زار

من الآخر كدة الشعب دة ﻣﻠﺒﻮﺱ ﻭ ﻣﺤﺘﺎﺝ ﻟﺰﺍﺭ ، و لازم نعمله زار
ﻳﻌﻨﻰ ﺷﻴﺦ ﻣﺤﻀﺮ ﻳﺎ ﺷﻴﺦ ﻣﺤﻀﺮ و يا عينى ع اللى هايحضر ، شعب ملبوس و اللى لابسه مش عفريت ، دة مارد ، و فى الزار ندق الدفوف بصوت عالى ،
و الدرابندوخ الدرابدوخ
قتلوا الشباب و سابولنا شيوخ
و اللى يقعوا من التعب ننزل ﻋﻠﻰ ﺩﻣﺎﻏﻬﻢ بالجزمة القديمة و يستحسن بالبيادة و هاتك يا رزع  لغاية ما يطفحوا الكفتة اللى كلوها و يخرجوا من بطنهم المية المالحة بتاعة القناة الجديدة ، و نخرج المارد اللى لابسهم من قفاهم .

برلمان صافيناز

اما صافيناز تطلع تصريح تقول فيه ان الجنسية منعتها من الترشح للبرلمان و ان هدفها كان الترشح علشان كل الشعب يرقص و يغنى ،
بغض النظر طبعا عن انه بيرقص لوحده و الحكومة و الرئيس بيغنوا عليه ،

تخيلوا كدة لو كانت اترشحت و بقت خيا و سما المصرى فى البرلمان ، كان هاقول بقلب جامد ان عندنا فى مصر اول برلمان كوميدى استعراضى راقص ، على مسرح مجلس الشعب ، بطولة صافيناز ، سما المصرى ، يشاركهم البطولة حمدى الوزير ، المسرحية من اخراج المخرج اللاوذعى خالد يوسف .
دة احنا داخلين على ايام سودة أجودعان .

انت مين فيهم

ايه يا عم التيتى تعبتنا معاك ، انت مين فيهم  ، مؤيدينك اتهبلوا مش عارفين يبرروا ازاى ،
بجد انت فشخت الواقع و المنطق يخرب بيتك  . ايه ياعم انت عندك شيزوفرانيا  ولا ايه ؟

قولتلنا انتم نور عينيا ، طلعت عين اللى جابونا و اللى خلفونا  ،

قولتنا امريكا بتساند الاخوان و عايزة ترجعهم الحكم و رايح فى امريكا تقول العلاقة بين مصر و امريكا اكبر من اى مساعدات و امريكا ساندت الجيش ب ٥٠ مريار زولار ،

تقولهم مسافة السكة و لا حد يشوف وشك هناك ،

تقولهم احنا اخوات و يسمعوك فى التسريبات  بتقول عندهم فلوس زي الرز

وتقولنا مش قادر اديك و رايح تعمل حملة ب ٣٠٠ مليون زولار في امريكا لتأييدك و الكدب عليهم ،

تقول مفيش و رايح ترمة مليارات فى البحر بتفريعة و لا ليها اى لازمة ،

تقولنا لازم نتحمل و رايح نرفع مرتبات و معاشات جيش و داخلية و قضاء ،

ايه ياعم التيتى انت مين يا عم بالظبط ، عقدتنا فى عيشيتنا. 

هندسة الاقتصاد

طبعا بعد حديث التيتى لصحيفة وول ستريت ، فنعم نحن نؤيد هندسة الاقتصاد كما قال التيتى ، و لو فيه اقتصاد الهندسة ما يضرش ، احنا معاك يا تيتى فنحن نؤيد هندسة الاقتصاد و التي معتمدة على الاساس والمنطق المتضخم علي طاولة البحث ، و الانتقال من الوضع طويل القمة من وعي الواقع المتغلغل في فى الانحدار قصير التيلة ، و تحقيق اقصي تقدير متوقع فى التخريب و التزنيق بحيث لا يتبدد مع صلاحية التجارة فى التفريعة لمواصلة الحصول على الايزو ٦٠٠٩٠٠٠ و الايزو ٢٠٠ ، فى تأهيل عمال  يستقون المدي الطويل من الاحساس المتوسط و القصير الأمد فى رفع مستوى دخل الفرد و تحقيق التقدم بتطوير العشوائيات فى جزيرة البط .

رئيس فاشل

يعنى ٥.٤ مليار دولار تمن الطيارات الرافال ، يعنى ٤٣.٢ مليار جنيه مصرى ،
٨.٣ مليار دولار تمن سفينتين ميسترال ، يعنى ٦٦.٤ مليار جنيه مصرى ،
نضيف عليهم تكلفة حفر القناة الجديدة ٣.٢ مليار دولار يعنى ٢٥.٦ مليار جنيه ،
و تكلفة الانفاق تحت القناة ٤ مليار دولار ، يعنى ٣٢ مليار جنيه ،
حفل الافتتاح للقناة ٣٠ مليون دولار ، يعنى ٢.٤ مليار جنيه
المؤتمر الاقتصادى ٤٠ مليون دولار على الاقل ، يعنى ٣.٢ مليار جنيه .

يبقى كدة المجموع ١٧٢.٨ مليار جنيه مصرى .

و الباشا فى نيويورك علشان يقابل مندوبى البنك الدولى و صندوق النقد الدولى علشان القروض ، ادينى عقلك و فهمنى لو الفلوس دى تم توجيهها لاصلاح البنية التحتية و انشاء مصانع و استصلاح اراضى و بناء وحدات سكنية ، كنا هانحتاج قروض فى ايه و كان حال البلد بقى ازاى دلوقتى .

رئيس فاشل ، حكومة فاشلة
بس البرادعى خاين و عميل
و ٦ ابريل ممولة من امريكا

التيتى بيحكم

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

ماما قالتلى
سيبك م التيتى
دة بيخطف على طول
لبس نص الشعب قضايا
و الباقى مقتول
راح التيتى قايل لأ
حتى لو جنب الحيط
هاجيبك برضه و اقول ارهابى
و انك من دول او دول

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

ناس بتطنش
و ناس بتهبش
لا شايفة و لا سامعة
و لا سامعة
و مسلمة ودانها بس
لإعلام ابو لمعة
ابو لمعة

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

حكومة فلة

حكومة حفرت قناة سويس جديدة ،
و اتفقت على عاصمة ادارية جديدة ،
و عملت مليون وحدة سكنية ،
استصلحت مليون فدان ،
و حلت مشكلة الكهربا ،
و حلت مشكلة سد النهضة و قالت انه زى الفل ، و حلت مشكلة البطالة بعربيات الخضار و التوك توك ،
و رفعت الدعم من اجل مصلحة محدودى
الدخل ،
و فكرت تقتحم الفضاء ، و حلت مشاكل التعليم ان ولاد الاسياد يحولوا براحتهم و يدخلوا اى كلية فى اى محافظة ،

حكومة عملت بلاوى

و رغم كل دة أقالوها ، يا نهار اغبر ، كل الانجازات دى و يقيلوها ، امال الحكومة الجديدة هاتعمل ايه ؟

حلول حلزونية

احلى حاجة ان الحكومة الانتيكة بتاعتنا عندها حلول حلزونية لكل المشاكل ، طبعا فى الفترة اللى فاتت الشعب المصرى مر بمشكلة كبيرة مع غلاء الاسعار ، و كيلو اللحمة وصل ل ١٠٠ جنيه ، و حكومتنا الرشيدة باعلامها المتميز حلت المشكلة على ٣ خطوات ، و كانت حلول رائعة ، طبعا الحكومة مش هاترخص الاسعار دة مستحيل للحد من انحراف الفقراء من الشعب لو اتوفرت الفلوس فى ايديهم ،

اول خطوة بدأت بيها الحكومة لحل مشكلة ارتفاع اسعار اللحمة ، حملة بلاها لحمة ، يا عالم غالية ما تاكلوهاش ، و احنا بكدة بنحارب الغلاء بالاستغناء ، و بدأ الاعلام بتاعنا يركز على الحملة و يقول للناس ما تاكلوش لحمة علشان الاسياد ياكلوا لوحدهم .

طبعا بعد فشل اول خطوة بدأت تانى خطوة للقضاء على المشكلة ، انتشار لحوم الحمير فى كل مكان  ، مسكوا حمارين هنا ، و ١٥ حمار هناك ، و جحش مدبوح ، بناقص اللحمة يا شعب دى لحمة حمير   ، بطلوا اللحمة .

اكيد بما اننا داخلين على عيد الاضحى و كله عايز لحمة فى عز الأزمة ، لازم الحكومة تاخد الخطوة التالتة ، و طلع شيوخ السلطان و يقولوا تضحى بخروف ليه اما ينفع تضحى بفرخة ، تضحى بعجل ليه و ممكن تضحى بدكر بط ، دة لو غنى يعنى و تقدر تشترى دكر البط .

و بكدة حكومتنا اللولبية ،
أوجدت حلول حلزونية ،
لمشكلة اللحمة المستعصية ،
علشان الشعب يموت م الجوع ،
و ينهبوا براحتهم التكية ،
ماهى اسياد و عبيد ،
الاسياد فى قصورهم  ،
و العبيد تحت بير السلم مستخبية ،
بلاها لحمة يا بهية ،
بلاها تحلمى بعيشة هنية ،
حد قالك فى يوم انك هاترتاحى ،
و انتى بتحلمى براحة ،
خليكى مستنية .

آخر لعب

التيتى يقوم
فرحان من النوم
فى البانيو يعوم
و هات يا لعب

و مجدى يهب
ع الشعب يشب
يقتل و يدب
آخر لعب

و الزند حديد
اسياد و عبيد
بقضاءه يشيد
و هات يا لعب

و قدرى ضريبة
شلة هليبة
ودانا فى مصيبة
و آخر لعب

و شكرى توهان
مقضيها جنان
مكسيك لبنان
و هات يا لعب

و اهو عنده هلالى
يغلط ما يبالى
فى الإملا ضلالى
و آخر لعب

و شريف اسماعيل
فى وزارة عناتيل
و فسادها طويل
و هات يا لعب

التيتى يقوم
فرحان من النوم
فى البانيو يعوم
و هات يا لعب

حكومة عيانة

احنا الحمد لله عندنا حكومة جديدة زى الفل ، تم اختيارها بعناية ، و على الفرازة ، حكومة برعاية اللمبى ، من الآخر احنا اول دولة جابت حكومة عيانة عايزة تتعالج

عندنا مثلا وزير تعليم الدغ فى ال ط   و كلامه كله غلطات املائية

عندنا وزير عدل عنده انيميا فى العدالة و تشنجات فى احكام القضاء

عندنا وزير صحة عنده ضمور فى المستشفيات و فقر فى الضمير

وزير مالية عنده تيبس فى الدعم و تضخم فى الضرايب و تآكل فى المرتبات

وزير ثقافة عنده نقص ثقافى و تراكم فى السلبيات

و ادى اخرة البلد اللى تمسك حكومتها لواحد صايع ضايع .

الرجالة اللى بتحط التي شيرت فى البنطلون ، بيرسموا على البنات اللى بتحط الموبيل فى الطرحة ، و يجيبوا عيال يحطوا الآيس كاب فى الشراب ، عادى يعنى .

١٢ مليون زورار

بعد الواحد ما شاف الصحافة الاجنبية فى موضوع المكسيكيين اللى اتقتلوا غلط ، و كل واحد هاياخد تعويض ١٢ مليون زورار ، بيحزن على نفسه ،
دة انا بابقى لابس قميص ب ٦ زورار
و كرافتة مربوطة
و جاكتة مقفولة
و اتقتل ، يتقال عليا ارهابى و ما يتدفعش فيا زورار . و لو اخدت ١٠ جنيه باروح مبسوط .

احنا

احنا اللى قلنا فى امثالنا مين فات قديمه تاه ،

و احنا اللى غنينا ، و عايزنا نرجع زى زمان ، قول للزمان ارجع يا زمان

و احنا اللى مشينا جنب الحيط

و احنا اللى يا بختنا بنبات مظلومين و لا نبات ظالمين

و احنا اللى مطرح ما بنحط راسنا نحط رجلينا

و احنا اللى ان فاتنا الميرى نتمرغ فى ترابه

و احنا اللى بنشيل القرش الابيض علشان مستنيين اليوم الاسود

احنا اللى قلنا معاك قرش تسوى قرش

و احنا اللى بعد النكسة رفضنا تنحى عبد الناصر

و احنا اللى خلعنا مبارك و جيبنا الاخوان و خلعنا مرسي و جبنا العسكر تانى ، مستغربين ليه ، دة احنا المصريين ، اللى غنوا اخترناه ، و اللى غنوا تسلم الايادى ، و اللى قالوا يسقط حكم العسكر ، و اللى قالوا الجيش و الشعب ايد واحدة و لازم رئيس عسكرى ، و اللى قالوا و اللى قالوا و اللى قالوا ، دى طبيعة شعب ، شعب مريض نفسيا و محتاج يتحجز فى الحجر الصحى .

بصراحة الراجل تعب

بصراحة التيتى تعب مع العالم كله ، مش عارف هايلاقيها منين ، من جوة البلد و لا من برة البلد ، الراجل دة شمعة تخترق فى سبيل السكرانين ، الراجل عايز مساعدات و معونات و منح و قروض من صندوق النقد الدولى و من الاتحاد الاوروبى ، و كلهم بيضغطوا عليه  ، فين الديموقراطية ، فين المهلبية ، فين البرلمان و الراجل كل ما يسافر بلد نفس الاسئلة و نفس الشروط ، هو ما كانش فى دماغه برلمان اصلا ، بس الضغوط ، ماهو مفيش الا بالبرلمان ، اضطر يقول لميركل مستشارة المانيا ، خلاص جهزى الرز و قبل آخر السنة هايبقى فيه برلمان ، الضغوط كانت اقوى منه ، صعبان عليا ، هاعيط ، هاعيط ،
دة الراجل من تضحياته فى سبيل مصر خد السلطة التنفيذية و التشريعية و القضائية فى جيبه ، بقى يشرع القانون اللى يريحه فى شغله ، طب اهو دلوقتى اتزنق فى برلمان ، و اتحددت الانتخابات البرلمانية ، يسكت و ما يضحيش علشان مصر ؟ لأ طبعا ، حاليا حملة شرسة لتعديل الدستور لالغاء اى صلاحية للبرلمان و تهميشه تماما ، و اللى قالوا نعم ع الدستور و رقصوا قدام اللجان ، هما نفسهم اللى بيهاجموه و عايزين يعدلوه .
و الضرب فى الميت حرام
و على رأى الشاعر اللى هو انا

آه يا بلد فيكى الجهل بالقنطار
ناس بتموت م الجوع و ناس معاها بالمليار
حمار يحكم و يتحكم و بيطبله الف حمار
لا اتقدمتى خطوة يا بلد ، و كل يوم تزيدى مرار
و آه يا بلد

اهو قال

السيسى قال فوضونى علشان اقضى على الارهاب ، و الحمد لله
قضى على العدل
و تكافؤ الفرص
و حرية التعبير
و المساواة
و العيش و الحرية و العدالة الاجتماعية
و ضيف عليهم السياحة و الاستثمار
بس لسه نحنوح عين امه بيحارب الارهاب و ما قضاش عليه .

فتح الباب

احنا عاملين زى اللى بيحاول فتح باب مقفول مش راضى يتفتح ، تزق فيه ما بيفتحش ، تضربه بكتفك ، كتفك يوجعك و هو مكانه ، تجيب ناس يزقوا معاك ، برضه ما بيفتحش ، و ييجى عيل صغير يقولك ، عمو عمو ، دة بيفتح من الناحية التانية ، انت بتفتحه غلط .

اللى غايظنى

اللى غايظنى ، و حازز فى نفساويتى و مدمر  روحى المعدنية ، و بيخلينى متأكد اننا فى دايرة مقفولة .
ان هما هما نفس الناس من اللى عملوا الثورة فى يناير ،
الناس اللى قالت الجيش و الشعب ايد واحدة ،
هما اللى قالوا الجيش حما الثورة ،
هما اللى اشتركوا فى برلمان قالوا عليه برلمان الثورة ،
هما اللى صدقوا تانى الاخوان اما قالوا مش هانرشح حد للرئاسة ،
هما نفسهم اما الاخوان طلعوا كدابين و رشحوا الشاطر و بعها مرسي ، عصروا لمون و انتخبوا مرشح الاخوان ،
هما اللى نزلوا ضد مرسي اللى عصروا لمون و انتخبوه ،
هما اللى مضوا على تمرد لعزل مرسي  ،
هما اللى قالوا شعب و جيش و داخلية ايد واحدة ،
و هما اللى صدقوا ان الجيش مش طمعان فى سلطة ،
و هما دلوقتى برضه اللى عايزين يمشوا السيسى و بيدعو للوحدة مع الاخوان .

على فكرة العيب فى الناس دى مش فى العسكر و لا الاخوان .
فيه واحد بيفهم من مرة ، من مرتين ، انما ٣٢١٥ خاروق و لسه ما فهمش ، دة يبقى بقى !!!!!!
ما علينا .

الهروب التكتيكى للفوج المكسيكى

اللى حصل مع الفوج المكسيكى دة شئ غريب ، هما كانوا جايين رحلة فى الصحرا و لا رحلة للآخرة ، غرابة اللى حص فى الحادثة نفسها ، اللى فاكرة قبل الحادثة بنص ساعة نزل خبر الجيش يدمر مجموعة من الارهابيين فى الصحراء الغربية بالقرب من الواحات ، و بعدها على طول ضرب فوح سياحى مكسيكى بالاباتشى ، لفت نظرى اوى موضوع الاباتشى ، دى طيارة هجومية بتطلع فى مهام محدودة مش مراقبة يعنى او استكشاف ، و ضربت ٤ سيارات بدون اى تحذير او حتى انذار ، رغم انهم ما مثلوش اى تهديد ليها ، عامة بعد ملابسات الحادث كلها تم اثبات اقتلك الاول و بعدها اشوفك ارهابى و لا لأ ، لو مصرى اصورك برشاش و اقول ارهابى لو مكسيكى تبقى دخلت منطقة محظورة ، يا سواد السواد يا جدعان على تعليقات الحمير السيساوية ذوات الاربع ، اللى يقول دول كانوا بينقبوا على دهب و اللى بيقول دول كانوا بينقبوا على آثار و اللى يقول دخلوا منطقة عسكرية ، و اللى و اللى و اهو كله مهلبية ،
انا بقى اما يتصل بيا الحج زلاطة المكسيكى اقوله ايه ، انا اعمل زى التيتى و اهنيه بالعيد الجومى للمكسيك ، و حاليا طبعا مفيش مكسيكى ارهابى عميل خائن فاسق داعر هايهوب من البلد ، دول اصطادوهم بأباتشى يابا ، هو العمر بعزقة ، اكيد المجلس الأعلى للعالم ليه يد فى الموضوع دة .
و كما قال الشاعر اللى هو انا
مع المسيكى
هروب تكتيكى
و بكرة تفرقع
فيا و فيكى

مش فيكى عبده بقت المثالية
و سما هاتبقى تحت القبة نايبة برلمانية
يبقى الاباتشى لازم تضرب مجموعة سياحية
و هذا قمة الاعجاز العلمى .

بلد انتيكا

و بعد كل اللى بيحصل
و اللى لسه هايحصل
و اللى راح و اللى جاى
و اللى فساده متأصل
و كله كان
و كان يا مكان
بلد انتيكا
دقى يا مزيكا
عنوانها الوحيد
الرقص ع السيكا
و مع الرقص
و تسلم الأيادى
و بشرة خير
بتفرم الانسان
كان ياما كان
كان فيه ناس
زمان بتحلم
و حلمهم قلب كابوس
ما صدقوا جابوا الفانوس
و طلع المارد
طلبوا حقوقهم
بس يا خسارة
حتى المارد فشل
فى رد الحقوق
قال مش هاقدر اساعد
و انتم خايفين فى الشقوق
اصلها انتيكا
دقى يا مزيكا
عنوانها الوحيد
الرقص ع السيكا
و مع الرقص
و تسلم الأيادى
و بشرة خير
بتفرم الانسان
اللى كان فى يوم بيحلم
انه يكون انسان .

كلنا فاسدون

كل اللى ماسكين مناصب فى البلد فاسدين واذا حد طلع عنده ضمير بيتم التخلص منه ويقولوا عليه فاسد ، شفتوا الخيبة .

كل اللى ماسكين البلد بيهرتلوا  ، انما لو واحد مش بيهرتل ، يخلصوا منه بتهمة الهرتلة

كل اللى ماسكين البلد بيقتلوا ، و لو واحد مش بيقتل بيلبس قضية قتل

كل اللى ماسكين البلد بيسرقوا و لو واحد مش بيسرق ، بيلبس اجدع قضية سرقة و يخلصوا منه

الله يخرب بيتنا احنا يا شيخ

الشعب المبلول

الشعب المصرى المبلول
بلغنى ايها الشعب المبلول , اللى اتعود ع الفول
انك خلاص شربت المقلب , و ختمت معاك بحكومة محلب
و سلمتها تانى للعسكر ، اللى بيعمل كحك بسكر
و ضحكوا عليك و قرطسوك , و بيطلعوا عين اللى جابوك
و غنيت تسلم الأيادى , و دة جيشى و بيحمى بلادى
بس رجعت تانى لمبارك  , و مش اخترت الكلب اختارك
قمت لبست قناة سويس ، و حكومة كلها تهييس
و ما تنساش عاصمة جديدة  , و انت يا اهبل ع الحديدة
جبت الحرامية الشطار ، بيبعوا بلدك بالقنطار
و لسه زى ما انت يا شعب , عايش بتعانى نفس الغلب
بتعانى غلاء الاسعار , و مفيش رقابة على التجار
بتعانى فقر و امية , بتعانى ان مفيش مية
بتعانى قهر و عبودية , بتعانى من ظلم الداخلية
و كل يوم تطلع قوانين ، تكح نراب و تسب الدين
و مفيش تنفيذ اى وعود , و لا حتى كأنك موجود
خليك كدة مظلوم تعبان , خليك مش عايش انسان
يا شعب مشيتنا وراك ، ورم خلاص قفانا و قفاك .

بيحارب الفساد

التيتى قال ايه بيحارب الفساد ، اقال وزير زراعة علشان يحارب الفساد ، هع هع هع فساد ايه سيادة حضرتك يعنى ؟
فساد حكومتك ؟
فساد وزراء انت اللى اخترتهم و عينتهم ؟ يعنى لو بتحارب فساد حكومة مبارك نعديها و نصدق كلامك
لو بتحارب فساد حكومة مرسى ، نبلعها
أنما بقى تقرطسنا و تقول انك بتحارب فساد حكومتك ألى أنت معينها و مختارها اسم اسم وزير وزير ؟ 
يعنى أنت اللى معينهم و أنت اللى مختارهم ، بتضحك على مين يخرب بيتك ؟
الكارثة بقى أن المطبلاتية عمالين يهللوا و يطبلوا أن التيتى بيحارب الفساد و هاينضف البلد ،
من مين هاينضفها يا فسل منك له لها له ؟ 
من الوزراء بتوعه ؟  من حكومته ؟

و كما قال الشاعر اللى هو انا
برطع يا تيتى براحتك ما بين ارهاب و فساد
و البلد بقت تكية و تاكسى من غير عداد
و منه له
جاى رايح
منه له

المجلس الأعلى للعالم

الإعلامي تامر أمين على روتانا مصرية اعلامى جهبز جابها فعلا من الآخر ، و ان فيه مؤامرة كونية على مصر يديرها المجلس الأعلي للعالم ،  المجلس الأعلى للعالم دة بقى اللى بيدمر الدول ، يعنى فارشين الخريطة قدامهم و قاعدين بقى ، عايزين زلزال هنا ، و نعمل فيضان هنا ، فى الحتة دى نعمل عاصفة ترابية ، و فى المنطقة دى عايزين بركانين و شرخ فى القشرة السفلية ، و ممكن لو ما جابوش نتيجة يجيبوا الخلاصة بقى و من الآخر ، اضربوا البلد دى بنيزك ، او نعمل تسونامى صغنن ، و طبعا حسب كلام الجهبز تامر امين ، المجلس الأعلى للعالم مركز على مصر أوى الايام دى ، و مغرقها بالوظة ، و دخلنا فى حرب الجيل التاسع المتعلقة باستخدام البالوظة فى خلع ابن المحظوظة ، و فى الاجتماع الاخير للمجلس الاعلى للعالم قرر اغراق مصر بالمهلبية المحلبية مع تمكين الشفحتاريت من القرنبيط فى الغيط ، اسيبكم بقى علشان اروح اكمل الاجتماع مع المجلس الأعلى للعالم ، علشان زمان اشقاءنا فى المريخ و زحل وصلوا للاتمام المؤامرة على مصر .

عكاشة اسلوب حياة .

حقل الغاز

يعنى مش فاهم
لقينا اكبر حقل غاز فى البحر المتوسط و البحر الاحمر و مملكة البحور السبعة

احتياطى الحقل من الغاز رهيب يكفى المجموعة الشمسية ١٠٠٠ سنة قدام

ايه دة ؟ لقينا حقل غاز تانى تحت الحقل الأولانى بمش عارف عشروميت متر

معقولة الغاز من الحقل الاولانى لسه بعد ٤ سنين ، طيب ليه مش دلوقتى ؟ اكيد محتاجين ٤ سنين ندق مواسير

يطلع علينا التيتى و يقول سنواصل التنقيب ، يعنى لا فيه اولانى و لا تانى و بعد ٤ هانعرف اذا كان فيه و لا كدبة جديدة ، و اللى بتنقب شركة ايطالية و فى الآخر سنواصل التنقيب ، ايه يا عم التيتى كفاية بقى ، جتها نيلة اللى عايزة خلف .

جنينة

وجهة نظر
هشام جنينة طلع و قال ان الفساد للركب و ان فيه وزراء سابقين و حاليين متورطين فى فساد الاستيلاء على اراضى الدولة ، بعدها السيسى اصدر قانون انه من حقه يعزل رئيس الجهاز المركزى للمحاسبات ، بس لو نفذ فعلا و عزله هايكشف نفسه قدام المؤيدين قبل المعارضين انه بيحمى الفساد ، و فى نفس الوقت الحملة الشرسة اللى اتعرضلها هشام جنينة فى اعلام السيسى خلت موقفه اقوى ، لأنه ما ردش عليها و كان رده ان كلامه بالأدلة و المستندات ، يبقى الحل ايه ، ايه ؟
كشف اكبر قضية فساد متورط فيها وزير الزراعة و بعض الوزراء ، و اضحى بالحرامى الغبى علشان احمى الباقيين ، و السيسى بيحارب الفساد ، و السيسى هايقضى على الفساد و السيسى زعيم الأمة ، و بكدة حجتك يا جنينة بخ ، و يقدر السيسى يعزله بكل سهولة . لأنهم عايزين كدة كدة يخلصوا منه بأى طريقة ، و لازم فيلم هندى علشان الرواية تبقى محبوكة .

العكش

نقلا عن قناة الفراعين ، منذ قليل و عاجل نجاة توفيق عكاشة من محاولة اغتيال .

بالليل بقى هاتلاقى دكر العكش قاعد على المصطبة او عمل مداخلة و بيحكى تفاصيل محاولة الاغتيال اللى حصلتله ، هايقول ايه

عليا الطلاق المخابرات اليابانية هي اللي دبرت محاولة الاغتيال علشان انا خطر علي الاتحاد الاوروبي واعتقادا منهم اني السبب الرئيسى في تفكيك الاتحاد السوفيتي و التمرد فى نيجيريا و عزلة جنوب افريقيا ، و هزيمة الامريكان فى خليج الخنازير ، و لا انسى دورى فى توجيه ضربات موجعة فى مقاومة حروب الجيل الرابع و الخامس و التاسع .

دون كيشوت

طويلة شوية بس هاتعجبكم

السيسى بالضبط عامل زى دون كيشوت ، ايه العلاقة بينهم و اشمعنى دون كيشوت ؟

نبدأ برواية  دون كيشوت دى رواية اسبانية ، الناس سمعت عنها بمحاربة طواحين الهوا ، بس الرواية اعمق من كدة ، دون كيشوت دة واحد فضل يقرأ عن الفرسان كتير و يتخيل نفسه اعظم فارس و صدق نفسه و عاش فى الوهم انه اعظم الفرسان ، و لأن كله وهم لازم يخترع اعداء ، و طبعا كأى فارس لازم يبقى ليه تابع ، جاب فلاح ساذج و اقنعه انه هايبقى التابع بتاعه فى مقابل جزيرة يحكمها ، الفلاح لأنه ساذج و من قريته صدقه و مشى معاه ، بدأ دون كيشوت يبحث عن الاعداء ، بس مفيش اعداء فبدأ يخترع اعداء ، طواحين الهوا فى المزارع دى وحوش لازم يهاجمها ، هو متخيلها كدة ، طبعا من اعظم معاركه معركة الأغنام ، و دى قصتها انه شاف من بعيد قطيع من الاغنام بيجرى ناحيته و الغبار حواليه من كل ناحية ، فتخيل دون كيشوت ان دة جيش كبير بيهاجمه و قرر يحاربه .
طبعا اللى كان بيشيل الطين كل مرة التابع بتاعه اللى هو الفلاح الساذج ، دون كيشوت بحصانه كان بيهرب و الفلاح هو اللى بيتعرض للاصابات من ورا المصايب اللى بتحصل .

طيب دة دون كيشوت ، السيسى بقى ،
بدل ما يقرأ حلم انه لبس اوميجا و انه عبد الناصر هذا الزمان و برضه عاش فى الوهم و صدق نفسه ، و طبعا علشان يبقى فارس الفرسان لازم يخترع اعداء ، اخوان و ارهاب و تفجيرات ، و مؤامرات خارجية و داخلية و عملاء و طابور خامس ، اعداء كتير اوى ، و طبعا الشعب الساذج صدقه و صدق انه هايقدر يعيش و دخله هايزيد و يقب على وش الدنيا ، دون كيشوت بتاعنا بيحارب اعداءه ، و كله وعود ان بعد القضاء على الاعداء هاتبقى اد الدنيا ، و الشعب الساذج ماشى وراه و هو اللى بيدفع تمن حماقاته ، رفع دعم و قانون خدمة مدنية و غلاء اسعار ، و غيره و غيره ، الشعب الساذج هو اللى بيدفع تمن الوهم و المصايب اللى بيعملها دون كيشوت .
و دون كيشوت بتاعنا مش فاضى للشعب دة بيحارب طواحين الهوا .