مكعب روبيك و السياسة

عارفين مكعب روبيك ؟

اللعبة دى جميلة اوى و مشهورة و قديمة من سنة 1974 تقريبا , مكعب روبيك هو لغز ثلاثى الابعاد ,

علشان نفهم حاجة , الثورة دى بالضبط عاملة زى مكعب روبيك , 

حاجات كتير بتتبدل , حاجات كتير بتاخد اماكن مختلفة و مراتب معينة , اللى فوق بيبقى تحت و اللى تحت بيبقى فوق , 

مكعبات صغيرة ملونة و احنا عمالين نركب فيه علشان نحل الفزورة او اللغز , 

اثناء الحل بنبدل لون مكان لون , نجيب الاحمر فوق و الازرق تحت , الابيض فى اليمين لا لا فى الشمال و الاصفر فى النص , و الاخضر دة يبقى فى تانى صف , 

اللون الاخضر النهاردة فى اول صف , بكرة يبقى فى التانى و بعده فى التالت و ممكن يرجع الاول تانى 

هيا بالضبط كدة كل اللى بنعمله اننا بنحاول نوصل علشان نكمل الالوان و نرتبها صح , 

طول الوقت حاجات عمالة تتبدل , اولويات و فكر و اشخاص , 

شوية الفلول اول صف و شوية الاخوان و شوية العسكر و كلهم عمالين يبدلوا مع بعض , و مع الوقت كل فترة بتلاقى العدو بيتغير و اللى كان عدو بيتركن على الرف , دة شئ طبيعى جدا مش غريب , باختلاف الظروف و طرق المواجهة و مدى تحمل كل طرف لهذه المواجهة , 

على فكرة مش دايما التبديل فى المكعب بيوصل بيه انه يترتب صح , بالعكس جايز يلخبطه اكتر من الأول و جايز يعقده زيادة و تحتاج وقت اكتر علشان ترتبه من جديد , 

مش مهم هاياخد وقت اد ايه , المهم ازاى ترتبه صح , ممكن و انت بترتب لون تلاقى لون اترتب معاك بكل سهولة , و ممكن الدنيا تتعقد , 

بس طول ما انت مصمم ترتبه صح , هاييجى الوقت اللى هاتلاقيه اترتب صح معاك .

يا رب تكون الفكرة وصلت 

فهمان و لا مو فهمان ؟

روبا بيكيا