شعار رابعة و السيساوية

بتابع الأخبار لقيت 

رفع شعار رابعة في مباراة مصر و البوسنة 

رفع شعار رابعة في ابو أتاتا و أم أتاتا و علي دماغ الواد أتاتا 

رفع شعار رابعة علي مصنع الكراسي 

رفع شعار رابعة علي كوكب المريخ و مفيش صريخ ابن يومين . 

بس بجد أنا باستكنيس أما اسمع كدة من السيساوية ، شعار رابعة دة رهيب . 

Kanoun saksonia

اهرشلى فى المربع رقم 33

مرة واحد ماشي في الشارع فقابل واحد تاني شكله مش على بعضه و مستعجل اوي

و بيقول : لو سمحت من فضلك قلعني الجاكتة

فالاولاني قال له : نعم؟!!!

فالتاني قال : قلعني الجاكتة بسرعة

حاضر.. حاضر و راح مقلعه الجاكتة

لو سمحت بقه قلعني الكرافتة...

إيه؟!!

الكرافته ..الكرافته بسرعة

حاضر.. حاضر و راح مقلعه الكرافته و هو مستغرب اوي من الراجل الغريب ده : ها يا سيدي اي خدمة تانية!!

اه .. معلش فكلي زراير القميص

لااااا دانت زّودتها اوي .. كده تاخد برد يقلب بنزلة شعبية حادة تاخد أجلك

من فضلك فكها .. بسرعة .. ارجوك

ا,فففففف.. و ادي زراير القميص خلاص فكتها.. دا كان يوم إيه المهبب ده, ها أي اوامر تانية؟

أيوه قلعني بقه القميص

يا سيدي عييب .. مايصحش كده , د إحنا فى الشارع خللي عندك دم .. .. لا حول الله يا رب !!

أرجوك.. أرجوك بسرعة.. مافيش وقت

دي وقعت إيه المهببه دي, أنا كان إيه إللي جابني من الشارع ده..وادي القميص ... هاااا.. إيه تاني!!

إرسملي على ظهري خطوط بالطول و خطوط بالعرض

حسبي الله و نعم الوكيل .. إنت مجنون ياراجل أنت؟؟!!

من فضلك .. أرجوك

رسمتلك زفت بالطول و زفت بالعرض

رقملي بقه المربعات إللي إتكونت على ظهري بالأرقام من 1 إلي 40

يا صبر أيوووب .. بقه إنت معطلني كل ده علشان تلعبني سيجه على قفاك؟!!!!

بسرعة لو سمحت .. أرجوك رقمهم .. من فضلك مش قادر

أديني رقمتهم...

لو سمحت بقى أهرشلي في المربع رقم 33

على فكرة الشتيمة عيب , ماحدش يشتم

غبى فى المحكمة

غبى طلبت منه المحكمة انه يجيب شئ يثبت ملكيته للبيت ................... جاب صورته و هو بيغسل السلالم

بتكرهوا السيسى ليه ؟

يا جماعة بتكرهوا السيسي ليه ؟

إيه يعني كان رئيس مخابرات مبارك الحربية ؟

إيه يعني كان عضو مجلس عسكري طنطاوي إللي قتل و سحل و إعتقل الثوار و في الآخر سلمها للإخوان ؟

إيه يعني إنه إعترف بكشوف العذرية علي إخواتنا ؟

إيه يعني إنه كان وزير دفاع مرسي و الناس بتتدبح و هو ساكت ؟

إيه يعني بحر الدم إللي عايشين فيه دلوقتي ؟

المهم إنه فاق بعد 50 سنة و عايز يبقي رئيس ، 

دة انتم ناس غريبة ، هو عمل إيه السيسي بس علشان تهاجموه ؟

مستعد احترم السيسى

أنا مستعد أحترم السيسي في حالة واحدة ، 

يطلع يقول يا شعب أنا كنت خيال مآته أيام فساد مبارك ، 

و طرطور في مجلس طنطاوي العسكري ماليش كلمة و لا أقدر أمنع القتل و الدم و المدابح و كشوف العذرية إللي حصلت ، و لا تسليم البلد للإخوان . 

و كنت كيس جوافة أيام مرسي و الإخوان بيدخلوا السلاح و بيدبحوا الثوار في الاتحادية و المقطم و بيبيعوا البلد .

كنت خايف علي وظيفتي و مرتبي بصراحة . 

يمكن ساعتها أحترمه .

دماغ الببلاوى

انا حاسس ان الببلاوى ده دماغه مخرومة ... عمالة تنقط .... متسمعلوش و لما

يتكلم سد ودانك لحسن ياكلها .... و الودان اليومين دول غالية يا بنى ... ملهاش قطع غيار

تيجى تقوله فيه مصيبة حصلت فى البلد يقولك عشان خاطر ربنا ... سيبونى أنام كمان خمس ست... ساعات عشان أقوم فايق .... أنا كنت سهران طول الليل لحد الساعة 9 مساء ... سيبونى أأنتخ شوية حرام عليكم . 

تقوله يا ببلاوى الارهاب ضرب المديرية , 

يقولك يا عم مديرية ايه و ارهاب ايه دة كله فى الكلتشة . 

انت لسة مِكَّحول ... 

ما تقوم ياواد خليك نشيط

يا عمونا حد يصحى حد الساعة 11 الصبح هو علشان انت صاحى بدرى تصحينى بدرى , 

يا بختك يا عم ببلاوى ... استكانيس براحتك يا عمونا و تتحرق البلد ..... طول عمرك محظوظ يا ابن المحظوظة 

kanoun saksonia

انواع السيساوية

بعد البحث و التفعيص فى انواع السيساوية المنتشرين هذه الايام بصور سيسهم على صفحات التواصل الاجتماعى و فى الشوارع , تم تقسيم السيساوية الى عدة انواع :

السيساوى الارتجاجى

كان اول ظهور له فى بداية 2014 فى استفتاء الدستور , و هو يتراقص على ان...غام تسلم الأيادى اما لجان الاستفتاء , و سمى بالارتجاجى لأنه عندما يرقص يرتج جسمه كله من حماسة الرقص .

السيساوى التكاثرى او التوالدى 

هو سيساوى اجتماعى يعيش فى جماعات و يتحرك باسراب و يلتزم بسربه و لا يتزوج الا سيساوية و طبعا بيخلفوا سيساويين صغيرين و تجدهم قطعان سيساوية بجانب بعضهم و تصدر عنهم روائح كريهة عند الاقتراب منهم و لم يستطع العلماء حتى الآن معرفة مصدر هذه الرائحة و لكن فى شهر فبراير الماضى تمكن عالم من وضع تصور افتراضى عن علاقة هذه الرائحة بنوعية الطعام الذى يتناولونه .

سيساوى التفليك او المجهض سابقا 

و عادة ما يوصي به أطباء النساء والولادة للسيدات الحوامل خصوصا في الشهر التاسع ، فيقوم الطبيب برسم كروكي خلف الروشتة لكيفية التعامل معه على ان تتقيد السيدة الحامل بالتعليمات الطبية و تستخدم سيساوى التفليك , و تم تغيير اسمه من المجهض الى التفليك وذلك تحسبا من إقامة أي دعوى قضائية ضد وزارة الصحة أو محافظة القاهرة أو وزارة الموصلات وان حدث أي إجهاض لاقدر الله لأي سيدة حامل فسوف تقوم جهات الإختصاص برد الدعوى القضائية بدعوى أن السيساوية قد تزوجت سيساوى خاطئ أو منتهى الصلاحية . 

و يطلق عليه طبيا اسم سيساميسين . 

السيساوى الحرارى الموجه 

و من اسمه يتضح لكم طريقة عمله , فهو يصفق لأى شئ مهما كان يفعله السيسى , و يبرر كل شئ حتى لو خطأ , و يحامى لحكومة الببلاوى , و يتبعك فى كل مكان على الفضائيات و فى كل القنوات و مهما حاولت الانتقال بين قنوات التليفزيون لا تستطيع تفاديه , و هو يحتوى على تقنية عالية جدا و يتواجد بكثرة فى مدينة الانتاج الأعلامى . 

و طبعا بعد انتشار الحالة السيساوية كان يجب التعريف بأنواع السيساوية المنتشرون فى ربوع مصر . 

kanoun saksonia

سؤال ساكسونى

أجب عن السؤال التالى 

س- الشفحتاريت المفتحز بالسهاريظ المشعظة لمصر هذه الايام ؟

و ماحدش يسألنى يعنى ايه هذه الايام مش هاقول .

رسالة مدرس علوم لحبيبته

شوية رومانسية بقى علشان الموزة ما تزعلش يمكن تفتكرنى بس بطريقة علمية معملية فذة

حبيبتى

حديدتى

...

تحية و أشواق كهرومغناطيسيه أبعثها اليكى بشحنة كهربائيّة مع مرور تيار كهربائي سالب في المكثفة اليسرى من قلبي , مع تمنياتي الإلكترونيّة بأن تصلك رسالتي بكامل حالات الشدة و المقاومة الكهربائيّة آملاً أن تكون درجة حرارتك منخفضة و ضغطك الجوي نظامي ..

أبعث إليك أخر التهاني الفراغية و أشواقي التحليلية ببراهين هندسية شكلها مستطيل و حَلها مستحيل ..

حديدتي .. نحاسي .. قصديرتي

يا وتر حياتي!

أتذكرين حديدتى عندما جلسنا نستمتع بالشعاع الوارد عندما قلت لكى بأني لا أزال أصر على أن التواجد في القبر أسهل عندى من الجبر ، و أن هندسة حياتنا جابتلى في رأسي هلوسة ، و أن الضرب بالقدوم بيخلينى احس انى رجعت فاشل فى العلوم ، وأن المستقيمان المتوازيان لا يلتقيان إلا بإذنه تعالى فإن إلتقيا فلا حول ولا قوة إلا بالله العلي العظيم.

التوقيع:

غاز ثاني أكسيد الكربون الملقب بــ سي او تو

انتخابات الرئاسة فى مصر

خدعوك فقالوا فيه انتخابات رئاسة و لازم تشوف برامج المرشحين 

انتخابات الرئاسة فى مصر هي الفتره التي يمضيها كيس الخضروات المجمده الانتقالية مع كيس اللحم المجمد المرشح بعد خروجهما من الفريزر بفعل المظاهرات حتى يذوب الثلج , و يبدأ الاندماج الحقيقي بفعل الصفقات و عندما يصبحان في اناء واحد مع الشعب بعد اتفاقهما يضعون علي الشعب حبة ملح و فلفل اسود و مهبب و يستوي على نار هاديه لمدة سنة . حتى يفيق من حالة التجمد و يتظاهر من جديد

30\6 ثورة شعب

ازاى تعرف انك فى سنة 2014 و ان 30 \ 6 كانت ثورة شعب

تبقى ماشى فى الشارع تلاقى مظاهرة تقف تتفرج يتقبض عليك و تتحبس

انك تقوم بمظاهرات و تفوض السيسى يقوم مطلع قانون لمنع التظاهر بعدها

ان الحتة الوحيدة اللى الكهرباء ما بتقطعش فيها اقسام الش...رطة 

ان الحتة الوحيدة اللى فيها المية ما بتقطعش هيئة الصرف الصحى 

انك بعد ما قلت يسقط حكم العسكر دلوقتى بتقول تسلم الايادى 

انك بعد ما تقول نعم على الدستور ترقص برة اللجنة 

ان صور السيسى بقت اكتر من صور ابو سيماعين الله يرحمه 

ان سما المصرى تبقى ناشتة سياسية 

انك تموت فى القسم من التعذيب و يقولوا مسكت سلك عريان فى الحمام , اكيد يعنى هايبقى عريان فى الحمام . السلك مش هايدخل بهدومه يعنى 

انك فوضت و ما حصلش تغيير و قلت نعم على الدستور و برضه ما حصلش تغيير و دلوقتى عايزك تنتخبه رئيس 

انك تفوضه علشان يقضى على الارهاب يقوم الارهاب مفجر المديرية 

ان الدم فى كل حتة و الناس بتغنى برضه تسلم الايادى 

ان المطبلاتية بقوا اكتر من اللى بيطبلوا عليهم 

ان الفضائيات كلها قلبت منافقين بقدرة قادر 

ان مبارك و مرسى يروحوا المحكمة بطيارة هليوكوبتر و الثوار اللى قاموا بالثورة و هما السبب انك موجود توديهم ال80 واحد فى عربية ترحيلات 

ان كل اللى حصل ايام مرسى و انت اعترضت عليه وافقت عليه دلوقتى 

و فى الآخر 

هههههههههههههههههههههههههههههههههههههههه

يقولك جيش و داخلية و شعب ايد واحدة 

قطع ايدك منك له لها له 

نورت سنة 2014 

هو كان واخد التفويض ليه ؟

هو كان واخد التفويض ليه ؟

علشان يكافح الإرهاب 

أيوة حتي بالأمارة السيسي كان قاعد هنا و الارهاب كان قاعد هنا ، 

و السيسي يقول أكافحه يا شعب ، أكافحه يا شعب ، أكافحه يا شعب ، قام الشعب فوضه . 

و يا تري كافحه ؟

الارهاب يفجر و هو يلم الجثث ، الإرهاب يفجر و هو يلم الجثث ، ...

إنه يكافحه ، و لا الهوا 

ما كافحوش يعني ؟

لأ ، بس كافح الشعب إللي فوضه و رماه في السجن ، أهو عمل حاجة .

الله يخرب بيتنا

السيساوية بيقولوا ماله السيسي و ذنبه إيه في التفجيرات إللي بتحصل ؟ 

الله يخرب بيتنا إحنا يا شيخ

تهييس سياسى

اصل الولية ام منص نزلت السوق تجيب فراخ , الراجل ابو منص بقاله 6 شهور نفسه فى الفراخ و النهاردة طقت فى دماغها بمناسبة عيد جوازهم تأكله فراخ من عند بلالا الفرارجى , بلالا الفرارجى بقى دة حكايته حكاية , امه كانت كل ما تخلف عيل يموت , فأما زهقت... جابت عيل , و سمته بلالا علشان الحسد و من ساعتها و هو بلالا و كبير عائلة البلالية , بلالا الفرارجى بقى فيه مشاكل بينه و بين مراته , مراته فوزية بنت المعلم عب فتاح , اما بلالا اتقدم للمعلم عب فتاح علشان يخطب فوزية كان فيه مشاكل بين المعلم عب فتاح و المعلم برقوق ابو بلالا , اصل مرات المعلم عب فتاح كانت ماشية فى السوق مرة فالواد دنجل العجلاتى عاكسها , دنجل دة متجوز فهيمة بنت المعلمة نحمده بتاعة الخضار , المعلمة نحمده بقى اما جوزها مات اتقدملها ناس كتير بس ما رضيتش بحد فيهم و فى الآخر اما لقت خلاص لازم راجل يبقى جنبها اتجوزت سلامة البقال , سلامة البقال خبى على نحمده انه متجوز من بتعة بنت شفلحة بتاع القماش , اما نحمده عرفت صممت على الطلاق طبعا , مش عايزة درة , فجه المأذون يطلقها , و اما اتطلقت ربنا فتحها عليها و اشترت المحل بتاع سيد المكوجى , سيد المكوجى بقى كان فى يوم ماشى فى الشارع شاف البت سنية الشغالة , عجبته اوى بس ما كانش يعرف ان شنية هيا بنت كمال الترزى . 

ايه اللى انا بقوله دة عن ابو منص ما كل فراخ , يخرب بيت الفراخ 

المهم فيه تفجيرات حصلت النهاردة و لا لسه ؟ هاتبقى تفجيرات سواريه و لا ايه ؟ 

الارهابيين دول ناس وحشة اوى . 

دة لولا تفجيرك ما كنتش شفتك يا كلب ؟

قشطة على التهييس اللى على الصبح 

kanoun saksonia

اسد بيشرب حاجة ساقعة

و دخل الأسد السوبر ماركت إللي علي ناصية الغابة ، لقي الفيل أبو زلومة ، قاله هاتلي واحدة كوكاكولا ساقعة ، بصله الفيل من فوق لتحت و إداله الفانتا تفاح أخضر إللي طلبها ، خد الأسد الميريندا و مشي في الغابة ، قابله الثعلت قاله ما تجيب شوية سبرايت من إللي انت بتشربها دي يا كبير ، قام الأسد شتمه و شرب كانزاية السفن أب لوحده . 

صباح الساقعة علي المصريين ، نفسي أعرف مين حطنا في التلاجة بس .

ترشح السيسى

لو حد ليه فى تفسير الاحلام يا جماعة

حلمت خير اللهم اجعله خير

انى ماشى لوحدى فى حتة ضلمة اوى ما فيهاش و لا حتى شمعة منورة , و شايف نور من بعيد اوى بينى و بينه مسافة طويلة , و انا مصمم انى اشوف ايه النور دة , فضلت ماشى ماشى ناحية النور , و... كل شوية الاقى حاجات بتعدى من جنبى و اصوات غريبة حواليا , و حاجات بتعدى و تخبط فى رجلى , مش عارف ايه هيا , و انا مرعوب و قلت أجرى ناحية النور بسرعة و فضلت اجرى اجرى , 

لقيت بوابة واقف عليها راجل مش باين منه فى الضلمة غير سنانه , قلتله عدينى يا عم , قالى لازم تدفع الأول , ما عرفتش اعدى و فضلت واقف قدام البوابة مش عارف اعمل ايه بصراحة . 

فجأة لقيت حاجة بتلمع من بعيد , رحت ناحيتها , لقيتها جنيه دهب , قمت واخده و اديته لحارس البوابة علشان يعدينى , و أخيرا وصلت للنور , 

لقيت ايه تفتكروا ؟

لقيت الببلاوى مولع نار و قالع هو و الحكومة بلابيص و عمالين يلفوا حوالين النار و يغنوا السح الدح امبو , 

و السيسى قاعد لوحده جنب النار بالبدلة بتاعته , ماسك قفص فراخ كل شوية يطلع منه فرخة ينتف ريشها ريشة ريشة , 

و هاترشح 

مش هاترشح 

هاترشح 

مش هاترشح 

هاترشح 

مش هاترشح

سيرة ذاتية لمصرى

الاسم : معدوم الدخل كحيان مظلوم الغلبان .

المهنة : عاطل إبن عاطل ، البلد مافيهاش شغل ، نفسي أشتغل بس مفيش و كل يوم الطابور بيذيد و العاطلين بيذيدوا .

العنوان : في الشارع ، أصل فيه أزمة سكن من 33 سنة مالهاش حل ، و دة يمشي و دة ييجي و برضه ما...لهاش حل و برضه أنا في الشارع .

الحالة الإجتماعية : أعزب ، مين هاترضي بيا ، لا شقة و لا شغل و لا أي حاجة . 

المؤهل : معايا كل المؤهلات ، و برضه عاطل .

المهارات : الوقوف في الطوابير ، من طابور تطعيم لطابور مدرسة لطابور أنابيب لطابور العيش لطابور التوظيف ، حياتي كلها طوابير و من طابور لطابور لطابور ، من كتر ما الناس كرهت حياتها ، بقيت خايف كمان الموت يبقي بالطابور .

أحلامي : شغل أعيش منه و أربع حيطان تلمني ، تعبت من الشارع ، تعبت من المواصلات ، تعبت من الطوابير ، تعبت من لقمة العيش إللي مش لاقيها ، نفسي آكل 3 طاقات في اليوم ، نفسي أتجوز و أشوف عيالي قبل ما أموت ، نفسي ما أتهانش في قسم الشرطة ،

علي فكرة مايهمنيش مين يحكم البلد ، و لا مين رئيس و لا نعم و لا علي دستور ،

بس نفسي بجد أبقي بني آدم ، و لو حتي بأقل حقوق الإنسان ، 

تفتكروا دة كتير عليا ؟ تفتكروا أحلامي صعبة أوي كدة ؟ تفتكروا دة مش حقي علي البلد ؟

هو مش من حقي تأكلوني قبل ما تخيروني ؟ و لا بتضحكوا عليا بجوعي ؟

ردوا عليا و فهموني

دنيا زى الخيارة

الدنيا دي عاملة زي الخيارة ، يوم في إيدك ، و يوم في سيسك

الجيش و السياسة و السيساوية

معلومة بس للسيساوية 

هو حد يقدر يشتم في الجيش ؟

ما يشتمش جيش بلده إلا خاين ، بس جيش مصر مش المجلس العسكري ، جيش مصر ضباط و جنود بيروحوا ضحايا بسبب صراعات سياسية ، 

يا جماعة السياسة لعبة قذرة ، إقحام الجيش في السياسة كارثة بجد .

حرب الثورة

إحنا فعلا في حرب .

خطط و معارك بين كل الأطراف المتصارعة ،

بس في كل خطة دايما هامش خطأ مش معمول حسابه و ثغرات بتقلب المواقف سواء من دفاع لهجوم أو من مكسب لخسارة ،

بس فيه نقطة مهمة المعارك المتتالية بتغير الأطراف المستخدمة و خلي بالكم من كل...مة المستخدمة ، قطع شطرنج يعني ، تغير الاطراف في الثورة المضادة بين طرفيها العسكري و الديني و العودة للوجه العسكري تاني ، 

بيثبت انهم ما عملوش حساب هامش الخطأ في الخطة و أعتقد هامش الخطأ إللي ماعملوش حسابه ، إن بعد 30 سنة من حكم الدولة البوليسية الناس بطلت تخاف و رغم محاولاتهم لتشويه الثورة و القضاء عليها بتصفية الثوار و إعتقالهم ، لسه فيه ناس فاهمة و مكملة طريقها ، من الآخر إحنا هامش الخطأ في الخطة ،

و هامش الخطأ دة هايبقي سبب فشل خططهم إن شاء الله

انا جاى

ههههههههههههههه

هو ما أعلنش ترشحه ليه لدلوقتي ؟

أنا جاي ، و غلاوتك ليا 

أصل أنا بامشي جوة الكزمة الأول ، 

و النبي اوعوا تكونوا قلقانين ؟

و لا مستحجلين ؟

أنا جاي ، و غلاوتك ليا .

ضحك عليا و قال هاكافح الارهاب

ضحك عليا بأنه هايكافح الإرهاب 

قاللي فوضيني و فوضته 

قاللي قولي نعم ع الدستور و قلت نعم 

قاللي ارقصي برة اللجنة و رقصت 

قاللي حلمت اني لابس اوميجا و عايز ابقي رئيس قلتله هانتخبك . 

قاللي نلعب انتخابات رئاسة ما رشحش نفسه و من يومها ما شفتوووووووش .

يكدب عليا ليه ؟

أنا وحشة و لا إيه ؟

صورة مين اللى فى كل حتة فى مصر

يابني إيه الصور إللي في كل حتة و مغرقة البلد دي ؟ صورة مين دي ؟

السيسي يا راجل

يابني السيسي مين ؟ مش واخد بالي 

السيسي 

السيسي إللي قال فوضوني علشان اكافح الارهاب ، و الإرهاب خلاه يعد الجتت و يلم وراه يا راجل

يا بني ما مبارك فضل 30 بيقول باكافح الإرهاب و باحمي البلد و طلع شايل الارهاب لوقت عوزة و طلقهم علينا بعد ما مشي...

السيسي يا راجل 

يا بني بالراحة عليا علشان افتكره ، 

السيسي ، 

السيسي إللي خلي الناس تقول نعم ع الدستور و يرقصوا برة لجان الاستفتاء

يابني مش فاكره ، مش عارف مين دة ،

السيسي يا راجل ، السيسي إللي صحي من النوم الصبح فريق و نام بالليل مشير يا راجل ، 

يابني مش فاكره ، طب فكرني بيه 

السيسي بتاع التسريبات 

تسريبات إيه يابني مش فاكر 

تسريبات ، إللي طلعله تسريب إنه حلم إنه قابل السادات و لابس أوميجا و هايبقي رئيس يا راجل ، 

يا بني ما كله طلع ليه تسريبات ، عنان طلعله تسريبات و طنطاوي طلعله تسريبات و النشطاء طلعلهم تسريبات و مرسي طلعله تسريبات ، و عبد الرحيم علي الصرف عنده ضارب و شغال تسريبات ، السيسي مين ؟

ماهو دة إللي طلع كل تسريباتهم يا راجل 

يابني أنا مش فاكره خالص ، السيسي دة . 

السيسي ، إللي كان في مجلس طنطاوي العسكري و وزير دفاع مرسي ، و بيقول عملوا كل حاجة من وراه و ما كانش يعرف إيه إللي بيحصل في البلد يا راجل 

مش عارف يابني ، مش عارف 

السيسي ، السيسي إللي راح روسيا يا راجل 

يابني محمد راح روسيا و علي راح روسيا و خالد راح روسيا 

بس دة رجع من هناك بالبالطو الاسود يا راجل ،

السيسي ، وزير الدفاع إللي عايز يبقي رئيس مدني يا راجل 

إزاي يابني وزير دفاع و رئيس مدني مش فاهم ، 

و لا حد فاهم حاجة يا راجل 

إمشي يا ابن ال تييييت 

دة انا هاطلع 

تييييييييييت 

بوم طراخ طيخ بوم 

آآآآآآآه

كلمة السر الاعلام

طبعا كلمة السر الإعلام .

طول ما فيه إعلام كاذب و مضلل ، هايفضل الشعب مغيب ، الموضوع طبعا على كل الاوجه الاعلامية , اعلام مسيس و منحاز لفئة معينة , و يعمل لخدمة هذه الفئة و تلميعها بما ليس فيها , لمجرد اقناع الشعب بهذه الفئة .

أكبر مشكلة و...اجهتنا من بداية الثورة و حتي الآن ، من يوم ما كان التليفزيون المصري جايب كوبري أكتوبر و النيل و الدنيا هادية ، و الميدان مقلوب و القتل علي ودنه هى ماسبيرو , و كلمة السر فى ان الثورة المضادة بقت غول يلتهم الثورة هيا الاعلام الموجه . 

السيطرة علي الإعلام اسهل طريقة للسيطرة علي أي شعب ، و السلطة الحاكمة عارفة كدة كويس ، علشان كدة بنلاقي المنافقين و المطبلاتية و حتي بعض النشطاء المحسوبين علي الثورة اللى بنقول عليهم نشطاء السبوبة , منتشرين في الفضائيات ، لتوجيه الناس لتقبل أشياء و رفض أشياء أخري ، لرفع شعبية أشخاص و تشويه آخرين ، 

و الأهم حصر تفكير الناس في أشياء معينة و إبعاد تفكيرهم عن اشياء أهم .

بقي الإعلام العام و الخاص حظيرة للنفاق و التسلق و وسيلة للإنتقام من أشخاص بعينهم ،

و فيه مثل بيقول الزن علي الودان أمر من السحر ، دي وسيلة الإعلام لتكميم الافواه و عمل غسيل مخ للشعب ، 

طول ما الإعلام بيطبل للسلطة مش هانتقدم خطوة ، لازم صوت حر و دة للأسف مش كتير ،

كلمة السر الإعلام 

و سمعني سلام كبير أوي و كداب يا خيشة كداب أوي .

مع الاعلام المصرى الشعب دماغه بقت كدة .

Kanoun saksonia

تهييس الزهايمر

كل ما اجي اكتب حاجة انساها

الزهايمر بعيد عنكم

بقيت انسي عايز اقول ايه

هاكتب اللي ييجي علي بالي

أيوه خلى بالك تتعور غير تتكسر...

دي حاجه و دي حاجه تانيه خالص

حاجه غريبه قوي

أزااااي ؟

حد يأذي حد عمره ماعمله حاجه وحشه ولا أذاه و علاقته بيه سطحيه من بعيد لبعيد

انا عمري ما افكر أعمل كده في حد أعرفه حتي لو معرفه سطحيه عمري

زي السلسله

زي صوره متقطعه , حته و مرميه و مش بتتجمع

علي فكره الحب نفسه حاجه قويه جدا و حلوه قوي

حب اي حاجه ف الدنيا بجد أقوي احساس ف الدنيا

لاان الأحساس ده هو اللي بيتبعه الأحاسيس التانيه

العيب مش ف احساس الحب

العيب في الناس اللي اصلا مبتعرفش تحب وفاكرين نفسهم كده بيحبوا مش عارف فيه ايه ؟ 

المهم يعنى كنت زى اللى مش فاهم كدة بس فهمت حاجات كتير 

زى اللى فضل ياكل ياكل و ما بيششبعش و رغم كدة بياكل و برضه ما بيشبعش 

عامل كدة زى السواق التايه تقوله اسكندرية يطلع اسيوط 

و اهى كلها رحله بس مش معروف طريقها

يا ترى ممكن يكون شكلها ايه

أكيد لما تفتح عنيك بعد ماكنت مغمضها كتتتتير

هتبقي واجعاك

ايه العك ده على الصبح 

الطبع غلاب

حقيقه 

يارب أحفظ مصر و فرج كربها يا رب تعبنا و جالنا زهايمر 

kanoun saksonia

مولد سيدى العسكرى

بدأ الاستعداد للمولد...

مولد سيدي العسكرى

تجري الان الاستعدادات علي قدم و ساق للاحتفال بمولد سيدي العسكرى

فقد بدأت المحلات في الاصطباغ بتسلم الايادى و بدأ موسم كمل جميلك و تم تعليق صور سيدى العسكرى فى كل مكان فى الجمهورية , تفتح التلاجة ت...لاقيها , تفتح البوتاجاز تلاقيها , ع الكوبرى تلاقيها , تحت الكوبرى تلاقيها , 

و مولد سيدي العسكرى يهل علينا في هذه الايام و تبدو تباشيره فى كل مكان من مريدى سيدى العسكرى على مواقع التواصل الاجتماعى و فى الشوارع و الميادين , 

و لأننا شعب عاطفي و دايما بيتضحك عليه و قلبه رهيف حبتين و لأن سيدي العسكرى دة حد مبروك اوي و ولي و ليه كراماته "بغض النظر ولي لمين مش مشكلة ولى لمبارك ولى لطنطاوى صاحبه اللى كان جنبه فى الحفلة مش مهم ولى لأى حد مش مهم و لأنه طبعا وسيم و اقرع " يحتفل شعبنا بمولد سيدنا الولي قصدى العسكرى كل شوية و فى اى مكان , 

انا شخصيا مش ضد ان احنا نعمل يوم للأم و يوم للحب و يوم للأب و يوم لسيدى العسكرى و فى يوم سيدى العسكرى نهاجم فى بعض و نشتم فى بعض او حتى نهدد بعض , دة سيدى العسكرى هو شوية فى البلد , 

انما انا اعتراضي اصلا علي المولد "كاعتراضي علي كل الموالد" و صاحبه طبعا...

ايوه انا معترض علي سيدك العسكرى و مش خايف لتحل عليه لعنته اطلاقا...

طبعا واحد بيقرا دلوقتي بيقول سامحو يا سيدنا ده جاهل و مايعرفش , انصرفوا , سامحوه ما يعرفش حاج و سامحوه يا اسيادنا , 

وانا مش معترض انا فعلا معرفش كتير عن سيدك العسكرى و زى بالضبط ما عرفش كتير ماحبتش اصدق العيال السيس مروجي الاشاعات انه له كرامات و معجزات , 

بصراحة بقى مولد مش و لابد , انا مالى يا عم بالموالد , دى بقت حاجة هم .

kanoun saksonia

احنا اللى دروكنا الشبارى

احنا اللى دروكنا الشبارى جوة اللبارى فى الدروكة يا معككة , و اذا كنت انت فذلكة و مقضيها كبلكة , فاحنا برضه مسلكة , و نسلك اوى يا هشتكة . 

و كله ماشى

الانشكاح السكسونى

صباح الانشكاح الساكسوني 

أنا حاسس إن البلد زروطت علي الآخر ، و الظاهر كدة أخينا حسبها غلط ، كان فاكر نفسه هايستكنيص ع الكرسي و يقضيها شهيصة و يقعد يلم في اللارجات لوحده ، و ياخد كله في الاستخوبس ، و جايب جدو يلعب في الهوامش ، بس ما عملش حساب المليطة الفارغة ، و الشنكتة الشاغرة ، 

يا صاحبي الطبلسة زيادة عن اللزوم ، بتقلب شقلطة و مهيصة في الآخر ،

و ع الواحدة كله يرقص . 

المهم يعني ، إذا كنت فاكر نفسك هندشة ، فإحنا طلعنا مدرشة في الفرفشة يا نعكشة ،

من الآخر كدة ، إللي يدخل المدعكة ، ما يجيش يقول مفككة يا بشتكة ، و الحلو يفهم .

و أهو كله ماشي .

الشاويش فى الدروشة و التهييس

اقولكم حاجة كله بخت و نصيب , و اللى من نصيبك لازم يصيبك حتى لو حكومة ابو سحلول

و الشعب عامل زى الارملة الوحدانية اللى مش لاقية تأكل العيال و ناكشة شعرها و بتلف حوالين نفسها ,

كله كوم و الشاويش فى البلد , بقوا اكتر من الهم على القلب , فعلا... اثبتوا ان من درويش لشاويش يا قلب لا تحزن , 

و ادينى دروشة اديك تهييس , 

و اهو كله ماشى فيكى يا بلد من غير حساب و لا عتاب , 

و كله ماشى بقى دى حكاية كل مصرى مش لاقى اى حاجة ى دنيته , كله ماشى و كله زى بعضه و مش فارق , ماهو مربوط فى الساقية و الساقية بتلف , و علشان الساقية تلف بيه لازم يغموا عنيه , علشان يفضل فى الكوز و ما يخرجش منه , 

اصل الكوز دة هو الخلاط اللى بتتضرب فيه حضرتك , كلنا بنتضرب فى الكوز و الكوز راح و الكوز جه , اصل عدوية اما قال فى يوم الكوز اتخرم كان بيقرأ الطالع , فعلا الكوز اتخرم و وقعنا منه كلنا , يطلع بقى الواحد بكل البلاوى اللى شافها فى الكوز زى الكلب المسعور مش شايف قدامه , ماهو خلاص الحشيش بعد ما ضربوه بقى حشيش بأمر الشاويش و الكوز المخروم , يبقى آخرها طلقة بالتلاتة بس طلقة فى المليان , 

و اهو كله سمك لبن تمر هندى و فيلم الكيف دة بحبه اوى و اصله بيعبر عن الواقع بتاعنا , اللى هو واقع م ال 19 , عايز تفهم ليه بيحبوا الشاويش اعمل دماغ برسيم و انت تحبه زيهم , ههههههههههههههه يا مبرسمين , 

و اهو كله ماشى و نص الشعب مااااااااااااااااااااااااااء و الباقى واااااااااااااااااااااااااااااااااااء 

و الله يمسيكى بالخير يا نجوى فؤاد كنتى رقاصة زى الفل .

حد فهم حاجة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الايام فى مصر

لأيام كلها في مصر بقت غير بعضها في كل حاجة إلا حاجة واحدة ،

في آخر كل يوم بنروح نعزي في ضحية جديدة ،

يا تري عزاء مين النهاردة ؟

أنا و لا انت و لا إنتي ؟

يا تري الدور علي مين ؟

و يا تري هاتبرروا موته بإيه ؟

سؤال حلزونى

سؤال ساكسوني حلزوني 

هو صحيح البيض قبل التبرير و لا التبرير قبل البيض ؟

يعني أنا أبرر ، إذا أنا بيض و لا أنا بيض ، إذا أنا ابرر ؟

يعني مثلا كل تبريرة و فيها بيضة كبيرة ، و لا كل بيضة كبيرة و فيها تبريرة ؟ 

الواحد بس من باب العلم بالشئ مش أكتر ، 

من هو الإنسان البيض ؟

هو إنسان موطنه الأصلي الجبلاية ، و يتكاثر بالتلامس ، يبرر كل شئ حتي أصبح مخه بصفارين . 

و بيضة علي بيضة ، التبرير بيكتر 

و نحط عليها بيضة ، يا مبرراتي يا أهبل ، 

بجد فعلا عندنا إكتفاء ذاتي من البيض ، و هاتلاقوه متوفر في كل حتة ، في الفضائيات ، الصحافة ، و مواقع التواصل الاجتماعي

الالتراس و ادينى عقلك

إديني عقلك 

دلوقتي علشان يبرأوا المجلس العسكري السابق ، بيقولوا إن الإخوان هما إللي عملوا مذبحة بورسعيد إللي إتقتل فيها 74 واحد من الألتراس ، ماشي ، قلت يا واد طنش خالص . 

قوم إيه إمبارح بعد الاشتباكات مع الالتراس يقولوا إن الالتراس إخوان متنكر في التراس ، 

ليه يا التراس تقتلوا 74 واحد من الالتراس ، ليه تنتحروا يا وحشين ؟ 

علي فكرة المشكلة مش فيهم ، المشكلة إنهم بيستغبوكم أوي ، و بصراحة أنتم بت...ثبتوا كل يوم إن عندهم حق ، 

كدة بقي الشعب اتقسم ما بين 

مااااااء

و وااااااء

و الباقي غبااااااااء

السيسى حل مشاكل البلد فى التليفون

السيسى حل مشاكل البلد كلها فى التليفون , و دة تسريب لبعض المكالمات 

المكالمة الاولى 

الووووووووووووووووووووو

ايوااا

سيادة وزير الدفاع 

- ايوا يا حبيبى ايه مشكلتك ؟؟؟

- أنا ياريس دخلت قسم شرطة أعمل محضر قام الظباط والمخبرين ضربوني علي قفايا

وجابوا ساعة رقمية وقعدوا يشوفوا من هايضربني أكتر علي قفايا في الدقيقة

و ماخلصوش إلا لما ظابط المباحث عمل رقم قياسي وضربني 80 ضربه على قفايا في الدقيقة...

لغاية ما قفايا ورم و نظري ضعف و ما بقيتش شايف قدامى , 

يرضيك كده دة انا فوضتك و قلت نعم على الدستور و أنا ولا مجرم و لا حاجة

أنا كنت رايح أشتكي و أعمل محضر في الجيران مش اكتر , 

- بص يا مواطن

إحنا كلنا في خدمة الوطن

و الجيش و الشرطة و الشعب ايد واحدة

و الشعب في خدمة الجيش و الشرطه

لما يكون ظابط بيحميك و يحمي أولادك من الارهاب إيده بردانة شوية و انت عارف الدنيا برد الايام دى و عايز يدفيها ويسخنها على قفاك ده يزعلك فى ايه بس ؟

لازم تضحي شوية علشان الوطن , احنا بنكافح الارهاب علشانك . 

- الله يخرب بيتنا احنا يا شيخ 

- المكالمة الثانية

============

- آلووو

ايوااا

سيادة وزير الدفاع معايا شخصيا

- ايوااا قول يا مواطن ايه مشكلتك ؟؟؟

- أنا يا ريس و غيري ملايين ساكنين في المقابر وتحت الكباري و في عشش في ال...

- اسكت اتكلم عن نفسك بس يا مواطن بلاش تعميم , إنت عايز تعمل لي تنظيم علي التليفون ؟!! فاهم ... و لا أفهمك بطريقتى !!!

- فاهم فاهم يا ريس

- كمل يا مواطن

- نفسي في شقة اودة و صالة و عفشة مية 

- واضح يا مواطن إنك مش متعلم ومش فاهم حاجه , تسكينك في المقابر إنت وغيرك ده له حكمة عظيمة , إنت عارف إن الدين بيأمرنا بزيارتها للموعظة والإعتبار من وقت للتاني عشان نعرف إنها دنيا فانية و إنت محظوظ كل يوم وكل ساعة بتتعظ , ده إنت تحمد ربنا إننا مخدناش منك ضريبة اتعاظ و حايشين الببلاوى عنك ,

- طب ما تيجي يا باشا تتعظ عندنا شوية

- إخرس يا ... مش كفاية بنكافح الارهاب علشانك , 

دببببب

وتم غلق الخط 

الله يخرب بيت التفويض ع الدستور ع الكل كليلة 

- المكالمة الثالثة

============

- آلووو

ايوااا

المشير السيسى حبيبنا معانا

- ايوا ايوا كدا إيه مشكلتك يا حبيبى ؟؟؟

- أنا يا ريس شاب عندي 29 سنه ومتخرج بقالي 9 سنين ومش لاقي شغل

ولسة بآخد مصروفي من والدى و قاعد علي القهوة طول اليوم و نفسي أشتغل يا ريس

- إنت غريب قوي يا مواطن , مش تحمد ربنا إننا مريحينك , عايز تروح للشقي برجليك و بعدين مالها قعدة القهوه , إتعلم منها حاجة تفيدك , ممكن تبقي بطل شطرنج زي كسباروف

و ساعتها تعرف إن قعدتك علي القهوة كان مصلحة . 

- ياريس عايز أكون نفسي

- متكونها يا حبيبي حد حايشك ؟؟!!

- أكونها إزاي من غير شغل ؟؟!!

- إيه يا مواطن أنا ماسك أعصابي , إحنا فاضينلك و لا إيه ؟؟!! إحنا عندنا عيال بنكونها برضوا

خلي أبوك يكونك يا مواطن , كفاية علينا بنكافح الارهاب علشانك . 

دبببب

وتم غلق الخط

الله يخرب بيت اللى جابوك يا سيسى 

بعد كدة تم تشغيل المجيب الآلى , اخدم نفسك بنفسك , احنا بنكافح الارهاب علشانك يا مواطن .

الشماتة فى الموت

الشماتة في الموت كارثة لا يعلم مداها إلا الله ، إحنا وصلنا لمرحلة بشعة ، 

الدم كله حرام ، دم مدني ، دم ضابط ، دم مجند ، كله حرام ، 

شوية بيشمتوا في الضباط و المجندين إللي بيموتوا ، ما لهومش ذنب في الصراع السياسي علي الكرسي الذنب ذنب إللي أشركوهم في الصراع دة ، هما برضه ضحايا . 

و إللي بيشمت في موت الإخوان ، و في موت شباب و طلبة جامعيين و، برضه مالهومش ذنب انهم مغيبين و في صراع سياسي ، الذنب إللي كان السبب في تغييبهم . 

الدم كله بدون وجه حق حرام ، القتل من أي حد لأي حد بدون وجه حق حرام ،

الشماتة في الموت حرام . 

يا رب نفوق بقي .

ابو لمعة و الخواجة بيجو بعد 30\6

حوار بين ابو لمعة و الخواجة بيجووووووو بعد 30 \ 6

ابو لمعة : بص يا خواجة انا كنت نايم فى مصر تحت شجرة جيلاتى , و فاتح بقى باكل , لقيت تعبان كبير 700 متر قام داخل فى بطنى , قلت انزل وراه اشوف حكايته ايه ,

الخواجة بيجو : تنزل وراه فين ؟

ابو... لمعة : فى بطنى ! و هو شافنى نازل راح واخد ديله فى سنانه و طالع يجرى، وانا وراه ، يدخل يمين ادخل وراه ، يدخل شمال برضه وراه ، لحد ما وصل بيت الكلاوى ، راح داخل و قفل الباب على نفسه !

الخواجة بيجو : طبعا ماعرفتش تدخل وراه و رحت مروح .

ابو لمعة : لأ، اروح ازاى ، و انا اقدر اسيبه بعد ما ضحك عليا و دخل فى بطنى . 

انت عارف يا خواجة تحت بيت الكلاوى فاتح واحد حلاق ، قلت اخش اخد دقنى و استنى التعبان لما يخرج ، نص ساعة كده ولقيته مطلع راسه من الباب، بص يمين بص شمال ماشافنيش راح متسحب خارج ، رحت خاطف الموس من ايد الحلاق وهاجم على التعبان، شوف يا خواجة، هى ضربة واحدة بالموس قسمته نصين !

الخواجة بيجو : بضربة واحدة قسمت التعبان الـ700 متر؟

ابو لمعة : بالطول وحياتك !

الخواجه بيجو: يا رااااااجل

ابو لمعة: وبعد كدة اخدت تلات اربع خمسين شنطة كدة من محل الفكهانى اللى بعد الطحااال

الخواجة بيجو: ايه دة هو الفكهانى دة لسه موجود ؟

ابو لمعة :ايو يا خواجة مهو فتح تانى بعد ثورة 30\6 اصل امه كانت عيانه و مراته كانت مبتخلفش فراح للوليه ام حنفى اللى اول الشارع قالها معندكيش مكركوم علشان ابنى الصغير متعور فى زورة , فقالتله اقعد علشان فيه خناقة دلوقتى فى سيناء قالها ليه كفا الله الشر

اصل بص يا خواجة دة موضوع طويل اوى اصل جوز الوليه ام حنفى دة بيشتغل كمسرى و المرتب مش مكفيه و عمل اضراب , فمرة....بلع ربع جنيه مخروم من زهقه , كان الوحيد اللى فى جيبه , فجاله مرض وحش بعيد عنك , بقى يشم صوابع رجليه وبقى مدمن ارباع جنيهات

لا وايه مخرومة كمان , و بعد كدة قال نعم على الدستور و خلى مراته ترقص برة اللجنة , و اتهبل بقى و جاله كساح و لين عظام و بلاوى سودة ربنا يسترها علينا , لأنه مش عارف اخينا هايترشح و لا لأ , 

الخواجة بيجو : بس ... بس ايه دة انت هتقرع عليا , بطل فشر بقى . 

ابو لمعة: يعنى يا خواجة مصدق ان كل دة بيحصل فى بطنى و مش مصدق انه مدمن ارباع ..... سلام انا ماشى

اما انت خواجة رغاااى بشكل 

فهمان و لا مو فهمان ؟

مقارنة بين القنوات الاخبارية

مقارنة بين القنوات في تغطية إللي جاي و إللي فات .

يعني إنت عايز تعرف الحقيقة ، زي أي مواطن عادي بتفتح التلفزيون هاتشوف إيه ؟ مفاجأة طبعا ، تعالوا سوا نقلب في القنوات .

قناة الجزيرة : إشتباكات هائلة في محافظة الجيزة بين انصار محمد مرسي ال...ذين خرجوا في مظاهرات سلمية و بين الداخلية و الداخلية تستخدم الغاز و الخرطوش و الحي و مدافع مضادة للطيارات و قاذفات اللهب و الجرينوف و مدافع الهاون في فض المظاهرات ، و القتلي بالآلاف بين أنصار الإخوان . 

إنت كمواطن مذهول ، تقلب تشوف قناة تانية ، 

سقناة سي بي سي : اشتباكات بين أنصار المعزول و الداخلية في الجيزة و استخدم فيها انصار المعزول المولوتوف و الخرطوش و الآلي ضد ضباط الداخلية ، و إصابة تلانتلاف ضابط و تلانتاشر مجند اصابات خطيرة ، و قد استعملت الداخلية اسلوب ضبط النفس لأقصي درجة . 

إنت هاتتجنن بقي الحقيقة فين ؟ تحول علي قناة تانية . 

قناة الحياة : يوم هادئ بلا اشتباكات في مصر و نشكر وزير الداخلية علي حفظه للأمن و الأمان ، و تسلم الأيادي و كمل جميلك و الشعب يريد السيسي رئيس و هييييه 

طبعا انت دلوقتي داخل علي حالة من البله المغولي و مش فاهم أي حاجة و هاتتجنن ، قلت تغير القناة و تسيبك من الفضائيات . 

القناة الأولي الأرضية : موعدكم الآن مع الحلقة التاسعة من فوازير فطوطة . 

كسرت التليفزيون بقي و نزلت الشارع ناكش شعرك بتكلم نفسك ،

و قلعت ملط و عمال تغني ،

التعلب فات فات 

و قلبت في كل القنوات

و في الآخر بقي اتقبض عليك و حولوك علي مستشفي الأمراض العقلية . 

ما هو برضه دي غلطتك ، بتدور علي الحقيقة ليه ، شفت أخرة التلفزيون إيه ؟ 

نصيبك بقي ، يلا كلنا لها .

هايترشح مش هايترشح

حصل معايا موقف النهاردة بجد أول مرة يحصل ، 

أنا من فترة بعد ما عرفت ان الأوزون إتخرم ، قلت ما بدهاش بقي ، جبت 4 كرمبات و حطيتهم علي السطح قلت يمكن الكرمب يغلي و لا حاجة ، جيت الصبح سمعت صوت غريب فوق السطح ، قلت أكيد حرامي ، أتسحبت و طلعت ، لقيت الولية ام بعجر جارتنا ناكشة شعرها و ماسكة دكر البط اليتيم بتاع الواد دقدق العجلاتي ، و عمالة تنتف ريشة ريشة ريشة ، 

و هايترشح 

مش هايترشح 

هايترشح 

مش هايترشح 

هايترشح 

لا لا مش هايترشح 

هو فيه كدة ؟

بتهاجموا السيسى ليه يا بشر

مش عارف الناس إللي مش عايزة السيسي رئيس بيهاجموه ليه ، إيه يعني هايبقي كدب ، إيه يعني مش عارف يقضي علي الإرهاب . 

دة السلفيين بيقولوا انه بيطبق شرع الله ، و عادي مش عاجبكم يبقي رئيس ، 

إعملوه حجاب ، مش بيقولوا ان اسمه في مخطوطة من 1100 سنة ، ينفع برضه ، 

بلاش حجاب ، إحشوه ، دة بقي محشي صينية في الفرن يجنن ، 

مش عايزين ؟ خللوه 

اكيد هاينفع في حاجة يعني بطلوا افترا و هجوم علي الراجل .

مصر بقت عاملة زى الملاهى

أنا حاسس إن مصر بقت عاملة زي الملاهي ، بقت مصر بارك .

إللي يعارض العسكر الداخلية تدخله بيت الرعب ،

و إللي يطبل و يزمر يركب الصاروخ ،

و إللي بيدور علي أهداف الثورة يركب المرجيحة إللي بتلف بيه ،

و إللي مش فاهم حاجة يخش أودة المرايا ، 

أما بقي إللي يعمل مظاهرات ، فدة اللعبة هاتقع بيه و يموت ، 

نورتم مراجيح المولد

برنامج السيسى رئيسى

برنامج السيسى رئيسى , و معانا مكالمة من المواطنة مزنوقة صلح 

- آلووو

صباح الخير يا سيسى يا جميل

صباح الجمال , أيوا يا شابة , إيه مشكلتك وأنا أحلها ليكي في فمتوثانية ؟ انتى مش عارفة انك نور عينيا و لا ايه , 

- أنا يا ريس وصلت لسن 35 و مش لاقية عريس و نفسي أتجوز زي البنات كلها ويبقي عندي بيت و اولاد و أسمع كلمة ماما

- هاهاهاهاهاها , إنتى تحمدي ربنا , جواز إيه و قرف إيه , خلفة و طبيخ و واحد متخلف ين...كد عليكي ومسئولية , خليكي كده

- يا سيادة المشير , نفسي أحب و أتحب

- يا مواطنة , حب الوطن كفاية عليكي

- يعني أتجوز الوطن وأجيب منه عيال !!!

- يوووه , مش كفاية عليا باكافح الارهاب , إنتى مش عجبك كلامي طيب 

دبببب

وإنتهت المكالمة

واخيرا

حد عايز الرقم يطلب ويجرب ؟

سخونية

سخونية .. سخونية .. نفسي سخن و حاسس اني تنين .. وشه هادي .. وشه هادي بغباء يعنى..

احلى حاجة اما تبقى عايش فى الدور ,

قاعد كدة , و الإضاءة زي مابحبها بالضبط .. لونها الأصفر و كميتها و متوزعة ازاي مابين الكل ، أنا خدت الحبة بتوعي و فضلت مبتس...م.. 

عضلات رجلي واقفة .. آه , تفتكروا من كتر الضحك على نفسى ؟

مطر ، احتمال ؟؟ تفتكروا احتمال ينزل مطر تاني ؟

كلمة كلمة يا حبيب قلبى كله كلام مش اكتر افهم الله يخرب بيتك , كبيرة على امك تفهم يعنى ؟ بقالى شهور بافهم في اللى جابوك . 

وشي بينمـل بشويش : منه لله انفلوانزا الخنازير 

كنت ماشى , واحد جابلى علبتين حلاوة الرئيدى الميزان هدية , و أنا حضنته في الشارع مع اني معرفهوش .. 

أيوة أنا مقصر ، مقصر فى حقكو كلكو و فى حقها بالذات , فى حق مصر ، 

حد عنده مشكلة ؟ 

وجع الأعصاب ينز ينز ، و يتوغل و ينتشر .. و يتسرب و يستمر و يستمر و يستمر , كائنات مستفزة على الفضائيات كلها ،، ليه فيه كائنات مستفزة ؟؟؟ 

نفسى فى يوم اروح معيط و دموعى على خدى .. من فضلكو .. أول ماعنيا تدمع دة لو حصل يعنى , وقفوا كلام فورا و طلعوا الطراطير و البلالين بتاعت الحفلة المفاجئة اللي هيا سبب كل دة ... حفلة 30\6 , و نعيش كلنا بقى 

و ما مصر بعد الثورة إلا فيلم هندي كبير ! و انا مش ابراهيم الأبيض ، طب بعمل هنا ايه طيب ؟... 

ليه بطني تكون بايظة فى أكتر يوم محتاج فيه اسبرسو ماكياتو و اللبن برة ؟؟ ليه ليه ليه ليه ... محروم من الحرية لمدة 33 سنة . ليه بس انا عملت ايه فى دنيتى ؟

من يوم ماخدت الصابونة بعد ما عصرت على نفسى لمون و قلت مرسى حبيتها أوي و بقيت اعشق الصابون ... 

كونسبت الزحلقة بقى مبهر بالنسبة ليا .. يوم ما أقف عدل بقى , لازم أشتري لنفسي صابونة مخصوص و أرميها تحت كعب رجلي بكل فخر .. و اقول انا فوضته و قلت نعم على الدستور و عايزه رئيس , و أول ماقع على ضهري أبتسم لمنظر النجفة في هذا الفيو الرائع و أستعيذ بالله من شر حاسد اذا حسد , اصل البلد محسودة , و الله مصر محسودة , عين و صابتك ياختى , بخرووووووووووووووووووووها ,

و اقوم بقى انكش شعرى و اقلع الهدوم و اجرى فى الشارع و اقول فينك يا سيسى يا صاحب اكبر صابونة أخدتها فى حياتى , 

سخونية .. سخونية .. تلطيش كلام في النافوخ .. نهجان كتير .. و التليفزيون عالي و الريموت فين ؟؟

فين يا حبايبى .. فيـــن ؟

الريموت كان معانا فى يوم بس دلوقتى ضاع مننا , مش احنا اللى بنتحكم , الريموت مش معانا , نعمل ايه طيب , نجيبه منين ؟

احنا اللى عملنا كدة فى نفسنا . فضلنا عايشين 3 سنين من غير الريموت , بذمتكم ينفع كدة ؟

فهمان و لا مو فهمان ؟

اسئلة تهييس سياسية

ليه عدلى منصور قاعد فى الثلاجة ؟

علشان يخض الببلاوى اما ييجى يفتحها

طب ايه هي قمة الادب ؟؟

ان الببلاوى يخبط على باب التلاجة قبل ما يفتحها

...

ايه هى قمة الدهشه ؟؟

انه يلاقى عدلى منصور زق الباب و فتحله التلاجة .

ايه هى قمة العبط ؟؟

انهم يسلموا علي بعض و يدخلوا يقعدوا مع بعض فى التلاجة

ايه هيا قمة الحيرة ؟؟

ان محمد ابراهيم بيدور عليهم مش عارف انهم فى التلاجة 

ايه هي قمة الرخامة ؟

ان السيسى ييجى يشيل فيشة التلاجة و يقطع عنهم الكهرباء .

kanoun saksonia

عسكرى الشطرنج و السياسة

فى لعبة الشطرنج

العسكرى ممكن يترقى وزير و يتحرك فى كل الاتجاهات و أى عدد من الخطوات ,

بس برضه فى لعبة الشطرنج

عمر العسكرى ما بيترقى يبقى ملك مهما طال الدور و لو قعد سنين , العسكرى آخره وزير عمره ما هايبقى ملك ,

عارفين ليه ؟
لأنه بعد ما كانت حركته محدودة بعد ما اترقى بقى يتحرك كتير و فى كل الاتجاهات , مش هايعرف يرجع و تبقى حركته محدودة تانى , ما هو حركة الملك خطوة واحدة زى العسكرى , بس الفرق الملك فى كل الاتجاهات ,
يعنى العسكرى لو حتى بقى ملك , هايبقى ملك فاشل و هايموت بسرعة ,
و من أقل حاجة كش .

روبا بيكيا

 .

شعار المرحلة القادمة

شعارنا في المرحلة الجاية 

هاتوافق تاخد بالجزمة ؟ و لا نتبلي عليك و نقول إن انت سبب الأزمة ؟

يا مآمن للبيادة

قال علي رأي المثل 

يا مآمن للبيادة ، يا مآمن لسما المصري في الشقة مع حمادة.

احنا رايحين على فين

الموقف دة حصل معايا النهاردة ، و هاقوله زي ما حصل بالضبط و يا رب تفهموا داخلين علي إيه . 

كنت راكب ميكروباص ، واحد فتح سيرة إضراب سائقي هيئة النقل العام ، ردت عليه واحدة قاعدة جنبي و قالت أنا موظفة ، فضحونا بس بحد أدني في الجرايد و الفضائيات و مفيش حاجة إتنفذت ، 

إيه المشكلة إنهم يدوهم الحد الأدني ، دة 1200 جنيه ، دة كيلو اللحمة ب 60 جنيه ، يعني هاياكلوا لحمة مرة بالعافية في الاسبوع ، فالحين بس هانطبق الحد الأدني و يفضحوا الدنيا في الفضائيات و يضحكوا علينا . 

أنا نقلت كلامها بكل أمانة لا زودت و لا نقصت .

لقد كافحت الارهاب

إنت هاتطلع تخطب في الشعب و تقولهم لقد كافحت الإرهاب 

لقد كافحت إيه ؟ الارهاب ، إحفظها كويس . يلا ، ميعاد الخطاب .

يا شعبي الحبيب الصبور المهاود ، 

لقد صافحت الكلاب 

يخرب بيتك ، لقد كافحت الارهاب 

لقد سننت الأنياب 

...

لقد كافحت الارهاب يا باشا

لقد حبست الشباب

لقد كافحت الارهاب قولها 

لقد ناشرت الهباب

الووووو ، لقد كافحت الارهاب يا سيادة المشير . 

هافتح الاسبيكر قدام الميكروفون و قولهم انت يا ببلاوي

لحظة خروج الآهة . شعر

لحظة خروج الآهة

من جوفك

لحظة ما يجافيك

طيفك

و عشان خوفك

بتكتم الآهة دى جواك ...

و تهزك دموع عنيك

و تزلزلك 

و الدمع يا صاحبى 

على الوشوش اشواك

تسيل على الخد

دمعاية 

و تفكرك

بأنك نسيت توبك 

عليك مقطوع 

و كان لابد يتغير 

بس انت خلاص رضيت

بتوب مرقوع 

رضيت بالرقعة يا صغير 

رضيت انك تعيش موجوع 

شوية آهات 

و شوية دموع 

بدلت دنيتك بآلام 

و اخترت تبقى نعامة 

تتخبى وسط الرمل 

بعت احلامك بكام ؟

ما بين دقن و ما بين كاب 

و عايش وسط النمل 

دلدول مع الحكام 

و انت يا صاحبى 

خلاص بقيت مكشوف 

دخلت خلاص القفص 

و صبحت ضل خروف

احنا اللى صفصهنا الهوا

من الآخر كدة علشان كله يرتاح 

أحنا أللى صهفصنا الهوا و عبينا الشفاشى باللولوا

و احنا اللى دشلعنا الغوازى من غير شرقصة و طبلصة

عشان نكرفش التنكيش من غير كرفشة لازم نعيشها شألشة

انا فوضت السيسى يا سامية

انا فوضت السيسى يا سامية 

فوضت السيسى يا ناس 

انا فوضت السيسى يا خلق 

يا ام نياظى 

صحى نياظى و قوليله ضبش فوض السيسى 

انا السبب يا ناس 

اعملوا فيا اللى انتو عايزينه 

انا السبب

رسالة تلقائية

هذه رسالة تلقائية تبتعد عن البعد الواقعى الحلزونى فى الواقعية المنتشرة مع الوضع فى الاعتبار وجود تيار تلقائى فى خلايا الدماغ اللاسعة ينحدر نحو التفصيل المتوازى فى المنعطف اللولبى لبسط التخيل الاستراتيجى و سعة المنحنى المتحد فى عامل مساعد ينقضى بانقضاء التوقف الأمثل لوجود الهيئة المستقلة فى المجتمع اللاوزعى تقوله يمين ماشى تقوله شمال يحدف منك فى مربع حدثى من الكفايات المنتشرة فى مشترك متقدم من كل ا...لخلفيات المحيطة بتكهنات او لا تكهنات بالمستقبل القريب المار فى طريق البراديسية الهائمة فوق التكدس المرورى و السكانى و هذا يحدث فى وسط الصراع بين الاجناس المختلفة على التكية المليئة بتعامدات فكرية تنمو متقيدة بمبدأ الاندفاع الغوغائى فى التقيد بالمفاهيم المختلفة للسلطة الحائرة بين المضلع الكرتونى فى تطبيل الحاكم و المنظور المعارض فى تقييده , و ايضا فى تخوين الآخر صاحب فكرة التغلغل فى مفاهيم المجتمع المنتشرة فى قيام الدولة البوهيمية , هذا بخلاف التعبئة المتشعبة فى المجتمع المتقيد بلاءات منحرفة و انحناءات متفرقة مع دخول موسم صيد البط

كفتة القوات المسلحة

عاجل 

القوات المسلحة إكتشفت علاج للإيدز و فيروس سي ، 

الحمد و الشكر ليك يا رب ، أول من إكتشف علاج للإيدز في العالم . 

كدة انا متفاءل ، ان شاء الله كدة بالمعدل دة هايلاقوا علاج لمشكلة الكهرباء و المية و الحد الأدني السنين الجاية .

و سمعني سلام إيدزاوي كبير أوي ، 

و بحبك يا حمار

العشبة السحرية

معانا العشبة السحرية ، علاج لكل الأمراض ، بتعالج الإيدذ و فيروس سي ، 

بتعالج فيروس بي و دي و إف و تي ، بتعالج الكسيح و المشلول ، علاج للضعيف و المخبول ، 

بتعالج الامراض المستعصية و تكشف عن العلل المستخبية ، 

بتعالج العين و تسلك الودنين ، 

الأعمي هايفتح و الاطرش هايسمع ، 

معانا العشبة السحرية ، تغلي الكيس و تشربه يا شريك ، كل الأمراض تقول يا فكيك ، 

العشبة مش في امريكا و لا في الصين ، 

و لا في روسي...ا و اليابان و لا تلاقيه في الفلبين ، 

العشبة دي في ارض النيل ، جهز بوتاجازك و مج طويل ، 

في الصيدلية ، أي علاج لأي مرض مش أقل من 100 جنيه ،

أنا لا هاقولك 100 و لا خمسين ، 

مش هاقول 20 و لا 30 

كل من طلع جنيه ياخد كيس ، أيوة الكيس بجنيه و الخمسة ب 5 جنيه ، 

و أدي كمان كيس ، 

أيوة جاي

شألشة

من الآخر كدة علشان كله يرتاح 

أحنا أللى صهفصنا الهوا و عبينا الشفاشى باللولوا

و احنا اللى دشلعنا الغوازى من غير شرقصة و طبلصة

عشان نكرفش التنكيش من غير كرفشة لازم نعيشها شألشة

ايفينت سفارة اوكرانيا

بافكر نعمل ايفينت قدام سفارة اوكرانيا علشان نباركلهم , و احنا واقفين هناك كل واحد يضرب اللى جنبه بالقلم على وشه .

علاج لأى حاجة و أى حد

مفيش علاج لأي حاجة و أي حد ؟

بس علاج مش دعاية

علاج بجد ؟

مفيش علاج للمكسحين ؟

طب الجعانين ؟

طب العميان ؟...

او الطرشان ؟

او المهمومين ؟

و العواطلية و الشحاتين ؟

طب المحبوسين ؟

و اللى فى الضلمة عايشين ؟

و اللى من السرطان شاكيين ؟

طب علاج للمغفلين ؟

للمنافقين ؟

طب حتى علاج للى فى المقابر ساكنين ؟ 

و لا اللى اصلا لأربع حيطان مش لاقيين ؟

أو علاج للمظلومين 

و المحرومين ؟

و اللى فى الكراسى لازقين ؟

طب علاج للمقتولين ؟

للعوانس و المغيبين ؟

طب علاج للضايعين ؟

و اللى عايزين يتعالجوا و تايهين ؟

طب علاج للجاهلين ؟ 

و اللى فى العسل نايمين ؟

و اللي ع القهاوي قاعدين ؟

علاج لمين و لا لمين و لا لمين و لا لمين