سمك لبن تمر هندى

رئيس الجمهورية ، اللى هو رئيس السلطة التنفيذية ، اللى عمال يأجل فى انتخابات السلطة التشريعية ، علشان يبقى معاه تنفيذية و تشريعية ، و ضمانه لتسييس السلطة القضائية و احكام القبضة الأمنية بأن من حقه كرئيس للجمهورية المهلبية الحلزونية عزل رؤساء السلطات الرقابية اللى المفروض بتراقب السلطة التنفيذية اللى يرأسها هو ذات نفسه ، يعنى من حقه انه يعزل اللى بيراقبه
يااااااه لو كل مواطن من حقه يعزل اللى بيراقبه كان امن الدولة قعد فى البيت ، و اهو كله خلطبيطة و البحر بيضحك ليه على سمك لبن تمر هندى و سمعنى سلام كبير اوى للفصل بين السلطات و زود الطحينة .

ثورة

ترانى ابكى
ثورة يناير
رئيس مدنى
حرية تعبير
بلد بتضيع
كلنا مسؤولين
بنتفرج
عجل بنى اسرائيل
اسكتوا
أصل معاه بندقيه
مش هانعمل بامية ليه
لأ
تقيلة ع القلب
اديها قرع
هو فيه احلى من الكوسة
كل ثورة و انتم فى المانيا صايمين
زى يسرا و الهام شاهين

المجرم

المجرم اسمه محمد الجمل

الوظيفة  محامي

التهمة كان ماشى بسرعة جوة محكمة مدينة نصر الدور التانى لأن كان عنده جلسة متأخر عليها

بس الحمدلله استطاع أحد أمناء الشرطة العاملين بقسم الاميرية النهاردة ضربه بالرصاص في محكمة مدينة نصر و نقل الى مستشفى التأمين الصحى بمدينة نصر
ويبقى يورينا بقى هيمشي تاني سواء بسرعة او يمشى على رجليه اصلا إزاي 

البلد دي فيها قانون

قال يمشي بسرعة قال ، هى سايبة

على فكرة بموجب قانون الارهاب قتل المحامى قانونى لأن امين الشرطة اشتبه فيه و من حقه بموجب القانون يقتله و مايتحاسبش لأنه بيؤدى واجبه فى مكافحة الارهاب .

دنيا

دنيا رايحة فى داهية
الحق بقى باطل
و الباطل بقى باشا
و الباشا داس على رقاب الكل
و لوحده عاش
الباشا داس على الحق
لحد ما دخله الانعاش
دنياااا

من المستفيد ؟

دايما ابحث عن المستفيد ، تفجير القنصلية الايطالية النهاردة ترتب عليه ايه

- مكالمة بين السيسي ورئيس وزراء إيطاليا يتعهدان فيها بالتعاون لمحاربة الإرهاب و دعم ايطاليا للسيسى فى حربه على الارهاب 

- مصطفى بكري و باقى كلاب السلطة يطالبون بالاسراع و اعلان حالة الطوارئ

- مظاهرة في مكان التفجير للمطالبة بإعدام محمد مرسي و القضاء على الارهابيين اللى هما حاليا المعارضة بكل اطيافها

- تحطم زجاج مقر نقابة الصحفيين و التفجير ساب الدنيا كلها و جه جنب النقابة ، قلتلى الصحفيين كانوا معترضين على قانون الارهاب باين

- الاهم بقى المطالبة بالإسراع في تطبيق قانون الارهاب و يبقى حد يعترض بقى ، المرة دى تكسير زجاج النقابة ، المرة الجاية بوووووم فى النقابة نفسها .

كدة الحمد لله اكيد الارهابى اللى فجر العربية هو المستفيد ، ناس طيبين اوى اوى يا خال .

تخيل

تخيل ان النهاردة ٢٤ يناير ٢٠١١ تفتكر لو الزمن رجع بيك هاتنزل يوم ٢٥ يناير ؟

سؤال صعب بس انا عن نفسى لو الزمن رجع هانزل اشرح كل اللى حصل بالضبط و امسك الخريطة و بصوا يا جدعان

هنعمل ثورة هنا

هانتركب اول مرة هنا

هانتركب تانى مرة هنا

هانتركب تالت مرة هنا

هانتمسك و نروح ع المعتقل هنا

هايموت مننا ناس هنا و هنا و هنا و هنا و هنا و هنا و هنا و هنا و هنا و هنا و هنا و هنا و هنا و هنا و هنا و هنا

و هانقطع في بعض هنا

هانكره بعض هنا

هانشمت فى موت بعض هنا

و هانقضى بقيت حياتنا نتنفخ من هنا و من هنا و من هنا

شكلك فاهم يا نصه

نفس اللعبة

الاخوان بيلعبوا نفس اللعبة و عايزين يقنعوا القوى الثورية ان هدفهم الثورة بس نشوف كدة شوية اسئلة
هدف الاخوان ايه ؟
عودة مرسي للحكم

مرسي فين ؟
مرسي فى السجن

محكوم عليه بإيه ؟
محكوم عليه بالاعدام

تفتكر انه هايتعدم ؟
الاخوان عندهم استعداد يضحوا بأى عدد علشان ما يتعدمش و يخرج و يرجع للحكم 

طيب هل السيسى هايعدم مرسي ؟
لأ ، لأن وجود قيادات الاخوان على قيد الحياة فى مصلحته و ضد مصلحة الثورة ، لأن بسببهم حسب كلامه فيه ارهاب و مظاهرات و بالتالى هايصدر قوانين قمعية براحته و يعمل اللى هو عايزه

طب دليلك ايه ؟
تشويه الاخوان و مؤيدى السيسى لكل القوى الثورية و النخبة المحسوبة على الثورة ، لأن الاتنين من مصلحتهم ان القوى الثورية دى تبقى تابعة لحد فيهم ، و كمثال السيساوية يشتموا ٦ ابريل و يقولوا عليها اخوان و الاخوان يقولوا كانوا فى تمرد و أيدوا العسكر .

ناس طيبين

المعونه بتيجي لمصر منين ؟
أمريكا

ضباط الجيش بتروح تتدرب فين ؟
أمريكا

المناورات والتدريبات بتتم بتخطيط مين ؟
أمريكا

السيسي طلب الأباتشي من مين علشان يحارب الارهاب ؟
امريكا

طيب الأف ١٦ دى اللى بيضربوا بيها الارهاب قطع غيارها و ذخيرتها منين ؟
امريكا

بس سيبك انت ان السيساوية مقتنعين ان السيسى ضد امريكا و أسر قائد الاسطول السادس الامريكى و منيم اوباما م المغرب .
ناس طيبين اوى اوى يا خال .

هتلر

قال هتلر اعطنى ثلاثة اشياء لأحتل العالم

الجندى المصرى
الذبدة الألمانى
السكر الامريكى

و اغرقلك العالم احلى كحك عيد من دار المشاة بالقاهرة .
و اطعم الفم تستحى العين يا معلم

معكم
المعلم هتلر صاحب الفرن اللى ع الناصية بجوار دار المدرعات .

الاتنين فى جانب واحد

الكلام الأخير للبرادعى و تصريحاته الأخيرة مش مختلفة عن تصريحاته اللى فاتت كتير ، هو كان قال ان الاتفاق كان خروج كريم لمحمد مرسي و انتخابات رئاسية مبكرة و مصالحة سياسية بين كل الاطراف ، الفرق فى اعترافه الأخير انه كشف عن بيرناردينو ليون، المبعوث الأوروبي اللى كان الاب الروحى للاتفاق ، بس الغريب ان بعد تصريحاته الأخيرة رغم انها فى مصلحة الاخوان ، لقينا ان مؤيدى السيسى و مؤيدى مرسي نازلين شتيمة و تشويه فيه بأقذر الالفاظ و الصفات و اتهامه برضه بالخيانة و العمالة ، طيب مؤيدى السيسى مفهومة
انما تصريحاته فى مصلحة الاخوان ، و شاهد بيعترف ان السيسى مسئول عن كل الدم اللى حصل ، يبقى مؤيدى مرسي سابوا مضمون الشهادة و مسكوا فى الراجل و نزلوا شتيمة و تشويه ليه رغم ثقل البرادعى الدولى و ان التصريحات دى هاتصب فى مصلحتهم دوليا ؟
كدة الطرفين فعلا بيتبعوا نفس الطريقة انهم مش عايزين تغيير و انهم الاتنين مش عايزين البرادعى او اى قوى مدنية تظهر فى الصورة لأن همهم الكرسي و الحكم مش اكتر ، و التفسير الاقرب للواقع ان الطرفين راضيين بأن يبقى الحال على ما هو عليه و يستمر الصراع بينهم و لا صابت لا اتنين عور ، المهم ان اللى ياخد الكرسي يحتله للأبد و ما يبقاش فيه اى منافسة ليه ، و دة واضح فى ان حتى الآن تشويه الاخوان ل ٦ ابريل و اليسار و كل القوى المدنية رغم احتياجهم ليها ، و برضه واضح فى شماتة الاخوان فى حبس احمد ماهر و دومة و علاء عبد الفتاح و غيرهم و ولولتهم على معتقليهم ، و واضح فى تصميم الاخوان على انهم اللى قاموا بثورة يناير رغم عدم اشتراكهم فيها ، مش علشان حاجة الاخوان هدفهم هو نفس هدف العسكر و هو اقصاء القوى المدنية خارج المشهد تماما .
بالبلدى العسكر و الاخوان عايزين الصراع يبقى بينهم بس بدون دخول طرف تالت فى المعادلة خصوصا طرف له ثقل دولى زى البرادعى او دخول اى قوى مدنية ، الاتنين عايزين يبقوا هما بس الصالحين لحكم مصر ، و يبقوا بديل لبعض ، و وجود حد منهم بيعتمد على وجود التانى ، يعنى الاخوان وجودهم بيعتمد كالعادة على تجارتهم بقمع العسكر ليهم و المعتقلات و السجون ، و العسكر وجوده بيعتمد على فزاعة اسمها الاخوان ، الاتنين مايستغنوش عن بعض عايزين الدنيا تفضل كدة بينهم و اللى يكسب منهم و يقدر يقضى على التانى ياخد كل حاجة و اللى يخسر يخسر كل حاجة ، بس ماتروحش لحد تالت غيرهم . وجهين لعملة استبدادية واحدة و دة واضح جدا .

اجتماع عاجل

اجتمع الشعب المصرى لبحث المصير المحتوم بعد ما ماتوا من الجوع و باعوا الهدوم ، و تشكلت لجنة لتجتمع اجتماع مغلق لبحث توحيد القوى لمواجهة العسكر المفتريين ، بعد ما شافوا منه السواد سنين ،
و اعضاء اللجنة :

الاستاذ / مقتول ابنه

الاستاذ / محبوس صاحبه

الاستاذ / مرفوع دعمه

الاستاذ / فاقد شغله

الاستاذ / قاطع خلفه

و برئاسة السيد الدكتور / طالع عين امه

و بعد مباحثات و انشقاقات اتفقت اللجنة على الا تتفق ،

فقد قال الاستاذ مقتول ابنه / ان البرادعى خاين و عميل

و قال الاستاذ / محبوس صاحبه ان ٦ ابريل اتفقوا مع العسكر ضد الشرعية و عزل الرئيس المنتخب

و قال الاستاذ / مرفوع دعمه ان لازم نصبر على الرئيس و نديله فرصة ٤١ سنة يمكن يعمل حاجة

اما الاستاذ / فاقد شغله فعجبته قعدة القهوة و الشيشة و مقضيها و بيقول البلد زى الفل

و فى النهاية رأى الاستاذ قاطع خلفه / ان الامن و الامان اهم من رغيف العيش و ان لازم نستحمل علشان نحارب الارهاب و نشد الحزام شويتين تلاتة سبعة .

و قد تم تسجيل ما تم فى الاجتماع عن طريق السيد الدكتور / طالع عين امه للبدء فى تنفيذ ما لم يتم الاتفاق عليه فى موعد اقصاه ٨٦ سنة من حفر القناة الجديدة

و بعد وضع الخطوط العريضة للمرحلة القادمة فى طريقنا الى الهاوية دخل فجأة الى قاعة الاجتماعات الاستاذ / مقطوع نته ليطالب بمقاطعة شركات الاتصالات علشان النت غالى و الخدمة سيئة و مش عارف يا عينى يدخل يتوت و يفيس ، و قد اتفق الجميع على ضربه بالجزمة ، يا راجل الناس مش لاقية تاكل و انت بتتكلم فى قطع النت يا نطع منك له لها له .

عروستى

طبعا بعد وصول الدين الداخلى ل ٢ تريليون يعنى كارثة الفترة الجاية عندنا التزامات برضه و اقلها الدين الداخلى 

اولا يجب تدبير الدولار لنادي باريس من أجل تسديد أقساط فوائد الديون واخد بالك انت يا ابن عمى مش تسديد الديون ، دة تسديد اقساط فوائد الديون ، يعنى الفائدة بالقسط و احنا بنسدد اقساطها ، امال الديون كام يا عبفتاح ؟

ثانيا عندنا بقى في أكتوبر الجاى يجب توفير الدولار لتسديد القرض القطري ، طبعا قطر دولة راعية للارهاب فى كوكو واوا و بوس الواوا و مصر و لازم نرمى القرض فى وشها ، ع الجزمة

ثالثا و اقل مشكلة فيهم بقى محاولة سد العجز في الميزانية خلال الربع الأول من السنة المالية الجديدة

دة اذا دخلت علينا السنة الجديدة ، تفتكروا هاتدخل برجليها الشمين و لا اليمال .

اصل هانجيب دولار منين ، اصله مفيش ، ما عنديش ، هاتاكلوا مصر يعنى .

لو عرفت الحل اتصل على ٠٩٠٠٦٦٦٦٦٦ علشان السيسى يتسهوك عليهم براحته .

مبروك

مبروك عليكم يا مصريين الدين الداخلى وصل 2 تريليون جنيه لأول مرة فى التاريخ ،
عارفين ليه ؟
علشان من اهم انجازات السيسى انه بيسد عجز الموزنه من الاقتراض من الودايع بتاعتكم اللى فى البنوك ، بعد ما اتنهب رز الخليج ، و عملوا ترعة قالوا عليها قناة جديدة
و تبرعوا
تبرعوا علشان السيسى يصيف
تبرعوا علشان محلب يركب ميكروباص
تبرعوا
تبرع يا اخى
تبرعى يا اختر

الدوله بتشحت يا ولاد المبعزقة .

ابحث عن المستفيد

ابحث عن المستفيد ، اللى بيحصل فى سيناء لمصلحة مين ؟ يبقى نشوف تأثيره ، قفل المعبر و هدم الانفاق دة ضد حماس ، و تركيز الصحافة الاسرائيلية على ان حماس مسئولة يبقى اسرائيل حسب ما استشفيت بعد ما كانت بتضرب حماس عايزة مصر هى اللى تضربها ، اما بقى بعد اعتقال فتح ل١٠٠ عنصر من حماس فى الضفة يبقى الهدف ان غزة ترجع تانى لمحمود عباس ، نرجع للى بيحصل فى سيناء ، اولا حماس مصلحتها انها تحسن العلاقات مع مصر مش تشوهها لأنها محتاجة المعبر ، ثانيا حماس مضغوطة و عندها جبهتين ما اعتقدش بغباءهم يفتحوا جبهة تانية ، يبقى اللى بيحصل فى سيناء لو فكرنا فى الهدف منه هانلاقيه واضح و هو القضاء نهائيا على حماس و التمهيد لخريطة برنارد لويس و اعلان الدولة الفلسطينية فى غزة الكبرى ، يبقى مين المستفيد ؟
عروستى .

حداد

من جنازة اروح جنازة
و كله فيكى لابس سواد

و الدموع مغرقاكى
على اللى ماتوا م الولاد

ياللى كنتى فى يوم عظيمة
مصر يا ام البلاد

بقيتى فى بحر الدم عايشة
و كل ايامك حداد

الدبة وقعت فى البير

الدبة وقعت فى البير ، و البير اتسد مفيش مية

قالوا نجيب واحد خطير ، عبفتاح و الالاتية 

جه عبفتاح بالدبابة ، قال فيه ايه يا صاحب البيت ؟

رد و قاله خلاص هانموت م الجوع و كويس انك جيت

قال الكبير عبفتاح
الحل نهد البيت
وبعدها نردم البير
و تموت الدبة
و يموت الزرع فى الغيط
و نقلبها مراجيح و تيت تيت

و لسه ناس فى دماغها براح
بتقول الحل عبفتاح

حماس

اما ينزل على موقع مصراوى الموالى للسيسى النهاردة خبر داعش يهدد بإسقاط حماس فى غزة و دة اللينك
http://www.masrawy.com/mobile/News/News_PublicAffairs/details/2015/7/1/611629/%D8%AF%D8%A7%D8%B9%D8%B4-%D9%8A%D9%87%D8%AF%D8%AF-%D8%A8%D8%A5%D8%B3%D9%82%D8%A7%D8%B7-%D8%AD%D9%85%D8%A7%D8%B3-%D9%81%D9%8A-%D8%BA%D8%B2%D8%A9

و فى نفس الوقت على موقع اسرائيل ناشيونال نيوز ان السيسى بيطالب اسرائيل بمساعدة مصر بضربات جوية على غزة و دة اللينك
http://www.israelnationalnews.com/News/News.aspx/197596

يبقى اللى بيحصل فى سيناء هدفه ايه ؟ و متفق عليه بين مين و مين ؟
أظن واضحة جدا دلوقتى .

التفريعة

انا زهقت بصراحة من موضوع قناة السويس ، اللى طالعين بيها السما و حقهم الاعلام قال انها هاتبقى اعظم مشروع فى العالم فى القرن الواحد و عشرين ، و اللى بيقولوا عليها فنكوش و عندهم حق برضه اما تبقى تفريعة عمقها ٢٤ قدم و طولها ٣٢ كيلو متر من طول القناة اللى هو ١٩٣ كيلو متر حسب جريدة الاهرام الحكومية للتطبيل المحلى و الدولى ، يعنى لا قناة جديدة و لا حاجة و العمق دة مايعديش الا مراكب شراعية و يخوت بس مش سفن و بحفل افتتاح ٣٠ مليون دولار يعنى ربع مليار جنيه مصرى يبقى فعلا عندهم حق ، بس برضه لازم ندور على الاستفادة ، احنا بكل دة هانستفيد ايه ؟ اكيد طبعا فيه استفادة ، اى حد من الشعب عايز يصطاد سمك ، عنده المشروع العالمى الدولى لصيد السمك فى محور قناة السويس ، ياخد صنارته و يطلع على هناك و السمك هناك ايه بقى ما اقولكش ، عندك بورى و سيسى و مميش فى الشوى تحفة ، تحفة .

مين معاه الكبريت

حبسوا الناس كلها فى شقة ضيقة
و قفلوا الشقة بالأقفال
و فتحوا الانبوبة على الآخر
و ما حدش عارف مين هايولع الكبريت و امتى ، بس اكيد المحبوسين هايكسروا الشقة او حد هايولع الكبريت و تنفجر بالكل و فى الحالتين الشقة اتدمرت و كله هايقعد فى الشارع .

مساطيل

من كتر ما باسمع فى اعلام السيسى عن القنابل اللى بتنفجر فى الارهابيين قبل ما يعملوا بيها عمليات ارهابية ، و طبعا مع غباء امن الدولة افتكرت نكتة

واحد ارهابى مسطول ماسك قنبلة عمال يحدفها من ايده دى لإيده دى ، عدى عليه واحد تانى اما شافه كدة قاله يخرب بيتك مش خايف لتنفجر فيك ، رد عليه الارهابى و قاله ما تخافش لو انفجرت معايا غيرها .

ماهو لأمن الدولة عبط و إلا مأجرين ارهابيين هطل بصراحة

و اهو مسطيل بتخطط لمساطيل علشان مسطول يحكم دولة المساطيل .

انا او انا

مبارك قال انا او الفوضى
و مشى مبارك و بدأت الفوضى

طنطاوى قال انا او الثورة
و مشى طنطاوى بعد ما ضحك على الثورة و قتل و اعتقل اللى قاموا بيها

مرسي قال انا او الارهاب
و مشى مرسي و بدأ الارهاب

عدلى منصور قال انا او القانون
و مشى عدلى منصور بعد ما فصل قوانين تبيع البلد

السيسى انا او الشعب
دة بقى غيرهم
و اهو رايح فى داهية بالبلد و واخد الشعب معاه يسليه فى الطريق

حل المعادلة

اجابة السؤال دة فيها الحل للمعادلة اللى احنا فيها بالنسبة لاغتيال النائب العام
هل اغتيال النائب العام رسالة للسيسى و لا رسالة من السيسى لحد معين ؟
عامة فى الحالتين لو رسالة للسيسى يبقى فيه فعلا انقسام و مش هايخرج عن الجيش ،
و لو رسالة من السيسى يبقى برضه فيه انقسام و برضه مش هاتخرج عن الجيش
و فى الحالتين حل المعادلة .

فى المية العكرة

طبعا بعد اغتيال النائب العام و النقاشات حول اغتياله و كالعادة ابحث عن المستفيد ، عامة من اوجه الاستفادة من اغتيال النائب العام للنظام طبعا اصدار و تعديل القوانين ،
عن جريدة المصري اليوم و طبعا دى من الجرائد اللى بتطبل بالقوى :
كشفت مصادر قضائية، ملامح التغييرات المقُرر إجراؤها في قانون الإجراءات الجنائية، وسيتم عرضها على مجلس الوزراء، في اجتماعه الأربعاء، تمهيدا لرفعها للرئيس عبدالفتاح السيسي للتصديق عليها.

وقالت المصادر القضائية لـ«المصري اليوم»، إن أبرز 3 تعديلات سيتم إجراؤها،

أولا أن «سماع شهود النفي اختياري للقاضي وليس إجباريا» هههههههههه يعنى بمزاج القاضى يسمع شهود النفى ، يعنى لو شاهد كنت معاه فى مكان غير مكان الجريمة ، من حق القاضى ما يسمعوش علشان مجهز الحكم طبعا ، من الآخر مش عايزين شهود ، من فترة لغوا شهود الاثبات و دلوقتى النفى ،

ثانيا  أحكام أمن الدولة العليا تُصدق من رئيس الجمهورية للتنفيذ دون نقض زيها زى المحكمة العسكرية بالضبط و بدل ما يبقى عندنا محكمة عسكرية واحدة يبقى عندنا اتنين .

ثالثا أحكام النقض على الأحكام الجنائية سيكون على درجة واحدة فقط لا غير ، يا جماعة دة توفير فى الوقت ، مش القضاء مسيس ، عادى بقى مش هاتفرق ، دة احنا هانشوف ايام مهببة و ننيلة بنيلة

سيبكم بقى من ان النائب العام مسئول عن فض رابعة و النهضة و انه جت سيرته فى تسريبات الاخوان فى قضية مرسي و ان و ان و ان مش مشكلة ،
المهم عرفتم المستفيد من اغتياله و لا لسه ؟

الشهيد

احلى حاجة اما ضابط او مجند او قاضى يموت السيساوية يطالبوا بحق الشهيد

و اللى ماتوا من ٢٥ يناير لحد يونيو القوى الثورية بتطالب بحق الشهيد

و اللى ماتوا بعد ٣٠ يونيو فى رابعة و النهضة و غيره الاخوان بيطالبوا بحق الشهيد

رغم ان الضابط و المجند اللى استشهدوا زى ما بيقول السيساوية قتلوا اكتر الف شهيد
و القاضى اللى استشهد زى ما بيقول السيساوية ضيع حق اكتر من الف شهيد

و الاخوان فى سنة حكموها قتلوا اكتر من ٤٠٠ شهيد

نضمهم على شهداء يناير هانلاقى فى كل حتة شهيد

من الآخر البلد كلها بتدبح فى بعضها و اللى بيموت بيقولوا عليه شهيد

و شهيد بيقتل شهيد ، و شهيد بيدبح شهيد ، و شهيد ورا شهيد و كله بيقولوا عليه شهيد ، القاتل لو مات شهيد و المقتول ميت شهيد .