السيكاوي الأصلي

السيكاوي الأصلي مختلف تماما عن أي بني آدم تاني و يعتبر من نوعية أنوية نادرة إنقرضت من سنين فاتت 

السيكاوي الأصلي بيقول ان الريس السيكي نيم أمريكا و اسرائيل من المغرب

كان أما يهتف مؤيدا للريس السيكي و يهاجم أمريكا يقول : يا أوباما يا جبان يا عميل الأمريكان ، أصلي أصلي يعني

  اما بقي السيكاوي الأصلي شاف الريس السيكي و هو بيتحايل علي أوباما إللي هو عميل الأمريكان عشان يسانده ضد الإخوان الإرهابيين و يبعت الطيارات الأباتشي قال إيه ؟ قال دة تكتيك من العبقري اسم النبي حارسه و صاينه الريس السيكي في انه يلبد في الدرة و يعمل خطة أباتشية حلزونية

  

السيكاوي الأصلي إقتنع و صدق إن الضفادع البشرية المصرية هاجمت الأسطول السادس الأمريكي و قبضوا علي قائد الأسطول و أبوه و أمه و جوز خالته الله يرحمه 

وفي نفس الوقت شايف بعينه سلاح الجنازات في الجيش عمال يحول في جثث مجندين و ضباط من سيناء و الفرافرة و حتي البحر ما إتعتقش و مفيش دبانة من المريخيين إللي بيفجروا إتمسكت و إتقبض عليها 

و رغم كدة عمال يشتم في الإرهابيين إللي بيقتلوا مجندي و ضباط الجيش إللي أسر قائد الاسطول السادس الأمريكي ، طب فين الضفادع او فيران حتى ؟ ما علينا

السيكاوي الأصلي إللي صدق إن إريال عبعاطي بيحول الفيروس لكفتة و ان كل دول العالم عايزة تسرق الإختراع و بعد ما استوردوا علاج فيروس سي سوفالدي قعد يطبل و يهيص و نسي خالص ان كان فيه كفتة فى الاسياخ من كام شهر 

السيكاوي الاصلي إلي صدق انه نور عيون الريس سيكي و رغم كدة قاعد ع القهوة مش لاقي شغل و لا لاقي شقة و لا لاقي علاج و يقول الأمن و الأمان أهم و لازم نحارب الإرهاب و مصدق ان فيه قنبلة تتحط فوق الشجرة علشان تفجر العصافير

السيكاوي الأصلي إللي صدق ان فيه حفر ع الناشف و حفر في المبلول و مصدق ان فيه محور قناة هايفيد البلد و شايف ان الجيش بشركاته هو إللي شغال و باقي البلد عواطليه و مصدق ان دة دور الجيش و رغم كدة زعلان ان المجند إللي بيبيع في سوبر ماركت علبة السمنة مش عارف يدافع عن نفسه

دة السيكاوي الأصلي النادر و الباقي تقليد 

 و حديد علي حديد ، الأصلي غير التقليد