انا هاتكلم و خلاص ، ممكن مش بالترتيب بس هاقول اللى فى دماغى ،
من فترة طويلة من قبل ترشح السيسى للرئاسة قلت لو اترشح فعلا يبقى كارت بيتحرق لمهمة معينة و سيتم الخلاص منه ، قلت ساعتها للناس اللى مش فاهمة ان نظام مبارك زى السرطان ، جزء منه الفلول و رجال الاعمال ، و جزء منه المجلس العسكرى ، و جزء منه الاخوان و سلفيين امن الدولة .
السيسى جه للقضاء على الارهاب المحتمل ، الارهاب المحتمل اللى تم لصقه بالاخوان ، الاخوان اللى اجتمعوا مع عمر سليمان و وقفوا مع المجلس العسكرى ، الاخوان اللى محمد بديع قال على صفحته مالناش علاقة بثورة يناير ، الاخوان اللى خيرت الشاطر و حسن مالك و غيرهم خرجوا من السجن معاهم مليارات ، الاخوان اللى كانوا جماعة محظورة و رغم كدة ليهم مقرات و عملوا حزب سياسى تحت اعين الجيش و المجلس العسكرى ، و فى الآخر اتسلموا السلطة بعد خروج آمن للى عملوا مذابح ماسبيرو و محمد محمود و مسرح البالون و العباسية ، و كمان تم اعطاءهم قلادة النيل .
المهم دلوقتى ان لو ماكانش فيه اخوان ما كانش هايبقى فيه ارهاب محتمل لازم رئيس عسكرى علشان ينقذ الشعب منه ، الاخوان كانت مهمتهم محددة حفظ التوازن ، فزاعة الناس تخاف منها ، مبارك قبل ما يتنحى قال لو اتنحيت هايحكمكم الاخوان ، و السيسى انقذ الشعب من الاخوان ، الفزاعة المعتادة برعاية امن الدولة ،
طبعا اللى ماتوا فى رابعة و النهضة مالهومش ذنب فى كل دة ، دول شهداء تم التضحية بيهم ، و المجندين اللى بيتقتلوا برضه مالهومش ذنب تم التضحية بيهم لحفظ توازن القوى ، وجود دة يعتمد على وجود دة ،
باب القوات المسلحة فى الدستور و تحصين وزير الدفاع ٨ سنين حط علامات استفهام ، ليه تحصين وزير الدفاع ،، و ليه مش الرئيس ، بس الموضوع سهل ، البلد كلها باقتصادها بثرواتها بمشاريعها بأراضيها تابعة للجيش ، مش تابعة للرئيس ، الجيش دولة فوق الدولة ، كل المشاريع العملاقة ، اللى بقت دلوقتى بقانون فى الجريدة الرسمية بأن الهيئة الهندسية للقوات المسلحة تاخد مشاريع بالأمر المباشر ، فيه قانون تانى صدر من شهور بأن السيسى يتنازل عن جزء من صلاحياته لوزير الدفاع و بعدها برضه السيسى يتنازل عن جزء من صلاحياته لرئيس الوزراء ، طيب اما يصدر قانون يقنن وجود الجيش فى الشارع لحماية المنشآت دة معناه ايه ؟ معنى وجود الجيش فى الشارع بقانون ان مفيش رئيس جمهورية و ان فيه ضبطية قضائية و احكام عرفية و قضاء عسكرى ، معناه ان الحاكم هو وزير الدفاع ، يعنى المستفيد الاكبر هو المجلس العسكرى حتى الآن ، طيب هل المجلس العسكرى ضد مبارك و فلوله ؟ لأ طبعا ، هما فى صراع و معاهم الاخوان زى ما بنقول مصارين البطن بتتخانق ، صراع التوازن فيه هو الاخوان ، اللى بيتم استغلالهم كورقة ضغط .
معلش كلام مش مترتب ، بس هارجع و اقول ليه الاعلام قلب على السيسى او بيبدأ يبقى ضده ، دى ليها تفسير من اتنين ، انا هاحتفظ باختيارى لنفسى بس هاعرض الاختيارين ، التفسير الاول انهم بيمتصوا غضب الناس ، يعنى بيخرج الشحنة اللى جواك ، انت اتصدمت و اتضحك عليك بدل ما تعمل مشاكل نهاجم احنا الرئيس و انت بتتفرج تخرج شحنة الغضب اللى جواك .
التفسير التانى ان خلاص السيسى كارت اتحرق و مهمته خلصت و بيتم التخلص منه ، الناس تعبت و بدأت تفهم و بدأت تتململ من اللى بيحصل ، و الحل لعبة تمرد جديدة و باى باى سيسى ، ممكن مختلفة بس هاتتعرف ،لو لاحظنا السيناريو دلوقتى اللى بنشوفه و طابقناه مع السيناريوهات اللى فاتت , طنطاوى ( عسكر )ظاهريا خلى مبارك يتنحى و بعدها سلمها لمرسى ( اخوان ) الشعب كان عايز رئيس مدنى و بعدها السيسى ( عسكر ) عزل مرسى و سلمها لعدلى منصور كمحلل علشان ترجعله بالانتخابات , بدايات مرسى كان الاعلام معاه و بعدها بدأت الكوارث فى البلد ازمات ورا ازمات ورا ازمات , دلوقتى السيسى الاعلام معظمه معاه بس بدأ الاعلام يحط السم فى العسل , يعنى بيضرب من تحت لتحت و برضه ازمات ورا ازمات ورا ازمات بس رد الفعل للشعب اتغير و بقى اقل فى الاندفاع
لو حبينا نعرف القادم ايه ، احنا من ٢٥ يناير و الخطة ما اتغيرتش ، دايرة مقفولة و سيناريو واحد بيعيد نفسه و هما عايزين الشعب يرجع مسالم و مستأنس لبديل مبارك ، اللى ظهر فى الاعلام يهنئ الشعب المصرى اللى دلوقتى نسبة لا يستهان بها منه بتقول ولا يوم من ايامك يا مبارك .
سيتم استخدام الاخوان لزيادة انقسام الشعب بلعبة فرق تسد ، سيتم الضغط من الفلول و رجال الاعمال المسيطرين على الاعلام ، سيتم الضغط على المجلس العسكرى و هايفضل صراع مد و جزر لكل واحد فيهم ، لأن للأسف مفيش بديل رابع فى البلد ، مفيش اى بديل ليهم ، و الضحية شعب لازم يتم استئناسه و كلمة السر انه يقول و لا يوم من ايام مبارك ، و ييجى البديل لمبارك و ياخد الشعب بمعارضة ٠٪ .
دايرة مقفولة برعاية امريكية .
اصدقائى القريبين منى عارفين ان توقعاتى ٩٠٪ بتحصل ، و انا متوقع تغييرات كتير هاتبدأ فى كل الاحزاب الموالية للسلطة و فى الاعلام . طبعا بعد التعديلات اللى حصلت فى قيادات الجيش و الداخلية .
مين كبش الفدا الجاى ؟
و مين عليه الدور فى الصفقة ؟
عسكر ؟
فلول ؟
اخوان ؟
المقال دة كان فى 29 يونيو 2012 بعد وصول مرسى للحكم
http://roba-bekia.blogspot.com/2012/06/blog-post_29.html
و المقال دة كان 1 مايو 2014 عن مبارك
http://roba-bekia.blogspot.com/2014/01/blog-post_5092.html
و دة كان 6 يونيو 2014
ملخص صغير
http://roba-bekia.blogspot.com/2014/06/blog-post_3260.html
و دة كان 1 يوليو 2014
كارت بيتحرق
http://roba-bekia.blogspot.com/2014/07/blog-post_5713.html
معلش طولت عليكم بس كله مرتبط ببعضه
يا رب احمى مصر
