اللاجئين

يا ريت ماحدش يزايد على موقف مصر من اللاجئيين ، موقف مصر فى مساندة اللاجئين واضح و صريح
مصر نقدر نعتبرها اكتر بلد بتحتضن اللاجئين و اتحدى اى بلد تانية على وجه الأرض فيها كمية اللاجئين المشردين اللى فى مصر ، يعنى لو شيلنا الجيش و الشرطة و القضاء ، هانلاقى فى مصر حوالى ٨٧ مليون لاجئ ، و مش كدة و بس ، دة مصر علشان تحافظ عليهم و تحتضنهم ، و علشان مصر دولة عظيمة بتتمسك باللاجئين ، طبعا مش هاتطردهم ، بالعكس ، دى بتمنعهم من السفر و لو صمموا و هاجروا هجرة غير شرعية بتحبسهم علشان ما يسيبوش مصر . يا ام الدنيا يا مصر .

حتى الكوسة بالقانون

الخبر بيقول
كشف مصدر كبير فى المجلس الأعلى للجامعات لـ«الشروق»، عن اتفاق وزير التعليم العالى السيد عبدالخالق والمجلس الأعلى للجامعات على استثناء مجموعة من الطلبة وأغلبهم من أبناء القضاة وكبار الضباط من قواعد التوزيع الجغرافى والتحويلات الجامعية تحت مسمى «اعتبارات قومية».
يعنى كوسة عينى عينك ، و طبعا كلهم على القاهرة و عين شمس ، و بتوع القاهرة بقى يبنوا ليهم جامعة جديدة فى ابو أتاتا ، أبو أتاتا حلوة برضه ، ما هو ابن القاضى غير ابن الغسالة ، و هى البلد ايه غير جيش و داخلية و قضاء و شوية ناس مسميين نفسهم شعب بيشتغلوا عندهم ، بس ما هو صح كدة ، ما اللى قال احنا اسياد و الشعب عبيد مسك وزير العدل ، يبقى صح و بدل ما يسموها كوسة أهى بقت قانونى و كله بالقانون ، حتى الكوسة بالقانون .

حموم الانسان

بصراحة بعد تقرير المجلس القومى لحموم الانسان عن سجن العقرب ، فى زيارة مفاجأة على غفلة حسب ما قالوا كانوا رايحين ابو زعبل الداخلية قالت ليهم يروحوا العقرب ، ايوة على غفلة بدون علم الداخلية اللى اتصلت بيهم ،
بصراحة  احنا نحمد ربنا عندنا انضف داخلية في التاريخ الماهونى للمجموعة الشمسية ،
لا بتعذب و لا بتقتل و لا الكلام الفارغ اللى المغرضين و العملاء و الخونة التابعين لأمريكا و قطر و تركيا و اوروبا و تنزانيا و غينيا و باقى الكرة الارضية اللى عايزة تسقط مصر ، دة حتى المعتقلين هايصين ، كل يوم حفلات و سهر و انت داخل السجن بتستقبلك التشريفة ، الصول برعى يستقبلك بالورد و الموسيقى الكلاسيك و الحراس يقدمولك المنيو و تختار منه اللى انت عايزه و تشرب ازازة البيبسى اللتر و نص ، و الاهم ان من حقك تختار زنزانتك ، عايزها على البحر و لا على الشارع و، بحرى و لا قبلى ، و هاتلاقى ساونا و انترنت و ملاعب اسكواش و سينما ، و اظارة السجن بتعمل مسابقات و بتقدم جوايز شاليهات فى مارينا و عربيات هامر و لابات و تابلت و موبيلات ، انما طبعا الخونة و الحاقدين مش بيقولوا الحقيقة و هدفهم تشويه الداخلية ، حتى اسألوا حافظ ابو سعدة كدة ، و اللى مش مصدق يخطف نفسه كدة كام سنة فى اى سجن يشوف بنفسه ، يا كلاب يا خونة ، عايزين تدمروا ماسر و تشوهوا الداخلية العظيمة .
من ابو دومه  الى الأمين زعتر  : البضاعه خلاص اتوزعت علي تجار التجزئة و جارى حصر المكسب .

مصر زى الفل

مصر زى الفل يا ريس

هبوط حاد فى الأمانه
تم استئصال الشرف بنجاح
تم القضاء على الضمير
أزمة فى الجبهه الداخلية
انتشار الفساد الداخلى
مصر غرقانة فى الفساد
و مين بيحكم مصر ؟
الأمن الوطنى ، و لا الجيش ؟
مش انت اللى بتحكم ، بس عايزين نعرف مين بيحكم ؟

زيارة سنغاقورة

السيسى فى جولة اسيوية لمدة اسبوعين لزيارة سنغاقورة و الصين و اندونيسيا ، واخد معاه مين يا ولاد ؟
مهاب مميش ، اللى هو رئيس هيئة قناة السويس ، ليه بقى ؟ هانعرف ، المهم الزيارة دى حصل فيها ايه ؟

بصراحة زى ما اعلامنا شغال نفخ ، الراجل اما وصل مطار شانغي السنغاقورى كان في استقباله ما شاء الله ، اللهم لا حسد وزير المواصلات ، و مدير المراسم في وزارة الخارجية ،
بس ؟
اينعم و حياة الأخوة

و الغريب أن زيارة السيسي يومين كاملين في سنغافورة ، قبل ما تقام له مراسم الاستقبال الرسمية في قصر الرئاسة ، في سابقة دبلوماسية غريبة تعكس عدم الاهتمام الرسمي من المسؤولين هناك بالزيارة .

و بالرغم من الاستقبال دة ، نقول ايه ناس ما عندهاش دم ، السيسي قرر ان الزيارة ٣ أيام بمنافعهم ، رغم ان سياسيا معروف أن الزيارات التي تستغرق أيام لا تكون إلا للبلدان المؤثرة سياسيا واقتصاديا ، زى الولايات المتحدة أو روسيا أو ألمانيا ، انما سنغاقورة ، ينفع سنغاقورة ٣ ايام و وزير المواصلات فى المطار ، يا مشرفنا يا سيسى

الاهم من كل دة ان الباشا راح بقى فى اليومين دول يزور ايه و يتصور هناك ، محطة مياه و توليد كهرباء و حديقة نباتات ، ايوة فعلا رئيس دولة راح يزور محطة مياة ، و طبعا علشان الاعلام بتاعنا يطبل شوية زار حديقة نباتات ، علشان يسموا زهرة على اسمه ، طب و سنغاقورة هاتستفيد ايه ، آه دة خلى مهاب مميش يوقع على اتفاقية ان سنغاقورة هاتعمل ٣ محطات مياة فى مصر ، اولهم فى العين السخنة ، بس دة وقع مهاب مميش ، لاوزير موارد مائية و لا وزير كهرباء و لا رئيس وزرا ، دة مميش رئيس هيئة قناة السويس بالترعة الجديدة ، مش غريبة اوى دى .
سيبكم انتم بس انه يقول لرئيس سنغاقورة ، مصر لن تسقط و بنرحب بأى حد يقدم لينا مساعدات انسانية ، زى ما قالت المصرى اليوم ، يبقى يخرب بيتك يا ابن المفضوحة ، اصل التسول دة ادمان .

مفيش

عمو عمو
هو احنا عندنا رئيس جمهوية ؟

يابنى فى مصر مفيش رئيس جمهورية ، فيه رئيس عصابة ، مافيش حاجة اسمها رئيس جمهورية ، انت جبت الكلمة دى منين ؟

سمعت رئيس الوزراء امبارح بيتكلم و بيقول بتوجيهات رئيس الجمهورية .

جهز شنطتك و باسبورك يابنى و سيب البلد دى لأن شكلك تعبان اوى

ليه يا عمو

اصل البلد اصلا مافيهاش رئيس وزرا ، دول اشباح يا حبيبى .

ارنبنا فى منور انور

نبدأ كدة سوا خطوة خطوة

حسني سجن مرسي و احنا قاعدين

طنطاوي طلع مرسي من السجن و سجن حسني ، و احنا قاعدين

مرسي اقال طنطاوي و جاب  مكانه السيسي ، برضه و احنا قاعدين ، 

السيسي سجن مرسي تانى و طلع حسني 

واحنا قاعدين

قالك ايه قالك أه

قالك امريكا مع الإخوان 

و قال الإخوان ضد العسكر 

و قال برضه العسكر مع امريكا 

الخلاصة ان أرنبنا في منور أنور و أرنب أنور في منورنا

قانونى

كل القوانين اللى اصدرها السيسى اكتر من ٥٠٠ قانون ،
تقنين للفساد و بيع البلد و حماية للقاتل و تطويع للجهات السيادية ،
السيسى خلى الفساد بالقانون ،
خلى الداخلية تقتل اى حد و تعتقل اى حد بالقانون ،
باع اراضى البلد للاجانب بالقانون ،
حصن الجيش و الداخلية بالقانون ،
خلى القضاء مسيس بالقانون. 
كله قانونى قتل سرقة بيع كله قانونى ،
موظفين تتفصل و يقللوا عجز الموازنة على حساب الغلابة بالقانون ، الدعم بيقل كل مدى على كهربا و مية و بنزين بالقانون ، كله بالقانون و لما يمشى هاياخد براءة من اى قضية لأنه ماشى قانونى.

كله زى بعضه

خروف عمل ثورة ع الكلاب ، وقع فى حفرة فقد الذاكرة ،

عمل ثورة تانى ع القطط اللى ركبته  وقع فى حفرة تانى اتشل ،

حب يعمل ثورة تالت نزل الخروف يهتف و يقول  ماااااااء هوووووو نووووووووو

كله رجع زى ما كان

دلوقتى بعد ٤ سنين ثورة ، و ٢ دستور ، و اعلان دستورى ، و آلاف الشهداء و المصابين ، كل واحد رجع مكانه ،

الفلول رجعوا الحكم

الاخوان رجعوا للسجون و المعتقلات

الشباب رجعوا يدوروا على فرص سفر و يسيبوا البلد

الاعلام رجع و اخترناك و عاش الرئيس

الداخلية رجعت بلطجية و تعذيب و قتل و اعتقال و اخفاء قسرى

البرادعى رجع النمسا

كل حاجة رجعت زى ما كانت الا الجيش ما رجعش ثكناته و ودانا احنا ثكناته و خد هو البلد .

دة موقعنا

امريكا تحذر روسيا من بيع منظومة الصواريخ s300 لإيران

روسيا تحذر فرنسا من بيع السفينة ميسترال لأى دولة بدون موافقتها

فرنسا تحذر ايران من التفكير فى امتلاك سلاح نووى

ايران تحذر اسرائيل من المساس بمصالحها

اسرائيل تحذر مصر من تطور الاحداث فى سيناء وو اضطرارها للتدخل

مصر تحذر من التدخين لأنه ضار جدا بالصحة

دة موقعنا بين دول العالم بعيد عن عكاشة و احمد موسي .

القانون واضح و صريح

القانون واضح وصريح فى دولة سيكا سيكا العسكراطية

مادة ١ بتقول
اي تجمهر يصحبه اعمال شغب واحتجاز مسؤولين و يحتاج لتدخل من قوات الأمن وتعامل بخراطيم المياه وقنابل الغاز و معاهم سلاح و قفلوا مديرية أمن بعد ما اقتحموها ، هو وقفة احتجاجية بشرط ان يكون القائمون به من امناء الشرطة و مهم جدا الشرط دة .

مادة ٢ بتقول
الوقوف على سلالم نقابة الصحفيين او فى ميدان من الميادين و رفع الشعارات و اللافتات و لبس التيشرتات المناهضة للحاكم يعتبر تظاهر واخلال للنظام ومحاولة لقلب نظام الحكم وارهاب للدولة و التعامل بالخرطوش و الرصاص الحى بشرط ان يكونوا من الشعب .

مادة ٣ بتقول منه له ، جاى رايح منه له .

ليه يا ماسر

واحد يقوللى ليه لم يطبق قانون التظاهر على اعتصام امناء و افراد الشرطة فى الشرقية خصوصا انهم اقتخموا مديرية الأمن زى ما بيطبقوه على اى وقفة او مظاهرة سلمية ؟

سؤال جميل و منطقى
مهما كان امناء و افراد الشرطة دول تبع الداخلية ، يعنى من الأكابر فى البلد ، دول نقدر نعتبرهم ٦٤ حصان ما يقدروش عليهم و الشعب نص حصان ، فيه فرق فى السرعات أجودعان .
ثم انتم عايزينهم يحبسوا امناء الشرطة بتخمة خرق قانون التظاهر ، انتم اتجننتوا ، هل يختلط الزيت بالماء ؟ لا يختلط الزيت بالماء ، و اذا سألوك عن العدل قولهم يروحوا للزند .

اوباااااااااااااااا بقى

يعنى بصراحة بعد اضراب و اعتصام افراد و امناء الشرطة فى الشرقية و محاصرتهم لمديرية الأمن و فشل فض اعتصامهم بالقوة و اطلاق قنابل الغاز عليهم ،
اوباااااا الحراميه اختلفوا على تقسيم التورتة يا ام بقلظ صحى بقلظ و قوليله الحرامية اختلفوا مع بعض على تقسيم السرقة ، على النهيبة ،
يا عالم يا هووووووه العسكر بيتخانقوا على تقسيم التورتة ، خير اجناد الارض مسكوا فى بعض ، النت فين يا سيسى ، قوم شوف الاربعين حرامى بتوعك بيقتلوا بعض يا معلم و انت مستخبى فى الزلعة يا معلمة .
و طوبة على طوبة خلى عاركة ولاد الكلب منصوبة .

فاهم و مش فاهم

مشكلتنا فى مصر اننا اتقسمنا لفاهم و مش فاهم ،
فاهم ساب البلد و هج و كبر دماغه او قعد فيها و برضه كبر دماغه و ساب على الساحة اللى مش فاهم ،
اللى مش فاهم اتقسم تلات انصاص ، واحد ؤغم هايسألنى هو فيه حاجة اسمها تلات انصاص ، هاقوله ايوة يا فالح بعد التفريعة الجديدة الواحد فى مصر بقى تلات انصاص ، المهم التلات انصاص ، نص عاش فى الدور انه فاهم ، و نص عايز بدل ما يبقى مش فاهم يتقال عليه فاهم و نص مقتنع و راضى انه مش فاهم ،
النص اللى مش مش فاهم و عايز يتقال عليه فاهم ، سلم ودانه للنص اللى مش فاهم و عامل نفسه فاهم ، فاللى مش فاهم و عامل نفسه فاهم عمل فيها برم و بدأ يفهم فى المش فاهم و نفسه يتقال عليه فاهم ، و بقى اللى مش فاهم بيفهم فى اللى مش فاهم و يقول له انا فاهم و هو مش فاهم ، جه اللى مش فاهم ما فهمش من اللى مش فاهم و عامل فاهم ، و فضل اللى مش فاهم مع نفسه مش فاهم ، و اللى مش عايز يفهم بطل يسمع للى مش فاهم لأنه مش فارق معاه اصلا فاهم و مش فاهم ، اما الفاهم ساب اللى مش فاهم يضحك على اللى مش فاهم و يبقى كله مش فاهم ، تفتكروا غلطة الفاهم و لا غلطة اللى مش فاهم ؟
حد فاهم حاجة و لا كله مش فاهم ؟

ثورة دى و لا انقلاب

موعدنا مع الفيلم الاكشن كوميدى تراجيدى ثورة دى و لا انقلاب ، هى خلاصة الفيلم ناس قامت بثورة على ناس ركب عليهم ناس تبع الناس اللى قامت الثورة عليهم و ضموا ليهم ناس عصرت لمون ، قامت الناس اللى قامت عليهم الثورة ضحكوا على الناس اللى عصرت لمون و خلوهم يقوموا بثورة على الناس اللى ركبت على الثورة و بعدها قاموا ساجنين الناس اللى ركبت و الناس اللى عصرت لمون و بقى الناس اللى قامت عليهم هما الناس اللى عملوها و اللى ركبوها برضه عملوها و وصلنا لمرحلة مين مع مين و مين ضد مين و اللى حصل دة ايه بيودى فين و ثورة دى و لا انقلاب .

مفيش فايدة

جايبين ضيف على قناة المحور بيقول نرش مسامير حوالين المبانى المستهدفة علشان لو عربية مفخخة جت الكاوتش ينام و ما تتحركش ،

بصراحة تفكير عميق يدل على عقلية معملية حلزونية فذة . و بصراحة كله بقى خبير استراتيجى و كله بقى خبير امنى .

دول بقى عاملين زى ناس راحوا اشتكوا عشان فيه حفرة كبيرة بيقع فيها العيال و بيفكروا فى حل ليها ،

واحد قال احنا نجيب عربية اسعاف و نوقفها جنب الحفرة ، علشان لو طفل وقع و طلعناه تبقى العربية جاهزة تشيله

واحد تانى قال لأ طبعا ، احنا اسهل نبني مستشفي جنب الحفرة بدل عربية الاسعاف ، نطلعه من الحفرة على المستشفى

الثالث بقى زى أخينا اللى فوق دة قال و ليه نبنى مستشفى جنب الحفرة ، ما احنا عندنا اصلا مستشفي فى اول الشارع ، احنا نردم الحفرة و نحفر حفرة غيرها جنب المستشفي اللى فى اول الشارع .

عندما ينتحر المنطق على حدود السبهللة ، تصبح الحلول لولبية و دة من خيبتك يا ولا

ادينى

نقلا عن مصراوى

وزيرة القوى العاملة
استمارات التوظيف فى قناة السويس الجديدة لا تعنى وجود فرص عمل

الله الله عليكى يا ست ، قولى كمان و اشجينى

إديني القاضية في الحتة الفاضية

إدينى اللسعة فى الحتة الواسعة

إدينى الفنكوش نزلنى على فاشوش

مصر الجديدة

فى مصر الجديدة بعد التمرد و ثورة ٣٠ يونيو ، اتغيرت مفاهيم كتير

مثلا تم تغيير مفهوم ان الشرطة فى خدمة الشعب الى الشرطة فى خدمة الكلب

برضه بقت القناة طولها ١٩٦ كيلو و ممكن يبقى طولها ٣٥ كيلو عادى يعنى ماهى قناة جديدة و فى التحديث الطول بيقل و الكرش بيكبر

تم تغيير مفهوم السلطة بأن السلطة سيف مسلط على رقاب الشعب

تم تغيير مفهوم الاعلام بأن الاعلام هو الوسيلة التى يعلم بها المواطن انه فى ظل المؤامرات الخارجية و الداخلية و العمليات الارهابية الحلزونية هايموت من الجوع ، أصل مافيش ، ما عنديش ، هاتاكلوا مصر يعنى

من الآخر ايها المواطن هاتفضل تاخد خوازيق حتى تستغيث

انت بتقول تفريعة

شفت يا عم أهو السيسى حقق اللى قال عليه و افتتح التفريعة الجديدة لقناة السويس زى ما وعد الناس

انت بتقول تفريعة ؟
يبقا انت اخوانى ارهابى عميل طابور خامس تابع للحركة  الصهيواوروبية الامريكية اليابانية الصومالية القطرية التركية التايلاندية الالمانية التى تسعى لتدمير مصر يا واطى ، دى قناة السويس الجديدة .

احساس غريب

كان احساس غريب اوى امبارح و الخديوى الملك الرئيس المشير المدنى العسكرى عبد الفتاح بيفتح ترعة تفريعة قناة السويس القديمة الجديدة ، فجأة الدنيا قلبت برد رعد برق حر و قلت اعد فى السفن اللى بتعدى علشان اعرف نصيبى كام ، و قمت ركبت قطر المفاجآت و قمت نازل على ميدان التحرير و هاتك يا رقص و اللى مات مات و اللى اتسجن اتسجن و اللى مختفى مختفى ، بس ايه مصر بتفرح
زغرطى ياللى مش غرمانة .

المصرى

المصرى دايما بيشوف اللى مش موجود ، بجد شعب مهيس بطبعه

يعنى التفريعة ال ٣٢ كيلومتر شافها قناة جديدة ١٩٦ كيلو متر

المصرى شاف المؤتمر الاقتصادى رفع اقتصاد مصر ، رغم ان البورصة فى النازل ، انا مالى يا عم هما بيقولوا كدة

المصرى شاف الرئيس العسكرى رئيس مدنى ، و اما لبس البدلة العسكرية فى سيناء و فى افتتاح القناة بعد استقالته من الجيش برضه رئيس مدنى

المصرى شاف و صدق ان الايدز و فيروس سى يتعالجوا بالكفتة و استنى العلاج

المصرى بلا فخر بيشوف اى حاجة مش موجودة و كل حاجة مش موجودة ، شعب بيشوف بقفاه .

مصر بتفرح

احلى حاجة فى مصر بتفرح انها اتقسمت فرق و الشعب اتشتت

فريق بيرقص على واحدة و نص
و فريق زعلان
و فريق مش عارف يفرح و لا يزعل
و فريق بيخبط دماغه فى حيطة الزنزانة
و فريق مستنى حبل المشنقة
و فريق بيتفرج على اللى بيحصل و ميت م الضحك
وفريق رايح يفتتحها

و فريق بيقول كل الفرق هاتفرح غصب عنها و اللى مش هايفرح هاياخد بالجزمة 

ههههههههههههههههههه شكلها كدة فيه مصر غير مصر و ناس عايشة فى مصر و ناس مش عايشة فى مصر و اخويا هايص بيوزع دهب و انا لايص باكل طوب و قال ايه مصر بتفرح ، افرحى لوحدك يا مصر دة الشعب بطل يفرح .

الحقد الطبقى

ناس عندها حقد طبقى يا جدع ، ايه يعنى رجال اعمال عندهم مليارات و ضباط الجيش و الداخلية و القضاء بياخدوا ملايين و ألافات ، بطلوا حقد ، السيسى برضه ليه مغزى من الكلام دة ، دى سياسة ، ايه فهمكم انتم فى السياسة ، الفقير المحروم لو خد فلوس و علاوات و دعم و الكلام دة هاينحرف ، اللى هايتجوز على مراته و عياله يتشردوا و اللى هايشرب بانجو ، برضه لازم نخاف عليه ، مش بعيد الفقير بعد ما ياخد العلاوة الاقيه بدل ما يشرب عصير قصب ، يشرب فراولة و العياذ بالله ، الفلوس كتير ما شاء الله فى البلد ، دة حتى هانوزع عملات دهب فى افتتاح قناة السويس و مصر بتفرح و كدة يعنى بس برضه لازم نخاف ع الفقير و ندوس على امه لينحرف .

مالوش ملامح

انا نزلت عملت ثورة علشان اطالب بحقى ، عيش ، حرية ، عدالة اجتماعية ، كرامة انسانية ، فجأة لقيت نفسى دخلت فى اعلان دستورى و حوارات و متاهات و عسكر و اخوان و كفتة و نهضة و تفريعة ، و بقيت فى عرف الدولة مسجل خطر و ارهابى و لازم اتحبس و اتقتل فى الشارع ، و بدل عيش ، حرية ، عدالة اجتماعية و اهداف الثورة اللى كنت باطالب بيها ، لقيت مستقبل اسود فى اسود مالوش ملامح و لا باين ان هايبقى ليه ملامح .

القناة الجديدة

مسرح فيه ٩٧ كرسي ، كل يوم ييجى يقعد يتفرج على المسرحية ٤٧ متفرج يقعدوا على ٤٧ كرسي ، جه صاحب المسرح قالك المسرحية حلوة انا هاخلى المسرح ٢٠٠ كرسي و تساعدونى انى اخلى المسرح ٢٠٠ كرسي ، بس برضه كل يوم مش هايحضر المسرحية الا ٤٧ متفرج مش هايفرق معاهم ٩٧ كرسي و لا ٢٠٠ كرسي ، اصل مفيش غيرهم بييجى .

تعريفات سياسية حلزونية مصرية

مصر غير اى دولة فى العالم بتاخد من النظام جزء و تسيب الباقى و دى تعريفات سياسية من وجهة نظر حكام مصر

الاشتراكية
الاشتراكية ان كل الشعب يشتغل عند الحكومة ، و الحكومة تلم الفلوس اللى بيشتغل بيها الشعب ، تديله عيش حاف و تاكل هى السيمون فيميه

الرأسمالية
الحكومة تأجر الشعب لرجال الأعمال يشتعل عندهم بالعيش الحاف و تاخد من رجال الاعمال اللى يكفيها و ذيادة من تمن شغل الشعب عندهم

الانفتاح
الحكومة تختار كام واحد بيشحت و تخليه يتاخر فى المخدرات لحد ما الشعب يتعود على الحشيش و اما يفوق يقول انا مش فايق اصل طبيعته انه مسطول

التعددية الحزبية
الحكومة تعمل كام حزب عن طريق امن الدولة يعددوا وراها لو حد مات غلط فى معدية الوراق

حرية الاعلام
الحكومة تمول القنوات علشان تمجد انجازاتها و لو مفيش انجازات ، نقضيها رقص و غنا و تسلم الأيادى و رفع اعلام

الدستور
دة قبل ما تدخل الحمام ، يمكن حد جوة و لا حاجة بتقول دستور

واد يا مزيكا

واد يا مزيكا ، تعرف ايه عن السياسة فى مصر يا واد يا مزيكا ؟

السياسة فى مصر انك تقول حاضر و نعم و موافقين و الا تشرف فى السجن مع المعتقلين

و تعرف ايه عن البطالة يا واد يا زيكا ؟

١٠٠٠ عربية خضار كل عربية يشتغل عليها ٣ و نبقى حلينا مشكلة البطالة

طب و الاقتصاد يا واد يا زيكا ؟

مؤتمر اقتصادى يا معلمى و ما حدش واخد باله و اضرب و اقلب

طب و ازمة السكن يا واد يا مزيكا ؟

عاصمة جديدة تروحها بمترو الأنفاق

بس مفيش مترو انفاق بيروح هناك يا واد يا زيكا

اما يبقى يروح نبقى نعملها فى الحتة اللى هايروحها يا معلمى

طيب و القناة الجديدة يا واد يا مزيكا ؟

هى  ترددها كام يا معلمى ؟

التفريعة

هى البقرة اللى عندك دى بتجيب لبن اد ايه فى اليوم ؟

٦ لتر لبن فى اليوم

طيب تشاركنى و اديك فوق البقرة معزة تديك ١٠٠ لتر فى اليوم

بس ازاى ؟

انا آخد البقرة و احولها لشركة مش تابعة ليك و ابقى اتصرف فيها لوحدى و انت خد المعزة و عيش حياتك يا معلم ، بس تدينى تفويض بالادارة و البيع و الشرا و اعمل اللى انا عايزه

قشطة طالما ١٠٠ لتر فى اليوم يبقى موافق ، شيل البقرة و ورينى معزتك يا كبير .

بيقولك ما تخافش م الهابلة ، خاف من خلفتها .

شعبى الحبيب

يا شعبى الحبيب الصبور المهاود
طبعا بعد كل القوانين اللى صدرت فى عهدى لتعديل قوانين صدرت قبل كدة ، او لالغاء قوانين صدرت من فترة ، او لالغاء تعديلات قوانين حصلت ، و هذا يصب فى مصلحة البلد العليا و لن يصب فى مصلحة المواطن السفلى ، من الآخر لازم تتعدل علشان تفهم لأن انا سابقكم بتفريعتين و ترعة ، يعنى انا لقيتكم ماشيين مقلوبين رجليكم تحت و دماغكم فوق ، و لازم علشان تفهموا تتعدلوا تبقى دماغكم تحت و رجليكم فوق ، ساعتها بس هاتفهموا الحقيقة ، و الحقيقة الغايبة عنكم انى خفت عليكم من الكتكوت و وابور الزلط ، انا قلت اشيل الكتكوت لأن وابور الزلط جاى عليكم و خفت من الكتكوت ليقلب وابور الزلط فى الترعة البولاقية ، علشان كدة يتحتم على حبس الكتكوت و قتل النعامة حتى لو دفنت راسها فى الرمل و تعذيب الديوك نظرا لعدم توفر البيض ، و دى خطتى للنهوض بمصر و نقلها من عصور الظلمات الى عصور الدوامات .
و لو فهمتوا قصدى ايه تبقوا عمد .
و الله الموفق و المستعان
مع تحيات سيسو عضلات

افتح الجورنال

ياض يا بيسو ،

ايوة يا معلم

افتحلى كدة الجورنال و اقرالى الاخبار

حاضر يا معلم

الفريق مهاب مميش فى تصريح ان قناة السويس الجديدة ستدر دخل ١٠٠ مريار زورار

سيبك يا ابنى من الجيش

دة رئيس هيئة قناة السويس يا معلم

شوفلنا خبر تانى

السيد اللواء محافظ الغربية يفتتح ....

يا ابنى سيبك من الجيش ، شوف خبر تانى

اللواء رئيس الرقابة الادارية

يا ابنى كفاية لواءات بقى

السيد الدكتور محافظ الاسكندرية

اخيرا حد بره الجيش كمل يابنى

بصحبة اللواء سكرتير عام المحافظة

امشى يا ابن الكلب من هنا ، مش عايز اعرف اخبار

يا معلم فى تصريح من رئيس الجمهورية بيقول لا و الله ما حكم عسكر

امشى يا ابن التييت ، عبوك عبو الجرايد ، مش عايز اعرف اخبار .