تعرف إيه عن انتخابات الرئاسة يا واد يا بيكا ؟
أعرف ان انتخابات الرئاسة ، ناس انسحبت قبل أصلا ما تترشح و بيتعملها توكيلات علشان تترشح رغم انهم انسحبوا أصلا و هما ما ترشحوش يا معلمي ، سبحان الله .
فيه بقي ناس إترشحت و مش عارفة تكمل التوكيلات للبيروقراطية النزيهة للشهر العقاري ، شوف أزاي توكيل يخلص في دقيقة و توكيل يذلك ساعة و سلملي علي الديموقراطية .
طب و ابو عجلة يا واد يا بيكا ؟
أبو عجلة بقي توكيلاته في صناديقها و جاهزة و إتعملت أصلا من 30 / 6 و جاهزة و الصناديق مقفولة و أعتقد الناس انتخبت خلاص يا معلمي .
و الناس يا واد يا بيكا ؟
الناس بقي مستنية العرس الديموقراطي تحت إشراف قضاءنا الشامخ ، علشان يرقصوا و لإختيار الرئيس القادم يا معلمي .
مين هايختاره يا واد يا بيكا ؟
مش مهم مين يختار ، المهم انه تم إختياره خلاص يا معلمي .
انت بتجيب الكلام دة منين يا واد يا بيكا ؟
أنا الشعب يا معلمي .
روبا بيكيا
ليست هناك تعليقات:
إرسال تعليق