل مبارك لو ضامن ولاء القضاء ليه السيسى قلقان منه و بيقنن كل حاجة ؟
اكيد الصراعات دلوقتى كتير ، بس سؤال ، انتم فاهمين يعنى ايه القتل و الفساد و السرقة و النهب بقانون ؟
شفتم وصلنا لإيه ؟
عرفتم ماشية ازاى ؟
المخرج الوحيد اليتيم محاكمات ثورية .

ثوروا او موتوا
و هاتموتوا بالقانون و ماحدش هايتحاسب و لا حد هايتحبس يوم .
اللهم بلغت
اللهم فاشهد .

احكام الاعدام

احكام الاعدام بتاعة النهاردة بتوصل كذا رسالة لناس كتير

اولها رسالة ضغط على قيادات الاخوان فى معركة فرض الشروط و المساومات للتصالح

ثانيا العسكر عارف ان تقريبا الشارع خارج سيطرة القيادات و كان لازم يعمل كدة لتخويف الشباب و عمل كارت ارهاب مش اكتر

ثالثا تشتيت الناس دوليا و محليا ما بين احكام الاعدام على القيادات و اجكام اعدام اتنفذت فعلا على شباب مالوش ذنب

رابعا تشتيت الرأى العام العالمى عن اعترافات البرادعى و ادانتها للجيش

خامسا ايام احداث الجامعات كان السيسى اصدر قانون و تم نشره فى الجريدة الرسمية باعتبار الجامعات و خصوصا كليات الهندسة منشآت عسكرية خاضعة للقانون العسكرى ، ساعتها انا قلت نزول الجيش لحماية المنشآت المدنية بقانون يبقى دة احكام عرفية ، و طبعا اتقبض على شباب كتير و اتحالوا للقضاء العسكرى و كانت النتيجة احكام اعدام بدون دفاع و بدون نقض دة غير التعذيب ، و تنفيذ فورى رغم ان اللى اتحكم عليهم اتقبض عليهم قبل الواقعة اصلا ، يعنى ابرياء ، بس لا براءة مع الاحكام العرفية .

سادسا رسالة لكل الشعب ان اللى هايتكلم مصيره معروف و تهيئة الشعب للقادم و ان الاعلام بتسميمه عقول الناس يوصلهم لأن دة يبقى الطبيعى بتاعهم و انهم ما يتهزوش من حاجة زى كدة و طبعا دة مهم جدا قبل موجة الغلاء المتوقعة خلال شهرين و الناس اصلا مش لاقية تاكل . و مع كل دة تهيئة الشعب للعنف السلبى ، العنف السلبى انك شايف الدنيا والعة و حرب قدامك و بتقول انا مالى لو خلصت هايدبسونى فيها و انا عندى عيال عايز اربيها .

سابعا رسالة للجيش و الداخلية و القضاء بأنهم معاهم حصانة لفعل ما يحلو لهم و انهم بيخدموا على بعض

الواقع بيقول و هاقتبس كلمة البرادعى ان مصر ما فيهاش غير عسكر و اخوان قادرين على الحكم ، و طبعا لحد وقت قريب الفلول و العسكر حاجة واحدة ، فيه مشاكل بين الفلول و السيسى بس مش بين الفلول و العسكر ،  و انا مقتنع بكدة ، على فكرة تسريب السيد البدوى اللى حصل دة كان رسالة لمالكى القنوات الفضائية من امن الدولة و بتدخل السيسى اعتقد الرسالة وصلت للفلول ، دلوقتى القوى الدولية منقسمة بين  عسكر و اخوان ، حتى الاعلام الدولى لو حد متابع هاآرتس الاسرائيلية او برافدا الروسية يجد تأييد الدولتين للسيسى ، لو حد متابع إل باس الاسبانية او ذا اندبندنت الانجليزية او نيويورك تايمز الامريكية هايلاقيهم بيقولوا ان دة انقلاب عسكرى ، دى الحقيقة ما نهربش منها لأن القوى المدنية مالهاش وجود فى مصر حتى الآن مع الاعتذار للاشتراكيين و مؤيدى حمدين و البرادعاوية و ٦ ابريل و غيره انتم مش موجودين اصلا ، هوا ، سراب لحين اشعار آخر و طبعا ان مفيش غير عسكر و اخوان دة واضح جدا فى الاعلام ، قنوات مؤيدة للسيسى و قنوات مؤيدة لمرسي ، مفيش تالت ، السيسى كارت اتحرق هو خلاص نفذ دوره ، سيناء هاتضيع و باقولها تانى راجعوا خريطة الشرق الاوسط الجديد و شوفوا غزة الكبرى بتخطيط صهيونى ، البلد على حافة حرب اهلية و اعتقد كل الشواهد بتقول ان ولاية سيناء او جماعة انصار بيت المقدس هاتبقى فى قلب القاهرة و الدلتا و اسكندرية قريب ، لأن كله بيدور على الانتقام و تجنيد الشباب هايبقى سهل ، بس علشان السيسى يمشى لازم لعبة تتلعب ، اللعبة ايه لسه مش عارف بس كل اللى شايفة ان الضغط اكيد هايولد الانفجار ، هاقول كلمة اخيرة العدو مش السيسى بس ، الغلطة اللى بتتعاد و نعيد و نزيد ، العدو المجلس العسكرى كله و رجال اعمال مبارك و قيادات الاخوان ، الفرصة جاية قريب و خطتهم معروفة اسلوب المخابرات الامريكية اللى اغتالوا رئيس باكستان بضرب طيارته رغم ان كان معاه فيها السفير الامريكى فى التمانينات ، الفرصة هاتيجى ، الثورة مالهاش فى السياسة ، الثورة تحكم ، تقبلوا انها تبقى عسكر و اخوان ماحدش يقول اتضحك عليا ، استنوا الوقت المناسب و اركبوا زى ما غيركم ركب عليكم . اللهم بلغت ، اللهم فاشهد .

من الآخر

من الآخر السيسى خرج برة الخط المرسوم ليه ، يعنى هما يضحكوا علينا بأنه قلع البدلة. الميرى و رئيس مدنى بس دوليا دة انقلاب على رئيس شرعى ، الغباء ان اللعبة اتلعبت غلط و هو فقد حتى كل الناس اللى وقفت معاه ، اعتقد السيسى هايبقى تمن التوافق بين العسكر و الفلول و الاخوان و التخلص منه هايبقى الاصلح لكل الاطراف ، الاخوان مش دة اللى انتم عايزينه يمشى و دة اللى قتلكم ، ترجعوا للحياة السياسية و انسوا اللى فات ، العسكر مش فارق معاهم السيسى فى حاجة و وزير الدفاع متحصن فى منصبه بحكم الدستور و اللى ماحدش خد باله ان الدستور نفسه متحصن لمدة سنة من اى تعديل ، يعنى مأمن نفسه ، و الفلول خلاص هانعمل انتخابلت رئاسة و نجيب واحد يرضيكم ، يبقى خرجوا من مزنق الاخوان و رابعة و ممكن يروح فيها كام واحد من اللى خرجوا من المجلس العسكرى من اسبوعين على وزير الداخلية محمد ابراهيم ، و فى نفس الوقت خلاص يا شعب هانقف معاك تانى و نخلصك منه بس اهمد شوية بقى ، و كله يعيش مبسوط و نلبس تانى فى الحيط ، بس ازاى دة هايحصل ، لسه مش باينة بس الايام الجاية هانعرف النية ايه . بس الاكيد انها هاتبدأ بتنفيذ احكام اعدام بالجملة لناس بعيد عن قيادات الاخوان لزيادة وتيرة العنف و جر الشارع نحو الفوضى . و دى هاتبقى بداية النهاية .

و على فكرة جمال مبارك بالحكم ال ٣ سنين هو و علاء فى قضية القصور الرئاسية خرج من اللعبة ، يعنى لا رئاسة و لا برلمان ، لأنها بقت سابقة جنائية ، العسكر و الفلول عاملين حساب لبعض و حافظين بعض و بيلعبوا مع بعض صح اوى .
تفتكروا فعلا فريد الديب محامى مبارك اكتشف فجأة ان عنده سرطان الدم و حالته خطر و سافر على فرنسا ، دة منطقى ان حالته تسوء من سرطان الدم فجأة كدة ؟
فريد الديب لإما ساب البلد و خلع او تم اغتياله عن طريق سم بقى او اى طريقة تانية الله اعلم او رايح لحاجة معينة و راجع و ما تنسوش الشركات اللى يملكها مبارك و عياله فى فرنسا .

المساواة فى الظلم عدل

ليه يتحكم بالاعدام على محمد مرسي ؟
اللى اعرفه لو فعلا اتحكم بالاعدام على محمد مرسي يبقى يتحكم بالاعدام على قيادات المجلس العسكرى بتهمة الخيانة العظمى و طبعا منهم السيسى ، اما تبقى جحافل جيوش حماس و طبعا جحافل لأنهم حرقوا كل الاقسام فى جميع انحاء الجمهورية و فتحوا كل السجون ، يعنى الآلاف من حماس دخلوا البلد و عملوا كل دة و الجيش نايم و وقتها رئيس المخابرات الحربية كيس جوافة ما يعرفش حاجة يبقى لازم يتحاكم ، اما واحد هارب من السجن يترشح للرئاسة يبقى المجلس العسكرى يتحاكم ، اما جماعة محظورة تستلم الحكم فى البلد يبقى المجلس العسكرى يتحاكم ، دة العدل . و إلا يبقى كل دى تمثيلية و اتفاق بين العسكر و الاخوان .