بلد و ماشية شمال

بلد و ماشية شمال
دعارة تاخد براءة
تقول رأيك محال
و تقول يا بلد النيل
يرد عليك عناتيل
لو صحفى شريف تسيبها
و الا تكون طبال
اصلها ماشية شمال
تصدق الاعلام
تبقى وطنى تمام
و تلغى عقلك خالص
و تهيص مع الاحلام
ايوة مش لاقى تاكل
ايوة عايش مشاكل
بس ما تقولش لأ
علشان تربى العيال
بلد و ماشية بركة
و بتحدف ع الشمال
قالوا هانحفر قناة
و نلم فلوس يا شعب
و الحفر كله ناشف
و خلاص انسى الغلب
بس انت عايز انبوبة
و شغلة تأكل عيش
و انا مش هادى حاجة
مفيش يا شعب
مفيش
طوابير فى كل حتة
و لا حل لمشكلة
ما ركب البسكلتة
و سابها متنيلة
بس كله كوم
و قضاءها دة موال
اصلها يمينها ضاع
و ماشية بيك شمال
بلد و ماشية شمال
ندخل ع التسريبات
و نحكى ع اللى فات
دة دخلت مليارات
و لا حاجة منها جات
لا شفناها يا عينى
و لا شمينا ريحيتها
و لا حلت اى حاجة
و لا حتى جينا ناحيتها
اتصرفت طب فى ايه
هاتسأل تبقى خاين
و ندل من الاندال
انا ماشية اهو بمزاجى
ماشية بيك شمال
و المؤتمر اقتصادى
و الرز بالعبيط
هاتعيش يلا حياتك
و زيط يا شعب زيط
و هانعمل عاصمة
جميلة متقسمة
لا اصل الميزانية
عاجزة و مسلمة
طب فين المليارات
حبيبى التعلب فات
و بص على اللى مات
جنازاته بمليارات
اصل انا عاجبنى حالى
و راضية بحظى اللى مال
و رضيت ابقى ماشية
يا حبيبى كدة شمال
بلد و ماشية شمال
فيفى عبده مثالية
و هاتقلعوا الحجاب
و الصحابة قتلة
زى ما قال الكتاب
و سلملى على الارهاب
ارهاب
كله بقى ارهاب
بيان من المتحدث العسكرى
تم قتل ٧٠٠ ارهابى و القبض على ٥٤٣٠ ارهابى و تصفية العديد من البؤر الارهابية
يا خرابى
ارهابى
بووووووووم
وفاة عشرة مجندين فى تفجير مدرعة
بيان للمتحدث العسكرى
للمهندس و الطالب و السمكرى
تم تصفية ٥٠ ارهابيا فى العريش
بوووووم
وفاة ٣ضباط و ١٠ مجندين
فى هجوم على الكمين
و الارهابيين
وحشين
يا لهووووى
كله كله ماشى
و بيرمى فى الشواشى
و الاعلام يطبل
و ساءت الاحوال
و اهو ادينا ماشيين
يا بلد ماشية شمال .

بكرة تشوفوا ماسر

بعد ما أسرنا قائد الاسطول السادس الامريكى
و بعد ما الاسطول الايرانى هرب من باب المندب
و بعد ما قتلنا ارهابيين فى سيناء بمعدل ٢٠٠ ارهابى فى الدقيقة
و بعد ما عالجنا الايدز و فيروس سى بالكفتة
و بعد ما سلمنا المليون وحدة سكنية
و بعد ما حفرنا محور القناة ع الناشف
و بعد ما عملنا العاصمة الادارية
و بعد ما ضربنا الحوثيين فى اليمن قبل ما نشترك فى الحرب اصلا ، اه و الله ما كناش لسه رحنا هناك و الصحافة شغالة عن البطولات و الامجاد فى ضرب الحوثيين

حسام سويلم الخابور العسكرى السيساوى بيقول ان الجيش أسر طائرة تجسس امريكية تابعة للاسطول السادس الامريكى فى سيدى بشر الفتحة الشمال و انت داخل من على البحر و ذلك الفضل لرجال البحرية فى المدمرة المصرية لواحظ ، و الفرقاطة كاريوكا .

كدة ناقص كدة نأسر حاملة طائرات و نهربها فى ترعة السلام و نفككها و نبيعها خردة فى وكالة البلح

زعبولا القلة رجع تانى يا جدعان ، استخبى يا امريكا ، اسكتى يا روسيا ، شات أب يور ماوس يا اوروبا

عبعاطى كفتة مش هايسيبكم .

الله يخرب بيتك

يا بحر العلم
يا ترعة المفهومية
يا باكبورت نباهة
يا فيلسوف الحمير
يا ملك ملوك الغباء

عقبة ابن نافع بيحض على العنف
و السيسى و محمد ابراهيم رسل يا ابن الموبوءة

الله يخرب بيتك
و البيت اللى جنب بيتك
و البيت اللى جنب اللى جنب بيتك
جتكم القرف
مليتو البلد .

احكى ايه

لو حبيت احكى عن مصر
  احكى ايه 
  احكى عن ظلمها  
و لا عن ولادها اللى سابوها 
  احكى عن قسوتها و مرها  
و لا احكى عن اللى سرقوها  
و فى الآخر شافوا حلوها  
احكى ايه 
  احكى عن اللى عايش  
و لا احكى عن اللى مات 
  و اللى اتقتل  
و اللى اتسحل  
و اللى اتسجن  
واللى راضى بالظلم من سكات 
  احكى عن بطالة و لا كره  

و لا احكى عن آهات 
  احكى ايه 
  احكى عن مات شهيد  
ولا احكى عن العبيد 
  احكى عن اللى باع  
و لا الشريد 
  احكى ايه 
  احكى عن مش لاقى ياكل  
و لا عن الام المثالية  
احكى عن مريض يعانى  
و لا عن الحرامية 
  احكى ايه 
 عن اللى مات
و لا اتحبس 
  و لا ايه  
عن حكم عسكر  
و لا ناس تجارتهم دين
عننا 
  و لا احكى عن ناس تانيين  
عن مبارك خد براءة  
و لا عادلى 
و لا مين 
  احكى ايه 
  احكى عن رئيس بيكدب 
  و لا ايه 
  احكى عن حكومة تنصب 
 و لا ايه 

احكى ايه 

عن وعود زى السراب 

عن عيشة بقت هباب 

عن شباب برصاصة ضاع 

عن فرقة و عن ضياع 

عن خداع 

عن حاكم ظالم و باع 

احكى ايه 

احكى ايه و لا ايه و لا ايه 

جمهورية البلح

الباشا السيسى
رئيس جمهورية البلح
يعنى النواة
يعنى النواية الحسنة
يعنى قلنا هايطرح ابريمى طرح سهوكة
يعنى نخلة حبيبى و احمد نحبسه
يعنى النووى
يعنى ايران تعمل نووى
و احنا بنحفر ع الناشف
يعنى اللى كلته زغلول تجيبه رطب
يعنى الخشاف
و كل حاجة اتعملت و لا من درى و لا من شاف
الباشا السيسى
يعنى البلح المسوس
يعيش تجار البلح
و الشعب يموت
و توت توت الشعب خد بالشلوت

آه يا زمن

زمن الاعلام الفاسد الموجه اللى كل يوم برأى

زمن اساتذة و جهابزة التطبيل 

 الحاصلين على المركز الأول فى تطبيق مادة التعريصولوجيا  و المحافظين على مبادئ مصطفى بكرى صاحب كتاب التلخيص فى فن التعريص و لاميس الحاصلة على دكتوراه فى تلبيس السلطانية بالفنون التعريصية و تامر امين صاحب البحث اللى قلب الدنيا بالبسهم العمة اصلى معرص يا اما و ابراهيم عيسى المتخصص فى دور المعرصين على زيت التموين و قد تم تغيير بعض الامثال الشعبية المصرية

تجرى جرى الوحوش و العرص ما تلحقوش

روحنا المؤتمر الاقتصادى لقينا تعريص حيادى

تذاكر تتوظف ، تعرص تبقى مذيع 

و قد تم الغاء كلمنى شكرا من الموبايل و وضع مكانها عرصلى شكرا

التاريخ هايقول ايه

دلوقتى نفهم كدة بالراحة

دول الخليج و مصر بتأيد عاصفة الحزم ضد الحوثيين اللى هما شيعة و فى نفس الوقت ضد داعش فى العراق اللى هما بيقتلوا الشيعة

السعودية مثلا

بتحارب الحوثيين المدعومين من ايران فى اليمن و متحالفة مع امريكا و ايران فى ضرب داعش اللى بتدبح الشيعة اللى مع ايران فى العراق

ﻣﺼﺮ
ﺑﺘﺪﻋﻢ ﺑﺸﺎﺭ ﺍﻻﺳﺪ الشيعى ﺍﻟﻠﻲ ﺑﺘﺪﻋﻤﻪ ﺍﻳﺮﺍﻥ ﻭ ﺍﻟﻠﻲ ﺍﻟﺴﻌﻮﺩﻳﺔ ﺑﺘﺪﻋﻢ ﺍﻟﻔﺼﺎﻳﻞ ﺍﻟﻠﻲ ﺑﺘﻌﺎﺭﺿﻪ و منها الجيش الحر .ﺍﻟﻠﻰ ﻫﻢا ﺍﻟﺜﻮﺍﺭ ﻭﺍﻻ‌ﺧﻮﺍﻥ ﻫﻨﺎﻙ . دة غير ان مصر بتشارك فى عاصفة الحزم ضد الشيعة لمصلحة الاخوان اللى بتأيد بشار اللى من الشيعة و ضد الاخوان و بتحارب الاخوان فى مصر و بتقول عليهم ارهابيين و متحالفة مع قطرو تركيا  ضد الشيعة فى اليمن و بتقول عليهم بيدعموا الارهاب فى مصر


ﺗﺮﻛﻴﺎ ﻭﺍﻟﺴﻌﻮﺩﻳﺔ ﻭﻗﻄﺮ ﻣﺘﻮﺍﻓﻘﻴﻦ ﻋﻠﻰ ﺩﻋﻢ ﺍﻟﺸﺮﻋﻴﺔ ﻓﻲ ﺍﻟﻴﻤﻦ .. ﺑﺲ ﺍﻟﺴﻌﻮﺩﻳﺔ ﺑﺘﺪﻋﻢ الحكم العسكرى ﻓﻲ ﻣﺼﺮ .. ﻭﺗﺮﻛﻴﺎ ﻭﻗﻄﺮ ﺑﺘﻌﺎﺭﺿ الحكم العسكرى فى مصر

ﺑﺲ ﺍﻟﺴﻌﻮﺩﻳﺔ ﺍﻟﻠﻲ ﺑﺘﺪﻋﻢ الحكم العسكرى ﻓﻲ ﻣﺼﺮﻫاﺘﺪﺧﻞ ﻓﻲ ﺣﻠﻒ ﻳﻀﻢ ﻣﺼﺮ ﻭﻗﻄﺮ ﻭﻣﻌﺎﻫﻢ ﺗﺮﻛﻴﺎ ﺍﻟﻠﻲ ﻣﺶ ﻣﻌﺘﺮﻓﻪ ﺑﺎلحكم العسكرى ﻓﻲ ﻣﺼﺮ .. ﻋﻠﺸﺎﻥ ﻳﺪﻋﻤﻮﺍ ﺍﻟﺸﺮﻋﻴﺔ المدنية ﻓﻲ ﺍﻟﻴﻤﻦ و يساعدوا ﺍﺧﻮﺍﻥ ﺍﻟﻴﻤﻦ ﺍﻟﻠﻰ ﻫﻢ ﺍﺭﻫﺎﺑﻴﻦ ﻓﻰ ﻣﺼﺮ ؟

العراق طيب

العراق بتدعم الحوثيين وتعارض التدخل العربي فى اليمن ، والحوثين شعارهم الموت لأمريكا و امريكا بتساعد  العراق في حربه على داعش بالخبراء والسلاح .و إيران بتدعم الحوثيين اللي شعارهم الموت لأمريكا . بينما إيران في الوقت نفسه تحارب الدواعش إلى جانب امريكا تحت مظلة الجيش العراقي اللي قيادته اصلا تحت قيادة قادة من إيران
ما فهمتش حاجة صح
شوف اللى جاى بقى

 ﻓﻲ ﻟﻴﺒﻴﺎ
 ﺗﺮﻛﻴﺎ ﻭﻗﻄﺮ ﺑﻴﺪﻋﻤﻮﺍ ﻗﻮﺍﺕ ﻓﺠﺮ ﻟﻴﺒﻴﺎ
 ﻭﻣﺼﺮ ﻭﺍﻟﺴﻌﻮﺩﻳﺔ ﺑﻴﺪﻋﻤﻮﺍ ﻗﻮﺍﺕ ﺣﻔﺘﺮ و الاتنين ضد بعض
بس الاربع دول مع بعض ضد الحوثيين فى اليمن و دة لمصلحة الاخوان اللى منهم فجر ليبيا و ضد مصلحة الشيعة اللى منهم بشار الاسد اللى مصر معترفة بيه و بتأيده .

ﻃﻴﺐ  ﻟﻮ ﺍﻟﺤﺮﺏ ﻋﻠﻰ ﺍﻟﻴﻤﻦ سنة و شيعة ﺳاﻴﺒﻴﻦ ﻟﻴﻪ ﺑﺸﺎﺭ ﺍﻟﺸﻴﻌﻰ ﺍﻟﻠﻰ ﺑﻴﻘﺘﻞ ﻓﻰ ﺷﻌﺒﻪ السنى
ﻃﻴﺐ ﻟﻮ ﻫﻰ ﺣﺮﺏ ﻋﻠﺸﺎﻥ ﺍﻻ‌ﻧﻘﻼ‌ﺏ ﺍﻟﻠﻰ ﺣﺼﻞ ؟ ﻃﻴﺐ ﻣﺎﻫﻮ ﺍﻛﺒﺮ ﺣﺪ ﻫﻴﺴﺘﻔﺎﺩ ﺍﺧﻮﺍﻥ ﺍﻟﻴﻤﻦ ؟؟؟ ﺍﻟﻠﻰ ﻓﻰ ﺩﻭﻝ ﻋﺮﺑﻴﻪ ﺑﺘﻘﻮﻝ ﻋﻠﻴﻬﻢ ﺍﺭﻫﺎﺑيين

 و دوخينى يا لمونة دوخينى

ورونى بقى عجين الفلاحة

و الآن جائزة اوسكار لفيلم

هو مين مع مين و مين ضد مين

الاهم من كل دة اما نكتب تاريخ الفترة دى هانقول ايه , دة اللى هايكتب التاريخ هايتشل 

هو فيه ايه

طبعا بعد ما وزارة التربية و التعليم لغت من المناهج اعتبار اسرائيل دولة معادية

وطبعا بعد الغاء اجزاء من قصص صلاح الدين الايوبى وعقبة ابن نافع و اعتبارهم ارهابيين
كدة كفار قريش هايبقى اسمهم المعارضة
و قالوا ان السيسى ومحمد ابراهيم أنبياء ورسل
و الحوينى و بكار و محمود بانجو من الاحرار
و ابراهيم عيسى وعلى جمعة مجددون
  كدة بقى أوباما ونتنياهو هايبقوا من ال10 المبشرين بالجنة

انهم يتبعون دين جديد , فالنذهب خلفهم الى يثرب 

تجيبها كدة تجيلها كدة هى كدة

يعنى ايه ثورة

يعنى تلاقى مؤتمر اقتصادى و كل صحيفة برقم مليارى شكل دخل مصر اللى تقول ٥٣ مليار و اللى يقول ١٠٠ مليار و تسريبات بتكشف بلاوى و كله مهلبية ويقولوا  نزاهة و شفافية

يعنى امه تبقى مثالية و بنته فى الاكاديمية البحرية و ابنه فى الرقابة الادارية و ابن القاضى قاضى و ابن الضابط ضابط و واسطة و محسوبية و يقولوا مساواة وتكافؤ فرص يا نور عينيا

يعنى القضاء يحكم على نفسه ان هو ذات نفسه فوق الدستور و القانون و لا يطبق عليه الحد الاقصى للاجور و يبقى خصم و حكم فى نفس الوقت و يقولوا  عدالة اجتماعية

يعنى ناس معاها مليارات و ناس مش لاقية رغيف العيش و لا الانبوبة و لا المواصلات و رغم كدة بيضغطوا على اللى مش لاقى ياكل و يقولوا الفقير يموت م الجوع علشان مصر تبقى ام الدنيا بالغنى و طبلوا يا الاتية

يعنى قانون طوارئ و حبس و اعتقال و قضاء مسيس و قتل علنى و خطف و يقولوا حرية و امك فى العش و لا فى النملية

يعنى تجيبها كده تجيلها كده هي كده و يقولوا احلام و سراب و آمال مستخبية

يعنى الغلبان مالوش مكان و مايتحسبش من بنى الانسان و لا شغل و لا لقمة و لا سكن و لا ليه ع الخريطة مكان ويقولوا هاتبقى قد الدنيا
اد الدنيا في الغش والخداع والمحاباة والنفاق والوساطه والمحسوبية

اد الدنيا فى الظلم و القتل و الاغتصاب و الكدب و التزوير و المبرراتية

اد الدنيا فى الهبل و العبط و الهطل و البله المغولى و الملوخية

وزغرتي ياللي مش غرمانه

اكتشاف هائل

في إكتشاف علمي هائل للعلماء المحلبية السيساوية

في تلبيس الشعب السلطانية 

تم مراجعة التاريخ و الجغرافيا في دور الإخوان في كوارث ما قبل التاريخ و ما بعده و في نصه 

و تم إكتشاف

ان الإخوان هما إللي حمروا البحر الأحمر 

و بيضوا البحر المتوسط و سودوا البحر الأسود 

و قزونوا بحر قزوين

و قتلوا البحر الميت بقنبلة يدوية الصنع 

و تم إكتشاف لوحة حجرية نادرة من عهد الملك فساكونيا سيكاوى تثبت أن الإخوان هما إللي دكروا بولاق الدكرور
و شبروا شبرا
و كوموا الدكة 

و أزرطوا الأزاريطة 

و دخلوا الداخلة  

و مطرحوا مطروح

و سوسوا السويس 

و لا تزال هناك أبحاث لإكتشاف
هل فعلا الإخوان هما إللي هندنوا المحيط الهندي 

و هدوا المحيط الهادي 

و جمدوا المحيط المتجمد أم لا ؟

و يأتي إلينا سؤال مهم و هو عن علاقة الإخوان بتطرية المطرية و تبحير البحيرة وتغريب الغربية و دميطة دمياط 

هما مفيش غيرهم

كل المعارضة إخوان 

و كل إللي ماتوا من 25 يناير لدلوقتي مستخبيين في بيوتهم 

و كل إللي كانوا تحت السرير أيام مرسي و الرجالة علشانهم بتموت في الإتحادية و المقطم ركبتهم الشجاعة 

و كل الإنتهازيين و علي رأسهم الإخوان بيتكلموا انهم عملوا ثورة يناير ، 

و السجن كبير 

و إللي دخل دخل 

و إللي خرج خرج 

و كله سمك 

لبن 

تمر هندي

خبر عاجل

عاجل في شمال سيناء 

تم اسقاط طيارة بدون طيار 

 استهدفت سيارة بدون سواق

بمدفع بدون ذخيرة 

 و قد تم إطلاق الرصاص عليها بدون مسدس 

 و قد نتج عن ذلك استشهاد قتيل واحد بس بدون جثة

اكتفاء ذاتى

الحمد لله حققنا الجيش المصري حقق الإكتفاء الذاتي من الأسلحة التي تنتج في المصانع الحربية و سيتجه إلي التصدير
و من أهم الأسلحة التي يتميز بها الجيش عندنا
مربى التى ان تي
مياه معدنية ذرية
جبنة مضادة للدبابات
مكرونة طويلة المدى
سخانات مضادة للطائرات
 بوتاجازات قاذفة لهب
و فوق دة كله بينتج كفتة مشكلة شديدة الانفجار

الشرق الأوسط الجديد

تنفيذ خطة الشرق الأوسط الجديد و التى بدأ تقسيمها فعلا بالسودان التى قسمت الى جنوب السودان و شمال السودان , وجود داعش كما تركز الصحافة العالمية و رؤساء الدول العربية فى سوريا و العراق و حاليا فى ليبيا و اليمن .

سنبدأ بسوريا

 الحرب المدمرة فى سوريا تشكل نقطة تحول، ومن هنا سنجدها على الخريطة مقسمة الى 3 دويلات، و هي الدولة العلوية بقيادة بشار الأسد التي تتكون من اقلية حوالى 25% الآن من سوريا و قد سيطرت على سوريا لعقود وتسيطر الآن على الممر الساحلي.

الدويلة الثانية هي كردستان السورية التي بإمكانها الانفصال والاندماج مع اكراد العراق في نهاية المطاف، اما الثالثة فهي الدولة السنية التي بامكانها الانفصال ومن ثم الاتحاد مع المحافظات في العراق".

 المملكة العربية السعودية

و على الخريطة تم تقسيمها الى 5 دويلات،وهابستان في الوسط، واخرى في الغرب تضم مكة والمدينة وجدة،

ودويلة في الجنوب،

واخرى في الشرق مع الدمام،

الى جانب دويلة اخرى في الشمال،

بما يرجح ان يصبح اليمن باكمله او جنوبه على الاقل جزءا من السعودية،

التي تعتمد تجارتها بالكامل تقريبا على البحر، حيث ان من شأن ايجاد منفذٍ على بحر العرب ان يقلل الاعتماد الكامل على مضيق هرمز، الذي تخشى السعودية من قدرة ايران على الاستيلاء عليه وحرمان دول الخليج الفارسي من عبوره، و نصل هنا الى علاقة امريكا بأيران حاليا و التى تزعج دول الخليج خصوصا بعد استيلاء ايران على الجزر الأماراتية و تطور العلاقات الامريكية الايرانية للأحسن و محاولة امريكا كسب ود ايران و هذا جزء من المخطط .

لا ننكر ان الصحف الامريكية قد ذكرت كثيرا ان السعودية تواجه انقساماتها الداخلية المكبوتة التي بإمكانها ان تظهر على السطح جراء انتقال السلطة الى الجيل المقبل من الامراء"، منوهة بان "وحدة المملكة مهددة من قبل الخلافات القبلية والانقسام بين السنة والشيعة والتحديات الاقتصادية".

اما عن ثالث الدول، فهي ليبيا

ليبيا التى نجدها على الخريطة مقسمةالى ثلاث دول هما طرابلس وبرقة و فزان فى الجنوب الغربى  وذلك نتيجة النزاعات القبلية والاقليمية القوية.

رابع الدول هى السودان

و قد تم تقسيمها فعلا الى دولتين هما جنوب السودان و السودان

خامسها العراق

ومن الممكن ان ينضم اكراد الشمال فى العراق الى اكراد سوريا، و ابحث عن داعش و علاقة الاكراد باسرائيل و لماذا ترفض تركيا ضرب داعش ؟ لأن وجود الدولة الكردية الموالية لأسرائيل جنوب تركيا سيكون تهديد مباشر لها .

اما المناطق المركزية التي يسيطر عليها السنة ستصبح دولة سنية

 ويصبح الجنوب خاصا بالشيعة

أما بخصوص الدولة الفلسطينية

فقد ذكرت الخريطة عدم وجودها الا فى سيناء مع قطاع غزة سواء بانفصال سيناء و ان تصبح دولة مستقلة تستقبل الفلسطينيين او بضربة موجهة لغزة يكون رد الفعل ضرب صواريخ على اسرائيل و هروب الفلسطينيين من غزة و دخول سيناء .

اما الدولة القبل الاخيرة فهي اليمن،

و ستعود مقسمة الى دويلتين وذلك بعد اجراء استفتاء محتمل في جنوب اليمن على الاستقلال،

فمن الممكن ان يصبح جزء او كل جنوب اليمن جزءا من 

السعودية.

و الدولة الأخيرة مصر و دى فى بوست لوحده بس عايزين تعرفوا 

ليه داعش فى ليبيا و سوريا و العراق , امامكم الأجابة

ليه السيسى متوقع انه يضرب غزة ؟ امامكم الاجابة

ليه السيسى ضرب ليبيا ؟ امامكم الأجابة .

باتفوض و اتحول

انا باتفوض و أتحول 

ما انتم عارفين م الأول 

اقرع و لا حاجة فى راسى 

و يهمنى الكراسى 

 انا اقتل اى حد 

و مفيش عندى شرف

مصرى حمساوى و ليبى 

يا نور عنيا يا حبيبى 

 كله هايعيش فى قرف 

اصل انا عندى شعرة 

و هاموتكم م القهرة 

هاقتل كل الناس 

مينا و محمد و مليجى 

اصلها ساعة تروح و ساعة تيجى

ساعة تروح و ساعة تيجى

و هاتبقى أسود ليالى 

و انا فى قصرى و لا على بالى

و عندى شيوخ السلطان 

موجودة فى كل مكان 

و فضائيات ساكسونيا 

فيها العكش و المونيا 

 هارميكم م البلكونة 

اصل انا جاتلى الجنونة 

و ع الناشف شغل نضيف 

و هاتشحتوا ع الرصيف 

و هايغتصبوكى يا شابة

و اهو كله بالمحبة 

دة انا عندى وزير داخلية 

حمرا يا يا مطالب شعبية

و قضائى كله طاهر 

انا بس بأيدى اشاور 

اصل انا عندى شعرة 

و هاموتكم م القهرة 

هاقتل كل الناس 

مينا و محمد و مليجى 

اصلها ساعة تروح و ساعة تيجى

ساعة تروح و ساعة تيجى

 استنى استنى استنى 

نسيت اقتل حنا 

هاقتلكم فى المطرية 

عين شمس العباسية 

و قنابل فى المنصورة 

و كمان فى اسكندرية 

لو حتى تشجع كورة 

هاعملك سلك شايك و مهوى 

لو حتى فى بورسعيد 

او فى الدفاع الجوى

و هاتسمعوا ضرب النار 

و الدم يسيل انهار 

و فى كل عيلة شهيد 

و الباقى فى السجن بعيد 

اصل انا عندى شعرة 

و هاموتكم م القهرة 

هاقتل كل الناس 

مينا و محمد و مليجى 

اصلها ساعة تروح و ساعة تيجى

ساعة تروح و ساعة تيجى

هاقتلكم فى التحرير 

و فى ماسبيرو و فى ناهيا 

و فى رابعة يموت بكتير 

و النهضة يروحوا فى داهية 

أصلى باحارب الأرهاب 

و هاخلى العيشة هباب 

مش فاضى للأنابيب 

مطالبكم فى الدواليب 

و هاولع فى الاسعار 

و هاخلى العيشة مرار 

انا باتفوض و أتحول 

ما انتم عارفين م الأول

ربط أحداث

سيبكم من ان الفيديو الغريب بتاع دبح الأقباط و ان الفيديو بيقول انه متصور في طرابلس ، 

و إللي حصل ان درنه إتضربت ، و جيش حفتر إتجه ناحية درنه و ضربها لأنها الأقرب ليه و مع ضرب الطائرات المصرية فرصة كبيرة  ، و الإتحاد الأوروبي و أمريكا يوافق علي التدخل العسكري بتحالف دولى فى ليبيا , يبقي كل دة فيلم واضح للتدخل فى ليبيا  الايام الجاية هاتثبت كتير بس نتابع تحركات جيش حفتر و ردود أفعال أوروبا و خصوصا الشقيقة إيطاليا ، أصل داعش ليبيا مصممة تحتل روما ، نتابع و هانعرف كل دة ليه و دي لسه بداية للشرق الأوسط الجديد و الحجة داعش و دة سبب وجود داعش أصلا . خلي بالكم هما قالوا انتظروا الرد في سيناء  ، مش عارف ليه ما قالوش السلوم أو مطروح رغم انها أقرب ، بس الجيش نزل يحمي المنشآت الحيوية فى المحافظات , يا ترى الجيش قدر يحدد مواقع داعش فى ليبيا و ما قدرش يحدد مواقع جماعة انصار بيت المقدس فى سيناء ؟  المهم ان كل المواقع الاسرائيلية بتقول ان أكبر هجرة في تاريخ اسرائيل من أوروبا خصوصا من فرنسا و افتكري صحيفة شارلي إيبدو و بلجيكا إللي برلمانها اعترف بدولة فلسطين و أوكرانيا بالحرب اللي فيها و بيجهزوا لهجرة أعداد مهولة من الدول دي لإسرائيل في ٢٠١٥ ، هايقعدوهم فين بقي و كل يوم مشكلة ع المستوطنات ؟ و دول كتير و ضم عليهم يهود إيطاليا إللي داعش بتهددها ، نربط كل دة بقي ببعضه هاتعرف بيحصل إيه في الشرق الأوسط الجديد قريبا

القصاص للشهداء

لو فعلا السيسى ضرب ليبيا علشان داعش قتلت 21 مصرى قبطى ماشى انا معاه بس باقى الشهداء 

شهداء استاد بورسعيد

شهداء استاد الدفاع الجوى

شهداء جمعة الغضب 

شهداء ماسبيرو 

شهداء سيناء 

شهداء طلعت حرب 

شهداء المنصورة 

شهداء العباسية 

شهداء الأسكندرية 

شهداء المطرية 

شهداء عين شمس 

شهداء ناهيا 

شهداء رمسيس 

شهداء رابعة

شهداء مجلس الوزراء

شهداء شارع القصر العينى 

 شهداء محمد محمود 

شهداء السويس

 شهداء الفرافرة 

شهداء ميدان التحرير 

شهداء شهداء شهداء شهداء و مفيش قصاص 

برلمان حسب الله

موعدنا قريبا مع الفيلم الغنائى الاستعراضى الكوميدى الراقص الممنوع من الصرف 

برلمان حسب الله 

بطولة 

الراقصة الحلزونية : سما المصري

 

المطرب اللولبى صاحب اوبريت الايادى غراب البين : مصطفي كامل 

درامز  الفنان اللاوزعى السوابق حرامى الغسيل : أحمد عز

بالاشتراك مع شيوخ كل العصور و دلاديل القصور اللى اتسمكوا ع الزراعى بالدور : شيوخ حزب النور و الزور بقيادة بكار ابو دقن و زرار 
و برهامى الحرامى 

الفيلم من أخراج المخرج البهبهونى : خالد يوسف 

 قريبا بكل دور العرض 

مفيش برلمان يا غجر

النهاية  

دمك فى رقبة البلد يا شيماء

نقول حكاية

بألف حكاية

عدت و لسه

بكرة تعدى مليون حكاية زيها

الأم ماتت

برصاصة طايشة

و اتيتم الولد

و الزوج شايلها

نفسه يلحقها

و النخوة ماتت يا بلد

بدموع يتامى

و دموع ارامل

نزلت

تقول للظلم لأ

شايلة الورد فى ايديها

تصرخ تقول دة الحق حق

نزلت بميت راجل تقول

حق الشهيد

نزلت و رجالة فى بيوت

تحت اللحاف

فى عالم بعيد

برصاصة طايشة

الأم ماتت

و تحت التراب صوتها بيصرخ

أنا حقى فين ؟

يا ترى هابقى زى اللى فاتت

و حقى عليه تعدى السنين

ضحيت بنفسى يمكن تفوقوا

يمكن عشانى تقولوا لأ

دة الحق حق

بدموع كتير

كتبت مصير

بلد بحالها

بتقول وداع

مفيش وداع

و مفيش عزا

عزاكى يا غالية

لو خدنا تارك

من اللى سبب الأذى

دمك فى رقبة

كل واحد مننا

دمك هايفضل

شاهد علينا كلنا

دمك فى رقبة كل البلد

دمك هايفوق مليون ولد

دمك مش هايروح هدر

دمك بيرسم القدر

دمك دة دم البلد

جيش طالعله شعب

 طبعا القوات المسلحة دخلت فى كل حاجة تتخيلوها بتعمل كل حاجة لما البلد كلها بقت بتاعتها و لا بتدفع ضرايب و لا مرتبات للعمالة المجندين زى الفل يعنى طالع واكل نازل واكل 

عندنا مثلا

طريق الجيش 

محور الشاذلى 

نفق الشهيد 

 كوبرى عمله الجيش 

 مستشفى الجيش

 مسجد الجيش 

 نادى الجيش 

 شارع الشهيد 

ميدان الشهيد عبد المنعم

 سوبر ماركت الجيش 

 بنزينة وطنية بتاعة الجيش 

مكرونة الجيش 

 مربى الجيش 

يعنى من الآخر كدة دولة مصر جيش و طالعله دولة 

شعب مصر جيش و طالعله شعب

اقتصاد مصر جيش و طالعله مشاريع اقتصادية 

الأهم بقى مؤيدى السيكى اللى بيقولوا جيش مصر 

دول بقى
جيش و طالعله بقر 

و البقر طالعلهم ديل 

ميت ميت

 اسهل حاجة فى مصر الموت 

فى أتوبيس 

فى قطار 

فى عبّارة

 فى قصر ثقافة 

فى مسرح 

فى مظاهرة 

فى ملعب 

 فى قسم شرطة 

فى سجن 

فى مستشفى حكومى

فى عربية 

فى الشارع 

على الحدود 

فى وسط البلد 

فى الواحات 

تحت الانقاض 

سبحان الله حتى لو هربت و رحت كوت دى فوار 

برضه ميت ميت 

 يا ترى مين عليه الدور
لأن كله ميت ميت

تبرعوا

 الزند  يطالب بفرض ضريبة على كل مواطن مقابل الأمن والحماية ودعم الشرطة

عايزين بقى اعلان فى التليفزيون
يقولوا فيه : تبرعوا تبرعوا

ضباط كتير و عساكر كتير حالتهم صعبه جدا

و مش لاقيين تمن الخرطوش و الغاز و الضرب شغال عليهم من كل مكان بالنبلة و الطوب
و مفيش مخابئ تحمهيم
اخواتك قتالين القتلة دول محتاجين مساعدتك
محتاجينك تقف جنبهم و تساعدهم عشان يقتلوا بضمير 
و يخلصوك من الدنيا و بلاويها
و يقتلوك و تبقى شهيد
و بكده يبقوا ردولك الجميل
اتبرع لفقراء الداخلية
اتبرع و لو بقنبلة غاز فارغ قديمة رموها فى شقتك خنقتك 

مين مامتش

هو مين مات

الأهلاوي مات فى بورسعيد 2012
زملكاوي مات فى الدفاع الجوى 2015
ليبرالي مات فى كل جمعة الغضب و محمد محمود و مجلس الوزراء و ذكرى الثورة 
يساري مات فى مصر كلها
متشدد مات فى رابعة و النهضة و العباسية
متظاهر مات فى مقطم و اتحادية
مسلم مات من سيناء لمطروح
مسيحي مات من ماسبيرو لعين شمس و المطرية

طب حد عايش
ايوة كتير عايشين فى السجن

لسه مين فيكى يا بلد مامتش

يقتل و يتحاكم ؟ معقولة

الداخلية تقتل شباب الاولتراس 

و النائب العام يطلع قرار بضبط و احضار قيادات الأولتراس  

الجيش و الداخلية يقتلوا قيادات الأخوان 

و يتم القبض على قيادات الأخوان

 الداخلية تقتل شباب الثورة 

و يتم القبض على اخواتهم و أصحابهم و المصابين  و ممكن أهاليهم و يضربوا الجنازة

الداخلية تقتل شيماء الصباغ 

و يتم القبض على نائب رئيس الحزب اللى هى عضو فيه 

انما اللى يقتل يتقبض عليه ؟ أبدا ما حصلتش , يعنى يقتل و كمان يتمسك ؟ دة حتى ما يصحش 

قالك ايه قالك آه

قالك ايه قالك آه قالك عايزين نلغى الدعم و سايب الدنيا و ماسك الدعم بيجرى وراه 

قالك علشان البلد تتقدم لازم الشعب يجوع و يتحايل على رغيف العيش و يستناه 

طيب ما يلغى الدعم 

هو يعنى مكسوف مننا ....

وبرضوا عاملك كوبري و يطلع المطبلاتية يقولوا قبل ما ياخد القرار 

طب ما شرط صندوق النقد ان الدعم يتلغى 

يعنى من الآخر هايتلغى 

هو يعنى الأنبوبة ام 70 جنيه مدعومة 

و لا فاتورة الكهربا اللى وصلت من 20 جنيه ل 120 جنيه مدعومة 

و لا المية القاطعة على طول مدعومة 

الغى ياخويا الغى دة احنا اخوات 

عاوز بطيخ نبطخلك 

دة احنا مبسوطين اوى و كنا بنتمنى من زمان اللى بتعمله فينا دة 

دة يوم المنى اما انا جيت 

الغى يا اخويا الغى احنا اخوات 

شلحنا و غطى العسكر يا ريس

عرينا فى عز البرد و دفى الداخلية و القضاء يا ريس 

الغى يا راجل و اخلص انت لسه هاتقول

يعنى جت ع الدعم 

هو فين اصلا الدعم 

الغى يا راجل ما تضيعش وقت 

و خش على اللى بعده 

و كل ما يكون عندك وقت الغى اى حاجة 

ارفع شوية اسعار 

اصل احنا نور عينيك و نستاهل بصراحة 

يا راجل الغى على طول