سيدتى الرقاصة

بصى بقى يا ستى ، انتى تصحى الصبح بدرى و تقولى لجوزك او لابوكى او لاخوكى انك رايحة حفلة رقص و هو هايوافق ما تقلقيش علشان مصر ، تروحى على اقرب لجنة ليكى هاتلاقى شغالة اغنية بشرة خير ، عايزك بقى تاخدى بالك اوى ، تهزى اوى اوى عند الصعيدى و تقومى نازلة عند الشباب الاسكندرانى و الطلعة بهزة حلوة كدة عند المحلة و اللى منها ، و ما تنسيش القصعة الجامدة بقى عند الاسمعالاوية و عايز جسمك كله يتلوى من القشعريرة اول ما توصل الاغنية لأملنا كبير.
روبابيكيا

دردشة

انا بس عايز افهم بعيدا عن مؤيد او معارض او مع او ضد ، ايه علاقة الرقص بالانتخابات الرئاسية ، ايه علاقة ان الستات ترقص فى الشارع و تتصور و تنتشر على مواقع التواصل الاجتماعى بالتصويت و الصندوق ، ايه علاقة ان راجل يسيب بنته او مراته او اخته ترقص فى الشارع و الناس كلها تتفرج عليها و تتفضح على مواقع التواصل الاجتماعى ، هو ليه لازم نبقى الفقرة الكوميدية فى الاعلام العالمى ، ليه رغم الانقسام الواضح فى الخوف من ترشح مرشح له وزنه زى عنان او شفيق او حتى واحد زى خالد على ، ما ينفعش نكمل الانتخابات بدون ما نبقى تريقة العالم كله، لحد امتى هانفضل عايشين فى عالم سمسم؟
روبابيكيا

الشعب السعيد

بلغنى ايها الشعب السعيد ، ذو التيتى الوحيد ، ان الأربع سنين اللى فاتوا ، مجرد تمهيد ، و الأربع سنين الجايين جديد فى جديد ، لا تقول قناة و لا تفريعة و لا رفع دعم و توليعة ، دة الجاى خرااااب على الكل، مؤيد و معارض فل الفل ، و ليلة سودة مطينة ، و مهببة و محينة ، و سلام كبير اوى و خليكوا ساكتين يا بهايم على جيش راكب و متين ، متانة السنين و ابلع البلد فى عبك و لا حد ييجى جنبك و جيش طالعله بلد يبقى مفيش راجل يا بلد و الجاى سوااااااااد و مدد مدد مدد مدد رحتى فى داهية يا بلد
روبابيكيا

قالك ايه

قالك ايه قالك اه ، موسم و كله بيستناه ، و التعريض على ودنه ، الكارثة ان الزناتى خليفة نازل قصاد خيال المآتة و ناجح م العتبة لأبو أتاتا بس الخواجة بيشو لازم يقتنع ان فيه انتخابات ، و فات فات ابوك السقا مات ، و عندها نزلت الغازية متحزمة و الشوادر متلغمة و كله على كله قال ايه فيه انتخابات ، و الانتخابات دى متاهات من تعريض و شغل اثباتات و ادينى حتة من التورتة يا عدلات ، و التورتة كبيرة و كله عايز يلهط و الشعب راضى و متمرمط و كله على كله اشتغالات فى مسرحية اسمها انتخابات.
روبابيكيا

انتخابات

بيقولوا فيه انتخابات ، و الرقص على ودنه و السيرك فى البلد يا عمدة ، و الدنيا خربانة ، و بدل الرقص ببلاش و مرشح ما يسواش و كله فى المعمعة لابس البردعة و ماشى عارف طريقه للصندوق ، قال ايه نزيهة و مفيش مرشحين و كله شايل الطين و الطين هايغلى و لسه كمان ٤ سنين ، يا مصيبتى السودة يانا يامه.
روبابيكيا