دة مش ماتش كورة

الموضوع مش موضوع ماتش كورة الموضوع فريق ضايع ما عندوش خطة و كل خططه فاشلة مرة كفته و مرة ع الناشف و كله ساكت رغم انه شايف ، سيبكم انتم نحسبها كدة

نبدأ بخط  الضهر خط الضهر ما شاء الله مفتوح ع البحري ، و المنافس بيلدع زي الحية ، تفجير هنا و تفجير هنا ، و كل مرة نقول هانظبط الدفاع ما بيحصلش و نفس المساك إللي كل مرة المهاجم يهرب منه ما بيتغيرش ، فاشل و في مكانه متثبت ، تقولش متثبت بمسامير ، و قال إيه الدفاع معاه عقد تحصين ٨ سنين ، وحش حلو هايقعد ٨ سنين ، أصلها مش لعبة دي الناس قالت نعم و آمين ، دفاع مفتوح يمين و شمال ، بس تغييره محال ، العقد بيحميه ، و إللي عمل العقد أندال ، بس الجمهور ماله ، كل ما تحصل هجمة من الفريق التاني الجمهور يعيط و يشتم ، بدل ما تشتم ما تشوف دفاعاتك يا عم المفتوحة دي ، ما هو أما يبقي المساك بيبني كباري و الليبرو بيعمل مكرونة يبقي مين هايفكر في الماتش ، دي ناس مش فاضية يا عم ، البيزنس واخد كل وقتها بس كابتن خط الدفاع متحصن و متسلطن و ضامن مكانه ، سيبك م الدفاع دة ميئوس منه ، تعالي نشوف خط الوسط

خط الوسط يا خرابي إيه إللي انا شايفه دة ؟ خط الوسط مقضيها هز و رقص و غنا و سايب الماتش ، عندك واحد بيطبل و واحد بيرقص و ٤ بيغنوا تسلم الأيادي ، بس الماتش شغال و الهجوم جامد و لا الهوا تسلم الأيادي ، طبعا بالنسبة لخط الوسط لازم المطبلاتي علشان يظبط الأداء ، و المطبلاتي ممكن يبقي فضائي علي أي فضائية و ممكن يبقي نتاوي علي موقع تواصل ، و طبعا يمتاز بالتبرير ، هو ما يهموش الإجوان إللي قطعت الشبكة ، هو بيبرر ليه الإجوان دي دخلت ، طول ما الإجوان بتدخل هو بيبرر دي شغلته التبرير إيه إللي انا شايفه دة ليبرو خط الوسط بيرقص و يغني ، اه بيظبط الإيقاع ، طب و باقي خط الوسط فين ؟ دول بقي نايمين و مقضيينها تفخيد و مستكنيسين في بيوتهم مقتنعين بأن الحياة بقي لونها بمبي ، و أنا جنبك و انت جنبي ، و أنا جنبك يا حبيبي ، يا حبيبي و انت جنبي ، المباراة بقي لونها بمبي ، بمبي بمبي بمبي بمبي و طبعا بظهور اللون البمبي بدأ ظهور العناتيل و كله ماشي و كله مقضيها و كله في الاستخوبوس و الناس لبعضيها ، حتي الوسط سايب طب و الهجوم ؟ ربنا يستر

خط الهجوم بقي دة حكايته حكاية و رواية و صدق مين قال ما بتحدفش كتاكيت الحداية ، خط الهجوم مكتوم طبعا فيه فرع الوطني مركب كاتم للصوت ، و عندنا ناس شغالة هجوم عمال علي بطال ، تفضل تهاجم فيك حتي تستغيث ، و الاستغاثة مش من العالم الآخر ، دي بفعل الكهربا هاتقول الكهربا قاطعة لأ مش قاطعة يا عم دول واخدينها كلها مبسوط انت و فاشخ ضبك ان خط الهجوم شغال و مواله موال ، ما تتبسطش أوي كدة ، دة خط الهجوم أصلا سايب الماتش و بيهاجم الجمهور ، أيوة الجمهور يا عم الجمهور جاي يتفرج يقولك ما لكش دعوة هو إللي هارينا إجوان يا عم إزاي بس فهمني إيه ياض انت جمهور و لا إيه ، شكلك جمهور لا يا عم و الله انا محترف أجنبي و هايرجعوني أتحاكم في بلدي زي ما قال الكابتن طب يلا غور ، بس ما تزعلش إشطة يا مان ، سي يو

واحد رخم هايقول طب في وسط الزحمة دي فين الجون كيبر ؟ أقوله الجون كيبر مات في الفرافرة و فيه ناس بتقول في ليبيا و أما غيرناه مات في العريش و فيه ناس بتقول في ليبيا ، غيرناه تاني مات في البحر المتوسط في دمياط و فيه ناس بتقول في ليبيا ، ما علينا بس اسكت مش طلع الفريق التاني متفق معاهم ، هاتقوللي إزاي ، هاقولك مش بعد ما الناس إتأكدت ان الجون كيبر مات في ليبيا طلع فيديو لمدرب الفريق التاني يعلن مسئوليته عن كل الإجوان ، مش توقيت غريب بذمتك ؟ إشمعني دلوقتي بقي ؟ سيبك انت الماتش شغال و الدنيا فل و الحمد لله الجمهور نصه إتقتل و شوية في المعتقل ، و الباقي أدينا مستنيينهم ينزلوا الملعب يدشدشوه علي دماغ الفريقين تفتكر الجون الجاي إمتي قريبا