افتح الجورنال

ياض يا بيسو ،

ايوة يا معلم

افتحلى كدة الجورنال و اقرالى الاخبار

حاضر يا معلم

الفريق مهاب مميش فى تصريح ان قناة السويس الجديدة ستدر دخل ١٠٠ مريار زورار

سيبك يا ابنى من الجيش

دة رئيس هيئة قناة السويس يا معلم

شوفلنا خبر تانى

السيد اللواء محافظ الغربية يفتتح ....

يا ابنى سيبك من الجيش ، شوف خبر تانى

اللواء رئيس الرقابة الادارية

يا ابنى كفاية لواءات بقى

السيد الدكتور محافظ الاسكندرية

اخيرا حد بره الجيش كمل يابنى

بصحبة اللواء سكرتير عام المحافظة

امشى يا ابن الكلب من هنا ، مش عايز اعرف اخبار

يا معلم فى تصريح من رئيس الجمهورية بيقول لا و الله ما حكم عسكر

امشى يا ابن التييت ، عبوك عبو الجرايد ، مش عايز اعرف اخبار .

كفاية استكرار

خلال اسبوع
انفجار فى اوتوبيس نقل جنود و اصابة ١٨ مجند ، غير انفحار دبابة و مقتل ضابط و ٣ مجندين و انفجار سيارة مدرعة و مقتل ضابط و اصابة ٣

غرق معدية فى الوراق و وفاة ٤٠ شخص و لسه البحث جارى عن باقى الجثث

حريق مصنع أثاث فى العبور و وفاة ٣٢ شخص و اصابة ٢٢

تسمم ٣٢ طفل بفعل محلول معالجة الجفاف المغشوش فى الصعيد

واحد اتقتل اهله حرقوا ٤ منازل اقارب اللى قتله فى المحلة

كفاية استكرار ابوس ايديكم

قال ايه

قال ايه سيتم توزيع ٢١ الف عملة ذهبية تذكارية على الضيوف فى حفل افتتاح القناة ، اينعم الشعب مش لاقى ياكل بس عادى ، مفيش مشكلة ، و ليه اصلا الشعب ياكل ؟

ثم احنا هانوزع مراكب صيد ، يعنى كله هايصطاد و السمك هايبقى للركب ، و هانقلبها زفارة ، و كله هايبقى زفر يا معلم

واحد اخوانى كلب عميل هايقولى اشمعنى مراكب صيد يعنى ؟
اقوله يا كلب غاطس ٧ متر هايعدى ايه يعنى غير مراكب صيد يا اهبل .

و سمعنى سلام كبير اوى
و شحات و مد ايديه
و كسر خاطره حرام

موعدنا فى حفر القناة التالتة يا ولاد الهابلة ، اصله بيقولك ما تخافش م الهابلة ، خاف من خلفتها .

مسافات

احنا دولة محترمة ، غصب عن اى حد دولة محترمة

احنا اى حاجة تحصل فى قارة افريقيا ، ما بنستناش و بنقفل محطة مترو انور السادات على طول و نقول بيكيااا

طب لو فى سيناء فى قارة اسيا ، احنا هانلعب يعنى ، بنقفل ميدان التحرير فى قلب القاهرة عروس افريقيا يا ناسي انت و يا ناسية

طيب لو حصل انفجار فى اوروبا ، على طول نقبض على المنتمين لحركة ٦ ابريل فى شمال شرق افريقيا خصزوصا بتوع روكسى و الكوربة

طيب لو الانفجار بقى فى امريكا ، نروح احنا نمسك اللى فى المنيا و المنوفية و ناهيا و اسكندرية يا ويكا

اسكتوا مش فجروا القنصلية الايطالية ، و احنا سكتنا يعنى ، قبضنا على شوية ناس م الغربية

هههههه احنا بلد لا نؤمن بالمسافات ، و التعلب فات فات ، و فى ديله شمع على مغات .

سندريلا

بعد ما السندباد طلب يتجوز سندريلا بعد ما يخلى ميكى ماوس يطلقها ، و عرض عليها شبكة كبيرة من مغارة على بابا اللى كان متجوزها قبل ميكى ماوس ، بس بعد الجواز السندباد اتقلب ١٨٠ درجة ، رجع لعلى بابا المغارة بتاعته و طلع الأربعين حرامى و عصابة القناع الأسود من السجن ، و دخل مكانهم ميكى ماوس و بطوط و عم دهب و عم شكشك و بوجى و طمطم و زيكا و زيكو و لما فطوطة اعترض قتله هو و سمورة ، و تم اغتيال كمبورة علشان ما يبعبعش بأى حاجة من الاسرار اللى عندة ، و بقى قاسم السماوى هو اللى فوق و باقى البلد قاعدين على قهوة الموظفين ، و اما جه المواطن الكحيان يطالب بحقه ، طلع عليه فلاح كفر الهنادوة يبهدله ع الفضائيات ، سندريلا رفضت تعيش كدة و قالت للسندباد انت وعدتنى تجيبلى الشبكة من مغارة على بابا ، و قامت رافعة قضية و فى اول جلسة تم الحكم بأن الشبكة عند ام ترتر و ان على بابا و السندباد ابرياء مما هو منسوب اليهم ، و تم اصدار امر بالقبض على ام ترتر و الواد ترتر .

تركيا و داعش

طبعا بعد فتح تركيا قواعدها الجوية للطائرات الأمريكية لمساعدة امريكا فى ضرب داعش حط علامات استفهام كتير ، علاقة تركيا بداعش علاقة غريبة شوية ، خصوصا ان داعش ضد الأكراد ، و تركيا مشيت معاها بمبدأ عدو عدوى صديقى ، يعنى تركيا مشيت مع داعش بنظام لا اساعدك و لا احاربك و لا اساعد فى الحرب عليك ، ماليش فيه يعنى ، و طبعا دة لأن تركيا رافضة رفض تام قيام دولة كردية جنوبها ، لأن معروف ولاء الأكراد التام و محبتهم لإسرائيل ، و قيام دولة كردية موالية لإيران و اسرائيل جنوب تركيا ، دة كارثة ليها و تهديد مباشر للأمن القومى التركى ،
بس ايه اللى اتغير الايام اللى فاتت خلى تركيا تغير موقفها ، حصل كذا حاجة

اولا الاتفاق النووى بين الغرب و ايران و اعتراف الغرب بالمفاعلات النووية الايرانية و رفع العقوبات من عليها و دة هايخلى ايران نفوذها يذيد فى المنطقة .

ثانيا الضغوط اللى على حلف الناتو لطرد تركيا بسبب رفضها ضرب داعش و مساعدة قوات التحالف .

ثالثا التفجيرات اللى بدأت تحصل فى تركيا و اعلان داعش مسئوليته عنها

الأهم بقى ان العالم كله تعاطف مع الاكراد و بيطالب بدولة مستقلة ليهم

كدة تركيا لقت نفسها هاتخسر كل حاجة من كل ناحية ، فقالت تمسك العصاية من النص ، تساعد فى ضرب داعش و فى نفس الوقت تنشر قواتها على الحدود مع سوريا علشان تضمن تحجيم الاكراد فى حالة حاولوا يستقلوا بدولتهم .
تركيا فى موقف لا تحسد عليه و بعد الاتفاق النووى بقت ايران هى الحليف الاول لامريكا بعد اسرائيل ، و المصالح تكسب .

الهابلة

فيه مثل بيقول هابلة مسكوها طبلة ، بس الهابلة ما بتسكتش اصلها هابلة ، تخيل بقى بلد هابلة ، هابلة ازاى ، اقولك هابلة ازاى

الهابلة اما يبقى اكتر من نص شعبها تحت خط الفقر و تقولك هانعمل وكالة فضاء

الهابلة اما يبقى مرتبات جيشها و داخليتها و قضاءها كل يوم بتذيد و باقى الشعب مش لاقى ياكل

الهابلة اللى بتلم تبرعات من الناس الغلابة و تتنازل عن الضرايب لرجال الاعمال

الهابلة اللى اما تنزل تتظاهر تطلب حقك تاخد تأبيدة بس لو حرامى سرقتها تاخد براءة

الهابلة اما تيجى تسيبها و تهاجر و تعرض نفسك للموت فى هجرة غير شرعية ، لو اتمسكت بتهاجر تاخد ٣ سنين سجن علشان سايب الجنة و ماشى

الهابلة اللى لو قلت لأ تبقى ارهابى و من حقهم يشنقوك و يضربوك بالنار

الهابلة اللى الجوامع فيها تدفع فواتير كهربا و نوادى جيشها تتعفى من كل حاجة ضرايب و كهربا و مية و خلافه

الهابلة اللى تحفر ترعة يمشى فيها مركب صيد و تقول قناة جديدة ، رغم انها اصلا ما تجيش ربع القديمة

الهابلة اللى كل يوم تصفى ارهابيين فى سيناء و برضه كل يوم تفجير يموت فيه مجندينها و ضباطها

الهابلة اللى اعلامها مفهمك ان كل الدنيا عاملة مؤامرات عليها علشان يحرموك من الرفاهية اللى انت فيها

تفتكر هى اللى هابلة و لا هى شايفاك اهبل بتصدق انها بلدك و بتستهبل عليك ؟

قرار عاجل

عاجل
بيان هام من القيادة العامة المصرية نظرا لقرب افتتاح التفريعة الجديدة ، غاطس ٢٤ قدم يعنى ٧.٢ متر ، تقرر الآتى

فى حفل الافتتاح هايبقى كله مراكب صغيرة و يخوت لأن دة آخر ما يقدر يعدى فيها ، بس هانبلغ الاعلام يصور كام سفينة عملاقة فى القناة القديمة و يقول دى فى الجديدة علشان الشعب يلبسها

تكليف كل السيساويات بالزغرطة فى الشبابيك و البلكونات احتفالا بالقناة الجديدة و لازم الاعلام يصورهم و يركز على الزغاريط

طيب لو سيساوية و عايزة تحتفلى و ما بتعرفيش تزغرطى تعملى ايه ؟ يبقى اللى ما بتعرفش تزغرط تنزل قدام بيتها بعد ما تشغل تسلم الأيادى و هاتك يا رقص و هز يا وز فرحة بالقناة الجديدة

طيب و الرجالة السيساوية ، يقعدوا ساكتين ، لأ طبعا تنزل يا دكر منك له تطبل و تصقف لمراتك او امك او اختك و هى بتهز ، احنا عايزين استعراض غنائى سيساوى راقص

طيب و العيال الصغيرة يسكتوا ، لأ طبعا ، ينزلوا بلابيص و يعملوا حركات اكروباتية على اغنية بشرة خير

و لحفظ النظام ، كلفنا وزارة الداخلية بالقبض على كل واحد هايمشى مكشر يوم افتتاح القناة ، و لأنه مش مبسوط و هايفضحنا و يبين للعالم انه مش مبسوط يحاكم محاكمة عادلة و يعدم

اصطحاب الناشطين و الناشطات زى فيفى و الهام و يسرا و اشهر الراقصات ، بحضور حفل الافتتاح و رفع اللافتات فرحين و فرحات بافتتاح القناة

و الله الموفق و المستعان

عيب و النبى عيب

الناس اللى بتشتم فى ثورة يوليو ، و الله عيب عليكم ، دى هى اللى انقذتكم من براثن الملك فاروق ، و محمد نجيب كان هايسلمها لسلطة مدنية بس لحقوه و عزلوه و بقى تحت الاقامة الاجبارية ، عيب عليكم

اينعم استلموها من الملك فاروق و هو ملك مصر و السودان و تابع لمصر قطاع غزة بس برضه عيب ، هاتبقى اد الدنيا كلها مش دول بس

اينعم كانت بريطانيا العظمى مديونة لمصر ب ٤٠٠ مليون جنيه ، بس ما ينفعش ، احنا الحمد لله دلوقتى مديونين لبريطانيا و فرنسا و كل دول العالم تقريبا

اينعم استلموها و الجنيه الدهب ب ٩٧ قرش بس برضه ما يصحش ، دلوقتى لا فيه جنيه و لا دهب

استلموها و البطالة ٢٪ بس عدد السكان اللى زاد مش غلطتهم ان البطالة بقت ٩٠٪

استلموها و كانت مصر اكبر غطاء نقدي في العالم ، بس عادى و ايه يعنى ، دلوقتى احنا اكبر عجز موازنة

استلموها مع اول محطة كهرباء طاقة شمسية في العالم و كانت فى المعادى ، و ايه المشكلة ما الكهربا بتقطع ليل و نهار و الناس عادى و موافقين

استلموها و فيها اكبر استديو في الشرق الاوسط استديو مصر الذي كان ينافس استديوهات هوليود ، بس برضه ما احنا دلوقتى عندنا شارع الهرم و جامعة الدول و احنا ملوك الكباريهات

استلموها و كانت اجمل مدن العالم القاهرة ، و دلوقتى عندنا ابو اتاتا و الوراق و كفر بطاطا

استلموها مع اكبر شبكة ري في العالم ، مش محتاجنها دلوقتى ، ما بقاش عندنا اراضى زراعية اصلا

استلموها مع اكبر بورصة في العالم بورصة القطن ، دلوقتى عندنا بورصة زى الفل كل يوم تخسر ما شاء الله ، اللهم لا حسد

استلموها و الاجانب بييجوا يشتغلوا في المحلات و الكافتيريات ، دلوقتى الحمد لله كله قفل و كله فلس و ما بقاش فيه حتى شغل للمصريين

استلموها و كان اسمها في اوربا مصر ارض الفرص ، دلوقتى بقت ارض الموت

استلموها و اسمها ام الدنيا والمحروسة ، دلوقتى بقت موكوسة

ايه اللى حصل بقى فى ٦٣ سنة ؟

راحت السودان و و اتقسمت شمال و جنوب

راحت غزة

بقينا نشحت من الدول العربية اللى كان ايام الملك فاتح للمغتربين العرب تكية ياكلوا فيها

وانخفضت قيمة الجنية المصري أمام الدولار حوالي ٣٠ ضعف

دين محلى اكثر من ٢.١٦ تريليون جنية دين محلي فقط غير الخارجي

بس برضه المفروض نحتفل و نغنى و نقضيها ، دى الزيطة ارادة شعب ، و نديهم فرصة ٦٣ سنة كمان يمكن يعملوا حاجة .

وجهة نظر

زيارة خالد مشعل للسعودية لفتت انتباه ناس كتير ، و طبعا التقارب دة بدأ بعد الاتفاق النووى مع ايران ، السعودية عارفة ان ايران بمساعدتها للحوثيين جرت رجلها لمستنقع اليمن ، و ان حاليا نفوذ ايران بقى واضح فى العراق و سوريا و اليمن و لبنان ، و ان برفع العقوبات المفروضة على ايران بعد الاتفاق النووى و اعتراف امريكا و الاتحاد الاوروبى بالمفاعلات النووية الايرانية و اذا كان فى المجالات السلمية دلوقتى فأعتقد بمساعدة روسيا و الصين الحلفاء الاستراتيجيين لإيران مسألة امتلاك رؤوس نووية مسألة وقت مش اكتر ، و كله بتمنه ، و دة هايسمح لإيران انها تبقى اقوى دولة فى المنطقة ، و بالتالى فى صراع السنة و الشيعة السعودية مفيش قدامها الا عمل حلف سنى بمساعدة قطر و تركيا ، و علشان يعملوا حلف سنى فى المنطقة العربية لابد من الاستعانة بالاسلاميين و على رأسهم الاخوان ، و دة شئ مؤكد لأن عدم فعله دة معناه تزايد المد الشيعى فى المنطقة ، يبقى كدة اعتقد بالنسبة للسعودية السيسى برة المعادلة و الامارات بتسحب رجلها من مساندته شوية بشوية ، و كدة حرب السنة و الشيعة هاطول المنطقة كلها .

هاتاكلوا مصر يعنى

الحمد لله عندنا فلوس نشتري طيارات رافال
و فلوس ننتج افلام و مسلسلات
و فلوس للقضاه
و فلوس للممثلات و الراقصات
و فلوس لإلهام شاهين و يسرا يروحوا المانيا
و فلوس نشترى بيها من المجر قطارات
و فلوس للاعلام يغيب الشعب
و فلوس للشرطه و الجيش
و فلوس نصرف بيها على اسياد البلد
و فلوس نعمل افتتاح اسطورى لقناة السويس الجديدة ، الترعة اياها
و فلوس نعمل حفل تنصيب
و فلوس نعمل بيها انتخابات و دعايا انتخابية

اما بقى الموظف الغلبان ننقص من مرتبه علشان مفيش 
و الشعب الغلبان هايموت م الجوع علشان ما عنديش
و الشباب الضايع مش لاقى لا شغل و لا سكن ، هاياكلوا مصر يعنى

عماااااااااااااار يا مصر

الحمار ما ينفعش ملك الغابة

الكلام دة للسيساوية ، علشان نبقى واضحين و فاهمين و عارفين ان قوانين الطبيعة بتقول ان الحمار ما ينفعش يبقى ملك الغابة ، ليه بقى ؟

ليه ما ينفعش إلا الأسد ملك للغابة ؟
 
لأنه ما بيخافش من التعالب ، فيعمل معاهم صفقات و يبقى وزير الدفاع بتاعهم .
 
لأنه ما بيعملش حساب للديابة فيحصنهم في دستور الغابة لمدة ٨ سنين و نسي يحصن نفسه

 
لأنه ما بيقتلش و ما بيعتقلش سكان الغابة علشان بيطالبوا بحقوقهم و عمره لا هايقتلهم كلهم و لا هايعتقلهم كلهم
 
لأنه ما بيتفقش مع الضباع السعرانة علشان يسرقوا الغابة سوا .
 
لأنه ما بيبقاش حمار يحكم قدام حيوانات الغابة و يبقي فيه حاكم من خلف الستار متحصن و ما حدش ييجى جنبه  . 
 
و أهم سبب لأن كل حيوان في الغابة عارف دوره و عارف مقامه و ما بيتعداش علي غيره و لا علي قانون الغابة اللى بيقول البقاء للأقوى و عمر الحمار ما هايبقى اقوى من كل حيوانات الغابة .

من الآخر
لا عمرنا سمعنا عن ديب إغتصب غزالة و لا عن أسد حبس أرنب ، و لا عن تعلب سرق أكل الفيل و لا عن ضبع قتل قرد فى حكم الأسد للغابة . 

علشان كدة ما ينفعش غير الأسد ملك للغابة . لأنه ما عندوش مساومات ، ما عندوش صفقات ، ما عندوش خد و هات . 
أي ملك غيره هايبقي فاشل . 
يا ترى بقى الغابة هاتشوف حكم الأسد و لا هاتقضيها كل سنة حمار ؟
 
روبا بيكيا

المواطن المصرى

المواطن المصري هو المواطن الوحيد على وجه الكرة الارضية اللى رغم الأوضة حمام مشترك و من غير سقف و لا مية و لا كهربا و مية المطر اللى فى عز الشتا بتغرقه والمجاري اللي داخلة عليه صيف و شتا  و اللقمة اللى مش لاقيها الا وجبة فى اليوم و اللبس اللى كل كام سنة يجيبله طقم جديد و التعليم اللي مش قادر يعلمه لعياله و غالبا بيخرج عياله من المدرسة يشتغلوا علشان هو و المدام يسترزقوا علشان يعرفوا ياكلوا و رغم انه لا لاقى يتعالج و لا لاقى اى خدمات و لا ادوية و لا مستشفيات
الاعلام بقى مفهمه ان قطر وتركيا و ايران وتونس ودول الاتحاد الاوروبي وأمريكا واسرائيل وداعش و ولاية سيناء و الاخوان والتكفيرين والارهابيين و المريخيين و الصين و اليابان و تنزانيا و سكان كواكب المجموعة الشمسية و القمرية و الحلزونية بيتآمروا عليه علشان يحرموه من العز اللي هو فيه و لازم يضحى علشان العسكر يحموه من كل الغوغاء دول و بالمرة يبقوا بيحكموه و بيحموه من المؤامرات الكونية دى  .
ما هو لو مفيش تهديدات و مؤامرات مش هايحتاج حكم عسكر يحميه ، واخدلى بالك انت ان الشئ لزوم الشئ .

الضباع و الثعالب و الأرانب

قررت حيوانات الغابة القيام بثورة على الاسد الظالم ، و تم اقصاء الأسد من منصبه كملك للغابة ، ثم بدأ الضباع و الثعالب الصراع على من يخلف ملك الغابة فى الحكم ، و اختلفا معا ، و تم حشد الجيوش من حيوانات الغابة تحسبا لقيام الحرب بين الضباع و الثعالب ، و قامت الحرب بين الجيشين ، و عندما تعبوا من القتال قررا أخد هدنة لتهدئة الاوضاع و حصر الضحايا و الأسرى ، و عند حصر الضحايا و الأسرى وجدوا ان كل ضحايا و أسرى الفريقين من الحيوانات الأخرى فى الغابة و اغلبهم من الأرانب .
و دفع الأرانب ثمن الصراع على الحكم بين الضباع و الثعالب .

خايف ننسى شكله

واحد صاحبى امريكى بيقولى هو ليه عندكم فى مصر حاطين صورة السيسى فى كل حتة فى الشارع على التليفزيون ، على طول حاطين صورته ، قولتله دى سياسة ، الراجل اللى اسمه السيسى خايف لننسى شكله ، بيفكرنا بوشه العكر طول الوقت .

الا هما

فلول مبارك سرقوا الشعب كله ، الا هما اللى عايشين

جه الاخوان كفروا الشعب كله ، الا هما اللى مسلمين

جه السيساوية خونوا الشعب كله ، الا هما اللى وطنيين

و التلاتة فلول و اخوان و عسكر جوعوا الشعب كله ، الا هما اللى شبعانين

و بقت التقسيمة تورتة ضايعة لهفها الديابة من المساكين

و قتل بدم بارد ، لأى معارض ، و الباقى طالبوا بحريتهم ، بقوا مساجين

لحد امتى يا بلد ، الخاين يمسك زمامك ، و الحر يتقال عليه خاين من الخاينين

لحد امتى الذل ، و هم طايل الكل ، و دم فى الشوارع و القسمة بقت ناس و ناس تانيين .

الثور و الاسد

اثبتت الدراسات ان الثور هو اقوى حيوان جسديا فى الغابة بين الحيوانات ، و رغم كدة الأسد هو ملك الغابة ، و لو جاع بيفترس الثور و بياكله ، تفتكروا لو الثور عارف انه اقوى من الأسد هايسيب الأسد ياكله ؟ و اذا كان مش الأسد بس اللى لو جاع بياكله ، دة برضه النمر و الفهد لو جاعوا بياكلوه ، بس ليه الاسد ما بيمنعش النمر و الفهد ياكلوا الثور ، رغم ان الثور اكلته المفضلة ؟ لأن لو النمر و الفهد اتمنعوا من اكل الثور ، الثور هايتفرع لمواجهة الأسد ، و الأسد عايز الثور خايف ، و النمر و الفهد مقدور عليهم ، طلعوا و لا نزلوا هايعرف يخلص منهم ، انما لو الثور فاق على الأسد ، الأسد عارف انه مش هايقدر يواجهه علشان جسديا الثور اقوى ، يبقى الحل الثور يفضل مطارد بين اسد و نمر و فهد علشان ما يلاقيش وقت يرتاح و يفكر صح .
دى قصة ثورة يناير بالضبط .

وكالة فضاء

اليوم السابع
مصادر
رئيس الوزراء محلب يناقش انشاء وكالة فضاء مصرية غدا

عامة لو حسيتم بهزة أرضية ١٢ ريختر بعد الخبر دا متقلقوش دول الـ ٨٠٪ اللى عايشين تحت خط الفقر فى مصر بيشخروله مع بعض شخرة جماعية .

مؤيدى السيسى

مؤيدى السيسى عاملين زى واحدة باعت اهلها علشان واحد ماشية معاه ، فسابتهم و هربت و راحت تعيش معاه و اما جوعها و ضربها و شلفطها ، اهلها راحولها بيتها و قالولها مش كنتى سمعتى الكلام ، من الكبر بتاعها قالتلهم بكرة هايتغير و هايبقى احسن واحد و طردتهم شر طردة .

كاس و داير

التخوين دة كاس و داير ، النهاردة تبقى وطنى بكرة خاين ، م البداية كانت لعبة الكراسى الموسيقية فى التخوين ، من مبارك اما قال اللى فى الميدان قلة مندسة و عملاء امريكا و كنتاكى و ١٠٠ دولار رغم انه كان راجل امريكا بس عادى ، لحد نزول الجيش و ضحك على كل القوى الثورية و الجيش و الشعب ايد واحدة و اول ما بدأ يقتل و القوى الثورية وقفت ضده بقوا عملاء و خونة و بياخدوا شريط ترامادول و ٢٠٠ جنيه و هدفهم اسقاط جيش مصر ، جت الانتخابات و القوى الثورية عصرت لمون و بقوا زى الفل و رجالة و وقفوا مع مرسي ، و اما بدأوا يقفوا قصاده بقوا خونة و عملاء و زود عليهم علمانيين كفار ، و خانوا العهد ، بعدها جت القوى الثورية وقفت مع تمرد و ساعدت فيها ، بقوا رجالة و مع الشعب و ثورة ٣٠ يونيو بتكمل ثورة يناير و الجيش و الشرطة و الشعب ايد واحدة ، و اما اعترضوا على الدم ، رجعوا عملاء و خونة و منهم اللى اتقتل و منهم الاى فى المعتقل و السيسى ما بتفرقش عنده الدم ، و طبعا نفس التخوين من الاخوان علشان وقوف القوى الثورية مع تمرد ، طبعا بعد خاين وطنى خاين وطنى خاين وطنى كل شوية عندى سؤال
تفتكروا المشكلة فى القوى الثورية و لا فى العملاء و الخونة و لا فى شريط الترامادول ؟

الجهاز المركزى للمحاسبات

طبعا بعد اصدار السيسى لقانون يعطى لرئيس الجمهورية ، الذى بيده السلطة التنفيذية و التشريعية و القضائية ، الحق فى عزل رؤساء الجهات الرقابية لأول مرة فى تاريخ اى دولة فى العالم ، و طبعا اهم جهاز رقابى هو الجهاز المركزى للمحاسبات و رئيسه هشام جنينه

الجهاز المركزي للمحاسبات:

منذ أكثر من 70 عاما، صدر المرسوم الملكي رقم 52 لسنة 1942 بتاريخ 16 أغسطس بإنشاء ديوان المحاسـبة كهيئة مستقلة للرقابة على المال العام، كأداة للتحكم في مراقبة إيرادات ومصروفات الدولة، وسُمّي في الأصل (ديوان المحاسبة) ثم غُيّر اسمه بالقانون رقم (129) لسنة 1964 بمسمى الجهاز المركزي للمحاسبات، ومرت تلك الجهة الرقابية بالعديد من التطورات والتعديلات القانونية.

ويعد الجهاز المركزي للمحاسبات، هيئة مستقلة ذات شخصية اعتبارية عامة، تتبع رئيس جمهورية مصر العربية، وتهدف إلى تحقيق الرقابة الفعالة على أموال الدولة وأموال الشخصيات العامة الأخرى وغيرهم من الأشخاص المنصوص عليهم في القانون، كما تعاون مجلس الشعب في القيام بمهامه في هذه الرقابة.

وتعاظم دور الجهاز المركزي للمحاسبات، فشمل إضافة إلى الرقابة المالية بشقيها المحاسبي والقانوني، الرقابة على الأداء ومتابعة تنفيذ الخطة والرقابة القانونية على القرارات الصادرة في شأن المخالفات المالية، ومن ناحية أخرى، اتسعت الجهات التي يباشر الجهاز اختصاصاته بالنسبة إليها حتى شملت الأحزاب السياسية والمؤسسات الصحفية القومية والصحف الحزبية والنقابات والاتحادات المهنية والعمالية والنوادي الرياضية والجمعيات والمؤسسات الأهلية المعانة، وما يتعلق باتفاقيات المنح والقروض.

فعلا كدة تنفيذية و تشريعية و قضائية و رقابية و بقى عندنا فصل بين السلطات .