يمكن تفرج

اصبروا بس ٦ شهور
نصبر عشان يحصل إية بعد ٦ شهور.
مصر دي بلد عظيمة و انتوا شعب عظيم يا مصريين.
هيحصل إية بعد ٦ شهور إية خططتك؟!
خطة؟ هو انا كان عندي برنامج عشان يبقى عندي خطة؟ اصبروا بس ٦ شهر ، مش يمكن تفرج

يا شحتفتك يا بلحة

لما شفت دموع سيادة الرئيس العظيم الشأن لواء فريق مشير فى شهرين السيسي
و اتشحتف يا عينى لما صوت موزة حنين قاله بنحبك يا ريس اتأثرت قوي قوي بصراحة ، 
افتكرت ملايين الشباب ولاد الجزمة الى عايزين  يسيبوا البلد عشان مش عارفين يعيشوا فيها
و افتكرت كمان الكلاب الخونة الارهابيين اللى بيدوروا على دواهم ومش لاقيينه ، قال ايه عايزين يتعالجوا والبلد بتنهار و تمر بهذه المرحلة الحرجة ... ودا وقت علاج يعني ، ما تموت و انت ساكت ، بنحارب الارهاب
ما علينا...
بردو افتكرت الاهالي اللى اكيد اخوان و ارهابيين و ممولين و نكسجية اللى مش عارفين يصرفوا على عيالهم وحارمين نفسهم من اللقمة و بردو مش قادرين بسبب غلو الاسعار واخيراً جه فى بالي العيال الواطية اللى كانت عايزه تتجوز بس فركشت عشان مصاريف الجواز اتضربت في 1000 مرة ، جواز ايه و نيلة ايه فى الظروف العصيبة دى
وقولت لنفسي...
يجي ايه كل دا قدام دموع سيادة الرئيس وشحتفته على الهوا قدام العالم كله ...احنا اسفين يا ريس على إننا مش قادرين نصبر كمان شوية بعد ما بعنا الأندر وير .

عايشها كدة

انك وانت صغير تكبر ف بلد بتعلمك ف كتاب التاريخ والجغرافيا ع تاريخها وانتصاراتها وتميزها وسط العالم كله وتكبر وعقلك يستوعب انك عشت طفولة مزيفة فى بلد عاهرة وان دفاعك عنها زمان كان مجرد وهم وانك توصل لمرحلة ان أما حد يتكلم عن بلدك انك بتخرس مبتنطقش لانه بيتكلم صح ..
ومش فكرة حكومة بس لا ده شعب ونظام انت عايش فيه ماشي بالتعريص من اصغرها مواطن عادي لاكبرها راس ف البلد .. الواحد مقتول طموحه واحلامه حتى والواحد متغرب بعيد عنها بس الواحد ميت من جواه وعايشها كدة

السيسى فى الجاهلية

تخيلوا كدة لو السيسى بيحكم مصر ايام الجاهلية

كان اما يطلع طلعة للصين و لا نيويورك

وسع للكافر لما يسافر

و لا اما يطلع قانون جديد

سيبوه يعدي وبلاش حيره دة موافق عليه تبع الوليد ابن ابى مغيرة.

و لا اما احمد موسي يعرضله

الحلو من قنا و صاحبه عكرمة .

و لا مثلا اتبرع و لو بجنيه

ماحدش يقول مفيش فكه ولا حلول دة صندوق ابن ابي سلول

طب اما البلدية تيجى
الحلوه من قريش وباكل عليها عيش

و لا البراءات و المصالحة مع نظام مبارك

مفيش كافر صالح كله بتاع مصالح

و لا سوريا و العراق

لا نار ولا حريق ابو لهب على الطريق

شيزوفرانيا

شعب شيزوفرانيا
شعب غريب عجيب
كل واحد فيه بيبجى على التانى بس ما يجيش على اللى ظلمه ، يمكن الظلم مسألة نسبية ، و معنى كلمة حاكم ظالم شعب جبان فعلا معناها الشعب المصرى ، البنزين يغلى و يترفع الدعم ، الميكروباص يعلى الأجرة ، و السواق يشترى اكله اغلى و صاحب السوبر ماركت مش فارق معاه ، كدة كدة هايبيع بمكسب ، بس المدرس اللى بيدى درس خصوصى لابنه رفع تمن الحصة علشان عنده الضغط و الادوية غليت لأن مفيش دولار لاستيرادها و كله بياكل فى كله و ناسى ان المشكلة من الأول ان الحكومة رفعت الدعم عن البنزين .
المشكلة انك تسيب الاصل لأنه مش فارق معاك و تاكل فى اخوك ، بس فعلا ربنا اسمه العدل بيولى على الناس اللى شبههم ، الشعب لو ما فاقش بسرعة هايخسر كل حاجة.

شعب ملعون

فعلا احنا شعب ملعون
اتلعن فى قصة سيدنا موسي بغضب ربنا الضفادع و القمل و الفيضان و موت الأطفال
اتلعن فى قصة سيدنا يوسف ب ٧ سنين عجاف
اتلعن فى الشدة المستنصرية
اتلعن فى احتلال المماليك العبيد و الاتراك و انجليز و فرنسيين
ملعون فى فرعون و هامان و سحرة فرعون
ملعون فى قاضى ظالم حكم على سيدنا يوسف و هو عارف انه برئ
ملعون فى الاسكندر اللى عبد آلهته فوافق انه يحكمه
بجد شعب ملعون
و صدق الله العظيم اما قال
فاستخف قومه فأطاعوه

رسالة

اقولك حاجة يا مصر ، انتى قهرتى انضف ما فيكى ، انا مش عايز انكد عليكى و انتى بتفرحى ، انتى بس اللى تفرحى و احنا بنموت علشانك فى اليوم الف مرة ، بجد انا زعلان منك و زعلان عليكى ،
اكلمك بصراحة ، انتى بلد هابلة ، ايوة بلد هابلة ، و من كتر الهبل بتاعك بقيتى تفتخرى بهبلك و تحتفلى بيه ، صدق اللى قال هابلة مسكوها طبلة ، اتعميتى و بقيتى مش شايفة حاجة ، قلبك بقى حجر مش بيلين و لا بيحن و لا بيزعل على حد ، بقيتى عاملة زى عفش كتير بس ذوقه وحش ، من اول فرعون و انتى الفساد راكبك و حكامك بيظلموا ولادك و انتى ساكتة ، بقيتى رخيصة و تافهة قدام العالم كله ، ما بقاش ليكى سعر و لا لينا سعر ، بتشيلى الفاسد فوق راسك و تعليه و اللى بيحبك بجد بتدوسى عليه ، بتفعصيه .
مش باقولك هابلة ،
لأ يا مصر انتى مش هابلة ، انتى الشر ركبك ، بقيتى شريرة ، بتدوسي على ولادك بقلب جامد ،
عارفة يا مصر انضف ما فيكى اتقتل او اتسجن او سافر او هاجر ، و انتى و لا فى دماغك ، عادى و لا فارقة معاكى و لا هاتفرق ، خلاص بقيتى صنم ما بيحسش ، عايزة اللى يطبلك و يرقصلك و ينصب عليكى و يسرقك و ينعب ثروتك ، انما اللى يحبك تدمريه و تقتليه ، علشان بس انه بيحبك ، اصل حبك دة داء ، لا عارفين نعيش بيه و لا عارفين نتعالج منه ،
انتى فاهمة يا مصر قهرتنا ، اخواتنا اللى اتقتلوا ، اللى محبوسين ، اقول ايه عليكى و انتى فيكى كل العبر ،

عارفة احلى حاجة ، انك بتفرحى ، مصر بتفرح ، بتفرحى بدم ولادك و شبابك اللى ضاع ، بتفرحى على جثث الناس اللى بيحبوكى بجد ، بتفرحى بقهرتنا و تعبنا ، بتفرحى و احنا بنموت كل يوم الف مرة منك و علشانك .
افرحى باللى بيرقصلك و يطبلك و يكدب عليكى و ينافقك ، و دوسى علينا احنا اللى بنحبك .

حقيقة العالم دلوقتى

صُنّاع الفتن و محترفوا الهدم اكتشفوا من قديم أن أفضل وسيلة للقضاء على عقيدة هي البحث لها عن نقيض يبارزها ..
و في زماننا رأينا محاولة القضاء على الرأسمالية بالشيوعية و محاربة الصوفية بالأصولية و محاربة الدين بالعلمانية و السنية بالشيعية و القومية العربية ( في الجزائر ) بالقومية البربرية .
و السياسيون الأذكياء لا يحبون تضييع الوقت في دهاليز المذاهب و الفلسفات و يكتفون بضرب الأشخاص بالأشخاص .. و الزعامات بالزعامات .. و الرموز بالرموز .. فحيثما وُجِد التناقض و التضارب فهناك رموز و أشخاص تعبر عنه .. و الأشخاص دائماً هم موضوعهم ..

~~

من كتاب / زيارة للجنة و النار
للدكتور مصطفى محمود

ارضنا

بنتخانق علشان ارضنا ، مصريين عايزين يثبتوا بأى طريقة ان ارض مصر مش ارضها ، احنا دخلنا فى مرحلة جديدة ، كانت زمان الارض عرض ، دلوقتى بقت عرض و طلب للى يدفع و نثبتله كمان انها بتاعته و تدافع عنه .

حقيقة

"هنا تبدأ الدائرة المفرغة فى دورتها المفزعة. ففى غياب المعارضة المدنية، سوف يؤدى الحكم العسكري إلى السلطة الدينية. ولن ينتزع السلطة الدينية من مواقعها إلا الإنقلاب العسكري، الذى يُسلم الأمور بدوره، بعد زمن يطول أو يقصر، إلى سلطة دينية جديدة. وهكذا. وأحياناً يختصر البعض الطريق فيضعون العمامة فوق الزي العسكري، كما حدث ويحدث فى السودان.

الخروج من هذه الدائرة المفرغة، ضرورة..
والتواصل مع الشرعية الدستورية، مسألة حياة أو موت..
والشرعية الدستورية لا تتسع لهذا أو لذاك. فكلاهما خطر عليها، ومدمر لها، والذى يُفضل أحد البديلين على الآخر، يستجير من الرمضاء بالنار."

د. فرج فودة - حديث عن آفاق المستقبل
من كتاب "حتى لا يكون كلاماً فى الهواء"
1973

حالنا للأسف

تعلب لقي قطة بتشرب حشيش
قال ايه دا بتشربي حشيش دا مضر بصحتك تعالي
اجري معايا الحياة حلوة و الدنيا جميلة
القطة اقتنعت و جريت معاه
شويه و قابلوا فيل بيشم هيروين
التعلب قال ايه دا الهيروين مضر بصحتك
تعالي اجري معانا الحياة حلوة و الدنيا جميلة
الفيل اقتنع و جري معاهم
شوية و قابلوا الاسد و كان بيضرب حقن
التعلب قال ايه دا بتضرب حقن دي مضره
تعالي اجري معانا
الاسد سكت شويه و بعدين قال
هو ابن الكلب دا كل ما يضرب ترامادول يجرينا وراه الغابة كلها

انخفاض منسوب النيل

بعد فزع المصريين من ظهور جزر جديدة فى النيل بعد انخفاض منسوب المياة بسبب سد النهضة ، خرج وزير الرى فى سيكا سيكا بهذا التصريح
يا شعب سيكا سيكا انتم مش فاهمين ، ظهور الجزر دى مصلحة و سيتم زراعة الجزر المكتشفة حديثا بنهر النيل بالكوسة والطماطم و بناء مصانع لتصدير الكوسة والصلصه والارز بالمرة لعمل محشى الكوسة للصوماليين و اهالى الكونغو و تنزانيا العنب و سيتم التصدير حسب بحث وزاره التموين ربنا يكرمهم بيكافحوا من اجل الشعب والشعب وحش مش راضى عنهم...

كل دى عصافير

حسن يوسف يسعى لانشاء لاس فيجاس مصرية
ميريهان حسين و الضابط
عكاشة و قصة مقابلة السفير الاسرائيلى بدون موافقة النظام
مرتضى منصور
شيرين اعتزلت الغناء
البرلمان
و كمان البرلمان
كل دى عصافير ،دة الدولار وصل ٩.٥٠ يا ولاد المفكوكة.

صباحوو يا ماسر

جنيه تصبح على ماسر ،
و جنيه تمسى على ماسر ،
و جنيه علشان شكلك متضايق ،
و هاتطول فى الكلام هاخليك تشحن كارت جديد كل نص ساعة.

ثورة تالتة

احنا من الآخر محتاجين ثورة تالتة على الناس اللي عملوا الثورة الثانية لتحقيق مطالب الثورة الأولى ، بس ما يركبهاش اللى ركبوا الثورة الأولى و اتسببوا فى ظهور اللى نطوا ع الثورة التانية بسبب ركوبهم ع الثورة الاولى .

خريج الجامعة فى مصر

التعليم الجامعى مهم جدا ، بس فى مصر خريج الجامعة حاجة تانية ، يا ترى بعد ما بيتخرج من الجامعة بيعمل ايه؟

بيقعد ع القهوه من الصبح للعصر

ومن العصر للمغرب بيروح البيت ياكل لقمة ، اصله تعب من القعدة ،

ومن المغرب للعشا بيروح يلعب بلاي ستيشن عند جالاكسي بلاى ستيشن اللى على ناصية شارعهم ،

و من العشا بقى للساعه عشره بيرجع البيت ياكل تاني ، جاع من البلاى ستيشن ،

ومن عشره بالليل يشوف رفاق السوء هيسهروا فين عشان يصرف باقى اللى جيبه على دماغه ،

و هذا قمة الاعجاز العلمى.

استغماية

يا عم التيتى ارسي على بر حيرتنا معاك

مرة هانعمل عاصمة جديدة و مرة مش هانعمل عاصمة جديدة
مرة هانعمل محطة نووية و مرة تم تأجيلها لأسباب فنية
مرة سد النهضة مش هايأثر على حصة مصر و مرة التماسيح بعد فتح البوابات بتبلبط فى الشوارع
مرة اكتشفنا علاج لفيروس سى و جربناه و نسبة الشفاء ١٠٠٪ و مرة جبنالكم سوفالدى بالألافات
مرة نفتح محطة مترو السادات و يحصل تفجير فى تنزانيا نقفلها علشان كوريا زعلانة
حيرتنا معاك يا عمونا ، احنا بلعب استغماية سوا و لا ايه ، يخرب بيتك واكل داتورة

خلطبيطة

هى اتلخبطت شوية ، لأ بصراحة اتلخبطت كتير
بعد ٥ سنين ثورة اكتشفنا مفاجآت مذهلة

المؤيدين نزلوا التحرير
و المعارضين فى السجن
و الثوار قاطعوا الدستور
و ٦ ابريل بتهتف ضد الجيش
و الاخوان عملوا ثورة
و الفلول عملوا ثورة بعديها
و المشير رئيس مدنى
و الدستور بيعترف بثورة يناير
و اللى قالوا عليه نعم مش معترفين بيها
و الارهاب المحتمل بقى واقع
و قفلوا محطة مترو السادات
بس سينا تحت السيطرة
و الجنود بتموت
و قضينا ع الارهاب
بس عندنا ارهاب
و هاننشط السياحة
و تماسيح فى النيل
و خرفان كتير
و الوحش المصري بيطير
و برلمان طراطير
و كله بيتمرجح فى مولد سيدى المشير

المهم بقى
ناس بتقول اللى ما يتسمى راجع
و ناس بتقول فين ايامك يا فاسد
ناس بترقص و ناس بتموت م الجوع
و الدعم اتشال
و كله سعيد و مبسوط
من اسكندرية لأسيوط

و سمعنى سلام كبير اوى
و انا مش عارفنى ، انا تهت منى ، انا مش انا .

الاعلام السيساوى و اعداء مصر

طبعا لأن مصر تحظى بالأمن و الأمان ،
و حقوق الانسان و النبات و الحيوان ،
و العدل فى كل مكان ،
صحرا كان او بستان ،
و السيسى مدلع الشعب ،
و انقذه من الغلب ،
و مفيش حرامية ،
و لا فساد و لا بلطجية ،
و لا بطالة و لا ازمة سكن او تعليم ،
و الناس شبعانة و غرقانة فى النعيم ،
و طبعا علشان الشعب مبسوط ،
و بيغنى توت توت ،
لازم يبقى فيه مؤامرات خارجية ،
و تحالفات داخلية ،
ليحرموا الشعب من المهلبية ،
و يرجعوه للطعمية ،
اصله شعب محسود ،
من برة و جوة الحدود ،
و حسب الاعلام السيساوى ،
الموجه للحمير الحصاوى ،
اعداء مصر بالكوم ،
عايزين ثورة تقوم ،
حماس و تركيا و قطر ،
و امريكا عاملة مؤامرة تمنع المطر ،
و حروب جيل رابع تعمل زلازل و براكين ،
و سكان كوكب زحل و المريخيين ،
و اثيوبيا هاتقطع عنا المية ،
و الفراخ هاتختفى م الجمعية ،
الاشتراكيين و الالتراس و الاخوان ،
و سكان كوكب عطارد و الشيعة فى لبنان ،
و البرادعى الخاين العميل ،
و ضيف عليهم ٦ ابريل ،
و داعش و انصار بيت المقدس و تايوان ،
و ضيف عليهم كوريا و اليابان ،
و تنزانيا و كينيا و اليونان ،
و لازم نحارب فى كل الجبهات ،
و ترقص عند اللجان الستات ،
ان الشعب برئيسه فرحان ،
و انه من مكرونة الجيش شبعان ،
و يحيا الجيش و الداخلية ،
و شيوخ المنصر و الحرامية ،
و قضاء السلطة السياسية ،
و البالوظة و المهلبية ،
و طراطير برلمانية ،
و التيتى ابن الجنية .

و سمعنى احلى سلام ،
لاعلام الكدب و الاوهام .

الاعلام و ازاى الناس تنام

مصر تنافس ..
تكتشف ..
تبهر ..
تذهل ..
تستحوذ على الإهتمام ..
تلفت أنظار ..
تجذب انتباه ..
جاذبة للاستثمارات ..

و كل فنكوش جديد من الفناكيش
أكبر ..
أضخم ..
أوسع ..
الوحيد ..
النادر ..
لأول مرة ..
هاتبقى أد الدنيا ..

و وسعوا من وش العقلاء
لااااااااء
لاااااااااااء

برلمان ساكسونيا

الناس المتضايقة من البرلمان ، دة برلمان لقطة ،

برلمان بكرى و العكش برئاسة الدكش ،
برلمان الموافقات و اللى جاى انيل م اللى فات ، النصاب حساسين بيوافق على كل القوانين ، برلمان الراندفوهات و المعاكسات ، برلمان السيلفى و اضحك الصورة تطلع حلوة ، برلمان الطراطير على حساب الفقير ، برلمان هايدخلنا التاريخ ، من باب النواح و الصريخ ، برلمان ضرب كل العصافير ، بخازوق واحد كبير ، برلمان ساكسونيا ، المونيا و اى حاجة قديمة للبيع ، البلد بتضيع ، بيع بيع ، برلمان القندلة و البهدلة ، رايحين فى داهية يا ولا ، سايبين مشكلة المية و عايزين يحبسوا الطلاب ، يادى الايام الهباب ، برلمان العكس عكاس ، كله سلطة على قلقاس ، برلمان الهباب ، بياكلوا كباب علشان بيحموا البلد م الارهاب ، برلمان الكفتة و الطرب و الكباب ، برلمان هايقضيها ، و كل الناس لبعضيها ، و ان كنت مورتا سيديهات ، انا الصندوق الاسود اللى بيسجل مكالمات .

أوجه الشبه بين ٢٥ يناير و ٣٠ يونيو

عارفين ايه أوجه الشبه بين ٢٥ يناير و ٣٠ يونيو

الاتنين الاخوان ما اشتركوش فيهم
الاتنين الجيش هو اللى شال الرئيس
الاتنين حكم بعدهم واحد من مجلس عسكرى مبارك ، طنطاوى و السيسى
الاتنين اتضحك على الثوار اللى قاموا بالثورة و اتركبت ثورتهم بناس ما قامتش بيها
الاتنين اللى استفاد منهم ناس ما نزلتش فيهم .

منافسة شريفة

اشتدت حدة المنافسة بين الجيش و الداخلية فى جميع المجالات ، ماعدا حفظ الأمن و حماية الحدود ،

نبدأ بكرة القدم عندنا فريق طلائع الجيش
و حرس الحدود دة مش ع الحدود ، دة بيبلعب فى استاد برج العرب ،
و منافسهم فرق اتحاد الشرطة و الداخلية ، مش بيحفظوا الأمن ، دول بيحتفظوا بالكورة.

طبعا الداخلية شافت الجيش بيبيع فراخ و لحمة و زيت و سكر و بيكسب ، قالت اشمعنى و قامت فاتحة اكشاك أمان قدام الاقسام تبيع فيها بقالة .

و طبعا بالنسبة للمصانع ، مش السلاح طبعا ،
احلى حلاوة طحينية تلاقيها مصانع الداخلية ،
و تشترى كحك العيد بالملبن من دار المدفعية ،
و تروح تشترى مكرونة من بقالة القوات الجوية ،
اما بقى زيت الطعام دة تخصص امن مركزى يا عنيا ،
عايز لحمة ، عايز فراخ تروح على دار القوات البحرية ،
و لو عايز رز و و شعرية تروح على كشك أمان اللى قدام قسم السبتية.

و سمعنى سلام كبير اوى
و خلى السلاح صاحى

ليه النظام خايف من ٢٥ يناير

النظام طبعا لازم يخاف علشان الي قامت ضدهم الثورة رجعوا تاني اوسخ من الاول و هما مش ناسيين اللى حصل ،
علشان مجلس طنطاوي اللى كان فيه السيسي ساب علينا الاخوان وخرجهم من السجون علشان يركبوا على ثورة ماقاموش بيها و الناس تقول حقي برقبتي و رجع نظام مبارك تاني و برضه الاخوان هايخرجوا من السجون تاني و الايام بيننا ،
من الآخر اصل ماينفعش البلطجي يعيش من غير كلابه الي بيسيبهم على الشعب وقت اللزوم.
حلو الكلام ؟

الطالع

طلبت من الريس شمهورش يقرالى الطالع ، بص فى السما و قاللى
الشعب دة مش نافع
شوية عايزين البعيد يرجع
و هو مش راجع
و شوية عايزين اللى ركب يدفع
و هو مش دافع
و شوية تايهين مابين الاتنين
و حقهم واقع
و شوية مساطيل
لا ليهم فى الطور و لا فى الطحين
يريحنا منهم و ياخدهم الرافع