سيكاوى بالنحوى

المواطن فى دولة سيكا سيكا دايما أحواله غريبة و ماشية معاه بالعكس ,
جينا ندرس احوال المواطن السيكاوى
لقيناه ( ممنوع من الصرف ) يعنى لا ليه سعر فى بلده و لا برة بلده
يحب دايما يكون ( مرفوع ) فوق فوق فوق سن الخازوق ,
تحس انه طوال تاريخه ( منصوب ) عليه من كل حكامه ,
و فى مواسم الانتخابات تلاقيه ( مجرور ) لأختيارات مش عايزها يتحكم فيها الزيت و السكر ,
عايش فى ( حال ) لا يسر عدو و لا حبيب ,
و طبعا ( مضاف اليه ) فقر و غم و هم ما يتلم ,
المشكلة ان المواطن السيكاوى عمره ما كان ( فاعل ) ,
حتى اما عمل ثورة اتضحك عليه و خلوه كالعادة ( مفعول به ) ,
كان نفسه فى ( حرف جر ) يجره للحرية ,
بس يا خسارة بعد ما لقاه حن ل ( فعل ماضى ) مبنى على الفساد ,
و رجع النظام القديم تانى ب ( فعل مضارع ) فى 30 يونيو ,
علشان كدة يستاهل انه يكون دايما ( ضمير مستتر ) تقديره مفيش .

سيكاوى بالنحوى ,
وحوى يا وحوى ,
ابقى سلملى على أمك يا اسماعيل بيه .

هانموت كلنا

تخيلوا كدة غيروا اسماء محطات المترو تقوم انت ايه بقى , تركب من محطة مبارك تنزل تغير فى محطة طنطاوى اول ما توصل محطة مرسى تفتكر انك ركبت غلط تنزل تروح اتجاه السيسى , هااااااااااااااااااااااااااااااااااااااااااااار اسود شالوا القضبان , هانمووووووووووووووووووووت كلنا .

هو حكم العسكر ايه ؟

هو حكم العسكر إيه غير مشير يحكم ،
و فريق يمسك وزارة الدفاع
و لواء يمسك الداخلية ،
و شوية عقداء علي عمداء متقاعدين يدخلوا انتخابات البرلمان ،
و مقدم يطلع يرغي ع الفضائيات ،
و رائد يلم أتاوات
و نقيب بيشرف علي صناعة الألبان و البنزينات ،
و ملازم عايش في الدور مقضيها بسلاحه حوارات ،

و مجند بيموت غدر علشان مصر .
دة الوحيد إللي ما بياخدش م التورتة و لا طمعان في القصر .

مطالب فئوية

اما يبقى هدفك من النزول اسقاط قانون التظاهر يبقى ما تقولش ثورة
اما يبقى هدفك من النزول عودة رئيس تم عزله بأمر الشعب يبقى ما تقولش ثورة
اما يبقى هدفك من النزول مجرد الأفراج عن المعتقلين فقط يبقى ما تقولش ثورة
اما يبقى هدفك من النزول مجرد الانتقام من الداخلية يبقى ما تقولش ثورة
اما يبقى هدفك من النزول المطالبة بحق الشهيد بمجرد هتاف أجوف يبقى ما تقولش ثورة

الثورة تطالب بأسقاط النظام , اسقاط نظام كامل بكل ما سبق و ما لم يتم ذكره , دة هدف الثورة , اسقاط النظام لتحقيق مطالب عيش حرية عدالة اجتماعية كرامة انسانية , اما اذا كنت بتنزل علشان سبب من الاسباب السابق ذكرها ,
يبقى اسمها مطالب فئوية و ليست ثورة .

العبى يا العاب

العبى يا العاب ,
ناس عايزة شرعية , و ناس عملت انقلاب

زغرطى يا ام فاروق
قال ايه جم يأخونوها قاموا واخدين خازوق

اشكرى يا انشراح
بهبلهم سلموا العسكر المفتاح

حط نفسك مكان النظام

لو حطينا نفسنا مكان النظام هانعرف بيفكر إزاي ، دايما النظام بيدفعك سواء عن طريق الإعلام أو اللجان للتفكير في إتجاه معين ، و دايما بيخليك مشغول بحاجة يخترعها علشان يشغلك بيها و الأمثلة كتير ، هل صليت علي النبي ، أحاديث البخاري ، فتاوي دينية غريبة ، حتي قنبلة يدوية الصنع و إرهاب ، كل دة إشتغالات ، شوف إستفادة النظام إيه من كل حاجة هاتعرف إيه بيغطي علي إيه ، فكر دايما عكس ما هما بيدفعوك تفكر علشان تفهمهم .

لما تحب واحدة ما بتحسش

لما تحب واحدة ما بتحسش و ما عندهاش دم

U feel like

إيه يا حجة هانفضل نحفر ع الناشف كتير ؟ مش هاتجيب مية بقي ؟

دي جابت شلالات في محور القناة ، و بقي الحفر بالمايوهات 

يعنى ايه ؟

يعني إيه حفر ع الناشف ؟
يعني تجيب الناشف و تحفر عليه

طب يعني إيه و انت بتحفر ع الناشف تجيب مية ؟
يعني استرخصت الناشف و جبت نوع مضروب يا معلم 

طب يعني إيه جبت الناشف مضروب ؟
يعني هايجيب مية من كل حتة و هاتبقي مليطة علي دماغك و دماغ إللي خلفوك .

تعالى خدينى يا ماما

قال إيه بيقولوا إن المصريين سحبوا ٩٠% من ودائع البنوك علشان شهادات إستثمار قناة السويس ،
بس فيه ١٠% فاضلين في البنوك ، يسيبوهم ؟ لأ طبعا
قاموا واخدين كمان قرض ١٨٠ مليار من البنوك لتمويل المشروع بضمان بوبوس .

طب و بوبوس أخباره إيه ؟
بوبوس ع الحديدة و البنوك ع الحديدة و الشعب ع الحديدة و مفيش حديدة أحسن من حديدة .

كدة مفيش أي استثمارات لسنين قدام ، محور القناة = دمار شامل .
ماما
تعالي خديني يا ماما
تعالي خديني يا ماما

مااااااااء غبااااااااااء

ما اعتقدش خروج ماهينور و علاء عبد الفتاح مفاجأة ، كل الحكاية انهم خرجوا المعروفين قبل زيارة أمريكا ، و علشان منظمات حقوق الإنسان ، يا ريت بس ما نفرحش أوي لأن فيه ٤٠ ألف معتقل لسه من ضمنهم ناس مضربين عن الطعام ، و أحب أشكر الناس إللي عاملين حملات للإفراج عن أشخاص معينة ، جتكم القرف و لا عمركم هاتتعلموا و هاتفضلوا أغبياء و مضحوك عليكم ، ما هما إتحبسوا علشان يطلعوا و غيرهم يفضل جوة علشان مش مشهورين زيهم . نظام غبي و شعب أغبي .

التقسيم السياسى لجمهورية سيكا سيكا

التقسيم السياسي لجمهورية سيكا سيكا الحلزونية ،
إنقسمت جمهورية سيكا سيكا في ال ٣ سنين إللي فاتوا إي عدة تكتلات سياسية في انقسام لولبي يحدث لأول مرة في مجرة بظرميط .
و قد نتج من هذا الإنقسام عدة تكتلات

النوع الأول
السيساوي و موطنه الأصلي العالم الموازي و يعتقد ان السيسي أنقذ مصر من الإرهاب و النور ما بيقطعش و الحفر ع الناشف مش هايجيب مية ، و الدنيا ربيع و الجو بديع و إتحلت كل المواضيع ، يمتاز بالقدرة علي التبرير ،
و شعاره
لو هاشحت علي باب النادي ،
أنا و ولادي ،
برضه تسلم الأيادي .

النوع الثاني
الربعاوي ، و قد نزح من جبل المقطم بفعل العواصف و الصفقات ، و هذا النوع يعتمد علي مبدأ السمع و الطاعة و قد حدث ضمور في العقل لعدم استخدامه ، و هذا الربعاوي يؤمن ان مرسي له شرعية و انه راجع للحكم ، و قد ترك هذا أثرا علي قفاه في نقش حفري نادر ،
و شعاره جئت لا أعلم من أين ،
و لكني أتيت ،
عملوا عليا ثورة فمشيت ،
النوع الثالث
التلفاوي ، و هذا النوع يؤمن بالتلون و مات الملك عاش الملك ، مش فارق معاه مين و إزاي المهم هاكسب إيه ، و يمتاز هذا النوع بالدقن و الزبيبة و النفاق ،
و شعاره
ما تقولش عليا مان ،
بس دخلني البرلمان .
النوع الرابع
صفقاوي و هذا النوع موطنه الأصلي الأحزاب الكرتونية ، و وظيفته معارضة مدفوعة الأجر مقابل كام كرسي في البرلمان أو وزارة أو تلميع ، و شعاره
إرميلي أي عضمة ،
أحسن ما تبقي صدمة .
النوع الخامس
الحصاوي ، و دة النوع إللي مصدق ان الأربع انواع إللي فاتوا ممكن يعملوا حاجة للبلد أو يهمهم غير مصلحتهم .

لا بنشحت و لا بنقول لله

صلي علي رسول الله
لا بنشحت و لا بنقول لله
قال إيه نقلا عن جريدة الوفد ، الطائرات الحربية ترافق طائرة السيسي حتي خرجت من الأجواء المصرية .
واحد يسألني طب ليه ؟
سؤال منطقي ، طبعا خايفين الإخوان يضربوا الطيارة بمدافع الأشعة الحلزونية المنزلقة من القاعدة الحربية بأبو أتاتا . علشان كدة الجيش قلب شركة حراسة . ما علينا .

الخبر التاني تصريح من السيسي ، المصالحة مع الإخوان ليست قراري ، الشعب يرفض العنف و الإقتتال .
و الله يعني أينعم الإخوان ما بيفجروش حاجة بس إحنا كأمن وطني بنفجرلهم لحد ما الشعب بنفسه يطلب المصالحة ، و مش علشاني دة علشانك يا شعب ، انت إللي عايز و انا هاسمع الكلام .
شفت انا هاتنازل علشانك عن كل إللي حصل إزاي ، يلا غني تسلم الأيادي .
طيب و لو شباب الإخوان إعترضوا ؟
يبقوا إرهابيين و ضد إرادة الشعب إللي عايز المصالحة و كدة أبقي ضربت حمارين بشلوت واحد .

خازوق سيساوى

الموضوع مش موضوع محور و كفتة و إرهاب ، لأ ، الموضوع موضوع خوازيق كتير من كل حتة في أي حتة من جميع الإتجاهات و النواحي ،
المثل بيقول لا يلدغ المؤمن من جحر مرتين إلا في بلاد سيكا سيكا ، يتم أخذ الخازوق مرة و مرتين و ثلاثة ، و ينتشر الخازوق و يتوغل و يتسرب و ينتشر و يستمر و يستمر ،
و طبعا من كتر الخوازيق بقي المواطن السيكاوي شبه الخازوق ، و انت ماشي كدة تلاقي خوازيق ماشية في الشارع ، خازوق بشنب ، خازوق أقرع ، خازوقة حامل ، خازوق ماشي مع خازوقة بياكلوا زر بطاطا ع الكورنيش ،
و طبعا لأنها بقت غابة و في غياب القانون بقت الخوازيق بتاكل بعضها ، الخازوق الصغير ياخد الخازوق الكبير ، و الخازوق الغني ينهب قوت الخوازيق الفقيرة ، و طبعا في وجود الخوازيق السيكاوية العسكرية في الحكم ، تم توزيع الخوازيق ع البطاقة ، و دعمها لتصل العشوائيات .
و بكدة أصبحت سيكا سيكا من أكبر الدول المصدرة للخوازيق في القضاء علي الثورات ، مع الوضع في الإعتبار تنوع و إختلاف المقاسات ،

و قال علي رأي المثل
إللي يمشي ورا العسكر ما يخلاش من الخوازيق .

خطاب فى الأمم المتاخدة

خطاب السيسي في الأمم المتحدة

الأمم المتحدة بتحضن كل الدول ، و انا جاي آخد حضن ، علشان أحس بالأمان ع الكرسي ، بس حضن بحنية ، أصلي محتاج حنان ، و عايز ألم تبرعات ، تبرعوا علشان الحفر ع الناشف ،
أخي الحنين ،
إختي الحنينة ،
تبرع و لو بدولار ، حسنة قليلة تمنع بلاوي كتيرة .
و راح ضارب تسبيلة ،
أنا مش عايز ماما أمريكا تزعل مني ، محتاج لحضنك يا ماما ، انتي بابا و انتي ماما و أنا بتاعك برضه بس كان لازم أطلع إشاعات علشان ألبس الشعب السلطانية ،
انا بحبك يا ماما ، و كلنا عايشين بالحب ، لازم نحب بعض ، و نخاف علي بعض .
الحب الحب
الشوق الشوق
و عندك واحد بيض بالبسطرمة لزوم القعدة الرومانسية دي .
و ثانك يو فيري ماتش .

فى بلاد سيكا سيكا

في بلاد سيكا سيكا ، المواطن السيكاوي ليه طبيعته المميزة المختلفة عن أي مواطن في أي مكان تاني في المجموعة الشمسية .
إختلاف المواطن السيكاوي في حاجات كتير .
مثلا السيكاوي دايما بيقول نعم ، ما عندوش في القاموس كلمة لأ ، أي استفتاء بيطلع بنعم ،
و تسأل السيكاوي
هاتقول نعم ليه ؟

يرد : مش عارف بس هاقول نعم .
بس يا مواطن لازم تقول لأ ، نعم هاتخرب الدنيا
إنت مالك انت ، أنا عايز أقول نعم علشان الاستكرار .
بس نعم مش هاتجيب استكرار
أنا مالي ، المهم أقول نعم و خلاص علشان عجلة الإنتاج
بس نعم ما لهاش علاقة بعجلة الانتاج ؟
إيه
و يشتهر السيكاوي بالأغنية الوطنية ، أما نعيمة نعمين .
أما في الإنتخابات و إختيار من سينتخبه السيكاوي فحدث و لا حرج ، مقاييس غريبة لا محل لها من الإعراب ،
ممكن إزازة زيت ، كيس سكر ، و ياه لو علبة تونة ينتخبك دورتين ،
و آخر نوادر المواطن السيكاوي في انتخابات الرئاسة الأخيرة بإختياره الرئيس المشير سيكو كمرشح مدني و تسأل المواطن السيكاوي
بس دة مش مرشح مدني ؟
ما هو قلع البدلة العسكرية ، يبقي مدني
بس دة فاشل ، ما عملش حاجة و قطع النور و مقضيها شحاتة .
لو سمحت ما تغلطش في الجيش السيكاوي العظيم .
انت مش قلت ساب الجيش خلاص ؟
إيه
ما علينا ، كله ماشي
و سيكا سيكا
بولوتيكا
و الشعب دة أنتيكا

المواطن الأنتيخ

مع انتشار نوعية المواطن الأنتيخ في شوارع جمهورية سيكا سيكا ، بحثنا في هذا النوع ،
المواطن الأنتيخ هو المواطن إللي مكبر دماغه و عايش في مية البطيخ .

تقوله البلد خربت

يقولك ما تخرب يا عم أنا مالي
يا عم وديتنا في داهية بسلبيتك
يا عم يعني هي جت عليا ، حل عني بقي عايز أأنتخ براحتي .
زمان كانت لا أري لا أسمع لا أتكلم
مع المواطن الأنتيخ
شايف و سامع كل حاجة بس مأنتخ و مش هاتكلم ، هه
ما تخرب يا عم أنا مالي ، أنا أنتيخ .
تحياتنا للمواطن الأنتيخ و مية البطيخ .

أوف كورس بيبى

اوف كورس بيبي ..
وهل عندك شك سيدتي ؟

السيساوية بيقولوا ان مشروع القناة هو أكبر و أضخم مشروع في القرن ال ١٥ و القرون المنتشرة حوله هذه الأيام .

الاخوان بقي بيقولوا مشروع القناة انتقام من الله بسبب الإنقلاب ،
رباه لقد شلت يدى .هذا غضب الآلهه . ستصب عليكم لعنه هبل ، و اللات و العزي لأفشخنكم فشخ النعاج أول يوم العيد .
أنا باقول المجانين في نعيم . ضربت خالص يا ولاد نم نم .
لقد ذهبت عقولكم ادراج الرياح ،
يا قوم
يا قوم
إنها سليمة ، إنها سليمة .

أخينا فى الأمم المتحدة

طيب هو أخينا كان رايح يقول خطاب في الأمم المتحدة و لا رايح يحيي العلم ؟

ههههه هو السيسي فاكر العالم كله أهبل زي المصريين يعني ؟
عمال يقول إرهاب و القضاء علي الإرهاب ، طب هو فين الإرهاب ؟ فين الإرهاب ؟ فين الإرهاب ؟
طب هو فين السيسي ؟
سؤال بس
تفتكروا فاكر المخابرات الأمريكية ما تعرفش أنه هو إللي سلمهم البلد ؟

و لا المخابرات الروسية نسيت انه كان من ال ١٩ بتوع المجلس العسكري إللي ساندوا الإخوان ؟
و لا الموساد ما يعرفش أنه من الناس إللي وافقت علي ترشح واحد هربان من السجن ؟
و لا المخابرات الفرنسية ما تعرفش أنه هلهوطة و إخترع الإرهاب دة علشان الكرسي ؟
أخراااابي ع الفضايح ، إرحم أمي العيانة .

افيدونا أفادكم الله

هو السيسي أما بييجي يسافر

بيطلع الطيارة بالسلم و لا بيعدي علي السير ؟

مش قصدي تريقة ،
بس عادي كدة يعني و لا لازم أشعة إكس ليكون الإرهابيين مفخخينه ؟

بلاش تفهموني غلط ،
يعني هو بيقعد علي كرسي و لا بيحطوه في بطن الطيارة ؟
يا جماعة فهموني ،
الراجل دة و هو راجع من أمريكا ، هايرجع عادي و لا هانستلمه من قرية البضائع ؟
أفيدونا

مزرعة الحيوانات فى مصر

مستر جونز = مبارك
نابليون = العسكر
سنوبول = الإخوان
سكويلير = وزير الداخلية

مزرعة الحيوانات
تتحدّث الرواية عن مزرعةٍ يديرها السيد (جونز).
والحيوانات في هذه المزرعة تشعر أنّ أسلوبه في التعامل معها فيه الكثير من الظلم والقسوة والاستغلال.. ولقد عملت جملةٌ من الظروف على تصعيد مشاعر النقمة في نفوس الحيوانات..
ومع أوّل فرصةٍ تعلن الحيوانات في المزرعة الثورة على السيد جونز، وتتمكّن من طرده، لتصبح المزرعة تحت سيطرتها.. تتولّى مجموعةٌ من الخنازير لاسيّما (سنوبول) و(نابليون) إدارة العمل في المزرعة، وتنظيمه، رافعةً خلال ذلك شعاراتٍ أو وصايا تدعو إلى الإخلاص في العمل والتفاني فيه لإقامة المجتمع الحيوانيّ الجديد الذي تنتفي فيه كلّ أشكال الظلم والاستغلال، ويسوده الرخاء والعدل، وتربط بين أفراده أواصرُ المحبّة والإخاء..
ولكن ماذا لو تحوّلت هذه الشعارات البرّاقة إلى سكاكين مسلّطةٍ على رقاب الحيوانات؟.. هذا ما حدث فعلاً،
فباسم الحرية استُعبِدت هذه الحيوانات،
وباسم المساواة تم سلب حقوقها،
وباسم الرخاء اصبحت مجاعة فى المزرعة ،
وباسم الحياة سُفِكت دماؤها ،
وباسم المستقبل كُمّمت أفواهها..
حتى تمكّن الخنزير (نابليون) من طرد رفيق دربه (سنوبول)، والاستئثار بالسلطة، مستعيناً بمجموعةٍ من الكلاب التي درّبها منذ كانت جراءً صغيرةً لتكون جهاز أمنه الخاصّ، إضافةً إلى الخنزير (سكويلير) الذي أنيطت به مهامّ الإعلامي القادر على تبرير سياسات (نابليون)، وإقناع الحيوانات بحكمة ما يصدر عنه من قراراتٍ أيّاً كانت طبيعةُ هذه القرارات، أو الدوافعُ وراءها، ومهما كان الثمنُ الذي ستدفعه الحيوانات جرّاء تنفيذها..
الروايةُ لا تتضمّن إدانةً لنظام الحكم الدكتاتوري والثورات الخداعة فحسب، بل إنّها تدين إلى جانب ذلك ـ بل ربّما قبل ادانتها للثورات الخداعة ـ حالةَ الاستسلام الكليّ التي يبديها مجتمع الحيوانات تجاه كلّ ما يُمارَس ضدّه من صنوف القهر والظلم.

تقديم و تأخير الساعة

دولة سيكا سيكا دي مالهاش حل في موضوع الساعة إللي عاملة قلق
بداية
قررت دولة سيكا سيكا تقديم الساعة ساعة في ١٥ مايو

و في أول رمضان رجعت دولة سيكا سيكا أخرتها ساعة في ٢٥ يونيو
بعد ما رمضان خلص قامت دولة سيكا سيكا بتقديمها ساعة في ٣١ يوليو
تتهد بقي و تسكت ، لأ طبعا ، رجعت دولة سيكا سيكا تأخر الساعة ساعة في ٢٥ سبتمبر
و سيكا سيكا
بولوتيكا
و الساعة دي أنتيكا
هانقدم
و نأخر
براحتنا أوي يا ويكا

خطاب السيسى فى الأمم المتحدة

خطاب السيسي في الأمم المتحدة .
طبعا بعد الزيطة إللي عملها مؤيدي السيسي علي خطابه عايز أقول كلمتين ،
في نفس توقيت خطاب السيسي و هو بيقول تحيا مصر كانت اسرائيل بتحتفل بوصول الغواصات الجديدة و إنضمامها للبحرية الأسرائيلية بعرض عسكري في ميناء حيفا ، 

 بعدها كلمة أردوغان بأن تركيا لن تسمح بالعدوان علي أي دولة اسلامية ، 

رد عليه السيسي في المقابلة التليفزيونية بأنه علي أستعداد للتحالف مع أي حد في محاربة الأرهاب و طبعا لأنه عايز يقنع الدنيا كلها بأن وجوده لأنه بيحارب الأرهاب و ناسى ان العالم كله عارف ان مفيش ارهاب فى مصر . 

 بعدها تصريح لأوباما انه علشان مايبقاش ظاهر إنه بيحارب الاسلام لازم يستعين بالدول ألعربية في ضرب سوريا ، و طبعا الكلام دة لأستغراب الكثير من الأمريكيين ان اوباما لأول مرة يتحالف مع 5 دول عربية بعيدا عن الناتو . 

بعدها تصريح لنتنياهو بأن اسرائيل هي الحليف الوحيد لامريكا في الشرق الأوسط ، و ان حتى لو تحالفت امريكا مع دولة تانية فى الشرق الأوسط فدة مجرد تحالف وقتى مش اكتر أو بتستخدم الدول دى كأدوات لتحقيق مصلحة . 

نربط كل دة ببعضه و نقول فعلا تحيا مصر في وكستها.

مبرراتية المسهوك

طبعا مبرراتية المسهوك قال إيه رفع الدعم علشان ما يستلفش من برة ، و ياخد قروض ،

أعتقد يا خروف منك له لها له ، لو راجعت شروط الحصول علي قرض صندوق النقد الدولي أيام مرسي ، هاتلاقي كل الشروط بتتحقق علشان تاخد القرض ، و طبعا أهم شرط رفع الدعم يا بلاليص ، اما نشوف حزب الزور هايقول فايدة و لا مصاريف إدارية ،

المهم بقي يا عميان القلب و النظر و طرشان السمع ، المسهوك طلع امبارح و قال رفع الدعم ما يغطيش العجز ، و محتاجين ٢٥٠ مليار الأيام الجاية ،
يبقي منين ؟
ناخد قرض من صندوق النقد إللي بتقولوا عليه أمريكي صهيوني يا بقر ، ما هي مالهاش سكة تانية يا غجر ،
أقسم بالله لو بإيدي ، أحاكم كل مبرراتي بتهمة الخيانة العظمي .

بس أقولكم
نفس الأسباب دايما تؤدي لنفس النتائج .

ابقوا سلمولي ع المعزول رقم ٢ ، بإعتبار ما سيكون يعني .

روبا بيكيا

دة مش ابوك

الدين الداخلى : ابوك خد منك و من اخواتك كل الفلوس اللى معاكم بلطجة و مش عايز يرجعها و بيعك كليتك و ضرب الفلوس و قالك يبقالك .

الدين الخارجى : ابوك استلف من الجيران نفس المبلغ بس مش عارف يسده فعايز ياخد اللى باقى معاك بس لقاك مفلس .

الدعم : ابوك بعد ما خد منك كل اللى معاك هايديك مصروف من فلوسك .

رفع الدعم : ابوك أكل الفلوس عليك ومش هيديك مصروف و اخبط دماغك فى الحيط علشان يسد الفلوس اللى استلفها من الجيران .

التقشف : ابوك هيفضل يستلف منك قهر ومش هيديك مصروف برضو و اعلى ما فى خيلك اركبه , مفيش كله رايح للجيران .

التبرع : مش هتتغدى النهارده عشان ابوك عايز يشرب سجاير و السجاير أهم , دة ابوك برضه و اطيعوا اولى الأمر على رأى برهامى و بكار .

المعونة الامريكية : ابوك عاطل و بيلعب طاولة على فلوس مع صاحب العمارة وبيخسر و صاحب العمارة عمال ياخد عليه ايصالات علشان يحجز ع الشقة اللى قاعد فيها انت و اخواتك .

التطبيع : امك قاعدة بتطبخ مع الولية اللى بتضرب اخواتك و بتشتغل معاها .

الوطنية : دى بنزينة فى اول الصحراوى , سيبك منها .

الحقيقة : الراجل ده اصلا مش ابوك و انت لقيط لقيط لقيط لقيط .

روبا بيكيا

مصر ترجع الى الخلف

انتبه من فضلك
مصر ترجع إللي الخلف

إنتبه من فضلك
مصر ترجع إلي الخلف

شكلنا كدة هانخبط في السودان ، تقوم السودان تقع علي إثيوبيا ، تنزانيا تعترض ،
امريكا تحذر ،
اسرئيل تضرب غزة في الزحمة ، فرنسا توافق ، ايطاليا تؤيد هذا العدوان ، السعودية تقول آمين ، الكويت محتاسة ، روسيا تمنع القمح ، اليابان تسحب سفيرها من جنوب أفريقيا ، و الصين تدعو لإجتماع طارئ لمجلس الأمن ، مجلس الأمن يجتمع ، بريطانيا تطلع بيان و تقولكو عيب ما تعملوش كدة تاني و النبي ،

أقولكم أسهل من كل دة ، إحنا نرفع الدعم .

روبا بيكيا

يعملوا كام مصرى ؟

أسيسي
أسيسي
هما ال ٢٥٠ مريار لحلوح دول إللي محتاجهم علشان عجز الموازنة يعملوا كام مصري ؟

روبا بيكيا

رد على الاخوان

دة رد علي صديق إخواني بيقول :
المعارضة الوحيدة في مصر دلوقتي الإخوان .

دة ردي علي كل إخواني .

هو فيه معارضة في مصر ؟ الإخوان عملوا إيه لغزة بقي ؟ ولولة و نشر صور علي الفيس ؟ فين بقي الإخوان من ٧/٣ ، آه بيقولوا في المعتقل ، لموهم كلهم بعد ٧/٣ و رفع الدعم علشان ما ينزلوش ،
علي فكرة خلوا فيه شوية إنصاف و عقل ، طول ما اسمكم إخوان تبقوا مش ثوار و إحنا تاني مصدقين ان رجالة الإخوان هايرجعوا مرسي علشان يتعزل تاني ، كنتم تحموه أولاني ،
فوقوا بقي و اصحوا و إعرفوا ان مرسي مش راجع و انكم أداة مش أكتر ، فوقوا . كله باع ما فاضلش إلا الشباب ، انسوا الأشخاص و خليكم في البلد ، انتم أغبياء و مالكوش دية لا عند قياداتكم و لا عند النظام ، افهموها بقي و وحدوا الأهداف و انسوا مرسي ، يمين الله ما هايرجع .

روبا بيكيا

كان زمان و جبر

ههههههههه
لسه سامع واحد بيقول لواحد في المترو ، هما العيال ولاد الكلب بتوع الثورة ساكتين علي الأسعار إللي ولعت ليه و ما بينزلوش مظاهرات ؟ مش المفروض ينزلوا علشان الغلابة ؟

هع هع هع هع
كان زمان و جبر .
إللي عايز حقه ينزل يجيبه .

روبا بيكيا

يكدب عليا ليه ؟

قاللي هاحارب الإرهاب ، اسرائيل ضربت غزة .
قاللي انت نور عينيا ، قطع عليا النور و المية .
قاللي مصر هاتبقي أد الدنيا ، مصر شحتت من طوب الأرض .
قاللي الشعب دة عايز حد حنين عليه ، رفع الدعم و الأسعار و جوعه .

قاللي وطن يعني حضن ، من يومها ما شفتوش .
يكدب عليا ليه ؟

روبا بيكيا

أحلى حاجة

أحلي حاجة

الإخوان مصر بالنسبة ليهم كلها عايزة مرسي يرجع .

الثوار مصر بالنسبة ليهم كلها باعت الثورة .

السلفيين مصر بالنسبة ليهم دراويش في حلقة ذكر .

الأحزاب المدنية مصر بالنسبة ليهم بتجري ورا الزيت و السكر .

النخبة مصر بالنسبة ليهم جهلة و مش فاهمين حاجة في أي حاجة .

الداخلية مصر بالنسبة ليهم سلخانة كبيرة ، نفخ و سلخ و دبح .

إعلام التطبيل مصر بالنسبة ليهم كباريه ، كل شئ مباح .

السيساوية مصر بالنسبة ليهم زريبة و كله بيقول ماااااااااااااااء
مااااااااااااااااااااء .

روبا بيكيا

ما يردش

أقوله يا سيدي ،
ما يردش
أقوله يا عم ،
ما يردش
أقوله حبيبي ،
ما يردش .

أعمله إيه ؟
إيه

إللي بيلعب بسكينة الكهربا .

روبا بيكيا

فين الصناديق الخاصة ؟

الصناديق الخاصة فين أسيسي ؟
فلوسها بتروح فين ؟
مين بيلهفها في كرشه ؟
الصناديق دي تحل مشاكل البلد كلها لو تم ضمها للموازنة ،
٩٨٠٠ صندوق بها ١.١ تريليون جنيه ، بتروح فين يا سيسي ؟
طنطاوي وعد يسلمها قبل كدة و ما إتسلمتش ، خايفين تكشفوها ليه يا سيسي ؟

و جاي علي الفقير و بترفع الدعم رغم ان الحل موجود ،
الشعب عايز يعرف الصناديق الخاصة فلوسها فين ؟

لازم نعرف مصير الصناديق دي إيه .

روبا بيكيا

شوية اسئلة

عندي شوية أسئلة

أما الجيش ينزل أوتوبيسات و الكمسارية مجندين ، هو مش دة استغلال للمجندين في غير سبب تجنيدهم و لا إحنا مجندين كمسارية في الجيش ؟ و هل دة قانوني ؟ الأوتوبيسات تشتغل مع المدنيين بالأجرة ؟ و استغلال سواقين و مجندين الجيش ؟

طب البياعين في منافذ البيع ؟ هما عساكر و لا بقالين و لا إيه ؟ يعني وظيفتهم يحموا الحدود و لا يبيعوا سمنة و جبنة ؟

كارتة الطريق في مدخل بورسعيد ، دي تبع الصناديق الخاصة ، إزاي مكتوب عليها وزارة الدفاع ؟

طب إيه علاقة وزارة الدفاع بكارتة طريق ؟

مش مهم ، السؤال الأهم
حصيلة كل دة المفروض لمصر و لا لدولة القوات المسلحة الشكيكة ؟

و لا المجندين يشتغلوا و الجنرالات يلموا المليارات ؟

الفلوس دي لمين ؟ و مين إللي تبع مين بالضبط ؟

روبا بيكيا

اسئلة و اجابات

اسئلة و اجابات

- ما المصدر الرئيسي للكهرباء في مصر ؟
وزارة الداخلية

- ما المصدر الرئيسي للصرف الصحي ؟
فضائيات حنكورة

- ما اسرع الطرق لتعليم الرقص الشرقي ؟
اللجان الانتخابية .

- ما المصدر الرئيسي للدخل القومي فى مصر ؟
المواطن المطحون .

- ما هو علاج الإيدز و فيروس سي و الصدفية فى الشفخانة ؟
إريال الكفتة بقيادة شهبندر الكبابجية مجدي عبعاطي .

- ما أسرع الطرق لدخول السجن ؟
انك تقول لأ .

- ما سبب وجود الاخوان فى الشارع ؟
بقاء العسكر فى الحكم .

- ما هو سبب بقاء العسكر فى الحكم ؟
وجود الاخوان فى الشارع .

دوخينى يا لمونة دوخيييييييييييييييييييييييييييييينى

روبا بيكيا

بص العصفورة

كاس العالم خلص ،
رمضان قرب يخلص ،
العيد هايعدي ،
الناس هاتبدأ تفوق و تتكلم علي الأسعار و الدعم و المواصلات .

طب و الحل ؟

لازم عصفورة كبيرة ،
تخينة ،
مدملكة ،
كلها قفش .

إمبارح البداية و عدوا العصافير الأيام الجاية .

روبا بيكيا

عصافير

عصافير عصافير عصافير

عصافير
يشغلوا بيها
الصغير و الكبير
عصافير بترتر
فى الليل تنور
بالنهار تقولك
دة طريقك اخضر
بس الحقيقة
إنه اغبر
و تلاقى نفسك
بعد ما صدقت كل وعوده
دماغك تطير

عصافير عصافير عصافير

عصفور بيبرق
عصفور بيلمع
ما بقتش تفرق
عصفور يفجر
عصفور و تولع
عصفور و تجري وراه لبعيد
ملعلع فوق طرطور كبير

عصافير عصافير عصافير

عصفور مقاسك
و كمان مقاسى
و كله يبص و كله ناسى
و ياما لسه هانشوف مآسى
و ياما هانشوف
فى زمن الحمير

عصافير عصافير عصافير

عصفور و طاير
فوق دماغك
نازل و طابق
فوق ودانك
لا تسمع غير كلامهم
لا تفهم غير غناهم
تقعد متنح
تقعد مبلم
و ان حد قالك
يالا وافق
على طول تسلم
و لا مرة تتعب دماغك
فى التفكير

عصافير عصافير عصافير
للصغير و للكبير

إرفع دعم
و جوع دولة
و إديها شوية عصافير
قدم ع القرض في الزحمة
دة حزب وطني
و دي تفجير
و أهو كله
عصافير بتطير

عصافير عصافير عصافير
للصغير و للكبير

روبا بيكيا

كخ كخ

القرض صح صح
و الدعم كخ كخ

يا شعب لسه نايم
تعبان في سمه يبخ

لو قلت مرة لأ
يبعت عساكره تطخ

روبا بيكيا

سيكا سيكا

سيكا سيكا
بولوتيكا
و مقالب أنتيكا

و سيسيكا
ركبيكا
و رفع الدعم يا ويكا

سيكا سيكا
قواتنا دي شكيكة
يتبرع
تتبرع
و إشحت فلوسك يا بيكا

سيكا سيكا
و سيسيكا
خد قرض البنكيكا
و هانشحت
و نبلبط
كلنا في الفقر يا ويكا

سيكا سيكا
دة سيسيكا
عامل كدة بوليكا
تفجيرة
عصفورة
و انسي بقي التسليكة

روبا بيكيا

البلد البتاع

أذا كان الشعب قد ضاع و صاع و جاع فى هذا البلد البتاع ,
فى مصر الموكوسة , عريان ملط بس لابس الطرطور على دماغك و لا حد يقولك حاجة , بس فكر كدة تقلع الطرطور , و خد يا معلم فى سنانك , أهم حاجة الطرطور و الباقى مش مشكلة .
و من أعمق معاميق أغاوير العبد لله أتمنى من الله و لا يكتر على الله نقلع الطراطير بقى علشان شكلنا بقى وحش اوى قدام كواكب المجموعة الشمسية .

روبا بيكيا

الرقص قبل التفجير

هو الرقص قبل التفجير و لا التفجير بعد الرقص .

أصلهم جم يرقصوها ، فجروووووووها ،

و بافجر انا في السيدة ، و الارهابي بيفجر في الحسين ،
و علشان يبقي كدة ،
نفجر المسهوك مرتين .

هافجرك
ما تقدرش
يا ابني هافجرك ابعد عني
ما تقدرش

فجروا يا نسوان يا مكبوتة .

بوم طاخ طراخ بوووووم
انفجار قنبلة في محيط الإتحادية .

بس دي غزة بتتضرب ؟
يا راجل كبر مخك

تخاريف صيام بقي .

روبا بيكيا

غار المرسى و جاء السيسى

غار المرسي و جاء السيسي
و الكلاب هاو هاو
هاو هاو
رفع الدعم ،
و خبي عليكم
و العصافير صو صو
صو صو

أبانا قاله خلاص ربيهم
و إعتقل فيهم
راح علي طول بقي
يقتل يحبس في
اللي جابوهم
بس أهو بكرة يخلعوا أمه
ربي يخليهم
دول جبابرة و لا يوم يقدر
أبدا عليهم ،

غار المرسي و جاء السيسي
و الكلاب هاو هاو
هاو هاو
رفع الدعم
و خبي عليكم
و العصافير صو صو
صو صو

روبا بيكيا

مين سرق الثورة ؟

يا تري مين سرق الثورة ؟ جاوب تكسب ٥ سنين سجن ،
كان مولد كبير أوي ماحدش عارف اسمه إيه ، شوية يقولوا سيدي الشاويش ، و شوية يقولوا سيدي الدروايش ، و شاويش علي درويش و إللي ييجي في الريش بقشيش .
و الثوار عملوا هناك ثورة عظيمة ، خلعت الجبار و جابت حمار ،
فجأة النور قطع و بقت ضلمة ، المرة دي النور ما طولش ، فضل قاطع ٣ سنين .
و أما النور جه بيدوروا علي الثورة مش لاقينها ، الثورة إتسرقت .
و لما رحت المولد أحقق في الموضوع شكيت في ٣ ،
١-طنطاوي أس البلاوي
٢-مرسيكا إللي إتمسح بأستيكة
٣-سيسو خان بتاع النسوان
و لما سألت طنطاوي أس البلاوي ، قال بص بقي يا روبا ، أنا بصراحة الراجل إتنحي و فوضني أدير شئون البلاد ، و الراجل وثق فيا علشان أحافظ علي فلوسه و فلوس عياله . و الثوار طيبين ، صدقوا ان الجيش حمي الثورة . و بقيت أقتل و اسحل و أحبس و يقولوا إيد واحدة ، بس مش انا إللي سرقت الثورة .
و لما سألت مرسيكا إللي إتمسح بأستيكة ، بص يا حبيبي يا روبا ، الحق أبلج و الباطل لجلج ، و انا هاقول الأبلج ، إحنا عملنا صفقة مع العسكر أهو نركب شوية من نفسنا ، بصراحة الثوار دول زباين ، وقفنا مع العسكر و ساعدناه ، و بقي الثوار يتقتلوا و إحنا نبرر و نقول عليهم بلطجية و في الآخر إللي بعناهم عصروا لمون و انتخبوني ، بصراحة يستاهلوا . بس اني اسرق الثورة ، لأ يا روبا ، مش أنا ، هو أنا أصلا كان في إيدي حاجة .
و لما سألت سيسوخان بتاع النسوان قال
يا روبا باشا انت مش فاهم حاجة ، كشوف عذرية إعترفت بيها ، كنت مع المجلس إللي سلم البلد للإخوان ، قتلت و سحلت و إعتقلت ، و إغتصاب و مجازر و إرهاب و دم من ٣سنين لحد دلوقتي ، و كل دة فوقه كدب و نفاق و رجالة مبارك إللي خرجتهم ، و رغم كل دة شوية نحنحة و سهوكة و بحة في صوتي ، بقيت رئيس المولد و خدته بيضه مقشرة ، بس بصراحة يا روبا ياخويا هما يستاهلوا تتسرق منهم بس مش أنا إللي سرقتها .
أنا عرفت مين إللي سرق الثورة ،
لو انت كما عرفت إتصل بينا علي ٠٤٢٢٢٠ و الجائزة الكبري ٥ سنين سجن ، علي رنات بقي ،
يا تري إللي سرقها
طنطاوي أس البلاوي و لا مرسيكا إللي إتمسح بأستيكة و لا سيسو خان بتاع النسوان .
روبا بيكيا

قضاءنا طاهر

إتحرش ببنت و تاخد ٦ شهور سجن .

إقتل كام واحد و تاخد براءة .

اسرق و انهب شعب كامل و تاخد براءة .

إنما تقطع طريق تاخد إعدام .

تنزل تتظاهر و تطلب حقك تاخد ١٥ سنة .

و قضاءنا طاهر
و هايفضل طول عمره طاهر
و يا أم المتطاهر
حطوا الثوار في المعتقلات
دة قضاءنا دة طاهر
و الحرامية خدوا براءات

يا قضاء يا معرض
حبسة تفوت و لا حد يموت
بكرة هاتتجرس
و هاتغرق زي الكتكوت .

روبا بيكيا

عندى تبرعات

يا شعبي الحبيب الصبور المهاود ،
قررنا نحن شخرم خان ، شيخ قبيلة بني عجلان ، القرارات الآتية :

- إلغاء صوابع زينب و تغيير اسمها إلي صوابع سما ، نظرا للدور البطولي الذي قامت به المناضلة سما المصري في إرساء الدعم الهزاز في أركان الدولة .

- قررنا إلغاء الساعة واحدة ، و تغيير من ١٢ ل واحدة و نص علي طول حسب القواعد المتبعة في الانتخابات .

- قررنا هدم كل المعتقلات ، ما تفرحوش أوي ، هانبني معتقلات علي أوسع ملحق بها منطقة مدافن خاصة بها .

- قررنا فتح الباب لإستيراد متحرشين من تنزانيا ، نزلنا متحرشين محلي و لسه البنات و الستات بينزلوا مظاهرات .

- قررنا الغاء يوم ٢٥ يناير من شهر يناير ، يعني ٢٤ يناير و بعده علي طول ٢٦ يناير .

- قررنا تذويد الداخلية بمدافع هاون و غواصات لفض المظاهرات في البر و البحر .

- هالف عليكم ألم تبرعات عايز الجردل يتملي يا ولاد الشششششعب .

و الله الموفق و المستعان .

روبا بيكيا

كره الاخوان للسيسى

ناس كتير بتكره السيسي و انا و ناس كتير أعرفهم منهم لأنهم شايفين انه جزء لا يتجزأ من نظام مبارك و اسباب تانية كتير ، مش زي ما فضائيات حنكورة بتقول انه شخصية محبوبة .
بس عامة أحلي حاجة كره الإخوان للسيسي و انه السبب في عزل مرسي و محاولة العودة لخانة الفئة المضطهدة من السلطة
و نسيوا اتفاقهم مع العسكر و الصفقة اللى عملوها ,
نسيوا تعطيل العرس الديموقراطى و يا مشير انت الأمير ,
نسيوا اجتماعهم مع عمر سليمان و احنا بنموت فى الميدان ,
نسيوا الاتحادية و المقطم و جيكا و الحسينى ابو ضيف و الشيخ عماد عفت ,
نسيوا الداخلية ما ضربتش خرطوش ,
نسيوا ان احنا بلطجية و علمانيين كفار مهدور دمنا ,
نسيوا ان مرسي هو إللي رقي السيسي وزير دفاع رغم انه كان في المجلس العسكري السفاح و إعترف بكل برود بكشوف العذرية .
و نسيوا السلطة إللي كانت فرصة دهبية في إيديهم ،
و نسيوا انهم جمعوا المصريين كلهم علي كرههم
و نسيوا أهم حاجة ،
ان السيسي ما كانش هايركب و لا يعزل مرسي إلا أما الشعب كله خد القرار دة و نزل الشوارع يطالب بإسقاط حكم الإخوان ،
يعني انتم السبب في كل دة ، طمعكم و انتهازيتكم و جريكم ورا مصلحتكم بس سبب نزول الناس ضدكم و سبب فشلنا حتي الآن ، فين بقي مظاهراتكم و إشتباكات الجامعات و القلق إللي كنتم بتعملوه ؟إختفيتوا ليه بعد ما مسك السيسي ؟ و لا كله بيخلص تليفون و لا إيه ؟
يسقط كل من خان عسكر فلول إخوان .
روبا بيكيا

ايه بيودى فين ؟

هو ايه مودى على فين ؟

بصراحة هو كان هنا مودى على هناك من ناحية شمال غرب شرق صبح , اصل الواد حبلص ابن ام دجدج و هو ماشى ماخدش باله ان فيه قانون تظاهر و الواد تخين قد الكشك و مش عارف ان ممنوع اكتر من 4 يتجمعوا و الا يبقى تجمهر , شاف مدرعات الداخلية جاية من بعيد قال مش انا و جرى على الولية ستيتة بتاعة الفجل و قالها خبينى خبينى , قالتله اخبيك فين دة انت عايز نفق , و قصة الانفاق دى بقى من ساعة استخدامها بنجاح فى انتخابات الرئاسة و استعمال الناخبين ليها باعداد كبيرة اكتر من 24 مليون ناخب من ال 26 مليون ناخب و راقصة دخلوا اللجان فى الخبينى عن طريق الانفاق , المهم طبعا لأن مفيش مكان الواد حبلص جرى على مدرعة الداخلية حاول يقلبها ماعرفش , قام نازل تحتها خد الكاوتش و جرى بيه على بتاع الفسيخ اللى على الناصية , اصل مرعى بتاع الفسيخ واخد بنت سلامة المزين , سلامة المزين ماكانش موافق ليه بقى اصل ام مرعى كانت متخانقة مع عواطف مرات سلامة , علشان عواطف كانت اخوانية , و ام مرعى بتكره الاخوان بس بعد ما اتخانقوا اخر مرة و صالحوهم كله بقى تمام و سلامة وافق بس بشرط ان ابو مرعى المعلم سليمان يكتب الشقة باسم فتحية بنته بس ابو مرعى ما رضيش ليه بقى , سلامة و سليمان كان بيتخانقوا على البت مسعدة بنت جعفر العجلاتى , جعفر العجلاتى واخد سعدية بنت المعلم شرارة النحس الحانوتى و خناقتهم كانت ان الاتنين بيحبو المعلم شرارة و عايزين يناسبوه لأن عم المعلم شرارة حسنين الهايص عنده شركة مقاولات كبيرة شغال فيها محمود ابو راس اللى واخد بتعة بنت سمير البقال اللى على الناصية , سمير البقال دة بقى يبقى صاحب ابو حبلص الروح بالروح و قام الواد حبلص استخبى عنده ,

روبا بيكيا

هات سيف خد سيف

خد سيف ،
خد كمان سيف ،
و كمان سيف ،
أنزل بالسيسي ،
ضاعف مرتبه ،
يمسك مكانك ،
يتبرع بنص المرتب ،
دخل دة في دة ،
كأنه ما إتبرعش بحاجة ،
إديني هييييييه ،

هيييييييييييييه
طبلوا يا مطبلاتية و إعزفوا يا آلاتية و إلبس يا شعب ،
النحنوح إتبرع بنص مرتبه و طرطور لكل مواطن ،
خدت طرطورك يا استاذ ؟
خدتي طرطورك يا هانم ؟
انت ياض يا اللي بتلعب في كتف زميلتك ، مش لابس الطرطور ليه ؟

هيييييه
طراطير بترتر ،
بالليل بتبرق ،
بتقولك إمشي ،
طريقك أخضر ،
و هو أغبر .

روبا بيكيا

دماغه مخرومة

انا حاسس ان السيسي ده دماغه مخرومة، عمالة تنقط نحنحة و سهوكة ، متسمعلوش خطابات و إلا هاتبيع هدومك ، أصله طمعان فيها ، و لما يتكلم سد ودانك لحسن ياكلها ، دة أما بيركب ع الودان ما بينزلش و يفضلوا يعيدوا و يذيدوا في كلامه ،

و الودان اليومين دول غالية يا بنى ، مالهاش قطع غيار ، و التوكيل صادروه علشان ماسر .

احلي حاجة تيجى تقول للسيسي فيه مصيبة حصلت فى البلد يقولك عشان خاطر ربنا ... سيبونى أنام كمان خمس ست ساعات عشان أقوم فايق .... أنا كنت سهران طول الليل لحد الساعة 9 مساء ... سيبونى أأنتخ شوية حرام عليكم ، عندي تبرعات ألمها الصبح ،

تبرعوا علشان محلب يصيف ،

تبرعوا علشان نجيب مدرعات جديدة تقتل فيكم ،

تبرعوا علشان قنابل الغاز خلصت ،

تبرعوا علشان نبني معتقلات علي أوسع ،

تبرعوا علشان نجيب أكفان للشهداء إللي هانقتلهم ،

تقوله يا سيسي الارهاب بيختفي و يظهر كدة ليه فجأة ؟

يقولك يا عم ارهاب ايه دة كله فى الكلتش ، إحنا نفرقع كام بمبة ، الناس تخاف و تقول إلحقونا .

انت كحول يا عمونا ، بس أقولك

يا بختك يا عم سيسي.. استكانيس براحتك يا عمونا و تتحرق البلد ..... طول عمرك محظوظ يا ابن المحظوظة

روبا بيكيا

عسكرستان

كان يا ما كان
في بلاد قريبة بعيدة
تسمي عسكرستان
بلاد المواطن الكحيان
الغلبان
و يحكمها السيس الكبير
سيسوخان
زعيم قبيلة السيساوية
النحنوح الألعوبان
و في يوم غريب
طلع سيسوخان
بخطاب عجيب
و قال :
تبرع يا كحيان
علشان نعيش
و نحافظ علي الهيلمان
تبرعوا يا مساكين
ياللي مش عايشين
علشان إحنا ننهب الملايين
و انتم تفضلوا تحت
في الطين
و قد طبلت له الفضائيات
و المنافقين
و لاعبي الأكروبات
و كأن شعب عسكرستان
قد انتخبه لجمع التبرعات
و الشحاتة هو و إللي معاه
و مش مشكلة الشعب تاه
ربنا معاكي يا عسكرستان
راجعين قريب ع الميدان
لخلع سيسوخان .

روبا بيكيا

دولة داخل دولة

أما صدقي صبحي يقول ان القوات المسلحة هاتتبرع بمليار جنيه لصندوق تحيا مصر ، يبقي كدة بالضبط جزء من الدولة بيجبي علي الدولة من أموال الدولة ، طب هو مش القوات المسلحة من مؤسسات الدولة و لا إيه ؟

آه نسيت اننا بقينا دولتين ، دولة فوق الدولة .

مش ملاحظين بجد رفع الدعم ، التبرع بنصف مرتبه ، القوات المسلحة المرة اللي فاتت كانت قرض و دلوقتي تبرع ، كلام بتطبيق الحد الأقصي مع الاستثناءات طبعا ، كوبونات الانابيب ، أزمات الوقود .
كل دة صورة بالكربون من إللي عمله مرسي بالضبط ،
يعني طرطور جديد من الآخر بس طرطور مسهوك .
تفتكروا نفس الاسباب ستؤدي لنتائج مختلفة ؟

روبا بيكيا

الساعة كام ؟

هيا الساعة كام ، أصلها كانت ١٢ من ساعة و برضه ١٢ دلوقتي ، ماهو هايقدموها تاني آخر الشهر زي ما قدموها من شهرين و رجعوا أخروها قبل ما يقدموها و هيا متأخرة .

عبوكو كلكو
لخبطنا ابن الموبوءة

روبا بيكيا

ممنوع فلاشة 16 جيجا

اول إمبارح حصل معايا موقف غريب شوية ، الفلاشة ال١٦ جيجا شبهة أجودعان .

كنت عند واحد صاحبي في شبرا الخيمة و انا راجع ركبت ميكروباص رمسيس ، في كمين عبود وقف و نزلوا كل الناس إللي فيه و بيفتشونا ،
الضابط طبعا غلس جدا ، جه عندي خلي أمين شرطة يفتشني كان في جيبي فلاشة ١٦ جيجا عليها بلاوي سودة ، فيديوهات انا مصورها كان واحد صاحبي طالبها مني علشان فيلم وثائقي عن الثورة ، طبعا انا مش حاطط في دماغي ،
أمين الشرطة لقي الفلاشة ، إداها للضابط ، الضابط بيسألني الفلاشة دي عليها إيه ؟ قلتله مجرد مستندات برامج سياحية ، قاللي بتشتغل إيه ، قلتله مرشد سياحي ، قاللي و إللي يشيل برامج يشيلها علي فلاشة ١٦ جيجا ، قلتله ما كنتش أعرف ان ال١٦ جيجا ممنوعة ، منعتوها إمتي ؟
رد و قال انت هاتهرج يا روح امك ، اركنلي بقي هنا لحد ما نشوف الفلاشة عليها إيه .

دخلني غرفة في الكمين و كنت لوحدي ، حمدت ربنا ان تليفوني لسه معايا و طبعا قلت لو شافوا إللي علي الفلاشة رحت في داهية .
بعت رسالة ل ام عبدالرحمن قولتلها انا في كمين عبود ،
بعدها لقيت الباب إتفتح و لقيت أمين شرطة و عربية ميكروباص تويوتا خدوني علي قسم أول شبرا الخيمة ، مش عارف اشمعني رغم ان الكمين تبع قسم تاني .
المهم دخلت القسم ، و بعدها طلعوني المباحث فوق ، الراجل إللي قاعد علي الكمبيوتر حط الفلاشة في الجهاز ، طلع عليها فيروس ، الجهاز صفر ان فيه فيروس ، لقيته شالها ، و قلتله خلي بالك انا جهازي متفيرس و ممكن تبوظلك الجهاز ، صدقني فاضية و هما كام ورقة وورد برامج سياحية .

قاللي طب خلاص ، طبعا نزلت تحت ، كشفوا عليا الحمد لله مفيش حاجة ، ادوني الفلاشة و روحت .

عرفت بعدها ان صاحبي Mohamed Keshk راح سأل عليا في الكمين قالوله اني في قسم تاني مش قسم أول و راحلي علي هناك .
تعبتك معايا يا كشك و ربنا يخليك يا صاحبي ، أشوفك الحبسة الجاية .

روبا بيكيا

تدريبات

قالوا رحيله هايعمل أزمة ،

إرحل إرحل يا ابن الجزمة ،

قالوا رحيله هايعمل فتنة ،

إرحل إرحل يا ابن النتنة .

أنا باتدرب بس علي إللي جاي .

روبا بيكيا

الهدف القادم , هاتوه

طبعا لأن مصر من الكواكب المتقدمة جدا فى المجموعة الشمسية و على السادة المقيمين خارجها مراعاة فروق التهليب ,

طبعا احنا دولة مختلفة فى كل حاجة , بنحل مشاكلنا , ماجيك سحر ما تعرفوش ازاى ,

نشوف كدة كيف تغلب النحنوح على المشاكل التى تواجه الشعب المصرى

مشكلة الأيدز و فيروس سى علاجها اريال الكفتة .

بذمتكم فيه كوكب تانى فكر فى العلاج الحلزونى دة ؟ اللواء شغال ضرب عبعاطى كفتة حل المشكلة دى . نحط الاريال من هنا الفيروسات تطلع كفتة من هنا .

مشكلة 22 مليون عاطل حلها 10 آلاف عربية خضار ,

أظن كفاية عليهم , 22 مليون و 10 آلاف عربية يبقى 2200 عاطل لكل عربية خضار , كدة كتير , 200 يسوقوا العربية و 400 تباعين يحملوا الخضار , 1000 ياكلوا الخضار اللى هاتحمله العربية , و 400 ميكانيكية لو العربية باظت او لو فيه أزمة بنزين يشيلوها يمشوا بيها .

أظن مفيش دولة و لا كوكب هايقدر يشغل 2200 شخص على عربية واحدة .

حل مشكلة الكهرباء , لمبة موفرة ,

هات لمبة موفرة و الكهربا مشكلتها تتحل ,

ايه بتقول ايه ؟

جبت و برضه الكهربا بتقطع ؟

انت اللى بتستعملها غلط بقى حطها فى .....................................

الدواية يا واطى منك له لها له .

حل مشكلة الأقتصاد , الشحاتة , ايوة الشحاتة

احنا نشحت من الكواكب المجاورة كام مليون , و نلم من الشعب تبرعات , و نخلى دولة الجيش الشكيكة تتبرع بمليار جنيه من اموالها الخاصة بيها اللى بتلمها من الشعب بتاعنا , و نقضيها كدة بقى .

فيه كوكب فى اى مجرة فكر فى الحل دة ؟ من غير كدب

حل مشكلة المظاهرات و الاعتصامات اعتقال المتظاهرين ,

احنا لسه هانحل مشاكلهم و محتاجين سكن و علاج و تعليم و شغل , كل دة منين و نحن نعتمد على الشحاتة كما ذكرنا سالف , حلوة سالف دى ؟ يعنى ايه سالف ؟

و بدل ما نحل المشاكل نبنى معتقلات على اوسع , ملحق بيها مدافن و دة هايوفر كتير فى عربيات نقل الموتى طبعا , مكان حبستك هاييبقى مكان دفنتك , اى خدمة .

حل مشكلة اهداف الثورة , نقتل الثوار , نطلع مبارك و رجالته براءة , نطلع عين ام اللى جابوا شعب الكوكب , نخليه ما يفكرش فى ثورة تانى .

أظن كدة حلينا كل مشاكل البلد , علاج اتعالجتوا , اقتصاد و اتعدل , سكن المعتقلات كتير و الزنازين اكتر و نبنى غيرهم لو مش هايكفوا ,

مالكوش حجة بقى , ثورة ايه و كلام فاضى ايه .

الحلول المصرى أم الأجنبى .

روبا بيكيا

لجنة الاصلاح التشريعى غير شرعية

الموضوع مهم فوقوا .
لازم تقرأه , و لو فهمته شير و فهم غيرك ,
و مش كل عصفورة تجرى وراها , نفسى مرة نشوف فيه ايه ورا بص العصفورة ,
هل صليت على النبى اليوم ؟
عليه افضل الصلاة و السلام
نزلتوا علشان قانون التظاهر اللى اتقبل الطعن عليه و جابوا مكانه قانون التحرش ؟
نزلتوا و اتقبض على نصكم
بصيتوا العصفورة الحمد لله ؟
ما شاء الله زى ما هما عايزين بالضبط بتلفوا حوالين نفسكم و مشغولين بالعصفورة الله ينور .
سألتم نفسكم اشمعنى كل دة دلوقتى و بيشغلوكم عن ايه ؟
لأ طبعا
عرفتم فشلتم لحد دلوقتى ليه ؟
يا رب تكونوا عرفتم و لا ان شكلها كدة ما بنتعلمش و لا هانعرف .

نشوف بقى ليه بطيروا العصافير ؟
اشربوا يا معلمين
اسلق قوانين , و لجنة برئاسة محلب اللى ينطبق عليه اصلا قانون العزل , و الحق اعمل قوانين على قد ما تقدر قبل مجلس الشعب الجاى , و برضه الاحزاب السياسية الهابلة او المتواطئة مالهاش تفسير تانى مفيش كلب منهم اتكلم , و بيدوروا على الانتخابات , ماحدش منهم اتكلم ليه اصلا ؟
اولا انا كفرت بكل الاحزاب و النخب بلا استثناء , ملعون ابو اللى دخلهم السياسة اصلا .
نشوف بقى ليه بص العصفورة , يا حلوين .
في أول قرار له منذ دخوله القصر الرئاسي، أصدر "عبد الفتاح السيسي" قرارا بإنشاء اللجنة العليا للإصلاح التشريعي، برئاسة رئيس الوزراء إبراهيم محلب.
القرار يثير تساؤلات، كون تشكيل اللجنة ومهامها يعد استباقا لسلطة البرلمان وتعديا عليها في غيبته. فضلا عن التساؤل حول تعارض وجود اللجنة مع وجود البرلمان بعد انتخاب أعضائه، خاصة والقرار لم يشر إلى أن عمل اللجنة سيتوقف بعد تشكيل البرلمان، حيث إن إعداد التشريعات العاجلة لا يعني أن اللجنة أتمت مهامها.
وحسب القرار، تهدف اللجنة إلى: إعداد وبحث ودراسة مشروعات القوانين والقرارات الجمهورية وقرارات الحكومة اللازم إصدارها أو تعديلها، وبحث ودراسة ومراجعة مشروعات القوانين الرئيسية بهدف تطوير التشريعات وتوحيدها وتجميعها، وبحث ودراسة المشروعات التي يرى رئيس اللجنة العليا عرضها عليها.
وتضم اللجنة وزير شؤون مجلس النواب ووزير العدالة الانتقالية، ووزير العدل ورئيس مجلس الدولة، ومفتي الجمهورية، ووكيل الأزهر، ورئيس هيئة مستشاري رئيس الوزراء، ورئيس قسم التشريع بمجلس الدولة، ومساعد وزير العدل لشؤون التشريع، وثلاثة من أساتذة الحقوق بالجامعات يختارهم المجلس الأعلى للجامعات، واثنين من رجال القضاء، واثنين من المحامين، وثلاثة من رجال القانون يختارهم رئيس الوزراء.
ووفقا للقرار تشكل اللجنة العليا لجانا فرعية لإعداد وتطوير التشريعات في المجالات الاقتصادية، والتشريعات الإدارية، والتشريعات الاجتماعية، والتشريعات التي تخص الأمن القومي، وتشريعات التقاضي والعدالة، وتشريعات التعليم.
كما يعرض رئيس الوزراء على رئيس الجمهورية تقريرا شهريا بنتائج عمل اللجنة، على أن تنتهي من إعداد التشريعات العاجلة في صورتها النهائية وعرضها على رئيس الجمهورية خلال شهرين من تاريخ العمل بالقرار.
طرح فقهاء قانونيون عددًا من القوانين التي قالوا إنها تحتاج إلى إعادة النظر في بعوض بنودها، أمام لجنة الإصلاح التشريعي التي شكلها الرئيس عبدالفتاح السيسي مؤخرًا، ومن بينها ما يتعلق بالعدالة الناجزة لمحاكمة "الإخوان المسلمين" وقيادات الحزب "الوطني" المنحل. وقال بهاء الدين أبو شقة، الفقيه الجنائي، إن لجنة الإصلاح التشريعي ستقوم بثورة تشريعية، موضحًا أن العدالة الناجزة ستكون أحد أهداف تلك اللجنة عبر إزالة كافة العقبات في القوانين الخاصة بإطالة فترات مقاضاة الأنظمة السابقة. وأضاف أن اللجنة ستركز على إزالة العقبات التي تعوق تفعيل القوانين سواء الخاصة بالتعليم أو الصحة، مشدًدا على أن هناك قوانين تحتاج إلى إصلاحات من بينها قوانين تنظيم الجامعات وقانون الإجراءات الجنائية وقانون تنظيم الآثار وقانون تنظيم الإرهاب. فيما أكد الدكتور رمضان بطيخ، أستاذ القانون الدستوري بكلية الحقوق جامعة القاهرة، أن مهمة خلال المرحلة القادمة لأن هناك الكثير من القرارات والتشريعات التي سيكون هناك حاجة لإصدارها لإدارة شئون البلاد، مشيرًا إلى أن المهام الموكلة للجنة في مشروع القانون واضحة وهناك الكثير من العمل ينتظرها. وأوضح بطيخ أن القرار الجمهوري الخاص بتشكيل هذه اللجنة برئاسة رئيس مجلس الوزراء لدراسة القرارات الرئاسية ومشروعات القوانين جاء في وقته المناسب لوجود خلافات حول أكثر من قانون. وأصدر الرئيس عبد الفتاح السيسي الاثنين قرارا، بإنشاء اللجنة العليا للإصلاح التشريعي برئاسة المهندس إبراهيم محلب، رئيس مجلس الوزراء،وعضوية ووزير شؤون مجلس النواب، ووزير العدالة الانتقالية، ويحل محل رئيس الوزراء عند غيابه، وزير العدل، ورئيس مجلس الدولة، ومفتى الجمهورية، ووكيل الأزهر، ورئيس هيئة مستشاري رئيس الوزراء، ورئيس قسم التشريع بمجلس الدولة، ومساعد وزير العدل لشئون التشريع، وثلاثة من أساتذة الحقوق بالجامعات يختارهم المجلس الأعلى للجامعات، واثنين من رجال القضاء، واثنين من المحامين، وثلاثة من رجال القانون يختارهم رئيس الوزراء. وتختص اللجنة العليا للتشريع، وفقا للقرار الذي نشر اليوم بالجريدة الرسمية بإعداد وبحث ودراسة مشروعات القوانين والقرارات الجمهورية وقرارات رئيس مجلس الوزراء اللازم إصدارها أو تعديلها أو التي تحيلها إليها الوزارات والجهات المختلفة لمراجعتها وتطويرها والتنسيق بينها وبين التشريعات المختلفة لضمان عدم تعددها أو قصورها أو تناقضها أو غموضها والعمل على ضبطها وتوحيدها. كما تختص اللجنة ببحث ودراسة ومراجعة مشروعات القوانين الرئيسية، بهدف تطوير التشريعات وتوحيدها وتجميعها، وبحث ودراسة المشروعات التي يري رئيس اللجنة العليا عرضها عليها. وتشكل اللجنة العليا لجانا فرعية لإعداد وتطوير التشريعات في المجالات الاقتصادية، والتشريعات الإدارية، والتشريعات الاجتماعية، والتشريعات التي تخص الأمن القومي، وتشريعات التقاضي والعدالة، وتشريعات التعليم. وتقدم اللجنة مشروعات القوانين وقرارات رئيس مجلس الوزراء التي تفرغ من إنجازها إلى مجلس الوزراء، لعرضها على قسم التشريع بمجلس الدولة لمراجعتها. ويعرض رئيس الوزراء على رئيس الجمهورية تقريرا شهريا بنتائج عمل اللجنة، على أن تنتهي من إعداد التشريعات العاجلة في صورتها النهائية وعرضها على رئيس الجمهورية خلال شهرين من تاريخ العمل بالقرار , اهم حاجة واخدين بالكم من خلال شهرين ؟ قبل البرلمان يعنى , اسلق اسلق اسلق بسرعة .
يا رب نفهم .

روبا بيكيا