هي الكفتة فين ؟

هي الكفتة فين إتدلقت

  هي الكفتة فين إتحرقت

  إتدلقت و إتحرقت إهي راحت و إتفلقت

  هي الكفتة فين الكفتة فين الكفتة فين

  إتسرقت

عبعاطى يا كفتجي صبع قوام صوباعين

  بيقولوا ليه أونطجي و نجيب الفيروس منين

  إيدز أو حتي سي إريال يشيل الاتنين

  و العيان كدة تخليه ع النار تحتيه فحمتين

هي الكفتة فين الكفتة فين إتدلقت

عبعاطى عصر السيكى 

نصب كدة و تهليب 

يحبس فى كل الشعب 

يحبس قريب و غريب 

و اللى يقول لأ 

يقضوها معاه تعذيب 

لازم تصدق كل حاجة 

دة قضاء و قدر و نصيب 

هى الكفتة فين الكفتة فين الكفتة فين 

اتحرقت 

احنا زى الفل

إحنا حاجة فظيعة مالهاش مثيل في المجموعة الشمسية 

 حد أسر قائد الاسطول السادس الأمريكي قبل كدة ؟ 

إحنا بقي أسرناه و نيمنا الأمريكان من المغرب زي الفراخ 

حد حفر ع الناشف قبل كدة ؟ 

احنا حفرنا ع الناشف و اما جابت مية كملنا حفر ع المبلول و لا همنا 

حد عمل سكة حديد فى سفينة قبل كدة ؟

احنا على رأى وزير التموين عملنا سكة حديد توصل بين مصر و اوروبا فى سفينة فى البحر و كمان عملنا البحر طحينة 

حد عالج الفيروسات بالاريال قبل كدة ؟

احنا عالجنا فيروس سى و الأيدز بالاريال و كمان عملناهم كفتة

حد قال وطن يعنى حضن قبل كدة ؟

احنا عندنا رئيس قال وطن يعنى حضن و خد الشعب كله يحضن بعضه من البرد فى المعتقلات و السجون 

حد طلع عفاريت على قناة فضائية قبل كدة ؟

احنا عندنا ريهام سعيد طلعت عفاريت و فكت السايب و ربطت المربوط قدام الكاميرات و على عينك يا تاجر

انتو بتقولوا ايه يا جماعة ؟ احنا زى الفل

  

و إديني كفتة 

أديك حفر ع الناشف 

و منه له 

جاى رايح 

منه له 

الشعب المتشحتف

بلغنى ايها الشعب السيكاوى المقشف 

اللى مش لاقى ياكل و متشحتف 

ان الريس السيكى مقضيها قوانين و قرارات 

و اللى جاى سواد اكتر من اللى فات 

لأنه معاه العصابة كلها فلولية و عسكرية 

و الراقصات و الفنانين و الفنانات و الحكومة المهلبية 

و معاه برضه كل الوجوه الاعلامية 

و كل القنوات الفضائية 

و باستطلاع رأى الاعلاميين 

فيما يحدث فى البلد المسكين 

وجدنا المهازل على الفضائيات 

و العاهات بين المذيعين و المذيعات 

و هذه بعض الأمثلة 

للفضائيات المنيلة 

و البلاوى المتلتلة 

معاكم جورسة جلاجل 

اللى دايما مستعجلة 

نبدأ كلامنا بالأبراشى ابن ابى زوبعة 

الذى يبرر الدلع و الشخلعة 

و السيكى دة اعظم رئيس 

و العيب كله على المحابيس 

ازاى يعملوا مظاهرات 

و التعلب فات فات

و اللى ينزل يستحمل 

و اللى عايز البراءة يشخلل 

و نشوف فضائية تانية 

لاميس بنت ابى فونية 

بتقول الاخوان عملوا كل حاجة 

من حرب عالمية لقنبلة على ساحل سفاجا 

و قلبوا القطر و المقطورة 

بقيادة زعيمهم ابو شفطورة 

و كل مصيبة اخوان اخوان 

و الحكومة و رئيسها محلب الغلبان 

لا حول ليهم و لا قوة 

بس السيكى برضه فتوة 

مش عارف يعمل حاجة 

و لا عارف يجيب محتاجة 

بس برضه زعيم 

يحكم قبائل بنى بهيم 

و ندخل على عوكش الدوكش ابن المدملكة 

اللى مقضيها تفعيص و تمحيص و فذلكة 

و هو اصلا مايسواش تعريفة 

و عايز يدخل السرايا الصفرا بتشريفة 

عمال يقول كلام مالوش لازمة 

جيل رابع و كائنات فضائية هاتعمل ازمة 

و لازم نعمل قنابل بلازما 

بيجيب منين الكلام دة ابن الجزمة 

ندخل على موسى ابن بنت عبيطة 

اللى عمال يزيط فى الزيطة 

و يزعق زى الغولة الحولة 

و يجعر فى الفضائية المبلولة 

عايزها بحر دم 

يا شيخ بلاها هم 

عايز الجثث فى كل مكان 

و اقتلوا الناس قدر الامكان 

و اللى يعارض اضربوه 

و اللى ما يتضربش احبسوه 

و عمال يدى اوامر للداخلية 

تقولش هو رئيس المهبلبية 

و هو اصلا صايع ماعهوش الاعدادية 

عمال يهبل و يطبل تقولش خالتى اللتاتة 

و هو ياخد الجايزة الاولى فى الغلاسة و الغتاتة 

واحد لا عنده دم و لا احساس 

بيضرب بانجو و شبه الدفاس 

بعدها بكرى ابن ابى بردعة 

صاحب السنان المخلعة 

استاذ فى التطبيل و الشخلعة 

واخد الريس السيكى على حب 

زى ما كان واخد مرسى و مبارك 

و كل من هب و دب

نفسه يتاخد ورا مصنع الكراسى 

و كل ما يتاخد هناك يرجع ناسى 

مقضيها طبل و رقص و تهجيص 

و هو ملظلظ كدة عايز و اتهرى تفعيص 

عمال يهبل شمال و يمين 

غور فى داهية يا ابن المهرتلين 

و عندنا فى النهاية ريهام بنت ملك الجان 

امها عفريتة و ابوها مش انسان 

مقضياها هرتلة و بتطلع عفاريت 

قال ايه 5 بنات ملبوسين من الجنى شحطاريت 

و اتصلت بابوها ملك الجان 

و امها عفريتة هانم الالعوبان 

قالولها هاتى بتاع مجلس الشعب حزب وطنى 

آآآآآآآآآآآآآآآآآآآه يا حواجبى يانى يا بطنى 

و قال ايه طلع العفريت فى دقايق 

تقولش كانوا راكبين معاه العربية و هو اللى سايق 

بس كانت تمثيلية هابلة 

و بنت ملك الجان ماسكة طبلة 

و هذه عينة من الاعلاميين الشرفاء 

اللى مسيطرين على شعب الماء ماء 

مااااااااااااااااااااء 

مفيش برسيم 

اطلع على اى فضائية يا بهيم 

الدولة العبيطة

أهم حاجة فى الدولة العبيطة نجاحهم فى تحويل فيروس الأيدز و فيروس سى الى كفتة و طبعا الناس العبيطة فى الدولة العبيطة صدقوا ان الفيروس هايبقى كفتة باستخدام اريال عبعاطى اللى اتعرض عليه مليارات علشان يكشف سر الاريال و رفض طبعا لولائه للدولة العبيطة .

طبعا من أهم التصريات تصريح وزير التموين من كام يوم و هو بيقول هانعمل خط سفن جواه سكة حديد يربط مصر بأوروبا , و دة طبعا اختراع جديد من وزير النقل قصدى التموين فى الدولة العبيطة .

من أهم تصريحات الدولة العبيطة تصريح وزير الداخلية لمواجهة تفجيرات محطات مترو الانفاق فى الدولة العبيطة , فقد اكتشف ان الارهابيين الوحشين بيحطوا القنابل فى صناديق القمامة بمحطات المترو , طبعا تصريحه كان لا علاقة له بالارهابيين الوحشين بل صرح بالغاء وجود صناديق القمامة بمحطات المترو و تخزينها و جعل المحطات بدون صناديق قمامة و تحويلها الى صناديق قمامة كبيرة كله برمى فيها , من الآخر خلاها مزبلة .

من اهم التصريحات التى صدرت من الدولة العبيطة , عند حدوث العمليات الارهابية فى سيناء و قتل المجندين , يقوم وزير الدفاع مطلع تصريح بمحاصرة الجامعات و القبض على الطلاب و اعتبار كلية الهندسة منشأة عسكرية , واحد هيسأل ايه علاقة دة بدة , هاقوله ما احنا لسه بنقول عمرنا ما هانفهم الدولة العبيطة 

اهم حاجة فى تصريحات الدولة العبيطة انها تصريحات مش مفهومة و اللى بيحصل فيها مش مفهوم برضه , مثلا القبض على اتنين بيتكلموا انجليزى دة طبعا ما حصلش الا فى الدولة العبيطة , حبس طلبة الجامعات من اهم انجازات الدولة العبيطة , سيبكم انتم رئيس الدولة العبيطة دة حكايته حكاية , الريس السيكى زعبوط كل تصريحاته بتثبت ان الدولة العبيطة فعلا عبيطة و الاسم على مسمى , يطلع مثلا فى خطاباته

الحب الحب

الشوق الشوق

و تلاقوا خازوق يطلع من فوق

طبعا من اهم تصريحاته اننا هانحفر محور قناة السويس على الناشف , طبعا دة كان تصريح لولبى عجيب 

و طبعا صرف ارباح شهادات استثمار محور القناة اللى لسه ماشتغلش من البنوك دة طبعا تصريح تانى من الدولة العبيطة 

و اساسى لازم نذكر الشقق اللى كانت لمحدودى الدخل و بعدها اخدتها شركة اماراتية بقت لمتوسطى الدخل ب 400 ألف جنيه , طبعا شعب الدولى العبيطة غنى جدا و سهل متوسط الدخل يدفع 400 ألف جنيه فى 5 سنين مش مشكلة يعنى , كان حل مشكلته من 5 سنين فاتوا بس مش مهم , 

طبعشقطنا تصريح خطير للريس السيكى رئيس الدولة العبيطة و معبوط النساء العبط فى الدولة العبيطة بيقول فيه انه مش هايسمح لحد يتدخل بينه و بين المصريين و يمكن واخدين بعض عن حب و عادى يعنى بس من حقنا نعرف مين الدكر و مين المسهوك قصدى النتاية علشان بوليس الآداب ع الباب 

هى دى الدولة العبيطة

القبض على اتنين بيتكلموا انجليزى فى مترو الانفاق

المترو زحمة موت
و عمال يجرى
و يعدى على المحطات
و كله لازق فى كله
رجالة و ستات
و السواق فى كابينة لوحده
و اللى على الباب مش نازل
و اللى بيشحت و اللى بيبيع
و اللى عايز يخربهل فبيبيع التلاتة بربع جنيه
و كله بيتكلم مع كله
و الصوت عالى
الصوت ايه
الصوت عالى
قوم ايه أخينا سمع اتنين بيتكلموا انجليزى و جابوا سيرة 25 يناير
قام رايح جرى عمل محضر و قال عليهم ارهابيين
فى وسط كل دة و اخينا فهم و تمعن و اكتشف اتنين ارهابيين
بيعملوا ايه
لأ ما فجروش حاجة
لأ ماكانوش بيتفقوا على مظاهرة
لأ مش معاهم سلاح
دول بيتكلموا انجليزى
يادى المصيبة يادى الداهية بيتكلموا انجليزى
بتقول ايه
بيتكلموا انجليزى
ايه يا ولاد
بيتكلموا انجليزى
و طبعا التطبيل هايشتغل على ودنه
من اول الراقصة الموقرة لاميس مسخرة
لحد الطبال الراقص بكرى راجع لورا

روبا بيكيا

مش هما اللى أكلوا الجبنة

طبعا كلنا عرفنا دلوقتى ايه كان الهدف من الاخوان
كان الهدف ان نظام مبارك يتبرأ من كل حاجة و ان الاخوان بسنة قعدوها فى الحكم يشيلوا الليلة كلها و فساد 30 سنة , و الناس تتشغل بيهم و ينسوا مبارك بكل اللى عمله , دة طبعا غباء من الاخوان و انتهازية استغلوها بس الكوميدى بقى الايام دى ان كل حاجة بيلبسوها فى الاخوان بطريقة كوميدية سخيفة ,
مثلا اللى فتح السجون , الاخوان
اللى قتل المتظاهرين الاخوان
اللى باع البلد الاخوان
طبعا الاخوان الوحشين عملوا كل حاجة وحشة فى ال 80 سنة اللى فاتت دة غير الاكتشافات الجديدة عن مسئوليتهم عن الطائرة اللى سقطت فى امريكا سنة 1999 و الخبر الأخير نقلا عن جريدة الوطن ان الاخوان احرقوا رابعة و قتلوا المعتصمين , يعنى حرقوا مكانهم و قتلوا نفسهم أخراااااااااابى على الهطل , بس احنا ما سكتناش 
و طبعا بعد البحث فى التاريخ اكتشفنا بلاوى سودة 

اولا ان الاخوان هما اللي قتلو البحر الميت و ذلك بعد الهجوم الارهابى العنيف فى موقعة بظرميط

اما بالنسبة للصين لقيناها عملت سور الصين العظيم عشان تحمي نفسها من هجمات الاخوان الارهابية

و صلاح الدين بنى القلعة لحماية القاهرة من حملات الاخوان الصليبية

و قطز هزم الاخوان فى موقعة عفركوش بعد تدميرهم لبغداد

و مسئولية الاخوان فى اشعال الحرب العالمية الاولى و التانية و التالتة و على السادة المقيمين خارجها مراعاة فروق التفجير

هذا و ايضا ان الاخوان كانوا السبب الرئيسى فى احتلال الهكسوس لمصر بخيانتهم للدولة الفرعونية

و ان طبعا رمسيس التانى عمل المسلات علشان يقعد عليها الاخوان

و الحكم اللي كان في ماتش مصر و الجزائر اللى كان السبب فى عدم وصول مصر لكاس العالم كان اخوان 

و طبعا فيه بقر بتصدق اى حاجة و رغم كراهيتى للاخوان بس مش الاخوان اللى أكلوا الجبنة يا بقر

روبا بيكيا   

احداث الأتحادية

عارفين احنا ممكن نلخص الثورة كلها من اولها لأخرها فى احداث الاتحادية و تغير المواقف بالنسبة لموقعة الاتحادية 

الأول بالنسبة لأحداث الأتحادية قام بيها الثوار و عملوا اعتصام عند قصر الأتحادية و الأخوان فضوا الأعتصام بتاعهم و مات فيها 10 من الثوار من ضمنهم طبعا الحسينى ابو ضيف و طبعا كلنا ما ننساش جبنة نستو يا معفنين و عزة الجرف اما قالت انها من شباك القصر شافت الثوار بيمارسوا افعال فاضحة فى الخيام و غيره و غيره 

طبعا ساعتها الفلول و اتباع مبارك كانوا عايشين فى رعب و مستخبيين تحت السرير و بيدعوا على اللى قاموا بالثورة و طبعا الاخوان ساعتها كانوا بيهجموا على الثوار اللى قالوا عليهم كفار و بيقولوا الله اكبر كأنهم بيحاربوا كفار قريش و و طبعا كالعادة الثوار صمدوا و كانت اشتباكات طول الليل 

دة ساعتها , دلوقتى بقى بالنسبة لأحداث الاتحادية المواقف كلها اتغيرت نشوف كدة 

الفلول بيقولوا على اللى ماتوا فى الاتحادية شهداء و انهم كانوا فى احداث الاتحادية حتى اسألوا السرير كان فيه حد تحته و لا لأ , الاخوان بيقولوا ان اللى ماتوا فى احداث الاتحادية 8 منهم من الاخوان مش عارف ازاى يعنى رغم ان الاخوان و الداخلية و الاخوان كانوا مسلحين هما اللى فضوا الاعتصام و قتلوا 10 من الثوار

دلوقتى بقت احداث الاتحادية قام بيها الفلول و مات فيها الاخوان و لا عزاء للثوار 

زى بالضبط ثورة 25 يناير قالوا الاخوان بيقولوا انهم قاموا بيها و الفلول بيقولوا عليها نكسة 

زى بالضبط 30 يونية الفلول بيقولوا قاموا بيها و الاخوان بيقولوا انقلاب 

نفس القصة بتتكرر لحد امتى مش عارف بس السؤال هو : الثوار بقى اللى عملوا كل دة هايفوقوا امتى و يعرفوا ان عدوهم عسكر فلول اخوان 

مين الركيب الجاي علي شعب فوتوشوب ؟

الفلول بيقولوا علي ثورة ٢٥ يناير نكسة و الإخوان إللي ما شاركوش فيها و ركبوا عليها بيقولوا عليها ثورتهم ، و الشعب ما كانش موجود .

بعدها الإخوان بيقولوا علي ٣٠ يونيو نكسة و الفلول إللي سنة حكم مرسي كانوا مستخبيين تحت السراير و الاشتباكات شغالة في الإتحادية و المقطم بيقولوا دلوقتي عليها ثورة قاموا بيها و الشعب إللي نزل كان فوتوشوب .

الأحلي من كل دة ان فضائيات الفلول بتتكلم علي أحداث الإتحادية و الجيش فصل بين المؤيدين و المعارضين . رغم ان الفلول ما كانوش في أحداث الإتحادية ، كانوا تحت السرير بيترعشوا ساعتها بس ما علينا

كله بينط و كله بيركب و الشعب فوتوشوب

كله بينط و كله بيركب و الثوار فوتوشوب

مخلوع و معزول و دلدول و مهبول و يا تري مين الركيب الجاي و الثورة الجاية إمتي و مين هايقوم بيها مع الشعب الفوتوشوب

روبا بيكيا