ناس كتير مستغربة من فشل الثورة في سيكا سيكا ، و استيلاء الريس السيكي علي الحكم ، و حالة التوهان إللي فيها الشعب السيكاوي و عدم تحقيق أي هدف من أهداف الثورة
طبعا عندهم حق
بالبحث و التمحيص و التفعيص و التفطيس عن اسباب فشل ثورة سيكا سيكا لقينا السبب هم الثوار نفسهم و انتشار بعض نوعيات من الثوار تذيد كلها عن ٩٥% من ثوار سيكا سيكا و برصد هذه النوعيات و محاولة معرفة انواع الثوار في سيكا سيكا وجدناها كالتالي
بداية نبدأ بالثائر الزيوط
الثائر الزيوط أو الزياط من أنواع الثوار المنتشرة في الكيانات الثورية في سيكا سيكا
علي رأي الحج شكسبير الله يرحمه جعجعة بلا طحن ، الثائر الزيوط كدة برضه
كلام كلام كلام و فعل مفيش
حكاوي و بطولات و عمليات خاصة و ساعة الجد تعالي ، يقولك ما عنديش
صوت عالي أوي و أنا و انا و انا و اشتبكت و ضربت و دمرت و عملت و هو في سوق الرجالة ما يساويش
النوع التاني من ثوار سيكاسيكا هو الثائر العيوط
الثائر العيوط دة من نوعية الثوار الحلزونية ، و يمتاز الثائر دة بأنه بيولول و يعيط علي طول ، قبضوا علي فلان يا عيوط
يا دهوتي
فلان الداخلية قتلته يا عيوط
يا مصيبتي
و يغير صورة البروفايل يخليها سودة كام يوم و يقعد يولول علي الصفحة
بس خلاص هو كدة عمل الثورة بتاعته
عندنا برضه من أنواع الثوار نوع مهم جدا و هو الثائر الشنكوت
و الثائر الشنكوت دة ، واحد صايع من ع القهوة لا في دماغه ثورة و لا نيلة ، واحد صاحبه قال ليه تعالي معايا نقعد ع القهوة في التحرير و نضرب سيجارتين ، ينزل معاه ، الثائر دة منتشر و سعره رخيص في متناول الجميع ، سيجارتين و كوباية شاي من أي حد إخوان عسكر ثوار أي حد يجيب السيجارتين و كوباية الشاي ، يبقي معاه ، و طبعا الأخ بانجو بتاع تمرد مثال واضح للثائر الشنكوت
عندنا نوع تاني من ثوار سيكا سيكا و هو الثائر الزعبوط
الثائر الزعبوط هو ثائر متزعبط يعني زعبوطه فوق دماغه بديلا عن العقل
ماشي بمبدأ عممني و لبسني السلطانية ، أبقي معاك يا عينيا . و الثائر الزعبوط دايما مضحوك عليه و دايما بيستغلوه ، استغله الإخوان و قرطسوه و زعبطوه و خلوه يعصر لمون و ينتخب مرسي علشان يسقط حكم العسكر ، جه بعدها الريس السيكي قام مزعبطه الزعبوط التمردي المتين بمساعدة الثائر الشنكوت لعزل مرسي و عودة حكم العسكر ، و دلوقتي الإخوان بيحاولوا يزعبطوه تاني لإسقاط العسكر و عودتهم للحكم
و عندنا برضه الثائر الشعبوط
الثائر الشعبوط يؤمن بمقولة سنحيا في أي ناحية و أبجني تجدني و انا معاك طول ما فيه مصلحة و هذا الثائر بيتشعبط فى اى سلطة مش مهم السلطة دى ايه بس المهم انه متشعبط معاها طالما فيه السبيج اناناس و مصلحة معاهم مش هايقول لأ و فى الآخر أهو يطلع بأى مصلحة , كام كرسى فى البرلمان , وزارة صغيرة , يبقى عنده حزب يطبل , اى حتة عضمة و خلاص ثورة ايه و كلام فاضى ايه
و عندنا من الأنواع المهمة فى ثوار سيكا سيكا الثائر السفروت
و الثائر السفروت لا فى دماغه ثورة و لا نيلة , هو كل اللى بيفكر فيه ازاى ينزل فى وسط المظاهرة يشقط الموزة من دول و يقضى معاها يومين , و النوع دة منتشر جدا على صفحات التواصل الاجتماعى و فى المظاهرات بأنك تلاقى على الصفحة بتاعته السفروت هو البطل المغوار اللى هزم الداخلية فى موقعة زرزار و هزم الجيش فى درب الحمار و فى الميدان الدنيا مقلوبة و الباشا قاعد هو و الموزة ع القهوة بيحكيلها عن بطولاته و على بعد خطوات منه الاشتباكات شغالة تقوله يلا دة فيه اشتباكات , يقولك ثوانى و فجأة تلاقيه اختفى و قاعد فى بيتهم على الكيبورد بيكتب بطولاته
و عندنا فى ثوار سيكا سيكا الثائر الكيوت
و الثائر الكيوت مشهور بكلمة سلمية سلمية و طبعا مفيش خوف منه و هو فاكر اما يقول يسقط يسقط الحاكم هايسمع كلمه و يسقط على طول و النوع الكيوت دة بيرقص على كل الاحبال و غالبا بيبقى تبع حركة او حزب كرتونى و بتاع كلام و شعارات و سلميتنا اقوى من الرصاص طاخ واحد مات , طاخ 2 ماتوا , طاخ 7 ماتوا , سلمية سلمية يا حجة روحية
و برضه عندنا الثائر الهلفوت
و الثائر الهلفوت دة واحد مالوش اى لازمة فى الحياة , مقضيها ع القهوة و نازل يدورله على اى مصلحة , عشرة جنيه من هنا و عشرين من هنا و يبيع برشامتين و سيجارتين و اهو بيقضيها مصالح مع خلق الله
طبعا بوجود 95 % من الثوار من هذه النوعيات لازم الثورة تفشل بالثلث و لازم نوصل للمرحلة دى , طبعا ناس هاتسألنى طيب و ال 5% الباقيين فين
ال 5% الفاضلين من ثوار سيكا سيكا متقسمين جزء الله يرحمه و جزء الله يفك سجنه و جزء الله يشفيه و جزء قرف و طهق من النوعيات اللى شافها و بطل سياسة
منورين سيكا سيكا يا سيكاوية
ليست هناك تعليقات:
إرسال تعليق