العلاج بالسيكى

نشرت قناة النهار التلفزيونية تقريرًا يزعم تحسن صحة الطفل المريض بالسرطان، بعد أيام من لقائه بالرئيس انتى بايوتيك  السيكي ,

احنا بقى نعالج كل المرضى 
نعمل مصنع كبير نشغل فيه اللى مش لاقيين شغل وو المصنع دة يتخصص فى منتجات العلاج بالسيكى

سيكى أمبول
سيكى كبسول 
سيكى اقراص 
سيكى فوار
سيكى شرب

و منتجنا الجديد , الذى حصل على شهادة الأيزو 12641 من فاساكونيا العظمى و المنتج الذى سيحطم كل نظريات الطب الحديث ,

سيكى لبوس
سيكى لبوس تلبسه و تدوس .

سيناء بها فيلم قاتل

دة نقلا عن جريدة الوطن , نشوف كدة الفيلم سوا

قال مصدر عسكري بشمال سيناء، اليوم، إنه بعد ساعة واحدة من العثور على جثة مجند بمحيط نقطة "كرم القواديس"، التي تم تفجيرها بسيارة مفخخة أمس، سلم مجند آخر من النقطة العسكرية ذاتها، نفسه إلى قوات الجيش، عقب اختفائه بشكل كامل  أثناء الاشتباكات التي اندلعت عقب التفجير
وأضاف المصدر، الذي امتنع عن ذكر اسمه، إن المجند أثناء الاشتباكات أصيب بصدمة، وعلى إثرها اضطر للهرب عقب مشاهدته الانفجار واندلاع الاشتباكات، فلجأ إلى داخل مزارع تبعد حوالي كيلو متر عن النقطة العسكرية حتى غلبه النوم، ثم عاد وبدأ في التحرك متخفيًا بين الزراعات حتى سلم نفسه إلى مدرعة عسكرية.

طبعا المجند أختفى بشكل كامل أثناء الأشتباكات , يعنى ساب النقطة و جرى أو هرب , الوحيد اللى فكر صح يمكن ؟ او الوحيد اللى ماخافش يجرى ببدلة الجيش من غير ما حد يشوفه , طبعا تحت تأثير الصدمة الراجل فكر صح و قلع بدلة الجيش و تخفى عن الارهابيين لحد ما وصل مزارع على بعد كيلو متر من النقطة من غير ما حد يشوفه , جميل ,
عمل ايه بقى فى المزارع اما وصل هناك فى الأمان ؟
بدأ فى التحرك متخفيا , معنى كدة انه كان خايف و بيتحرك داخل المزارع متخفيا , حتى غلبه النوم , خايف و مرعوب و بيتحرك فى المزارع متخفيا و نام يوم كامل ما ظهرش الا تانى يوم , غلبه النوم , يا سبحان الله , النوم سلطان صحيح .

طبعا المجند دة هو الشاهد الوحيد , و اللى هايقوله كله هايقول انها الحقيقة , دة شاهد عيان غلبه النوم يعنى مش اى حد , يا ولاد النصابة بتلعبوها صح اوى ,
ارفع القبعة بصراحة .

وجهات نظر بس كلام

طبعا اللى خسران فى كل دة هو الشعب اللى بيغرق و بيموت من الجوع , احنا قمنا بثورة فعلا يوم 25 يناير بس كل واحد فكر فى نفسه بس ما فكرش فى الشعب اللى قامت علشانه الثورة , تفتكروا الشعب و هو بيغرق وجهات النظر ايه 

ثوار الفيسبوك 

السيسى هو السبب و الشعب يستاهل , هو اللى اختار كدة , شعب جاهل ما بيفهش و فعلا بقر و يستاهلوا , نسيوا الثورة اللى قامت علشانهم و نسيوا الشهداء , يستاهلوا  , احنا عملنا الثورة علشانهم و باعونا , اىنعم ما عملناش بديل , بس باعونا , اينعم عصرنا لمون و اتضحك علينا بس باعونا , اينعم مضينا على تمرد و اتقرطسنا و لبسنا السلطانية بس باعونا , اينعم الفقر زاد و البطالة زادت و ما قدمناش اى حلول بس باعونا , شوفوا بقى حكم العسكر بيعمل ايه ؟ عايز البوست دة يلف الفيس كله , شير يا جماعة , دة طبعا آخرهم شير يا جماعة .

الاخوان 

كل دة علشان مرسى مشى , كان هاينقذ البلد و هو الرئيس الشرعى و لابد من عودة الشرعية , و محاسبة قادة الانقلاب , السيسى عر..... و لازم يتحاكم , يسقط الانقلاب و يسقط حكم العسكر , احنا اللى عملنا ثورة يناير و هانجيب حق الشهداء و هانسقط الانقلاب و هانحاسب كل واحد , و الشرعية هانرجعها بايدينا , الاخوان رجالة صامدين بقالهم سنة لوحده  , و الطلبة عاملين مظاهرات فى كل حتة لأسقاط الانقلاب , كل اللى بينزلوا اخوان 

الأعلام الموجه 

السى بى سى 

دة مصير شعب مصر فى حالة عودة الاخوان , الجيش بيحاول انقاذ الشعب , و الاخوان مش مديينه فرصة , الارهابيين عمالين يفجروا فى كل مكان و بيحاولوا القضاء على جيش مصر العظيم خير أجناد الأرض , لازم نقف مع الرئيس و لازم نتبرع علشان مصر , و علشان الاقتصاد , دة احسن رئيس مسك مصر , انزل يابنى بتسلم الأيادى , 

تجيب قناة فلول 

أوباه بأه تعتذر سما المصرى عن ظهورها فى قناة فلول علشان عندها حالة وفاة و اللى عايز يعزيها يتصل على رقم 000011 , 

تحول لأون تى فى 

الارهاب بتموله قطر و تركيا , عايزين يقضوا على جيش مصر و لكن نحن صامدون و سنقضى على الارهاب , الشعب و الجيش ايد واحدة , 

تجيب صدى البلد

يجب على الجيش ان يدك سيناء على كل من فيها و يخليها و يعلنها منطقة حرب , عايز جثث , عايز دم , عايز اشلاء 

تجيب الجزيرة 

قادة الانقلاب مش قادرين يحموا نفسهم , هذا جزاء من يتطاول على الشرعية , هذا من اعمالهم , يجب اسقاط الانقلاب , اصمدوا يا ثوار مصر , اصمدوا يا طلاب مصر

 . النخبة 

لن نسمح باسقاط السيسى , و سنتحول الى المعارضة , و الثورة مستمرة و سنكملها من البرلمان القادم , فان التكوين الايديلوجى للشعب المصرى المتوازى مع تكوينه الفكرى يتعارض مع راديكالية الاخوان 

العسكر 

اتحرقوا كلكم بجاز , كله تبعى و اهو حاجة مشروعاتى و نشاطى الاقتصادى , هو انا خلفت الشعب دة و نسيته , لن نسمح بالتطاول على جيش مصر , و اى حد هايعمل مظاهرة هايبقى اخوانى , و عملنا قانون تظاهر و هانراقب كل حاجة , لن يسقط جيش مصر ابدا . 

شعب مصر 

بولولوء بولولوء بولولوء انى أغرق أغرق أغرق

 

نوديهم أبو أتاتا

إحنا نخلي سيناء و ناخد سكانها نوديهم الفرافرة لأ لأ الفرافرة إتضربت

نوديهم الجيزة لأ ، الجيزة انفجرت و ممكن يموتوا في تفجير محطة مترو البحوث

يا عم ما تقلقش انفجارات القاهرة و الجيزة بتنقي الضباط و أمناء الشرطة بس ، الإرهابي عارف انهم هايبقوا في مكان الانفجار ساعتها بالضبط .

علشان تتطمن نوديهم أبو أتاتا ، علي البحر و أهو يبقي مصيف و مشتي ع الدائري ،

شعب طيب أوي أوي يا خال .

بلد بانيه

انفجار في سيناء إحنا نخلي سيناء من السكان

إحتجاجات في الجامعات إحنا نلغي العام الجامعي و نخلي الجامعات من الطلبة

مظاهرات في الشارع إحنا نخلي الشارع من الناس و نفضيه خالص

الشعب جعان إحنا نخلي البلد من الشعب

السيكي عايز يتغدي إحنا نخلي فرختين و نحمرهم

ايه البلد البانيه دي ؟

مكافحة الإرهاب في سيكا سيكا

سيكا سيكا الإرهاب مركز عليها أوي اليومين دول ، جماعة انصار التنظيم الدولي مش سايباها في حالها و تعلن مسئوليتها عن الحادث ، إيه دة ؟   خلينا في الريس سيكي ، طبعا الريس سيكي مش ساكت و مبهدل الدنيا ، لازم يوجه ضربات موجعة للخلايا الإرهابية ، و طبعا الخلايا الإرهابية بترد بضربات أوجع يا آه يا آه ، أما بخصوص اسلوب الريس سيكي في مكافحة الإرهاب ، فهو يتبع اسلوب مختلف عن الأساليب المعروفة ، يتميز الريس سيكي بأسلوب يطلق عليه إنتباه يا دانس ، أحلي من الشرف مفيش ، بعد أي تفجير و هجوم إرهابي ، تبدأ الخطوات التصعيدية لمواجهة الإرهابيين ، مجلس الدفاع الوطني يجتمع ، نحن نشجب هذا الإعتداء و مش هانسكت ، قررنا إطلاق العملية نسر ٢ لو ما نفعتش تبقي العملية بغل ٣ ، إحنا هانخلي المنطقة و نخليها بانيه ، نضرب كام بيت بالطيران نهدهم علي دماغ إللي فيهم ، و نتحرك في شريط موازي لتحرك الأرهابيين ، بعدها نمسك كام واحد نقول عليهم إرهابيين ، و نطلع شوية تصاريح صحفية ، نحن بلد الأمن و الأمان و لن ينال أي شخص من الجيش السيكاوي العظيم ، و سيتم تكريم الشهداء بجنازة رسمية ، يتولاها سلاح الجنازات بقواتنا المسلحة ، دة سلاح جديد عملناه مخصوص لأننا بقينا نحتاجه كتير ، و قد تم نقل الجثث بالهليوكوبتر إلي القاهرة ، يطلع وزير الداخلية بتصريح ، سنقضي علي الإرهابيين و نقتلهم قتلا شنيعا ، حق جنودنا لن يضيع ، و البيان الختامي لإجتماع مجلس الدفاع الوطني ،  بنقول للإرهابيين عيب ما تعملوش كدة تاني و النبي .

يطلع كام خبير عسكري علي الفضائيات ، لابد من إخلاء المحافظة التي تم بها التفجير من سكانها ، لازم إبادة كل سكان المنطقة ، إضربوا بيد من حديد بلا شفقة و لا رحمة ، يجب قتل الجميع بلا هوادة و هدم منازلهم ، عايزينها تبقي والعة ، من العريش للقلعة .

تدخل مواقع التواصل الإجتماعي تلاقي النقد البناء ، اتباع الريس سيكي بيشتموا في الإخوان و يقولوا انهم ورا العمليات دي و يحيا الجيش السيكاوي العظيم و لن تنالوا من الجيش يا خونة الوطن . الإخوان يشمتوا في الناس إللي ماتت و فرحانين و يقولوا ان الريس سيكي هو السبب في موتهم و الجيش السيكاوي ساب الحدود و بيعمل مكرونة . القوي الثورية و الحركات المدنية علقوا صورة البروفايل السودة و بدأوا في تحليل الموقف تحليلا دقيقا  في إثبات انهم مش إخوان ، و أتباع الريس سيكي مصممين انهم إخوان .

و بكدة الحمد لله بعد هذه الخطوات الفزيعة ، لم يتم القضاء علي الإرهاب و التفجيرات بتذيد ، و سلاح الجنازات شغال الله ينور من الفرافرة للعريش لرفح هنا ١٦ شهيد و هنا ١٤ و إمبارح ٢٦ شهيد ، و العساكر سابوا المدرعات و الخبراء ع الفضائيات و الرقص في البيوتات و كله بيغني تسلم الأيادي .     

دور العسكري في الشطرنج

إللي بيلعب شطرنج يعرف إيه هو دور العسكري ، و إزاي ممكن  تضحي بواحد أو إتنين أو حتي خمسة لحماية الملك لأن العساكر الأكثر عدد علي الرقعة و حركتهم محدودة و أول درع في المواجهة .

لغز قتل ٢٩ مجند و اصابة ٢٦ في سيناء

اسئلة تحتاج إجابة لحل اللغز

كيف يمكن لتفجير في كمين أو نقطة أمنية كما يقال أن يقتل كل هذا العدد ؟  ٢٩ قتيل و ٢٦ مصاب ؟

هل هناك أي كمين  يبقى فيه كل العدد دة من المجندين ؟ و مجندين جيش مش داخلية في كمين علي الحدود مع اسرائيل ؟ مش غريبة شوية ؟

لماذا يتم قطع الاتصالات عن سيناء ؟ ما المطلوب إخفاؤه في سيناء ؟

طبعا أول إمبارح إصابة ٢ جنود اسرائيليين علي الحدود ، و اسرائيل ردت بإشتباكات و قالت انها قتلت ٦ من عرب سيناء المسئولين عن إصابة جنودها ، هل خرجت سيناء من تحت سيطرة الجيش ؟ أم كان ضرب المجندين الاسرائيليين تمهيد لما سيحدث و إثبات ان فيه إرهاب فعلا علشان ماحدش يشك ؟

لماذا يتم تهجير أهالي الشريط الحدودي من ٨٥٠ منزل بإخلاءها و فرض حظر تجوال ؟ لصالح من تهجير عرب سيناء و ما مصيرهم ؟

هل الوضع في ليبيا متأزم بالنسبة لحفتر و القوات التي تساعده و يقال منها مجندين من الجيش المصري ؟

لماذا لم يرد أحد من قادة الجيش أو الرئاسة على ما نشره الليبيين لصورة بطاقة عسكرية لأحد الجنود المصريين التي تم العثور عليها في سيارة تابعة لجيش حفتر ؟

انت طلعت في الأمم المتحدة و قلت انك محتاج مساندة لمحاربة الإرهاب ، يبقي إزاي تقطع الإتصالات و تمنع التصوير و تقفل المنطقة بحظر تجول ؟ المنطق يقول انك علشان تثبت للعالم كله ان عندك إرهاب تسيب الصحافة الأجنبية تصور و تسيب الإتصالات و يعملوا أحاديث صحفية و دة مصلحة ليك ، و لكن ان يتم التصوير فقط للصحف و القنوات الموالية ليك و بعد الحادث بفترة و بعدها تقطع الإتصالات عن شمال سيناء غريبة أوي ، و يبقي انت  عايز تخفي شئ ، ماذا يتم التعتيم عليه في سيناء ؟

  

إجابة الأسئلة دي تبين الفاعل و الحقيقة التي يتم إخفاءها .

حل مشاكل سيكا سيكا

إحنا كسيكاويين شرفاء بنقدم للريس سيكي تقسيم جديد لسيكا سيكا .

الإخوان و السلفيين يلموا بعض بربطة المعلم و يروحوا يحرروا الأقصي و يرجعوا الأندلس حسب ما بيقولوا و أهو تبقي سيكا سيكا خلصت منهم .

الجيش السيكاوي العظيم يخليه في دوره الجبار ، في صناعة المكرونة و كحك العيد و بناء الكباري ، و يسيبه من الحدود و القرف .

القوي الثورية ياخدوا الميادين يوم الجمعة و السبت  يهتفوا فيها براحتهم و يروحوا آخر النهار ، و باقي أيام الاسبوع يعملوا كام وقفة و يعلقوا كام يافطة يتصوروا بيهم ساعتين و يروحوا .

أحزاب المعارضة ياخدوا نص البرلمان ، كدة كدة مالوش لازمة يحكوا مع بعض و يشتموا بعض شوية و يمشوا ، و نصورهم و نذيع الجلسات علي نايل كوميدي .

أما الداخلية هانسيبلهم كام ميدان نحط فيهم الأسري إللي هيأسرهم الإخوان و السلفيين في حرب تحرير الأقصي و الأندلس و يقتلوا فيهم براحتهم .

الحكومة بقا هانشتريلها كام قناة فضائية و يطلعوا تصريحات براحتهم و يتصوروا براحتهم طول اليوم . 

الحدود بقي هانبقي نعمل ليها لجان شعبية تحميها ، و نعمل فرق مدنية لحفظ الأمن .

كدة تبقي مشاكل سيكا سيكا إتحلت .

سيكا سيكا و انسانية الريس سيكي

في دولة سيكا سيكا يهتم الريس سيكي إهتماما كبيرا بالشعب السيكاوي ، مش موضوع أكل و شرب ، الشعب السيكاوي مات من الجوع ، بس الريس سيكي إنسان يحب يساعد الشعب و يحقق له مطالبه . و حاولنا نرصد بعض الحالات الإنسانية للريس سيكي مع السيكاويين ،

الاسطي بعجر كان ابنه شلاطة تعبان و في المستشفي ، و الواد ما بياخدش الدوا و كل إللي عليه ، عايز أشوف الريس سيكي ، عايز أشوف الريس سيكي ، الأب بلغ إدارة المستشفي ، إدارة المستشفي بلغت الداخلية ، الداخلية بلغت المخابرات ، تم عمل التحريات اللازمة و التأكد أنه مش كمين و أن الطفل لا علاقة له بجماعة الخرفان المحصورة ، و جه الريس سيكي و إتصور مع الطفل شلاطة و حضنه و حقق أمنية الطفل في لحظة و الطفل و أبوه و أمه و جوز خالته قاعدين يغنوا تسلم الأيادي . 

أما بقي الولية أم دجدج الدلالة وقفت في إشارة الإسعاف ، و حلفت ما تعدي الشارع ، و العربيات تزمر و عسكري المرور يشد في شعره و دي تعيط ، و المحافظ جه و بطيخة في إيده و دي يعيط ، مش راضية تعدي ليه يا أم دجدج ؟ عليا ندر و لازم الريس سيكي يعديني ، سواق تاكسي معدي عرف الحكاية ، إتصل بالريس سيكي ، الريس سيكي يطنش ؟ لأ طبعا ، راح علي إشارة الإسعاف و شال الولية أم دجدج علي ظهره و عداها الشارع ، و إتصور معاها و هو بيعديها و حضنها ، و الفضائيات صورت و الجرايد صورت و الناس ملمومة علي أم دجدج بيغنوا تسلم الأيادي .

و في مرة الحجة غوايش أما عرفت ان سيكا سيكا في أزمة و السيكي بيلم تبرعات ، صممت تتبرع من أجل انقاذ إقتصاد سيكا سيكا ، جابت كل إللي حيلتها إللي هو الحلق بتاعها ، إللي كان جايبهولها جوزها عم بلالا الله يرحمه في عيد جوازهم ، وصلت الحجة غوايش قاهرة السيكي قادمة من قريتها الصغيرة بأدغال الصعيد ، شاورت للتاكسي ، و قالتله يا ابني وديني عند الريس سيكي ، سواق التاكسي طلع علي القصر الجمهوري ، رن الجرس فتحله اللواء بقلظ من الحرس الجمهوري و قاله عايزين الريس سيكي في موضوع مهم ، الريس سيكي كان بيتغدي ، ساب الغدا و نزل يقابل الحجة غوايش و صمم يشتري منها الحلق ، و الفضائيات جت و الصحافة جت و صورتهم و الحجة غوايش و الحرس الجمهوري و عم بلالا طلع من تربته و كله يغني تسلم الأيادي .

طبعا بعد وقوع إقتصاد سيكا سيكا كان لازم الريس سيكي يدعو الناس للتبرع لإنقاذ إقتصاد سيكا سيكا و طبعا علشان يبقي قدوة فلازم يتبرع هو الأول ،  فقرر الريس سيكي انه يتبرع بنصف ثروته ، قام الريس سيكي جايب نص ثروته بما فيها من عقارات و أراضي و فلوس في البنك و قام ضاربهم في الخلاط و وزنهم بميزان حساس و أخد نصهم حطه في شنطة سامسونايت جلد سودة إزاي ما أعرفش ، و طلع ع البنك إللي جنب القصر وقف ع الشباك زي أي مواطن سيكاوي بسيط ، يتبرع لصندوق تحيا سيكا سيكا ، و طبعا الصحافة وصلت و الفضائيات وصلت رغم انه ما قالش لحد و صوروره و هو بيتبرع و بقي مدير البنك و الموظفين و الفراش يغنوا تسلم الأيادي و الموظفات ترقص .

دي مجرد أمثلة عن انسانية الريس سيكي و سبب حب الشعب السيكاوي ليه و تمسكه بيه .   

السياحة في سيكا سيكا

اللواء سماح قنديل محافظ بورسعيد و هي من محافظات القناة في سيكا سيكا ع الناشف ، و في تصريح هام جدا علي قناة صوت الشعب السيكاوي قال
وصل إلي ميناء بورسعيد سفينة بها ١٥٠٠ سائح من اسبوع و أمس وصلت سفينة بها ٣٠٠٠ سائح ، مش من جنسية واحدة و لا إتنين ، من كل جنسيات العالم الموازي للمجموعة الشمسية ، و تم استقبالهم بعزف موسيقي الشرطة السيكاوية ، واخدين بالكم ؟ السياح جايين يسمعوا موسيقي الشرطة ، الحمد لله لم يتم استقبالهم بالغاز المسيل للدموع ، و سيقوم هؤلاء السياح بجولات سياحية في القاهرة و الأسكندرية و الأقصر و يتم تأمينهم في رحلتهم بالتنسيق بين المحافظ و شركات السياحة و مديرية الأمن التي عزفت لهم موسيقي الشرطة ، و جبنا أطفال المدارس بأسلوب حضاري و أعطوا كل سائح وردة بأسلوب حضاري جميل ، و هذا يثبت أن مصر بلد الأمن و الأمان ،
كان فيه تفجير عند جامعة القاهرة أعتقد ؟ و لا المدرعة إللي مات فيها ٦ في الشيخ ذويد ؟ أمن و أمان رهيب يعني زي الفل ، يمكن الأخبار بتوصل متأخر بورسعيد لإنقطاع الكهرباء المتواصل ، مش خدوا ورد ، يبقي أمن و أمان ، المهم إن لا فيه صورة و لا فيديو و لا صوروا ال١٥٠٠ و لا ال٣٠٠٠ ، الوحيد إللي إتصور هو المحافظ و كان جنبه أمن و أمان .
آه علي فكرة يا موحة ، سيكا سيكا كلها بطولها و عرضها ما فيهاش ١٠٠٠ سائح يا ابن الكدابة .

السيسي و أردوغان

هو السيسي محروق أوي من أردوغان ليه ؟ تقريبا أردوغان خده في الحارة المزنوقة قبل كدة

عامة كل دول الشرق الأوسط حلفاء لأمريكا مع إختلاف طبعا نوع التحالف و طبيعته ، تركيا ، إيران ، دول الخليج ، مصر ، كله بينفذ مخطط معروف مسبقا و بالإتفاق ، طبعا بتختلف طبيعة التحالف من دولة للتانية حسب ثقلها الدولي ، و الإختلاف دة بيظهر أوي في بعض الإعتراض علي الفرعيات ، بس  كله محسوب و كله في إتجاه واحد ، فيه دول من حقها تعترض بس دة مش معناه انهم مش حلفاء ، و فيه خط أحمر لكل دولة زي مثلا إعتراض تركيا علي ضرب سوريا ، و بعده الهجوم الشرس عليها و المطالبة بطردها من الناتو ، قرصة ودن مش أكتر ، الفرق بين مصر و تركيا أن تركيا عندها مساحة للإعتراض ، انما السيسي سلم الراية في المقابلة التليفزيونية في أمريكا و قال هايتحالف مع أي حد لمحاربة الإرهاب ، طبعا ما يقصدش داعش ، يقصد إرهاب مزعوم إخترعه علشان يبقي رئيس ، و معني كلامه انه من شدة طاعته لأمريكا و ولاءه ليها طلب منها صراحة التدخل في الشئون الداخلية ، و دة طبعا يعتبر فرق في نوعية التحالف مع أمريكا ، ان السيسي لغي مساحة الإعتراض تماما ، كل الشرق الاوسط حليف لأمريكا و لكن تحالف تركيا مع امريكا غير مصر غير ايران غير اسرائيل في مساحة الإعتراض و السيطرة علي القرارات . 

سيكا سيكا و الطابور

في سيكا سيكا كل حاجة بالطابور ، العيش بالطابور ، التطعيم بالطابور ، التموين بالطابور ، تذكرة المترو بالطابور ، البنزين بالطابور ، الأنابيب بالطابور من الآخر السيكاوي عايش حياته طوابير ، من طابور لطابور لطابور و علشان حكومة سيكا سيكا تدرب السيكاوي علي إحتمال الطوابير ، عملت في المدارس وسيلة تعذيب اسمها طابور الصباح ، طابور يومي لمدة ساعة ، مرفق بميكروفون و أصوات غريبة ، و بكدة حكومة سيكا سيكا ضربت إتنين سيكاوية بشلوت واحد ، سيكاوي يتعود علي وقفة الطابور و سيكاوي يتعود علي الدوشة إللي عاملها الطابور تحت البيت عنده . بس رغم كل دة و كل مجهودات الحكومة ، السيكاوي ما بيقفش في الطابور ، تلاقيه يزق و يدخل في النص ، تلاقي الطابور واقف و طلعلك سيكاوي دخل من الجنب كأن كل الناس دي مش واقفة ، يبقي الطابور ماشي تمام و تلاقي عيل سيكاوي طلع من تحت الأرض قدامك ، تبقي مثلا واقف بقالك ساعة في الطابور و أول ما توصل تلاقي ولية سيكاوية رغاية دخلت قدامك و قاعدة ترغي ، و تقول معلش ياخويا سايبة العيال لوحدهم ، و لو إتكلمت بقي و قلت إن دة دورك ، خد من المنقي يا خيار ، انت راجل ، انت تستحمل ، علشان عيالها ، ما فرقتش ٥ دقايق . السيكاوي فنان في إختراق الطوابير ، معلش علشان الحق القطر ، العربية واقفة مستنية ، سايبة الأكل ع النار و حجج كتير أوي تخليه مستعجل ، و السيكاوي مستعجل علي طول ، في المترو يقف علي الباب ، تسأله نازل يقولك لأ ، الأوتوبيسات و الميكروباصات بتسابق بعضها ، وراك الديوان ياسطي ، لأ أهو مستعجل و خلاص ، ليه ؟ هو نفسه مش عارف . شعب سيكا سيكا مفيش منه و لا هايبقي فيه تاني .

سيكا سيكا و الشيزوفرانيا

المواطن السيكاوي في دولة سيكا سيكا

يمتاز المواطن السيكاوي بطبيعة خاصة مختلفة عن أي مواطن آخر علي وجه الكرة الأرضية ، فقد إشتهر السيكاوي بأنه مريض بالشيزوفرينيا و عنده إنفصام في الشخصية ، و تاريخه القريب يثبت ذلك بما لا يدع مجالا للشك ، نشوف كدة

المواطن السيكاوي إللي قال الجيش حمي الثورة و الجيش و الشعب إيد واحدة هو نفسه المواطن إللي قال يسقط حكم العسكر .

المواطن السيكاوي إللي صدق ان الجيش هايعالج فيروس سي بالكفتة هو نفسه إللي طبل للحكومة علشان استوردت علاج فيروس سي بملايين الدولارات .

المواطن السيكاوي إللي سمع كلام الإخوان و قال نعم علي الإعلان الدستوري علشان يدخل الجنة لأن نعم تدخله الجنة ، هو نفس المواطن السيكاوي إللي برضه قال نعم علي الدستور الأخير علشان الإخوان ما يرجعوش و البلد تستقر .

المواطن السيكاوي إللي قال علي محور قناة السويس خيانة و مرسي هايبيع البلد لقطر هو نفسه المواطن السيكاوي المقتنع بالحفر ع الناشف و ان مشروع محور القناة أعظم مشاريع القرن ال٢٠ و ال٢١ و علي السادة المقيمين في القرن ٢٢ مراعاة فروق التوقيت .

المواطن السيكاوي إللي قال يسقط حكم العسكر و عصر لمون و انتخب مرسي علشان يعرف ربنا ، هو نفسه المواطن إللي فوض العسكر علشان يعزلوا مرسي .

المواطن السيكاوي إللي بيقول ان الريس سيكي مرشح مدني هو نفس المواطن اللي أما تهاجم الريس سيكي يقولك ما تغلطش في جيش سيكا سيكا .

المواطن السيكاوي إللي قال قبل كدة ان رفع الدعم كارثة و هايقضي علي الفقير و الناس هاتموت من الجوع ، هو نفسه المواطن إللي قال رفع الدعم في مصلحة الفقير و علشان ماسر .

المواطن السيكاوي إللي قال الإخوان بتوع ربنا و إللي ضدهم يبقي ضد شرع الله هو نفس المواطن إللي قال الإخوان مالهومش علاقة بالإسلام و لا بشرع الله .

المواطن السيكاوي إللي بيقول أمريكا واقفة مع الإخوان ، هو نفسه المواطن الفرحان بزيارة السيكي لأمريكا و طلب مساندتها و مساندتها ليه .

المواطن السيكاوي إللي قال الداخلية بلطجية هو نفسه المواطن إللي فرحان و الداخلية بتقتل طلبة الجامعات .

المواطن السيكاوي إللي شاف تصريح وزير الداخلية مخطط للإخوان بعد قليل سيتم التصدي له ، هو نفسه المواطن إللي مصدق إن رغم قفل الشوارع و مدرعات و عساكر أمن مركزي ، إن الإخوان هما إللي عملوا تفجير عند جامعة القاهرة .

يا خرابي ع السيكاوية علل و أمراض نفسية كبيرة يا عباسية غني و ارقصي يا ولية .

سيكا سيكا و الكتابة على الحيطان

من ايام الفراعنة اجداد اجداد السيكاويين الموجودين دلوقتى و الشعب السيكاوى مشهور بالكتابة على الحيطان , يحب اوى يكتب على الحيطان ,
طبعا ايام الفراعنة كانوا صبورين جدا و يكتبوا كل حاجة على جدران المعابد و المسلات و علشان ماحدش يلعب فى كتابتهم كانوا بيكتبوها بالحفر مش مجرد كتابة , كأنهم خايفين لا التاريخ يتزور , بس هما السيكاويين هايغلبوا تلاقى مثلا رمسيس التانى كاتب انه انتصر على الهكسوس و بهدلهم , ييجى بعده رمسيس التالت يكسر الجزء اللى فيه اسم التانى و يكتب اسمه تحت , و اشمعنى الجزء دة , عوامل التعرية ,

السيكاويين ورثوا الكتابة على الجدران من اجدادهم الفراعنة , تلاقى على اسوار السكة الحديد , على اى حيطة او سور , امبراطور التاريخ استاذ شلاطة , قرش الجغرافيا فلوطة الاقرع , عملاق اللغة العربية عبمتجلى سيبويه .

حتى بعيد عن الاعلانات تلاقى مثلا اما ييجوا يهاجموا الرئيس يهاجموه على الحيطان , سيكو عر...... , يسقط سيكو
تلاقى بقى مؤيدين السيكو يردوا عليهم , و كاتبين ع الحيطة اللى قصادها اخوان خرفان , يحيا سيكو ,

تيجى الحكومة اما تلاقى حيطة فاضية مش مكتوب عليها تسيبها كدة ؟ لأ طبعا تقوم كاتبة عليها بالبنط العريض ( ممنوع لصق الاعلانات ) ههههههههههههههههههههه مش بقولكم عادة ورثوها و متمسكين بيها .

الآيات القرآنية فى سيكا سيكا

 استخدام الايات القرآنية فى سيكا سيكا مش زى اى مكان تانى فى العالم , احنا بنختار اللى يناسبنا , ممكن ناخد نص الآية و نسيب النص التانى و دة اختراع سيكاوى اصلى او نفصل الآية زى ما احنا عايزين , او نختار الآية اللى تمشى معانا

نشوف كدة

اللى عايز يتجوز على مراته يقولك يا عم دة حلال و القرآن بيقول و تلاقيه جابلك الآية
مثنى و ثلاث و رباع
و يسيب الباقى
و ان خفتم الا تعدلوا فواحدة و لن تعدلوا ,
هو جاب الجزء اللى يناسبه بس و ساب الباقى .

مثلا معظم محلات عصير القصب معلقة لوحة مكتوب عليها
وسقاهم ربهم شرابا طهورا
سقع وبيع يا وديع و أهو آية قرآنية تلم الزباين

كله كوم و الحلاق كوم , انا شفت حلاق كاتب
وجوه يوم اذن ناعمة
دة بقى ضرب كل محلات عصير القصب بالآية دى .

و لا الترزى اللى شعاره على المحل بتاعه
نحن نقص عليك احسن القصص
طبعا القصص و نقص فى الآية مالهاش علاقة بالمقص بتاعه بس تسأله اشمعنى الىية دى يقولك
كله كلام ربنا . . وكلام ربنا كله بركة و الناس تحب المؤمنين و اللى كاتبين آيات قرآنية ,

تلاقى صاحب عربية كبدة كاتب
كلوا من طيبات ما رزقناكم
اكيد طبعا الكبدة و السجق مش هما المقصودين بكلوا من طيبات ما رزقناكم , و دول مش طيبات خالص .

سواق تريللا كاتب على عربيته
ربنا ولا تُحملنا ما لا طاقة لنا به
طبعا مش قصده حمولة التريللا بتاعته بس هو اختار الآية دى .

تلاقى الحرامى مثلا اما تيجى تقوله عيب و حرام يقولك يا عم دة ربنا كبير و بيرزق
و يقولك الآية
و يرزقكم من حيث لا تحتسبوا
طبعا الرزق هنا بالنسبة ليه شقة ملغمة , خزنة , علبة مجوهرات و يروح يسرق يقول
استرها يا رب .

كله كوم و حكومة سيكا سيكا كوم تانى , تلاقى فى اعلانات التحذير من التدخين و المخدرات بيقولوا
ولا تُلقوا بايديكم الى التهلكة
مع ان الاية تفسيرها يعيد تماما عن التفسير الحكومى المحلبى الببلاوى الحلزونى دة لكن طبعا احنا بناخد الجزء اللى يناسبنا , الآية بقيتها ,
وانفقوا فى سبيل الله ولا تلقوا بايديكم الى التهلكة واحسنوا ان الله يحب المحسنين
الموضوع لا له علاقة لا بالتدخين و لا المخدرات خالص

لكن فى سيكا سيكا كله ماشى و كله بيعدى و كله على كله ايمان و تقوى , الشعب السيكاوى شعب متدين بطبعه .
سيكا سيكا
بولوتيكا
و الشعب دة انتيكا . 

تبرعوا

بعد قيام ثورة 30 يونيو فى سيكا سيكا ,
استولى على الحكم القائد تيتو خان ,
زعيم قبيلة بنى سهتان ,
قائد فرقة كتيان بن بهتان ,
الذى انتصر على الربعاويين فى موقعة بظرميط
و هزم الارهابيين الوحشين فى موقعة ابو اتاتا العبيط
و بيع الشعب السيكاوى الجلد و السقط و الغيط ,
و تبرعوا للحفر ع الناشف ,
و ما عنديش اديك ما عنديش ,
و الباقى فى سوق البلاد مايساويش ,
حاولت ابيعها جملة و قطاعى ,
بس اوباما قفل التليفون على صباعى ,
 و تبرع يا سيكاوى ,
تبرعى يا سيكاوية
تبرعوا علشان انهب التكية ,
تبرعوا علشان الارهاب ,
و موتوا من الجوع بعد ما اقفل كل الابواب ,
تبرعوا علشان نركب عربيات ,
تبرعوا لتوسيع المعتقلات  ,
و نزود لضباطنا المعاشات ,
اللى هايتبرع مولود ,
و اللى مش هايتبرع مفقود ,
و انا تيتو العجيب ,
و طريقكم مسدود مسدود مسدود .

دولة سيكا سيكا و الولية ام ترتر

الولية ام ترتر تعتبر اشهر ولية فى دولة سيكا سيكا , عندها كل حاجة يتخيلها المواطن السيكاوى ,
كل ما المواطن السيكاوى يبقى عايز حاجة , يقولوله عند ام ترتر , بعد ما السيكاوى قام بثورة عظيمة , و شال النظام ,
سأل المجلس العسكرى
فين حق الشهيد ؟
عند ام ترتر

طب عيش ؟
عند ام ترتر

طب حرية ؟
عند ام ترتر

عدالة ؟
عند ام ترتر

المواطن السيكاوى زهق , قال ما بدهاش بقى العلاقة المشبوهة بين المجلس و الولية ام ترتر , يسقط المجلس و نجيب حد ما يعرفش ام ترتر , عصر لمون و جاب تجار الدين ,

حق الشهيد ؟
عند ام ترتر

حرية ؟
عند ام ترتر

طب عدالة ؟
عند ام ترتر

طب عيش ؟
عند ام ترتر

السيكاوى طهق من حياته ايه الولية ام ترتر دى اللى عندها كل حاجة , يسقط المرشد , و نجيب العسكر تانى يمكن يكونوا اتعلموا و جاب السيكاوى العسكر تانى .

حق الشهيد ؟
عند ام ترتر

عيش ؟
عند ام ترتر

حرية ؟
عند ام ترتر

عدالة ؟
عند ام ترتر

قلنا ندور على الولية ام ترتر دى شكلها واصلة و عندها كل حاجة , نقلب الدنيا على ام ترتر مش لاقيينها , حتى نسأل على الواد ترتر يمكن بيجيب لأمه كيس ملح و لا حاجة , لا لقينا ام ترتر و لا الواد ترتر .

السيكاوى تعب , لحد ما جه الامبراطور سيكو و قاله , بص يا سيكاوى احنا هانحفر محور ع الناشف و هاتدفع يعنى هاتدفع ,

ادفع ايه ؟ ما عنديش حاجة ادفعها
كان الرد
دة عند امك ماعنديش دى
هاتوه

و دخل السيكاوى المعتقل لقى مين ؟
لقى ام ترتر فى سجن النسا

دولة سيكا سيكا و الديموقراطية

في دولة سيكا سيكا إختلفت كل المفاهيم ، تلاقي كدة العالم السيكاوي عالم تاني ، لما حاولت سيكا سيكا تطبق الديموقراطية بعد ما الشعب السيكاوي فاض بيه و قام بثورة علي الحاكم العسكري مباريكا و سلمها للحاكم العسكري طنطاويكا و الجيش و الشعب إيد واحدة ، بس المواطن السيكاوي فهم الثورة غلط ، طنطاويكا يقتل و السيكاوي يقول إيد واحدة ، طنطاويكا يسحل إيد واحدة ، طنطاويكا يحبس أيد واحدة ، طنطاويكا وعدهم بالديموقراطية ، الديموقراطية في سيكا سيكا غير أي ديموقراطية في أي مكان تاني ،
دايما الإختيارات صعبة ،

تدخل الجنة بنعم و لا تدخل جهنم و بئس المصير بلأ ؟

تنتخب القاتل و لا تنتخب الخاين ؟

تنتخب الكافر و لا يبقي البرلمان من المؤمنين أمثال البكليمي و إللي بيسرحوا بموزز ع الطريق الزراعي زى ونيس ؟

تعيش في إرهاب و قنابل و تفجيرات و عيالك يموتوا و لا تنتخب السيكي ؟

تموت م الجوع و تعيش فى أمن و أمان و لا تاكل و تموت ناقص عمر فى تفجير و لا بطلقة فى دماغك ؟

تغنى تسلم الأيادى و لا تغنى ظلموه فى المعتقل ؟

اختار و لك الحرية المطلقة , نحن فى أزهى عصور الديموقراطية السيكاوية .

و يمتاز السيكاوي بأنه دايما يرقض و يغني بعد ما يدلي بصوته ،
فرحان بالقفا اللي بياخده ؟ يمكن ،
كان عليه ندر ؟ جايز أتهطل ؟ مش بعيد
و دايما صوته يلبسه في الحيط ، تقريبا نية المواطن السيكاوي مش خالصة ،
أهم ميزة بقي في سيكا سيكا ميزة إديله فرصة ، السيكاوي يحب أوي الكلمة دي ، يبقي رايح اسوان و السواق واخد طريق اسكندرية يقولك إديله فرصة هو إللي فاهم و عارف ،
انت ركبت عربية غلط ،
يقولك لأ ، هو ماشي صح
يابني إزاي ؟ دة طريق اسوان الناحية التانية .
و بعد ما السواق يوصل اسكندرية , انزل هنا
إيييييييييييييييه
ما علينا

سيكا سيكا
و المواطن الأنتيكا

الانتخابات فى سيكا سيكا

الانتخابات فى جمهورية سيكا سيكا

الانتخابات فى جمهورية سيكا سيكا غير اى انتخابات فى اى بلد تانية ,
فى سيكا سيكا انتخابات الرئاسة يشارك فى الوفيات كعنوان للوفاء ان اصواتهم لسه موجودة هذا عن الجن و الشياطين اللى بيدخلوا يدلوا بأصواتهم من غير ما تشوفهم زى ما حصل فى انتخابات الرئاسة الأخيرة اللجان فاضية و الاصوات كتيرة و احتار الناس هل من ادلوا بأصواتهم هم الجن و الشياطين أم استخدموا انفاق سرية الى داخل اللجان و خرجت التصريحات بنزاهة الانتخابات و ان السيكى نجح باكتساح كامل و انتخبه الملايين و ارتجت الارض فى سيكا سيكا براقصات الوزن فوق الثقيل و الدنيا ربيع و الرقص بديع و قفللى على اصوات المقاطيع و قد شارك فى الانتخابات النزيهة كل من الحرامية و الفاسدين و المطبلاتية و المهللاتية و المأجورين من اتباع السيكى و رغم بكاء المطبلاتية و المنافقين من قلة عدد الناخبين تجد فرحتهم بالملايين التى انتخبت السيكى تحت اشراف قضاء ذنوبة ,
أزاى ؟
ما أعرفش
انها من معجزات سيكا سيكا

اما بخصوص الانتخابات البرلمانية فحدث و لا حرج

تأجيل ورا تأجيل قال ايه بنقسم الدوائر , الانتخابات البرلمانية فى سيكا سيكا من عجائب الدنيا الحديثة , فقد تم تقسيم البرلمان قبل الانتخابات مثلا حزب الزور 20% و تحالف المواطن الانتيخ 12% و حزب الولية ام اشرف 22% و تحالف كومبو السنيد 11 % و الباقى فلول على رجال اعمال على ضباط متقاعدين و كل من عايز حصانة يقول و يدفع ياخد ععلى طول ,
و كله مصالح و الناجح طالح , اما بخصوص عدد البرلمان فلم يتم تحديده و سيتم الانتهاء من تحديد العدد بموجب قانون الافشخانات بناء على صفقات ما تحت الترابيزة و ما فوقها و ما بين الترابيزات و بعضها , و كله جاه\ز و الاصوات فى الصناديق و ديق ديق كله فى الصناديق و احنا جاهزين فى شهر ديسمبر لأ لأ فى شهر فبراير لأ لأ الله اعلم بنقسم الدوائر .

سيكا سيكا
بلد المواطن الانتيكا .

داعش

داعش داعش داعش
.
لو قلنا ثورات الربيع العربي أزاحت ٤ رؤساء و ليس ٤ أنظمة ،
زين العابدين في تونس ،
مبارك في مصر ،
القذافي في ليبيا ،
علي عبد الله صالح في اليمن ،
و رغم كل التدمير و الحرب الأهلية و سفك الدماء ، لم تستطع أن تزيح بشار الأسد في سوريا ،
الاسلاميين ظهروا و بشدة في تونس و مصر و اليمن ، كمحلل لعودة نفس النظام الذي قامت عليه الثورات بحكمهم الفاشي ، و دة نجح في مصر و اليمن ، ليبيا تعلموا مما حدث في مصر و تونس و رفضوا الاسلاميين و لا زالت الحرب مستمرة بين نظام فاسد بقيادة حفتر و بين كتائب الاسلاميين ، فجأة ظهرت داعش و كانت السبب في ضرب سوريا ،
تفتكروا ظهور داعش لأن اليد التي تدير الشرق الأوسط لم تتوقع صمود بشار الأسد في سوريا حتي الآن ؟
و مطلوب إزاحة كل الوجوه القديمة ؟
و ليه أمريكا استعانت ب ٥ دول عربية لضرب سوريا لأول مرة و لم تستعن بالناتو ؟
سؤال مهم
لماذا تمت إزاحة هذه الوجوه إذا كان الدفاع باستماتة لترسيخ نفس النظم الفاسدة ؟
سؤال أهم
ليه دلوقتي الهجوم الشرس علي تركيا في الصحافة الأمريكية لطردها من حلف الناتو ؟
و هل مطلوب التخلص من أردوغان ؟
الأهم من كل دة
ليه لم يتم التعرض لإيران رغم انها مش بثقل تركيا ؟
إجابة الاسئلة دي فيها اللعبة كلها .
نرجع لتنظيم داعش
تنظيم مبهم تتزايد اعداده بطريقة غريبة , مرتزقة من كل انحاء العالم , الكثير من الأسئلة
هل المرتزقة فيه حد له سيطرة عليهم ؟
إيه قصة النمساويات و الفرنسيات ؟
ليه عايزين يربطوا داعش بتركيا ؟
بقت تونس أكبر ممول لداعش بالمجاهدين ،
مصري ينضم لداعش و يرجع يشتري أرض و عربية و يبني عمارة ؟
مين بيدعو للإنضمام لداعش في أوروبا ؟
امام جامع فى نيويورك يدعوا المسلمين للانضمام لداعش ؟
محاولات طرد تركيا من الناتو ؟
و الإحتجاجات هناك بالتزامن مع كل دة ؟
ليه سوريا و العراق بداية داعش ؟
فيه تنظيم ارهابي مسلح بالطريقة دي انه يحاصر عاصمة زي بغداد ؟
إللي بيحصل في اليمن ؟ ليبيا ؟
ليه اسرائيل بتتسلح بالطريقة دي ؟
ماحدش سمع صوت إيران و لا روسيا و لا الصين و دة شئ غريب ؟
هل حقا تركيا تساعد تنظيم داعش للقضاء علي الأكراد أم هي ذريعة لشئ سيحدث في تركيا و طردها من حلف الناتو ؟
Is turcky really help isis or it is a reason for something will happen there and kicking it out of neto
http://pamelageller.com/2014/10/turkey-helping-islamic-state-bombed-gassed-kurdish-fighters.html/
ماذا لو سقطت بغداد في يد داعش ؟ لقد بدأت معركة الاستيلاء علي بغداد ، ماذا بعد ؟
http://pamelageller.com/2014/10/the-battle-for-baghdad-has-begun.html/
4 من عرب اسرائيل يلتحقون بداعش فى سوريا نقلا عن صحيفة ها آرتس http://www.haaretz.com/mobile/1.620512?v=C7CFB60B04BBC468F621E59D4A38626D
تنظيم من المرتزقة ليس إلا ، من خلفه ؟ و من يموله ؟
تونس اكبر ممول لداعش بالمجاهدين http://www.theguardian.com/world/2014/oct/13/tunisia-breeding-ground-islamic-state-fighters?CMP=twt_gu
فتاتين يهوديات من فرنسا تلتحقان بداعش هذا غير اكثر من 100 فتاة فرنسية http://abcnews.go.com/International/wireStory/french-girls-lured-jihad-online-26095719
مقابلة السيسى للتلفزيون الامريكى استفزاز لداعش لا جدال فيه فما وراءها http://www.youtube.com/watch?v=21MUphZRRko
مراهقتين من النمسا ك لقد ارتكبنا خطأ جسيما فى الالتحاق بداعش http://nypost.com/2014/10/10/pregnant-teen-girls-who-joined-isis-weve-made-a-huge-mistake/
امام جامع فى نيويورك يدعو المسلمين للالتحاق بداعش و لا رد فعل من الحكومة الامريكية اللى بتحارب داعش
دة الفيديو http://pamelageller.com/2014/08/video-new-york-mosque-leader-commands-muslims-jihad-friday-prayer.html/
ماذا بعد ؟

الصورة جايبة خيمة في معسكر داعش في نينوي بالعراق ، و الخيام عليها ماما أمريكا ، دة معناه إيه تفتكروا ؟

أشمعنى

السيسي في الأمم المتحدة ،
إشمعني ،
يتسهوك واحدة واحدة

السيسي فيه ألاطة ،
إشمعني ،
خلاها ع البلاطة .

السيسي في الجامعة ،
إشمعني ،
زيه زي أبو لمعة .

السيسي في الطيارة ،
إشمعني ،
إتعطل في الإشارة .

السيسي في النواشف ،
إشمعني ،
رايح يحفر ع الناشف .

السيسي أسد مصر،
إشمعني ،
ساب قفصه و هج العصر .

حكم العسكر

المشكلة إننا نسينا إن العسكر كانت مشكلتهم التوريث ، و انهم ما عندهمش استعداد يسيبوا الحكم لحاكم مدني بعد ٦٠ سنة حكم ، من ١١ فبراير ٢٠١١ لحد دلوقتي و العسكر بيتحكم في كل حاجة ، يطلع الإخوان ، ينزل الفلول ، بعدها يطلع الفلول و يطلع السلفيين بديل للإخوان ، و ينزل الإخوان و القوي الثورية ، بعدها يعمل مصالحة و يرجع ضبط كل حاجة زي ما كانت قبل ٢٥ يناير ، بيتحكم في كل الفصائل ، بيحط للقوي الثورية الخط إللي يمشوا عليه ، إنزلوا ضد الإخوان ، إنزلوا ضد قانون التظاهر ، دايما بيحدد الطريق و في إيده كل خيوط اللعبة ، زي الصورة دي .

هنا مقص و هنا مقص

هنا مقص و هنا مقص ،
هنا شعب بيتنصص ،
و بلد بتتقسم تتقص ،
و مسهوك يحكم و يبصبص ،
هنا مقص و هنا مقص ،
و منافقين عمالة تترص ،
دي هاتبقي أد الدنيا يا قص ،
ع الناشف ويا البيج بوس ،
هنا مقص و هنا مقص ،
أرانب راضية بتاكل خص ،
و الفساد عمال يترص ،
تتقسم نص بنص ،
هنا مقص و هنا مقص
شالوا المخ و حطوا البنص ،
و ضرب في الغباوة بلنص .

سيكاوى بالنحوى

المواطن فى دولة سيكا سيكا دايما أحواله غريبة و ماشية معاه بالعكس ,
جينا ندرس احوال المواطن السيكاوى
لقيناه ( ممنوع من الصرف ) يعنى لا ليه سعر فى بلده و لا برة بلده
يحب دايما يكون ( مرفوع ) فوق فوق فوق سن الخازوق ,
تحس انه طوال تاريخه ( منصوب ) عليه من كل حكامه ,
و فى مواسم الانتخابات تلاقيه ( مجرور ) لأختيارات مش عايزها يتحكم فيها الزيت و السكر ,
عايش فى ( حال ) لا يسر عدو و لا حبيب ,
و طبعا ( مضاف اليه ) فقر و غم و هم ما يتلم ,
المشكلة ان المواطن السيكاوى عمره ما كان ( فاعل ) ,
حتى اما عمل ثورة اتضحك عليه و خلوه كالعادة ( مفعول به ) ,
كان نفسه فى ( حرف جر ) يجره للحرية ,
بس يا خسارة بعد ما لقاه حن ل ( فعل ماضى ) مبنى على الفساد ,
و رجع النظام القديم تانى ب ( فعل مضارع ) فى 30 يونيو ,
علشان كدة يستاهل انه يكون دايما ( ضمير مستتر ) تقديره مفيش .

سيكاوى بالنحوى ,
وحوى يا وحوى ,
ابقى سلملى على أمك يا اسماعيل بيه .

هانموت كلنا

تخيلوا كدة غيروا اسماء محطات المترو تقوم انت ايه بقى , تركب من محطة مبارك تنزل تغير فى محطة طنطاوى اول ما توصل محطة مرسى تفتكر انك ركبت غلط تنزل تروح اتجاه السيسى , هااااااااااااااااااااااااااااااااااااااااااااار اسود شالوا القضبان , هانمووووووووووووووووووووت كلنا .

هو حكم العسكر ايه ؟

هو حكم العسكر إيه غير مشير يحكم ،
و فريق يمسك وزارة الدفاع
و لواء يمسك الداخلية ،
و شوية عقداء علي عمداء متقاعدين يدخلوا انتخابات البرلمان ،
و مقدم يطلع يرغي ع الفضائيات ،
و رائد يلم أتاوات
و نقيب بيشرف علي صناعة الألبان و البنزينات ،
و ملازم عايش في الدور مقضيها بسلاحه حوارات ،

و مجند بيموت غدر علشان مصر .
دة الوحيد إللي ما بياخدش م التورتة و لا طمعان في القصر .

مطالب فئوية

اما يبقى هدفك من النزول اسقاط قانون التظاهر يبقى ما تقولش ثورة
اما يبقى هدفك من النزول عودة رئيس تم عزله بأمر الشعب يبقى ما تقولش ثورة
اما يبقى هدفك من النزول مجرد الأفراج عن المعتقلين فقط يبقى ما تقولش ثورة
اما يبقى هدفك من النزول مجرد الانتقام من الداخلية يبقى ما تقولش ثورة
اما يبقى هدفك من النزول المطالبة بحق الشهيد بمجرد هتاف أجوف يبقى ما تقولش ثورة

الثورة تطالب بأسقاط النظام , اسقاط نظام كامل بكل ما سبق و ما لم يتم ذكره , دة هدف الثورة , اسقاط النظام لتحقيق مطالب عيش حرية عدالة اجتماعية كرامة انسانية , اما اذا كنت بتنزل علشان سبب من الاسباب السابق ذكرها ,
يبقى اسمها مطالب فئوية و ليست ثورة .

العبى يا العاب

العبى يا العاب ,
ناس عايزة شرعية , و ناس عملت انقلاب

زغرطى يا ام فاروق
قال ايه جم يأخونوها قاموا واخدين خازوق

اشكرى يا انشراح
بهبلهم سلموا العسكر المفتاح

حط نفسك مكان النظام

لو حطينا نفسنا مكان النظام هانعرف بيفكر إزاي ، دايما النظام بيدفعك سواء عن طريق الإعلام أو اللجان للتفكير في إتجاه معين ، و دايما بيخليك مشغول بحاجة يخترعها علشان يشغلك بيها و الأمثلة كتير ، هل صليت علي النبي ، أحاديث البخاري ، فتاوي دينية غريبة ، حتي قنبلة يدوية الصنع و إرهاب ، كل دة إشتغالات ، شوف إستفادة النظام إيه من كل حاجة هاتعرف إيه بيغطي علي إيه ، فكر دايما عكس ما هما بيدفعوك تفكر علشان تفهمهم .

لما تحب واحدة ما بتحسش

لما تحب واحدة ما بتحسش و ما عندهاش دم

U feel like

إيه يا حجة هانفضل نحفر ع الناشف كتير ؟ مش هاتجيب مية بقي ؟

دي جابت شلالات في محور القناة ، و بقي الحفر بالمايوهات 

يعنى ايه ؟

يعني إيه حفر ع الناشف ؟
يعني تجيب الناشف و تحفر عليه

طب يعني إيه و انت بتحفر ع الناشف تجيب مية ؟
يعني استرخصت الناشف و جبت نوع مضروب يا معلم 

طب يعني إيه جبت الناشف مضروب ؟
يعني هايجيب مية من كل حتة و هاتبقي مليطة علي دماغك و دماغ إللي خلفوك .

تعالى خدينى يا ماما

قال إيه بيقولوا إن المصريين سحبوا ٩٠% من ودائع البنوك علشان شهادات إستثمار قناة السويس ،
بس فيه ١٠% فاضلين في البنوك ، يسيبوهم ؟ لأ طبعا
قاموا واخدين كمان قرض ١٨٠ مليار من البنوك لتمويل المشروع بضمان بوبوس .

طب و بوبوس أخباره إيه ؟
بوبوس ع الحديدة و البنوك ع الحديدة و الشعب ع الحديدة و مفيش حديدة أحسن من حديدة .

كدة مفيش أي استثمارات لسنين قدام ، محور القناة = دمار شامل .
ماما
تعالي خديني يا ماما
تعالي خديني يا ماما

مااااااااء غبااااااااااء

ما اعتقدش خروج ماهينور و علاء عبد الفتاح مفاجأة ، كل الحكاية انهم خرجوا المعروفين قبل زيارة أمريكا ، و علشان منظمات حقوق الإنسان ، يا ريت بس ما نفرحش أوي لأن فيه ٤٠ ألف معتقل لسه من ضمنهم ناس مضربين عن الطعام ، و أحب أشكر الناس إللي عاملين حملات للإفراج عن أشخاص معينة ، جتكم القرف و لا عمركم هاتتعلموا و هاتفضلوا أغبياء و مضحوك عليكم ، ما هما إتحبسوا علشان يطلعوا و غيرهم يفضل جوة علشان مش مشهورين زيهم . نظام غبي و شعب أغبي .

التقسيم السياسى لجمهورية سيكا سيكا

التقسيم السياسي لجمهورية سيكا سيكا الحلزونية ،
إنقسمت جمهورية سيكا سيكا في ال ٣ سنين إللي فاتوا إي عدة تكتلات سياسية في انقسام لولبي يحدث لأول مرة في مجرة بظرميط .
و قد نتج من هذا الإنقسام عدة تكتلات

النوع الأول
السيساوي و موطنه الأصلي العالم الموازي و يعتقد ان السيسي أنقذ مصر من الإرهاب و النور ما بيقطعش و الحفر ع الناشف مش هايجيب مية ، و الدنيا ربيع و الجو بديع و إتحلت كل المواضيع ، يمتاز بالقدرة علي التبرير ،
و شعاره
لو هاشحت علي باب النادي ،
أنا و ولادي ،
برضه تسلم الأيادي .

النوع الثاني
الربعاوي ، و قد نزح من جبل المقطم بفعل العواصف و الصفقات ، و هذا النوع يعتمد علي مبدأ السمع و الطاعة و قد حدث ضمور في العقل لعدم استخدامه ، و هذا الربعاوي يؤمن ان مرسي له شرعية و انه راجع للحكم ، و قد ترك هذا أثرا علي قفاه في نقش حفري نادر ،
و شعاره جئت لا أعلم من أين ،
و لكني أتيت ،
عملوا عليا ثورة فمشيت ،
النوع الثالث
التلفاوي ، و هذا النوع يؤمن بالتلون و مات الملك عاش الملك ، مش فارق معاه مين و إزاي المهم هاكسب إيه ، و يمتاز هذا النوع بالدقن و الزبيبة و النفاق ،
و شعاره
ما تقولش عليا مان ،
بس دخلني البرلمان .
النوع الرابع
صفقاوي و هذا النوع موطنه الأصلي الأحزاب الكرتونية ، و وظيفته معارضة مدفوعة الأجر مقابل كام كرسي في البرلمان أو وزارة أو تلميع ، و شعاره
إرميلي أي عضمة ،
أحسن ما تبقي صدمة .
النوع الخامس
الحصاوي ، و دة النوع إللي مصدق ان الأربع انواع إللي فاتوا ممكن يعملوا حاجة للبلد أو يهمهم غير مصلحتهم .

لا بنشحت و لا بنقول لله

صلي علي رسول الله
لا بنشحت و لا بنقول لله
قال إيه نقلا عن جريدة الوفد ، الطائرات الحربية ترافق طائرة السيسي حتي خرجت من الأجواء المصرية .
واحد يسألني طب ليه ؟
سؤال منطقي ، طبعا خايفين الإخوان يضربوا الطيارة بمدافع الأشعة الحلزونية المنزلقة من القاعدة الحربية بأبو أتاتا . علشان كدة الجيش قلب شركة حراسة . ما علينا .

الخبر التاني تصريح من السيسي ، المصالحة مع الإخوان ليست قراري ، الشعب يرفض العنف و الإقتتال .
و الله يعني أينعم الإخوان ما بيفجروش حاجة بس إحنا كأمن وطني بنفجرلهم لحد ما الشعب بنفسه يطلب المصالحة ، و مش علشاني دة علشانك يا شعب ، انت إللي عايز و انا هاسمع الكلام .
شفت انا هاتنازل علشانك عن كل إللي حصل إزاي ، يلا غني تسلم الأيادي .
طيب و لو شباب الإخوان إعترضوا ؟
يبقوا إرهابيين و ضد إرادة الشعب إللي عايز المصالحة و كدة أبقي ضربت حمارين بشلوت واحد .

خازوق سيساوى

الموضوع مش موضوع محور و كفتة و إرهاب ، لأ ، الموضوع موضوع خوازيق كتير من كل حتة في أي حتة من جميع الإتجاهات و النواحي ،
المثل بيقول لا يلدغ المؤمن من جحر مرتين إلا في بلاد سيكا سيكا ، يتم أخذ الخازوق مرة و مرتين و ثلاثة ، و ينتشر الخازوق و يتوغل و يتسرب و ينتشر و يستمر و يستمر ،
و طبعا من كتر الخوازيق بقي المواطن السيكاوي شبه الخازوق ، و انت ماشي كدة تلاقي خوازيق ماشية في الشارع ، خازوق بشنب ، خازوق أقرع ، خازوقة حامل ، خازوق ماشي مع خازوقة بياكلوا زر بطاطا ع الكورنيش ،
و طبعا لأنها بقت غابة و في غياب القانون بقت الخوازيق بتاكل بعضها ، الخازوق الصغير ياخد الخازوق الكبير ، و الخازوق الغني ينهب قوت الخوازيق الفقيرة ، و طبعا في وجود الخوازيق السيكاوية العسكرية في الحكم ، تم توزيع الخوازيق ع البطاقة ، و دعمها لتصل العشوائيات .
و بكدة أصبحت سيكا سيكا من أكبر الدول المصدرة للخوازيق في القضاء علي الثورات ، مع الوضع في الإعتبار تنوع و إختلاف المقاسات ،

و قال علي رأي المثل
إللي يمشي ورا العسكر ما يخلاش من الخوازيق .

خطاب فى الأمم المتاخدة

خطاب السيسي في الأمم المتحدة

الأمم المتحدة بتحضن كل الدول ، و انا جاي آخد حضن ، علشان أحس بالأمان ع الكرسي ، بس حضن بحنية ، أصلي محتاج حنان ، و عايز ألم تبرعات ، تبرعوا علشان الحفر ع الناشف ،
أخي الحنين ،
إختي الحنينة ،
تبرع و لو بدولار ، حسنة قليلة تمنع بلاوي كتيرة .
و راح ضارب تسبيلة ،
أنا مش عايز ماما أمريكا تزعل مني ، محتاج لحضنك يا ماما ، انتي بابا و انتي ماما و أنا بتاعك برضه بس كان لازم أطلع إشاعات علشان ألبس الشعب السلطانية ،
انا بحبك يا ماما ، و كلنا عايشين بالحب ، لازم نحب بعض ، و نخاف علي بعض .
الحب الحب
الشوق الشوق
و عندك واحد بيض بالبسطرمة لزوم القعدة الرومانسية دي .
و ثانك يو فيري ماتش .

فى بلاد سيكا سيكا

في بلاد سيكا سيكا ، المواطن السيكاوي ليه طبيعته المميزة المختلفة عن أي مواطن في أي مكان تاني في المجموعة الشمسية .
إختلاف المواطن السيكاوي في حاجات كتير .
مثلا السيكاوي دايما بيقول نعم ، ما عندوش في القاموس كلمة لأ ، أي استفتاء بيطلع بنعم ،
و تسأل السيكاوي
هاتقول نعم ليه ؟

يرد : مش عارف بس هاقول نعم .
بس يا مواطن لازم تقول لأ ، نعم هاتخرب الدنيا
إنت مالك انت ، أنا عايز أقول نعم علشان الاستكرار .
بس نعم مش هاتجيب استكرار
أنا مالي ، المهم أقول نعم و خلاص علشان عجلة الإنتاج
بس نعم ما لهاش علاقة بعجلة الانتاج ؟
إيه
و يشتهر السيكاوي بالأغنية الوطنية ، أما نعيمة نعمين .
أما في الإنتخابات و إختيار من سينتخبه السيكاوي فحدث و لا حرج ، مقاييس غريبة لا محل لها من الإعراب ،
ممكن إزازة زيت ، كيس سكر ، و ياه لو علبة تونة ينتخبك دورتين ،
و آخر نوادر المواطن السيكاوي في انتخابات الرئاسة الأخيرة بإختياره الرئيس المشير سيكو كمرشح مدني و تسأل المواطن السيكاوي
بس دة مش مرشح مدني ؟
ما هو قلع البدلة العسكرية ، يبقي مدني
بس دة فاشل ، ما عملش حاجة و قطع النور و مقضيها شحاتة .
لو سمحت ما تغلطش في الجيش السيكاوي العظيم .
انت مش قلت ساب الجيش خلاص ؟
إيه
ما علينا ، كله ماشي
و سيكا سيكا
بولوتيكا
و الشعب دة أنتيكا

المواطن الأنتيخ

مع انتشار نوعية المواطن الأنتيخ في شوارع جمهورية سيكا سيكا ، بحثنا في هذا النوع ،
المواطن الأنتيخ هو المواطن إللي مكبر دماغه و عايش في مية البطيخ .

تقوله البلد خربت

يقولك ما تخرب يا عم أنا مالي
يا عم وديتنا في داهية بسلبيتك
يا عم يعني هي جت عليا ، حل عني بقي عايز أأنتخ براحتي .
زمان كانت لا أري لا أسمع لا أتكلم
مع المواطن الأنتيخ
شايف و سامع كل حاجة بس مأنتخ و مش هاتكلم ، هه
ما تخرب يا عم أنا مالي ، أنا أنتيخ .
تحياتنا للمواطن الأنتيخ و مية البطيخ .

أوف كورس بيبى

اوف كورس بيبي ..
وهل عندك شك سيدتي ؟

السيساوية بيقولوا ان مشروع القناة هو أكبر و أضخم مشروع في القرن ال ١٥ و القرون المنتشرة حوله هذه الأيام .

الاخوان بقي بيقولوا مشروع القناة انتقام من الله بسبب الإنقلاب ،
رباه لقد شلت يدى .هذا غضب الآلهه . ستصب عليكم لعنه هبل ، و اللات و العزي لأفشخنكم فشخ النعاج أول يوم العيد .
أنا باقول المجانين في نعيم . ضربت خالص يا ولاد نم نم .
لقد ذهبت عقولكم ادراج الرياح ،
يا قوم
يا قوم
إنها سليمة ، إنها سليمة .

أخينا فى الأمم المتحدة

طيب هو أخينا كان رايح يقول خطاب في الأمم المتحدة و لا رايح يحيي العلم ؟

ههههه هو السيسي فاكر العالم كله أهبل زي المصريين يعني ؟
عمال يقول إرهاب و القضاء علي الإرهاب ، طب هو فين الإرهاب ؟ فين الإرهاب ؟ فين الإرهاب ؟
طب هو فين السيسي ؟
سؤال بس
تفتكروا فاكر المخابرات الأمريكية ما تعرفش أنه هو إللي سلمهم البلد ؟

و لا المخابرات الروسية نسيت انه كان من ال ١٩ بتوع المجلس العسكري إللي ساندوا الإخوان ؟
و لا الموساد ما يعرفش أنه من الناس إللي وافقت علي ترشح واحد هربان من السجن ؟
و لا المخابرات الفرنسية ما تعرفش أنه هلهوطة و إخترع الإرهاب دة علشان الكرسي ؟
أخراااابي ع الفضايح ، إرحم أمي العيانة .

افيدونا أفادكم الله

هو السيسي أما بييجي يسافر

بيطلع الطيارة بالسلم و لا بيعدي علي السير ؟

مش قصدي تريقة ،
بس عادي كدة يعني و لا لازم أشعة إكس ليكون الإرهابيين مفخخينه ؟

بلاش تفهموني غلط ،
يعني هو بيقعد علي كرسي و لا بيحطوه في بطن الطيارة ؟
يا جماعة فهموني ،
الراجل دة و هو راجع من أمريكا ، هايرجع عادي و لا هانستلمه من قرية البضائع ؟
أفيدونا

مزرعة الحيوانات فى مصر

مستر جونز = مبارك
نابليون = العسكر
سنوبول = الإخوان
سكويلير = وزير الداخلية

مزرعة الحيوانات
تتحدّث الرواية عن مزرعةٍ يديرها السيد (جونز).
والحيوانات في هذه المزرعة تشعر أنّ أسلوبه في التعامل معها فيه الكثير من الظلم والقسوة والاستغلال.. ولقد عملت جملةٌ من الظروف على تصعيد مشاعر النقمة في نفوس الحيوانات..
ومع أوّل فرصةٍ تعلن الحيوانات في المزرعة الثورة على السيد جونز، وتتمكّن من طرده، لتصبح المزرعة تحت سيطرتها.. تتولّى مجموعةٌ من الخنازير لاسيّما (سنوبول) و(نابليون) إدارة العمل في المزرعة، وتنظيمه، رافعةً خلال ذلك شعاراتٍ أو وصايا تدعو إلى الإخلاص في العمل والتفاني فيه لإقامة المجتمع الحيوانيّ الجديد الذي تنتفي فيه كلّ أشكال الظلم والاستغلال، ويسوده الرخاء والعدل، وتربط بين أفراده أواصرُ المحبّة والإخاء..
ولكن ماذا لو تحوّلت هذه الشعارات البرّاقة إلى سكاكين مسلّطةٍ على رقاب الحيوانات؟.. هذا ما حدث فعلاً،
فباسم الحرية استُعبِدت هذه الحيوانات،
وباسم المساواة تم سلب حقوقها،
وباسم الرخاء اصبحت مجاعة فى المزرعة ،
وباسم الحياة سُفِكت دماؤها ،
وباسم المستقبل كُمّمت أفواهها..
حتى تمكّن الخنزير (نابليون) من طرد رفيق دربه (سنوبول)، والاستئثار بالسلطة، مستعيناً بمجموعةٍ من الكلاب التي درّبها منذ كانت جراءً صغيرةً لتكون جهاز أمنه الخاصّ، إضافةً إلى الخنزير (سكويلير) الذي أنيطت به مهامّ الإعلامي القادر على تبرير سياسات (نابليون)، وإقناع الحيوانات بحكمة ما يصدر عنه من قراراتٍ أيّاً كانت طبيعةُ هذه القرارات، أو الدوافعُ وراءها، ومهما كان الثمنُ الذي ستدفعه الحيوانات جرّاء تنفيذها..
الروايةُ لا تتضمّن إدانةً لنظام الحكم الدكتاتوري والثورات الخداعة فحسب، بل إنّها تدين إلى جانب ذلك ـ بل ربّما قبل ادانتها للثورات الخداعة ـ حالةَ الاستسلام الكليّ التي يبديها مجتمع الحيوانات تجاه كلّ ما يُمارَس ضدّه من صنوف القهر والظلم.

تقديم و تأخير الساعة

دولة سيكا سيكا دي مالهاش حل في موضوع الساعة إللي عاملة قلق
بداية
قررت دولة سيكا سيكا تقديم الساعة ساعة في ١٥ مايو

و في أول رمضان رجعت دولة سيكا سيكا أخرتها ساعة في ٢٥ يونيو
بعد ما رمضان خلص قامت دولة سيكا سيكا بتقديمها ساعة في ٣١ يوليو
تتهد بقي و تسكت ، لأ طبعا ، رجعت دولة سيكا سيكا تأخر الساعة ساعة في ٢٥ سبتمبر
و سيكا سيكا
بولوتيكا
و الساعة دي أنتيكا
هانقدم
و نأخر
براحتنا أوي يا ويكا

خطاب السيسى فى الأمم المتحدة

خطاب السيسي في الأمم المتحدة .
طبعا بعد الزيطة إللي عملها مؤيدي السيسي علي خطابه عايز أقول كلمتين ،
في نفس توقيت خطاب السيسي و هو بيقول تحيا مصر كانت اسرائيل بتحتفل بوصول الغواصات الجديدة و إنضمامها للبحرية الأسرائيلية بعرض عسكري في ميناء حيفا ، 

 بعدها كلمة أردوغان بأن تركيا لن تسمح بالعدوان علي أي دولة اسلامية ، 

رد عليه السيسي في المقابلة التليفزيونية بأنه علي أستعداد للتحالف مع أي حد في محاربة الأرهاب و طبعا لأنه عايز يقنع الدنيا كلها بأن وجوده لأنه بيحارب الأرهاب و ناسى ان العالم كله عارف ان مفيش ارهاب فى مصر . 

 بعدها تصريح لأوباما انه علشان مايبقاش ظاهر إنه بيحارب الاسلام لازم يستعين بالدول ألعربية في ضرب سوريا ، و طبعا الكلام دة لأستغراب الكثير من الأمريكيين ان اوباما لأول مرة يتحالف مع 5 دول عربية بعيدا عن الناتو . 

بعدها تصريح لنتنياهو بأن اسرائيل هي الحليف الوحيد لامريكا في الشرق الأوسط ، و ان حتى لو تحالفت امريكا مع دولة تانية فى الشرق الأوسط فدة مجرد تحالف وقتى مش اكتر أو بتستخدم الدول دى كأدوات لتحقيق مصلحة . 

نربط كل دة ببعضه و نقول فعلا تحيا مصر في وكستها.

مبرراتية المسهوك

طبعا مبرراتية المسهوك قال إيه رفع الدعم علشان ما يستلفش من برة ، و ياخد قروض ،

أعتقد يا خروف منك له لها له ، لو راجعت شروط الحصول علي قرض صندوق النقد الدولي أيام مرسي ، هاتلاقي كل الشروط بتتحقق علشان تاخد القرض ، و طبعا أهم شرط رفع الدعم يا بلاليص ، اما نشوف حزب الزور هايقول فايدة و لا مصاريف إدارية ،

المهم بقي يا عميان القلب و النظر و طرشان السمع ، المسهوك طلع امبارح و قال رفع الدعم ما يغطيش العجز ، و محتاجين ٢٥٠ مليار الأيام الجاية ،
يبقي منين ؟
ناخد قرض من صندوق النقد إللي بتقولوا عليه أمريكي صهيوني يا بقر ، ما هي مالهاش سكة تانية يا غجر ،
أقسم بالله لو بإيدي ، أحاكم كل مبرراتي بتهمة الخيانة العظمي .

بس أقولكم
نفس الأسباب دايما تؤدي لنفس النتائج .

ابقوا سلمولي ع المعزول رقم ٢ ، بإعتبار ما سيكون يعني .

روبا بيكيا

دة مش ابوك

الدين الداخلى : ابوك خد منك و من اخواتك كل الفلوس اللى معاكم بلطجة و مش عايز يرجعها و بيعك كليتك و ضرب الفلوس و قالك يبقالك .

الدين الخارجى : ابوك استلف من الجيران نفس المبلغ بس مش عارف يسده فعايز ياخد اللى باقى معاك بس لقاك مفلس .

الدعم : ابوك بعد ما خد منك كل اللى معاك هايديك مصروف من فلوسك .

رفع الدعم : ابوك أكل الفلوس عليك ومش هيديك مصروف و اخبط دماغك فى الحيط علشان يسد الفلوس اللى استلفها من الجيران .

التقشف : ابوك هيفضل يستلف منك قهر ومش هيديك مصروف برضو و اعلى ما فى خيلك اركبه , مفيش كله رايح للجيران .

التبرع : مش هتتغدى النهارده عشان ابوك عايز يشرب سجاير و السجاير أهم , دة ابوك برضه و اطيعوا اولى الأمر على رأى برهامى و بكار .

المعونة الامريكية : ابوك عاطل و بيلعب طاولة على فلوس مع صاحب العمارة وبيخسر و صاحب العمارة عمال ياخد عليه ايصالات علشان يحجز ع الشقة اللى قاعد فيها انت و اخواتك .

التطبيع : امك قاعدة بتطبخ مع الولية اللى بتضرب اخواتك و بتشتغل معاها .

الوطنية : دى بنزينة فى اول الصحراوى , سيبك منها .

الحقيقة : الراجل ده اصلا مش ابوك و انت لقيط لقيط لقيط لقيط .

روبا بيكيا

مصر ترجع الى الخلف

انتبه من فضلك
مصر ترجع إللي الخلف

إنتبه من فضلك
مصر ترجع إلي الخلف

شكلنا كدة هانخبط في السودان ، تقوم السودان تقع علي إثيوبيا ، تنزانيا تعترض ،
امريكا تحذر ،
اسرئيل تضرب غزة في الزحمة ، فرنسا توافق ، ايطاليا تؤيد هذا العدوان ، السعودية تقول آمين ، الكويت محتاسة ، روسيا تمنع القمح ، اليابان تسحب سفيرها من جنوب أفريقيا ، و الصين تدعو لإجتماع طارئ لمجلس الأمن ، مجلس الأمن يجتمع ، بريطانيا تطلع بيان و تقولكو عيب ما تعملوش كدة تاني و النبي ،

أقولكم أسهل من كل دة ، إحنا نرفع الدعم .

روبا بيكيا

يعملوا كام مصرى ؟

أسيسي
أسيسي
هما ال ٢٥٠ مريار لحلوح دول إللي محتاجهم علشان عجز الموازنة يعملوا كام مصري ؟

روبا بيكيا