مين معاه الكبريت

حبسوا الناس كلها فى شقة ضيقة
و قفلوا الشقة بالأقفال
و فتحوا الانبوبة على الآخر
و ما حدش عارف مين هايولع الكبريت و امتى ، بس اكيد المحبوسين هايكسروا الشقة او حد هايولع الكبريت و تنفجر بالكل و فى الحالتين الشقة اتدمرت و كله هايقعد فى الشارع .

مساطيل

من كتر ما باسمع فى اعلام السيسى عن القنابل اللى بتنفجر فى الارهابيين قبل ما يعملوا بيها عمليات ارهابية ، و طبعا مع غباء امن الدولة افتكرت نكتة

واحد ارهابى مسطول ماسك قنبلة عمال يحدفها من ايده دى لإيده دى ، عدى عليه واحد تانى اما شافه كدة قاله يخرب بيتك مش خايف لتنفجر فيك ، رد عليه الارهابى و قاله ما تخافش لو انفجرت معايا غيرها .

ماهو لأمن الدولة عبط و إلا مأجرين ارهابيين هطل بصراحة

و اهو مسطيل بتخطط لمساطيل علشان مسطول يحكم دولة المساطيل .

انا او انا

مبارك قال انا او الفوضى
و مشى مبارك و بدأت الفوضى

طنطاوى قال انا او الثورة
و مشى طنطاوى بعد ما ضحك على الثورة و قتل و اعتقل اللى قاموا بيها

مرسي قال انا او الارهاب
و مشى مرسي و بدأ الارهاب

عدلى منصور قال انا او القانون
و مشى عدلى منصور بعد ما فصل قوانين تبيع البلد

السيسى انا او الشعب
دة بقى غيرهم
و اهو رايح فى داهية بالبلد و واخد الشعب معاه يسليه فى الطريق

حل المعادلة

اجابة السؤال دة فيها الحل للمعادلة اللى احنا فيها بالنسبة لاغتيال النائب العام
هل اغتيال النائب العام رسالة للسيسى و لا رسالة من السيسى لحد معين ؟
عامة فى الحالتين لو رسالة للسيسى يبقى فيه فعلا انقسام و مش هايخرج عن الجيش ،
و لو رسالة من السيسى يبقى برضه فيه انقسام و برضه مش هاتخرج عن الجيش
و فى الحالتين حل المعادلة .

فى المية العكرة

طبعا بعد اغتيال النائب العام و النقاشات حول اغتياله و كالعادة ابحث عن المستفيد ، عامة من اوجه الاستفادة من اغتيال النائب العام للنظام طبعا اصدار و تعديل القوانين ،
عن جريدة المصري اليوم و طبعا دى من الجرائد اللى بتطبل بالقوى :
كشفت مصادر قضائية، ملامح التغييرات المقُرر إجراؤها في قانون الإجراءات الجنائية، وسيتم عرضها على مجلس الوزراء، في اجتماعه الأربعاء، تمهيدا لرفعها للرئيس عبدالفتاح السيسي للتصديق عليها.

وقالت المصادر القضائية لـ«المصري اليوم»، إن أبرز 3 تعديلات سيتم إجراؤها،

أولا أن «سماع شهود النفي اختياري للقاضي وليس إجباريا» هههههههههه يعنى بمزاج القاضى يسمع شهود النفى ، يعنى لو شاهد كنت معاه فى مكان غير مكان الجريمة ، من حق القاضى ما يسمعوش علشان مجهز الحكم طبعا ، من الآخر مش عايزين شهود ، من فترة لغوا شهود الاثبات و دلوقتى النفى ،

ثانيا  أحكام أمن الدولة العليا تُصدق من رئيس الجمهورية للتنفيذ دون نقض زيها زى المحكمة العسكرية بالضبط و بدل ما يبقى عندنا محكمة عسكرية واحدة يبقى عندنا اتنين .

ثالثا أحكام النقض على الأحكام الجنائية سيكون على درجة واحدة فقط لا غير ، يا جماعة دة توفير فى الوقت ، مش القضاء مسيس ، عادى بقى مش هاتفرق ، دة احنا هانشوف ايام مهببة و ننيلة بنيلة

سيبكم بقى من ان النائب العام مسئول عن فض رابعة و النهضة و انه جت سيرته فى تسريبات الاخوان فى قضية مرسي و ان و ان و ان مش مشكلة ،
المهم عرفتم المستفيد من اغتياله و لا لسه ؟

الشهيد

احلى حاجة اما ضابط او مجند او قاضى يموت السيساوية يطالبوا بحق الشهيد

و اللى ماتوا من ٢٥ يناير لحد يونيو القوى الثورية بتطالب بحق الشهيد

و اللى ماتوا بعد ٣٠ يونيو فى رابعة و النهضة و غيره الاخوان بيطالبوا بحق الشهيد

رغم ان الضابط و المجند اللى استشهدوا زى ما بيقول السيساوية قتلوا اكتر الف شهيد
و القاضى اللى استشهد زى ما بيقول السيساوية ضيع حق اكتر من الف شهيد

و الاخوان فى سنة حكموها قتلوا اكتر من ٤٠٠ شهيد

نضمهم على شهداء يناير هانلاقى فى كل حتة شهيد

من الآخر البلد كلها بتدبح فى بعضها و اللى بيموت بيقولوا عليه شهيد

و شهيد بيقتل شهيد ، و شهيد بيدبح شهيد ، و شهيد ورا شهيد و كله بيقولوا عليه شهيد ، القاتل لو مات شهيد و المقتول ميت شهيد .

المفرمة

البلد دى عاملة زى المفرمة ، و المفرمة ما بترحمش ، و فيها ٤ انواع بيتعاملوا معاها

الاولانى اللى حاطط الناس فى المفرمة و نازل فرم فيهم بدون رحمة

و التانى اللى بيتفرج و مستسلم و مستنى دوره ، و هو متأكد ان الدور جاى عليه

و التالت اللى بيتفرم و بيموت و مقتنع و موافق و مش فارق معاه

و الرابع اللى بيعافر و مش عارفين يفرموه ، و كل ما يحاولوا يطلعلهم تانى .

قسمها هاتلاقيها الاربع انواع دول ، يا ترى كل واحد عارف هو انهى نوع فيهم ؟

اغتيال النائب العام

موضوع اغتيال النائب العام فيه علامات استفهام كتير كالعادة بعد كل مصيبة تحصل ، سيبكم من ان ناس كتير منهم انا كانوا متوقعين ان لازم تحصل حاجة قبل ٦/٣٠ علشان ماحدش ينزل ، بس برضه الموضوع مش منطقى ، نشوف كدة
انفجار سيارة مفخخة بالتحكم عن بعد دة على حسب اللى قالته الداخلية ، اللى حصل ان مفيش حد مات الا شخص واحد فقط اللى هو النائب العام هشام بركات الله يرحمه و حسابه عند ربه ، و الباقى اصابات لم تذكر حتى لأنها انفجرت بالقرب من الموكب مش فيه و دة حصل فى ميعاد مشبوه يوم ٦/٢٩ قبل ٦/٣٠ بيوم واحد
المثير اكتر ان اول تصريح طلع من المستشفى ان النائب العام مصاب بكدمات و كسر فى الانف و خلع فى الكتف ،
و دة التصريح من الوطن
قال الدكتور حسام عبدالغفار المتحدث الرسمي باسم وزارة الصحة، إن الشهيد هشام بركات دخل مستشفى النزهة على قدميه، وتمثلت إصابته في جرح قطعي في الأنف وإصابة في الكتف فقط.

وأضاف عبدالغفار، لـ"الوطن"، "أصيب بركات نزيف ثم توقف واستقرت حالته تماما، 

و بعدها خبر وفاة النائب العام بنزيف داخلى بعد تهتك فى البطن و دة برضه غريب لأن لو انفجرت فيه القنبلة مش هايبقى تهتك فى البطن بس ، و الاصابات الكتف عند الصدر و كسر الأنف عند المخ ، يعنى حتى اصاباته اللى اعلنوا عنها فى تصريحاتهم بعيد عن سبب الوفاة و الأهم برضه فى التصريح داخل المستشفى ماشى على رجليه ، و هو مش خارج مصر ، يعنى المستشفى اعلنت دة للاعلام ، الاهم بقى سيارات الاسعاف و سيارات المطافى و وجودها قبل الحادث ، المحلات المقفولة ، الحراسة اللى ماحدش مات منهم ،  اظن كل دة بيثير علامات استفهام كتير اوى . و اهمها هل بيتخلص النظام من رجاله فى سبيل بقاؤه ؟ او فيه فعلا انقسام فى الجهات السيادية ؟ و لا مجرد كبش فدا ؟ السؤال الأهم النائب العام مات نتيجة التفجير فعلا ؟
عامة اللى بيلعب شطرنج يعرف انك اما بتتزنق ممكن تضحى بأى قطعة علشان الملك يعيش ، بتبدأ بالعسكرى لحد الوزير ، المهم تحمى الملك . بس المرة دى النائب العام من الصناديق السوداء اللى جواعا اسرار كتير جدا عن الفترة دى و تقريبا هذا جزاء سنمار . و اعتقد فيه صندوق اسود تانى اسمه محمد ابراهيم كان وزير داخلية و برضه زى ما هشام بركات جه فى تسريب مع ممدوح شاهين علشان مكان حبس مرسي ، وزير الداخلية السابق جت سيرته برضه فى التسريبات ، يا ترى الدور عليه .
دة مجرد تخمين و الله اعلم .

نشاط اقتصادى

يعنى مش معقول كله صدف يعنى ، ما انا مش راكن الفيل ع الناصية

يطلع موضوع تطوير معهد القلب يقوم الجيش رايح على هناك علشان ميزانية التطوير ٢٠ مليون

يطلع موضوع لحم الحمير بتاع الفيوم يقوم الجيش مغرق بعدها منافذ بيعه لحمة

يطلع موضوع مقاطعة شركات الاتصالات نلاقى على صفحة الجيش المصرى ان الجيش بيفكر فى عمل شركة اتصالات جديدة للحفاظ على الامن القومى و تنزيل الاسعار

طيب الشعب بقى يشتغل ايه ، اما الجيش ساب شغله و باصص لشغل الشعب و الشعب اصلا مش لاقى شغل و كدة شكلها هايفضل مش لاقى شغل .

انا باقول الجيش يشوف دكتور كويس يخلصه من الكالو اللى طالعله اللى اسمه الشعب .

الحقيقة

فيه نظرية بتقول كل ما الكدبة كبرت ، كل ما الناس صدقتها و اقتنعت بيها ، كل واحد فاهم الحقيقة اللى عايشين فيها بحسب ما هو عايز يفهمها ، المشكلة مش فى الحقيقة لأن الحقيقة ثابتة ما بتتغيرش ، المشكلة فى تزييف الحقيقة بحقيقة غير موجودة غير فى خيال كل واحد و متفصلة على مزاجه ، بطريقة اسهل عندنا فى مصر ، المتظاهر الحقيقة اللى فى دماغه انه اتظلم و عايز حقه  ، و الاخوانى الحقيقة اللى فى دماغه انه عايز الشرعية و عايز محمد مرسي يرجع ، و المجند و الضابط اللى بيقتلوا المتظاهر و الاخوانى ، الحقيقة اللى فى دماغهم انهم بيحموا البلد و بيخدموها و بيخلصوها من الارهاب ، القاضى الحقيقة اللى فى دماغه مش انه بيخالف ضميره ، لأ ، انه بيعمل دة لمصلحة الوطن ، هو فاهم كدة ،  دى كلها مش حقايق ، كلهم نسيوا الحقيقة الاساسية ان دى بلدهم و هما مش بيكرهوها ، بالعكس كل واحد فيهم شايف بطريقته و بالحقيقة اللى اتزرعت جواه . و اللى اتزرع جواه دة جزء صغير من الحقيقة ، مزيف او حقيقى مش مشكلته ، المهم انه مقتنع ان دى الحقيقة . و صدق الاى قال الطريق الى الجحيم مفروش بالنوايا الطيبة .

السيساوى

المناقشة مع السيساوى ، بالضبط كأنك عايز تفهم رقاصة يعنى ايه نواقض الوضوء

قانون مكافحة الارهاب

مشروع قانون مكافحة الإرهاب والمعد من وزارة العدل الذى أرسله مجلس الوزراء إلى لجنة الإصلاح التشريعى لمناقشته مع الجهات المختصة.

نبدأ سوا كدة نشوف القانون المطاط فى مكافحة الارهاب

من حق النيابة العامة أو سلطة التحقيق فى جريمة إرهابية إصدار إذن بمراقبة وتسجيل المحادثات والرسائل وتسجيل وتصوير ما يجرى فى الأماكن الخاصة واخدين  بالكم فى الاماكن الخاصة ، يعنى شقتك ، الشركة اللى بتشتغل فيها ، تحت السرير ، اى مكان تتخيله

الاهم بقى ان النيابة العامة برضه اللى هى مش مسيسة ابدا ابدا من حقها اصدار اذن بمراقبة و تسجيل ما تكتبه عبر الشبكات المعلوماتية أو الاتصال أو المواقع الإلكترونية

كمان من بنوده ان تخصص دوائر بمحاكم الجنايات ويكون رئيس كل منها بدرجة رئيس بمحاكم الاستئناف لنظر الجنايات من الجرائم الإرهابية. وتخصص دوائر المحاكم الابتدائية لنظر الجنح من الجرائم الإرهابية ، يعنى قسمنا الارهاب جنايات و جنح ، يعنى الشمروخ غير الطوبة ، و كمان عملنا محاكم مخصوص و قضاة تبعنا و ان شاء الله محاكمة عادلة و تعدم
و طبعا لأن كل الشعب سواسية امام القانون و كلنا مصريين ، من بنود القانون إلزام الدولة بإبرام وثيقة تأمين إجبارى شامل مع شركات التأمين لتغطية جميع الأخطار الناجمة عن الجرائم الإرهابية التى تصيب أى فرد من أفراد القوات المسلحة أو قوات الشرطة المكلفة بمكافحة الإرهاب سواء فى حالات الوفاة أو العجز الكامل أو الجزئى ويحق لرئيس الوزراء تخصيص جزء من الأموال أو المتحصلات فى الجرائم الإرهابية لسداد التزامات الدولة فى وثيقة التأمين الإجبارى ، واخدين بالكم انتم ، طبعا مفيش مدنيين ، المدنى الكلب يتعالج على حسابه و اذا مات راح فى داهية مش هايفرق ، المهم الجيش و الشرطة ، ايه هاتاكلوا مصر يعنى ، بس الغريب تخصيص جزء من الاموال او المتحصلات فى الجرائم الارهابية ، هايأجروا الارهابى مفروش يعنى و لا هايبيعوا ازازة المولوتوف يعنى ، يلا هانفهم اكتر م الحكومة .

ندخل على التقيل بقى ، أعطى مشروع القانون الحق لرئيس الجمهورية بعزل وإخلاء وحظر التجوال فى بعض المناطق لمدة لا تجاوز 6 أشهر متى قام خطر من أخطار الجرائم الإرهابية، وينظم القانون عمل ذلك حال غياب البرلمان وذلك وفقاً للدستور ، مش عارف هما مش عايزين يعملوا برلمان ليه ، تفتكروا ليه ، يعنى حظر تجوال ٦ اشهر خبط لزق ، يا بلاش

الشياكة بقى فى اللى جاى
يعاقب بالسجن مدة لا تقل عن ١٠ سنوات من يستخدم هذه الاسلحة فى المظاهرات
الأسلحة التقليدية:
الأسلحة والذخائر والمفرقعات والمواد الجيلاتينية المنصوص عليها قانوناً ، يعنى بمب ، صواريخ ، شماريخ هاتروحوا فى داهية .

الأسلحة غير التقليدية:
الأسلحة والمواد النووية والكيماوية والبيولوجية والإشعاعية والجرثومية أو أى مواد أخرى طبيعية أو اصطناعية صلبة أو سائلة أو غاز أو بخار أياً كان مصدرها أو طريقة إنتاجها لها القدرة والصلاحية على إزهاق الأرواح أو إحداث إصابات بدنية أو نفسية خطيرة بها أو إلحاق الضرر بالبيئة أو بالمبانى والمنشآت.
نووى يا جدعان ، بلاش النووى علشان بيلسوع ، وصلنا للنووى يا جدعان ، اللى ياكل بلح ما يرميش النواة ، هايطربقوها على دماغه ، و اللى معاه اسلحة جرثومية او كيماوية لو اتمسك بيها هايتنفخ ، اى حد معاه صلبة او سائلة او غاز او بخار هانوديه ورا الشمس ، يا حلاوة يا ولاد على القوانين .

نقطة عجبتنى اوى ، ان لا محاكمات و لا عقوبات جنائية على اى فرد جيش او شرطة بيكافح الارهاب ، اقتل يا معلم بقلب جامد و لا يهمك ، قول عليه ارهابى و اقتله ، حد يجرؤ يحاكمك ، دة انت معاك حصانة بالقانون .

اكيد طبعا بعد ما تطلع ارهابى زى جماعة الاخوان الارهابية ، ٦ ابريل الارهابية ، روابط الالتراس الارهابية برضه ما يضرش ، و اى حد ارهابى تانى من حق الحكومة تصادر اموالك و ممتلكاتك و ممتلكات اللى جابوك ، نعمل بيها ايه بقى ؟ نديهم للجيش و الشرطة على شكل وثيقة تأمين ، دول غلابة ، يا ارهابى يا عميل يا كلب .

احلى حاجة بقى ان الارهابى هو اى حد ضد السيسى فى الشارع ، على الفيس ، على تويتر ، تحت السرير ، معايا صاحبى و حبيبى و كفاءة ، ضدى هاتبقى ارهابى و عميل يطبق عليك قانون الارهاب و ناخدك انت و فلوسك و بيتك و اللى جابوك .

الاحلى من كل اللى فات ان اى مجموعة من ٣ اشخاص من حقهم يقولوا عليها جماعة ارهابية ، لها رئيس و جناح عسكرى و باك شمال ، يا مصيبتى السودة يانا يامه .

الحلاوة كلها بقى فى المذكرة الايضاحية
قالت المذكرة الإيضاحية للمشروع، التى احتوت على «18» مادة، إن البلاد تمر بمرحلة حاسمة من تاريخها، ولعل أخطر ما يواجه الدولة فى هذه المرحلة جرائم العنف والإرهاب التى تدمر كيان المجتمع وتعصف بأمنه واستقراره. ومن هنا كان لزاماً على الدولة أن تسارع بمواجهة هذا الخطر من خلال قانون محكم، خاصة مع تزايد انتشار هذه الجريمة عن طريق قلة منحرفة سيطرت عليها نزعات إجرامية جامحة بهدف ضرب الاستقرار وتدمير النظام الديمقراطى الذى اختاره الشعب ، واخدين بالكم انتم ضرب الاستقرار و تدمير النظام الديموقراطى الذى اختاره الشعب ، عن طريق قنابل حلزونية لولبية مطاطة ، و طاطا طاطا ، كله فى البطاطا

عامة خلال سنة اكتر من ٥٠٠ قانون غير دستورى ، انا باقول نلغى الدستور احسن .

دة احنا هانشوف ايام سودة يا جدعان .

اشترى

احلى حاجة ان السيسى فى كل زيارة لدولة لازم يشترى شرعيته بالفلوس

اما راح فرنسا كانت صفقة طائرات الرافال اللى العالم كله حتى فرنسا رفضتها لأن سعرها غالى جدا و فلوس تشغيلها و قطع غيارها غالية و تعتبر من اغلى الطائرات فى العالم رغم ان امكانياتها بالنسبة لطائرات ارخص منها محدودة .

جه راح المانيا اتفق مع شركة سيمينز قبلها على انشاء محطات كهرباء بالمليارات رغم ان برضه لو عمل مناقصة عالمية هايلاقى شركات تعمل نفس المحطات بتكلفة اقل ، او كا عملها تبع بنك الطاقة من غير ما يدفع فلوس .

قام طالع على المجر اشترى قطارات محلية الصنع ، يعنى من الآخر راح يشترى كام قطر صناعة محلية لا تستخدم الا فى بلدها رغم ان عنده و اثبتت حدارتها القطارات الفرنسية و الاسبانية ، بس لازم يشترى شرعية فى المجر برضه .

دلوقتى فيه دعوة لزيارته لانجلترا ، يا ترى يشترى ايه ، تم الاتفاق على شراء ١٩ شحنة غاز مسال من شركة بريتش بتروليوم بسعر اعلى من السعر العالمى ،

ايوة كدة يا ريس ، كل ما تتزنق اشترى ، اشتري يمكن تاخد شرعية .

اختلاف مفاهيم

المفاهيم عند السيساوى :

اللى انقذ البلد السيسى

اللى عايز يدمر البلد و يبيعها هو الاخوانى

الشهداء هما شهداء الجيش و الشرطة

اسوأ مرحلة فى تاريخ مصر هى ما بعد ثورة يناير حتى ٣ يوليو

٣٠ يونيو ثورة مش انقلاب

٦ ابريل و البرادعاوية و الاشتراكيين و ثوار يناير عملاء و خونة و ممولين عايزين يرجعوا الاخوان

المفاهيم عند الاخوانى :

أحسن رئيس حكم مصر محمد مرسي

اللى عايز يدمر البلد و يبيعها هما العسكر و منتفعى حكمهم و مؤيديهم

الشهداء هما شهداء رابعة و النهضة و ما بعد ٣٠ يونيو

احسن فترة فى تاريخ مصر الفترة اللى حكمها محمد مرسي

٣٠ يونيو انقلاب مش ثورة

٦ ابريل و البرادعاوية و الاشتراكيين و ثوار يناير عملاء و خونة و ممولين و كانوا السبب فى اسقاط مرسي

تشابه غريب بين السيساوى و الاخوانى فى حاجات كتير ، فعلا وجهين لعملة واحدة .

يا سيادة الرئيس

يا سيادة الرئيس البلد بتغرق و رايحة فى داهية

اصبر بس عندى تسبيلة ع الماشى كدة و داخل ع النحنحة

يا ريس بقولك رايحة فى داهية

يا عم اصبر شوية لا التسبيلة تيجى جنب العارضة ما اعرفش اتنحنح بعدها

بتغرق و الله العظيم بتغرق

مش عارف تصبر دقيقة ، اسبل ازاى فى الضغط العصبى دة يا رب بس

ال٧ جنيه

وزير التموين كان قال ان الفرخة ع التموين ب ٧٥ قرش ، و دلوقتى وزير الزراعة بيقول كيلو السمك ب ٥ جنيه ، طبعا الحكومة مش ناسية الشعب فى رمضان مدياكم منحة ٧ جنيه بحالهم يعنى يجيبوا ٣ فرخات و نص كيلو سمك و شوية رز ، و عيش يا معلم رمضان كريم ، هاتنهبوا و لا ايه
فالتحيا الحكومة
فاليحيا عبفتاح
و عبمتجلى
و عبعاطى كفتة

عنان و شفيق

مداخلة عنان التليفزيونية امبارح و تكذيبه للى قاله شفيق عن انه اتصل بيه ليلة اعلان النتيجة و ابلاغه بفوزه على مرسي فى الانتخابات ، بعد طبعا ما قال قصيدة مدح فى علاقته بشفيق و احنا اخوات و علاقتنا جامدة من زمان و و و و و و ، طبعا شفيق نرجع نقول انه رافع قضية فى الادارية العليا بالطعن على نتيجة انتخابات الرئاسة ٢٠١٢ و ان هو الرئيس الشرعى مش مرسي ، و الفرق بين عنان و شفيق ان عنان فى مصر و دى تفرق كتير اوى ، طيب ماشى ، السؤال هنا

ماذا لو عنان كان قال انه فعلا اتصل بشفيق قبل اعلان النتيجة بيوم و ابلغه بفوزه ؟

لو دة كان حصل فعلا ، يبقى حاجتين ،

اولا ان عنان بيعترف بحريمة خيانة الامانة منه و من رئيس اللجنة العليا للانتخابات اللى عرفه النتيجة قبل اعلانها رسميا و طبعا دة يعرضه للمحاكمة بتهمة خيانة الامانة و تكدير السلم العام و الخيانة العظمى بتزوير النتيجة لصالح جماعة يقال انها ارهابية ، و قضية سهلة جدا و محامى بشلن يكسبها و اعتقد دى كانت ورقة الضغط على عنان .

ثانيا قانونيا و دستوريا اعتراف عنان بأنه اتصل بشفيق يبقى دة يبطل مرحلة الاعادة من انتخابات الرئاسة و يجب اعادتها ، و الاعادة مرسي و شفيق ، بس مرسي فى السجن ، يبقى شفيق بالتزكية او دخول تالت المرحلة الاولى اللى هو حمدين ضد شفيق فى الاعادة ، و طبعا دة يخلى شفيق الرئيس الشرعى او على الاقل ضامن يبقى الرئيس .

السؤال الأول
ليه الادارية العليا لم تحكم سواء بالقبول او الرفض فى القضية اللى رافعها شفيق بأنه الرئيس الشرعى و شايلة القضية لحد دلوقتى لم تبت فيها ؟

السؤال التانى
هل المجلس العسكرى ما كانش يعرف ان مرسي هربان من السجن ؟
لو يعرف تبقى خيانة عظمى و يتحاكم كله بما فيهم رئيس المهاترات الحربية السيسى ، و لو ما يعرفش تبقى خيانة امانة و اهمال و برضه كله يتحاكم عليه .

السؤال التالت
هل الاحتفاظ بالقضية مقصود و ان مرسي خارج و التورتة رايحة لشفيق بموافقة الاخوان للمصالحة ؟

كل شئ متوقع فى البلد دى ، و ظهور عنان و شفيق اعلاميا بيقول كتير .