و علي رأي الله يرحمه أحمد ذكي ،
لو انت هايص أو كنت لايص ،
تعالي يلا و شوف الهجايص .
يلا بينا مع الهجايص مع الهجاص الكبير ، صيصي الخطير ،
دكتوراه في الهجص ، ماجستير في الكدب ، بكالريوس نفاق و الذي منه و كتر الطحينة .
ما علينا ، طبعا كل ما يطلع علينا الهجاص الكبير يفتح بقي في الهجايص و من نوادر مولد سيدي الهجاص ،
مولد و الدنيا زحمة ،
و الجوزة عايزة فحمة .
بس الفحم راح علي محطات الكهربا ، أصله ارخص م الغاز ، و الغاز بيروح لأشقاءنا في دولة اسرائيل الشكيكة ، و رغم كدة النور قاطع و الناس قاعدة في الضلمة ،
نور ربنا كفاية يا أخي ،
استعمل لمبة موفرة يا واطي .
طب بس يا سيدي الهجاص لو استعملت لمبة موفرة النور مش هايقطع ؟
للأسف برضه هايقطع ، أصل مفيش فحم .
مولد سيدي الهجاص دة زحمة موت ، نوادره كتير و حلوله كتير .
قال إيه الأقرع النحنوح بتحبه الستات ، إلهي يتعموا أكتر ماهو إتعموا في نواضرهم يا شيخ ، لأ دة الإعلام بيقول ؟ معقولة الإعلام بيقول ؟ و اشمعني بقي أنا ما انا ستات أحبه زي ما الإعلام بيقول ،
و اديها هجايص تديك زنقة الستات يا معلم .
و المولد شغال ، و أجدع موال من مواويل سيدي الهجاص ،
و البيضة و الحجر شغال اللعب بيهم ،
أصل إحنا محتاجين مساندة امريكا ضد الإرهاب ،
طب هو فين الإرهاب ؟
نحضر عفريت و نعمل ارهاب ،
و الجن الأحمر يفجر فنبلتين فوق الشجرة توقع خوخ ،
و يا خارجة من باب الحمام و كل خد عليه خوخة ، خوخة خوخة خوخة .
قررنا تعميم القرع العسلي في جميع انحاء العزبة ،
بس انا مابحبش القرع و عايز كوسة ،
كدة تبقي إخوان يا معلم ،
شغلوا المراجيح و مرجح الشعب ، مولد سيدي الهجاص ، و اديك تقول ماخدتش .
شفته آخر كراماته ، كرامات سيدي الهجاص ما بتخلصش ،
قال إيه و في الآخر عايز الكرسي و حاسبوني بعد سنتين ،
يا ابن الهجاصة يا صايع ، سنتين هاتجرب فينا ؟ و لا لتوفير لمبات موفرة ؟ و قطع نهر النيل من بلاد البرازيل ؟
ما أصلنا داقين عصافير
فين الفيل ؟
العلبة دي فيها إيه ؟
فيها خاتم
طراخ علي قفاه
العلبة دي فيها رئيس جمهورية
خاتم
طراخ
رئيس جمهورية
رئيس جمهورية رئيس جمهورية
و هانروح المولد .
روبا بيكيا
