اختلاف مفاهيم

المفاهيم عند السيساوى :

اللى انقذ البلد السيسى

اللى عايز يدمر البلد و يبيعها هو الاخوانى

الشهداء هما شهداء الجيش و الشرطة

اسوأ مرحلة فى تاريخ مصر هى ما بعد ثورة يناير حتى ٣ يوليو

٣٠ يونيو ثورة مش انقلاب

٦ ابريل و البرادعاوية و الاشتراكيين و ثوار يناير عملاء و خونة و ممولين عايزين يرجعوا الاخوان

المفاهيم عند الاخوانى :

أحسن رئيس حكم مصر محمد مرسي

اللى عايز يدمر البلد و يبيعها هما العسكر و منتفعى حكمهم و مؤيديهم

الشهداء هما شهداء رابعة و النهضة و ما بعد ٣٠ يونيو

احسن فترة فى تاريخ مصر الفترة اللى حكمها محمد مرسي

٣٠ يونيو انقلاب مش ثورة

٦ ابريل و البرادعاوية و الاشتراكيين و ثوار يناير عملاء و خونة و ممولين و كانوا السبب فى اسقاط مرسي

تشابه غريب بين السيساوى و الاخوانى فى حاجات كتير ، فعلا وجهين لعملة واحدة .

يا سيادة الرئيس

يا سيادة الرئيس البلد بتغرق و رايحة فى داهية

اصبر بس عندى تسبيلة ع الماشى كدة و داخل ع النحنحة

يا ريس بقولك رايحة فى داهية

يا عم اصبر شوية لا التسبيلة تيجى جنب العارضة ما اعرفش اتنحنح بعدها

بتغرق و الله العظيم بتغرق

مش عارف تصبر دقيقة ، اسبل ازاى فى الضغط العصبى دة يا رب بس

ال٧ جنيه

وزير التموين كان قال ان الفرخة ع التموين ب ٧٥ قرش ، و دلوقتى وزير الزراعة بيقول كيلو السمك ب ٥ جنيه ، طبعا الحكومة مش ناسية الشعب فى رمضان مدياكم منحة ٧ جنيه بحالهم يعنى يجيبوا ٣ فرخات و نص كيلو سمك و شوية رز ، و عيش يا معلم رمضان كريم ، هاتنهبوا و لا ايه
فالتحيا الحكومة
فاليحيا عبفتاح
و عبمتجلى
و عبعاطى كفتة

عنان و شفيق

مداخلة عنان التليفزيونية امبارح و تكذيبه للى قاله شفيق عن انه اتصل بيه ليلة اعلان النتيجة و ابلاغه بفوزه على مرسي فى الانتخابات ، بعد طبعا ما قال قصيدة مدح فى علاقته بشفيق و احنا اخوات و علاقتنا جامدة من زمان و و و و و و ، طبعا شفيق نرجع نقول انه رافع قضية فى الادارية العليا بالطعن على نتيجة انتخابات الرئاسة ٢٠١٢ و ان هو الرئيس الشرعى مش مرسي ، و الفرق بين عنان و شفيق ان عنان فى مصر و دى تفرق كتير اوى ، طيب ماشى ، السؤال هنا

ماذا لو عنان كان قال انه فعلا اتصل بشفيق قبل اعلان النتيجة بيوم و ابلغه بفوزه ؟

لو دة كان حصل فعلا ، يبقى حاجتين ،

اولا ان عنان بيعترف بحريمة خيانة الامانة منه و من رئيس اللجنة العليا للانتخابات اللى عرفه النتيجة قبل اعلانها رسميا و طبعا دة يعرضه للمحاكمة بتهمة خيانة الامانة و تكدير السلم العام و الخيانة العظمى بتزوير النتيجة لصالح جماعة يقال انها ارهابية ، و قضية سهلة جدا و محامى بشلن يكسبها و اعتقد دى كانت ورقة الضغط على عنان .

ثانيا قانونيا و دستوريا اعتراف عنان بأنه اتصل بشفيق يبقى دة يبطل مرحلة الاعادة من انتخابات الرئاسة و يجب اعادتها ، و الاعادة مرسي و شفيق ، بس مرسي فى السجن ، يبقى شفيق بالتزكية او دخول تالت المرحلة الاولى اللى هو حمدين ضد شفيق فى الاعادة ، و طبعا دة يخلى شفيق الرئيس الشرعى او على الاقل ضامن يبقى الرئيس .

السؤال الأول
ليه الادارية العليا لم تحكم سواء بالقبول او الرفض فى القضية اللى رافعها شفيق بأنه الرئيس الشرعى و شايلة القضية لحد دلوقتى لم تبت فيها ؟

السؤال التانى
هل المجلس العسكرى ما كانش يعرف ان مرسي هربان من السجن ؟
لو يعرف تبقى خيانة عظمى و يتحاكم كله بما فيهم رئيس المهاترات الحربية السيسى ، و لو ما يعرفش تبقى خيانة امانة و اهمال و برضه كله يتحاكم عليه .

السؤال التالت
هل الاحتفاظ بالقضية مقصود و ان مرسي خارج و التورتة رايحة لشفيق بموافقة الاخوان للمصالحة ؟

كل شئ متوقع فى البلد دى ، و ظهور عنان و شفيق اعلاميا بيقول كتير .

اذا اختلف اللصان

اعتقد كدة طبيعة المشكلة بين شفيق و السيسى بقت واضحة ، السيسى باع كل الناس اللى وقفت معاه سواء بحسن نية او بسوء نية ، و خلع بالتورتة لوحده بعد ما ظبط الجهات السيادية فى البلد و اعتمد عليها تحميه .

السيسى باع البرادعى و ٦ ابريل و كل القوى الثورية اللى وقفت ضد الاخوان ، سواء بفض رابعة و النهضة ضد رغبة البرادعى او بتخوين كل القوى الثورية بعد عزل مرسي و دلوقتى بقوا اللى برة مصر و اللى فى السجن .

السيسى باع ولى نعمته مبارك و ولاده و قضى على مستقبلهم السياسى تماما فى المستقبل بالحكم اللى صدر عليهم نهائى فى قضية القصور الرئاسية ٣ سنين و طبعا توقيت الحكم كان واضح انه بعد خروجهم و بدء ظهور جمال مبارك فى الصورة تانى فى اماكن عامة و تصويره .

السيسى باع مرسى اللى اقسم الولاء ليه ، و حنث بالقسم ، و كله عارف ان مرسي هو اللى خلاه وزير دفاع بعد اقالة طنطاوى و عنان .

و طبعا السيسى باع شفيق بعد ما خرجه برة اللعبة خالص و همشه تهميش كامل ، دة غير البلاغات اللى اتقدمت ضد شفيق و اعتقد هايلعب نفس اللعبة اللى لعبها مع مبارك و ولاده .

السيسى اقتنع ان دوره انتهى او قرب ينتهى و ان سيتم الخلاص منه و التضحية بيه ، خصوصا ببعد ضغوط كبيرة علشان المصالحة مع الاخوان و دة مستحيل فى وجود السيسى

فحب انه يتخلص من كل منافسيه ، او بدلاءه المتوقعين ، بس اكبر مشكلة واجهته شفيق ، اللى عايش فى ابو ظبى بعيد عنه و فى حماية اكبر حليف ليه ، اللى هى الامارات ، و فى نفس الوقت شفيق رافع قضية لسه منظورة فى الادارية العليا بأنه الرئيس الشرعى مش مرسي و القضية لم يتم الحكم فيها حتى الآن و دة برضه بيقول ان السيسى مش فى ايده كل حاجة ، و ان فيه اللى بيحركه و الدليل انه بسيطرته الكاملة على القضاء ماقدرش يخليه يرفض القضية او يحكم فيها لصالح مرسي ، بس حاول يضرب شفيق تحت الحزام فى زيارة المانيا و قال فى خطابه ان مرسي فاز بالرئاسة بانتخابات حرة نزيهة ، معنى كدة انه بيوصل رسالة لشفيق ما ينتظرش حاجة ، و بعدها بدأ هجوم شفيق عليه

خصوصا اليومين اللى فاتوا صدر تصريح من يوسف ندا من جماعة الاخوان بأن مطلوب منه يسعى فى المصالحة بين العسكر و الاخوان ، فى نفس التصريح مفيش مصالحة فى وجود السيسى . و ان حد كلمه يحضر خطة مصالحة من جهة سيادية .

تفتكروا اللى بيعمله السيسى دة حلاوة روح ؟ و انه خلاص عارف ان مهمته انتهت و بيهد المعبد على دماغ الكل ؟
و تفتكروا ان شفيق كرجل عسكرى من القوات الجوية و عايش فى الامارات حليف السيسى عارف كدة و عارف و متأكد ان السيسى دوره انتهى ؟
و ظهور سامى عنان فى الصورة و الاشاعات اللى طلعت عليه انه مرشح الاخوان و ترشحه و انسحابه ، و بدء ظهوره الايام دى و استشهاد شفيق بيه معناه ايه ؟

الامور واضحة ، المصالحة فى الطريق و دلوقتى وقت المساومات و مين هايشيل الليلة و يبقى كبش فدا ، و اعتقد ان الامور بدأت توضح و المعركة بقت تكسير عظام فى العسكر نفسهم ، ما ننساش ان شفيق و عنان من الجيش ، و اكيد ناس كتير فى الجيش ولاءهم ليهم و هايقفوا معاهم ، خصوصا القوات الجوية و الدفاع الجوى اللى منه عنان ، يا ترى الجيش هايقف مع مين و يضحى بمين ؟
و يا ترى هانفضل كدة هما يتخانقوا على التورتة و احنا محلك سر بنلف فى دايرة مقفولة و لا هانفهم اللعبة مرة فى حياتنا ؟

اذا اختلف اللصان ظهر المسروق ، اعتقد الايام الجاية لسه فيها كتير .

هاتغرق بالكل

عايز اقول حاجة ،
فى رواندا بعد ما انتهت الحرب الاهلية و مات فيها اكتر من مليون و نصف مليون مواطن ، حاكموا اعلاميين كمجرمى حرب و اتحكم عليهم بالاعدام ، لدعواتهم للعنف و القتل ، و فى روسيا بعد الثورة البلشفية ١٩١٧ حاكموا صحفيين بإثارة الفتنة و الدعوة للعنف ، يعنى من الآخر مفيش اعلامى يقول عايزين جثث عايزين دم مهما كان ، دة كدة بيدعو لحرب اهلية مش اكتر ، و مريض نفسيا و اعتقد عدم اكتراث المصريين بأى دماء تسيل يدل دليل مؤكد ان القادم اسوأ و لو فعلا ما اقتنعوش ان كله هايدفع التمن و الكبار سواء السيسى او قيادات الاخوان او مبارك او رجال الاعمال او الاعلاميين او المجلس العسكرى او نشطاء السبوبة او القضاة او قيادات الداخلية او الحكومة ، انتم مش فارقين معاهم حاجة ، انتم مجرد عساكر على رقعة شطرنج و نضحى بالعسكرى علشان الملك يعيش ، ماحدش له دية ، ملعون ابو السياسة اللى خلت المصريين يكرهوا بعض و يشمتوا فى موت بعض و متعطشين لدماء بعض . ما طول عمرنا عايشين مع بعض ، فوقوا بقى من الكراهية اللى انتم فيها و الا كله هايدفع التمن ، و يا ريت كل واحد يسأل نفسه لو جاره اخوانى ، او لو اخوانى و جاره مؤيد للسيسى ، او لو اخوانى او مؤيد للسيسى و جاره مؤيد لثورة يناير و جاتله فرصة يقتله من غير ما يتحاسب ، هايقتله و لا يقول دة جارى و طول عمرنا جيران ، او لو الجار دة اتقتل لأى سبب هايشمت فى موته و لا هايقول ربنا يرحمه . اجابة السؤال فيها احنا وصلنا لأيه . و بقينا شعب بشع ازاى و ملانا السواد .
فوقوا لأن كله هايدفع التمن و الكبار هايسيبوها تغرق و يمشوا مش هايغرق الا الشعب بكل انتماءاته .

ضلمة و نور

فيه ناس من كتر ما عاشوا فى الضلمة ،
أما شافوا النور عينيهم وجعتهم منه ،
و اقتنعوا ان العيب فى النور ، مش فى عينيهم ، علشان كدة لعنوا النور ، و حاربوا بكل قوتهم علشان يرجعوا يعيشوا فى الضلمة تانى .

تقسيم التورتة

اشمعنى دلوقتى افتكروا شفيق ، و بقى يطلع فى البرامج و لازم يرجع ، يا ترى بعد صراع السيسى شفيق و انقسام الدولة العميقة ، تم الاتفاق على تقسيم التورتة ، و ان شفيق يبقى بديل لمحلب فى رئاسة الوزراء ، خصوصا بعد تصاعد الاصوات بإقالة محلب و تعيينه مستشار لرئيس الجمهورية ، و خصوصا برضه ان السيسى تنازل عن جزء من صلاحياته لرئيس الوزراء ، و يا ترى الضلع التالت فى الأزمة المختفى سامى عنان ، اللى اسمه ورد فى الاعلام السعودى انه ممكن يكون الحصان الكسبان فى المصالحة بين العسكر و الاخوان هايبقى دوره ايه الايام الجاية ، و باعتبار السعودية تثق فى رجل امريكا الاول عنان ، و الامارات احتضنت شفيق ، و علاقة الاتنين الجيدة جدا بسرطان الدولة العميقة و الجيش ، يا ترى تقسيم الادوار المرحلة الجاية هايبقى ازاى ، و يا ترى هايبقى فيه احلال و تبديل ، و يا ترى مين الاقوى ، السعودية و لا الامارات ؟
دة احنا هانشوف ايام سودة .

غيبوبة

الشعب فقد الوعى اما نزل ضد مبارك
و بعد كدة رجعله الوعى و قال الجيش و الشعب ايد واحدة
جه فقد الوعى تانى و عصر لمون و انتخب مرسي
بعدها رجعله الوعى و نزل فى ٦/٣٠ و عزل مرسي
جه بعدها فقد الوعى و صدق ان السيسى مش هايترشح
بعدها على طول رجعله الوعى و انتخبه بالملايين زى ما بتقولوا
جه قام فاقد الوعى ، ماينفعش نعمل انتخابات لشعب فاقد الوعى يعنى ، تبقى مصيبة ، ممكن يجيبلنا الفلول و لا حاجة .
ههههههههههههههه هو الشعب فى غيبوبة و لا واعى ، الحكومة اللى تقول ، فالتحيا الحكومة ، فاليحيا عبفتاح ، و عبعاطى و عبمتجلى

ايها المواطنون

ايها المواطنون
قرر الزعيم طويل العمر يطول عمره يزهزه عصره ينصره على مين يعاديه

انشاء مليون وحدة سكنية
و حفر قناة ع الناشف
و عاصمة جديدة
و الفرخة ب ٧٥ قرش
و بناء ١٠٠٠ مصنع جديد
و استصلاح مليون فدان

بس حسبها كدة لقاها ما تنفعش

لغى المليون وحدة سكنية و عمل مكانها ٥ سجون جديدة ، و هو اللى هايسكنوا فى دول يدخلوا دول

بدل حفر قناة ع الناشف باع الارض اللى حوالين القناة بالأمر المباشر للاجانب ، و اهو يا بخت مين نفع و استنفع

بدل ما يعمل عاصمة جديدة ، نزل الداخلية تقتل فى سكان العاصمة القديمة و اهو نفضى القديمة بدل ما نجيبلها ضرة

بدل الفرخة ام ٧٥ قرش رفع الدعم و بقت الفرخة ب ٤٠ جنيه و اهو برضه يا جماعة الغالى تمنه فيه

بدل ما يبنى ١٠٠٠ مصنع جديد ، اصدر قانون يولى كل المناقصات بالأمر المباشر و يقفل ١٠٠٠٠ مصنع قديم و اهو الله جاب الله خد الله عليه العوض

و بدل ما يستصلح مليون فدان راح مضى على اتفاقية سد النهضة و قلل حصة المية و منع زراعة الأرز فى ٣ محافظات ، و اهو يا بخت مين بات مغلوب و لا باتش غالب

مبسوطين يا مواطنين
مقضيينها و فرحانين

ربنا يخلى الرئيس
طويل العمر يطول عمره يزهزه عصره ينصره على مين يعاديه
جتكو القرف مليتو البلد

تفصيل قوانين

احلى حاجة فى الدنيا اصدار القوانين ، و انك تعمل اللى انت عايزه بالقانون ، تسرق و تنهب و تقتل و تحبس بالقانون ، دة الفرق بين السيسى و مبارك ، يمكن الفرق الوحيد بينهم ، ان مبارك طحن الشعب فقر و جهل و مرض ، السيسى بقى خلى الفساد قانونى ، اتعلم من محاكمة مبارك و عمل حسابه نشوف كدة اهم القوانين اللى صدرت

مثلا لو نزلت مظاهرة و اعترضت من حق الداخلية تستعمل معاك الغاز و الخرطوش قانونى ، بموجب قانون التظاهر ، ما حدش هايتحاكم و هو ماشى قانونى ،

ياااااه بقى لو حد بلغ عنك انك اخوانى ارهابى عميل ، بموجب قانون الارهاب طلقة فى دماغ حضرتك و انت فى بيتك و على سريرك وسط عيالك ، دة قانونى ، مسموح باستخدام الرصاص الحى علشان الارهاب . القانون بيقول كدة .

قانون تانى صدر يسمح لبيع الاراضى حول محور قناة السويس للمصريين و الاجانب ، ماحددش طبعا جنسية الاجانب ، يعنى اللى معاه يشيل ، تدفع تلاقى و بيع يا عواد

دة غير طبعا الغاء المناقصات و ان من حق رئيس الجمهورية و رئيس الوزراء اسناد المشروعات بالأمر المباشر ، يعنى لا عطاءات و لا مناقصات ، و اللى هايشتغلوا معانا حبايبنا بس ، رجال اعمالنا و الجيش بتاعنا و بالأمر المباشر يا معلم .

ندخل على قانون الاستثمار الجديد و نقول ، من حق اى حد من اى جنسية فى الدنيا يشترى اى حاجة فى مصر ، اراضى ، عقارات ، منتجعات ، شركات ، اللى عايز ييجى يدفع و يشترى و تبقى بتاعته من حقه يعمل اى حاجة فيها ، ماحدش هايناقشه ، يدفن نفايات ، يزرع مخدرات ، احنا بنحميه بالقانون

و طبعا علشان حبايبنا فى الامارات ما يزعلوش لغينا اى مناطق حرة فى مصر و بالقانون ، ممنوع عمل اى منطقة حرة ، يعنى اللى ييجى بعد كدة يعمل منطقة حرة فى قناة السويس و يدمر دبى تماما ، يا راجل عيب امال صرفوا كل دة على السيسى ليه .

بس طبعا السيسى ممكن يمشى و اللى هايشترى مش ضامن مين هاييجى بعده ، نحمى كل الفساد دة ازاى ؟
قول انت بقى
اصدرنا قانون بعدم جواز الطعن على اى عقود ابرمتها الحكومة مع اى حد الا من طرف من طرفى العقد ، يعنى الحرامية بس اللى مسموح ليهم يطعنوا على بعض ، اى حد تانى لأ . يعنى حتى لو مشى السيسى ماحدش هايقدر يطعن على اى حاجة و كله بالقانون ، و اللى هايتاخد فى عهد السيسى مش من حق حد يرجعه و الا يدخل فى محكمة دولية و تعويضات و ليلة سودة مهببة على دماغ اللى خلفوا الشعب .

اكتر من ٥٠٠ قانون اصدرهم السيسى ، معظم الناس ما تعرفش عنهم حاجة .

و كله بالقانون ، فساد و سرقة و نهب و قتل بالقانون .

تهييس لذيذ

يا منجى الوحش من الجحش
و رافع ع الكرسي حمار
نزلت تعزل البغل
و تجيبلنا تعلب مكار

و الدبة وقعت فى البير
و لبسنا كلنا طراطير
من قنديل او كدة ببلاوى
و ختمنا بمحلب بيطير

يا غراب البين ليلتك طين يا معلم
شغال خطابات و احلى كلام بتتكلم
لا نفذت وعد و سايب الشعب كدة مبلم

سيسى واوا سيسى واوا
سيسى سيسى وا
سيسى واوا سيسى واوا
سيسى سيسى وا
اخرب فيها اكتر
و الحرامية تكتر
احبس و اقتل
انهب و اسرق
سيسى وا وا وا

قضاءنا طاهر
و هيفضل طول عمره طاهر
تنطق اعدام
لا نقض و لا كلام
تقتل دى براءة
تسرق دى براءة
بعودة الأيام

سيسى بابا بعد الضنا لابس حرير فى حرير
بيقول انا و انا
ماشى وراه حمير
اعلامه عمال يطبل
و الخيبة بالقناطير

يالا حالا بالا بالا
شفنا التسريبات
واخدين بلدنا فحت و ردم
و ابوك السقا مات
حلوة التسريبات

قال فوضونى و اخليها
حتة من الجنة
هاتعيشوا حياتكم و الشعب
هايفرح يتهنى

فوضناه فوضناه
يوم ورا احنا لبسناه
فوضناه فوضناه
رايح فى داهية واخدنا معاه

رحت لرئيسنا الجميل
طلبت شئ مستحيل
عايز اتجوز يا ناس
و انا على الحديدة
قولت يجيبلى شقة
فى العاصمة الجديدة

و حواجبه اتنفشوا باعجوبة
و اترسموا سبعة مقلوبة
و ندهلى و قال يا حياتى
دى مصر دى تبقى مراتى
و عندى مليون قرداتى
بينفذ تعليماتى

من اسوان لاسكندرية
الداخلية بلطجية
و ضبطية قضائية
و كله بقى رد سجون
عمال يزيف فى الحقيقة
و الاحلام بقت غريقة
و شفنا جنون فى جنون

عواد باع ارضه يا ولاد
شوفوا طوله و عرضه
يا ولاد
بصوله قولوله
يا ولاد
على عرضه و طوله
يا ولاد

شحااااات و مد ايديه
و كسر خاطره حرام
دة احنا نور عينيه
و مقضيها كلام
ارميله منحة
و لا قرض
اهو فى يوم
هايبيعلك ارض

الخيبة الكبيرة يا عمى
و المقاطيع كتيرة
و الاعلام عمال يطبل
و الشعب فى حيرة
الخيبة الكبيرة يا عمى
الخيبة الكبيرة

تسلم الايادى
بلعها جيش بلادى
تسلم الايادى
لا حياة لمن تنادى

و انتهى التهييس
و الشعب راح فطيس
و اتلم خايب الرجا
فى احضان المتاعيس

و سيس سيس سيس سيس
ريسنا مقضيها تهييس
سيس سيس سيس سيس
قفلوا الميادين بالمتاريس
سيس سيس سيس سيس
زنزانة مقفولة بالترابيس
سيس سيس سيس سيس
و بلاوى تحصل فى الكواليس

مبروك مبروك مبروك
مبروك عليكم و علينا
مبروك مبروك مبروك
هايطلع عين اللى جابونا

و تخلص الحكاية
لا بداية و لا نهاية
و من امتى كانت
كتاكيت من الحداية

راضى يا ريس

بعد سنة من حكم السيسى ، يا ترى راضى عن اداء الشعب يا ريس ،
قتل و قتلت
سحل و سحلت
اعتقال و اعتقلت
رفع دعم و رفعت
توليع اسعار و ولعت
كدب و كدبت
وعود فى الهوا و وعدت
بيع البلد و بعت
تهجير و هجرت
بيوت و هديت
حرايق و حرقت
ارهاب و صنعت
تفجيرات و فجرت
انتقام من المعارضة و انتقمت
كهربا و قطعت
سفر بممثلات و مطبلاتية و سافرت
سجون و بنيت
طلبة و حبست
الفاسدين و برأت
تشويه و شوهت
اشاعات و طلعت

و الشعب تقريبا مات و اتكفن بس بيستعطف سيادتك ما تبخلش عليه بتصريح الدفن ، اتمنى تكون راضى عن اداء الشعب يا كبير و مبسوط كدة و فرحان بينا .