انقسام ام اختراق

لتبقى ارهابى لتبقى مطبلاتى و مبرراتى ،
اى حد ضد السيسى ارهابى ، بعد كل اللى حصل النهاردة من احكام اعدام و بعدها اغتيال ٣ وكلاء نياية ، الاكيد ان فيه انقسام فى البلد و ان الجهات السيادية بتحارب بعضها و تم اتخاذ القرار خلاص بجر البلد لحرب اهلية ، احكام الاعدام على ناس ماتت و معتقلة من سنين فى سجن الاحتلال الاسرائيلى و على قيادات الاخوان دى رسالة لافقاد النظام الحاكم شرعيته اللى اصلا ما اخدهاش قدام العالم كله ، و الحرب بين اذرع النظام العسكرى هاتبقى قريب فوق السطح و علنى ، و بالنسبة لموضوع قتل وكلاء النيابة اللى عايز يفهم ان اللى عمل كدة عارف ان هايتحكم بالاعدام على مرسي و مجهز لكدة يفهم و اللى مش عايز يفهم يا ريت يفهمنى ازاى خطة و اوتوبيس و خط سير و قضاة تتقتل خلال ساعة اتجهز كل دة بعد النطق بالحكم ، على كدة بقى اللى عملوا كدة و الا موالين للنظام او يبقى الجيش و الداخلية و القضاء مخترقين بطريقة بشعة و الاتنين كارثة ، اصل ما تقنعنيش يعنى ان خلال ساعة خطة زى دى و من الآخر دة آخر مسمار فى نعش القضاء ، و للمصريين بص العصفورة .

التقسيمة

هما حبوا بس يقسموا الشعب بدل مسلم و مسيحى علشان الفتنة الطائفية يتم القضاء عليها من جذورها ، فقسموا الشعب لمطبلاتى و ارهابى ، و طبعا التقسيم دة لازم يبقى بحكم محكمة و اكيد طبعا قضاء كمبورة مش هايتأخر
يعنى الاخوان بقت جماعة ارهابية محظورة
٦ ابريل جماعة ارهابية محظورة انشطتها و التحفظ على مقراتها
حظر انشطة روابط الالتراس فى مصر و اعتبارها جماعات ارهابية

يعنى من الآخر تختار و يمكن يكتبوها فى البطاقة كمان تبقى مطبلاتى و لا ارهابى ، تبقى بكرى و لا ارهابى ، تبقى عكاشة و لا ارهابى ، تبقى البغل احمد موسي و لا ارهابى ، طبعا الاعلام و القضاء و جيش و داخلية و ممثلين و مطربين و راقصات دول اللى مش ارهابيين و باقى الشعب بقى ارهابى بحكم محكمة  ، ناقص بس يحطوا اسلاك شايكة على حدود مصر داير مايدور و يكتبوا عليها سجن الارهاب العمومى و بكدة يبقى خلصنا العالم من الشعب الارهابى المصرى الشقيق .

الالتراس جماعة ارهابية

النهاردة الظلهر كدة انه يوم الاحكام الغريبة
محكمة الامور المستعجلة تقضى باعتبار الالتراس جماعات ارهابية يطيق عليهم قانون الارهاب ،
فعلا القضاء اللى سجن سيدنا يوسف فى قضية آداب ، يحكم على مشجع كورة بالارهاب .
قضاءنا طاهر
و هايفضل طول عمره طاهر

قضاء غريب

يعنى هجوم الاعلام على السيسى و وصف الصحف الاسبانية له بأنه ديكتاتور يبحث عن شرعية و اعترافات البرادعى و تصريحات وزراءه الغريبة لاستفزاز الشعب بكل الطرق الممكنة ، و الاكبر من كدة اما يبقى بعد ظهور تسريبات سامى عنان بيومين التى تبرئ مرسى و الاخوان من اقتحام السجون و اذاعة هذه التسريبات على قناة مكملين يتم الحكم بإحالة اوراق بديع و مرسي و الشاطر و ابنه معاه و النكتة بقى كمان القرضاوى و قيادات من حماس من ضمنهم الاسير حسن سلامة المعتقل فى سجون اسرائيل من سنة ١٩٩٦ و حسام الصانع الشهيد من ٢٠٠٨ و تيسير ابو سنيمة الشهيد من ٢٠٠٩  للمفتى فى الهروب و اقتحام السجون اللى حصل سنة ٢٠١١ ، يبقى كدة بيتم نسف اى شرعية لأحكام القضاء دوليا و اى شرعية للسيسى و القضاء على اى مصداقية للسيسى دوليا ، و دفن القضاء المصرى فى ترب الغفير رسميا ،
المهم ان كدة فعلا بيتم التخلص من السيسى و طبعا لأننا متأكدين ان القضاء مسيس و الاعلام مسيس يبقى كدة السيسى اوت و جارى تحضير البديل .

لماذا ضرب حفتر السفينة التركية؟

لو فرضنا ان حفتر يريد السيطرة على مدينة درنة، و طبعا لن يسمح بدخول أي شحنة مساعدات إليها. و دة هو سبب استهداف أيّة سفينة تقترب من شواطئ درنة. لكن حفتر لم يتهم السفينة اليونانية بأنها تنقل أسلحة، قال كدة على السفينة التركية فقط وفي حين ان الطائرات الإماراتية والمصرية تضرب مواقع الثوار في ليبيا، فإن حفتر يريد إشغال الصحافة بخبر السفينة التركية، كي لا يتفرغوا للضربات الإماراتية المصرية. من ناحية ثانية، فإن ثوار ليبيا عقدوا آمالهم على تركيا والدعم التركي لهم، خصوصا مصراتة. لذلك فقد أراد حفتر تشويه الصورة التركية أمام المجتمع الدولى بأن تركيا تدعم الارهاب فى ليبيا و انه بمساعدة مصر و الامارات يقاومونه و برضه يفتح باب لتدخل تركيا علشان يجبر المجتمع الدولى للتدخل فى ليبيا زى ما طلب السيسى . تفكير شياطين .

الخيبة التقيلة

قبة سيدنا العسكرى


دول فوضوها

محلاها الطراطير يا عينى


و هما بيلبسوها



الخيبة التقيلة يا عمى

و القراطيس كتيرة

ماليين الشوارع يابا

و اتنيلت بنيلة

الخيبة التقيلة يا عمى

و القراطيس كتيرة


فوض فوض

علشان يركب

يديك مقلب

مقلب تاخده على طول

قال مش هاترشح

كدة و اترشح

اصل دة تعلب


اسعى اسعى اسعى اسعى

ليك زنزانة

ستة فى تسعة

اسعى اسعى اسعى اسعى

ناس كدة تركب

على ناس خسعة


الله الله الله الله

حكومة باللوز

فيها محلب اراجوز


الخيبة التقيلة يا عمى

و القراطيس كتيرة

ماليين الشوارع يابا

و اتنيلت بنيلة


يا ريس تعالى و قوللى

يا نور عينيا عاوز ايه ؟

هاتفضل تنهب ما تخلى ؟

امدح نبينا و صلى عليه

اللهم صلى عليه

هافضل كدة على طول على طول

لحد ما تروحوا فى داهية

لحد ما نروح فى داهية

و مش هاتلاقوا حتى الفول

بحكومة صايعة و ساهية

بحكومة صايعة و ساهية

يضيع يمينك و شمالك

و تلف حوالين نفسك اكتر

و الف حوالين نفسى اكتر

و انت مش واخد بالك

لابس طرطورك  متغندر

لابس طرطورى متعندر

و تفضل كدة على طول بتلف

و العسكر يا كل و يحف

و تقول يا ريتنى ما كنت طلعت

و تندم لأنك تهت و ضعت

دى خطة سهلة

اوى اوى

دى خطة هايلة

اوى اوى


مع السلامة مع السلامة

مع السلامة و بطل خيلة

مع السلامة و بطل خيلة


دستور للعيل

يا ابو العيال ميل

خدلك سبع خوابير

دى لجنة شخليلة

و فلول يا حليلة

دستور يا ناس بيطير

بيطير بيطير بيطير

بيطير بيطير بيطير


الليلة الليلة

اخوان فى الشارع

شوفوا بيعملوا ايه

قولوا هيه

هيه هيه هيه

عاملين ارهاب

و العدل غياب

و قنابل و انفجارات

قولوا هيه

هيه هيه هيه

و يقولوا شجيع

واخد تفويض

ربنا ياخدك يا بعيد

قولوا هيه

هيه هيه هيه

و التعلب فات

و مواطن مات

و عندهم و لا يسوى جنيه

هيه هيه هيه

هيه هيه هيه


يا قضاءنا الطاهر

رشوا الملح سبع مرات

بمقامه الطاهر

حط الثوار فى

المعتقلااااااااااااااااااااااااات

يا نائب يا خاص

بكرة هاتاخد علقة موت

طب فين العدل ؟

و لا فاكرها كدة هاتفوت ؟

يا قضاءنا الطاهر

رشوا الملح سبع مرات

و مقامه الطاهر

حط الثوار فى

المعتقلااااااااااااااااااااااااااااااااااات


مسا التماسى مسا التماسى

يا شعب على طول

مسطول و ناسى


يا غزال يا غزال

حبسوا العيال

و ركبوا الثورة

كدة فى الحال


مش هانيجى بالقوة

يابنى انت و هو

و لا عنده مروة

و عاملى فتوة


وسع وسع وسع وسع

كل شوية بمبة تطرقع

وسع وسع وسع وسع

بس خلاص الشعب دة فرقع


و بياخدوا براءه هناك اهم

ليه يا قاضى طلعتهم

براءات براءات براءات

براءات براءات براءات


ايامكوا الجاية جلجلة

جلجلة جلجلة

و البلد هاتولع يا ولا

يا ولا يا ولا

شفت فى منام

لابس اوميجا

ساعة اوبهة

و قالتلى اترشح

فى الرئاسة و هفها

و صحيت م النوم

و خدت نفسى و دنى جاى

حى


يا ولاد الحلال

بلدنا تاهت مننا

و اتقتلوا العيال

و موتنا من الجوع كلنا

اعترافات البرادعى

سنتين و البرادعى مختفى من ساعة ما ساب البلد و ما اتكلمش و ناس كتير قالتله دافع عن نفسك و برضه ما اتكلمش لحد من كام يوم فى مؤتمر تابع للاتحاد الاوروبى و البرادعى اخيرا نطق و قال الحقيقة , طبعا الاخوان ما صدقوا و برضه سابوا جزء و اخدوا جزء , عامة اعتراف البرادعى كان ضربة للسيسى رغم غرابة ميعاد الاعتراف دة , يعنى نشوف كدة الاحداث حوالينا 

سفر السيسى لأسبانيا و الصحف الاسبانية فى مانشيتاتها تكتب الديكتاتور يبحث عن الشرعية فى اسبانيا و طبعا من اهم الصحف اللى كتبت كدة صحيفة El Pais الاسبانية 

نشر صحف امريكية زى نيويورك تايمز و واشنطن بوست تأكيدات من معامل صوتيات اوروبية تثبت صحة تسريبات السيسى و انها حقيقية و دة يؤكد ان اللى بيخرج التسريبات دى المخابرات العامة 

العلاقة التى تسوء يوما بعد يوم بين السيسى و الملك سلمان ملك السعودية 

موقف السعودية و مصر من عاصفة الحزم 

بدء مهاجمة الاعلام الموالى للسيسى ليه و لحكومته و بدء الضرب تحت الحزام حتى ان عمرو اديب قال للسيسى يرد على تصريحات البرادعى و الا كدة بيثبت صحتها 

كل دة غريب جدا و بيدل ان السيسى ايامه فى الرئاسة بقت معدودة و انه بقى عبء اكتر منه بقى الرجل الذى يحافظ على مصالح اسرائيل لأن طبعا باعتراف البرادعى و فى نفس الوقت صحة التسريبات اوباما تعرض لانتقادات واسعة لمساندته انقلاب عسكرى 

 المهم ان البرادعى فضح الاتفاق الحقيقي بين قادة المعارضة وقادة الجيش لأزاحة مرسى، والذي كان ينص على انتخابات رئاسية مبكرة، وخروج آمن وكريم للدكتور مرسي، ونظام سياسي يضم الجميع، بمن فيهم الإخوان والإسلاميون، ولجنة مصالحة وطنية شاملة، وحل سلمي للاعتصامات.. ولكن في الحقيقة استخدم العسكر الجميع لقيادة الانقلاب، وتم تجاهل كل هذه الاتفاقيات، واللجوء إلى العنف، والذي رفضه البرادعى وقرر المغادرة

بس السؤال ليه دلوقتى , يا ترى صدفة و لا اتفاق  , البرادعى رغم كل ما يقال عنه لا أشك ى وطنيته , و اعتقد الراجل اتعرض لكتير اوى من حملات التشويه و المضايقات و حاول كتير انه يحط الشباب على الطريق الصحيح , ممكن يكون تم الاتصال بيه و تم وعده بأن التغيير اللى بيدور عليه قادم و لازم يبقى ليه دور , بس كدة يا بوب هاتبقى بتتعرض لنفس الخدعة لتالت مرة و كفاية , و ممكن يكون علاقاته بالدول الاوروبية اديته الجرين لايت انه يفضح الدنيا و انه فى امان و ممكن تكون صدفة زى ما 25 يناير كانت صدفة و ماحدش اتوقع الاعداد اللى نزلت , 

عامة الاخوان هاجموا البرادعى على سكوته و طبعا كالعادة بدأوا يسوقوا الموضوع لمصلحتهم , بس اللى انا متأكد منه ان على قد العسكر ما خان الاتفاق , قيادات الاخوان كانت متفقة على نفس الاتفاق و موافقة عليه و موافقة ان مرسى يخرج خروج كريم و يشتركوا فى الحياة السياسية و ممكن الرئيس اللى بعده يكون منهم بانتخابات رئاسية مبكرة , يعنى الاخوان كانوا جزء لا يتجزأ من الاتفاق , يا ريت بلاش متاجرة على الثورة و متاجرة بالوطنية لأن الاخوان آخر ناس يتكلموا عن الوطنية لأن غباءهم و سياسة الاقصاء اللى اتبعوها سبب اللى احنا فيه دلوقتى .ربما تكون المصادفة، وربما يكون اتفاقا.

اللى يهمنى اكتر دلوقتى اعلام النظام و اعلام الاخوان ، اعلام النظام رجع يهاجم البرادعى و يشتمه و الخاين و العميل و انا اعذره فى دى ، طبعا اعتراف البرادعى هايبقى مصدق اكتر من ٥٠ سنة اعلام الطبالين يقعد يبرر فيهم ، يعنى ماحدش هايكدب البرادعى و طبعا لأنه قال الحقيقة ، لم يجرؤ الرئيس او الحكومة انهم يكدبوه ، بس الغريب بقى موقف الاخوان من الهجوم على البرادعى ، بجد موقف غريب ، بدل ما يتم استغلال كلامه دوليا بيهاجموا سكوته ، يا ترى اتفاق العسكر و الاخوان فى رد فعلهم فى حاجات كتير اوى زى مهاجمة القوى الثورية و كراهية البرادعى و التمسك بالكرسى و الاهم من كل دة سياسة الاقصاء للمعارضين ، و التركيز هلى شغل الرأى العام بسياسة بص العصفورة ، دة كله بيثبت انهم جانب واحد و ان فيه اتفاقات بينهم . كله هايبان 

عامة اخر حاجة ان اعتراف البرادعي بأن القوتين الرئيستين في مصر، هما الإخوان والجيش دة كلنا عارفينه و دى كارثة الثورة ان القوى المدنية لا وجود لها , و اللى اعرفه ان دايما البرادعى بيظهر اما تبقى الصورة ضبابية بيحط النقط على الحروف مش اكتر , و طالما ظهر نبقى احنا فى نهاية مرحلة ، بس يا ترى القادم ايه , الله اعلم 

انجازات انجازات

انجازات 

انجازات 

يوم تهزك 

انجازات 

و يوم توزك 

انجازات 

عندنا اكبر 

انجازات 

انجازات انجازات

و كل يوم

انجازات

و حكومة محلب

انجازات

عمالة تحقق

انجازات

و عندنا اشرار

انجازات

دة احنا الكفار

فى الانجازات

انجازات انجازات

حفرنا ع الناشف

انجازات

و لا حدش شايف

انجازات

عندنا ارهاب

انجازات

و العيشة هباب

انجازات

شعبنا دة جعان

انجازات

لسه فى توهان

الانجازات

انجازات انجازات

انجاز الكفتة

انجازات

و المليون وحدة

انجازات

عيشوا فى اوهام

الانجازات

و اسمعوا فى كلام

عن انجازات

انجازات

انجازات

انجازنا فى سينا

انجازات

داخلية متينة

انجازات

اعلامنا يطبل

انجازات

فضائية تهبل

انجازات

انجازات

انجازات

عندنا اكبر انجازات

ريسنا عبيط

انجازات

شعبنا بيظيط

انجازات

و اهو ناس بتموت

انجازات

و اهو كدب يفوت

انجازات

و عاصمة جديدة

انجازات

احلام سعيدة

بالانجازات

انجازات

انجازات

و حمار فى مطار

انجازات

هاتسرح بخضار

انجازات

عندنا ارهاب

انجازات

و قضاءنا كلاب

انجازات

و سواد و هباب

انجازات

و سجون و عذاب

انجازات

انجازات

انجازات

عندنا اكبر انجازات

طبعا كلنا سايبين الانجازات و بنتكلم فى السلبيات , بس لازم احقاقا للحق زى ما بنقول السلبيات نقول الانجازات اللى كلنا شايفينها بعنينا و لامسينها بايدينا

انجازات الرئيس نحنوح المسهوك حتى الآن للرد على الحاقدين

 سرقة 41 مليار من ميزانية الدولة منعا للتضخم و هذا فى صالح الأقتصاد . 

 الاعتراف علنا في مقابلة في التلفزيون الفرنسي أن تهجير أهالي سيناء وافراغ الحدود المصرية الإسرائيلية دى لمصلحة إسرائيل وامن إسرائيل دول ولاد عمنا و ديننا أمرنا بصلة الرحم مع ولاد العم

براءة مبارك و ولاده و رجالته و نسايبه و حبايبه و اللى جابوه و جابوا امه دة برضه صاحب الضربة الجوية المهلبية الحلزونية فى حرب العباسية ضد الاحوال المنسية .

إعفاء نجيب ساويرس من 16 مليار دولار الضرائب المستحقة عليه لمصر طبعا لأننا اكتشفنا انه  مسكين وغلبان و مضيع فلوسه ع النسوان

الحفر ع الناشف و فى السر من غير ما يبقى حد شايف و ضربت مية و زروطت و دة لأثبات ضرر الحفر ع الناشف فى القضاء على الحتة الطرية  
 

ذيادة مرتبات الجيش والشرطة والقضاة علشان يشتغلوا بذمة و ضمير , لسه باقى الشعب برة السجون و المقابر و لازم شغل جامد علشان نخلص منه ، لأن المشكلة فى الشعب

رفع اسعار الكهرباء و المية و البنزين و السولار و الغاز الطبيعى و الأنابيب و جميع المنتجات الغذائية و الحلزونية و المهلبية و البالوظة و طوظة على طوظة كله هاياكل البالوظة 
  انقطاع الكهرباء علشان الشعب يولع الشموع و يعيش الجو الرومانسى اللى اتحرم منه

قانون تظاهر يحبسك و يحبس اللى جابوك و اللى يتشددلك لو فتحت بقك و قلت آه و دة طبعا علشان سلامتك من الآه يا كبد أمك

 ارتفاع إجمالي الدين العام المحلي ليصل إلى 1.817 تريليون علشان برضه نبقى مديونين و يا بخت مين بات مديون و لا باتش داين 

ارتفاع سعر الدولار ل8 جنيه علشان الناس تهتم بالجنيه و اما يغيروا دولارات يبقى معاهم فلوس كتير 

  غلاء السكن بعد ان اصبح السكن لمحدودي الدخل بنصف مليون جنيه و دة طبعا علشان محدودى الدخل مناعتهم تزيد من السكن فى الشارع و التعرض للبرد 

استكمال بناء سد النهضة و عرض لتمويله علشان النيل نجاشى اصلا مش تبعنا   

تهجير أهالى رفح و الشريط الحدودى علشان العقارب كتير هناك بنحميهم من قرص العقارب و التعالب ، يا لهوى ، الله غالب

ذيادة ميزانية الجيش مع اعفاء نوادي و مستشفيات الجيش من الضرائب 

ذيادة المعاشات العسكرية 15 % باثر رجعي

دة طبعا غير قتل أكثر من ٢٠ الف مصرى لحل مشكلة الاسكان و البطالة

  طبعا دة غير المشاريع العظيمة التى انجزتها حكومة الريس نحنوح فى الأحلام  ترشيد الكهرباء باستخدام لمبات موفرة  علاج فيروس سى و عمله كفتة بالأريال بتاع عبعاطى العبيط  اعطاء ٥٠ عربية خضار لحاملى الماجستير و الدكتوراه للقضاء على البطالة 

مليون وحدة سكنية بتطل على النيل فى 6 اكتوبر من ناحية محور صلاح سالم و انت داخل على البحر الأحمر 
   مش عايز حد يتكلم , انجازات دى و لا مش انجازات يا متعلمين  و طوظة على طوظة , شعب اتعود على البالوظة 

الخلاصة

الخلاصة كدة من الآخر الجاى مترتب ، ضغط ضغط علشان الناس تنفجر ، هايقولوا مفيش احزاب ، و هايقولوا مفيش برلمان ، و هايقولوا مفيش زيادات الا فى الاسعار ، و هايقولوا كله فنكوش ، و الاعلام هايبدأ يشتغل على انجازات وهمية لحكومة العاهات ، كان الأول بيكدب و يوعد ، دلوقتى هاتقلب بجاحة و هايجيب من الآخر و اعلى ما فى خيلكم اركبوه ، و الضغط بيولد الانفجار و الانفجار هايشيل السيسى و يجيب يا ترى بقى شفيق و لا جمتل و لا صدقى صبحى و لا مين و شالوا الدو حطوا شاهين .

حبيبى أسيسى

و هيا عاملة ايه دلوقت ؟ و مين هون عليها الوقت ؟
طبعا بعد ما نيويورك تاميز طلعت و قالت ان التسريبات بصوتك و حقيقية و مفيش كلب طلع قال اى حاجة يبقى ايه ؟ ايه ؟ اللينك اهو
http://mobile.nytimes.com/2015/05/13/world/middleeast/leaks-gain-credibility-and-potential-to-embarrass-egypts-leaders.html
ماشى
طيب لما البرادعى اخيرا يظهر و يقلبها على الكل ، ايه

طيب السعودية اللى قلبت عليك و اعلام الامارات اللى بدأ يهاجمك ، ايه شايف ايه يا معلم ؟ زى ما انا قلت من سنة كارت بيتحرق مش اكتر ، حضروا نفسكم لمرحلة ما بعد السيسى .

اتعلمتوا و لا لسه

ايه يا ثوار مصر ، اتعلمتوا و لا لسه ، اتعلمتوا ان السياسة تبوظ اى ثورة اتعلمتوا ان مفيش ثورة بتقول نعم و لا على اعلان دستورى اتعلمتوا ان مفيش انتخابات رئاسية تحت اشراف اللى قامت عليه الثورة اتعلمتوا ان المشكلة الدستور مش الرئاسة ايه ؟ يسقط حسنى مبارك و مبارك اتنحى يسقط حكم العسكر و طنطاوى و عنان مشيوا يسقط حكم المرشد و مرسي اتعزل و يسقط حكم العسكر تانى

و انا باقولكم السيسى هايمشى و السنة دى فى ٢٠١٥ ، انتم بقى عملتم ايه ، اقولكم انا

اول مرة اتضحك عليكم لما قلتم الجيش حمى الثورة و الشعب و الجيش ايد واحدة ، الشعب و الجيش ايد واحدة .

تانى مرة لما قسموكم باعلان دستورى نعم و لا ، و انتم طبعا ما تعرفوش انكم مش قد الاسلام السياسى ، و ان التجارة بالدين فى بلد زى مصر رايجة و مش هاتقدروا تقفوا قدامها ، بس هما كانوا عارفين و لبستم انتم فى الحيط

تالت مرة اما قسموكم بانتخابات برلمانية و بقى برلمان اجدع من موجة كوميدى و اما آن الآوان حلوه ، ما هو بالاعلان الدستورى باطل

رابع مرة اما عصرتم لمون و انتم عارفين و متأكدين ان الرئيس بدون اى صلاحيات و ان الانتخابات ان ماكانش بعزل برضه بالقضاء مشكوك فيها بس عصرتم لمون و بينا و بين دة دم و اللى قتل مش زى اللى خان ، فاكرين ؟ اكيد فاكرين

خامس مرة بلعبة تمرد اللى لبستكم فى الحيط و شربتوها صح الصح و دخلتوا الفلول اللى قامت اصلا عليهم الثورة فى وسطكم

سادس مرة اما صدقتم ان السيسى شال مرسي علشان البلد و انه مش هايترشح للرئاسة ، اصله وطنى

سابع مرة انكم سايبين الاخوان بيتكلموا بإسم ثورة يناير. ، فاكرين تصريحات بديع على صفحته ايام الثورة اما قال الاخوان مالهومش علاقة باللى بيحصل فى الميدان ، فاكرين الاتحادية و المقطم ، فاكرين نعم تدخل الجنة و لا تدخل النار

ما تزعلوش منى الموقف ايه دلوقتى الاخوان قاموا بثورة يناير اللى دبحوها ، و العسكر عمل انقلاب على انتخابات شرعية نزيهة فاز بيها محمد مرسي و الاخوان بيقاموا لترسيخ مبادئ ثورة يناير اللى قاموا بيها ، دة قصاد العالم كله 

انتم بقى فين ؟ مالكوش وجود ، ايه ؟ اتعلمتم و لا لسه ؟  بتوع حمدين عرفتم ان الثورة ما بتدخلش انتخابات و لا لسه ؟ البرادعاوية عرفتم اننا مش فى يوتوبيا و ان الشعارات مالهاش لازمة و لا لسه ؟ الاشتراكيين فهمتم ان مفيش حاجة اسمها اللى خان احسن من اللى قتل و لا لسه ؟ ٦ ابريل عرفتم ان ماينفعش اتحالف مع عدو ضد عدو تانى و ان عدو عدوى مش صديقى و لا لسه ؟ فهمتم ان انلعب بيكم بدل المرة ٧ مرات و لسه بيتلعب بيكم و لا لسه ؟ عرفتم بعد سقوط السيسى هاتعملوا ايه و لا هاتسيبوا الخناقة بين عسكر و فلول و اخوان و انتم تتفرجوا ؟ اصل بقى مفهوم الرئيس المدنى عند الشعب مشير استقال او اخوان اتعزل ظلم ، انتم فين ؟ انعلمتم و لا هاتفضلوا تلفوا فى الساقية تتفرجوا و كل واحد يضحك عليكم شوية ؟ ايه ؟ ما اتعلمتوش حاجة من كل دة ؟ دة بيقولوا لا يلدغ المؤمن من جحر مرتين و انتم ما شاء الله اتلدغتم ٧ مرات ، يارب تكونوا اتعلمتم و تعملوا حسابكم على اللدغة الجاية .

ازهى عصور الديموكتاتورية

لقد جئت بالصندوق ، ما جيتش بتاكسى ، ما جيتش بمترو الانفاق ، جئت بالصندوق ، فى انتخابات شهد لها العالم أجمع ، أينعم اللجان كانت فاضية ، بس انتخبونى ، مين ، الله اعلم ، لقد جئت بالصندوق و هذا ان دل فيدل دلالة على اننا فى ازهى عصور الديموقراطية ، معايا سلطة تنفيذية ، معايا سلطة تشريعية ، مقضيها قوانين و هاخرب بيت البنى أدمين ، و لكن هذا لا يمنع اننا فى ازهى عصور الديموقراطية ، عايزين ايه يعنى ، ع الناشف و حفرت ، وحدات سكنية و قلت هاعمل ، اينعم ما عملتش بس مش مشكلة المهم اديتكم أمل ، عالجت الايدز بالكفتة ، حد عملها قبل كدة ، بذمتكم حد عملها ، قلت هاعمل عاصمة جديدة ، اينعم ميزانية البلد ما تسمحش بس قلت و قعد ارغى فيها ساعتين و لأ تسلموها بعد ٥ سنين و قعدت أفاصل مع الناس ، اينعم وهم بس ماشى نحلم سوا ، اينعم مفيش حاجة هاتتحقق بس اوكى مايضرش ، دى ديموقراطية ، من حقك تعترض ، ايوة من حقك و من حقك تنزل مظاهرة ايوة و انا من حقى اقتلك و اعتقلك و اطلع عين اللى جابوك ، هاتلبس الطرطور و تمشى تهز ديلك و اتت ساكت تبقى صاحبى و حبيبى و كفاءة و بتحب البلد ، هاتعترض و تقول عملت ايه و ما عملتش ايه ، تبقى اخوانى و ارهابى و غير وطنى و هاسلط عليك كلاب الداخلية يعملوك كفتة ، زى ما من حقى اكدب عليك و اوعدك بوعود مش هانفذها ، من حقك تصدقنى بدون مناقشة ، تقول لأ هاديك بالجزمة قصدى بالبيادة ، و لازم تعرف يا مواطن ان نحن فى ازهى عصور الديموقراطية ، و الف باء ديموقراطية رفع الدعم ، علشان الفقير يحس بالفقير اللى زيه و الاتنين يموتوا من الجوع ايوة يا مواطن انا باخلصك من الدنيا و بلاويها و اللى بيجرى فيها ، اما انا و جيش و داخليتى و قضائى نحيا فى ازهى عصور الديموقراطية و أحلى من الشرف مفيش
انتباه يا دانس
يا آه يا آه

الاحلام و الحقوق

كل واحد فينا عنده احلام ، دايما بنقول الحلم بيتولد مع الشخص ، كله بيحلم و كله نفسه يحقق حلمه ، ما بيفرقش غنى او فقير ، كل واحد بيحلم بحاجة ناقصاه نفسه فيها ، الطالب بيحلم يدخل الجامعة كلية كويسة ، و اللى بيدخل الجامعة بيحلم يخلص و يلاقى وظيفة محترمة ، و اللى بيحلم بزوجة و شقة كويسة و اولاد ، الفلاح الاجير اللى بيحلم بأرض تبقى بتاعته ، اللى بيحلم يعالج ابنه ، اللى بتحلم بفارس الاحلام ، اللى بيحلم يتعالج ، و اللى بيحلم بدخل ثابت يستره ، و اللى بيحلم يجوز بناته و اولاده ، و اللى بيحلم بعربية و اللى بيحلم يلاقى لقمة عيش شريفة كل دى احلام بسيطة مش كبيرة ، بنتولد و الاحلام بتبقى سوبر مان و سبايدر مان و اما ندخل المدرسة ، ابقى ضابط و ابقى طيار و ابقى دكتور ، و بعدها احلم بأنى ادخل ثانوى عام ، و بعدها احلم بالجامعة ، و بعدها بيبقى الحلم مجرد وظيفة علشان اكون نفسى ، و ممكن مجرد رغيف العيش ، مين السبب فى ان الاحلام كل يوم تصغر و تصغر و تصغر لحد ما قربت تختفى ، تعرفوا اللى بيحلم بالحرية و يترمى فى المعتقل ، و يفضل حلمه يصغر بين اربع حيطان ، لحد ما يبقى حلمه مجرد يشوف اهله او يقعد على القهوة ، الحلم بقى صغير اوى بتفضل الاحلام تصغر و تتقتل جوانا حلم ورا حلم ورا حلم ، بس اللى حلم بالحرية كان عارف ان كل اللى فات دة مش احلام ، دى حقوق ، دى حقوقك على الدولة ، من حقك تتعلم تعليم محترم ، من حقك السكن و من حقك تلاقى وظيفة و من حقك تركب مواصلات ادمية ، و انت يا فلاح من حقك حتة ارض تزرعها ، و انت من حقك حريتك و انت من حقك تلاقى مستشفيات ادمية تتعالج فيها ، من حقك تشتغل و تتجوز و تخلف و تجوز ولادك ،  من حقك من حقك من حقك من حقك حقك على البلد بقى حلم بتجرى وراه طول عمرك ، حقوقك بقت احلامك اللى عايز تحققها ، حقوقك بقت حاجة فى المنام مش فى الواقع ، حقوقك اللى و انت مش حاسس عمالة تصغر تصغر تصغر لحد ما هاتختفى . مين خلى الحقوق احلام ؟

انا و اخويا على ابن عمى

انا و اخويا على ابن عمى و انا و ابن عمى ع الغريب المثل دة مثل عربى ، بس طبعا لاننا فرتكنا المنطق و فشخنا المعقولية و اللامعقولية ، بقينا فى الدول العربية انا و ابن عمى على اخويا و انا و الغريب على ابن عمى و اخويا و جوز خالتى و العيلة كلها ، يعنى السعودية تضرب اليمن و تساند الجيش الحر فى سوريا و مع حفتر فى ليبيا و تعمل تحالف من ٩ دول عربية منها مصر و الامارات و قطر و الاردن و بمساندة امريكية ، و بقى المثل انا و ولاد عمى و الغريب على ابن عمى الغلبان مصر بقى لأنه شعب متنيل بنيلة و على طول ماشى بالعكس و خلف خليفة خلف الله خلف خلاف المحامى ، دمرت ام المثل ، بقى انا و اخويا و ابن عمى و الغريب على باقى اخواتى ، يعنى السعودية و الامارات و امريكا و اسرائيل بتساند المسهوك فى قتل الشعب و مين اخويا و مين ابن عمى و مين الغريب ماحدش عارف ، و حتى مين انا ؟ انت تعرفنى ؟ لأ دة اروح فيكم فى داهية يلا اهى دنيا و منه له جاى رايح منه له .

بلد الموز

بلد الموز
يحكمها ابو بوز
يتسهوك يطلع يتنحنح
و يقول مشاريع
كدب و تقريع
و يسبل عينيه و يتنح
بارد و جرئ
و الشعب غريق
و اهى دقنى اهى كدة لو يفلح
اصلها جواميس
و جعيص و معيص
ع الفضائيات توك شو بيشرشح
و الناس بتموت
اجدع شلوت
و الداخلية اهى بتتسلح
خطته شخابيط
و زعيط و معيط
رقص و زغاريط
و قضاء شفلح
و معاه قطعان
سلسلة و لبان
دبح يا عبيط
فينا و دبح
اصلنا مقاطيع
هات الجرابيع
اللى يشتم فينا و يأبح
و شهيدنا اهو مات
و التعلب فات
و اللى هاينطق
خده ع المدبح
طراطير طراطير
و وزير و غفير
و اهو كله على بعضه بيتجرح

كفاية يا مصر

كفاية يا مصر يا بلد الفول كفاية يا كل دماغ مقفول كفاية يا مصر العيشة مرار كفاية يا بلد الاسعار نار كفاية يا مصر المعتقلات كفاية خلاص ما شبابك مات كفاية وعود و عهود احلام كفاية يا عايش فى الاوهام كفاية مش لاقيين انابيب كفاية يا شعب فى بلده غريب كفاية يا بلد البراءات للحرامية و للبهوات كفاية جريح و كفاية شهيد بس القضاء قال كلب و مات كفاية يا مصر يا ارخص شعب كفايةخلاص ما شبعناش غلب كفاية يا مصر أهو كله عبيد كفاية و مش عايز تجديد كفاية خيانة كفاية نتانة كفاية لثوار بقوا مطاريد كفايةيا بلد  شبعت خوف كفاية دة الاعمى هايشوف سرقة علنى و شعب يغنى و طبل و زمر مئات و ألوف كفاية يا بلد الحلوف كفاية يا مصر كفاية يا بلدى كله سراب رفعوا الدعم و عيشة هباب كفاية على حاكم كداب و لا قضاء فيه العدل غياب كفاية يا مصر يا بلد الذل و الموت طايح كدة فى الكل عبارة ، قطر ، حادثة اوتوبيس لو حتى جندى ورا المتاريس هاتقول لأ هاتبقى عريس يتسلى عليك الاباليس كفاية يا مصر يا بلد الكوسة كفاية يا للى كنتى المحروسة كفاية ما بقيتى الموكوسة و بقيتى ماشية كدة معكوسة كفاية كله فى التوهان و الاعلام عالم حيوان الحرباية معاها حمار بيقولوا فى الحاكم اشعار و كله بتمنه و عبى كروش و الشعب غلبان ماعهوش كفاية إتأجرتى مفروش بشعب جبان صدق غدار كفاية يا مصر كفاية الرقاصة مثالية و كبارك شلة حرامية و فى سجونك اهو ناس منسية و فى الاهرام افلام اباحية قطعوا فيكى النور و المية و فضايحك بقت عالمية كفاية يا مصر غلوا الجاز و التجويع فيكى انجاز و السرطان و فيروس سي و الشعب عايش كدة اعجاز كفاية يا مصر داسوا عليكى و على ولادك كسروا عنيكى كفاية خلاص ما بقيتش لاقيكى رمونى فى الشارع و عاشوا فى قصر كفاية يا مصر كفاية خلاص ما بقيتى تكية بينهبوكى مهلباتية و كله فى حراسة الداخلية و قضاء شامخ و بلطجية كفاية يا مصر كفاية يا مصر

طبيعة شعب

بعد ظهور جمال مبارك و اسرته بكل بجاحة فى الاهرامات ، بجد حاجة تحرق الدم بس اقولكم حاجة

احنا شعب اللى اختشوا ماتوا و اللى قلعوا برقع الحياء عاشوا

احنا شعب تمشى جنب الحيط ، بس نسيوا يقولوا ان حتى الحيط ممكن تقع عليك تجيب أجلك

احنا شعب يا بخت مين بات مظلوم و لا باتش ظالم ، بنفرح اننا نبات مظلومين اصل الظلم وحش

احنا شعب ان كانلك عند الكلب حاجة قوله يا سيدى ، و اهو الكلب ركب و دلدل رجليه و مفيش مفيش هاتاكلوا مصر يعنى ، و الشعب الاهبل على امل الفتات بيقوله يا سيدى

احنا شعب العين بصيرة و الايد قصيرة ، احلى حجة نهرب بيها ، دة بدل ما نشوف حقوقنا و ناخدها

احنا شعب على قد لحافك مد رجليك ، ما عندناش امل اللحاف يكبر و الامور تتحسن

احنا شعب القناعة كنز لا يفنى ، بنموت م الجوع و السرطان و المواصلات و الرصاص و الاعتقال بس قناعة ، شعب قنوع بطبعه

احنا شعب القرش الابيض ينفع فى اليوم الاسود ، يعنى عارفين ان الاسود جاى جاى و مستنيينه و عاملين حسابنا ، دة بدل ما نحاربه

احنا شعب الجنيه غلب الكارنيه ، يعنى العلام مالوش لازمة ، المهم الجنيه ييجى ، ييجى ازاى مش مشكلة

احنا شعب اللى يتجوز امى اقوله يا عمى ، شعب مسالم او عبيط ، و الام كل جوازاتها زفت و العم بينهب فيها و احنا برضه بنقوله يا عمى

احنا شعب ساب فى القرآن فرعون و هامان و ظلمهم ، ساب القضاء الظالم اللى حكم على سيدنا يوسف ، ساب كلمة فأستخف قومه فأطاعوه ، و شبطان فى كلمة خير اجناد الأرض ، لحد ما خير اجناد الارض بقوا فوق الشعب و داسوا عليه

احنا شعب اللى تعرفه احسن من اللى ما تعرفوش ، تغيير ايه ، بنرضى بأى حد نعرفه حتى لو ظالم و نخاف من اللى ما نعرفوش حتى لو عادل

احنا شعب العيار اللى ما يصيبش يدوش ، و العيار عمره ما صاب و دايما بيدوش بس احنا راضيين بالدوشة و اتعودنا عليها

احنا شعب الحى ابقى من الميت ، و اللى مات بيتنسى و مش مهم مات ليه ، حتى لو مات علشانك و علشان حقك

و على رأى الخال الله يرحمه احنا ولاد الكلب الشعب .

طب ازاى

اما يطلع مسئول حكومى من وزارة التموين فى تصريح نارى حلزونى ماهونى لحل ازمة الغلاء و يقول ، بدل ما تاكلوا البامية ام ٢٠ جنيه ، كلوا كوسة ب ٢ جنيه و نص . اصلها ناقصك و ناقصة كوسة يا اخويا ، و بالبحث و التمحيص و التفعيص عن ثمن الكوسة التى تنصح بها الحكومة فى اسواق المخروبة ، المحروسة سابقا وجدنا ان كيلو الكوسة ب ٦ جنيه و كوسة يبقى عايزة قوطة و القوطة مجنونة و عرفنا ان كيلو طماطم ب ٧ جنيه و قول نجيب شوية بصل ب ٢ جنيه و قول ٣ جنيه سمنة على توابل على ملح و ٤ جنيه ارز يبقى وجبة من غير لحمة ٢٢ جنيه ، يعنى فى الشهر من غير لحمة لو كل يوم كوسة اللى هى ارخص حاجة ٦٦٠ جنيه ، دة غير كهربا و ميه و علاج و مصاريف مدارس و وجبتين كمان و العيش و العيشة و اللى عايشينها . غطينى و صوتى يامة ، قلبوها كوسة و طبخةها و بيأكلوهالنا يامة آه يا شعب البوظة ، ما شبعتش م البالوظة .

معقولة شفيق

السيى خلاص كارت اتحرق ، و حاليا بيتم التخلص منه ، مرسي باعتراف دول كتير الرئيس الشرعى و حصل عليه انقلاب ، طب نخلص من السيسى من غير ما يرجع مرسي ازاى ؟
سهلة تلميع نظام مبارك و يطلع مبارك على الفضائيات و الناس تقول و لا يوم من ايامك يا مبارك ، و بعدها صور جمال فى كل حتة و جمال راح و جمال جه ، و بعدها نجيب اخر واحد فى فى نظام مبارك و نلمعه و نحطه واجهة ، بس ازاى اذا كان مرسي الرئيس الشرعى ، سهلة نطلع مرسي من السجن و نثبت الانتهاكات فى الانتخابات و يبقى الرئيس الشرعى احمد شفيق و ساعتها نبقى ضربنا ٣ حمير بشلوت واحد .
نظرية برضه ، و ممكن تحصل .

ملخبطة بس مفهومة

حاجات كدة حصلت ورا بعضها ملخبطة بس اكيد مرتبطة ببعضها

عاصفة الحزم و توتر العلاقات بين السعودية و مصر بدء الضرب تحت الحزام من الاعلام الموالى للسيسى فوسفات فى النيل بص العصفورة غاز مسال فى مياة الشرب فى اسكندرية بص العصفورة الجيش و الداخلية فاقدين السيطرة فى سيناء انصار بيت المقدس اسقطوا طائرة بدون طيار قبائل الترابين و الحبيطات لموا نفسهم بالسلاح من سيناء و مدن القناة لحرب جماعة انصار بيت المقدس ، و اللى المفروض كل دول ليهم ثأر مع الجيش و الداخلية بدء ظهور كلمة ولاية الصعيد على مواقع داعش بعد اعلان ولاية سيناء موقع ديبكا الاسرائيلى بيقول ان الجيش المصرى هايعلن الحرب خلال ايام بمباركة اوباما على اقليم برقة فى ليبيا

و نراجع خريطة الشرق الاوسط الجديد .

اينما تكونوا يدرككم الموت

الحكومة بتاعتنا مش مقصرة بصراحة و شعارها اينما تكونوا يدرككم الموت تموت فى حادثة مترو و لا يولع بيك القطر حادثة على الطريق و انت رايح مدرستك و لا اوتوبيسك يتقلب و انت رايح شغلك رصاصة طايشة و لا من التعذيب فى الاقسام كوبرى يقع بيك و لا فى مزلقان تموت مشنوق و لا تموت فى حريقة تموت م الجوع و لا بخرطوش فى دماغك واحد ناصح يقول مش نازل من البيت ، عندهم برضه اختيارات من مية الحنفية تسمم فوسفات و لا مواد بترولية .

اختار يا كوتش

كلام من دماغ لاسعة

انا هاتكلم و خلاص ، ممكن مش بالترتيب بس هاقول اللى فى دماغى ، من فترة طويلة من قبل ترشح السيسى للرئاسة قلت لو اترشح فعلا يبقى كارت بيتحرق لمهمة معينة و سيتم الخلاص منه ، قلت ساعتها للناس اللى مش فاهمة ان نظام مبارك زى السرطان ، جزء منه الفلول و رجال الاعمال ، و جزء منه المجلس العسكرى ، و جزء منه الاخوان و سلفيين امن الدولة . السيسى جه للقضاء على الارهاب المحتمل ، الارهاب المحتمل اللى تم لصقه بالاخوان ، الاخوان اللى اجتمعوا مع عمر سليمان و وقفوا مع المجلس العسكرى ، الاخوان اللى محمد بديع قال على صفحته مالناش علاقة بثورة يناير ، الاخوان اللى خيرت الشاطر و حسن مالك و غيرهم خرجوا من السجن معاهم مليارات ، الاخوان اللى كانوا جماعة محظورة و رغم كدة ليهم مقرات و عملوا حزب سياسى تحت اعين الجيش و المجلس العسكرى ، و فى الآخر اتسلموا السلطة بعد خروج آمن للى عملوا مذابح ماسبيرو و محمد محمود و مسرح البالون و العباسية ، و كمان تم اعطاءهم قلادة النيل . المهم دلوقتى ان لو ماكانش فيه اخوان ما كانش هايبقى فيه ارهاب محتمل لازم رئيس عسكرى علشان ينقذ الشعب منه ، الاخوان كانت مهمتهم محددة حفظ التوازن ، فزاعة الناس تخاف منها ، مبارك قبل ما يتنحى قال لو اتنحيت هايحكمكم الاخوان ، و السيسى انقذ الشعب من الاخوان ، الفزاعة المعتادة برعاية امن الدولة ، طبعا اللى ماتوا فى رابعة و النهضة مالهومش ذنب فى كل دة ، دول شهداء تم التضحية بيهم ، و المجندين اللى بيتقتلوا برضه مالهومش ذنب تم التضحية بيهم لحفظ توازن القوى ، وجود دة يعتمد على وجود دة ، باب القوات المسلحة فى الدستور و تحصين وزير الدفاع ٨ سنين حط علامات استفهام ، ليه تحصين وزير الدفاع ،، و ليه مش الرئيس ، بس الموضوع سهل ، البلد كلها باقتصادها بثرواتها بمشاريعها بأراضيها تابعة للجيش ، مش تابعة للرئيس ، الجيش دولة فوق الدولة ، كل المشاريع العملاقة ، اللى بقت دلوقتى بقانون فى الجريدة الرسمية بأن الهيئة الهندسية للقوات المسلحة تاخد مشاريع بالأمر المباشر ، فيه قانون تانى صدر من شهور بأن السيسى يتنازل عن جزء من صلاحياته لوزير الدفاع و بعدها برضه السيسى يتنازل عن جزء من صلاحياته لرئيس الوزراء ، طيب اما يصدر قانون يقنن وجود الجيش فى الشارع لحماية المنشآت دة معناه ايه ؟ معنى وجود الجيش فى الشارع بقانون ان مفيش رئيس جمهورية و ان فيه ضبطية قضائية و احكام عرفية و قضاء عسكرى ، معناه ان الحاكم هو وزير الدفاع ، يعنى المستفيد الاكبر هو المجلس العسكرى حتى الآن ، طيب هل المجلس العسكرى ضد مبارك و فلوله ؟ لأ طبعا ، هما فى صراع و معاهم الاخوان زى ما بنقول مصارين البطن بتتخانق ، صراع التوازن فيه هو الاخوان ، اللى بيتم استغلالهم كورقة ضغط . معلش كلام مش مترتب ، بس هارجع و اقول ليه الاعلام قلب على السيسى او بيبدأ يبقى ضده ، دى ليها تفسير من اتنين ، انا هاحتفظ باختيارى لنفسى بس هاعرض الاختيارين ، التفسير الاول انهم بيمتصوا غضب الناس ، يعنى بيخرج الشحنة اللى جواك ، انت اتصدمت و اتضحك عليك بدل ما تعمل مشاكل نهاجم احنا الرئيس و انت بتتفرج تخرج شحنة الغضب اللى جواك . التفسير التانى ان خلاص السيسى كارت اتحرق و مهمته خلصت و بيتم التخلص منه ، الناس تعبت و بدأت تفهم و بدأت تتململ من اللى بيحصل ، و الحل لعبة تمرد جديدة و باى باى سيسى ، ممكن مختلفة بس هاتتعرف ،لو لاحظنا السيناريو دلوقتى اللى بنشوفه و طابقناه مع السيناريوهات اللى فاتت , طنطاوى ( عسكر )ظاهريا خلى مبارك يتنحى و بعدها سلمها لمرسى ( اخوان ) الشعب كان عايز رئيس مدنى و بعدها السيسى ( عسكر ) عزل مرسى و سلمها لعدلى منصور كمحلل علشان ترجعله بالانتخابات , بدايات مرسى كان الاعلام معاه و بعدها بدأت الكوارث فى البلد ازمات ورا ازمات ورا ازمات , دلوقتى السيسى الاعلام معظمه معاه بس بدأ الاعلام يحط السم فى العسل , يعنى بيضرب من تحت لتحت و برضه ازمات ورا ازمات ورا ازمات بس رد الفعل للشعب اتغير و بقى اقل فى الاندفاع 

 لو حبينا نعرف القادم ايه ، احنا من ٢٥ يناير و الخطة ما اتغيرتش ، دايرة مقفولة و سيناريو واحد بيعيد نفسه و هما عايزين الشعب يرجع مسالم و مستأنس لبديل مبارك ، اللى ظهر فى الاعلام يهنئ الشعب المصرى اللى دلوقتى نسبة لا يستهان بها منه بتقول ولا يوم من ايامك يا مبارك .

 سيتم استخدام الاخوان لزيادة انقسام الشعب بلعبة فرق تسد ، سيتم الضغط من الفلول و رجال الاعمال المسيطرين على الاعلام ، سيتم الضغط على المجلس العسكرى و هايفضل صراع مد و جزر لكل واحد فيهم ، لأن للأسف مفيش بديل رابع فى البلد ، مفيش اى بديل ليهم ، و الضحية شعب لازم يتم استئناسه و كلمة السر انه يقول و لا يوم من ايام مبارك ، و ييجى البديل لمبارك و ياخد الشعب بمعارضة ٠٪ . دايرة مقفولة برعاية امريكية . اصدقائى القريبين منى عارفين ان توقعاتى ٩٠٪ بتحصل ، و انا متوقع تغييرات كتير هاتبدأ فى كل الاحزاب الموالية للسلطة و فى الاعلام . طبعا بعد التعديلات اللى حصلت فى قيادات الجيش و الداخلية . مين كبش الفدا الجاى ؟ و مين عليه الدور فى الصفقة ؟ عسكر ؟ فلول ؟ اخوان ؟

المقال دة كان فى 29 يونيو 2012 بعد وصول مرسى للحكم 

http://roba-bekia.blogspot.com/2012/06/blog-post_29.html

و المقال دة كان 1 مايو 2014 عن مبارك 

http://roba-bekia.blogspot.com/2014/01/blog-post_5092.html

و دة كان 6 يونيو 2014 

ملخص صغير 

 http://roba-bekia.blogspot.com/2014/06/blog-post_3260.html

و دة كان 1 يوليو 2014

كارت بيتحرق

http://roba-bekia.blogspot.com/2014/07/blog-post_5713.html

معلش طولت عليكم بس كله مرتبط ببعضه 

يا رب احمى مصر