شهر ٦

شهر ٦
رمضان خلص فيه
والعيد خلص فيه
وامتحانات الثانوية خلصت فيه
والمرتب خلص فيه
وتيران وصنافير خلصت فيه
والبنزين خلص فيه
و الغاز خلص فيه
و الاسعارخلصت فيه
والشعب خلص فيه ...
و هو لسه بسلامته مخلصش ..
يخربيت امك شهر شبه شهر ٨ كدة!

عزيزى العميل

عزيزي العميل /انت الان علي نظام ايام سودة للتحويل الي نظام انت لسة شوفت حاجة اضغط 1 ، للتحويل الى نظام الجاى انيل اضغط 2 ، للتحويل الى نظام سواد السنين اضغط 3 ، للعودة للايام السودة اضغط # .

حكومة مسخرة

اول مرة اشوف حكومة بتتبلى على نفسها انها احتلت جزء من بلد تانية و المصيبة انها احتلتها من قبل ظهور البلد التانية اصلا على الخريطة و ان الحكومة احتلت الجزء دة بمباركه البلد الي مكانتش لسه موجودة اصلا  و ماحدش يعرفها فى الوقت دة ، و اما قامت حروب البلد التانية ما طالبتش بالجزء دة و لا سألت عليه و لا دافعت عنه ، و الامم المتحدة قالت ان الجزء دة تبع مصر و برضه الحكومة بتقول انه تبع البلد التانية بالعافية ، و مجلس النواب و النوايب قال ايه ، احتراما لأحكام القضاء بيناقش بيع البلد لبلد تانية و ابقى سلملى على امك يا عبد العال بيه.

احساسك ايه

احساسك ايه و تيران و صنافير بتتسلم للسعودية و انت مش قادر تتكلم

طب احساسك ايه اما يحصل تفجير محترم يموت فيه كام واحد يشغلك عن ان تيران و صنافير اتسلمت للسعودية

احساسك ايه اما يترفع الدعم و ينسيك التفجير اللى هايحصل و تنسي تيران و صنافير و التفجير و تفكر هاتعيش ازاى

و لا احساسك اما يحصل تفجير تانى و احنا عندنا ارهاب علشان ماحدش يتكلم على رفع الدعم و البلد فى حالة حرب

طب احساسك اما تقوم اثيوبيا بالبدء فى تخزين المياة فى سد النهضة و يبقى مفيش أكل بعد رفع الدعم و لا مية تشربها

تقوم بقى تصحى الصبح تحكيلى على احساسك اما يحصل تفجير تانى اكبر من اللى سبقوه علشان تنسي مشكلة المية و انك هاتموت من العطش

احساسك ايه اما تعرف ان كل دة هايحصل خلال شهر و بالتحديد فى شهر ٧ ، الشهر الجاى .

احنا مش جيل اتظلم ، احنا جيل اتخرم .

بقدرة قادر

وبقدرة قادر حسب كلام الدكتور فاروق الباز اللي المفروض انه كلام علمي ايام السادات تيران وصنافير كانوا تبع مصر بس كانوا بيعوموا بعدوا شوية عن الشط  وبقوا تابعين للسعودية ،
المصيبة ان من كام يوم ظبطوا اسكندرية رايحة الشرقية لولا ولاد الحلال لحقوها ع الطريق .

بلح بلح

فيه ناس قاعدة ليل و نهار تتريق على بلحة ، من انتم ؟ من انتم ؟
أتتحدثون عن حامي الديار و مغيث الصبايا اﻻحرار
اللى ﻻ تنطفيله نار و ﻻ ينذللوا  جار
حامى الحما
بلحة جوز انتصار
قاهر الاشرار  ومدمر التتار
عميد الحكام العرب و العجم و الاغريق و الرومان ،  ملك ملوك أفريقيا واسيا و بيلعب ف تصفيات أوروبا للأندية الابطال ..
من انتم يا زبلة منك ليه ؟
انتم عبط ولا حد لعبلكم في دماغكم تفتكروا الزعيم القائد العظيم قائد العرب مخلص العالم من الأخوان الإرهابيين ، اللى أسر قائد الاسطول السادس ، و حفر التفريعة الفظيعة ، اللي هايقضي على الإرهابيين والدواعش الوحشين ،  اللي منيم أمريكا من المغرب و روسيا من العصر ، اللى بيلعب فى الصين تايكوندو ، ملك ملوك سواقة العجل بالليل و اللى ضيع النيل و لم حواليه البهاليل ،
من انتم يا غجر منك له لها له ؟

اللهم انى صائم

لأ بجد احلى حاجة فى الفيس بوك شغل اللجان ، كتائب السيسى ضد لجان الاخوان ، و الاحلى في التعليقات انهم عارفين بعض ، دة يقول لدة يا لجنة و دة يقول دة يا لجنة و يغنوا و يردوا و يشتموا فى بعض ، بس طبعا دة لا يمنع ان فيه ناس فعلا مش لجان سواء مؤيدين  للسيسى او مرسي ، بيعتبروا مغيبين مش لجان ، احلى حاجة بقى فى رمضان ، طبعا لأنه شعب متدين بطبعه فالكومنتات بتختلف فى نهار رمضان ، لأن الناس صايمة ، تلاقى واحد بيرد فى كومنت على واحد مختلف معاه و يقوله يا خروف يا ابن التيت و التيت و التيت و امك تيت و كفاية علشان انا صايم مش هاشتم ، واحد تانى يقول على كومنت الله ام انتى صائم هارد عليك بعد الفطار علشان اشتمك براحتى ، و يعقد النية انه هايشتمه بعد الفطار ،دة طبعا ما يمنعش ان فيه ناس محترمة لا بيفرق معاهم شتيمة قبل فطار و لا بعده و شغالين لجان السيسى و لجان الاخوان شتيمة فى بعض و المصيبة الخروف اترقى و بقى لجنة ، سواء بكاب او بدقن ، ما علينا .