طبعا كلمة بص العصفورة ، معناها انه يشغلك بحاجة صغيرة تفضل تفكر و ترغي و تهري فيها و هو و انت مشغول يعمل حاجة كبيرة يفاجأك بيها ، العصفورة مش لازم تكون حاجة بتغطي علي حاجة أو حاجة بتصرف نظرك عن حاجة ، ممكن العصفورة تبقي حاجة يحصل بسببها حاجة لمكاسب بعيدة جدا عن العصفورة ، زي مثلا التفجير الأخير في سيناء كانت نتيجته إيه ؟ أولا تهجير أهالي رفح و تنفيذ المخطط الصهيوني في إخلاء سيناء و عمل منطقة عازلة لحصار غزة و الأهم بقي اللي حصل مالوش علاقة بالعصفورة ، نزول الجيش لحماية المنشآت العامة و إعتبارها منشآت عسكرية و التعدي عليها يحولك للقضاء العسكري مع تنازل الرئيس عن بعض صلاحياته لوزير الدفاع المحصن ٨ سنين بموجب الدستور ، و حملة إعتقالات كبيرة بين طلبة الجامعات ، طبعا حضرتك يا باشا و حضرتك يا هانم بمختلف انتماءاتكم السياسية مشغولين يا تري الجنود ماتوا في سيناء و لا في ليبيا ؟ و يا تري إزاي نقطة أمنية فيها العدد دة ؟ و يا تري القاعدة و لا أنصار بيت المقدس و لا تركيا و لا قطر و لا الحفر ع الناشف ؟ و السبب في دة الإخوان و لا السيسي ؟
و رغي رغي رغي
و هري هري هري
و كله يهاجم كله
و كله يشتم في كله
و سمعني سلام كبير أوي
أصلنا داقين عصافير
و راكنين ع الناصية الفيل
و اديني عصافير أديك تمر هندي و أهو كله سمك بيعوم في البحر .
بص العصفورة بقي يا معلم
روبا بيكيا
ليست هناك تعليقات:
إرسال تعليق