عندى شوية علامات استفهام بافكر فى اجابات ليها فكروا معايا .
- جماعة الاخوان جماعة محظورة و تم حلها سنة 1954 بامضاء محمد نجيب و عبد الناصر , من ساعتها لم يتم اعلان انها جماعة غير محظورة و فى عهد مبارك 30 سنة جماعة الأخوان محظورة , و حتى الآن لم يصدر قرار رسمى بأنها جماعة غير محظورة لحد كدة تمام اوى ,
اللى حصل ايه بقى طنطاوى و عنان و السيسى و بدين و الفنجرى و مميش و العصار و باقى المجلس العسكرى , سمحوا لجماعة محظورة بعمل حزب سياسى و سمحوا لجماعة محظورة بدخول الانتخابات بمرشح هارب من السجن و سمحوا لجماعة محظورة بالاستيلاء على الحكم ,
السؤال هنا
لماذا لم يتم رفع قضية على المجلس العسكرى السابق لتسليمه البلد و الحكم لجماعة محظورة و رئيس هارب من السجن ؟
- كل الارهاب اللى بيحصل يقال ان اللى وراه جماعة الاخوان المسلمين حسب الاعلام و التصريحات و كل اللى بيتقال من السلطة , كله بتكلم ان جماعة الاخوان تم اعلانها جماعة ارهابية , بس كله كلام .
السؤال هنا
لماذا لم يتم نشر قرار رسمى من رئيس الجمهورية بأعلان جماعة الاخوان جماعة ارهابية فى الجريدة الرسمية كما هو متبع ؟
قانون التظاهر بنوده مخالفة للدستور , و صدر قبل الدستور و المفروض يسقط بصدور الدستور , و المظاهرات و الاعتصامات لاسقاطه
السؤال هنا
طالما القانون غير دستورى و يعتبر ساقط بصدور الدستور ليه بدل ما آلاف ينزلوا مظاهرات , يجمعوا نفس الآلاف توكيلات لقضية ترفع بعدم دستورية القانون ؟
قانون الانتخابات غير دستورى , و تحصين اللجنة العليا غير دستورى , و مخالف للدستور , و الانتخابات من قبل ما تحصل الرئيس مهدد و فاقد للشرعية ,
السؤال هنا
ليه المقاطعين اللى شايفين كدة بدل ما يدعو للمقاطعة ما اتفقوش و لموا آلاف التوكيلات مع محامى ثورى محترم يرفع قضية بعدم دستورية قانون الانتخابات بدل المقاطعة الجوفاء ؟
على فكرة , ماحدش يقولى القضاء مسيس , ايوة القضاء مسيس , اكشف امه قدام الشعب , أكشف الوجه الحقيقى ليه . عرف الناس يعنى ايه القضاء مسيس و يعنى ايه انه مع الفساد .
السؤال الكبير المجعلص بقى
امتى هانشتغل صح ؟
امتى هانعرف ان هما بيدفعونا للى هما عايزينه ؟
امتى هانفهم انهم بيستنزفونا مش اكتر ؟
امتى هانعرف ان لازم نلعب فى ارضهم ؟
اضرب اضرب اضرب اضرب اضرب بس قانونى و لففهم حوالين نفسهم .
روبا بيكيا
ليست هناك تعليقات:
إرسال تعليق