سايكس بيكو الجديدة

التحالفات الجديدة فى الشرق الاوسط بتقول اننا داخلين على سايكس بيكو جديدة ، الفرق ان بدل انجلترا و فرنسا بقت امريكا و روسيا ، بقت سيطرة دول على دول ،
امريكا لعبت بداعش علشان تحقق خريطة برنارد لويس و استغلت غباء العرب و ضعفهم و العداء بين السنة و الشيعة فى قيام حروب اهلية بطلها داعش ، و الهدف تقسيم الشرق الاوسط لدويلات سنية و دويلات شيعية يحاربوا بعض و يستهلكوا سلاح ،
بس دلوقتى الأمور اختلفت ان فيه اتحاد كونفدرالى بين روسيا و الصين مش هايسيب امريكا تاكل التورتة لوحدها ، خصوصا ان ايران ، اللى هى معقل الشيعة حليف اساسى و دائم لروسيا فى الشرق الاوسط ، و بقيام الحروب الاهلية بين السنة و الشيعة فى العراق و سوريا و اليمن و استهداف الشيعة من داعش ، روسيا و الصين طبعا هايساندوا الشيعة ،  يبقى حتة ليك و حتة ليا . و لا عزاء للعرب .
واحد بديل يقول طيب مصر مع مين ؟
مصر مع الرز يا معلم حتى لو م المريخ .

عاش الرئيس

احلى حاجة ان التيتى العيد اللى فات افرج عن بعض المعتقلين السياسيين اللى تم القبض عليهم بموجب قانون التظاهر ،علشان عملوا وقفة للمطالبة بالافراج عن زمايلهم اللى اتقبض عليهم فى وقفة برضه لرفض المحاكمات العسكرية  للمدنيين ، اللى كانوا نازلين علشان الناس زمايلهم اللى اتقبض عليهم و اتحولوا لمحاكمات عسكرية ، لأنهم كانوا نازلين يطالبوا بحق زمايلهم المعتقلين بدون وجه حق بعد ما نزلوا يطالبوا بحق اللى ماتوا ، و بكدة عاش الرئيس و نقضيها تهييس ، و اللى دخل دخل و اللى طلع طلع . يلا قضيها ، ايامك معدودة يا تيتى .

زعيم عصابة

السيسى مقتنع بضرورة إسقاط الدولة كلها علشان يحمى نفسه ،

السيسى نسي أن مفيش رئيس من غير دولة يحكمها ،

و مفيش دولة من غير شعب ، 

و مفيش شعب غبى حتى لو كان جاهل ،

النتيجة الطبيعية لحكم السيسى أن يثور الشعب ضد الدولة ورئيسها ، و دة جاى جاى

كان قدامه الفرصة بدل ما يبقى زعيم عصابة ، يبقى رئيس دولة .

و يقولك جيش

لماالجيش يبقى عنده مصانع مكرونة و كحك العيد و يفتح سوبر ماركت و بنزينة و يستورد جميع انواع اللحوم والدواجن ويفتح صالات افراح وملاهي فى النوادى بتاعته و مشاريع و بناء كباري و بالأمر المباشر داخل فى جميع الاستثمارات و الصناعات و الزراعات و يسيب الحدود للمهربين وبتوع السلاح و المخدرات ، و انصار بيت المقدس و داعش .

القصة كلها ايه

الجيش ما بيدفعش ضرايب ، 

الجيش ما بيدفعش اجور لأن اللى شغالين فى المشاريع بتاعته ضباط و عساكر بياخدوا مرتبات اصلا بصفتهم فى الجيش

الجيش ما بيدفعش كهربا ولا بيدفع مية 

الجيش ما بيدفعشجمارك وكل المعدات بتاعة المصانع بيستوردها علي حساب صاخب المخل 
الجيش بياخد كل الفلوس بتاعت المحاجر و الطرق و الثروة المعدنية المصرية كلها .

الجيش يأخذ المعادن و ينقلها و يصنعها و كل شئ علي حساب صاخب المخل اصل صاخب المخل اهبل معلش

يعني الجيش كل يوم علي الاقل ينهب من مصر كام  مليار من البيع و الرسوم حتي الرسوم علي الطرق السريعةيخدمها عساكر تأخذ مرتباتها من الدوله و مطبوع ع التذكرة وزارة الدفاع .

احنا فعلا عايشين فى جيش طالعله دمل اسمه شعب ، بس الجيش هايفقع الدمل و يقضى ع الشعب ، و بلاها شعب ، خليها جيش .

حرامية

نقلا عن الشروق
مجلس الوزراء يستثني 7 هيئات عسكرية وشرطية من الموازنة الجديدة

المشكلة ان جيش و داخلية و قضاء حرامية
و هما عارفين انهم حرامية
و الشعب متأكد انهم حرامية
و العالم كله عارف انهم حرامية
بس فعلا دة الطبيعى انهم يبقوا حرامية
ماهو ما ينفعش يبقوا حاجة تانى غير حرامية فى بلد بيحكمها شيخ منصر

زار

من الآخر كدة الشعب دة ﻣﻠﺒﻮﺱ ﻭ ﻣﺤﺘﺎﺝ ﻟﺰﺍﺭ ، و لازم نعمله زار
ﻳﻌﻨﻰ ﺷﻴﺦ ﻣﺤﻀﺮ ﻳﺎ ﺷﻴﺦ ﻣﺤﻀﺮ و يا عينى ع اللى هايحضر ، شعب ملبوس و اللى لابسه مش عفريت ، دة مارد ، و فى الزار ندق الدفوف بصوت عالى ،
و الدرابندوخ الدرابدوخ
قتلوا الشباب و سابولنا شيوخ
و اللى يقعوا من التعب ننزل ﻋﻠﻰ ﺩﻣﺎﻏﻬﻢ بالجزمة القديمة و يستحسن بالبيادة و هاتك يا رزع  لغاية ما يطفحوا الكفتة اللى كلوها و يخرجوا من بطنهم المية المالحة بتاعة القناة الجديدة ، و نخرج المارد اللى لابسهم من قفاهم .

برلمان صافيناز

اما صافيناز تطلع تصريح تقول فيه ان الجنسية منعتها من الترشح للبرلمان و ان هدفها كان الترشح علشان كل الشعب يرقص و يغنى ،
بغض النظر طبعا عن انه بيرقص لوحده و الحكومة و الرئيس بيغنوا عليه ،

تخيلوا كدة لو كانت اترشحت و بقت خيا و سما المصرى فى البرلمان ، كان هاقول بقلب جامد ان عندنا فى مصر اول برلمان كوميدى استعراضى راقص ، على مسرح مجلس الشعب ، بطولة صافيناز ، سما المصرى ، يشاركهم البطولة حمدى الوزير ، المسرحية من اخراج المخرج اللاوذعى خالد يوسف .
دة احنا داخلين على ايام سودة أجودعان .

انت مين فيهم

ايه يا عم التيتى تعبتنا معاك ، انت مين فيهم  ، مؤيدينك اتهبلوا مش عارفين يبرروا ازاى ،
بجد انت فشخت الواقع و المنطق يخرب بيتك  . ايه ياعم انت عندك شيزوفرانيا  ولا ايه ؟

قولتلنا انتم نور عينيا ، طلعت عين اللى جابونا و اللى خلفونا  ،

قولتنا امريكا بتساند الاخوان و عايزة ترجعهم الحكم و رايح فى امريكا تقول العلاقة بين مصر و امريكا اكبر من اى مساعدات و امريكا ساندت الجيش ب ٥٠ مريار زولار ،

تقولهم مسافة السكة و لا حد يشوف وشك هناك ،

تقولهم احنا اخوات و يسمعوك فى التسريبات  بتقول عندهم فلوس زي الرز

وتقولنا مش قادر اديك و رايح تعمل حملة ب ٣٠٠ مليون زولار في امريكا لتأييدك و الكدب عليهم ،

تقول مفيش و رايح ترمة مليارات فى البحر بتفريعة و لا ليها اى لازمة ،

تقولنا لازم نتحمل و رايح نرفع مرتبات و معاشات جيش و داخلية و قضاء ،

ايه ياعم التيتى انت مين يا عم بالظبط ، عقدتنا فى عيشيتنا. 

هندسة الاقتصاد

طبعا بعد حديث التيتى لصحيفة وول ستريت ، فنعم نحن نؤيد هندسة الاقتصاد كما قال التيتى ، و لو فيه اقتصاد الهندسة ما يضرش ، احنا معاك يا تيتى فنحن نؤيد هندسة الاقتصاد و التي معتمدة على الاساس والمنطق المتضخم علي طاولة البحث ، و الانتقال من الوضع طويل القمة من وعي الواقع المتغلغل في فى الانحدار قصير التيلة ، و تحقيق اقصي تقدير متوقع فى التخريب و التزنيق بحيث لا يتبدد مع صلاحية التجارة فى التفريعة لمواصلة الحصول على الايزو ٦٠٠٩٠٠٠ و الايزو ٢٠٠ ، فى تأهيل عمال  يستقون المدي الطويل من الاحساس المتوسط و القصير الأمد فى رفع مستوى دخل الفرد و تحقيق التقدم بتطوير العشوائيات فى جزيرة البط .

رئيس فاشل

يعنى ٥.٤ مليار دولار تمن الطيارات الرافال ، يعنى ٤٣.٢ مليار جنيه مصرى ،
٨.٣ مليار دولار تمن سفينتين ميسترال ، يعنى ٦٦.٤ مليار جنيه مصرى ،
نضيف عليهم تكلفة حفر القناة الجديدة ٣.٢ مليار دولار يعنى ٢٥.٦ مليار جنيه ،
و تكلفة الانفاق تحت القناة ٤ مليار دولار ، يعنى ٣٢ مليار جنيه ،
حفل الافتتاح للقناة ٣٠ مليون دولار ، يعنى ٢.٤ مليار جنيه
المؤتمر الاقتصادى ٤٠ مليون دولار على الاقل ، يعنى ٣.٢ مليار جنيه .

يبقى كدة المجموع ١٧٢.٨ مليار جنيه مصرى .

و الباشا فى نيويورك علشان يقابل مندوبى البنك الدولى و صندوق النقد الدولى علشان القروض ، ادينى عقلك و فهمنى لو الفلوس دى تم توجيهها لاصلاح البنية التحتية و انشاء مصانع و استصلاح اراضى و بناء وحدات سكنية ، كنا هانحتاج قروض فى ايه و كان حال البلد بقى ازاى دلوقتى .

رئيس فاشل ، حكومة فاشلة
بس البرادعى خاين و عميل
و ٦ ابريل ممولة من امريكا

التيتى بيحكم

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

ماما قالتلى
سيبك م التيتى
دة بيخطف على طول
لبس نص الشعب قضايا
و الباقى مقتول
راح التيتى قايل لأ
حتى لو جنب الحيط
هاجيبك برضه و اقول ارهابى
و انك من دول او دول

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

ناس بتطنش
و ناس بتهبش
لا شايفة و لا سامعة
و لا سامعة
و مسلمة ودانها بس
لإعلام ابو لمعة
ابو لمعة

قمنا بثورة
و ركبوا عليها
و التيتى بيحكم
يحكم
قتل شوية
و حبس الباقى
و كلنا هانلطم
نلطم

حكومة فلة

حكومة حفرت قناة سويس جديدة ،
و اتفقت على عاصمة ادارية جديدة ،
و عملت مليون وحدة سكنية ،
استصلحت مليون فدان ،
و حلت مشكلة الكهربا ،
و حلت مشكلة سد النهضة و قالت انه زى الفل ، و حلت مشكلة البطالة بعربيات الخضار و التوك توك ،
و رفعت الدعم من اجل مصلحة محدودى
الدخل ،
و فكرت تقتحم الفضاء ، و حلت مشاكل التعليم ان ولاد الاسياد يحولوا براحتهم و يدخلوا اى كلية فى اى محافظة ،

حكومة عملت بلاوى

و رغم كل دة أقالوها ، يا نهار اغبر ، كل الانجازات دى و يقيلوها ، امال الحكومة الجديدة هاتعمل ايه ؟

حلول حلزونية

احلى حاجة ان الحكومة الانتيكة بتاعتنا عندها حلول حلزونية لكل المشاكل ، طبعا فى الفترة اللى فاتت الشعب المصرى مر بمشكلة كبيرة مع غلاء الاسعار ، و كيلو اللحمة وصل ل ١٠٠ جنيه ، و حكومتنا الرشيدة باعلامها المتميز حلت المشكلة على ٣ خطوات ، و كانت حلول رائعة ، طبعا الحكومة مش هاترخص الاسعار دة مستحيل للحد من انحراف الفقراء من الشعب لو اتوفرت الفلوس فى ايديهم ،

اول خطوة بدأت بيها الحكومة لحل مشكلة ارتفاع اسعار اللحمة ، حملة بلاها لحمة ، يا عالم غالية ما تاكلوهاش ، و احنا بكدة بنحارب الغلاء بالاستغناء ، و بدأ الاعلام بتاعنا يركز على الحملة و يقول للناس ما تاكلوش لحمة علشان الاسياد ياكلوا لوحدهم .

طبعا بعد فشل اول خطوة بدأت تانى خطوة للقضاء على المشكلة ، انتشار لحوم الحمير فى كل مكان  ، مسكوا حمارين هنا ، و ١٥ حمار هناك ، و جحش مدبوح ، بناقص اللحمة يا شعب دى لحمة حمير   ، بطلوا اللحمة .

اكيد بما اننا داخلين على عيد الاضحى و كله عايز لحمة فى عز الأزمة ، لازم الحكومة تاخد الخطوة التالتة ، و طلع شيوخ السلطان و يقولوا تضحى بخروف ليه اما ينفع تضحى بفرخة ، تضحى بعجل ليه و ممكن تضحى بدكر بط ، دة لو غنى يعنى و تقدر تشترى دكر البط .

و بكدة حكومتنا اللولبية ،
أوجدت حلول حلزونية ،
لمشكلة اللحمة المستعصية ،
علشان الشعب يموت م الجوع ،
و ينهبوا براحتهم التكية ،
ماهى اسياد و عبيد ،
الاسياد فى قصورهم  ،
و العبيد تحت بير السلم مستخبية ،
بلاها لحمة يا بهية ،
بلاها تحلمى بعيشة هنية ،
حد قالك فى يوم انك هاترتاحى ،
و انتى بتحلمى براحة ،
خليكى مستنية .

آخر لعب

التيتى يقوم
فرحان من النوم
فى البانيو يعوم
و هات يا لعب

و مجدى يهب
ع الشعب يشب
يقتل و يدب
آخر لعب

و الزند حديد
اسياد و عبيد
بقضاءه يشيد
و هات يا لعب

و قدرى ضريبة
شلة هليبة
ودانا فى مصيبة
و آخر لعب

و شكرى توهان
مقضيها جنان
مكسيك لبنان
و هات يا لعب

و اهو عنده هلالى
يغلط ما يبالى
فى الإملا ضلالى
و آخر لعب

و شريف اسماعيل
فى وزارة عناتيل
و فسادها طويل
و هات يا لعب

التيتى يقوم
فرحان من النوم
فى البانيو يعوم
و هات يا لعب

حكومة عيانة

احنا الحمد لله عندنا حكومة جديدة زى الفل ، تم اختيارها بعناية ، و على الفرازة ، حكومة برعاية اللمبى ، من الآخر احنا اول دولة جابت حكومة عيانة عايزة تتعالج

عندنا مثلا وزير تعليم الدغ فى ال ط   و كلامه كله غلطات املائية

عندنا وزير عدل عنده انيميا فى العدالة و تشنجات فى احكام القضاء

عندنا وزير صحة عنده ضمور فى المستشفيات و فقر فى الضمير

وزير مالية عنده تيبس فى الدعم و تضخم فى الضرايب و تآكل فى المرتبات

وزير ثقافة عنده نقص ثقافى و تراكم فى السلبيات

و ادى اخرة البلد اللى تمسك حكومتها لواحد صايع ضايع .

الرجالة اللى بتحط التي شيرت فى البنطلون ، بيرسموا على البنات اللى بتحط الموبيل فى الطرحة ، و يجيبوا عيال يحطوا الآيس كاب فى الشراب ، عادى يعنى .

١٢ مليون زورار

بعد الواحد ما شاف الصحافة الاجنبية فى موضوع المكسيكيين اللى اتقتلوا غلط ، و كل واحد هاياخد تعويض ١٢ مليون زورار ، بيحزن على نفسه ،
دة انا بابقى لابس قميص ب ٦ زورار
و كرافتة مربوطة
و جاكتة مقفولة
و اتقتل ، يتقال عليا ارهابى و ما يتدفعش فيا زورار . و لو اخدت ١٠ جنيه باروح مبسوط .

احنا

احنا اللى قلنا فى امثالنا مين فات قديمه تاه ،

و احنا اللى غنينا ، و عايزنا نرجع زى زمان ، قول للزمان ارجع يا زمان

و احنا اللى مشينا جنب الحيط

و احنا اللى يا بختنا بنبات مظلومين و لا نبات ظالمين

و احنا اللى مطرح ما بنحط راسنا نحط رجلينا

و احنا اللى ان فاتنا الميرى نتمرغ فى ترابه

و احنا اللى بنشيل القرش الابيض علشان مستنيين اليوم الاسود

احنا اللى قلنا معاك قرش تسوى قرش

و احنا اللى بعد النكسة رفضنا تنحى عبد الناصر

و احنا اللى خلعنا مبارك و جيبنا الاخوان و خلعنا مرسي و جبنا العسكر تانى ، مستغربين ليه ، دة احنا المصريين ، اللى غنوا اخترناه ، و اللى غنوا تسلم الايادى ، و اللى قالوا يسقط حكم العسكر ، و اللى قالوا الجيش و الشعب ايد واحدة و لازم رئيس عسكرى ، و اللى قالوا و اللى قالوا و اللى قالوا ، دى طبيعة شعب ، شعب مريض نفسيا و محتاج يتحجز فى الحجر الصحى .

بصراحة الراجل تعب

بصراحة التيتى تعب مع العالم كله ، مش عارف هايلاقيها منين ، من جوة البلد و لا من برة البلد ، الراجل دة شمعة تخترق فى سبيل السكرانين ، الراجل عايز مساعدات و معونات و منح و قروض من صندوق النقد الدولى و من الاتحاد الاوروبى ، و كلهم بيضغطوا عليه  ، فين الديموقراطية ، فين المهلبية ، فين البرلمان و الراجل كل ما يسافر بلد نفس الاسئلة و نفس الشروط ، هو ما كانش فى دماغه برلمان اصلا ، بس الضغوط ، ماهو مفيش الا بالبرلمان ، اضطر يقول لميركل مستشارة المانيا ، خلاص جهزى الرز و قبل آخر السنة هايبقى فيه برلمان ، الضغوط كانت اقوى منه ، صعبان عليا ، هاعيط ، هاعيط ،
دة الراجل من تضحياته فى سبيل مصر خد السلطة التنفيذية و التشريعية و القضائية فى جيبه ، بقى يشرع القانون اللى يريحه فى شغله ، طب اهو دلوقتى اتزنق فى برلمان ، و اتحددت الانتخابات البرلمانية ، يسكت و ما يضحيش علشان مصر ؟ لأ طبعا ، حاليا حملة شرسة لتعديل الدستور لالغاء اى صلاحية للبرلمان و تهميشه تماما ، و اللى قالوا نعم ع الدستور و رقصوا قدام اللجان ، هما نفسهم اللى بيهاجموه و عايزين يعدلوه .
و الضرب فى الميت حرام
و على رأى الشاعر اللى هو انا

آه يا بلد فيكى الجهل بالقنطار
ناس بتموت م الجوع و ناس معاها بالمليار
حمار يحكم و يتحكم و بيطبله الف حمار
لا اتقدمتى خطوة يا بلد ، و كل يوم تزيدى مرار
و آه يا بلد

اهو قال

السيسى قال فوضونى علشان اقضى على الارهاب ، و الحمد لله
قضى على العدل
و تكافؤ الفرص
و حرية التعبير
و المساواة
و العيش و الحرية و العدالة الاجتماعية
و ضيف عليهم السياحة و الاستثمار
بس لسه نحنوح عين امه بيحارب الارهاب و ما قضاش عليه .

فتح الباب

احنا عاملين زى اللى بيحاول فتح باب مقفول مش راضى يتفتح ، تزق فيه ما بيفتحش ، تضربه بكتفك ، كتفك يوجعك و هو مكانه ، تجيب ناس يزقوا معاك ، برضه ما بيفتحش ، و ييجى عيل صغير يقولك ، عمو عمو ، دة بيفتح من الناحية التانية ، انت بتفتحه غلط .

اللى غايظنى

اللى غايظنى ، و حازز فى نفساويتى و مدمر  روحى المعدنية ، و بيخلينى متأكد اننا فى دايرة مقفولة .
ان هما هما نفس الناس من اللى عملوا الثورة فى يناير ،
الناس اللى قالت الجيش و الشعب ايد واحدة ،
هما اللى قالوا الجيش حما الثورة ،
هما اللى اشتركوا فى برلمان قالوا عليه برلمان الثورة ،
هما اللى صدقوا تانى الاخوان اما قالوا مش هانرشح حد للرئاسة ،
هما نفسهم اما الاخوان طلعوا كدابين و رشحوا الشاطر و بعها مرسي ، عصروا لمون و انتخبوا مرشح الاخوان ،
هما اللى نزلوا ضد مرسي اللى عصروا لمون و انتخبوه ،
هما اللى مضوا على تمرد لعزل مرسي  ،
هما اللى قالوا شعب و جيش و داخلية ايد واحدة ،
و هما اللى صدقوا ان الجيش مش طمعان فى سلطة ،
و هما دلوقتى برضه اللى عايزين يمشوا السيسى و بيدعو للوحدة مع الاخوان .

على فكرة العيب فى الناس دى مش فى العسكر و لا الاخوان .
فيه واحد بيفهم من مرة ، من مرتين ، انما ٣٢١٥ خاروق و لسه ما فهمش ، دة يبقى بقى !!!!!!
ما علينا .

الهروب التكتيكى للفوج المكسيكى

اللى حصل مع الفوج المكسيكى دة شئ غريب ، هما كانوا جايين رحلة فى الصحرا و لا رحلة للآخرة ، غرابة اللى حص فى الحادثة نفسها ، اللى فاكرة قبل الحادثة بنص ساعة نزل خبر الجيش يدمر مجموعة من الارهابيين فى الصحراء الغربية بالقرب من الواحات ، و بعدها على طول ضرب فوح سياحى مكسيكى بالاباتشى ، لفت نظرى اوى موضوع الاباتشى ، دى طيارة هجومية بتطلع فى مهام محدودة مش مراقبة يعنى او استكشاف ، و ضربت ٤ سيارات بدون اى تحذير او حتى انذار ، رغم انهم ما مثلوش اى تهديد ليها ، عامة بعد ملابسات الحادث كلها تم اثبات اقتلك الاول و بعدها اشوفك ارهابى و لا لأ ، لو مصرى اصورك برشاش و اقول ارهابى لو مكسيكى تبقى دخلت منطقة محظورة ، يا سواد السواد يا جدعان على تعليقات الحمير السيساوية ذوات الاربع ، اللى يقول دول كانوا بينقبوا على دهب و اللى بيقول دول كانوا بينقبوا على آثار و اللى يقول دخلوا منطقة عسكرية ، و اللى و اللى و اهو كله مهلبية ،
انا بقى اما يتصل بيا الحج زلاطة المكسيكى اقوله ايه ، انا اعمل زى التيتى و اهنيه بالعيد الجومى للمكسيك ، و حاليا طبعا مفيش مكسيكى ارهابى عميل خائن فاسق داعر هايهوب من البلد ، دول اصطادوهم بأباتشى يابا ، هو العمر بعزقة ، اكيد المجلس الأعلى للعالم ليه يد فى الموضوع دة .
و كما قال الشاعر اللى هو انا
مع المسيكى
هروب تكتيكى
و بكرة تفرقع
فيا و فيكى

مش فيكى عبده بقت المثالية
و سما هاتبقى تحت القبة نايبة برلمانية
يبقى الاباتشى لازم تضرب مجموعة سياحية
و هذا قمة الاعجاز العلمى .

بلد انتيكا

و بعد كل اللى بيحصل
و اللى لسه هايحصل
و اللى راح و اللى جاى
و اللى فساده متأصل
و كله كان
و كان يا مكان
بلد انتيكا
دقى يا مزيكا
عنوانها الوحيد
الرقص ع السيكا
و مع الرقص
و تسلم الأيادى
و بشرة خير
بتفرم الانسان
كان ياما كان
كان فيه ناس
زمان بتحلم
و حلمهم قلب كابوس
ما صدقوا جابوا الفانوس
و طلع المارد
طلبوا حقوقهم
بس يا خسارة
حتى المارد فشل
فى رد الحقوق
قال مش هاقدر اساعد
و انتم خايفين فى الشقوق
اصلها انتيكا
دقى يا مزيكا
عنوانها الوحيد
الرقص ع السيكا
و مع الرقص
و تسلم الأيادى
و بشرة خير
بتفرم الانسان
اللى كان فى يوم بيحلم
انه يكون انسان .

كلنا فاسدون

كل اللى ماسكين مناصب فى البلد فاسدين واذا حد طلع عنده ضمير بيتم التخلص منه ويقولوا عليه فاسد ، شفتوا الخيبة .

كل اللى ماسكين البلد بيهرتلوا  ، انما لو واحد مش بيهرتل ، يخلصوا منه بتهمة الهرتلة

كل اللى ماسكين البلد بيقتلوا ، و لو واحد مش بيقتل بيلبس قضية قتل

كل اللى ماسكين البلد بيسرقوا و لو واحد مش بيسرق ، بيلبس اجدع قضية سرقة و يخلصوا منه

الله يخرب بيتنا احنا يا شيخ

الشعب المبلول

الشعب المصرى المبلول
بلغنى ايها الشعب المبلول , اللى اتعود ع الفول
انك خلاص شربت المقلب , و ختمت معاك بحكومة محلب
و سلمتها تانى للعسكر ، اللى بيعمل كحك بسكر
و ضحكوا عليك و قرطسوك , و بيطلعوا عين اللى جابوك
و غنيت تسلم الأيادى , و دة جيشى و بيحمى بلادى
بس رجعت تانى لمبارك  , و مش اخترت الكلب اختارك
قمت لبست قناة سويس ، و حكومة كلها تهييس
و ما تنساش عاصمة جديدة  , و انت يا اهبل ع الحديدة
جبت الحرامية الشطار ، بيبعوا بلدك بالقنطار
و لسه زى ما انت يا شعب , عايش بتعانى نفس الغلب
بتعانى غلاء الاسعار , و مفيش رقابة على التجار
بتعانى فقر و امية , بتعانى ان مفيش مية
بتعانى قهر و عبودية , بتعانى من ظلم الداخلية
و كل يوم تطلع قوانين ، تكح نراب و تسب الدين
و مفيش تنفيذ اى وعود , و لا حتى كأنك موجود
خليك كدة مظلوم تعبان , خليك مش عايش انسان
يا شعب مشيتنا وراك ، ورم خلاص قفانا و قفاك .

بيحارب الفساد

التيتى قال ايه بيحارب الفساد ، اقال وزير زراعة علشان يحارب الفساد ، هع هع هع فساد ايه سيادة حضرتك يعنى ؟
فساد حكومتك ؟
فساد وزراء انت اللى اخترتهم و عينتهم ؟ يعنى لو بتحارب فساد حكومة مبارك نعديها و نصدق كلامك
لو بتحارب فساد حكومة مرسى ، نبلعها
أنما بقى تقرطسنا و تقول انك بتحارب فساد حكومتك ألى أنت معينها و مختارها اسم اسم وزير وزير ؟ 
يعنى أنت اللى معينهم و أنت اللى مختارهم ، بتضحك على مين يخرب بيتك ؟
الكارثة بقى أن المطبلاتية عمالين يهللوا و يطبلوا أن التيتى بيحارب الفساد و هاينضف البلد ،
من مين هاينضفها يا فسل منك له لها له ؟ 
من الوزراء بتوعه ؟  من حكومته ؟

و كما قال الشاعر اللى هو انا
برطع يا تيتى براحتك ما بين ارهاب و فساد
و البلد بقت تكية و تاكسى من غير عداد
و منه له
جاى رايح
منه له