إشى خيال يا ناس

من شهور تنازل السيد الخسيس عن بعض صلاحياته لرئيس الوزراء ابراهيم محلب ، بعدها بشهرين تنازل برضه السيد خسيس الجمهورية عن بعض صلاحياته لوزير الدفاع المتحصن بالدستور  ٨ سنوات و الكلام دة حصل ايام احداث ثورة طلاب الجامعات قبل ما يقتلوا الطلبة و يعتقلوهم بعد اعتبار كليات الهندسة منشآت عسكرية ، و طبعا كدة الجيش بقى فى الشارع بقانون صادر من رئيس الجمهورية ، ما علينا مش مشكلتنا .
المهم ان بعدها بقى خسيس الجمهورية يصدر قوانين و رئيس وزراءه يصدر قوانين ، و الأهم بقى وزير الدفاع يصدر قوانين ، ايه بقى القوانين دى ، كل يغنى على ليلاه و كله بيخدم كله نشوف كدة
الخسيس اصدر قانون ان من حق محلب انه يسند اى مناقصة بالأمر المباشر لجهة معينة ، و بكدة طبعا كله راح بالأمر المباشر للهيئة الهندسية للقوات المسلحة اللى خدت كل المشاريع فى البلد ، و لا عزاء للشركات و لا العمال اللى هاتتشرد و لا البيوت اللى هاتتخرب ، المهم الجيش ،
جه بقى وزير الدفاع لأول مرة فى التاريخ فى اى بلد بيصدر قانون باعفاء نفسه ، قصدى باعفاء كل منشآت الجيش اللى تقريبا نص البلد بتاعته من الضريبة العقارية ، دة طبعا لأن كل مشاريع الجيش معفاه اصلا من كل انواع الضرايب التانية ، يعنى من الآخر موت و خراب ديار ، هى الشركات الوحيدة اللى شغالة و فى نفس الوقت معفية من كافة انواع الضرائب ، وكمان كارتة الطرق و الصناديق الخاصة لهفوها ، و قال ايه البلد فيها فقر و بطالة و مفيش ، ما عنديش ، هاتاكلوا مصر يعنى ،
إشى خيال يا ناس 

جمهورية الموز

#جمهورية_الموز
معروف ان معهد القلب القومى فى امبابة هو الوحيد فى مصر و على مستوى الشرق الاوسط و طبعا بيجيله تبرعات بالملايين علشان الغلابة تتعالج ، قوم ايه شيخ محلب فجأة و بدون مقدمات و على سهوة عمل زيارة لمعهد القلب ، فجأة ، طبعا الناس الحقودة اللى هايقولوا ازاى فجأة ازاى و الصحفيين صوروه و هو داخل و على سلم المعهد ، الحكومة قالت فجأة يبقى فجأة ، مالناش فيه ، هاتعرفوا اكتر م الحكومة ، فالتحيا الحكومة ، فاليحيا ابراهيم محلب ، و ابراهيم حسن و خالى ابراهيم .
المهم يعنى محلب اكتشف القصور فى معهد القلب اللى بيجيله تبرعات بالملايين ، فأصدر السيد فتيس الجمهورية قرار باسناد اعمال تطوير معهد القلب بالأمر المباشر للهيئة الهندسية للقوات المسلحة بتكلفة مفتوحة ، رئيس جمهورية الموز بيصدر قرار تطوير مستشفى للجيش ، علشان الجيش يلهط تبرعات الناس الغلابة اللى بيتعالجوا بيها ، مش احسن ما نبقى زى بوروندى و تنزانيا .
حسبنا الله و نعم الوكيل .

عايزين نكمل الثورة

متخيل كدة بنتى بعد عشرين سنة تجيلى و تقولى يا بابا غايزين نكمل الثورة اللى ماحققتش اهدافها و انتم بدأتوها
حوار كدة ما بينى و بينها

بابا عايزين نكمل الثورة

ليه

ليه ايه ؟ انت مش كنت مع اللى نزلوا فى ثورة يناير ٢٠١١ من ٢٥ سنة و لسه لحد دلوقتى نظام مبارك زى ما هو

ايوة ماشى بس اشمعنى يعنى

عايزين نكملها و نحقق اهدافها

طيب انتم جربتم تبقوا زى سوريا او زى العراق

لأ ما جربناش

جربتم تبقوا زى ليبيا

لأ ما جربناش

يبقى ازاى عايزين تكملوا الثورة و انتم مش عارفين اننا احسن ما نبقى زى سوريا و العراق و ليبيا

بس البلد خربانة و الناس بتموت من الجوع و العسكر و نظام مبارك و الاخوان ناهبين البلد و كلهم زى بعض و عمالين يبدلوا علينا

انتى متخيلة انها سهلة بس هى مش سهلة ، انتم تنزلوا و يطلقوا عليكم العربجية بتوع الداخلية

بس كل حتة فيها الوحش و الحلو

الا الداخلية و الجيش ، الفرق الوحيد بين القاتل و الشريف فيهم ان الشريف لسه ما قتلش

انت عايز ايه يا بابا

عايز اقولك يا بنتى ان الثورة دى شالت مبارك بالستر من عند ربنا

مش فاهمة

يعنى فى اى بلد الناس بتتعلم من اخطاءها ، الا فى مصر عندنا ايحاء غريب اننا حمير ، و ما بنتعلمش ، يعنى انتم دلوقتى عايزين تكملوا الثورة و احنا قلنا عايزين نكمل الثورة ، و ولادك هايقولوا عايزين نكمل الثورة ، يبقى العيب مش فى الثورة

بس احنا غيركم ، انتم شيلتم مبارك هتفتوا لطنطاوى الراجل بتاعه ، شيلتم طنطاوى و عصرتم لمون و شيلتم مرسى بتفويض بالقتل و لبستم تانى فى الراجل بتاع مبارك اللى اسمه السيسى، شيلتم السيسى و بقت بين عنان و شفيق ، معلش يا بابا مش احنا اللى لا مؤاخذة حمير

يعنى انتى دلوقتى عايزة تقنعينى انكم هاتقدروا تشيلوا جمال مبارك ، يا بنتى دة كويس ، مش احسن ما نبقى زى سوريا و العراق . ياااااااه فين ايام حبيب العادلى كان ملاك .

مولد سيدى النحنوح

طبعا بمناسبة مرور سنة كاملة على حكم سيدى النحنوح و البلد كلها فى طريقها الى سكة الندامة ، و سكة اللى يروح ما يرجعش ، قلنا نطلع على مولد سيدى النحنوح و نشوف الدنيا ايه فى مولد الاوهام .

و هانروح المولد
و اول ما دخلنا المولد لقينا الساحر عبعاطى ، و لا سحر و لا شعوذة ، اعالج كل حاجة ، اعالج الايدز بالكفتة و فيروس سى بالاريال ، و جهزنا متجرب و كله تمام و روح على الشئون المعنوية و اسأل ، كله بالحب ، يدخل الفيروس من هنا يطلع كفتة من هنا ، خدلك رغيفين و بالهنا ، قشطة يا سلطنة ؟
هيييييييييييييييييه

يلا نشوف الناس اللى هناك دول بيعملوا ايه ؟ اى الحفر دة كله ؟ ايه دة كله ، ايه دة كله ، حفر على الناشف اجودعان ، بنعمل قناة جديدة ، و كله مراجيح و كله بيتفرج ، و البلطجى على الباب واقف ، و هاتدفع يعنى هاتدفع ، اصل مفيش ، ماعنديش اديكم ، هاتاكلوا مصر يعنى ؟

التذاكر غالية اوى فى المولد دة ، اصل اترفع من عليها الدعم ، كله مش لاقى يشترى حاجة ، و كله ما معاهوش اى حاجة ، و كل حاجة غالية فى المولد و الاسعار نار ، و نار يا حبيبى نار ، يلا تفويض على تفويض يفعل الله ما يريد .

مين المتعلق هناك دة ، دة امن المولد معلقين واحد و بيلعبوا فيه البخت ،
يمكن حرامى
و لا رئيس عصابة
و لا نصاب
و لا قتل حد
للأسف كل دول فى مولد سى النحنوح براءة و ما بيتحاسبوش ، الامن بيمسك و يعلق اللى يغلط فى سيدى النحنوح بس ، اكيد طالما غلط فيه يبقى ارهابى عميل خائن يستحق التعليق مؤقتا حتى يتم نقله الى احد سجون المولد و يحاكم محاكمة عادلة و يعدم ، و اكتر حاجة فى المولد السجون ، ما شاء الله ، اسرع حاجة بتتبنى .

نطلع على الغوازى و المشخصاتية ، اللى كانوا فى بعثة لألمانيا مع كبير المولد و كل مولد ، يطبلوله و يصقفوله و يرفعوا صورة سيدى النحنوح و انجازاته الوهمية فى العقل الباطن مستخبية ، و طبل يا طبال و ارقصى يا غازية و غنى يا مغنواتى على خيبة بهية و أبوح يا أبوح على مولد سيدى النحنوح .

هانروح المولد

و ندخل على الملاهى و الشعب متلاهى ، عندنا ارهاب و الهيشة هباب ، و الطلبة اتسجنوا و الباقى اتقتلوا و راح الصغار ، و و الكبار عايزين استقرار ، اللى بيفهم ضاع و فضل الحمار .

عندنا عاصمة ادارية ، هاتتعمل و لا لأ دى من الامور الوهمية ، جت فى مؤتمر اقتصادى ، مؤتمر مش عادى بعد ولادة قيصرية ، و اضطرينا نضحى بالأب و بالأم و الجنين علشان الدكتور و يعيش ، و مفيش ، و اللى ييجى فى الريش بقشيش ،
و حى
النحنوح جاى

عندنا مشروعات خيالية ، تسريبات شمسية ، و ضبطية قضائية ، مع جيش و شرطة و مواطنين بقوا مخبرين ، و بلغ عن جارك و اخلص منه ، و كله بالقانون ، السرقة قانون و القتل قانون ، كله بالقانون ، و العاقل بقى مجنون ، و حنتوس يا حنتوس يا مفضى البلد م الفلوس ، بتحكم التيوس و اللى البيادة يبوس ، و على الغلبان تدوس
و حى
الاسعاف جاى .

يبقى انت اكيد فى مصر

اما يبقى الزند اللى قال انهم اسياد و باقى الشعب عبيد وزير عدل ، يبقى انت اكيد فى مصر

اما حبيب العادلي ياخد براءة و يطالب باعتذار رسمي من الدولة بعد كل اللى عمله من قتل و تعذيب و اعتقال و سرقة ، يبقى انت اكيد فى مصر

اما الجيش يعمل شركة مقاولات رأس مالها ١٠٠ مليون جنيه و تاخد كل المشاريع الحكومية بالأمر المباشر ، و و كل شركات المقاولات الصغيرة و المتوسطة تخرج من السوق و تقفل و العمال تتشرد ، يبقى انت اكيد فى مصر

اما يطلع ان المليون وحدة سكنية للشباب فنكوش و فى نفس الوقت يتبنى تانى اكبر سجن على مستوى الشرق الاوسط و افريقيا فى ١٥ مايو و فى وقت قياسى ، يبقى انت اكيد فى مصر

اما كل الاعلام الاوروبى بيتكلم عن فضايح زيارة السيسى لألمانيا ، و الاعلام المصرى بيتكلم ليل و نهار عن انجازاته فى الزيارة دى رغم ان الفضيحة كانت على عينك يا تاجر ، يبقى انت اكيد فى مصر

اما رئيس رايح زيارة رسمية لدولة و واخد معاه ممثلين و مطربين و اعلاميين يقفوا يرفعوا صورته و يبينوا ان ليه مؤيدين و يسافروا قبله بكام ساعة علشان يستقبلوه فى المطار ، يبقى انت اكيد فى مصر

اما الجيش مسيطر على ٦٠٪ من اقتصاد البلد اللى المفروض للشركات المدنية ، و عنده مصانع مكرونة و اجهزة كهربائية و مواد غذائية و شركات مقاولات و قاعات افراح و نوادى و فنادق و اراضى ، و فى نفس الوقت بيسخر المجندين بدل ما يحموا الحدود يشتغلوا فى مصانعه و كمان كل دة يتعفى من الضرايب ، و فى الآخر يقولوا فيه بطالة و البلد مافيهاش فلوس ، يبقى انت اكيد فى مصر

اما واحد محكوم عليه بسنتين سجن حكم نهائى و ياخد تأشيرة و يسافر المانيا مع رئيس الدولة لمجرد انه بيطبل على قناة فضائية زى احمد موسي ، و فى نفس الوقت شباب الثورة بيتعذبوا فى السجون ، يبقى انت اكيد فى مصر

اما واحد رايح يمتحن فى كليته ، و يتخطف و هو خارج من اللجنة بعربية بوكس و تانى يوم تلاقى جثته مضروب بالرصاص فى الصحراء و يقولك اشتبك مع الداخلية ، يبقى انت اكيد فى مصر

اما تبقى رايح جامعتك ، رايح تشترى حاجة ، و فجأة تلاقى عربية وقفت و خدوك و اختفيت ماحدش يعرف عنك حاجة و لا مكانك ، يبقى انت اكيد فى مصر

اما عربية جيش تدهس ٤ سيدات فى ٦ اكتوبر لمجرد ان الستات دى من الفقر عايزين شنط رمضان و بدل ما ياخدوا شنطة رمضان خدوا تذكرة للآخرة ، يبقى انت اكيد فى مصر

اما رئيس دولة فى عهده اتقتل اكتر من ٥٠٠٠ مواطن و تم اعتقال اكتر من ٤٠٠٠٠ مواطن ، و رايح اوروبا يتكلم انه بيحترم حقوق الانسان ، يبقى انت اكيد فى مصر

اما جريدة الوطن تنشر استطلاع رأى ان ٩ من كل ١٠ مصريين بيأيدوا السيسى و ان الشعب كله معاه و مصدقين نفسهم ، رغم ان من خوفه قافل الميادين و قافل محطات المترو و خايف الناس تنزل ، يبقى انت اكيد فى مصر

اما مبارك و كل حاشيته اللى نهبوا البلد ٣٠ سنة فساد و رشوة و سرطان و التهاب كبد و فقر و جهل ، ياخدوا براءة من كل حاجة و يتمتعوا بالفلوس اللى نهبوها من قوت الشعب غصب عن ام الشعب ، يبقى انت اكيد فى مصر

هى دى مصر
ايه رأيك ؟
عجبتك مصر

اكبر سجن

وزير الداخلية افتتح سجن ١٥ مايو ، الناس مش مقصرين معانا بصراحة ، جمايلهم غرقتنا ، يقال ان سجن ١٥ مايو تانى اكبر سجن فى الشرق الاوسط و افريقيا ، مش عايز السيساوية يزعلوا انه المركز التانى ، لأن اكبر سجن فى الشرق الاوسط و افريقيا سجن وادى النطرون عندنا برضه ، و اكيد هايطلع برضه من عندنا تالت اكبر سجن و رابع اكبر سجن و نحتل كل المراكز الاولى فى جهبذة الوزير فى افتتاح سجون بكتير .

سياسة عادل امام

العسكر و الاخوان : عريس من جهة امنية

الداخلية : الواد محروس بتاع الوزير

رجال الاعمال : بوبوس

القوى الثورية : زهايمر

السلفيين : عنتر شايل سيفه

الاحزاب : دموع فى عيون وقحة

اسفين يا ريس : فرقة ناجى عطالله

الشعب : الهلفوت

حزب الكنبة : النوم فى العسل

٦ ابريل : الارهاب و الكباب

ثوار يناير : كراكون فى الشارع

السيسى : الواد سيد الشغال

احنا شعب

احنا شعب شرب الوهم ،
و نام مع الهوا ،
و انجب الشيطان ،

شعب جبار بصراحة ،
تجيله من هنا
ييجى من هنا ،
كل ما تسد خرم ،
يفتحلك تلاتين خرم ،
شعب يغرق اى سفينة
و يرسي فى اى مينا ،
شعب يضيع اى فرصة
لأنه يعيش ،
شعب اتعود ان مش بإيدى مفيش ،
شعب اتعود ع التهزيق ،
شعب بيتروق ترويق ،
شعب بيعشق يبقى فى ذل ،
شعب بيغرق فى الكل ،
شعب غريب ،
شعب عجيب ،
شعب لقطة و فل الفل

عمل اللى عليه

الراجل عمل اللى عليه و زيادة ، قال هايلاقى مظاهرات معارضة لزيارته فى المانيا ، قال ياخد المؤيدين معاه و هو ماشى ، و اهو تأييد على تبديد ، المهم الراجل قال الم شوية مشخصاتية على كام مغنواتى يعملوا منظر فى برلين ، و يبينوا للعالم ان انا المتين ، قام واخد يسرا و الهام و معاهم هشام نسناس و المخرج الحلزونى خالد يوسف ، و الخبير الاستراطيجى هاله صدقى ، و تهنئة من تيتة لبلبة و سلامى لام احمد بمناسبة سفر احمد رغم انه محكوم على بسنتين سجن و ام يوسف بمناسبة طهور يوسف فى المانيا و يا رب ما يرجع بالسلامة ، و من جدو احمد بدير و عمو العلايلى اللى متضايقين ان جدو خد على قفاه اول ما وصل من عميل خائن و عندنا رسالة من رقيع بيه و الواد العربى بيهنوا ذئاب الجبل لإستيلاءهم ع الكرسي ، و من ماما فيفى اللى زعلانة و بتقولكو عيب ما تسافروش من غيرى تانى و النبى .

يا بلدنا

يا بلدنا يا بلد التعريص
فى كل حتة فيها قراطيس
نحنحة سهوكة
سيلفى و تحسيس
و طبل و زمر على البلاليص

يا بلدنا يا بلد التوهان
و رئيسك اقرع بودان
عهود و وعود و اد الدنيا
و اهو كله راح فى خبر كان

يا بلدنا ما بين الاتنين
عسكر اخوان و الباقى فين
كله مقضيها اعمى و اطرش
و ماشى ويا شيوخ سلاطين

يا بلدنا الشعب اهو مات
و كله بيبكى على اللى فات
لعبوها صح الشياطين
و رمونا فى المعتقلات

يا بلدنا الحر مسجون
و العاقل كدة بقى مجنون
و يقولك محلولة الازمة
و هانستحمل مهما يكون

يا بلدنا باعونا ببلاش
و اللى يعارضهم ما يستناش
قتل و حبس و سحل و موت
من واحد عرص ما يسواش

يا بلدنا هانموت م الجوع
و اى واحد فيما موجوع
و ناس كل اللى هممها كراسي
و بيحميها سلاح و دروع

يا بلدنا و لأمتى الذل
طب عرفينا ايه الحل
نكره نفسنا اكتر من كدة
و لا نعيش فى حقد و غل

يا بلدنا تعتبتينا وياكى
دة احنا الحلم اللى بيهواكى
احنا الأمل اللى مش هايضيع
و هايفضل العمر وراكى

يا بلدنا سبتك على عينى
بس سرقتى منى سنينى
ضيعتينى و خذلتينى
برضه بحبك
باعشق ارضك
حتى لو فيها قتلتينى

الراجل رايح المانيا

الراجل رايح المانيا
بيسرا و الهام ،
دى زيارة و لا حاجة تانية
و اهو كله كلام
رايح يتحنجل و فى ايده
شوية نسوان
سيبك انت اللى كان اهو كان

و طلع النبطشى على المسرح
معاكم فى المانيا ، ترامادول الرقصة الشعبية ، و الامور المستخبية ، اللى بيعدل دماغ الحمار و يصدع اللى فى عقله افكار ، اللى ودى الشعب فى داهية ، لا سحر و لا شعوذة ، السيسى استاذ الاساتيذ فى رحلة فى اللذيذ و نقول مين السيسى ، حفر ع الناشف و عالج الايدز بالكفتة ، امر مباشر و بيع الشعب هدومه و لبسه بفتة ، السيسى ، ملك ملوك النحنحة ، و السهوكة و الرحرحة ، اللى يوم ما راح المانيا خد معاه الغازية و المشخصاتية ، و ساب العلماء و المخترعين و اللى بياكلوا فول و طعمية ، السيسى اللى باعها و نهبها و قسمها و لسه الناس بتغنى ، اللى جاب ضرفها و خلى الحرية تمنى ، اللى قتل ولادها و حبسهم و لسه بيبنى سجون ، عاقل دة بس و لا حسبوه علينا مجنون ، اللى جاب الزند للقضا ، اصله فضا ، و القضا شامخ و الدنيا هلى رأى شيخ الازهر تلاهى ، السيسى الاى قلبها ملاهى ، تعارضه تدخل بيت الرعب ، تأيده هاتعيش فى فقر و غلب ، اللى نصب على الشعب بالشعب ، ترامادول الرقص و تسلم الايادى و شغل الكباريهات ، السيسى و اللى فات يا حبيبى مات و اللى ما فاتش برضه مات ، و كله يغنى من سكات و سمعنى سلام كبير اوى و غنى بعلو الصوت
و سلام كبير اوى لترامادول الفولكلور الشعبى
و انا شارب سيجارة بنى
حاسس دماغى بتاكلنى
قاعد ارقص و اهبل
و اطلع جعان و باطبل
و بشرة خير و باغنى

اه يا شعب مساطيل ، لسه اللى جاى تقيل .

عجائب ام الدنيا

ام الدنيا دى ما بقاش حد عارفلها حال و لا رايحة فين و لا جاية منين ، و دايما جوزها فيه حاجة غلط ، حظها زفت كل مرة ، اللى نكسها فى ٦٧ جه اللى وكسها فى ٧٩ و بعدها اللى نحسها ٣٠ سنة فقر و جهل و مرض ، و بعدها اللى حبسها و الشعب بيغنيله ايد واحدة ، و بعدها اللى فضحها و جرسها فى ٢٠١٢ و جه الطرطور اللى شرع قوانين و فى الحيط لبسها فى ٢٠١٣ و اخيرا حاليا فى ازهى عصور المحروسة اللى مشهورة بالقرع و الكوسة ، و بالعاهات مهووسة ، و ولادها من حوسة لحوسة ، اتجوزت الزعيم ، اللى طبلوله و رقصها ، و فضل يرقص فيها لما قطعت النفس ، الواحد اما يروح زيارة لبلد ياخد رجال اعمال و وزراء و علماء علشان البحث العلمى ، و علشان كدة
و علشان كدة قرر  الريس نحنوح اصطحاب الخبير العسكرى الدبابة إلهام شاهين وزوجة الجاسوس المصرى رأفت الهجان فراو سمحون  و الشهرة يسرا والقاطرة البشرية هالة صدقي و اليسارية فى السفارة فى العمارة و التى تمثل المعارضة داليا البحيري و قائد البحرية فى الطريق الى ايلات عزت العلايلي والخبيرة الاستراتيجية لقاء الخميسي و خبيرة تواصل الاجيال تيتة لبلبة
دة بقى اللى هايجيب من الآخر ، دة اللى هايخلى العالم كله يعمل لينا الف حساب ، طب يا ريس نحنوح هل السبب رفض رئيس البرلمان الالمانى لمقابلة حضرتك فبتغيظه بيسرا و الهام ، و لا بتحمى نفسك و قلت اخد معايا دبابتين ، و لا هاتلم عليهم نقطة ، يمكن ؟ فى ازهى العصور كل شئ جايز .
سمعونا تسلم الايادى أرجالة و خش عليا بسلام كبير اوى
ادحرج و اجرى
يا رمان
تعالى على حجرى
يا رمان