أنا عايز أرد علي حزب إديله فرصة ، أول ما مسك محمد مرسي نفس الحزب العتيق قال إديله فرصة ، و هارد عليهم نفس الرد إللي كتبته من سنتين فاتوا ،
يعني إيه إديله فرصة ؟
لو ليك مبلغ كبير عند حد ، و الحد دة وعدك و قالك خلاص هانت بس أصبر عليا أترقي في شغلي و اديك فلوسك ، و بعد ما إترقي نفضلك و لا كأنه يعرفك ، يبقي تديله فرصة ؟
و لا لو بعد ما إترقي جالك و قدرك و إداك جزء حتي لو صغير من المبلغ و قالك دة إثبات حسن نية بس محتاج فرصة أكمل الباقي ، ساعتها فعلا هاديله فرصة .
بالنسبة بقي للسيسي ، لو نسينا الدم و الكدب و النفاق ،
فيه قرارات كتير في إيده مش محتاجة إلا جرة قلم ،
قرار جمهوري بالإفراج عن كافة المعتقلين السياسيين ، إيه ؟ هاياخد ٣٠ ثانية ، وقت حضرته لا يسمح ؟ و لا فيه حد هايعترض ؟ و لا خايف منهم ؟
قرار جمهوري بإلزام كافة مؤسسات الدولة بتطبيق الحدين الأدني و الأقصي بدل ما هو حبر علي ورق . برضه خايف من إيه انه يقول كدة ؟ ما إللي بياخدوا ملايين موجودين و البلد ما شاء الله خرابة ، يعني زي قلتهم .
قرارين مش محتاجين أي حاجة و لا أي فرصة ، ساعتها تقولوا إديله فرصة ، و ساعتها فعلا ممكن نديله فرصة .
يا ناس دة مرسي ضحك علي الشعب و عمل ديوان مظالم حتي لو بالكدب ،
السيسي واخدها بلطجة و مستكبر ياخد أي قرار في صالح أي حد .
ساعتها يبقي إثبات حسن نية و إديله فرصة ،
و طبعا لو دة هايتعمل كان إتعمل إمبارح بدل ما يبقي أول قرار ان عدلي طرطور ياخد قلادة النيل مكافأة علي سلق القوانين إللي بيبيعوا بيها البلد .
حزب إديله فرصة ، انت فاشل بتدي فرصة لفاشل .
بتبدأ بإديله فرصة
و تختم بفضيحة و جورسة .
روبا بيكيا
ليست هناك تعليقات:
إرسال تعليق