احنا اللى عملنا الثورة

موعدكم قريبا مع الفيلم الكوميدي 

إحنا إللي عملنا الثورة 

بطولة الهنود الحمر 

و الكومبارس الهنود الحمر برضه 

Kanoun saksonia 

نأجر البلد مراجيح

أنا رأيي نلغي إنتخابات الرئاسة و نأجر البلد مراجيح 

و الدنيا زي المرجيحة 

و الغازية لازم تنزل 

و ظلموه 

و سمعني سلام كبير أوي 

أنا شارب سيجارة بني .

Kanoun saksonia

يسقط يسقط حكم العسكر

يسقط يسقط حكم العسكر 

اللعبة اتلعبت حلو اوى و الشعب شربها للأسف , بس هارجع و أقول الشعب مش هايصبر تانى على حد 30 سنة 

و الطوفان جاى و الجوع كافر 

و كله هايتحاسب و حق الشهيد راجع راجع , شهيد مدنى او عسكرى مش مهم 

يسقط يسقط حكم العسكر

 

عايز اعرف ليه ؟

عايز أعرف بس 

تفتكروا لو كنا جمعنا كل فلوس الدعايا اللي إتدفعت في الإعلانات إللي في الشوارع علي الإعلانات إللي في الفضائيات علشان نعم للدستور ، أعتقد دول أهم من نعم و لا للدستور ؟ تفتكروا الفلوس دي تعمل ليهم إيه و تكسي كام واحد ؟

تفتكروا لو كل مرشح رئاسة أو برلمان إتبرع ب 10% من تكاليف حملته لحل المشكلة دي ؟ 

تفتكروا إيه أهم من دول ؟

أما بتشوفهم بتحس بإيه ؟

تفتكروا حلها صعب ؟

لإمتي هايفضلوا منسيين ؟

لإمتي كله يجري علي كراسي و مناصب و ينسي دول؟

لإمتي كلنا هانفضل مش شايفين ؟

لإمتي هايفضلوا مرميين في الشوارع؟

هيا الثورة قامت اصلا ليه؟

هيا دي العدالة إنهم في البرد دة مرميين في الشوارع ؟

فين العدل و فين الإنسانية؟

حسبي الله و نعم الوكيل في دي بلد 

Kanoun saksonia

الاخوان عاملين قلق

معلش يعني ، 

الإخوان عاملين قلق في الشوارع ؟ 

عاملين إرهاب ؟

مبهدلين الدنيا ؟

موقفين العجلة؟

قاطعين الطرق ؟

أنا هاعمل نفسي من بنها و مصدق كل دة؟

بص يا سيسو يا حبيبي 

إللي حضر العفريت يصرفه ، و أظن إنت كنت موجود شاعة تحضير العفريت و تسليمه البلد حتي العفريت دة رقاك و عملك وزير .

مش قادر تصرفه بقي و عايزني أسلمك البلد و تقعد تحضرلي في عفاريت ما نعرفش نصرفها ، 

أبقي أنا حمار باربع رجلين و ديل ، 

و إذا كنت عايز تحكم البلد ، موت ياحمار علي مايجيلك العليق ، إذا فعلا حكمتها هاتبقي علي بحر دم ، 

دة وعد مني .

Kanoun saksonia

و ضحكت عليكم

بصوا بقي ياحبايبي يا حلوين أنا خلاص قامت عليا ثورة و ماشي ماشي ، خصوصا إني بقيت كارت محروق عند ماما أمريكا يبقي إيه يحصل علشان ما أخسرش أنا و رجالتي كتير : 

أتفق علي خطة ترضي جميع الأطراف ، تخرجني أنا و رجالتي خروج آمن و في نفس الوقت ترضي ماما أمريكا و تعلم الشعب إللي قام بالثورة الأدب و أبقي ضربت 3 غربان بشلوت واحد .

طب إيه الخطة يا جدو قول و النبي 

بصوا يا حبايبي 

مش الشعب عايزني أتنحي و عايز يحاكمني ، 

أهو أنا إتنحيت و فوضت رجالتي حبايبي إللي أنا القائد الأعلي بتاعهم و تلميذي طنطن إللي لحم كتافه من خيري و إللي لولا أنا عملته وزير دفاع مكان أبو غزالة كان زمانه قاعد في بيتهم ربنا يشفي كل مريض ، بأنهم يديروا شئون البلاد و العباد و أروح أقعد في شرم الشيخ بفلوسي يا كلاب ، و لو قفلت أوي و الشعب الواطي حاول يحاكمني ، أبحاكم ما يضرش و القضاء تبعنا و أنا ماسك بلاوي سودة علي كل خلق الله . 

و بعدين يا جدو ؟

طنطن حبيب قلبي بقي يسلمها للي يعلم الشعب الأدب بس إيه بشروط يضمنوا سلامته و سلامة رجالته و سلامتي و سلامة رجالتي ، 

طنطن يسلمها للإخوان ، فزاعتي حبيبتي أنا إللي عملتهم و رجالة هايظبطوا الشعب و يخلوه يندم .

و أما الناس تقول جاي من الإخوان و عمايلهم السودة سيسو حبيب قلبي العامل المشترك في كل حاجة يخلص الناس منهم و يبقي البطل المغوار ، 

و أبقي أنا و رجالتي في السليم و طنطن و رجالته في السليم و ديعة و رجالته في السليم و تتعاد إنتخابات الرئاسة تاني ، 

لو الإعادة بين مرسي و شفيق تاني أو ما يشابهم تفتكروا مين يكتسح المرة دي ؟ 

بذمتكم مش أنا عبقري ؟ و خسارة إني سبت الحكم ؟

شعب ما يجيش إلا بالخرفان صحيح .

و دقي يا مزيكا و سمعني سلام كبير أوي و آه يا قفا آه يا قفا .

Kanoun saksonia

العامل المشترك فى الثورة المضادة

اسئلة حلزونية 

من العامل المشترك في السلطة في كل مراحل الثورة المضادة؟

من عينه مبارك و تمت ترقيته في عهد مرسي ؟

حتي أيام من العامل المشترك في السلطة و حدث في عهده مهرجان البراءة للجميع ؟

من إعترف بكشوف العذرية؟

يقال إن أخينا لم يكن بيده معارضة قائده طنطاوي الذي قتل و سحل و كشف العذرية ، و لكن قائده طنطاوي عارض قائده مبارك و نفس الشخص عارض الخروف مرسي و عزله .

علل أبونا مسكونا ضربونا حمونا بالليفة و الصابونة .

أذكر السبب 

أنا إتضحك عليا يا بيه ، 

كارولين ضحكت عليا ، 

ماذا يحدث لو 

الشيطان يعظ 

و سلام كبير أوي أوي 

و بقيت تلعب بوكر 

و بتشرب جوني ووكر 

و أنا مش عارفني ، أنا تهت مني 

Kanoun saksonia

شفيقة رئيسا للجمهورية

شفيقة بعد عودتها من الرحلة المكوكية التي إستغرقت سنتين ، لعمل عمرة يناير في دبي ، بعد براءتها من التهم المنسوبة إليها ، و ضمان عدم دخولها إلي غياهب السجون ، 

و طلوعها زي الشعرة من العجين ، قررت المضروبة ، الحيزبونة المعطوبة ، قرار شفشقي لولبي مدروس ، أصل الشعب ناقص كمان كابوس ، 

قررت شفيقة الخنيقة ، دخول انتخابات الرئاسة و المنافسة لآخر دقيقة ، ما تحت أشراف صاحبي و حبيبي و يديني من التورتة نصيبي ، و هنيالك يا شعب مصر ، شفيقة رايحة القصر .

Kanoun saksonia

ملعونة

ملعونة النفس إللي بتظلم 

و الظلم ماليها و حواليها 

ملعون مظلوم بيتألم 

ساكت علي نفسه و ما فيها 

ملعونة عدالة و عميانة 

ملعونة ناس ساكتة و تعبانة

ملعونة النفس إللي بتقتل

ملعونة النفس إللي بتسرق

ملعونة النفس إللي بتسكت

تفضل خايفة لحد ما تغرق

ملعونة النفس الغدارة

ملعونة الدنيا الدوارة

ملعون الظالم علي ظلمه

ملعون مظلوم قافل فمه

ملعونة السلطة الفسدانة 

و نفس منافقة و نعسانة

ملعون كل تاجر دين 

ملعونة الناس الساكتين 

ملعون كل إللي يعيش خاين 

مهما يلف بلاد و مداين 

ملعون إللي اللي المال يعميه 

ينسي ناسه و قلبه يقسيه 

ملعون إللي بيسرق و بينهب 

و بقوت الناس يفضل يلعب 

ملعونة النفس المغرورة

و النفس التايهة المكسورة 

ملعونة النفس إللي بتفسد 

و نفس للسلطان تسجد 

ملعونة النفس الغدارة

و نفس بالسوء أمارة

ملعونة النفس المحرومة 

ساكتة علي حقوقها و مظلومة

ملعون الحاكم و المحكوم 

ملعون الظالم و المظلوم 

ملعونة و مليون ملعونة 

يا نفوس مرضانة و مجنونة

ملعونة و مليون ملعونة

يا نفوس مرضانة و مجنونة 

وزير ما مسكش وزارة

سرحان عبد البصير ، 

تعرف إيه عن حكومة الببلاوي ؟

و الله يا بيه إللي أعرفه إنهم م البيت لمجلس الوزراء و من مجلس الوزراء للبيت ،

طب يا سرحان تعرف حكومة الببلاوي بتشتغل ايه ؟

بتشتغل رعاشة ، خباصة ، رقاصة ، ايوة أيوة رقاصة يا بيه .

إهدي يا سرحان ، عايز تضيف حاجة تانية ؟

أيوة عايز أضيف ،

قول يا سرحان 

هيا بتشتغل رقاصة و بترقص .

و نعم الاضافة يا سرحان ،

طب يا سرحان سؤال تاني ، هيا ببلاوي و لا بلاوي بالبه و لا بالواو ؟

بالباو ، بالباو يا بيه ، اللى تشوفه يا بيه , انا هاعرف اكتر م الحكومة , دة انتوا الحكومة , فلتحيا الحكومة , فليحيا محمد ابراهيم , و محمد منير و شعبولا , 

دة أنا غلباااااااااااااااااااااااااااااااااااان 

ما تخافش يا سرحان يا ابني ، يا ابنى انت مجرد شاهد هاتقول اقوالك و تروح 

انا اسمعت انهم بيعدموا الشهود يا بيه , يا نهار اسود , شاهد يعنى اعدام اعدام , دة انا غلبااااااااااااااان 

ما تخافش يا ابنى لا اعدام و لا حاجة , جاوب انت بس و هاتروح على طول , عايزين نعرف آخر مرة شفت الببلاوي إمتي ؟

أنا كنت راجع من الشغل بالليل و عديت من عند مجلس الوزراء ، لقيت الببلاوي و إللي معاه مولعين نار في الشارع و عمالين يلفوا حواليها و يغنوا بصوت عالي ، قال إيه الجو برد و بيتدفوا ، ههههههههههههههههههههههه بيتدفوا قال .

طب يا سرحان خدت بالك الببلاوي كان لابس إيه؟

كان لابس شراب يا بيه . 

طب ما فكرتش تسيب البلد يا سرحان ؟

ماهو لو كل واحد ساب البلد علشان فيها واحد ببلاوي ، الببلاوي هايفضل فيها لوحده يا بيه .

حكومة الببلاوي يا سرحان كانت متعودة !

متعودة ... دايما 

يا ابني افهم حكومة الببلاوي كانت متعودة تستقبل ناس في المجلس ؟

و الله يا بيه أنا هاقول إللي شفته , هاقول كل حاجة يا بيه 

ما هوا دة اللى احنا عايزينه , قول يا سرحان 

أنا في يوم كنت معدي من هناك ، سمعت شخير عالي أوي ، بصراحة انا قلقت على ببلولتى , فدخلت المجلس أسأل ، قالولي دي الحكومة عندها إجتماع طارئ . 

بتكتب إيييييييييييييييييه ؟ بتكتب ايييييييييييييييييييييييه 

انا اسمي مكتوب ؟

لأ 

طيب 

دة أنا غلباااااان .

في الآخر أشكر صديقتي هالة الشربيني لانها أوحتلي بفكرة البوست دة .

Kanoun saksonia

انتى جاية اشتغلى ايه ؟

لا خمسة

إنتي خيوانة ، إنتي جاية إشتغلي إيه ؟

جاي أشتغل وزير يا ست هانم في حكومة الببلاوي ، 

آه ، جاية إشتغلي وزيرة .

إنتي كلبة ،

أيوة يا ست هانم 

إنتي جاية إشتغلي إيه؟

و الله وزير يا ست هانم ، درجن درجن درجن درجن ، بيب بيب و موتوسيكلات و أوأه اوأه و حراسة ، وزير يا ست هانم وزير .

خلاص فخمتو فخمتو ، إنتي جاية إشتغلي طرطورة .

لأ يا ست هانم , وزير يا ست هانم 

طرطورة يعنى بغلة 

إنتي جزمة ماشية هناك .

أيوة يا ست هانم 

إنتي جاية إشتغلي إيه ؟ جاية اشتغلي خمارة ؟ جاية إشتغلي خرامية ؟ جاية اشتغلي خيال مآتة ؟ جاية اشتغلى طرطورة ؟ جاية اشتغلى ايه ؟

أخرابي ، جاية أشتغل وزير يا ست هانم ، عندي 80 سنة و جاي أشتغل وزير ، في المصايب إخخخخخخخخخخ و أشخر و أنام ، وزير يا ست هانم وزير .

آه فخمتو فخمتو ، إنتي جاية إشتغلي خيال مآتة .

إنتي بغلة هناك ، إنتي جاية إشتغلي إيه ؟

Kanoun saksonia

تحليل محشش سياسى

فى هذا الموضوع حاولت زنجفة بعض الامور التى تحدث فى مصر :
طبعا اللى بيحصل الايام دى فى مصر حاجات غريبة ملة و عامة علشان نفهم رغم انها صعبة فحت يعنى بس نحاول نعرف ايه النيز يا مان , و ليه الشعب كله فى الترالالى مش شايف حاجة ,
الحاج عايش فى الدور و تحس كدة انه فاهم انه جامد تنين و أدارجى فحت و حواليه كام واحد فاكر نفسه جامد فتيق و هو فيه هبل السنين اصلا .
بس بجد رغم ان الناس دى نزلت علينا بالبراشوط التمردى و هما ناس فصيل و خنيقة و شبه الاومليت , بس سيبك دة هما كدة خس اوى و عنب جدا و اللى بيحصل دة الماظ يا حبيبى الماظ . غباءهم لازم نشكرهم عليه بجد .
مش عارف ليه الحاج قافش اوى كدة يا عم ما تنزل من على وداننا و تفكك مننا بقى , دستور فلولو متحزم على وسط عمرو موسى , هايكون مسمار نعشك و نعشه
 انا ملاحظ ان الفلول مقضياها شهيصة فى البلد دلوقتى و عمالة تروق الأنانى و عمالين ينهبوا فى الكاشات و اللارجاه و البرادس و البلد ما بقاش فيها و لا جندى و البنكنوت اتضرب فى السوق يعنى انت فلولك يبقوا مكيشين و الشعب كله مخيش ما ينفعش يعنى . فين الانابيب ياض عايز انبوبة
احل حاجة انكم سايبين البلد والعة و مقسومة و مقضينها انتخة و تفخيد و قاعدين مستكنيسين على الكراسى و كل يومين يطلع قانون مرة طوارئ و مرة مظاهرات و حظر تجول و و كل كام يوم يطلع المستشار المعلامى بتاع الطرطور و يعمل مؤتمر يتحدث فيه عن العك الهادف و المليطة الفارغة و الفوضى الصاخبة , اللى خلت الخلايا اللاسعة فى عمق الدماغ تضرب بقت دماغ الناس زى الحلة البريستو بتطلع بخار .
المصيبة ان كله كلام و فاكسان و طلع كله صيص و سرس على الآخر .
يا عمونا الفيلم دة اتهرس 1000 مرة قبل كدة , من ايام ببارك لطنطراوى للخروف مرسى ,
النهاردة بقى جماعة ابجنى تجدنى يا معلم كانت عند دار القضاء بتأيدك , و شكلك كدة عايز تطلع اى حملجة و خلاص و مش فارق معاك , و حاسس ان انت و  اللى معاك كدة ناس منفسنة و اللى بيأيدوك ناس سيس ملة يعنى ,
نصيحة للاصدقاء
لو تعرفوا حد فيهم فككم منه وش ليشبهوكم .
kanoun saksonia

ابـكـــى يـــــا مـــصــــــــر

ابـكـــى يـــــا مـــصــــــــر
واتلفحى ب
سواد
ما عادش فيكى
أمن
والفرح سعره
زاد
وديابة واقفة
بتعوى
ولحم ولادنا
ضاع
و طوفان شغال بيدمى
بيقول قولوا الوداع
ابكى على كل حاجة
ابكى و ما تخليش
ما بقاش فينا حاجة
و شعبك ما بيبكيش
مش فارق معاه ضياعك
و لا فارق اللى باعك
ابكى بدل دموعك دم
ابكى يا مصر
ابكى من الهم
ابكى و طلعى اللى فيكى
ما هو فيه ناس مش فارق معاها
و ناس نفسها حياتها تديكى
ابكى يا مصر
ابكى يا بلد
يمكن دموعك تمسح الذل
يمكن ناسك تفهم
و تقدر
انهم باعوكى
ابكى يا بلدى
ابكى على ولادك
كنتى فاكراهم ولادك
كنتى فاكرة ايه
دة الولد مات
و الدم فى الشوارع
و الحياة فيكى آهات
ابكى
ابكى يا مصر
فين دموعك
kanoun saksonia

توت توت وأهو كله تمام

توت توت
و اهو بكرة يفوت
و كل خروف
ليه عندى تابوت
توت توت
خرفان توهان
و معاهم
كتاتنى و عريان
توت توت
و رئيس دلدول
فوق منه
شاطر مخبول
و جماعة
ناقصيا ديول
توت توت
بيبيع و يأجر
بلد امه
و قرب يتفجر
خروف اهبل
عامل فيها عنتر
و آخرته ضرب النبوت
توت توت
طراطير طراطير
و الشعب
بيشيل بكتير
و بديعة
شغالة خوابير
و خابورك جاى م التحرير
توت توت
دى جماعة مخابيل
و هانزلزل كل الزلازيل
و لا نسيب
فيها المهاطيل
و نقول
اهى علقة تفوت
توت توت
و التعلب فات
و فلوطة
بيقول حكايات
و حجازى
فى الوهم يبات
يا شيوخ منصر
بمرشد زعبوط
توت توت
دى بلدنا غريبة
يا جماعة
عايشين فى زريبة
و بلدنا
دى مش نهيبة
و اهو كله
اتعلم مظبوط
توت توت
دة بالشلوت
توت توت
و السجن تابوت
توت توت
و اهو كله تمام
يا بلطية و عامل قرموط
kanoun saksonia

ارحل فى صمت

عند الرحيل

لا تضيع وقتك في البحث في أحشاء اللغة

لإنتقاء كلمات الحب أو الاعتذار او الوداع

فكل الكلمات التي تولد لحظة الفراق

إنما هي مجرد محاولات فاشلة لتبرير الرحيل

ارحل فى صمت

kanoun saksonia

اظلمنى

إظلمني

ظلمي هيسود حياتك

و هايطفي فرحتك

و يخنق ضحكتك

الظلم علقم

و دعوتي مُر

مصبوب فوق راسك
kanoun saksonia

مطلوبين والمكافأة حريتكم يا مصريين

مطلوبين مطلوبين مطلوبين
مطلوبين للعدالة يا مصريين
مطلوبين لأنهم خاينين
مطلوبين القتالين المرعوبين
مطلوبين و هما اصلا مش موجودين
بياعين و كدابين و منافقين
مطلوبين و المكافأة و لا حاجة
مطلوبين و هما اصلا ولا حاجة
مطلوبين للعدالة
و مش عايزة فيهم قوالة
مطلوبين الخرفان البياعين
و الخرفان مالهومش غير شيل الطين
مطلوبين و هما اصلا قتالين
مطلوبين و المكافأة حرية يا مصريين
المكافأة حريتكم يا مصريين
هاتوهم اصلهم مطلوبين
للعدالة مطلوبين
للدبح و القذارة مطلوبين
اصل البهايم فاكرين اننا نسايين
و اننا هايتضحك علينا بالدين
مطلوبين
مطلوبين و المكافأة حريتكم يا مصريين
مطلوبين هاتوهم ,
اصلهم مطلوبين
kanoun saksonia

فوق يا شعب من زيط ومعيط

نقول كمان
يا نظام جبان
و يا داخلية
و يا اخوان
نقول ظلموه
و طلعوا عين
اللى جابوه
عصرت لمون
طلع مجنون
م السجن
و قلت رئيس
يا شعب خسيس
يا شعب اختار
بين كلالا و بين متاعيس
يا شعب جبان
خايف من ايه
من حاجة اخوان
و اللى فيه فيه
دى جماعة خرفان
و كله خبر كان
و الجاى دة ايه
يا شعب عبيط
مش بالشخابيط
و لا بالنهضة
و زعيط و معيط
يا شعب ذليل
و جماعة مخابيل
و قلنا كتير
و عدنا كتير
نعم دى خازوق
و فيه مزنوق
يا شعب ضرير
سألنا كتير
و عدنا كتير
تجارة الدين
يا شعب لفين
تجارة الدين
دى للطراطير
يا شعب خلاص
و اخترت خلاص
كله خلاص
فى الترا با تيت
و سكر زيت
يا شعب غتيت
ما تفوق احسن
من زيط و معيط
kanoun saksonia

أرض الخرفان

ارض الخرفان و الاحباط و الاستعباط 
حين ترى اعداءك الخرفان ، 
و بلطجة و خيانة بيتوصف بيها شجعان، 
و شهامة بتملا كل ميدان ... 
مع قلة اصل من حراس الآمان .
و ترى فساد لسه ع السرير او العرش ... 
و الخير الكتير موجود و بيبلعه كام كرش ، 
بينما ولاد البلد الأصليين 
لخير بلدهم مش لاقيين ، 
و مع ذلك منهم اللى لسه 
لا بيهش 
و لا بينش .. 
لأ و ايه 
بييجى فى صف المتلون الواطى 
ابو الف وش و وش .
و يصدمك دستور اصلا غير دستورى 
بعد ما كنت بتقول الترتيب الضرورى ، 
و اذ به يخالف ذلك 
فى نوع من البجاحة اسطورى ... 
و الظريف ان اللى يوافق الأخطبوط 
على التواءه للإرداة الشعبية، 
هو ذات نفسه اللى بيتهم الناس 
بانهم لا يعترفون بالديموقراطية .... 
غطينى وصوتى عليا يا و لية , 
دة احنا وقعنا فى ملقف 
شيوخ منصر و حرامية .
و لما تلاقى مواطن شريف 
بيهجم بالسنج و الطوب و الخرطوش و الحى 
على متظاهر غير مسلح 
عايز البلد يبقى نضيف ، 
و الإعلام الرسمى الخرفانى 
يسمى الأولانى 
مواطن شريف ... 
و اللى يطبل مع صاجات الإعلام 
جرنال جماعات كانت بتقول 
انها عانت الإضطهادات ، 
جماعات بقى عقلها خفيف , 
قلبوا الربيع لخريف 
كل ده لازم يخليك تاخد لحسة من عمق الدماغ وتفرشها على سطح خلايا الدماغ اللاسعة من اللاموضوعية المنتشرة ... و هوبا قوام تلاقى التهييس ابتدى ، بعدها يملأ التفاؤل جنابك كلها .
اصل الشعب اللى فى جيناته الف حكاية عن الفروق بين الفيل والنملة، واللى منه راجل عجوز فى عز الضرب فى الميدان ماشى بازازة حاجة ساقعة ، و بيرشها فى وش الناس لجل ما يروح تأثير الغاز .. و هو بيقول: الثورة دى برعاية كوكا كولا ..
الظريف ان كرسى السلطة والشهرة بيصيبوا اللى قاعد عليهم بالغبا ... بيفتكر انه ممكن يضحك علينا بنفس الطريقة كل مرة ... ايشى فلول و ايشى النظام القديم و ايشى اطراف تالتة و ايشى مزايدات فارغة و لا استخدام "شرع الله" و كإننا كنا فى الجاهلية ، او كأن الإيمان محتاج يظهر فى لبس او شعار مش يبقى فى القلوب ، و يظهر أكثر فى التعاملات اليومية اللى بيننا .
kanoun saksonia

خرفاااااااااااان بابا قولوا مااااااااااااء

خرفاااااااااااااااااااااااااان
بابا
قولوا ماء
مااااااااااااااااااااااااااااااااء
بصوا بقى يا قطيع
عايزين نشترى و نبيع
و اللى معانا يا مرحب
و اللى مش معانا يضيع
خرفاااااااااااااااان
بابا

قولوا ماء مااااااااااااااااااااااااااااااااء
برادعى تكفروه
حمدين تشوهوه
و فلان و فلان و فلان
يطلع عين ابوه
خرفان
بابا
قولوا ماء
ماااااااااااااااااااااااااااااااء
رئيسكم تكبروه
و لو ما عملش حاجة ,
برضه تفخموه
فى الشارع فى كل حتة
مع الناس تعظموه
خرفااااااااااااااااااااان
بابا
قولوا ماء
ماااااااااااااااااااااااااااااء
الشعب تتوهوه
بالدين تقنعوه
اللى معانا دة مسلم
و دة كافر لا تسمعوه
خرفاااااااااااااااااااان
بابا
قولوا ماء
مااااااااااااااااااااااااااااااااء
عايزكم تكدبوا
تنافقوا و تلعبوا
اهم حاجة الكرسى
لو ضاع هاتندبوا
خرفان
بابا
قولوا ماء
ماااااااااااااااااااااااااااااء
عايز ناس فى التوهان
بيعشقوا الخرفان
مش فاهمين اى حاجة
نخدعهم , يقولوا كمان
خرفااااااااااااااااان
بابا
قولوا ماء
ماااااااااااااااااااااااااااااء
تفكير ما تفكروش
حسابات ما تحسبوش
و الكلمة تسمعوها
ببلاهة على الوشوش
خرفااااااااااااااان
بابا
قولوا ماء
مااااااااااااااااااااااااااااااااااااااااااااااء ماااااااااااااااااااااء
مااااااااااء مااااااااااااااااااء مااااااااااااء
kanoun saksonia

 —

خذ ثأرك

خذ ثأرك 
خذ ثأْر فرحان 
الذي هشموا منه الجسد
خذ ثأر عطشان 
طفل قتلوه و الآن في اللحد
خذ ثأر عرض بلد 
مزقوه لم يبالوا لِأحد
خذ ثأرك الذي 
به دوما ستركع العدد
إعلم بأن الثأر 
قد أَحنى رؤوسا و انقذ الولد 
و أقسم بحبل الله 
لا تبقـي عتاة للأبد
و قل لهم ستندموا 
ما دام عهدنا لنا سجد
لن تنعموا بل تسحقوا 
هذي مواثيق العهد
فلترحلوا بل و اسمعوا 
ثأْري يزلْزل البلد
يسقط طاغ قد هتك داري 
و كل ما حولى فسد
kanoun saksonia

اوكازيون

اوكازيون اوكازيون اوكازيون
اخوانى اصلى بالشاحن , ضمان سنة
تشده و تمطه فى اى حتة تحطه
لا بيفهم و لا بيميز
خبير مجادلة و تبرير
حنين على وسط الجماعة ,
فيه منه بأستك ترميه و تجيبه زى ما انت عايز ,
قطع الغيار متوفرة ,
صيانة مجانا بفرع المقطم
تقفيل بديعة و السعر مفاجأة 33 جنيه + مصاريف الشحن
kanoun saksonia

اخوانى بلطجى

أخوانى بلطجى .... و لحمل السنج غاوى
اخوانى بلطجى و للبلطجة هاوى
اخوانى بلطجى ما بافهمش و حمار حصاوى
عاشق للدماء , تنزل زى الرغاوى
خروف انا من بحرى او قبلى او سيناوى
لا عندى دين و لا مبدأ و جنسيتى بديعاوى
أنا باختصار بلطجى و من سنين عليكم ناوى
أخوانى بلطجى و المطوة قرن غزال
والكزلك هو شرفى و السمعة بالساطور تتقال
أخوانى بلطجى و النار فى كم دراعى

و الخنصر شايله فى طرف ضفر صباعى
و خلاص أبليس خويته و بقا من أتباعى
أخوانى بلطجى و الدم مركبى وشراعى
اخوانى بلطجى هالقبها بحور من دم
و العنف دة منهجى , و تشيلى يا بلد الهم
و كله بشرع الله , و المرشد قال كدة
قال البلد بلدنا , ادبحوا دة و دة .
أخوانى بلطجى
kanoun saksonia

شريعة الغاب

الغابة وإن كانت مكان يتجمع فيه عدد كبير جداً من الحيوانات المفترسة والأليفة
إلا أن لها شريعة منذ القدم ألا وهى شريعة الغاب..لها قانون ومنطق واحد لم يتغير بمرور الزمن منطق القوة....القوى يأكل الضعيف.. والمدهش أن جميع الحيوانات متقبلة تلك الشريعة بصدر رحب لم تحاول أن تغيرها أو تثور عليها.. فلم نر فأراً يقف في وجه الأسد يحاول أن يصارعه
لم نر غزالا يطارد نمرا.. الكل يعلم مقداره ومكانته تمام العلم .. يعلم أين يقف..يعلم من خصمة قبل أن يهاجمه ويدرس نقاط ضعفه وقوته.. وإذا وجد أن خصمة قوى انسحب في هدوء أو فر هاربا.. ليس للكرامة والكبرياء والشجاعة والتضحية من أجل الغير مكان في الغابة... هناك حياة أو موت لا ثالث لهما.. تكون صياد أو فريسة..إذا عشت اليوم حمدت الله وابتهلت حتى تطلع عليك شمس الغد.. إذا وقعت فريسة فلن تجد أحدا من بنى جنسك يدافع عنك..سينظروا إليك نظرة شفقه وينطلقوا فارين خوفا على أنفسهم.. وقد تجد بعضهم يعود لينهش ما تبقى من جثتك...
هناك ملك للغابة وهو الأسد..ليس له نائب أو وزير أو سفير.. ليس له أصدقاء أو حاشية..يفترس من يريد في اى وقت.. يترك فضلات فريسته بارادتة للجائعين من حيوانات الغابة ...لا ينتهي ملكة إلا بوفاته أو هزيمته في منازلة مع أسد غيره فقط ومثله تماما.. ليس في شريعة الغاب أن يتولى الفيل أو الثعلب الملك فهو للأسد فقط ومن غير المنتظر أو المرجو اى تغيير.. إلى أن يشعر هؤلاء بما فيهم من صفات تؤهلهم لمجابهة الأسد والوقوف أمامه دون خوف أو رهبة..
فلو استخدم الفيل قوته البدنية والحمار قدمة في الرفس والثعلب دهائه وحيلته والنمر مخالبه.. سيتغير
الكثير و الكثير الكل له نقاط قوة لا يعلمها أو يتجاهلها أو من كثرة الخوف لا يستطيع اخراجها.. هم لا ينظرون إلا لنقاط ضعفهم فقط..فلو اجتمعوا على رأى واحد فسوف يهزموا الأسد ويغيروا شريعة الغاب .. ولكن متى يتحقق ذلك... ؟؟؟؟ طالما هم من داخلهم يتملكهم الخوف منه لأنه الأسد فقط ليس إلا..
وكافة الحيوانات تحاول أن تكسب عطف الأسد وان يشملها برعايته.. يوفر لها الطعام أو بالأصح ما يتبقى منه من فريسته..كما يوفر لهم الحماية .... فهي أهم شئ في الغابة..وفى سبيل ذلك يغضون الطرف إذا ما التهم كل فترة فريسة منهم..وفى أحوال كثيرة قد يختارون له هذه الفريسة ويمدحون في محاسنها.. من لحمها الطيب والشهي..وأنها الأنسب له لالتهامها حاليا..حتى يلهو بتلك الفريسة وينشغل عنهم لبعض الوقت .. ويأخذوا وقتا للتفكير في الفريسة التالية..والكل منتظر من يقع علية الدور..
يحاول أن يسترضى الأسد ويفعل كل ما يجعله راضيا عنه.. فالكل يوهم نفسه بأنه بذلك لن يصبح فريسة للأسد... مع انه قد يكون الفريسة القادمة....فكما تحفر لغيرك .. فهو يفعل مثلك.. إنها شريعة الغاب فلا عجب في ذلك..
وسيظل الأسد أسدا ليس لأنه الأقوى أو الأسرع أو الأجمل أو الأذكى بل لأنهم من جعلوه يستأسد عليهم.. ينتقل من فريسة لأخرى وستظل الفئران في جحورها ترتعد كلما سمعت زئير الأسد و ستظل القرود تقفز من شجرة لأخرى كالمهرج لا تعلم نهاية ذلك القفز ؟؟؟ ويبقى الحمار- عفواً فهذا اسمه- بين كل هؤلاء لا يفهم شيئاً مما يجرى حوله .. عاش حماراً.. ومات حماراً.. فهل طغت شريعة الغاب علي شريعة البشر... مجرد سؤال ؟؟؟؟
ولا أجد أدل من رباعيات صلاح جاهين لختام ما سبق :
ما إنتاش بتلعب ليه يا روح بابا
ولا عسكري و لا لص في عصابة ؟
العب أسد أو ديب رهيب أو غزال
دي الدنيا في نهاية المطاف غابة
وعجبي
ايه رأيكم فى شريعة الغاب ؟ احنا دلوقتى فى غابة , و كله بلطجة حتى البغل اللى اسمه رئيس بيستخدم اسلوب الارهاب و البلطجة , هانسكت , موافقين تبقوا مهمشين ؟ مالكومش لازمة ؟ تخبطوا دماغكم فى الحيط ؟ ماهى مالهاش حل ؟
عايزينا نمشى بشريعة الغاب مفيش اى مشكلة , و شريعة الغاب بتقول البقاء للأقوى ؟ يا ترى انتم الاقوى و لا هما الاقوى ؟
kanoun saksonia

اشتم مورصى

اشتم مورصى و فه التهزيلا
كاد المورصى بأن يكون الغولا
أرايت أغبى أو أعبط من الذي
هو لطع جاء لن يمكث طويلا
عجبا له لا تنتهي كذباته
كم يحسن التبرير و التأويلا
قال بعد الكرسى لنا فتسهلوا
يا كفار لا تشغلوا المشغولا
من لجنة لزيارة لخطبة
افعاله تجعل السليم عليلا

وإذا أتاه من العشيرة زائر
أبدى له الترحيب و التأهيلا
و اعطاه غاز و كهرباء و سولار
فلقد تسهل أمره تسهيلا
و الكفار شعبه إذا أتت طلباتهم
نامت على الرف المكدس جيلا
فإذا رأى صفو مرشده معكرا
عرض التي يرجو لها التعطيلا
وإذا رأى أن المزاج مهيأ
عرض التي يبغي لها التعجيلا
و يصبح قد أمر قطونيل فبادروا
من لم ينفذ قوله يصبح المفصولا
ويقول قد قال المورصى لكم كذا
والله ربي عالم ما قيلا
اشتم مورصى و فه التهزيلا
فهو يقول انه لله وكيلا .
kanoun saksonia

دعاء على الخرفان

اللهم عليك بالعريان الخزاعى واجعل نعشه ملئ بالافاعي
اللهم عليك بالكتاتنى اللى سبه النملية
واجعله من عمال البلديه
اللهم عليك بالبرنس الماء ماء
واجعله كالأرنب التائه فى الصحراء
اللهم عليك بالشاطر الحرباء
واجعله سخريه للسفهاء
اللهم عليك بالحسينى المجنون
و اشوف يا رب بكرة مسجون

اللهم خلينى اسمع من الاتحادية صريخ
واحذف مورصى بعيدا عن المريخ
اللهم عليك ببديعة الهابلة
اشوفها فى الشارع بتشحت ماسكة طبلة
اللهم اضرب المقطم بقنبله ذرية
و ازنقهم زنقة الطعمية فى طاسة القلية
اللهم اضرب الاخوان ضربة قويه
و مكتب الارشاد سكتة قلبية
اللهم عليك بقطونيل
واجعل له خرطوم طويل
آمين آمين آمين
kanoun saksonia

رجاء ربط الاحزمة الناسفة

ايها الشعب المصرى
رجاء ربط الأحزمة الناسفة ... فمصر في حالة هبوط سياسي , بعد ان مرت بالكثير من المطبات الدستورية الغوغائية , تحت سيطرة الجماعة الخرفانية , و الحكومة القطونيلية الحلزونية اللاوزعية , تحكمها بديعة الاستك و استبن بلاستيك مربوط فى الاستك .
و من علي منبر ميدان النهضة و الذي ربما يمتد عمقه إلي افغانستان و الوهابية يخرج علينا الشيخ الشائخ , و المنافق الدائخ و قال خطاب عظيم يتمحور حول

نظرية كله فى الهجايص ,
و بدأ بنشر فكرة اخويا هايص فى ميدان النهضة بكباب و كفتة و انا لايص فى التحرير بسميطة و جبنة , و كل الحكاية ان اخويا كان عايز كارت شحن , راح يقف معاهم .
بس بجد فيه سؤال محيرنى اوى , عاملة لسعة فى دماغى , و اعتقد لو ماعرفتش اجابته الخلايا اللاسعة عندى ممكن تضرب و تعمل مشكلة ,
سؤال لشيوخ و مطبلاتية الخرفان , هى الدقون دى جاهزة و لا تفصيل ؟
kanoun saksonia

رئيس تايه

نزلت اول امبارح على القهوة اسمع آخر خطاب للأستبن و أنا ماشي قابلت واحدة ست كبيرة بتعيط و تقول رئيس عبيط تايه يا ولاد الحلال قولتلها يا حاجة زمانه جاى متخافيش قالتلى يا بنتى بنادى عليه من بدرى و مش لاقياه قولتلها ماهو بيبقى عامل و دن من طين و التانية بيسمع بيها أخبار غزة و فلسطين يعنى لا هيسمعك و لا يسمع غيرك قالتلى و باقى المشايخ فى الزكايب و اهله و عشيرته كده ؟
قولتلها لأ عامة الشعب كله مقسم

نفسه كل مجموعة شغالة بنظام معين :
فيه جزء مقضيها عبط و استهبال
و جزء مقضيها استهبال فقط
و جزء شغال بنظام البيزنس
و جزء خارج نطاق الخدمة
و جزء حافظ مش فاهم
و جزء شغال بنظام الشراكة مع ناس من خارج الاهل و العشيرة
و جزء بيلعب عسكر و اخوانجية
و جزء بيلعب طراطير ....... لسة , طراطير .... لسه
وجزء بيلعب استغماية
و اما باقى الشعب بقى بيشجع اللعبة الحلوة
و الاحتياطى منتظرين ضربات الجزاء بانسحاب القوى المدنية
, قالتلى طب و الشعب اللى متأكد انه اتضحك عليه دوره ايه ؟
قولتلها لأ يا حاجة الشعب المختلف معاهم زى ما بيقولوا معمولين سايلانت و بقوا كفار و بعد ما عملوا الشعب باسم الدين سايلنت سايبين الناس ترن
kanoun saksonia

مش هاعمل عبيط

اعمل عبيط وأنت تستمع إلى عابد الكرسى و هو يرص الأكاذيب حجراً على حجر مثل أحجار الشيشة و هو ينشر قنابل الدخان فى كل مكان حتى لا نرى الحقيقة.
اعمل عبيط وأنت ترى الرشوة عينى عينك والصفقات تتم حولها فوق الترابيزة و تحت الترابيزة و جنب الترابيزة
اعمل عبيط و عيش أيامك عيش لياليك. اعمل عبيط وأنت ترى مظاهرات السلالم فى نقابات وسط البلد تحاصرها الإحباطات كما لو كانت تحاصر القوات الإسرائيلية فى الثغرة فى

السويس .
اعمل عبيط ولا تسأل عن حكومة قطونيل و لا كيف جاءوا و لا ما هى مؤهلاتهم
اعمل عبيط وأنت تشاهد برامج المطبخ فى التلفزيون و هم يحدثونك عن السيمون فيميه والكوردون بلو و الطرطوفة و الكاليمارى، اعمل عبيط و استمتع بحفلة البصل والفول المدمس اللى ما بتاكلش غيرهم .
اعمل عبيط وأنت تستمع إلى رجال الأعمال و وزراء المجموعة الاقتصادية وهم يقولون مصر فيها فرص عمل تقدر بعشرات الآلاف و لكن الشباب يفضل الجلوس على المقاهي.
اعمل عبيط وأنت ترى العمالة المصرية مسحوقة تحت رحمة الكفيل و مطرودة من أمام أبواب السفارات.
اعمل عبيط ولا تتحدث عن حقوق الإنسان تحدث عن حقوق الخرفان .. أضمن ألعب على المضمون.
اعمل عبيط و انت شايف ام ايمن بتعملك دستور ريحته جايبة البلد من شرقها لغربها تقفيل غريانى
بس طبعا مش هاتفضل طول عمرك عبيط , تبقى كارثة لو موافق و مقتنع تكون عبيط ,
ما تعملش عبيط و خليك في الصورة .. زاحم.. انحشر.. خليك غتيت.. قاتل و قل لنفسك لا فيها لاخفيها .

اعمل عبيط وكأنك لم تقرأ هذا الكتاب.. و حاول تعمل حاجة لمصر.. فالسيارة عطلانة... لكن البكاء لن يدير الموتور .. قل للناس من حولك يلا يلا يا رجالة .. يلا ننزل نجيب حقوقنا , احنا مش شعب عبيط يتضحك عليه , هاناخد حقنا بايدينا , مش هاتعمل فيها عبيط تانى ,
kanoun saksonia

ثورة الخبز عام 1977 و التى اطلق عليها السادات انتفاضة الحرامية

منذ 34 عاما هب الشعب المصرى عن بكرة أبيه منتفضا فيما عرف لدى الشعب المصرى بإنتفاضة الخبز وما أطلقه عليها السادات بإنتفاضة الحرامية، واليوم وبعد مرور كل هذه الفترة ما زالت تلك الإنتفاضة تلهم الثوريين فى مصر والمنطقة دروسا مهمة وتدعو للتأمل بعمق فى التركيبة الذاتية للشعب المصرى ومعرفة متى يثور وكيف.

ملخص لأحداث الإنتفاضة :

بينما كان الشعب المصرى الذى عانى كثيرا من تدهور أوضاعه الإقتصادية بعد حرب إكتوبر 73 ينتظر قرارات حكومية تخفف عنه هذه المعاناة وتحقق له وعد الرئيس بتحقيق الرخاء الإقتصادى الذى ردده فى الكثير من خطاباته وإمكانية ان يحلم كل شاب بتملك فيلا صغيرة وسيارة كما كان يردد، وبعد أكثر من 3 سنوات من الزيارة الميمونة للرئيس نيكسون والآمال العريضة التى بناها البسطاء على هذه الزيارة، إذا بنائب رئيس الوزراء للشئون المالية والإقتصادية الدكتور عبدالمنعم القيسونى فى بيان له أمام مجلس الشعب يوم 17/1/1977 يعلن فيه مجموعة من القرارات الإقتصادية الصادمة ومنها رفع الدعم عن مجموعة من السلع الأساسية وذلك برفع أسعار الخبز 50% والسكر25% والشاى 35% وكذلك الأرز والزيت والبنزين و25 سلعة أخرى من السلع التى لا يستطيع الفقراء العيش بدونها، لذا كانت الصدمة شديدة، وفى صبيحة اليوم التالى صدرت الصحف الثلاث تحمل تفاصيل القرارات الإقتصادية الأخيرة، لتبدأ نذر العاصفة تتجمع ثم ما تلبث أن تفجرت.

بدأت هذه الحركة العفوية بدون تنسيق أو تخطيط مسبق فى عدد من التجمعات العمالية الكبيرة فى منطقة حلوان بالقاهرة فى شركة مصر حلوان للغزل والنسيج والمصانع الحربية وفى مصانع الغزل والنسيج فى شبرا الخيمة وعمال شركة الترسانة البحرية فى منطقة المكس بالأسكندرية حيث بدأ العمال فى تجمعات صاخبة تعلن رفضها للقرارات الإقتصادية وتخرج الى الشوارع فى مظاهرات حاشدة تهتف ضد الجوع والفقر وبسقوط الحكومة والنظام رافعة شعارات تلقائية منها:

ياساكنين القصور الفقرا عايشين فى قبور

ياحاكمنا فى عابدين فين الحق وفين الدين

سيد مرعى يا سيد بيه كيلو اللحمة بقى بجنيه

عبد الناصر ياما قال خللوا بالكم م العمال

هو بيلبس آخر موضة واحنا بنسكن عشرة ف أوضة

بالطول بالعرض حنجيب ممدوح الأرض

لا اله الا الله السادات عدو الله

وغير ذلك من شعارات ارتفعت فى مظاهرات بطول مصر وعرضها واختلطت تظاهرات الطلاب التى خرجت من كل الجامعات المصرية بحشود العمال والموظفين والحرفيين وكافة فئات الشعب.

إستمرت مظاهرات الشوارع المصحوبة بالعنف الموجه ضد المصالح الحكومية وأقسام الشرطة ( الأزبكية والسيدة زينب والدرب الأحمر وقسم شرطة إمبابة والساحل وحتى مديرية أمن القاهرة)، وإستراحات الرئاسة بطول مصر من أسوان حتى مرسى مطروح ولم تسلم من الهجوم استراحة الرئيس بأسوان حيث كان يقيم وتقرر الغاء اجتماعه بكيسنجر فى نفس اليوم، ووصل الهجوم إلى بيت المحافظ بالمنصورة وتم نهب أثاثه وحرقه، ونزل الى الشارع عناصر اليسار بكافة أطيافه رافعين شعارات الحركة الطلابية، و استمرت هذه المظاهرات حتى وقت متأخر من الليل مع عنف شديد من قوات الأمن وتم القبض على مئات المتظاهرين وعشرات النشطاء اليساريين.

وفى صبيحة اليوم التالى خرجت الصحف الثلاث بعناوين عريضة متحدثة عن مؤامرة شيوعية لإحراق البلد وقلب نظام الحكم، واستمرت المظاهرات فى هذا اليوم بزخم أكبر وأكثر عنفا وتم الإعلان فى نشرة أخبار الثانية والنصف عن إلغاء القرارات الإقتصادية وفى الرابعة أمر السادات بنزول الجيش الى الشارع لقمع المظاهرات وأعلنت حالة الطوارئ وتقرر حظر التجول فى كل مصر من السادسة مساءا الى السادسة صباحا.

مصر والبنك الدولى

تعد مصر من الدول المؤسسة للبنك الدولى فى 1945 و نعرف دور هذا البنك فى تطبيق السياسة الإمبريالية تجاه الدول الفقيرة ولا ننسى دوره فى الضغط على نظام عبد الناصر ورفض تمويل بناء السد العالى ولكن مع بداية نظام السادات فى تطبيق برنامج الإنفتاح الإقتصادى فى 1974 فقد حدث تحول جذرى فى العلاقة مع البنك وأصبح البنك هو من يخطط لإعادة هيكلة الإقتصاد المصرى وتحويله من رأسمالية دولة الى نظام السوق الرأسمالى فيما عرف ببرنامج الإصلاح الإقتصادى وشكل البنك " المجموعة الإستشارية لمصر" من تكتل الدائنين ومانحى المساعدات وتم تعيين ممثل مقيم فى القاهرة للصندوق فيما يذكرنا بعهد الخديوى إسماعيل والذى انتهى بالإحتلال الإنجليزى.

وضع البنك الدولى روشتة للإصلاح الإقتصادى تمثلت فى النقاط التالية:

1- تفضيل الزراعة على الصناعة

2- تفضيل القطاع الخاص على القطاع العام

3- تفضيل النشاط التجارى والتوكيلات على النظام الصناعى الإنتاجى

4- تغليب قوى السوق عوضا عن التخطيط

5- تعديل قوانين الإستثمار لصالح رأس المال الأجنبى

6- تعديل قوانين الصادرات والواردات لفتح السوق امام المنتجات الأجنبية

7- السماح للبنوك الأجنبية بحرية النشاط فى مصر

8- ترشيد الإنفاق العام وخاصة المبلغ الموجه لدعم السلع الغذائية والإستعاضة بمنح علاوة اجتماعية للعاملين فى الدولة

9- تعويم الجنيه المصرى من خلال "توحيد سعر الصرف"

أدى التطبيق القسرى لهذه التوصيات الى ارتفاعات حادة فى الأسعار مع تحولات إجتماعية حادة طالت الطبقة الوسطى بمختلف شرائحها مما أحدث إحتقانا متزايدا وصل الى ذروته بقرارات رفع الأسعار وربط البيان الصادر ذلك بالإتفاق مع صندوق النقد الدولى والبنك الدولى لتدبير الموارد اللازمة لتغطية عجز الموازنة.

الخبرات والدروس

عندما نستعيد ذكرى انتفاضة يناير 77 فلابد أن نستخلص منها بعض العبر والدروس عسى الذكرى أن تنفع الداعين للتغيير، ويمكن تلخيص هذه الدروس من وجهة نظرى فيما يلى:

الدرس الأول:

كانت الطبقة العاملة المبادرة بالإنتفاض وخاصة فى المناطق الأكثر تنظيما وذات الخبرات النضالية، فقد سبق أحداث 77 عدد من الهبّات فى سنوات 75 و76 فى شبرا وحلوان والمحلة وكفرالدوار وغيرها، ورغم ان تلك الهبات كانت اقتصادية ونقابية بالأساس ولكنها جاءت على خلفية التحول الإقتصادى الى نظام راسمالى فردى مرتبط بالرأسمالية العالمية والإطاحة بالمكاسب المحدودة التى تحققت للطبقة العاملة فى نظام عبد الناصر، وهكذا يظل الرهان على الطبقة العاملة هو الفيصل لأى حركة ثورية حالية أو قادمة.

الدرس الثانى:

صاحب عملية التحول الإقتصادى بعد 73 ظهور و نمو طبقة رأسمالية طفيلية مرتبطة بالمراكز الإمبريالية العالمية فى الغرب وظهرت الحاجة الى مناخ تستطيع فيه هذه الطبقات الجديدة التعبير عن أفكارها، واستجاب النظام الى ذلك مبكرا بالإفراج عن الإخوان المسلمين واتاحة منابر المساجد لهم والسماح لهم بإصدار مجلة الدعوة وحقق بعض الحريات الصحفية النسبية مقارنة بالعهد الناصرى، وكان لقرار تحويل التنظيم الأوحد " الإتحاد الإشتراكى" الى منابر ثم أحزاب خطوة فى هذا الإطار، وكان لهذه العملية من جانب السادات مخاطرها التى كان من ضمنها وجود مجموعة من المعارضين الرديكاليين بمجلس الشعب من أمثال المستشارممتاز نصار وخالد محيي الدين والدكتور محمود القاضى والشيخ صلاح ابو اسماعيل وأبو العز الحريرى وغيرهم ممن ساهموا فى تحريك الحياة السياسية وإثرائها، كذلك لعب حزب التجمع اليسارى حديث النشأة دورا فى التمهيد لإنتفاضة يناير والمشاركة فيها ويشهد على ذلك عدد المقبوض عليهم منه فى الأحداث وقصة البرقية الشهيرة ومصادرة جريدته المتكرر وإقتحام مقره أكثر من مرة ، كذلك المشاركة الواسعة لليسار الراديكالى فى الأحداث وهو ما إتخذه السادات ذريعة لإظهار عداءه الكامن لليسار والشيوعيين وتسديد سهامه إليهم بتصريحه " إقتلوهم حيث ثقفتموهم" وتهديده " العيال بتوع إنتفاضة الحرامية دول أنا حعرف أربيهم".

الدرس الثالث:

تركزت إنتفاضة يناير فى المدن الرئيسية وغابت بشكل كبير فى الأطراف، مما يعنى يدل على تدنى الوعى السياسى فى الريف المصرى بغالبيته العظمى من الفلاحين والتى تعتبر تاريخيا رديفا للطبقة العاملة وعدم قدرة الحركة اليسارية فى الوصول الى فقراء الفلاحين وصغار الملاك مثلما حدث فى ثورة 1919حيث مثل الفلاحون وقود الثورة ودعامتها الأساسية، مما يلقى بتحدى حقيقى على أى حركة ثورية للوصول الى القطاع الأعظم من الفلاحين فى الريف المصرى

الحكم التاريخى

جاء الحكم التاريخى فى القضية رقم 100 لسنة 1977 والخاصة بمحاكمات المتهمين بإشعال الإنتفاضة على قدر عال من الموضوعية والجرأة وكانت حيثيات هذا الحكم بمثابة سيمفونية رائعة تتهم النظام بأنه المتسبب الرئيسى فيما حدث وتسخر بشدة مما قدمته النيابة من قرار إتهام بناءا على تحريات مغلوطة وعارية من الصحة، وجاء فى هذه الحيثيات تقريع شديد لجهاز الأمن الذى قدم كتبا ومجلات مما يباع فى الأسواق كأدلة إدانة، ناهيك عن الأخطاء الفادحة فى كشوف الأسماء لمتوفين ومهاجرين خارج الوطن، وذكرت الحيثيات نكتة "الشاهد الطائر" عقيد المباحث الذى شهد على الأحداث فى أكثر من منطقة فى نفس الوقت وكأنه من أهل الخطوة.

عشرات الأسئلة التى أجاب عليه هذا الحكم بشجاعة يحسد عليها ذلك القاضى الوطنى المستشار " حكيم منير صليب " ومساعديه عضوى المحكمة القاضيان "أحمد محمد بيكار" و"على عبد الحكيم عمارة" ويمكن لمن أراد الإطلاع على الحكم كاملا على الرابط التالى:

http://wwwentisarblogspotcom.blogspo...8-19-1977.html

يبقى فى النهاية أن انتفاضة الشعب المصرى العظيمة فى يناير 1977 ستظل دروسها معينا لا ينضب لكل الوطنيين المصريين لكى نتعلم منها ونستعيد قراءتها وستبقى دليلا على قدرة هذا الشعب على صنع الأحداث الهائلة والتى قد تكون مفاجئة حتى لمن يتصورون أنهم طليعته

وأخيرا فإن الدرس الأهم للإنتفاضة هو ضرورة بناء منظمة ثورية قادرة على قيادة الجماهير فى أصعب اللحظات التاريخية القادمة، والا فلا تلوموا الاّ أنفسكم. والسلام عليكم.

============== لقد إستطاع السادات القضاء على الإنتفاضة التي سماها ( إنتفاضة حرامية ) ..

رئيس يتهم شعبه الجائع " بالحرامية " .. مصيره ولغير هذا من جرائم بحق الشعوب العربية كلها .. جهنم وبئس المصير ..

إستطاع القضاء عليها :

بالقوة والسلاح والعنف ..

وببعض " التنازلات " عن " بعض أسعار قوت الشعب ..

إستطاع هذا .. وللأهم :

[ عدم وجود منظمة ثورية قادرة على قيادة الجماهير في أصعب اللحظات التاريخية ]