طبيعة شعب

بعد ظهور جمال مبارك و اسرته بكل بجاحة فى الاهرامات ، بجد حاجة تحرق الدم بس اقولكم حاجة

احنا شعب اللى اختشوا ماتوا و اللى قلعوا برقع الحياء عاشوا

احنا شعب تمشى جنب الحيط ، بس نسيوا يقولوا ان حتى الحيط ممكن تقع عليك تجيب أجلك

احنا شعب يا بخت مين بات مظلوم و لا باتش ظالم ، بنفرح اننا نبات مظلومين اصل الظلم وحش

احنا شعب ان كانلك عند الكلب حاجة قوله يا سيدى ، و اهو الكلب ركب و دلدل رجليه و مفيش مفيش هاتاكلوا مصر يعنى ، و الشعب الاهبل على امل الفتات بيقوله يا سيدى

احنا شعب العين بصيرة و الايد قصيرة ، احلى حجة نهرب بيها ، دة بدل ما نشوف حقوقنا و ناخدها

احنا شعب على قد لحافك مد رجليك ، ما عندناش امل اللحاف يكبر و الامور تتحسن

احنا شعب القناعة كنز لا يفنى ، بنموت م الجوع و السرطان و المواصلات و الرصاص و الاعتقال بس قناعة ، شعب قنوع بطبعه

احنا شعب القرش الابيض ينفع فى اليوم الاسود ، يعنى عارفين ان الاسود جاى جاى و مستنيينه و عاملين حسابنا ، دة بدل ما نحاربه

احنا شعب الجنيه غلب الكارنيه ، يعنى العلام مالوش لازمة ، المهم الجنيه ييجى ، ييجى ازاى مش مشكلة

احنا شعب اللى يتجوز امى اقوله يا عمى ، شعب مسالم او عبيط ، و الام كل جوازاتها زفت و العم بينهب فيها و احنا برضه بنقوله يا عمى

احنا شعب ساب فى القرآن فرعون و هامان و ظلمهم ، ساب القضاء الظالم اللى حكم على سيدنا يوسف ، ساب كلمة فأستخف قومه فأطاعوه ، و شبطان فى كلمة خير اجناد الأرض ، لحد ما خير اجناد الارض بقوا فوق الشعب و داسوا عليه

احنا شعب اللى تعرفه احسن من اللى ما تعرفوش ، تغيير ايه ، بنرضى بأى حد نعرفه حتى لو ظالم و نخاف من اللى ما نعرفوش حتى لو عادل

احنا شعب العيار اللى ما يصيبش يدوش ، و العيار عمره ما صاب و دايما بيدوش بس احنا راضيين بالدوشة و اتعودنا عليها

احنا شعب الحى ابقى من الميت ، و اللى مات بيتنسى و مش مهم مات ليه ، حتى لو مات علشانك و علشان حقك

و على رأى الخال الله يرحمه احنا ولاد الكلب الشعب .

طب ازاى

اما يطلع مسئول حكومى من وزارة التموين فى تصريح نارى حلزونى ماهونى لحل ازمة الغلاء و يقول ، بدل ما تاكلوا البامية ام ٢٠ جنيه ، كلوا كوسة ب ٢ جنيه و نص . اصلها ناقصك و ناقصة كوسة يا اخويا ، و بالبحث و التمحيص و التفعيص عن ثمن الكوسة التى تنصح بها الحكومة فى اسواق المخروبة ، المحروسة سابقا وجدنا ان كيلو الكوسة ب ٦ جنيه و كوسة يبقى عايزة قوطة و القوطة مجنونة و عرفنا ان كيلو طماطم ب ٧ جنيه و قول نجيب شوية بصل ب ٢ جنيه و قول ٣ جنيه سمنة على توابل على ملح و ٤ جنيه ارز يبقى وجبة من غير لحمة ٢٢ جنيه ، يعنى فى الشهر من غير لحمة لو كل يوم كوسة اللى هى ارخص حاجة ٦٦٠ جنيه ، دة غير كهربا و ميه و علاج و مصاريف مدارس و وجبتين كمان و العيش و العيشة و اللى عايشينها . غطينى و صوتى يامة ، قلبوها كوسة و طبخةها و بيأكلوهالنا يامة آه يا شعب البوظة ، ما شبعتش م البالوظة .

معقولة شفيق

السيى خلاص كارت اتحرق ، و حاليا بيتم التخلص منه ، مرسي باعتراف دول كتير الرئيس الشرعى و حصل عليه انقلاب ، طب نخلص من السيسى من غير ما يرجع مرسي ازاى ؟
سهلة تلميع نظام مبارك و يطلع مبارك على الفضائيات و الناس تقول و لا يوم من ايامك يا مبارك ، و بعدها صور جمال فى كل حتة و جمال راح و جمال جه ، و بعدها نجيب اخر واحد فى فى نظام مبارك و نلمعه و نحطه واجهة ، بس ازاى اذا كان مرسي الرئيس الشرعى ، سهلة نطلع مرسي من السجن و نثبت الانتهاكات فى الانتخابات و يبقى الرئيس الشرعى احمد شفيق و ساعتها نبقى ضربنا ٣ حمير بشلوت واحد .
نظرية برضه ، و ممكن تحصل .

ملخبطة بس مفهومة

حاجات كدة حصلت ورا بعضها ملخبطة بس اكيد مرتبطة ببعضها

عاصفة الحزم و توتر العلاقات بين السعودية و مصر بدء الضرب تحت الحزام من الاعلام الموالى للسيسى فوسفات فى النيل بص العصفورة غاز مسال فى مياة الشرب فى اسكندرية بص العصفورة الجيش و الداخلية فاقدين السيطرة فى سيناء انصار بيت المقدس اسقطوا طائرة بدون طيار قبائل الترابين و الحبيطات لموا نفسهم بالسلاح من سيناء و مدن القناة لحرب جماعة انصار بيت المقدس ، و اللى المفروض كل دول ليهم ثأر مع الجيش و الداخلية بدء ظهور كلمة ولاية الصعيد على مواقع داعش بعد اعلان ولاية سيناء موقع ديبكا الاسرائيلى بيقول ان الجيش المصرى هايعلن الحرب خلال ايام بمباركة اوباما على اقليم برقة فى ليبيا

و نراجع خريطة الشرق الاوسط الجديد .

اينما تكونوا يدرككم الموت

الحكومة بتاعتنا مش مقصرة بصراحة و شعارها اينما تكونوا يدرككم الموت تموت فى حادثة مترو و لا يولع بيك القطر حادثة على الطريق و انت رايح مدرستك و لا اوتوبيسك يتقلب و انت رايح شغلك رصاصة طايشة و لا من التعذيب فى الاقسام كوبرى يقع بيك و لا فى مزلقان تموت مشنوق و لا تموت فى حريقة تموت م الجوع و لا بخرطوش فى دماغك واحد ناصح يقول مش نازل من البيت ، عندهم برضه اختيارات من مية الحنفية تسمم فوسفات و لا مواد بترولية .

اختار يا كوتش

كلام من دماغ لاسعة

انا هاتكلم و خلاص ، ممكن مش بالترتيب بس هاقول اللى فى دماغى ، من فترة طويلة من قبل ترشح السيسى للرئاسة قلت لو اترشح فعلا يبقى كارت بيتحرق لمهمة معينة و سيتم الخلاص منه ، قلت ساعتها للناس اللى مش فاهمة ان نظام مبارك زى السرطان ، جزء منه الفلول و رجال الاعمال ، و جزء منه المجلس العسكرى ، و جزء منه الاخوان و سلفيين امن الدولة . السيسى جه للقضاء على الارهاب المحتمل ، الارهاب المحتمل اللى تم لصقه بالاخوان ، الاخوان اللى اجتمعوا مع عمر سليمان و وقفوا مع المجلس العسكرى ، الاخوان اللى محمد بديع قال على صفحته مالناش علاقة بثورة يناير ، الاخوان اللى خيرت الشاطر و حسن مالك و غيرهم خرجوا من السجن معاهم مليارات ، الاخوان اللى كانوا جماعة محظورة و رغم كدة ليهم مقرات و عملوا حزب سياسى تحت اعين الجيش و المجلس العسكرى ، و فى الآخر اتسلموا السلطة بعد خروج آمن للى عملوا مذابح ماسبيرو و محمد محمود و مسرح البالون و العباسية ، و كمان تم اعطاءهم قلادة النيل . المهم دلوقتى ان لو ماكانش فيه اخوان ما كانش هايبقى فيه ارهاب محتمل لازم رئيس عسكرى علشان ينقذ الشعب منه ، الاخوان كانت مهمتهم محددة حفظ التوازن ، فزاعة الناس تخاف منها ، مبارك قبل ما يتنحى قال لو اتنحيت هايحكمكم الاخوان ، و السيسى انقذ الشعب من الاخوان ، الفزاعة المعتادة برعاية امن الدولة ، طبعا اللى ماتوا فى رابعة و النهضة مالهومش ذنب فى كل دة ، دول شهداء تم التضحية بيهم ، و المجندين اللى بيتقتلوا برضه مالهومش ذنب تم التضحية بيهم لحفظ توازن القوى ، وجود دة يعتمد على وجود دة ، باب القوات المسلحة فى الدستور و تحصين وزير الدفاع ٨ سنين حط علامات استفهام ، ليه تحصين وزير الدفاع ،، و ليه مش الرئيس ، بس الموضوع سهل ، البلد كلها باقتصادها بثرواتها بمشاريعها بأراضيها تابعة للجيش ، مش تابعة للرئيس ، الجيش دولة فوق الدولة ، كل المشاريع العملاقة ، اللى بقت دلوقتى بقانون فى الجريدة الرسمية بأن الهيئة الهندسية للقوات المسلحة تاخد مشاريع بالأمر المباشر ، فيه قانون تانى صدر من شهور بأن السيسى يتنازل عن جزء من صلاحياته لوزير الدفاع و بعدها برضه السيسى يتنازل عن جزء من صلاحياته لرئيس الوزراء ، طيب اما يصدر قانون يقنن وجود الجيش فى الشارع لحماية المنشآت دة معناه ايه ؟ معنى وجود الجيش فى الشارع بقانون ان مفيش رئيس جمهورية و ان فيه ضبطية قضائية و احكام عرفية و قضاء عسكرى ، معناه ان الحاكم هو وزير الدفاع ، يعنى المستفيد الاكبر هو المجلس العسكرى حتى الآن ، طيب هل المجلس العسكرى ضد مبارك و فلوله ؟ لأ طبعا ، هما فى صراع و معاهم الاخوان زى ما بنقول مصارين البطن بتتخانق ، صراع التوازن فيه هو الاخوان ، اللى بيتم استغلالهم كورقة ضغط . معلش كلام مش مترتب ، بس هارجع و اقول ليه الاعلام قلب على السيسى او بيبدأ يبقى ضده ، دى ليها تفسير من اتنين ، انا هاحتفظ باختيارى لنفسى بس هاعرض الاختيارين ، التفسير الاول انهم بيمتصوا غضب الناس ، يعنى بيخرج الشحنة اللى جواك ، انت اتصدمت و اتضحك عليك بدل ما تعمل مشاكل نهاجم احنا الرئيس و انت بتتفرج تخرج شحنة الغضب اللى جواك . التفسير التانى ان خلاص السيسى كارت اتحرق و مهمته خلصت و بيتم التخلص منه ، الناس تعبت و بدأت تفهم و بدأت تتململ من اللى بيحصل ، و الحل لعبة تمرد جديدة و باى باى سيسى ، ممكن مختلفة بس هاتتعرف ،لو لاحظنا السيناريو دلوقتى اللى بنشوفه و طابقناه مع السيناريوهات اللى فاتت , طنطاوى ( عسكر )ظاهريا خلى مبارك يتنحى و بعدها سلمها لمرسى ( اخوان ) الشعب كان عايز رئيس مدنى و بعدها السيسى ( عسكر ) عزل مرسى و سلمها لعدلى منصور كمحلل علشان ترجعله بالانتخابات , بدايات مرسى كان الاعلام معاه و بعدها بدأت الكوارث فى البلد ازمات ورا ازمات ورا ازمات , دلوقتى السيسى الاعلام معظمه معاه بس بدأ الاعلام يحط السم فى العسل , يعنى بيضرب من تحت لتحت و برضه ازمات ورا ازمات ورا ازمات بس رد الفعل للشعب اتغير و بقى اقل فى الاندفاع 

 لو حبينا نعرف القادم ايه ، احنا من ٢٥ يناير و الخطة ما اتغيرتش ، دايرة مقفولة و سيناريو واحد بيعيد نفسه و هما عايزين الشعب يرجع مسالم و مستأنس لبديل مبارك ، اللى ظهر فى الاعلام يهنئ الشعب المصرى اللى دلوقتى نسبة لا يستهان بها منه بتقول ولا يوم من ايامك يا مبارك .

 سيتم استخدام الاخوان لزيادة انقسام الشعب بلعبة فرق تسد ، سيتم الضغط من الفلول و رجال الاعمال المسيطرين على الاعلام ، سيتم الضغط على المجلس العسكرى و هايفضل صراع مد و جزر لكل واحد فيهم ، لأن للأسف مفيش بديل رابع فى البلد ، مفيش اى بديل ليهم ، و الضحية شعب لازم يتم استئناسه و كلمة السر انه يقول و لا يوم من ايام مبارك ، و ييجى البديل لمبارك و ياخد الشعب بمعارضة ٠٪ . دايرة مقفولة برعاية امريكية . اصدقائى القريبين منى عارفين ان توقعاتى ٩٠٪ بتحصل ، و انا متوقع تغييرات كتير هاتبدأ فى كل الاحزاب الموالية للسلطة و فى الاعلام . طبعا بعد التعديلات اللى حصلت فى قيادات الجيش و الداخلية . مين كبش الفدا الجاى ؟ و مين عليه الدور فى الصفقة ؟ عسكر ؟ فلول ؟ اخوان ؟

المقال دة كان فى 29 يونيو 2012 بعد وصول مرسى للحكم 

http://roba-bekia.blogspot.com/2012/06/blog-post_29.html

و المقال دة كان 1 مايو 2014 عن مبارك 

http://roba-bekia.blogspot.com/2014/01/blog-post_5092.html

و دة كان 6 يونيو 2014 

ملخص صغير 

 http://roba-bekia.blogspot.com/2014/06/blog-post_3260.html

و دة كان 1 يوليو 2014

كارت بيتحرق

http://roba-bekia.blogspot.com/2014/07/blog-post_5713.html

معلش طولت عليكم بس كله مرتبط ببعضه 

يا رب احمى مصر 

مكعب روبيك

عارفين مكعب روبيك ؟

مكعب من ٦ الوان مطلوب منهم انهم يترتبوا كل لون وجه من وجوه المكعب ، ممكن ترتبهم بسرعة و ممكن تقعد ساعات و ساعات ترتب فيهم ما بيترتبوش ، ممكن وجه يترتب معاك بالصدفة و انت مش قاصد و مركز فى وجه تانى ، و ممكن المكعب كله يترتب معاك بالصدفة ، و ممكن كل ما تحاول ترتب المكعب تلخبطه اكتر ، و ممكن كل ترتيبك يتغير فى لحظة تلاقى الاخضر فوق و الاصفر تحت ، ترتب باقى الالوان تلاقى الشمال راح يمين و اليمين بقى شمال ، فجأة تلاقى الاصفر اللى رتبته اتلخبط و انت مش واخد بالك و الازرق اللى انت مصمم عليه ترتبه مش عايز ييجى معاك ، و تفضل كدة ترتب فى وجوه و تترتب معاك وجوه تانية ، وجه مترتب مش شايفه ايدك مغطياه و وجه متلخبط بتحاول فيه ، الحياة كدة برضه ، بتفضل تحاول ترتب فيها ، مرة تيجى معاك حاجات مش متوقعة و مرة تترتب زى ما انت عايز ، مرة اللى انت فاكره صح يغيرلك كل ترتيبك اللى تعبت فيه ، و مرة اللى مش فى دماغك تلاقيه جاى معاك بسهولة ، كلها تدابير و صدف و اقدار ربك مرتبها من عنده ، انت مجرد بتحاول ، صح او غلط بتفضل تحاول ، ما هو لو ما حاولتش عمره ما هايترتب لوحده . خلى ثقتك فى ربنا كبيرة و اعرف ان كل حاجة بسبب و لهدف و انك هاتفضل تحاول طول عمرك ، حاجات هاتيجى معاك و حاجات هاتتلخبط منك ، حاجات هاتيجى صدفة و حاجات هاتروح بإيدك و انت مش واخد بالك ، و برضه هاتفضل تحاول و ربك يدبرها و كلها محاولات على تدابير على اقدار .

ناقلة الفوسفات و تسمم الشرقية

لفت نظرى اوى التسمم اللى حصل فى الشرقية ، طبعا اختلاف الآراء فى التسمم دة قلب بطريقة كوميدية ، مش باقولكم شعب بيموت فى الفتى
عامة اللى لاحظته ان كالعادة الاخوان مع السيساوية مقضيينها شتيمة فى بعض ، الاخوان يقولوا السبب ناقلة الفوسفات اللى غرقت فى قنا ، واخدين بالكم فى قنا ، يعنى المية المتفسفتة عدت على ييجى ٨ محافظات قبل ما توصل الشرقية و سممت بتوع الشرقية بس ، يمكن نيتهم مش خالصة ، يجوز

السيساوية بقى بيقولوا ان الفوسفات مفيد جدا للصحة و ان التسمم سببه الاخوان اللى رموا سم فى المية و ان الفوسفات مالوش ذنب فى كدة شتايم من هنا و شتايم من هناك ، و الناس اللى اتسممت فى المستشفى اكتر من ٣٠٠ حالة تسمم ، سيبك انت تصريحين لمسئولين لفتوا نظرى اوى

اول تصريح لوزير الموارد المائية ان الفوسفات مفيد للصحة و ان فيه دول بترمى فوسفات عن عمد فى المية

تانى تصريح على حادثة الشرقية طلع رئيس الشركة القابضة للمياة فى الشرقية بيقول ان الناس اللى اتسممت بيشربوا مية جراكن بيشتروها و ان مية الحنفية بعد تحليلها زى الفل يعنى عندهم مية حنفية زى الفل و بيشتروا جراكن يشربوا منها ، يا رايق

احنا و لاد كلب هايفسفتونى يامة اه يانا يانا يامة

فوسفات فوسفات فوسفات
اقولكم حاجة سيبكم بقى من كل الهجص دة ، و نقول
بص العصفورة
يا ترى بتفسفتى ايه للشعب يا حكومة

غرق ناقلة فوسفات فى مياة النيل

طبعا بعد غرق ناقلة الفوسفات فى مياة النيل اختلفت الآراء و انتم طبعا عارفين اننا شعب يموت فى الفتى و نحب نفتى زى عينينا

بمتابعة صفحات اليسار السيساوى المتخلف اكتشفنا ان الفوسفات دة بيعالج امراض كتير و بيستخدم كمطهر طبيعى و منظف معوى و احسن من البرسيل و بينضف الغسيل ، دة غير انه بيعطر الفم و يروق الدم و يمنع الدوخان و يقوى السنان ، و يساعد فى نمو الاطفال و يمكن استخدامه كعلاج للعقم .

اما بمتابعة اليمين الاخوانى المتطرف اكتشفنا ان ٥٠٠٠ قنبلة ذرية اترمت فى مياة النيل و ان يوم القيامة بعد بكرة خصوصا بعد ظهور المسيح الدجال اللى هو السيسى و المهدى المنتظر فى السجن اللى هو مرسي و البلد كلها هاتبقى اشعاعات ، مين بيطلع اشعاعات فوزية بتطلع اشعاعات اعدموا فوزية النواة ايوة خدناها فى سنة تالتة

اعدموه على الخازوق و كله طالع فوق فوق فوق سن الخازوق بس ما تقاطعوش

مجندة مصرية

عجبتنى اوى حملة مجندة مصرية ، اينعم مطبقة فى دول كتير بس بطبيعة البنت و الست فى مصر ما ينفعش ، لأن البنت او الست فى مصر ليها طبيعة خاصة لا مثيل لها فى الهالم ، مثلا نشوف كدة لو فعلا دخلوا الجيش هايحصل ايه

يا عسكرى سماح

افندم

خد الورق دة امضيه من الصول هايدى

الصول هايدى بترضع الواد يافندم

طب شوف الشاويش سميحة

فى أجازة وضع يافندم

طيب الرقيب نبوية

اتطلقت امبارح و حالتها النفسية وحشة يافندم

طب الملازم عدلات ، النقيب فتكات ، العسكرى جمالات

عند الخاطبة يافندم

انا كدة هاشتكيهم لقائدة الوحدة الرائد سوسن

الرائد سوسن تعبانة من الحمل يافندم .

يا مصيبتى نسيت الاكل ع النار انا لازم امشى

انصراف يا عسكرى

صندل فوسفات

غرق صندل الفوسفات فى النيل ، الخبر دة فى اى دولة محترمة كارثة , كارثة فى الرعب اللى هايسببه للناس من خوف الناس من شرب مية الحنفية , سيبكم من ان الفوسفات مادة سامة ، و سيبكم ان فيه نسبة يورانيوم لا يستهان بيها ، و سيبكم ان الصندل تابع للقوات المسلحة مش لمصر يعنى ، يعنى كمان التعدين تابه للقوات المسلحة ، اللى ميزانيتها فى الموازنة العامة للدولة رقم واحد ، مش مهم ، المهم محاولة تهميش الموضوع دة كأن تسمم مياة الشرب بقى عادى يعنى و أهو الفوسفات انضم لمخلفات المصانع و الحيوانات الميتة و مخلفات المراكب و الزبالة و الصرف الصحى اللى اصلا موجودين فى النيل ، الأهم بقى ان حتى الناس اللى عرفت عادى خالص و لا كأن حصل حاجة ، و كأن الاشعاع دة شئ عادى ، و اليورانيوم دة مغذى مثلا ، لو فى دولة محترمة هيتمنع الشرب من الحنفية لمدة ٣ شهور على الاقل بسبب هذه الكارثة البيئية و ارتفاع نسبة سمية المياة ، منطقى ان يكون فيه اجراءات احترازية مهما كان حتى لو الضرر مش كبير ،  بس شكلها علشان الصيف داخل و مش هايبقى فيه كهربا ، زيادة نسبة الاشعاع هاتخلى  الشعب كله يمشى منور فى الشوارع  ، و ساعتها مش هايفرق قطع الكهربا ، حكومة واعية اوى اوى يا خال .
كله هايتنيل بنيلة
اه يانا يانا يامة

العاصمة الجديدة

انا مبسوط اوى بالعاصمة الجديدة ، و اتخيلت نفسى كدة و انا باخلص ورق الوحدة اللى هاحجزها فى الخمسين الف وحدة سكنية اللى هايتعملوا قبل العاصمة نفسها و بدأوا فيهم و احنا مش عارفين العاصمة فين ، و اروح العاصمة الجديدة اخلص الورق و الموظف يقوللى اختم الطلب من عند مدام هالة فى العاصمة القديمة ، اروح لمدام هالة تقولى لازم امضاء استاذ دجدج اول طرقة ع الشمال فى العاصمة الجديدة ، اروح لاستاذ دجدج يقولى هات شهادة من اتنين موظفين انك عايز شقة فى العاصمة الجديدة ، و طبعا بعد رفض طلبى يقولولى  قدم التماس و اثبتلنا انك ملتمس يا حيليتها . ياااااااه امتى بقى .

تروح العاصمة الجديدة ازاى ؟

اللى يسأل ما يتوهش و الطريق سهل و بسيط و مافيهوش اى حاجة بص يا سيدى انت تلبس الملابس المستعملة اللى على الحبل  اللى جاية من الامارات و تطفى اللمبة الموفرة اللى عندك فى الشقة ، دة لو عايش فى شقة يعنى ، و تنزل تركب المترو  من محطة السادات لو فتحوها و تنزل اوسع محطة مترو اللى هى عدلى طرطور تطلع من السلم اللى على شمالك هاتلاقى عربيات خضار تركب عربية بس عامل الناس كويس دول مؤهلات عليا برضه شغالين عليها قول للسواق نزلنى عند مصنع كفتة عبعاطى ، هو عارفه تخلى المصنع على شمالك و تمشى لحد ما توصل للمليون وحدة سكنية هاتلاقى شوية عمال بيحفروا على الناشف مالكش دعوة بيهم و امشى زى ما انت بعد يافطة المؤتمر الاقتصادى تدخل شمال هاتلاقى عربيات كارو بيجرها شتلاند ، بيقولوا عاصمة عاصمة عاصمة اركب اى عربية فيهم هاتنزلك هناك

اوسع محطة مترو

طبعا بعد ما نزل خبر ان محطة مترو عدلى طرطور هاتبقى اوسع محطة مترو ، قصدى اكبر محطة مترو ، و طبعا بعد انشغال الناس بالحجاب و نقلع الطرح و لا نلبسها ، و حرق الكتب الدينية ، و البخارى صح و لا غلط ، و فى الوقت دة الحفر ع الناشف شغال و الجيش فى اليمن ، لأ لسه ما راحش ، لأ دى مناورة فى السعودية ، لأ دة ضرب الحوثيين ، لأ دة ما ضربش الجرس ، احب انتهز هذه الفرصة المنيلة بنيلة و ابعت سلامى للشعب الموزمبيقي الشكيك و سلامى لجوز خالتى  بالصومال وبنات خالتي بالسودان و خالتى بتنزانيا ، و المعلم عبد الجبار العنتيل بالغربية  و تحياتى للفنانة المبدعة و الام المثالية فيفى عبده و برنامج خمسة مواه الهادف الفاشخ المهيب ، و ابعت سلامى للأخ جنكيز خان و حسن ابن عمى ، و عنتر بن شداد و هتلر و هولاكو ، و نظمى زغلول فى المريوطية ، و تحيات كبيرة للمعارضة بقيادة ابو لهب ، و الاخت شكرية و حمدية و فوزية بقرب عنوسة اختهم البكرية شلبية ، و الله يرحمك يا سليمان يا حلبى جيت من حلب خوزقوك فى مصر ، و ننعى بكثير من الأسف ام بلالا ، و خالتى كلالا و ام المتطاهر و ابو المتطاهر و المتطاهر ، لانفجار قنبلة يدوية الصنع فى حفل الطهور نتج عنها مقتل امين شرطة و اصابة المتطاهر بقطع الخلف ، و احب ابعت سلامى لأم حبلص و ابو حبلص و ابنهم حبلص الله يفك سجنه كان بيصلى الفجر فى الجامع ، و تحياتى لعم شفلح بعد ما باع دكانته اللى اشتراها بالدين بضمان الراتب ، و ام بلحة العقربة و ام الخلول و ام رجل مسلوخة و الله يرحم ابو رجل مسلوخة نزل يعمل مظاهرة ، و احب اهنى القاصى و الدانى ، و الاول و التانى و كل اهلنا فى ابو اتاتا و كوم الدكة و الشقافة و جمهورية امبابة و صاحب دكان البسطرمة اللى على الناصية و اهديهم اغنية الدنيا خربانة يا عينى خربانة يا سيدى خربانة

و لكل واحد قرأ الكلام دة لو فهمه يبقى البلد فيها حاجة غلط ، معلش عبط .

اقلعوا الطرح

قالك ايه

قالك اه

قالك مظاهرة يا آه يا آه

مظاهرة ايه

مظاهرة قلع الحجاب يا بيه

و أحلى من الشرف مفيش

و كله ريش

على بقشيش

قالك كله يقلع طرح

و هانعمل فى الميدان فرح

إشى خيال يا ناس

بس ما حددوش

رجالة و لا ستات

ستات

دة السقا مات

يا شماتة ابلة ظاظا فيا

و الرجالة

هايفضلوا لابسين الطرح

و العمم و السلطانية

رغم ان كله طلع بلح

ايوة الستات يقلعوا الطرحة

و ندعمها للرجالة

دى بقت حالة

اصل الحكاية ما فيهاش قوالة

نقول كمان

قالك ايه قالك اه

قالك مظاهرة يا آه يا آه

شيلوا الطرح

ابنة داعية اسلامى تخلع طرحتها على الهواء

ماء ماء

و اهو كله ماء

بكرة ينزلونا بالبوكسر

و كله يسكر

بس الرجالة تلبس طرح

و الستات قلعوا الطرح

اصله فرح

لبس الرجالة للطرحة باطل

باطل

باطل

سيبكم انتم احنا فى الكماين نخلى الداخلية ماتشوفش الرخص

بدل رحصتك

يقولك فين طرحتك

و العلبة دى فيها ايه

خاتم يا بيه

طراخ

العلبة دى فيها طرحة

فيها ايه

طراخ

طرحة

طرحة

طرحة

طرحة

مزاد

 مزاد
مين يدخل المزاد
محور قناة
عاصمة جديدة
مين يشترى
مين يزود
كله بيتباع
كله ضاع
مزاد و اللى معاه يشيل
مين يدخل المزاد
اراضى و عقارات
كله للبيع يا بهوات
كله رخيص
كله خسيس
كله بيبيع فى العباد
مزاد
مين يزود
مين يشترى
بلد فى المزاد
بلد عايشة ع الشحاتة
كل حاجة بالشحاتة
و الشحاتة دى غتاتة
ادفع ولا شوف شماتة
بس
بس
البلد فيها كتير
خير كتير
و اللى يدى خيرها لغيرها
دة شيطان
شيطان قفل فى وشنا البيبان
كل البيبان
اللى سافر و اللى هاجر
و اللى مسجون فى الحيطان
و اللى قال و اللى عاد
ان دة كله مزاد
مزاد
مين يشترى
بلد بخيرها فى المزاد
بحر
لأ بحرين
و غازها و بترولها فين
و اللى عايز بس شغل
و اللى بيحكمها بغل
جه عرضها فى المزاد
مزاد مزاد مزاد
مين يزود
بلد قتلوا فيها الولاد
سجنوا العباد

بلد و ماشية شمال

بلد و ماشية شمال
دعارة تاخد براءة
تقول رأيك محال
و تقول يا بلد النيل
يرد عليك عناتيل
لو صحفى شريف تسيبها
و الا تكون طبال
اصلها ماشية شمال
تصدق الاعلام
تبقى وطنى تمام
و تلغى عقلك خالص
و تهيص مع الاحلام
ايوة مش لاقى تاكل
ايوة عايش مشاكل
بس ما تقولش لأ
علشان تربى العيال
بلد و ماشية بركة
و بتحدف ع الشمال
قالوا هانحفر قناة
و نلم فلوس يا شعب
و الحفر كله ناشف
و خلاص انسى الغلب
بس انت عايز انبوبة
و شغلة تأكل عيش
و انا مش هادى حاجة
مفيش يا شعب
مفيش
طوابير فى كل حتة
و لا حل لمشكلة
ما ركب البسكلتة
و سابها متنيلة
بس كله كوم
و قضاءها دة موال
اصلها يمينها ضاع
و ماشية بيك شمال
بلد و ماشية شمال
ندخل ع التسريبات
و نحكى ع اللى فات
دة دخلت مليارات
و لا حاجة منها جات
لا شفناها يا عينى
و لا شمينا ريحيتها
و لا حلت اى حاجة
و لا حتى جينا ناحيتها
اتصرفت طب فى ايه
هاتسأل تبقى خاين
و ندل من الاندال
انا ماشية اهو بمزاجى
ماشية بيك شمال
و المؤتمر اقتصادى
و الرز بالعبيط
هاتعيش يلا حياتك
و زيط يا شعب زيط
و هانعمل عاصمة
جميلة متقسمة
لا اصل الميزانية
عاجزة و مسلمة
طب فين المليارات
حبيبى التعلب فات
و بص على اللى مات
جنازاته بمليارات
اصل انا عاجبنى حالى
و راضية بحظى اللى مال
و رضيت ابقى ماشية
يا حبيبى كدة شمال
بلد و ماشية شمال
فيفى عبده مثالية
و هاتقلعوا الحجاب
و الصحابة قتلة
زى ما قال الكتاب
و سلملى على الارهاب
ارهاب
كله بقى ارهاب
بيان من المتحدث العسكرى
تم قتل ٧٠٠ ارهابى و القبض على ٥٤٣٠ ارهابى و تصفية العديد من البؤر الارهابية
يا خرابى
ارهابى
بووووووووم
وفاة عشرة مجندين فى تفجير مدرعة
بيان للمتحدث العسكرى
للمهندس و الطالب و السمكرى
تم تصفية ٥٠ ارهابيا فى العريش
بوووووم
وفاة ٣ضباط و ١٠ مجندين
فى هجوم على الكمين
و الارهابيين
وحشين
يا لهووووى
كله كله ماشى
و بيرمى فى الشواشى
و الاعلام يطبل
و ساءت الاحوال
و اهو ادينا ماشيين
يا بلد ماشية شمال .

بكرة تشوفوا ماسر

بعد ما أسرنا قائد الاسطول السادس الامريكى
و بعد ما الاسطول الايرانى هرب من باب المندب
و بعد ما قتلنا ارهابيين فى سيناء بمعدل ٢٠٠ ارهابى فى الدقيقة
و بعد ما عالجنا الايدز و فيروس سى بالكفتة
و بعد ما سلمنا المليون وحدة سكنية
و بعد ما حفرنا محور القناة ع الناشف
و بعد ما عملنا العاصمة الادارية
و بعد ما ضربنا الحوثيين فى اليمن قبل ما نشترك فى الحرب اصلا ، اه و الله ما كناش لسه رحنا هناك و الصحافة شغالة عن البطولات و الامجاد فى ضرب الحوثيين

حسام سويلم الخابور العسكرى السيساوى بيقول ان الجيش أسر طائرة تجسس امريكية تابعة للاسطول السادس الامريكى فى سيدى بشر الفتحة الشمال و انت داخل من على البحر و ذلك الفضل لرجال البحرية فى المدمرة المصرية لواحظ ، و الفرقاطة كاريوكا .

كدة ناقص كدة نأسر حاملة طائرات و نهربها فى ترعة السلام و نفككها و نبيعها خردة فى وكالة البلح

زعبولا القلة رجع تانى يا جدعان ، استخبى يا امريكا ، اسكتى يا روسيا ، شات أب يور ماوس يا اوروبا

عبعاطى كفتة مش هايسيبكم .

الله يخرب بيتك

يا بحر العلم
يا ترعة المفهومية
يا باكبورت نباهة
يا فيلسوف الحمير
يا ملك ملوك الغباء

عقبة ابن نافع بيحض على العنف
و السيسى و محمد ابراهيم رسل يا ابن الموبوءة

الله يخرب بيتك
و البيت اللى جنب بيتك
و البيت اللى جنب اللى جنب بيتك
جتكم القرف
مليتو البلد .

احكى ايه

لو حبيت احكى عن مصر
  احكى ايه 
  احكى عن ظلمها  
و لا عن ولادها اللى سابوها 
  احكى عن قسوتها و مرها  
و لا احكى عن اللى سرقوها  
و فى الآخر شافوا حلوها  
احكى ايه 
  احكى عن اللى عايش  
و لا احكى عن اللى مات 
  و اللى اتقتل  
و اللى اتسحل  
و اللى اتسجن  
واللى راضى بالظلم من سكات 
  احكى عن بطالة و لا كره  

و لا احكى عن آهات 
  احكى ايه 
  احكى عن مات شهيد  
ولا احكى عن العبيد 
  احكى عن اللى باع  
و لا الشريد 
  احكى ايه 
  احكى عن مش لاقى ياكل  
و لا عن الام المثالية  
احكى عن مريض يعانى  
و لا عن الحرامية 
  احكى ايه 
 عن اللى مات
و لا اتحبس 
  و لا ايه  
عن حكم عسكر  
و لا ناس تجارتهم دين
عننا 
  و لا احكى عن ناس تانيين  
عن مبارك خد براءة  
و لا عادلى 
و لا مين 
  احكى ايه 
  احكى عن رئيس بيكدب 
  و لا ايه 
  احكى عن حكومة تنصب 
 و لا ايه 

احكى ايه 

عن وعود زى السراب 

عن عيشة بقت هباب 

عن شباب برصاصة ضاع 

عن فرقة و عن ضياع 

عن خداع 

عن حاكم ظالم و باع 

احكى ايه 

احكى ايه و لا ايه و لا ايه 

جمهورية البلح

الباشا السيسى
رئيس جمهورية البلح
يعنى النواة
يعنى النواية الحسنة
يعنى قلنا هايطرح ابريمى طرح سهوكة
يعنى نخلة حبيبى و احمد نحبسه
يعنى النووى
يعنى ايران تعمل نووى
و احنا بنحفر ع الناشف
يعنى اللى كلته زغلول تجيبه رطب
يعنى الخشاف
و كل حاجة اتعملت و لا من درى و لا من شاف
الباشا السيسى
يعنى البلح المسوس
يعيش تجار البلح
و الشعب يموت
و توت توت الشعب خد بالشلوت

آه يا زمن

زمن الاعلام الفاسد الموجه اللى كل يوم برأى

زمن اساتذة و جهابزة التطبيل 

 الحاصلين على المركز الأول فى تطبيق مادة التعريصولوجيا  و المحافظين على مبادئ مصطفى بكرى صاحب كتاب التلخيص فى فن التعريص و لاميس الحاصلة على دكتوراه فى تلبيس السلطانية بالفنون التعريصية و تامر امين صاحب البحث اللى قلب الدنيا بالبسهم العمة اصلى معرص يا اما و ابراهيم عيسى المتخصص فى دور المعرصين على زيت التموين و قد تم تغيير بعض الامثال الشعبية المصرية

تجرى جرى الوحوش و العرص ما تلحقوش

روحنا المؤتمر الاقتصادى لقينا تعريص حيادى

تذاكر تتوظف ، تعرص تبقى مذيع 

و قد تم الغاء كلمنى شكرا من الموبايل و وضع مكانها عرصلى شكرا

التاريخ هايقول ايه

دلوقتى نفهم كدة بالراحة

دول الخليج و مصر بتأيد عاصفة الحزم ضد الحوثيين اللى هما شيعة و فى نفس الوقت ضد داعش فى العراق اللى هما بيقتلوا الشيعة

السعودية مثلا

بتحارب الحوثيين المدعومين من ايران فى اليمن و متحالفة مع امريكا و ايران فى ضرب داعش اللى بتدبح الشيعة اللى مع ايران فى العراق

ﻣﺼﺮ
ﺑﺘﺪﻋﻢ ﺑﺸﺎﺭ ﺍﻻﺳﺪ الشيعى ﺍﻟﻠﻲ ﺑﺘﺪﻋﻤﻪ ﺍﻳﺮﺍﻥ ﻭ ﺍﻟﻠﻲ ﺍﻟﺴﻌﻮﺩﻳﺔ ﺑﺘﺪﻋﻢ ﺍﻟﻔﺼﺎﻳﻞ ﺍﻟﻠﻲ ﺑﺘﻌﺎﺭﺿﻪ و منها الجيش الحر .ﺍﻟﻠﻰ ﻫﻢا ﺍﻟﺜﻮﺍﺭ ﻭﺍﻻ‌ﺧﻮﺍﻥ ﻫﻨﺎﻙ . دة غير ان مصر بتشارك فى عاصفة الحزم ضد الشيعة لمصلحة الاخوان اللى بتأيد بشار اللى من الشيعة و ضد الاخوان و بتحارب الاخوان فى مصر و بتقول عليهم ارهابيين و متحالفة مع قطرو تركيا  ضد الشيعة فى اليمن و بتقول عليهم بيدعموا الارهاب فى مصر


ﺗﺮﻛﻴﺎ ﻭﺍﻟﺴﻌﻮﺩﻳﺔ ﻭﻗﻄﺮ ﻣﺘﻮﺍﻓﻘﻴﻦ ﻋﻠﻰ ﺩﻋﻢ ﺍﻟﺸﺮﻋﻴﺔ ﻓﻲ ﺍﻟﻴﻤﻦ .. ﺑﺲ ﺍﻟﺴﻌﻮﺩﻳﺔ ﺑﺘﺪﻋﻢ الحكم العسكرى ﻓﻲ ﻣﺼﺮ .. ﻭﺗﺮﻛﻴﺎ ﻭﻗﻄﺮ ﺑﺘﻌﺎﺭﺿ الحكم العسكرى فى مصر

ﺑﺲ ﺍﻟﺴﻌﻮﺩﻳﺔ ﺍﻟﻠﻲ ﺑﺘﺪﻋﻢ الحكم العسكرى ﻓﻲ ﻣﺼﺮﻫاﺘﺪﺧﻞ ﻓﻲ ﺣﻠﻒ ﻳﻀﻢ ﻣﺼﺮ ﻭﻗﻄﺮ ﻭﻣﻌﺎﻫﻢ ﺗﺮﻛﻴﺎ ﺍﻟﻠﻲ ﻣﺶ ﻣﻌﺘﺮﻓﻪ ﺑﺎلحكم العسكرى ﻓﻲ ﻣﺼﺮ .. ﻋﻠﺸﺎﻥ ﻳﺪﻋﻤﻮﺍ ﺍﻟﺸﺮﻋﻴﺔ المدنية ﻓﻲ ﺍﻟﻴﻤﻦ و يساعدوا ﺍﺧﻮﺍﻥ ﺍﻟﻴﻤﻦ ﺍﻟﻠﻰ ﻫﻢ ﺍﺭﻫﺎﺑﻴﻦ ﻓﻰ ﻣﺼﺮ ؟

العراق طيب

العراق بتدعم الحوثيين وتعارض التدخل العربي فى اليمن ، والحوثين شعارهم الموت لأمريكا و امريكا بتساعد  العراق في حربه على داعش بالخبراء والسلاح .و إيران بتدعم الحوثيين اللي شعارهم الموت لأمريكا . بينما إيران في الوقت نفسه تحارب الدواعش إلى جانب امريكا تحت مظلة الجيش العراقي اللي قيادته اصلا تحت قيادة قادة من إيران
ما فهمتش حاجة صح
شوف اللى جاى بقى

 ﻓﻲ ﻟﻴﺒﻴﺎ
 ﺗﺮﻛﻴﺎ ﻭﻗﻄﺮ ﺑﻴﺪﻋﻤﻮﺍ ﻗﻮﺍﺕ ﻓﺠﺮ ﻟﻴﺒﻴﺎ
 ﻭﻣﺼﺮ ﻭﺍﻟﺴﻌﻮﺩﻳﺔ ﺑﻴﺪﻋﻤﻮﺍ ﻗﻮﺍﺕ ﺣﻔﺘﺮ و الاتنين ضد بعض
بس الاربع دول مع بعض ضد الحوثيين فى اليمن و دة لمصلحة الاخوان اللى منهم فجر ليبيا و ضد مصلحة الشيعة اللى منهم بشار الاسد اللى مصر معترفة بيه و بتأيده .

ﻃﻴﺐ  ﻟﻮ ﺍﻟﺤﺮﺏ ﻋﻠﻰ ﺍﻟﻴﻤﻦ سنة و شيعة ﺳاﻴﺒﻴﻦ ﻟﻴﻪ ﺑﺸﺎﺭ ﺍﻟﺸﻴﻌﻰ ﺍﻟﻠﻰ ﺑﻴﻘﺘﻞ ﻓﻰ ﺷﻌﺒﻪ السنى
ﻃﻴﺐ ﻟﻮ ﻫﻰ ﺣﺮﺏ ﻋﻠﺸﺎﻥ ﺍﻻ‌ﻧﻘﻼ‌ﺏ ﺍﻟﻠﻰ ﺣﺼﻞ ؟ ﻃﻴﺐ ﻣﺎﻫﻮ ﺍﻛﺒﺮ ﺣﺪ ﻫﻴﺴﺘﻔﺎﺩ ﺍﺧﻮﺍﻥ ﺍﻟﻴﻤﻦ ؟؟؟ ﺍﻟﻠﻰ ﻓﻰ ﺩﻭﻝ ﻋﺮﺑﻴﻪ ﺑﺘﻘﻮﻝ ﻋﻠﻴﻬﻢ ﺍﺭﻫﺎﺑيين

 و دوخينى يا لمونة دوخينى

ورونى بقى عجين الفلاحة

و الآن جائزة اوسكار لفيلم

هو مين مع مين و مين ضد مين

الاهم من كل دة اما نكتب تاريخ الفترة دى هانقول ايه , دة اللى هايكتب التاريخ هايتشل 

هو فيه ايه

طبعا بعد ما وزارة التربية و التعليم لغت من المناهج اعتبار اسرائيل دولة معادية

وطبعا بعد الغاء اجزاء من قصص صلاح الدين الايوبى وعقبة ابن نافع و اعتبارهم ارهابيين
كدة كفار قريش هايبقى اسمهم المعارضة
و قالوا ان السيسى ومحمد ابراهيم أنبياء ورسل
و الحوينى و بكار و محمود بانجو من الاحرار
و ابراهيم عيسى وعلى جمعة مجددون
  كدة بقى أوباما ونتنياهو هايبقوا من ال10 المبشرين بالجنة

انهم يتبعون دين جديد , فالنذهب خلفهم الى يثرب 

تجيبها كدة تجيلها كدة هى كدة

يعنى ايه ثورة

يعنى تلاقى مؤتمر اقتصادى و كل صحيفة برقم مليارى شكل دخل مصر اللى تقول ٥٣ مليار و اللى يقول ١٠٠ مليار و تسريبات بتكشف بلاوى و كله مهلبية ويقولوا  نزاهة و شفافية

يعنى امه تبقى مثالية و بنته فى الاكاديمية البحرية و ابنه فى الرقابة الادارية و ابن القاضى قاضى و ابن الضابط ضابط و واسطة و محسوبية و يقولوا مساواة وتكافؤ فرص يا نور عينيا

يعنى القضاء يحكم على نفسه ان هو ذات نفسه فوق الدستور و القانون و لا يطبق عليه الحد الاقصى للاجور و يبقى خصم و حكم فى نفس الوقت و يقولوا  عدالة اجتماعية

يعنى ناس معاها مليارات و ناس مش لاقية رغيف العيش و لا الانبوبة و لا المواصلات و رغم كدة بيضغطوا على اللى مش لاقى ياكل و يقولوا الفقير يموت م الجوع علشان مصر تبقى ام الدنيا بالغنى و طبلوا يا الاتية

يعنى قانون طوارئ و حبس و اعتقال و قضاء مسيس و قتل علنى و خطف و يقولوا حرية و امك فى العش و لا فى النملية

يعنى تجيبها كده تجيلها كده هي كده و يقولوا احلام و سراب و آمال مستخبية

يعنى الغلبان مالوش مكان و مايتحسبش من بنى الانسان و لا شغل و لا لقمة و لا سكن و لا ليه ع الخريطة مكان ويقولوا هاتبقى قد الدنيا
اد الدنيا في الغش والخداع والمحاباة والنفاق والوساطه والمحسوبية

اد الدنيا فى الظلم و القتل و الاغتصاب و الكدب و التزوير و المبرراتية

اد الدنيا فى الهبل و العبط و الهطل و البله المغولى و الملوخية

وزغرتي ياللي مش غرمانه

اكتشاف هائل

في إكتشاف علمي هائل للعلماء المحلبية السيساوية

في تلبيس الشعب السلطانية 

تم مراجعة التاريخ و الجغرافيا في دور الإخوان في كوارث ما قبل التاريخ و ما بعده و في نصه 

و تم إكتشاف

ان الإخوان هما إللي حمروا البحر الأحمر 

و بيضوا البحر المتوسط و سودوا البحر الأسود 

و قزونوا بحر قزوين

و قتلوا البحر الميت بقنبلة يدوية الصنع 

و تم إكتشاف لوحة حجرية نادرة من عهد الملك فساكونيا سيكاوى تثبت أن الإخوان هما إللي دكروا بولاق الدكرور
و شبروا شبرا
و كوموا الدكة 

و أزرطوا الأزاريطة 

و دخلوا الداخلة  

و مطرحوا مطروح

و سوسوا السويس 

و لا تزال هناك أبحاث لإكتشاف
هل فعلا الإخوان هما إللي هندنوا المحيط الهندي 

و هدوا المحيط الهادي 

و جمدوا المحيط المتجمد أم لا ؟

و يأتي إلينا سؤال مهم و هو عن علاقة الإخوان بتطرية المطرية و تبحير البحيرة وتغريب الغربية و دميطة دمياط 

هما مفيش غيرهم

كل المعارضة إخوان 

و كل إللي ماتوا من 25 يناير لدلوقتي مستخبيين في بيوتهم 

و كل إللي كانوا تحت السرير أيام مرسي و الرجالة علشانهم بتموت في الإتحادية و المقطم ركبتهم الشجاعة 

و كل الإنتهازيين و علي رأسهم الإخوان بيتكلموا انهم عملوا ثورة يناير ، 

و السجن كبير 

و إللي دخل دخل 

و إللي خرج خرج 

و كله سمك 

لبن 

تمر هندي