أعتقد البلد كلها الأيام دي ماشية بمبدأ لصابت لأتنين عور ، كله بيجهز للمعركة الأخيرة أو الضربة القاضية ،
الأوراق كلها إتكشفت ، و كله بقي يلعب علي المكشوف ، نسهل الموضوع أكتر ،
نبدأ بمواقع التواصل الإجتماعي ،
أكيد كلنا عرفنا مين معانا و مين ضدنا ، أكيد ظهر عند كل واحد الإخوان من الفلول من مؤيدي العسكر من الثوار ،
إللي هاجمك أيام طنطاوي و بقي صاحبك أيام مرسي ضد الإخوان و رجع هاجمك أما إتعزل مرسي ، و إللي هاجمك أيام مرسي و رجعلك أما مرسي إتعزل و إللي مواقفه ثابتة ما إتغيرتش ، كله بقي واضح قدامك ما بقاش فيه أنا مش إخوان و أنا مش مع العسكر بس حمانا ، كله مواقفه بقت واضحة ، مين معاك و مين ضدك و مين بيستغلك .
العسكر بذراعه الأمني الداخلية أعلن عن نواياه ، إعتقالات بالجملة لكل إللي ضده ثوار علي إخوان علي يسار ، يستخدم الذراع الأمني الداخلية إللي رجعت أوسخ من الأول و مع عودة زوار الفجر و دستور تحصين و قفل الشوارع و الميادين و محطات المترو ، و منع التظاهر ، و تشويه الثورة و عودة يوم 25 يناير كعيد للشرطة ، من الآخر بيقول أنا اهه و إللي مش عاجبه يشرب من البحر .و مش فارق معاه إللي يحصل .
الإخوان مقضيينها إرهاب و مظاهرات و إشتباكات و تايهين بعد الصفقات إللي عملتها قياداتهم و شبابهم هايدفع تمنها ، و بقوا أوضح من الأول ، و طلبهم معروف الشرعية المزعومة و مرسي ، و عايزين تاني ينضموا للثوار .
السلفيين وضح موققهم من لجنة الخمسين و الدستور إللي بيحشدوا ليه بنعم رغم رقصهم علي كل الحبال بس أعتقد إنهم وضحوا إنهم مع اللي معتقدين إنه الجانب الكسبان ،
الفلول موقفهم واضح جدا و باين أوي إن صوتهم بقي عالي في تأييد العسكر و عودة نظام مبارك .
حتي الثوار بقي موقفهم واضح في إنهم عرفوا مين معاهم لمصلحته أو علشان يركب و مين معاهم علشان البلد ، إتعلموا إن أعداءهم عسكر و فلول و إخوان و إن ماينفعش يتحدوا مع حد ضد حد ، عرفوا مين مبادئه ثابتة و مين متلون حسب مصلحته ،
كل فئة و ليها أهدافها و كل فئة أعلنت عن إتجاهاتها و كل فئة بتحضر نفسها للضربة القاضية لأن كل فئة عايزة تخلص من الكل و تبقي لوحدها ،
المواجهة الأخيرة هاتبقي علي عدة محاور و هاتبقي المعركة الأخيرة للكل بعد كشف كل الأوراق ، و كله بيحضر للضربة القاضية ،
بس يا تري مين إللي هايكسب الحرب ؟ الله أعلم ، الأيام الجاية هاتقول ، و طالما بقي اللعب علي المكشوف يبقي صاحب النفس الأطول هايكسب .
فهمان و لا مو فهمان ؟
Kanoun saksonia
ليست هناك تعليقات:
إرسال تعليق