ماحدش ينكر ان الفساد عامل زي السرطان في كل مفاصل و مؤسسات الدولة ، و خصوصا في الأماكن السيادية إللي هيا الداخلية و قيادات الجيش و القضاء . و دة واضح للكل .
أنا لسه عند رأيي ان رئيس مصر القادم مش السيسي ، أنا باحترم دماغي أوي و عمرها ما خدعتني ،
النقطة التانية إن دايما النظام بيلعب معانا لعبة بص العصفورة ، و بقت بايخة أوي ،
يشتغل بالإعلام و يخليك تعمل إللي هو عايزه كأنك انت إللي عايز كدة ، يعني بيدفعك للي عايزك تعمله و انت فاكر انك واقف ضده .
و طبعا لأن السيناريو دة حصل قبل كدة صورة طبق الأصل بالكربون ، فأنا متوقع نفس النتيجة المرة دي ، ليه ؟
أولا السيسي كارت إتحرق و برضه بضغط خارجي و إلي حد ما داخلي علشان يثبت انه مش انقلاب قلع البدلة العسكرية و رشح نفسه كمدني ، شفيق ٢ من الآخر . و دة ارضاء لكل الأطراف ، فكرة المرشح المدني مقتنع بيها فئة مش قليلة .
و الخطة من يوم ١١ فبراير و بموافقة أمريكا يحكم مصر حاكم عسكري ، و سيبكم من الأفلام إللي بتحصل عن معارضة الجيش لأمريكا و مصالحها زي ما بيقول السيساوية بإشاعاتهم الهابلة ، لأن مصالح امريكا في مصر لو حد عارضها أو جه ناحية كامب ديفيد كانت ضربت مصر من الآخر أو علي الأقل كانت اسرائيل دخلت سيناء ، و طبعا إللي قاله السيسي من يومين عن إحتياجه لدعم امريكا راعية الإرهاب لمكافحة الإرهاب دة لتجميل صورة أمريكا مش أكتر لأن مساندة امريكا للإخوان كان مجرد جزء من الخطة .
عامة بالنسبة بقي للإنتخابات ، أنا ما عنديش أي علامات علي حمدين و ربنا يعلم انا باحترمه قد إيه رغم إختلافي معاه ،
بس عايزه يعرف انهم هايقسمونا بيه إتنين ، و هايفرقونا ، و لما ينجح و يبقي رئيس هايلاقي إللي يبرر برضه زي إللي سبقه و ساعتها هايبقي صراع بين نصفي الثورة .
ربنا يستر يا حمدين و ما تلبسش في الحيط و تلبسنا معاك .
انا إحترمت رأي مؤيديك ، و هالعب معاهم علي هامش الخطأ في خطة العسكر ، بس يا ريت مؤيدي حمدين يعرفوا ان إحتمال ٦٠% الخطة حمدين مش السيسي و إللي فاهم النظام بيفكر إزاي يفهم كلامي . فكروا عكس الإتجاه هاتفهموا .
اللهم بلغت ، اللهم فاشهد
روبا بيكيا
