شخلل علشان تعدي

المواطن السيكاوي غير أي مواطن تاني 

 حقه ضايع و بيغني تسلم الأيادي 

 أيوة هي الأيادي إللي بترزعه علي قفاه  

الأسعار نار و مفيش شغل و مش لاقي ياكل و بيرقص علي أنغام بشرة خير 

 أيوة هي بشرة خير طبعا انه داخل الجنة علشان العذاب إللي شافه في الدنيا بأنه سيكاوي 

بس دخوله الجنة مشروط بموافقة السلفيين طبعا

 هما إللي بيحددوا هل سيدخل الجنة أم جهنم و بئس المصير ، و طبعا السلفيين معروفين 

 واقفين علي باب الجنة و شخلل علشان تعدي شخلل في عرف السلفيين مش فلوس لا سمح الله دول ناس بتوع ربنا ، شخلل يعني انتخابات برلمان تنتخب المرشح بتاعهم ، انتخابات رئاسة تنتخب إللي يقولولك عليه ، كدة يعني ، و طبعا تسمع الكلام تدخل الجنة  

شخلل علشان تعدي دة نظام قديم جدا في سيكا سيكا 

 من أول عسكري المرور لحد الوزير بس طبعا الشخللة بتفرق من العسكرى للوزيرالعسكرى تشخلله بعشرين جنيه علشان ما ياخدكش مخالفة انما الوزير شخللته تقيلة بكام مليون علشان تاخد مناقصة و لا يصدرلك قانون يخدمك و لا حتة ارض لشركة اماراتية , كدة يعنى 

 مثلا أمريكا علشان تشخلل مع العسكر و تحب تعمل منطقة عازلة في سيناء لضمان أمن اسرائيل تشخلل بكام طيارة أباتشي و دى امريكا مش اى شخللة يعنى ، العسكر بقى يقوم مشخلل بكام جثة و انفجار مدوى ، أهالي سيناء يشخللوا في الشارع بعد ما سابوا بيوتهم ، و الشعب يشخلل علي انغام تسلم الأيادي ، قفايا ورم انا و ولادي .

شخلل علشان تعدي بقي اسلوب حياة فى سيكا سيكا  .
روبا بيكيا