اقولك حاجة يا مصر ، انتى قهرتى انضف ما فيكى ، انا مش عايز انكد عليكى و انتى بتفرحى ، انتى بس اللى تفرحى و احنا بنموت علشانك فى اليوم الف مرة ، بجد انا زعلان منك و زعلان عليكى ،
اكلمك بصراحة ، انتى بلد هابلة ، ايوة بلد هابلة ، و من كتر الهبل بتاعك بقيتى تفتخرى بهبلك و تحتفلى بيه ، صدق اللى قال هابلة مسكوها طبلة ، اتعميتى و بقيتى مش شايفة حاجة ، قلبك بقى حجر مش بيلين و لا بيحن و لا بيزعل على حد ، بقيتى عاملة زى عفش كتير بس ذوقه وحش ، من اول فرعون و انتى الفساد راكبك و حكامك بيظلموا ولادك و انتى ساكتة ، بقيتى رخيصة و تافهة قدام العالم كله ، ما بقاش ليكى سعر و لا لينا سعر ، بتشيلى الفاسد فوق راسك و تعليه و اللى بيحبك بجد بتدوسى عليه ، بتفعصيه .
مش باقولك هابلة ،
لأ يا مصر انتى مش هابلة ، انتى الشر ركبك ، بقيتى شريرة ، بتدوسي على ولادك بقلب جامد ،
عارفة يا مصر انضف ما فيكى اتقتل او اتسجن او سافر او هاجر ، و انتى و لا فى دماغك ، عادى و لا فارقة معاكى و لا هاتفرق ، خلاص بقيتى صنم ما بيحسش ، عايزة اللى يطبلك و يرقصلك و ينصب عليكى و يسرقك و ينعب ثروتك ، انما اللى يحبك تدمريه و تقتليه ، علشان بس انه بيحبك ، اصل حبك دة داء ، لا عارفين نعيش بيه و لا عارفين نتعالج منه ،
انتى فاهمة يا مصر قهرتنا ، اخواتنا اللى اتقتلوا ، اللى محبوسين ، اقول ايه عليكى و انتى فيكى كل العبر ،
عارفة احلى حاجة ، انك بتفرحى ، مصر بتفرح ، بتفرحى بدم ولادك و شبابك اللى ضاع ، بتفرحى على جثث الناس اللى بيحبوكى بجد ، بتفرحى بقهرتنا و تعبنا ، بتفرحى و احنا بنموت كل يوم الف مرة منك و علشانك .
افرحى باللى بيرقصلك و يطبلك و يكدب عليكى و ينافقك ، و دوسى علينا احنا اللى بنحبك .
