ارضنا

بنتخانق علشان ارضنا ، مصريين عايزين يثبتوا بأى طريقة ان ارض مصر مش ارضها ، احنا دخلنا فى مرحلة جديدة ، كانت زمان الارض عرض ، دلوقتى بقت عرض و طلب للى يدفع و نثبتله كمان انها بتاعته و تدافع عنه .

حقيقة

"هنا تبدأ الدائرة المفرغة فى دورتها المفزعة. ففى غياب المعارضة المدنية، سوف يؤدى الحكم العسكري إلى السلطة الدينية. ولن ينتزع السلطة الدينية من مواقعها إلا الإنقلاب العسكري، الذى يُسلم الأمور بدوره، بعد زمن يطول أو يقصر، إلى سلطة دينية جديدة. وهكذا. وأحياناً يختصر البعض الطريق فيضعون العمامة فوق الزي العسكري، كما حدث ويحدث فى السودان.

الخروج من هذه الدائرة المفرغة، ضرورة..
والتواصل مع الشرعية الدستورية، مسألة حياة أو موت..
والشرعية الدستورية لا تتسع لهذا أو لذاك. فكلاهما خطر عليها، ومدمر لها، والذى يُفضل أحد البديلين على الآخر، يستجير من الرمضاء بالنار."

د. فرج فودة - حديث عن آفاق المستقبل
من كتاب "حتى لا يكون كلاماً فى الهواء"
1973

حالنا للأسف

تعلب لقي قطة بتشرب حشيش
قال ايه دا بتشربي حشيش دا مضر بصحتك تعالي
اجري معايا الحياة حلوة و الدنيا جميلة
القطة اقتنعت و جريت معاه
شويه و قابلوا فيل بيشم هيروين
التعلب قال ايه دا الهيروين مضر بصحتك
تعالي اجري معانا الحياة حلوة و الدنيا جميلة
الفيل اقتنع و جري معاهم
شوية و قابلوا الاسد و كان بيضرب حقن
التعلب قال ايه دا بتضرب حقن دي مضره
تعالي اجري معانا
الاسد سكت شويه و بعدين قال
هو ابن الكلب دا كل ما يضرب ترامادول يجرينا وراه الغابة كلها

انخفاض منسوب النيل

بعد فزع المصريين من ظهور جزر جديدة فى النيل بعد انخفاض منسوب المياة بسبب سد النهضة ، خرج وزير الرى فى سيكا سيكا بهذا التصريح
يا شعب سيكا سيكا انتم مش فاهمين ، ظهور الجزر دى مصلحة و سيتم زراعة الجزر المكتشفة حديثا بنهر النيل بالكوسة والطماطم و بناء مصانع لتصدير الكوسة والصلصه والارز بالمرة لعمل محشى الكوسة للصوماليين و اهالى الكونغو و تنزانيا العنب و سيتم التصدير حسب بحث وزاره التموين ربنا يكرمهم بيكافحوا من اجل الشعب والشعب وحش مش راضى عنهم...

كل دى عصافير

حسن يوسف يسعى لانشاء لاس فيجاس مصرية
ميريهان حسين و الضابط
عكاشة و قصة مقابلة السفير الاسرائيلى بدون موافقة النظام
مرتضى منصور
شيرين اعتزلت الغناء
البرلمان
و كمان البرلمان
كل دى عصافير ،دة الدولار وصل ٩.٥٠ يا ولاد المفكوكة.

صباحوو يا ماسر

جنيه تصبح على ماسر ،
و جنيه تمسى على ماسر ،
و جنيه علشان شكلك متضايق ،
و هاتطول فى الكلام هاخليك تشحن كارت جديد كل نص ساعة.

ثورة تالتة

احنا من الآخر محتاجين ثورة تالتة على الناس اللي عملوا الثورة الثانية لتحقيق مطالب الثورة الأولى ، بس ما يركبهاش اللى ركبوا الثورة الأولى و اتسببوا فى ظهور اللى نطوا ع الثورة التانية بسبب ركوبهم ع الثورة الاولى .

خريج الجامعة فى مصر

التعليم الجامعى مهم جدا ، بس فى مصر خريج الجامعة حاجة تانية ، يا ترى بعد ما بيتخرج من الجامعة بيعمل ايه؟

بيقعد ع القهوه من الصبح للعصر

ومن العصر للمغرب بيروح البيت ياكل لقمة ، اصله تعب من القعدة ،

ومن المغرب للعشا بيروح يلعب بلاي ستيشن عند جالاكسي بلاى ستيشن اللى على ناصية شارعهم ،

و من العشا بقى للساعه عشره بيرجع البيت ياكل تاني ، جاع من البلاى ستيشن ،

ومن عشره بالليل يشوف رفاق السوء هيسهروا فين عشان يصرف باقى اللى جيبه على دماغه ،

و هذا قمة الاعجاز العلمى.

استغماية

يا عم التيتى ارسي على بر حيرتنا معاك

مرة هانعمل عاصمة جديدة و مرة مش هانعمل عاصمة جديدة
مرة هانعمل محطة نووية و مرة تم تأجيلها لأسباب فنية
مرة سد النهضة مش هايأثر على حصة مصر و مرة التماسيح بعد فتح البوابات بتبلبط فى الشوارع
مرة اكتشفنا علاج لفيروس سى و جربناه و نسبة الشفاء ١٠٠٪ و مرة جبنالكم سوفالدى بالألافات
مرة نفتح محطة مترو السادات و يحصل تفجير فى تنزانيا نقفلها علشان كوريا زعلانة
حيرتنا معاك يا عمونا ، احنا بلعب استغماية سوا و لا ايه ، يخرب بيتك واكل داتورة

خلطبيطة

هى اتلخبطت شوية ، لأ بصراحة اتلخبطت كتير
بعد ٥ سنين ثورة اكتشفنا مفاجآت مذهلة

المؤيدين نزلوا التحرير
و المعارضين فى السجن
و الثوار قاطعوا الدستور
و ٦ ابريل بتهتف ضد الجيش
و الاخوان عملوا ثورة
و الفلول عملوا ثورة بعديها
و المشير رئيس مدنى
و الدستور بيعترف بثورة يناير
و اللى قالوا عليه نعم مش معترفين بيها
و الارهاب المحتمل بقى واقع
و قفلوا محطة مترو السادات
بس سينا تحت السيطرة
و الجنود بتموت
و قضينا ع الارهاب
بس عندنا ارهاب
و هاننشط السياحة
و تماسيح فى النيل
و خرفان كتير
و الوحش المصري بيطير
و برلمان طراطير
و كله بيتمرجح فى مولد سيدى المشير

المهم بقى
ناس بتقول اللى ما يتسمى راجع
و ناس بتقول فين ايامك يا فاسد
ناس بترقص و ناس بتموت م الجوع
و الدعم اتشال
و كله سعيد و مبسوط
من اسكندرية لأسيوط

و سمعنى سلام كبير اوى
و انا مش عارفنى ، انا تهت منى ، انا مش انا .

الاعلام السيساوى و اعداء مصر

طبعا لأن مصر تحظى بالأمن و الأمان ،
و حقوق الانسان و النبات و الحيوان ،
و العدل فى كل مكان ،
صحرا كان او بستان ،
و السيسى مدلع الشعب ،
و انقذه من الغلب ،
و مفيش حرامية ،
و لا فساد و لا بلطجية ،
و لا بطالة و لا ازمة سكن او تعليم ،
و الناس شبعانة و غرقانة فى النعيم ،
و طبعا علشان الشعب مبسوط ،
و بيغنى توت توت ،
لازم يبقى فيه مؤامرات خارجية ،
و تحالفات داخلية ،
ليحرموا الشعب من المهلبية ،
و يرجعوه للطعمية ،
اصله شعب محسود ،
من برة و جوة الحدود ،
و حسب الاعلام السيساوى ،
الموجه للحمير الحصاوى ،
اعداء مصر بالكوم ،
عايزين ثورة تقوم ،
حماس و تركيا و قطر ،
و امريكا عاملة مؤامرة تمنع المطر ،
و حروب جيل رابع تعمل زلازل و براكين ،
و سكان كوكب زحل و المريخيين ،
و اثيوبيا هاتقطع عنا المية ،
و الفراخ هاتختفى م الجمعية ،
الاشتراكيين و الالتراس و الاخوان ،
و سكان كوكب عطارد و الشيعة فى لبنان ،
و البرادعى الخاين العميل ،
و ضيف عليهم ٦ ابريل ،
و داعش و انصار بيت المقدس و تايوان ،
و ضيف عليهم كوريا و اليابان ،
و تنزانيا و كينيا و اليونان ،
و لازم نحارب فى كل الجبهات ،
و ترقص عند اللجان الستات ،
ان الشعب برئيسه فرحان ،
و انه من مكرونة الجيش شبعان ،
و يحيا الجيش و الداخلية ،
و شيوخ المنصر و الحرامية ،
و قضاء السلطة السياسية ،
و البالوظة و المهلبية ،
و طراطير برلمانية ،
و التيتى ابن الجنية .

و سمعنى احلى سلام ،
لاعلام الكدب و الاوهام .

الاعلام و ازاى الناس تنام

مصر تنافس ..
تكتشف ..
تبهر ..
تذهل ..
تستحوذ على الإهتمام ..
تلفت أنظار ..
تجذب انتباه ..
جاذبة للاستثمارات ..

و كل فنكوش جديد من الفناكيش
أكبر ..
أضخم ..
أوسع ..
الوحيد ..
النادر ..
لأول مرة ..
هاتبقى أد الدنيا ..

و وسعوا من وش العقلاء
لااااااااء
لاااااااااااء

برلمان ساكسونيا

الناس المتضايقة من البرلمان ، دة برلمان لقطة ،

برلمان بكرى و العكش برئاسة الدكش ،
برلمان الموافقات و اللى جاى انيل م اللى فات ، النصاب حساسين بيوافق على كل القوانين ، برلمان الراندفوهات و المعاكسات ، برلمان السيلفى و اضحك الصورة تطلع حلوة ، برلمان الطراطير على حساب الفقير ، برلمان هايدخلنا التاريخ ، من باب النواح و الصريخ ، برلمان ضرب كل العصافير ، بخازوق واحد كبير ، برلمان ساكسونيا ، المونيا و اى حاجة قديمة للبيع ، البلد بتضيع ، بيع بيع ، برلمان القندلة و البهدلة ، رايحين فى داهية يا ولا ، سايبين مشكلة المية و عايزين يحبسوا الطلاب ، يادى الايام الهباب ، برلمان العكس عكاس ، كله سلطة على قلقاس ، برلمان الهباب ، بياكلوا كباب علشان بيحموا البلد م الارهاب ، برلمان الكفتة و الطرب و الكباب ، برلمان هايقضيها ، و كل الناس لبعضيها ، و ان كنت مورتا سيديهات ، انا الصندوق الاسود اللى بيسجل مكالمات .

أوجه الشبه بين ٢٥ يناير و ٣٠ يونيو

عارفين ايه أوجه الشبه بين ٢٥ يناير و ٣٠ يونيو

الاتنين الاخوان ما اشتركوش فيهم
الاتنين الجيش هو اللى شال الرئيس
الاتنين حكم بعدهم واحد من مجلس عسكرى مبارك ، طنطاوى و السيسى
الاتنين اتضحك على الثوار اللى قاموا بالثورة و اتركبت ثورتهم بناس ما قامتش بيها
الاتنين اللى استفاد منهم ناس ما نزلتش فيهم .

منافسة شريفة

اشتدت حدة المنافسة بين الجيش و الداخلية فى جميع المجالات ، ماعدا حفظ الأمن و حماية الحدود ،

نبدأ بكرة القدم عندنا فريق طلائع الجيش
و حرس الحدود دة مش ع الحدود ، دة بيبلعب فى استاد برج العرب ،
و منافسهم فرق اتحاد الشرطة و الداخلية ، مش بيحفظوا الأمن ، دول بيحتفظوا بالكورة.

طبعا الداخلية شافت الجيش بيبيع فراخ و لحمة و زيت و سكر و بيكسب ، قالت اشمعنى و قامت فاتحة اكشاك أمان قدام الاقسام تبيع فيها بقالة .

و طبعا بالنسبة للمصانع ، مش السلاح طبعا ،
احلى حلاوة طحينية تلاقيها مصانع الداخلية ،
و تشترى كحك العيد بالملبن من دار المدفعية ،
و تروح تشترى مكرونة من بقالة القوات الجوية ،
اما بقى زيت الطعام دة تخصص امن مركزى يا عنيا ،
عايز لحمة ، عايز فراخ تروح على دار القوات البحرية ،
و لو عايز رز و و شعرية تروح على كشك أمان اللى قدام قسم السبتية.

و سمعنى سلام كبير اوى
و خلى السلاح صاحى

ليه النظام خايف من ٢٥ يناير

النظام طبعا لازم يخاف علشان الي قامت ضدهم الثورة رجعوا تاني اوسخ من الاول و هما مش ناسيين اللى حصل ،
علشان مجلس طنطاوي اللى كان فيه السيسي ساب علينا الاخوان وخرجهم من السجون علشان يركبوا على ثورة ماقاموش بيها و الناس تقول حقي برقبتي و رجع نظام مبارك تاني و برضه الاخوان هايخرجوا من السجون تاني و الايام بيننا ،
من الآخر اصل ماينفعش البلطجي يعيش من غير كلابه الي بيسيبهم على الشعب وقت اللزوم.
حلو الكلام ؟

الطالع

طلبت من الريس شمهورش يقرالى الطالع ، بص فى السما و قاللى
الشعب دة مش نافع
شوية عايزين البعيد يرجع
و هو مش راجع
و شوية عايزين اللى ركب يدفع
و هو مش دافع
و شوية تايهين مابين الاتنين
و حقهم واقع
و شوية مساطيل
لا ليهم فى الطور و لا فى الطحين
يريحنا منهم و ياخدهم الرافع

دراسة حالة

فى ٢٠١١ نزلنا و قولنا يسقط يسقط حسنى مبارك ،
بعدها قولنا الجيش و الشعب ايد واحدة ، و سلمنا البلد و الثورة للعسكر ،

فى ٢٠١٢ نزلنا و قولنا يسقط يسقط حكم العسكر ، و عصرنا على نفسنا لمون و سلمنا الثورة للمرشد ،

فى ٢٠١٣ بقى نزلنا و قولنا يسقط يسقط حكم المرشد ، و مضينا تمرد و سلمنا البلد و الثورة تانى للعسكر ،

و العسكر اتعلم و فهم و بقى واعى ، و احنا دلوقتى تانى بنقول يسقط يسقط حكم العسكر ، فيه ناس مقتنعة ان البلد دى عايزة ثورة ، البلد دى مش عايزة ثورة ، دى عايزة دراسة حالة و الكشف عن قواها العقلية.

خلاصة الكلام فى سد النهضة

فيه فرق بين دولى و عابر للحدود ، دولى يعنى ملك الدول اللى بيمر فيها ، انما عابر للحدود يبقى ملك دولة المنبع و دول المصب مالهاش فيه ، التيتى علشان يشترى شرعية مضى على اتفاقيه ان نهر النيل عابر للحدود و دة وقوف السودان قدامه انه مع اثيوبيا بنسبة 2:1 اعترف ان النهر ملك دولة المنبع ، و دة كان اول سطر فى الاتفاقية ، يبقى دلوقتى الكلام على ايه ، دولة المنبع ليها الحق فى النهر و الباقى دوليا مالوش فيه ، بس وزير الخارجية رمى ميكروفون الجزيرة ، يا راجل كبر مخك .

سد النهضة

تصريحات الحكومة المصرية و التيتى عن الحلول لكارثة سد النهضة
و اضاف
و تبين
و جاري
و يري من جانبه
و تمهيدا
وعلي ذلك
و اضاف
و سوف
ولا يوجد
و جارى
و لن
و قريبا
و لكن
و تبين
و حينها
و بناء عليه
و تأجل
و تم الاتفاق

و هكذا اكتشفنا الحلول الحلزونية ضد اثيوبيا المفترية.

بقت ملطشة

احلى حاجة ان العرب بقو ملطشة و المنطقة بقت تورتة كل القوى بتتخانق عليها ، سواء بترول العراق او سوريا او فلوس الخليج ، بدأت بأمريكا و بريطانيا و بعدها روسيا و فرنسا و ايران و الصين و اتخاد اوروبى و اسرائيل ، و الاحلى ان كله بيضرب فى سوريا و العراق ، طيارة روسية تقع فى سيناء ، روسيا تضرب فى سوريا ، تفجير فى فرنسا ، فرنسا تضرب سوريا ، الاحلى بقى من كل دة ان العرب بيتفرجوا عليهم و هما بيقسموا التورتة ، و الاحلى و الاحلى ان العرب بيشجعوا طرف على حساب طرف ، يعنى مصر بتشجع روسيا ، السعودية بتشجع امريكا ، بشار بيشجع روسيا ، الامارات بتشجع امريكا ، و اللى بتقتلهم روسيا و امريكا عرب ، و اللى بتضربهم روسيا و امريكا عرب ، و اللى بيتشردوا برضه عرب ، و العرب بيشجعوا و يسقفوا و هييييييييه هايجيب جون.

دايرة مقفولة

عارف الراجل اللي قدام المستشفى بيسب و يلعن في المستشفيات و الدكاتره و وزارة الصحة علشان مارضيوش يعملوا العملية لابنه و ينقذوا حياته غير لما يدفع مبلغ و قدره،
دة الموظف اللي كل يوم ييجى شغله متأخر و يطلع عين امك علشان يخلص مصلحتك و يفتحلك درج مكتبه علشان الشاى ،
عارف بقى الراجل اللي خارج من عند الموظف دا وهو بيضرب كف بكف على البلد اللي مابتمشيش غير بالرشاوي والفساد، هو نفسه المدرس اللي دخل الفصل النهاردة و هدد الولاد ان اللى مش هاياخد عنده درس خصوصى هايسقطه ،
عارف بقى أبو الولد اللى ابنه سقط السنة اللى فاتت علشان مش بياخد درس و قاعد يشتم كل المدرسيين و يحسبن على التعليم في البلد، هو دة أمين الشرطة اللي عدى عربية هامر من غير تفتيش علشان صاحبها مستعجل ، بس ما عدهاش ببلاش ، عداها لما صاحبها كرمشله ٥٠ جنيه في جيبه.
عارف بقى مين صاحب العربية الهامر اللي بيشتكي من فساد الشرطة و الرشوة و بيشتم فيهم ، طلع هو يا معلم الدكتور صاحب المستشفى اللي مرضيتش تستقبل إبن الموظف الأولاني اللي مات علشان ما عملش العملية ، شفت بقى .

احسن بلد

احلى حاجة اننا بلد منتجة زراعيا و صناعيا زى الفل

بنستورد ابرة الخياطة و سجادة الصلاة من الصين
بنستورد الطيارات من فرنسا وامريكا و روسيا
بنستورد القمح من روسيا و امريكا
بنستورد اللحمة من السودان و الهند و استراليا
بنستورد الأثاث من تركيا
بنستورد الملابس من تركيا و الصين و تايلند
بنستورد التقاوى الزراعية من اسرائيل
بنستورد أغلى عربيات من المانيا و ايطاليا
بنستورد التليفونات و الاجهزة الكهربائية من كوريا الجنوبية 
بنستورد الاقلام الرصاص من الهند
بنستورد الكبريت من باكستان
بنستورد الادوية من امريكا و السويد و الدنمارك و الهند

الاحلى من كل دة
احسن بلد الكهربا بتاعتها بتقطع
احسن بلد المية فيها مابتجيش رغم ان فيها النيل
احسن بلد المجارى طافحة فى شوارعها
احسن بلد النت بطيء فيها وشبكة المحمول مابتجمعش اصلا
احسن بلد المطر يغرقها فى ساعة
احسن بلد الزبالة مالية شوارعها
احسن بلد مستشفياتها مافيهاش سراير
احسن بلد مدارسها مافيهاش دكك
احسن بلد الكباري بتقع فيها
احسن بلد الطرق فيها متكسرة
احسن بلد فيها ٢ مليون طفل شوارع
احسن بلد فيها ٨ مليون عايشين فى المقابر والعشوائيات
احسن بلد فيها اعلى نسبة أمية

الأهم من دة كله اننا اجدع بلد العالم كله بلا استثناء ، و فاضيلها و بيعمل مؤامرات عليها علشان يحرموا شعبها من العز اللى هو فيه .

مؤامرة

يلا قولوا ورايا
البرادعى خاين وعميل ، ٦ ابريل كخة
السيسى حلو و جميل و انقذ مصر 
و احنا بتتآمر ضدنا الكرة الأرضية كلها ، مصر بيحصل ضدها مؤامرات من امريكا و اسرائيل و قطر و تركيا و المانيا و فرنسا و المكسيك وغزة ، استنى ما تقفلش القوس حط بريطانيا ، استنى لسه ما تقفلوش ، حط روسيا
قول بقى مصر لن تسقط
قول كمان مرة مصر لن تسقط
و اوعى تنسى مصر بيحصل ضدها مؤامرة ،
قول تانى مؤامرة
قولها كتير بقى مؤامرة مؤامرة مؤامرة مؤامرة مؤامرة مؤامرة
اوعوا تقولوا اسكندرية غرقت
اوعوا تقولوا ناس فى البحيرة ماتت
اوعوا تقولوا الشعب هايموت م الجوع 
يالا تانى و تالت و عاشر قولوا ورايا ، مؤامرة مؤامرة ، مؤامرة ، مؤامرة ، مؤامرة ، مؤامرة ،مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ،مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ،مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ،مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ، مؤامرة ،مؤامرة ، مؤامرة ، مؤامرة .

يا تيتى أمرك

يا تيتى أمرك
امرك يا تيتى
و لاجل خاطرك
خاطرك يا تيتى
تخرب و اطبل
ارقص و اهبل
لاحسن تحط الحديد
فى ايدى
اسمع
اسمع يا تيتى
كان فيه شعب
قام بثورة عندما
ختمت معاه
بيك يا بلوة
من السما
نصه مات و نصه ضايع
بينما
انت مقضيها
اعدامات فى المحكمة
مبسوط يا تيتى
يا تيتى
مبسوط يا تيتى
يا تيتى امرك
امرك يا تيتى
و لاجل خاطرك
خاطرك يا تيتى
تخرب و اطبل
ارقص و اهبل
لاحسن تحط الحديد
فى ايدى
اسمع
اسمع يا تيتى
و حقك انت الهبل و العبط
و الشعب دة شعب لبط
و انت عيل
فى الكرسي شبط
مسهوك جبلة
و جاى بالغلط
مبسوط يا تيتى
يا تيتى
مبسوووووووووط يا تيتى
يا تيتى امرك
امرك يا تيتى
و لاجل خاطرك
خاطرك يا تيتى
تخرب و اطبل
ارقص و اهبل
لاحسن تحط الحديد
فى ايدى
اسمع
اسمع يا تيتى
انا قلبى عليك
عليك قلبى
روحنا فى داهية
و انا ايه ذنبى
انا قلبى عليك
عليك قلبى
هاشحت يا حمار
يانا يا غلبى
مبسوط يا تيتى
يا تيتى
مبسووووط يا تيتى
يا تيتى امرك
امرك يا تيتى
و لاجل خاطرك
خاطرك يا تيتى
تخرب و اطبل
ارقص و اهبل
لاحسن تحط الحديد
فى ايدى
اسمع
اسمع يا تيتى

دة انا غلبان

سرحان عبد البصير ،
تعرف إيه عن السيسى ؟

و الله يا بيه إللي أعرفه إنه م البيت للإتحادية و من الإتحادية للبيت ، و من المانيا للسعودية و من بريطانيا لفرنسا

طب يا سرحان تعرف الرئيس بيشتغل ايه ؟

بتشتغل رعاشة ، خباصة ، رقاصة ، ايوة أيوة نحنوح يا بيه ، بيشتغل نحنوح .

إهدي يا سرحان ، عايز تضيف حاجة تانية ؟

أيوة عايز أضيف ،

قول يا سرحان

هو بيشتغل نحنوح و بيطلع يتنحنح يا بيه .

و نعم الاضافة يا سرحان ،
طب يا سرحان سؤال تاني ، هو الرئيس اسمه سيصي و لا بيصي ؟ يعني بالسين و لا بالباء ؟

بالبيص ، بالبيص يا بيه ، اللى تشوفه يا بيه , انا هاعرف اكتر م الحكومة , دة انتوا الحكومة , فلتحيا الحكومة , فليحيا عبغفار, و أبو محلب و ابن اسماعيل و شعبولا القلة يا بيه
دة أنا غلباااااااااااااااااااااااااااااااااااان

ما تخافش يا سرحان يا ابني ، يا ابنى انت مجرد شاهد هاتقول اقوالك و تروح

انا سمعت انهم بيعدموا الشهود و يعلقوهم في الأقسام يا بيه , يا نهار اسود , شاهد يعنى اعدام اعدام , هاخد إعدام ؟
دة انا غلبااااااااااااااان

ما تخافش يا ابنى لا اعدام و لا حاجة , جاوب انت بس و هاتروح على طول , عايزين نعرف آخر مرة شفت السيسي إمتي ؟

أنا كنت راجع إمبارح من الشغل بالليل و عديت من عند الإتحادية ، لقيت السيسي و ابن اسماعيل و الزند و عبغفار  و معاهم كام رقاصة على كام ممثلة ، مولعين نار في الشارع و عمالين يلفوا حواليها و يغنوا بصوت عالي ، قال إيه مش حكم عسكر ،  ههههههههههههههههههههههه مش حكم عسكر قال ، دة إحنا هانشوف أيام سودة .

طب يا سرحان خدت بالك السيسي كان لابس إيه؟

كان لابس شراب يا بيه .

شراب إيه يا سرحان ؟

كان لابس شراب بس يا بيه .

و مفيش أي حاجة تانية لابسها خالص ؟

ماااااااااالص يا بيه ، بس الجو برد برضه ، الراجل معذور .

طب ما فكرتش تسيب البلد يا سرحان ؟

ماهو لو كل واحد ساب البلد علشان السيسى , السيسي هايفضل فيها لوحده يا بيه مع المقاطيع بتوعه .

و أخبار الكهربا عندك إيه يا سرحان ؟

و الله يا بيه الكهربا قاطعة علي طول بس جبت لمبة موفرة يا بيه و الحمد لله الكهربا لسه قاطعة برضه .

و حطيت اللمبة فين يا سرحان ؟

ههههههههه أنا لو أعرف أقول علي طول يا بيه

الرئاسة يا سرحان كانت متعودة !

متعودة ... دايما

يا ابني افهم رئاسة الجمهورية كانت متعودة تستقبل ناس في الإتحادية ؟

و الله يا بيه أنا هاقول إللي شفته , هاقول كل حاجة يا بيه

ما هوا دة اللى احنا عايزينه , قول يا سرحان

أنا في يوم كنت معدي من هناك ، سمعت شخير عالي أوي ، بصراحة انا قلقت عليهم , دة شخير ابو بقرى , فدخلت القصر أسأل ، قالولي دة نايم هنا من امبارح مستنى كحك العيد بتاع المدرعات ، انا احب كحك العيد اوى يا بيه ، مشيت على طول ، دة بقرى يا بيه كبير معرضى شمال افريقيا .

طيب يا سرحان تفتكر ايه سبب الديون اللى على مصر دلوقتى ؟

احمد دومة يا بيه كان بيستلف من ام احمد الدلالة قال ايه عايز يجيب رافال للعيال و العيال بتوع ٦ ابريل يا بيه سالفين من طوب الارض علشان يحفروا ترعة فى ٦ اكتوبر يا بيه ، و العيال بتوع الثورة يا بيه مستلفين من ابو احمد ملك الطرشى يا بيه علشان يبنوا عاصمة جديدة يا بيه ، احنا ولاد كلب يا بيه غرقنا البلد و غرقنا اسكندرية و البحيرة و الغربية ، احنا ، احنا ولاد كلب

بتكتب إيييييييييييييييييه ؟ بتكتب ايييييييييييييييييييييييه
انا اسمي مكتوب ؟
لأ
طيب

دة أنا غلباااااان .