التيتى بالوظة

التيتى بالوظة
التيتى
إدانا كازوزة
التيتى
بحكومة عصابة
التيتى
مع حاشية ديابة
التيتى
شلة هليبة
التيتى
فاكرينها نهيبة
التيتى
العكش و موسي
التيتى
و لميس بالكوسة
التيتى
جه من المانيا
التيتى
رايح بريطانيا
التيتى
و اهى بتأيد
التيتى
قال ايه دة سى السيد
التيتى
شعب فى غيبوبة
التيتى
اعلام سبوبة
التيتى
ودانا فى داهية
التيتى
هايجيب الناهية
التيتى
و بلاد غرقانة
التيتى
و وشوش بهتانة
التيتى
دة و لا فى دماغه
التيتى
بكرة نجيب داغه
التيتى
التيتى بالوظة
التيتى
ادانا كازوزة
التيتى

أكلت يوم أكل الثور الأبيض

حلوة اوى حكاية أكلت يوم أكل الثور الأبيض ، بس ياترى مين الثور الابيض ؟
القوى الثورية اللى الاخوان ابتداء من اعلان دستورى ٩ مارس وقفوا مع العسكر ضدهم و برروا قتلهم ؟
و لا الاخوان اللى القوى الثورية اتخدعت بتمرد و وقفوا برضه مع العسكر ضدهم و منهم اللى برر قتلهم ؟
و لا السلفيين اللى شافوا تشويه و مرمطة و لعبوا على كل لون و دلوقتى بقوا ارهابيين زيهم زى الاخوان ؟
و لا الشعب اللى مش تبع حد و مش لاقى ياكل ؟
و لا الموظف اللى اتطبق عليه قانون الخدمة المدنية و مرتبه نزل ؟
مين باع مين ؟
و مين من حقه يقول أكلت يوم أكل الثور الأبيض ؟

يا ايها الاشرار

من شهبندر التجار لأهل مصر الأشرار
قررنا يا اشرار ، اننا نولع الاسعار ،
و اللى عاجبه عاجبه ، و اللى مش عاجبه هايدوق الحديد و النار
يا ايها الأشرار
انا مش عايز حد يفكر ، انا عايز شعب حمار
اولع الاسعار ما حدش ينطق و الا يبقى من الاشرار
خاين و مش وطنى و هابعت العسس ياخدوه من الدار للنار
دة انتم نور عينيا بس نسيت اقولكم ، ان عينى بتطق شرار
يا ايها الاشرار
هاتشربوها و لا عندى قضاء يدي اعدامات بالقنطار ؟

الحكاية سهلة

طبعا المعايير فى اختيار الحاشية الحاكمة بتختلف من واحد للتانى ، يعنى الفاسد بالنسبة للفاسد هو المواطن الشريف اللى لازم يكافئه و يديله صلاحيات ، و المواطن الشريف بالنسبة للفاسد هو الفاسد اللى لازم يقضى عليه و يحاكمه  ، علشان كدة كمثال دومة و ماهر فى السجن و جمال و علاء برة .

احنا زى الفل

احنا الجيش بتاعنا زى الفل جيش جبار ،

اينعم التيتى عملنا قانون الخدمة المدنية و المرتبات نزلت علشان البلد مافيهاش فلوس و لازم نستحمل ، انما اشترينا الرافال من فرنسا ب ٥.٤ مليار دولار ، اصل مفيش

اينعم الاسعار ولعت علشان الجمارك زادت و الضرايب على الاستيراد زادت ، بس اشترينا الميسترال من فرنسا ب ٨.٣ مليار دولار ، اصل ما عنديش .

اينعم الدولار وصل ٨ جنيه فى البنوك ، و وصل ٨.٥ فى السوق السودة ، و الاسعار هاتولع اكتر ، بس الحمد لله روحنا اشترينا ٤ غواصات من المانيا ب ٢.٦ مليار دولار ، هاتاكلوا مصر يعنى .

رسالة الشعب المصرى

من الشعب المصري العظيم الى الريس التيتى و شرطته و قضاءه و جيشه و حكومته بمناسبة الاقبال الفظيع على الانتخابات البرلمانية

يا حلو بانت لبتك
اول ما دابت قشرتك
تحرم عليا محبتك
و راح اتوب عن سكتك
القلب منك مليان جفا
و الصبر من قلبي اتنفي
و ضاع معاك كل الصفا
ضيعتوا بعندك يا قفاه ..
آه ياقفا
آه يا قفا

قالك ايه قالك آه

الاتنين وجهين لنفس العملة المصدية المتنيلة بنيلة
و قالك ايه قالك آه
قالك عسكر ضد الاخوان و اخوان ضد العسكر و الاتنين عايزين كرسى بيجروا وراه

قالك ايه قالك آه
قالك لو ما كانوش الاخوان حكموا ما كانش العسكر رجع تانى و لو اختفى الاخوانى من البلد العسكر هايستناه

قالك ايه قالك آه
قااك تجارة بالدين و تجارة بالوطنية ، و دة عايز ينقذ البلد من دة ، و كلهم فى بعضهم تجار حرامية و انتباه يا دانس ، يا آه يا آه

قالك ايه قالك آه
قالك دة بيكفر اللى يعارضه و دة بيخون اللى يعارضه ، و الاختيار بينهم تختار تبقى كافر و لا خاين و لا تمشى جنب الحيط انتباه

قالك ايه قالك آه
قالك فنكوش النهضة و ال ١٠٠ يوم ، على فنكوش عاصمة جديدة و مؤتمر اقتصادى و كفتة و ترعة بقدرة قادر بقت قناة

قالك ايه قالك آه
قالك الاتنين قطعان و الاتنين خرفان و الاتنين بيربطوا الحمار مطرح ما يعوز صاحبه و يبقى الحمار قدامه و يصدق انه وراه

قالك ايه قالك آه

تقسيمة حليمة اللئيمة

الثورة قامت فى ٢٥ يناير على مبارك و نجحت فى انها تخليه يتنحى ، و دة كان لأن كله فى الميدان كان مصرى بس ، كان شعب مصر اللى نزل ، مش هاتدخل فى تفاصيل مين اشترك فى الثورة و مين ركب عليها ، المهم ان بعد تنحى مبارك ، كانت اول تقسيمة بين معارضيه و مؤيديه ،

و اتقسم الشعب ما بين ثوار و فلول ،

و بعدها جه اعلان ١٩ مارس الدستورى و اتقسموا الثوار إلى إسلامي و غير إسلامي ،

بعدها جت انتخابات مجلس الشعب و الرئاسة و اتقسموا الاسلاميين إلى إخواني و سلفي وجماعة اسلامية و وسط و حازمون

باقى الثوار يسكتوا يعنى على التقسيمة دى ، لأ طبعا اتقسم باقى الثوار الى  بردعاوي و حمدينى و اشتراكى و ابريلى و ابو فتوحى و غيره من المجموعات ،

المهم فى دة كله ان اى واحد و كل واحد يعرف او ما يعرفش حاجة عن السياسة بقى اسمه ناشط سياسى ،
الثورة كانت فاشلة جدا سياسيا و الادلة كتير و اكبر دليل انها لم تحكم ، بس المهم ان الثورة كان فيها اكتر من مليون ناشط سياسى ، ما علينا ،
بقت سبوبة و كله ماشى .

المهم بقى ان اللى استفادوا من السبوبة دى غير اللى قاموا بيها خالص ،
اللى استفادوا من السبوبة دى

اللى قامت عليهم الثورة اللى هو نظام مبارك

فلول مبارك اللى رجعوا اقوى من الأول

العسكر اللى استغل كل حاجة و نط على كرسي الحكم

الصحفيين

مذيعى و مذيعات التوك شو

الأمنجية بختم تمرد

كل ثورة و انتم طيبين .

هاتدفع يعنى هاتدفع

فيه ناس مش مقتنعة ان البلد رايحة فى ٦٠ داهية ، اوعدكم ان البلد رايحة فى ٧٢١٦ داهية سودة مهببة و الاكطصاد  رايح فى ٤٣٢٧ مصيبة ، نشوف كدة تطور الاكطصاد فى عهد التيتى بعد مؤتمر اكطصادى و كناة سويس جديدة و محور و عاصمة و شوية كفتة

الدخل من التصدير كان ٢٨ مليار دولار أصبح فى آخر ٨ شهور ١٢ مليار دولار ، يعنى نزل ٤٥٪ .

دخل البلد من السياحة كان  ١٣ مليار دولار السنة اللى فاتت ، و السنة دى قفزت قفزة جهنمية لتحت و بقت ٧ مليار دولار ، دة طبعا بعد ما قتلنا المكسيكيين بالأباتشى .

التحويلات الخارجية انهارت من ٢٠ مليار دولار إلى ١٢ مليار  دولار

الحكومة الجديدة تبحث عن جلب ٤ مليار دولار قبل نهاية السنة من بيع أراضي للمغتربين واقتراض من البنك الدولي والأفريقي و الدول المانحة و النصب و الاحتيال لتغطية عجز الموازنة .

و طبعا مع تراجع الاحتياطي إلى ١٦ مليار دولار منهم ١٤ مليار ودائع مش بتاعتنا ، يادى المصيبة يبقى ليلة منيلة بنيلة .

نزود على كل دة ارتفاع دين مصر الخارجي لأعلى مستوى في ٢٤ عامًا بعد صعود قياسي في ٣ شهور ، فأصبح ٤٨.١ مليار دولار.

يبقى مفيش حل غير ضرايب جديدة و رفع الدعم عن الوقود ، مفيش اى حل تانى و دة طبعا هايخلى اسعار كل حاجة تتضاعف ،

هاتاكلوا مصر يعنى
هاتاكلوها
هاتدفع يعنى هاتدفع يا عجل .

طحيا ماسر

من الآخر كدة الموظفين خدوا اكبر خازوق مغرى شحط محط فى الدنيا

قانون الضريبة الجديد على الدخل الشهري للموظفين اللى اصدره التيتى نى التيتى نى

اللى مرتبه ٦٠٠ جنيه يدفع ضريبة ١٠٪ يعنى يكع ٦٠ جنيه ، مش عشانى دة علشان ماسر و الله

اللى مرتبه بقى ٣٠٠٠ جنيه يدفع ١٥٪ يعنى ٤٥٠ جنيه و تحيا ماسر

و اللى مرتبه ٤٠٠٠ جنيه يدفع ٢٠٪ يعنى ٨٠٠ جنيه ، انتو ناسيين انكو نور عنينا و لا ايه

اللى بقى مرتبه ١٠٠٠٠ جنيه فيما فوق يدفع ضريبة ٢٠٠٠ جنيه علشان ماسر

طبعا يستثنى ناس من الكلام دة اللى هما اسياد البلد ، جيش و داخلية و قضاء ، ما يدفعوش ضرايب مليم احمر ، دول الاسياد و هما اللى بيلموا الجزية برضه ، و هل يختلط الزيت بالماء ، لا يمكن ان يختلط الزيت بالماء

طحيا ماااسر

ملك الغابة

تصاريح الوزراء عندنا بخصوص الكهربا و المية و انهم بيدفعوا فواتير زى باقى الشعب ، بيفكرنى بقصة لذيذة كنت سمعتها
الاسد داخل الغابة و واقف القرد على البوابة ، القرد ضرب تعظيم سلام ، فالأسد بيقوله انت ازاى ما تسألنيش عن تصريح الدخول ؟
القرد رد و قال ازاى اسألك يا باشا ، دة انت ملك الغابة ، الأسد راح قايل كلنا زى بعض و انت واقف هنا علشان تسأل اى حد عن التصريح ، حتى انا .
الاسد خرج بعدها و رجع تانى ، فالقرد وقفله و قاله يا اسد فين تصريح الدخول ، الاسد رد عليه و قاله انت عبيط يا قرد ، اتهبلت ياض ، دة ملك الغابة ازاى تسألنى عن تصريح الدخول ، و رفد القرد و عين الفار مكانه .

احنا بلدنا

احنا بلدنا
بلد المزز
و الرقاصات و الطبالين
شبابها يتعلم
و يقعد فى الغرز
مبرشمين و محششين

احنا بلدنا بلد الكبير
بلد الوزير
بلد الغفير
احنا بلدنا فيها الفقير
مظلوم كتير
و مالوش مصير

احنا بلدنا
فيها الضعيف
بينام خفيف
و مش معاه
تمن الرغيف
احنا بلدنا
فيها عصابة
زى الديابة
تنهش ما تشبع
فى لحم الغلابة

احنا بلدنا
فيها و فيها
و فيها و فيها
و الخير ماليها
بس مش ليها
ناسها تجوع
اسيادها تشبع
ناس فى الدموع
و ناس عايشة
فى الشعب توجع

هو احنا مع مين

يعنى مصر مشتركة فى التحالف العربى فى اليمن لإعادة الشرعية ، و بتساعد السعودية فى محاربة الحوثيين الشيعة اللى بتدعمهم ايران و واقفة مع الاخوان السنة اللى بتقول عليهم ارهابيين ،
اما فى سوريا بالعكس ، مصر بتبعت سلاح لبشار و الشيعة فى سوريا اللى بتدعمهم ايران و روسيا ضد الجيش الحر اللى هو جبهة النصرة اللى بتدعمه السعودية ،
احنا بقى مع مين ؟
مع ايران و لا السعودية ؟
روسيا اللى بتحارب الجيش الحر و لا امريكا اللى بتدربه ؟
مع السنة و لا مع الشيعة ؟
مع الاخوان و لا الحوثيين ؟
احنا مع مين ؟

سايكس بيكو الجديدة

التحالفات الجديدة فى الشرق الاوسط بتقول اننا داخلين على سايكس بيكو جديدة ، الفرق ان بدل انجلترا و فرنسا بقت امريكا و روسيا ، بقت سيطرة دول على دول ،
امريكا لعبت بداعش علشان تحقق خريطة برنارد لويس و استغلت غباء العرب و ضعفهم و العداء بين السنة و الشيعة فى قيام حروب اهلية بطلها داعش ، و الهدف تقسيم الشرق الاوسط لدويلات سنية و دويلات شيعية يحاربوا بعض و يستهلكوا سلاح ،
بس دلوقتى الأمور اختلفت ان فيه اتحاد كونفدرالى بين روسيا و الصين مش هايسيب امريكا تاكل التورتة لوحدها ، خصوصا ان ايران ، اللى هى معقل الشيعة حليف اساسى و دائم لروسيا فى الشرق الاوسط ، و بقيام الحروب الاهلية بين السنة و الشيعة فى العراق و سوريا و اليمن و استهداف الشيعة من داعش ، روسيا و الصين طبعا هايساندوا الشيعة ،  يبقى حتة ليك و حتة ليا . و لا عزاء للعرب .
واحد بديل يقول طيب مصر مع مين ؟
مصر مع الرز يا معلم حتى لو م المريخ .

عاش الرئيس

احلى حاجة ان التيتى العيد اللى فات افرج عن بعض المعتقلين السياسيين اللى تم القبض عليهم بموجب قانون التظاهر ،علشان عملوا وقفة للمطالبة بالافراج عن زمايلهم اللى اتقبض عليهم فى وقفة برضه لرفض المحاكمات العسكرية  للمدنيين ، اللى كانوا نازلين علشان الناس زمايلهم اللى اتقبض عليهم و اتحولوا لمحاكمات عسكرية ، لأنهم كانوا نازلين يطالبوا بحق زمايلهم المعتقلين بدون وجه حق بعد ما نزلوا يطالبوا بحق اللى ماتوا ، و بكدة عاش الرئيس و نقضيها تهييس ، و اللى دخل دخل و اللى طلع طلع . يلا قضيها ، ايامك معدودة يا تيتى .

زعيم عصابة

السيسى مقتنع بضرورة إسقاط الدولة كلها علشان يحمى نفسه ،

السيسى نسي أن مفيش رئيس من غير دولة يحكمها ،

و مفيش دولة من غير شعب ، 

و مفيش شعب غبى حتى لو كان جاهل ،

النتيجة الطبيعية لحكم السيسى أن يثور الشعب ضد الدولة ورئيسها ، و دة جاى جاى

كان قدامه الفرصة بدل ما يبقى زعيم عصابة ، يبقى رئيس دولة .

و يقولك جيش

لماالجيش يبقى عنده مصانع مكرونة و كحك العيد و يفتح سوبر ماركت و بنزينة و يستورد جميع انواع اللحوم والدواجن ويفتح صالات افراح وملاهي فى النوادى بتاعته و مشاريع و بناء كباري و بالأمر المباشر داخل فى جميع الاستثمارات و الصناعات و الزراعات و يسيب الحدود للمهربين وبتوع السلاح و المخدرات ، و انصار بيت المقدس و داعش .

القصة كلها ايه

الجيش ما بيدفعش ضرايب ، 

الجيش ما بيدفعش اجور لأن اللى شغالين فى المشاريع بتاعته ضباط و عساكر بياخدوا مرتبات اصلا بصفتهم فى الجيش

الجيش ما بيدفعش كهربا ولا بيدفع مية 

الجيش ما بيدفعشجمارك وكل المعدات بتاعة المصانع بيستوردها علي حساب صاخب المخل 
الجيش بياخد كل الفلوس بتاعت المحاجر و الطرق و الثروة المعدنية المصرية كلها .

الجيش يأخذ المعادن و ينقلها و يصنعها و كل شئ علي حساب صاخب المخل اصل صاخب المخل اهبل معلش

يعني الجيش كل يوم علي الاقل ينهب من مصر كام  مليار من البيع و الرسوم حتي الرسوم علي الطرق السريعةيخدمها عساكر تأخذ مرتباتها من الدوله و مطبوع ع التذكرة وزارة الدفاع .

احنا فعلا عايشين فى جيش طالعله دمل اسمه شعب ، بس الجيش هايفقع الدمل و يقضى ع الشعب ، و بلاها شعب ، خليها جيش .

حرامية

نقلا عن الشروق
مجلس الوزراء يستثني 7 هيئات عسكرية وشرطية من الموازنة الجديدة

المشكلة ان جيش و داخلية و قضاء حرامية
و هما عارفين انهم حرامية
و الشعب متأكد انهم حرامية
و العالم كله عارف انهم حرامية
بس فعلا دة الطبيعى انهم يبقوا حرامية
ماهو ما ينفعش يبقوا حاجة تانى غير حرامية فى بلد بيحكمها شيخ منصر

زار

من الآخر كدة الشعب دة ﻣﻠﺒﻮﺱ ﻭ ﻣﺤﺘﺎﺝ ﻟﺰﺍﺭ ، و لازم نعمله زار
ﻳﻌﻨﻰ ﺷﻴﺦ ﻣﺤﻀﺮ ﻳﺎ ﺷﻴﺦ ﻣﺤﻀﺮ و يا عينى ع اللى هايحضر ، شعب ملبوس و اللى لابسه مش عفريت ، دة مارد ، و فى الزار ندق الدفوف بصوت عالى ،
و الدرابندوخ الدرابدوخ
قتلوا الشباب و سابولنا شيوخ
و اللى يقعوا من التعب ننزل ﻋﻠﻰ ﺩﻣﺎﻏﻬﻢ بالجزمة القديمة و يستحسن بالبيادة و هاتك يا رزع  لغاية ما يطفحوا الكفتة اللى كلوها و يخرجوا من بطنهم المية المالحة بتاعة القناة الجديدة ، و نخرج المارد اللى لابسهم من قفاهم .

برلمان صافيناز

اما صافيناز تطلع تصريح تقول فيه ان الجنسية منعتها من الترشح للبرلمان و ان هدفها كان الترشح علشان كل الشعب يرقص و يغنى ،
بغض النظر طبعا عن انه بيرقص لوحده و الحكومة و الرئيس بيغنوا عليه ،

تخيلوا كدة لو كانت اترشحت و بقت خيا و سما المصرى فى البرلمان ، كان هاقول بقلب جامد ان عندنا فى مصر اول برلمان كوميدى استعراضى راقص ، على مسرح مجلس الشعب ، بطولة صافيناز ، سما المصرى ، يشاركهم البطولة حمدى الوزير ، المسرحية من اخراج المخرج اللاوذعى خالد يوسف .
دة احنا داخلين على ايام سودة أجودعان .

انت مين فيهم

ايه يا عم التيتى تعبتنا معاك ، انت مين فيهم  ، مؤيدينك اتهبلوا مش عارفين يبرروا ازاى ،
بجد انت فشخت الواقع و المنطق يخرب بيتك  . ايه ياعم انت عندك شيزوفرانيا  ولا ايه ؟

قولتلنا انتم نور عينيا ، طلعت عين اللى جابونا و اللى خلفونا  ،

قولتنا امريكا بتساند الاخوان و عايزة ترجعهم الحكم و رايح فى امريكا تقول العلاقة بين مصر و امريكا اكبر من اى مساعدات و امريكا ساندت الجيش ب ٥٠ مريار زولار ،

تقولهم مسافة السكة و لا حد يشوف وشك هناك ،

تقولهم احنا اخوات و يسمعوك فى التسريبات  بتقول عندهم فلوس زي الرز

وتقولنا مش قادر اديك و رايح تعمل حملة ب ٣٠٠ مليون زولار في امريكا لتأييدك و الكدب عليهم ،

تقول مفيش و رايح ترمة مليارات فى البحر بتفريعة و لا ليها اى لازمة ،

تقولنا لازم نتحمل و رايح نرفع مرتبات و معاشات جيش و داخلية و قضاء ،

ايه ياعم التيتى انت مين يا عم بالظبط ، عقدتنا فى عيشيتنا. 

هندسة الاقتصاد

طبعا بعد حديث التيتى لصحيفة وول ستريت ، فنعم نحن نؤيد هندسة الاقتصاد كما قال التيتى ، و لو فيه اقتصاد الهندسة ما يضرش ، احنا معاك يا تيتى فنحن نؤيد هندسة الاقتصاد و التي معتمدة على الاساس والمنطق المتضخم علي طاولة البحث ، و الانتقال من الوضع طويل القمة من وعي الواقع المتغلغل في فى الانحدار قصير التيلة ، و تحقيق اقصي تقدير متوقع فى التخريب و التزنيق بحيث لا يتبدد مع صلاحية التجارة فى التفريعة لمواصلة الحصول على الايزو ٦٠٠٩٠٠٠ و الايزو ٢٠٠ ، فى تأهيل عمال  يستقون المدي الطويل من الاحساس المتوسط و القصير الأمد فى رفع مستوى دخل الفرد و تحقيق التقدم بتطوير العشوائيات فى جزيرة البط .

رئيس فاشل

يعنى ٥.٤ مليار دولار تمن الطيارات الرافال ، يعنى ٤٣.٢ مليار جنيه مصرى ،
٨.٣ مليار دولار تمن سفينتين ميسترال ، يعنى ٦٦.٤ مليار جنيه مصرى ،
نضيف عليهم تكلفة حفر القناة الجديدة ٣.٢ مليار دولار يعنى ٢٥.٦ مليار جنيه ،
و تكلفة الانفاق تحت القناة ٤ مليار دولار ، يعنى ٣٢ مليار جنيه ،
حفل الافتتاح للقناة ٣٠ مليون دولار ، يعنى ٢.٤ مليار جنيه
المؤتمر الاقتصادى ٤٠ مليون دولار على الاقل ، يعنى ٣.٢ مليار جنيه .

يبقى كدة المجموع ١٧٢.٨ مليار جنيه مصرى .

و الباشا فى نيويورك علشان يقابل مندوبى البنك الدولى و صندوق النقد الدولى علشان القروض ، ادينى عقلك و فهمنى لو الفلوس دى تم توجيهها لاصلاح البنية التحتية و انشاء مصانع و استصلاح اراضى و بناء وحدات سكنية ، كنا هانحتاج قروض فى ايه و كان حال البلد بقى ازاى دلوقتى .

رئيس فاشل ، حكومة فاشلة
بس البرادعى خاين و عميل
و ٦ ابريل ممولة من امريكا

التيتى بيحكم

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

ماما قالتلى
سيبك م التيتى
دة بيخطف على طول
لبس نص الشعب قضايا
و الباقى مقتول
راح التيتى قايل لأ
حتى لو جنب الحيط
هاجيبك برضه و اقول ارهابى
و انك من دول او دول

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

ناس بتطنش
و ناس بتهبش
لا شايفة و لا سامعة
و لا سامعة
و مسلمة ودانها بس
لإعلام ابو لمعة
ابو لمعة

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

حكومة فلة

حكومة حفرت قناة سويس جديدة ،
و اتفقت على عاصمة ادارية جديدة ،
و عملت مليون وحدة سكنية ،
استصلحت مليون فدان ،
و حلت مشكلة الكهربا ،
و حلت مشكلة سد النهضة و قالت انه زى الفل ، و حلت مشكلة البطالة بعربيات الخضار و التوك توك ،
و رفعت الدعم من اجل مصلحة محدودى
الدخل ،
و فكرت تقتحم الفضاء ، و حلت مشاكل التعليم ان ولاد الاسياد يحولوا براحتهم و يدخلوا اى كلية فى اى محافظة ،

حكومة عملت بلاوى

و رغم كل دة أقالوها ، يا نهار اغبر ، كل الانجازات دى و يقيلوها ، امال الحكومة الجديدة هاتعمل ايه ؟

حلول حلزونية

احلى حاجة ان الحكومة الانتيكة بتاعتنا عندها حلول حلزونية لكل المشاكل ، طبعا فى الفترة اللى فاتت الشعب المصرى مر بمشكلة كبيرة مع غلاء الاسعار ، و كيلو اللحمة وصل ل ١٠٠ جنيه ، و حكومتنا الرشيدة باعلامها المتميز حلت المشكلة على ٣ خطوات ، و كانت حلول رائعة ، طبعا الحكومة مش هاترخص الاسعار دة مستحيل للحد من انحراف الفقراء من الشعب لو اتوفرت الفلوس فى ايديهم ،

اول خطوة بدأت بيها الحكومة لحل مشكلة ارتفاع اسعار اللحمة ، حملة بلاها لحمة ، يا عالم غالية ما تاكلوهاش ، و احنا بكدة بنحارب الغلاء بالاستغناء ، و بدأ الاعلام بتاعنا يركز على الحملة و يقول للناس ما تاكلوش لحمة علشان الاسياد ياكلوا لوحدهم .

طبعا بعد فشل اول خطوة بدأت تانى خطوة للقضاء على المشكلة ، انتشار لحوم الحمير فى كل مكان  ، مسكوا حمارين هنا ، و ١٥ حمار هناك ، و جحش مدبوح ، بناقص اللحمة يا شعب دى لحمة حمير   ، بطلوا اللحمة .

اكيد بما اننا داخلين على عيد الاضحى و كله عايز لحمة فى عز الأزمة ، لازم الحكومة تاخد الخطوة التالتة ، و طلع شيوخ السلطان و يقولوا تضحى بخروف ليه اما ينفع تضحى بفرخة ، تضحى بعجل ليه و ممكن تضحى بدكر بط ، دة لو غنى يعنى و تقدر تشترى دكر البط .

و بكدة حكومتنا اللولبية ،
أوجدت حلول حلزونية ،
لمشكلة اللحمة المستعصية ،
علشان الشعب يموت م الجوع ،
و ينهبوا براحتهم التكية ،
ماهى اسياد و عبيد ،
الاسياد فى قصورهم  ،
و العبيد تحت بير السلم مستخبية ،
بلاها لحمة يا بهية ،
بلاها تحلمى بعيشة هنية ،
حد قالك فى يوم انك هاترتاحى ،
و انتى بتحلمى براحة ،
خليكى مستنية .

آخر لعب

التيتى يقوم
فرحان من النوم
فى البانيو يعوم
و هات يا لعب

و مجدى يهب
ع الشعب يشب
يقتل و يدب
آخر لعب

و الزند حديد
اسياد و عبيد
بقضاءه يشيد
و هات يا لعب

و قدرى ضريبة
شلة هليبة
ودانا فى مصيبة
و آخر لعب

و شكرى توهان
مقضيها جنان
مكسيك لبنان
و هات يا لعب

و اهو عنده هلالى
يغلط ما يبالى
فى الإملا ضلالى
و آخر لعب

و شريف اسماعيل
فى وزارة عناتيل
و فسادها طويل
و هات يا لعب

التيتى يقوم
فرحان من النوم
فى البانيو يعوم
و هات يا لعب